Annertuumik innarluutillit ikiorserneqartarnerat pillugu Namminersorlutik Oqartussat nalunaarutaat nr. 19, 16. decemberi 2010-meersoq

Annertuumik innarluutillit ikiorserneqartarnerat pillugu Inatsisartut peqqussutaanni nr. 7-imi 3. november 1994-imeersumi § 3 imm. 2, § 5, § 8a, § 11, imm. 4 § 12, imm. 4   § 15, § 18 imm. 3, § 20 imm. 2, § 21 imm. 2, § 22 imm. 2, § 25 imm. 3 aamma § 25a imm. 2  naapertorlugit, kingullermik allanngortinneqartoq Inuit annertuumik innarluutillit ikiorserneqartarnerat pillugu Inatsisartut peqqussutaata allanngortinneqarnera pillugu Inatsisartut peqqussutaanni nr. 10-imi, 31. maj 2010-imeersumi tunngavigalugit makku aalajangersarneqarput:

 

Kapitali 1
Atuuffii aamma nassuiaatit

§ 1.  Nalunaarutip matuma atuuffigai inuit annertuumik innarluutillit.  

§ 2.  Inuit annertuumik innarluutilittut paasineqartussat tassaapput timimikkut eqqarsartaatsimikkulluunniit ajorunnaarsinneqarsinnaanngitsumik nappaateqarnertik, ajoqusersimasuunertik imaluunniit amigaateqarnertik pissutigalugu, piginnaasamikkut annertuumik annikillisaaffigineqarsimasut. Piumasaqaataavoq piginnaasat annertuumik annikillisimanerisa pilersissimassagaat annertuumik annaasaqarneq imaluunniit inuup ulluinnarni nalinginnaasumik inuuneqarnissaminut aammalu inuup innuttaaqataasut allat assigalugit inuiaqatigiinni peqataanissaanut periarfissaasa killilerneqarsimanerat.  
Imm. 2.  Timikkut imaluunniit eqqarsartaatsikkut nappaateqarneq, ajoqusersimaneq amigaateqarnerluunniit ajorunnaarsinneqarsinnaassanngilaq, inuup inuunermi sinnera tamaat  timikkut imaluunniit eqqarsartaatsikkut, ajoqusernikkut amigaateqarnikkulluunniit nappaatini attatiinnassagaa ilimagineqartariaqarsimappat.

§ 3.  Piginnaasat annertuumik annikillineqarsimasutut paasineqassapput inuup ajorunnaarsinneqarsinnaanngitsumik timikkut imaluunniit eqqarsartaatsikkut nappaateqarnini, ajoqusersimani imaluunniit amigaateqarnini pissutigalugit: 
1)  nammineq pisariaqartitani isumagisinnaanngippagit, assersuutigalugit timikkut eqqiluisaarneq, atisalersorneq, nerineq assigisaallu, imaluunniit
2)  illup iluani silamilu nammineerluni angalasinnaanngippat, ilanngullugu niuertarfilerineq, allanut pulaarneq, nalinginnaasumik sukisaarsartunut peqataaneq assigisaalu ilanngullugit eqqarsaatigalugit, imaluunniit
3)  inunnut allanut attaveqarsinnaanngippat.
Imm. 2.  Annertuumik piginnaasat annikillisimanerat pilersimasinnaavoq inunnguuseralugit imaluunniit kingusinnerusukkut pilersunik timikkut ajorunnaarsinneqarsinnaanngitsunik nappaateqalerneq, ajoquserneq imaluunniit amigaateqarneq, assersuutigalugit tusilartuuneq tusaasinnaassutsilluunniit annikilleriarsimanera, nukitsigut noqartoortarneq pissutigalugu nukinnik aqutsisinnaannginneq allatulluunniit nukillaarnerit, noqartarneq, oqalunniarnikkut ajornartorsiuteqarneq, timip pisataanik amigaateqarneq, uummatikkut/taqqatigut/tartukkut/-tingukkullu ajoquteqarnerup kingunerisai, gigteqarneq kiisalu kromosomitigut ajoquteqarneq.
Imm. 3.  Piginnaasat annertuumik annikillinerat pilersimasinnaavoq inunnguuserisatut imaluunniit kingusinnerusukkut pilersumik ajorunnaarsinneqarsinnaanngitsumik tarnikkut nappaateqarnikkut, ajoqusernertigut imaluunniit amigaateqarnikkut assersuutigalugit nammineq silarsuaaqqamiittarneq, eqqarsartaatikkut ineriartoqqinnerup amigaataanera, eqqarsartaatikkut kinguarsimasuuneq, nappaatigalugu isummakkut avissimasutut ilineq.
Imm. 4.  Piginnaasat killeqarnerat napparsimagallarnermik pissuteqarpat nalunaarut manna malillugu ikiorsiisoqarsinnaanngilaq.

§ 4.  Napaatit, ajoqusernerit imaluunniit amigaatit, tamarmik immikkut annikinnerusumik piginnaasanik annikillisitsisuusinnaasut, tamarmik katillutik piginnaasatigut annertuumik annikillisitsisuusinnaapput, § 3, imm. 1-mi piumasarineqartut naammassineqarsimappata.
Imm. 2.  Piffissami aalajangersimasumi napparsimanerit, ajoqusersimanerit imaluunniit amigaateqarnerit,  piginnaasat annikillinerata tamakkiisumik missingersuusiorneqarneranut ilanngunneqassanngillat.

§ 5.  Kommunalbestyrelsi aalajangiisinnaavoq inuup peqqissutsimigut pissusaa annertuumik innarluutilittut paasinninnermut ilaatinneqassanersoq.
Imm. 2.  Annertuumik innaarluuteqarnermik taaguutip nalilersorneqarnerani tunngavissatut nakorsat suliamut tunngatillugu paasissutissiissutaat pigineqassapput.
Imm. 3.  Piginnaasat annertuumik annikillisimanerannut uppernarsaatit pigineqassapput aammalu pigineqassallutik timikkut tarnikkulluunniit nappaateqarnermik, ajoqusersimanermik amigaateqarnermilluunniit uppernarsaatit.

§ 6.  Piginnaasat annertuumik annikinnerulersimanerat illuatungilerniarlugu iluaqusersuutinik ikiorsiisoqarsinnaavoq. Ikiorsiiniutigineqarsinnaasut tassaapput assigiinngitsutigut siunnersuisarneq, ilitsersuisarneq, tapersersuisarneq, paaqqinnittarneq imaluunniit iluaqusersuutinik tunniussaqarneq.

 

Kapitali 2
Iluaqusersuutitigut Ikiorsiissutit

Ikiorsiissutit

§ 7.  Iluaqusersuutit annertuumik innarluutillip ulluinnarni inuuneranut oqilisaataasussat akuersissutigineqarsinnaapput.
Imm. 2.  Iluaqusersuutit ajornanngippat atukkiussatut tunniunneqartassapput.
Imm. 3.  Iluaqusersuutit pisiarineqarneranni ikiorsiissuutit taamaallaat tunniunneqassapput innarluuteqanngitsut namminneq illumilu atugassamittut pisiarisartagaannut sanilliullugit aningaasartuutit annertuumik amerlanerussuteqarpata. 
Imm. 4.  Iluaqusersuutinut inoqutigiinni nalinginnaasuni nalinginnaasumik atorneqartartunut akuersissuteqartoqarsinnaanngilaq.

§ 8.  Iluaqusersuutit timip pisataanut iloqissersimasunut amigaataasunulluunniit ornavaffiusut, qerattaqqusersuutaasut iluarsiissutaasulluunniit nalunaarut manna malillugu akuersissutigineqarsinnaanngillat.
Imm. 2.  Taamaallaat pissutsini immikkut illuinnartuni napparsimmavinni peqqinnissaqarfiulluunniit paaqqutarinniffiini uninngasunut timikkut iluaqusersuutinik akuersissuteqartoqarsinnaavoq.

§ 9.  Pisortat ilinniarfiini ilinniartitsinermi inuit annertuumik innarluutillit peqataanerannut iluaqusersuutinik nalinginnaasunik atugassanngortitsinernut nalunaarut manna tunngavigalugu akuersissuteqartoqarsinnaanngilaq.

§ 10.  Iluaqusersuutit siunnersuisup suliamik immikkut ilisimasaqartup sapinngisaq naapertorlugu siumoortumik inassuteqarneratigut akuersissutigineqartassapput.

§ 11.  Iluaqusersuutit §§ 7-10 malillugu atugassiissutigineqarsimasut iluarsartinnerannut aserfallatsaalineqarnerannullu akiliussisoqarsinnaavoq, iluaqusersuutit atorneqarsinnaanerisa iluarsaanissaq aserfallatsaaliinissarlu pisariaqartippassuk.
Imm. 2.  Kommunalbestyrelsip pissutsini ataasiakkaani tamani nalilersortassavaa iluaqusersuutit taarserneqarnissaat imminut akilersinnaanerunersoq.

Annertunerusumik aningaasartuutit

§ 12.  Inuk annertuumik innarluutilik innarluuteqarnerminik pissuteqartumik annertunerusumik aningaasartuuteqartarpat, annertunerusumik aningaasartuutaanerusunut  taakkununnga aningaasatigut ikiorsiisoqarsinnaavoq.
Imm. 2.  Annertunerusumik aningaasartuuteqarnerit pilersinnaapput assersuutigalugu makkunatigut:
1)  Angerlarsimaffimmut nutaanik pequtisinermi angerlarsimaffimmilu atortussanik allanik pisinermi, atortussaq aalajangersimasoq akisuujusartorlu pisariaqavissuusimappat
2)  Atisanik skuunillu pisinerni, innarluutigisap nassatarisaanik taakkua allanik sukkanerusumik aserfallatsinneqartarpata
3)  Nerisassanik immikkoorutilinnik pisinerni, tamanna innarluuteqarnerup pisariaqartippagu, assersuutigalugu sapigaqartuuneq
4)  Errorsinermi immikkut aningaasartuutinut
5)  Paaqqinninninermi aamma eqqiluisaarnermi atortunik pisinerni, soorlu nangernik ataasiaannarlugit atortakkanik, nangernik quiffiusinnaasunik il.il., peqqinnissaqarfiup tunniuttagarinngisaannik.
6)  Taxarnernut, najukkami angallassissutit atorsinnaasut allat pigineqanngippata.
Imm. 3.  Aningaasartuuteqarneruneq naatsorsorneqassaaq nalinginnaasumik aningaasartuutit innarluuteqarnerlu pissutigalugu immikkut aningaasartuuteqarnerit assigiinngissutaat sapinngisamik naapertorlugit. 

§ 13.  Aningaasartuuteqarnerunertut taamaallat oqaatigineqarsinaapput, aningaasartuutaanerusoq 500 kr.-nik annertuneruppat.
Imm. 2.  Aningaasartuutit arlallit, katillutik 500 kr.-nik annertunerusut, matussuserlugit aningaasaliiffigineqarsinnaapput.
Imm. 3.  Aningaasartuutit ingerlaavartut, ataatsimoorussamik qinnuteqaatigineqartut aningaasartamikkut 500 kr.-nit sinnerlugit amerlassuseqartut, matussuserneqarsinnaapput. Ukiumut aningaasartuutit 500 kr.-nit ataallugit annertussuseqartut  aningaasaliiffigineqarsinnaanngillat.

Siunnersortitut ikiortit

§ 14.  Inuk annertuumik innarluutilik pisariaqartitsinini naapertorlugu siunnersortitut ikiorteqarnissaminik pisinnaatitaaffeqarpoq.
Imm. 2.  Pisariaqartitsineq naapertorlugu siunnersorteqarnissaq paasineqassaaq inuup annertuumik innarluutillip immikkut ittumik siunnersorneqarnissaminik pisariaqartitsineratut imaluunniit ilitsersorneqarnissaminik, iluaqusersuutinut nalunaarummi maani pineqartunut sulisunik atorfeqartitanik suliaralugit naammassineqarsinnaanngitsunut tunngatillugu.

Inigisap aaqqissuunneqarnera

§ 15.  Inuup annertuumik innarluutillip inigisani immikkuullarissumik aaqqissuunneqarnissaa pisariaqartipagu, tamatumunnga ikiorsiissuteqartoqarsinnaavoq. Inigisap aaqqissuunneqarneranut ikiorsiisoqarsinnaavoq, inuk namminerisaminikk najugaqarpat, allat ilagalugit najugaqatigiiffimmi imaluunniit najugaqatigiiffimmi immikkut nakkutigisami, taamaaliornikkut inuk najugaqarfimmini imminut ikiorsinnaalersinnaappat.
Imm. 2.  Inini attartortittakkani nalinginnaasumik atortulersuutinut ikiorsiissuteqartoqarsinnanngilaq.

§ 16.  Inigisap  aaqqissuuneranut ikiuinermi ilaatigut pineqarpoq inigisamut isertarfimmut tunngasut, ilaatigut silataani isaarissap tungaanut aaqqissuussinerit assigisaallu. 
Imm. 2.  Ikiorsiissuteqarnermi inigisamut atatillugu quiliorneq assigisaanilluunniit sananeq aamma ilaatinneqarsinnaapput, annertuumik innarluutilik atortunut ikiorsiissutinut inissiivigisinnaasaminik peqarnissaminik immikkut ittumik pisariaqartitsippat, assersuutigalugu qamutit motoorillit.

§ 17.  Kommunalbestyrelsip nalilersussavai allanngortitassat suut pisariaqarluinnartuunersut, allanngortitsinermilu aningaasartuutit naatsorsuusiussallugit. Kommunalbestyrelsip pissarsiarissavai sanaartortitsinermi aamma ikuallattoornermi oqartussat allannguiniarnermut akuersissutaat, kiisalu aamma inissiamik piginnittup akuersissutaa.
Imm. 2.  Suliap suliarineqarnissaanut isumaqatigiissuteqarnerit kommunalbestyrelsip isumagissavai aammalu suliarineqarnerini nakkutiginnittuussalluni.

Qamutit motorimik ingerlatillit

§ 18.  Qamutit motoorillit, biilit ilanngunnagit, kommunalbestyrelsimit akuersissutigineqarsinnaapput annertuumik innarluutilik najugaqarfinni angallassissutinit tamanit ilaaffigineqarsinnaasunit tikinneqarsinnaanngitsuni, matumani aamma taxat eqqarsaatigalugit,  najugaqarluniluunniit ulluinnarni angalasarpat.  
Imm. 2.  Pissutsit immikkut illuinnartut atuutsillugit qamutinik motoorilinnik akuersissuteqartoqarsinnaavoq, biilit ilanngunnagit, naak imm. 1-imi piumasaqaatit naammassineqarsimanngikkaluarpataluunniit.

§ 19.  Qamutit motorimik ingerlatillit, kommunalbestyrelsimit akuersissutigineqarsimasut, kommunalbestyrelsimit sillimmaserneqassapput. Inuk annertuumik innarluutilik angallassissummik aalajangersimasumik atuisutut nalunaarsorneqassaaq.

§ 20.  Qamutit motoorimik ingerlatillit, matumani biilit ilanngullugit, allanngortiterne-qarnissaannut akuersissuteqartoqarsinnaavoq annertuumik innarluutillip qamutit motoorillit taakku allanngortiteqqaartinnagit atorsinnaanngippagit.

§ 21.  Qamutinut motoorilimik ingerlatilinnut, matumani biilit ilanngunnagit, ingerlatsinermut aningaasartuutinut, soorlu sillimmasiinermut, iluarsaassinermut aamma aserfallatsaaliinermut tamakkiisumik ilaannakortumilluunniit matusissutissanik tapiissuteqartoqarsinnaavoq.

§ 22.  Biilinut, innarluutilinnik atorneqarsinnaasunngortinneqarneranni ikiorsiiffigineqar-simasunut,  ingerlatsinermi aningaasartuutinut, soorlu sillimmasiinermut, iluarsaassinernut aamma aserfallatsaaliinernut aningaasartuutinut kommunalbestyrelsip tapiissuteqarnissaanut periarfissaqarpoq. 

Angallassinermut aaqqissuussinerit

§ 23.  Kommunalbestyrelsi inuit annertuumik innarluutillit angallanneqarnissaannut aaqqissuussinermik pilersitsisinnaavoq, tamanna kommuunimi immikkut illuinnartumik pisariaqartinneqarpat.
Imm. 2.  Angallassinermut aaqqissuussinermut taamaattumut kommunalbestyrelsi biilimik atugassiissinaavoq. Taamanna aaqqinneqarsinnaavoq peqqinnissaqarfiup namminersortu-milluunniit ingerlatsiviup suleqatiginerisigut.
Imm. 3.  Taassuma saniatigut kommunalbestytrelsi inuup annertuumik innarluutillip taxamik ingerlanneqartarnissaanut aningaasatigut ikiuisinnaavoq.

Inuit ikorfartortit

§ 24.  Inuk annertuumik innarluutilik nammineq inigisamini, aamma ataatsimoorsussamik inissiami imaluunniit nakkutigineqarluni inissiami, imminut ikiorsinnaajumalluni perorsaanermik sulialimmik ikorfartorteqarnissamik pisariaqartitsisoq, sapaatip akunneranut nal. akunnerini aalajangersimasuni ikorfartortilerneqarsinnaavoq.
Imm. 2.  Kommunimi inissiamik naleqquttumik allamik neqerooruteqartoqarsinnaanngippat, inuit annertuumik innarluutillit utoqqaat illuanni najugaqartut ikorfartorneqarnissamut tiiminik tunineqarsinnaapput.

§ 25.  Inuup ikorfartortaasup inuup annertuumik innarluutillip tarnikkut, timikkut aammalu isumaginninnikkut ineriartorteqqinnissaa suliassaraa.
Imm. 2.  Inuup ikorfartortaasup inuup annertuumik innarluutillip ulluinnarni suliassanik naammassisaqarsinnaalernissaa pimoorullugu ikorfartussavaa. 
Imm. 3.  Kommunalbestyrelsi annertuumik innarluutilik 18-it inorlugit ukioqarpat nammineersinnaatitaanngippalluunniit annertuumik innarluutilik, ikorfartortitut ikiorti, immaqa aamma sulianut ilisimasalik, angajoqqaatut oqartussaassusilik nakkutiginnittorluunniit peqatigalugit ikorfartortip sulinermini atugassaanik iliuusissanut pilersaarusiussaaq. Iliuusissatut pilersaarusiaq minnerpaamik ukiup affakkaartumik pisariaqartitsineq naapertorlugu nalilersorneqarlunilu aaqqiissuteqarfigineqartassaaq.

§ 26.  Inuk ikorfartortaasoq kommunalbestyrelsimit atorfinitsinneqassaaq, taanna inummut ikorfartortimut sulisitsisutut inissisimasuummat.
Imm. 2.  Kommunalbestyrelsip sapinngisamik inuit perorsaasutut ilinniarsimasut ikorfartortitut atorfinitsittassavai. Tamanna periarfissaqanngippat, komunalbestyrelsip inuit suliamik ingerlatsinissaminnut tunngavissalittut nalilerneqartut atorfinitsittassavai.
Imm. 3.  Inuit ikorfartortit aningaasarsiaqartinneqassapput Kalaallit Nunaanni Namminersorlutik Oqartussat aammalu suliassaqarfiup iluani kattuffiup isumaqatigiissuteqarsinnaatitaaffeqartup, inuup ikorfartortip inissisimaffianiittup, akornanni isumaqatigiissutit naapertorlugit. 

§ 27.  Inunnut annertuumik innarluutilinnut ataasiakkaanut tamanut  nal. akunneri ikorfartorneqarfiusussat amerlassusaat kommunalbestyrelsimit akuersissutigineqartassapput.
Imm. 2.  Nal. akunneri ikorfartorneqarfiusussat nalinginnaasumik qaammatini arfinilinni atuuttussatut tunniunneqartarput.

Nammineq angerlarsimaffimmi paaqqutarineqarneq

§ 28.  Inuk annertuumik innarluutilik nammineq angerlarsimaffimmini najugaqarpat ulluinnarni paaqqutarineqarneranik isumaginnittoq aningaasarsiaqartinneqarsinnaavoq. Taamaattorli piumasarineqarpoq pineqartup taamaaliornermigut nalinginnaasumik isertitaqarnissani tamakkiisumik ilaannakortumilluunniit annaasimassagaa.
Imm. 2.  Nammineq meerarisamik paarsinermut taamaallaat aningaasarsiaqartitsisoqarsinnaavoq ulluunerani paaqqinniffimmi paarsineq periarfissatut naleqquttuunngippat.
Imm. 3.  Nal. akunneri qassit aningaasarsiaqarfiussanersut kommunalbestyrelsip naliliiffigisassavaa.
Imm. 4.  Aningaasartuutit SIK-p isumaqatigiissutai malillugit suliamik ilinniagaqanngitsup nal. akunnermusiaatut minnerpaatut amerlassuseqassapput.

Oqilisaassineq

§ 29.  Inuk annertuumik innarluutilik nammineq angerlarsimaffimmini najugaqarpat, paaqqutarineqarneralu ilaqutariinnut annertuumik suliassaqartitsineruppat tamatuma oqilisaassivigineqarnissaa kommunalbestyrelsip akuersissutigisinnaavaa.
Imm. 2.  Aatsaat oqilisaassinissaq akuersissutigineqarsinnaavoq tamanna ilaqutariit annertuumik innarluutilimmik siunissami paaqqutarinnissinnaaginnarnissaannut tunngaviuppat.
Imm. 3.  Aammattaaq oqilisaassinermut akuersissuteqartoqarsinnaavoq annertuumik innarluutilik angerlarsimaffimmi avataani najugaqarallarnissamik pisariaqartitsippat.

§ 30.  Oqilisaassineq ilaqutariinni allani, ulloq unnuarlu paaqqinniffimmi allamiluunniit taamaaliornissamut naleqquttumi najugaqarallarnikkut pisinnaavoq.

§ 31.  Najugaqarnermi atugassarititaasut pillugit kommunalbestyrelsit oqilisaassiviusorlu allaganngorlugu isumaqatigiissuteqassapput.
Imm. 2.  Ilaqutariinnut oqilisaassisunut imaluunniit ulloq unnuarlu paaqqinnittarfimmut namminersortumik ingerlanneqartumut aningaasarsiaqartitsisoqarnissaa kommunalbestyrelsip akuersissutigisinnaavaa. Oqilisaassiffiusup nalaani aningaasarsiat inuup pilersorneqarneranut aningaasartuutinut ilaanngillat.
Imm. 3.  Pilersorneqarnermut aningaasartuutit pineqartumut pilersuisussaatitaasumit pilersuisussaatitaasunilluunniit akilerneqartassapput.
Imm. 4.  Inuk annertuumik innarluutilik aamma/imaluunniit angajoqqaatut oqartussaanermik pigisaqartoq imaluunniit angajoqqaatut oqartussaagallartoq, inuk annertuumik innarluutilik 18-it ataallugit ukioqarsimappat imaluunniit nammineersinnaassuseqanngippat, aamma ilaqutariit oqilisaassinermi najugaqarfiit imaluunniit ulloq unnuarlu paaqqinnittarfik namminersorluni ingerlanneqartoq, pineqartup kommunimi najugaqarfiani kommunal-bestyrelsi suleqatigalugu, akunnerminni isumaqatigiissutigissavaat pilersorneqarneranut qanoq iliornikkut akiliisoqartassanersoq.
Imm. 5.  Pisortanit pigineqartoq ulloq unnuarlu paaqqinnittarfik oqilisaasuuppat taamaallaat pilersuinermut akiliisoqassaaq, takuuk imm. 3.

§ 32.  Akiliutit annertussusiat imatut aalajangerneqarput:
1)  Pilersuineq                                                                                                             kr.      49,84 ulloq unnuarlu
2)  Ilaqutariinnut oqilisaassinermi najugaqarfinnut akiliut                                                kr.     284,00 ulloq unnuarlu
3)  Ulloq unnuarlu paaqqinnittarfinnut namminersortumik ingerlanneqartunut akiliut         kr. 3.000,00 ulloq unnuarlu
Imm. 2.  Imm. 1-mi akigititatut oqaatigineqartut atuutilerput 1. Januar 2011-mi. Akigititat aaqqiissuteqarfigineqartassapput Kalaallit Nunaanni Naatsorsueqqissaartarfiup pisisartut aningaasartuutaannut tunngaviusutut pisortatigoortumik nalunaarutaat tunngavigalugit. Atuisunut akigititanut naleqqersuutip pointinik pingasunik allanngorneratigut 3 %-imik iluarsineqartassaaq. Iluarsiineq januarip aallaqqaataani siullermi tulliuttumiit atuutilertassaaq, julip aallaqqaataani atuisunut akigititanut naleqqersuut tunngavigalugu.
Imm. 3.  Aningaasat iluarsineqarsimasut ukiut tamaasa januarip aallaqqaataani Naalakkersuisunit tamanut saqqummiunneqartassapput.

Pikkorissartitsisarnerit

§ 33.  Annertuumik innarluutilinnut, ilaqutaasunut, ikorfartortitut  ikiortinut allanullu pikkorissarnernut peqataanissanut ikiorsiisoqarsinnaavoq, kommunalbestyrelsi isumaqarpat pikkorissartitsinermi peqataaneq annertuumik innarluutillip ulluinnarni inuuneranut pitsanngoriaataasinnaasoq.

§ 34.  Pikkorissartitsinermut atatillugu ikiorsiissutinut pikkorissartitsinermut akiliutit, angalanermut pikkorissarnerullu nalaani najukkamut aningaasartuutit kiisalu sulinikkut isertitassaraluanut annaasanut tamakkiisumik ilaannakortumilluunniit taarsiissutit ilaatinneqarsinnaallutik.
Imm. 2.  Sulinikkut isertitassaraluit annaasat uppernarsaatissaqartinneqassapput.
Imm. 3.  Sulinikkut isertitassaraluit annaasat annerpaafigissavaat PIP-mut isumaqatigiissutit malillugit ilinniarsimasutut atorfinitsititap aningaasarsiaasa minnerpaaffiat.

Ilinniagaqarnissamut aamma sulinermut iliuusissatut pilersaarusiaq

§ 35.  Inuup annertuumik innarluutillip meeqqat atuarfianni atuarnini naammassigaangagu ilinniarnerup ingerlaqqinnissaanut aamma/imaluunniit sulinerup ingerlanneqarnissaanut, inuk annertuumik innarluuteqartoq aamma/imaluunniit angajoqqaatut oqartussaanermik pigisa-qartoq imaluunniit angajoqqaatut oqartussaagallartoq, inuk annertuumik innarluutilik 18-it ataallugit ukioqarsimappat imaluunniit nammineersinnaassuseqanngippat, suleqatigalugit kommunalbestyrelsip suliarissava ilinniagaqarnissamut aamma/imaluunniit suliamik ingerlataqarnissamut iliuusissatut pilersaarusiaq.
Imm. 2.  Kommunalbestyrelsip iliuusissatut pilersaarusiaq suliaralugu aallartissavaa atuarnerup naammassinissaa kingusinnerpaamik qaammatinik sisamanik sioqqullugu.
Imm. 3.  Iliuusissatut pilersaarusiaq naammasseriigaq pigineqassaaq atuarnerup naammassineqarnerani ullormi atuarfiusumi kingullerpaami.

Suliassaqartitsineq

§ 36.  Inummut annertuumik innarluutilimmut, ilinniagaqarnissamik imaluunniit suliffissaqartitsinerup iluani sulinissamik neqeroorfigineqarsinnaanngitsumut, suliassamik tassunga naleqquttumik neqerooruteqarnissaq kommunalbestyrelsip isumagisinnaasariaqarpaa.
Imm. 2.  Inuk annertuumik innarluutilik ulloq unnuarlu paaqqinnittarfimmi najugaqartuuppat naleqquttumik sammisassaqarnissaanut neqeroorutissaqarnissaq Naalakkersuisut sapinngisamik isumagissavaat.

§ 37.  Sammisaqartitsineq ulluunerani sammisassaqartitsivinni, nakkutigineqarluni sullivinni imaluunniit nakkutigineqarluni suliffinni ingerlanneqartassaaq.

§ 38.  Inunnut annertuumik innarluutilinnut ulluunerani sammisassaqartitsivinnik, aamma nakkutigineqartumik sullivinnik kommunalbestyrelsi pilersitsisinnaavoq.
Imm. 2.  Nakkutigineqarluni sullivinnik, ulloq unnuarlu paaqqinnittarfinnut atasunik, Naalakkersuisut pilersitsisinnaapput.
Imm. 3.  Ulluunerani sammisassaqartitsiviit, nakkutigineqarlunilu sulliviit sammisassanik ineriartuutaasunik katsorsaataasunillu neqerooruteqartassapput.
Imm. 4.  Nakkutigineqarluni sulliviit aaqqissuunneqarsimassapput inuit annertuumik innarluutillit maskiinanik akuutissanillu navianarsinnaasunik imaluunniit allanik ajoqusiisinnaasunik atuinissaminnut periarfissaqarfiginngisaannik.
Imm. 5.  Annertuumik innarluutilinnut nakkutigineqarluni sullivinni sammisaqartunut imaluunniit nakkutigineqarluni suliffimmi sulisunut sammissaqartitsinermut aningaasarsianik aningaasarsisitsisoqarsinnaavoq.              
Imm. 6.  Aningaasarsiat annertussusissaat aalajangerneqarpoq nal. akunneranut 15 kr.-ssasoq.

Najugaqatigiiffik

§ 39.  Inuit annertuumik innarluutillit 18-it sinnerlugit ukiullit, ulluinnarni ikorfartorneqar-nissaminnik pisariaqartitsisut, kisiannili imminnut ima ikiorsinnaatigisut perorsaanikkut  ulluinnarnilu suliassatigut ikiorneqarnissaminnik pisariaqartitsinerat killeqarluni, piginnaasamilli annertuumik annikillisimanerat pissutigalugu imminerisaminnik najugaqarsinnaanngitsut, najugaqatigiiffinni inissaannik neqeroorfigineqassapput.   
Imm. 2.  Najugaqatigiiffimmi inigisaq sapinngisamik pineqartup kommunimi najugaqarfianiittoq neqeroorutigineqassaaq, sapinngisamik pineqartup angerlarsimaffianut qaninnerpaami.

§ 40.  Taakkunannga pisariaqartitsineq naapertorlugu kommunalbestyrelsi najugaqatigiiffinnik pilersitsissaaq.
Imm. 2.  Naalakkersuisut kommunalbestyrelsi najugaqatigiiffilioqqullugu peqqusinnaavaa, maakku tunngavigalugit:  
1)  kommuni inunnut annertuumik innarluutilinnut18-it sinnerlugit ukiulinnut marlunnut imaluunniit amerlanerusunut kommunitut najugaqarfiuppat,
2)  pineqartut ulluunerani namminneq najugarisaminni imminnut ikiorsinnaanngippata aamma
3)  pineqartut imminnut ikioqatigiillutik ingerlatsisinnaappata.

§ 41.  Najugaqatigiiffik najugaqartut namminerisamik angerlarsimaffiattut isigineqassaaq. Najugaqatigiiffik imatut aaqqissuussaassaaq ineqartut tamarmik immikkut ineeraqassallutik, sapinngisamik namminneq perusuersartarfeqarlutillu uffarfeqarlutik.
Imm. 2.  Ineqartut ataatsimoorussamik isersimaartarfeqarlutillu igaffeqassapput.

Nakkutigineqarluni najugaqarfik

§ 42.  Inunnut 18-inik ukioqalereersimasunut annertuumik innarluutilinnut paaqqutarineqarnissamik ikorfartorneqarnissamillu najugaqatigiiffinni neqeroorutigineqarsinnaasut saniatigut annertunerusumik pisariaqartitsisunut aammalu ulloq unnuarlu ikorfartorneqarnissamik pisariaqartitsisutut naliliiffigisanut, nakkutigineqarluni najugaqarfimmi inissamik neqerooruteqartoqartassaaq.
Imm. 2.  Nakkutigineqarluni najugaqarfimmi inigisaq sapinngisamik pineqartup kommu-nimi najugaqarfianiittoq neqeroorutigineqassaaq, sapinngisamik pineqartup angerlarsimaf-fianut qaninnerpaami.

§ 43.  Taakkunannga pisariaqartitsineq naapertorlugu kommunalbestyrelsi nakkutigineqarluni najugaqarfinnik pilersitsissaaq.
Imm. 2.  Naalakkersuisut kommunalbestyrelsi nakkutigineqarluni najugaqarfilioqqullugu peqqusinnaavaa,  kommuni inunnut annertuumik innarluutilinnut18-it sinnerlugit ukiulinnut marlunnut imaluunniit amerlanerusunut, § 42 malillugu nakkutigineqarluni najugaqarfimmi inissaannik neqeroorfigineqartussanut, kommunitut najugaqarfiuppat.

§ 44.  Nakkutigineqarluni najugaqarfik najugaqartut namminerisamik angerlarsimaffiattut isigineqassaaq. Najugaqarfik imatut  aaqqissuussaassaaq ineqartut tamarmik immikkut ineeraqassallutik, sapinngisamik namminneq perusuersartarfeqarlutillu uffarfeqarlutik.
Imm. 2.  Ineqartut ataatsimoorussamik isersimaartarfeqarlutillu igaffeqassapput.
Imm. 3.  Ineqarfik aaqqissuussaassaaq paarsisunut sulisunut ineeralerlugu.

Inunnut annertuumik innarluutilinnut ulloq unnuarlu paaqqinnittarfiit

§ 45.  Inuit annertuumik innarluutillit, nakkutigineqarluni najugaqarfinni paaqqutarineqarnissamik ikorfartorneqarnissamillu neqeroorutinit annertunerusumik pisariaqartitsisut, ulloq unnuarlu paaqqinnittarfimmi najugaqarnissaminnik neqeroorfigineqassapput.
Imm. 2.  Inuit annertuumik innarluutillit ulloq unnuarlu paaqqinnittarfimmi najugaqarnerminni inuit annertuumik innarluutillit ataasiakkaat ikorfartorneqarnissaminnik paaqqutarineqarnissaminnillu pisariaqartitaat naammassineqartassapput. 

§ 46.  Inunnut annertuumik innarluutilinnut ulloq unnuarlu paaqqinnittarfinni inissat pisariaqartinneqartut pigineqarnersut Naalakkersuisut nakkutigissavaat.
Imm. 2.  Inunnut annertuumik innarluutilinnut ulloq unnuarlu paaqqinnittarfiit pilersinneqarnerini Naalakkersuisut ataqatigiissitsisuullutillu ingerlatsisuussapput.

§ 47.  Inunnut annertuumik innarluutilinnut  ulloq unnuarlu paaqqinnittarfiit aaqqissugaanissaannut tunngatillugu aalajangersakkat atuuttut innersuussutigineqarput.

Kalaallit Nunaata avataani najugaqarneq

§ 48.  Kalaallit Nunaanni najugaqarnissamut tunngatillugu periarfissat nungussimappata, Naalakkersuisut akuersissuteqarnerisigut Kalaallit Nunaata avataanut inissiisoqarsinnaavoq. 
Imm. 2.  Akuersissuteqarneq pissaaq kommunalbestyrelsip inassuteqarnera tunngavigalugu.

§ 49.  Kalaallit Nunaata avataani inissiinerup ingerlatiinnarneqarnissaanut apeqqut kommunalbestyrelsimit nalilersorneqartassaaq, pissutsit pisariaqartitsinerat malillugu akulikissusilimmik, kisiannili inissiinerup aallartinneraniit minnerpaamik qaammatit aqqaneq marluk qanngiunneranni, ingerlanneqartassallunilu inissiinerup attanneqarnerani.  Tamatuma kingorna kommunalbestyrelsip minnerpaamik ukiumut ataasiarluni pineqartup Kalaallit Nunaannut uternissaanut periarfissat misissortassavai.
Imm. 2.  Kalaallit Nunaanni inissiinissamut naleqquttumik periarfissaqartinnagu angerlartitsinissaq periarfissaqanngilaq.
Imm. 3.  Angerlartitsinissaq sioqqullugu angerlartitsinissarlu minnerpaamik sap. akunnerinik 16-nik sioqqullugu iliuusissatut pilersaarusiaq piareersimassaaq. Iliuusissatut pilersaarusiaq angerlartitsinnginnermi Naalakkersuisunut oqaaseqarfigisassatut saqqummiunneqassaaq.

 
Tikeraarnermut atatillugu angalanerit pisunullu immikkut ittunut il.il. atatillugu angalanerit

§ 50.  Inuk annertuumik innarluutilik innarluuteqarnini pissutigalugu nunagisami avataani najugaqartoq ukiumut ataasiarluni nunagisaminut feriarnissaminut ikiorserneqarsinnaavoq. Piumasaqaataavoq, pineqartoq nunagisamini naleqquttumik najugaqarfigisinnaasaminik neqeroorfigineqarsinnaannginnini pissutigalugu, nunagisami avataani najugaqartuussasoq aamma najugaqarneq pillugu kommunalbestyrelsi imaluunniit Naalakkersuisut aalajangiisuusimassasut.
Imm. 2.  Ikiorsiissutit angalanermut najugaqarnermilu aningaasartuutinut tamakkiisumik ilaannakortumilluunniit matusissutissatut ikiorsiissutigineqassapput.

§ 51.  Aammattaaq ikiorsiissutinut pisariaqartinneqartumik angallassisut angalanerinut najugaqarnerinullu aningaasartuutit ilaatinneqarsinnaapput. Angallassisut, innarluutilimmut ilaqutaanngitsut, ullormusiaat, angallassinermi aningaasarsiaat sulinermilu annaasarisinnaasanut taarsiissutit ikiorsiissutinik aamma akilerneqassapput.
Imm. 2.  Innuk annertuumik innarluutilik Kalaallit Nunaata avataani najugaqarfigisamini sulisumit angallanneqarpat, sulisumik taarteqartitsinermi aningaasartuutit matussuserneqarsinnaapput.
Imm. 3.  Inuup annertuumik innarluutillip angalanissamini kina angalaqatigissanerlugu sapinngisamik nammineerluni aalajangissavaa. Pineqartoq nammineerluni taamatuminnga aalajangiisinnaanngippat, kommunalbestyrelsi aalajangiissaaq. Tamanna ingerlanneqassaaq innarluutilik nammineq, angajoqqaatut oqartussaassuseqartoq innarluutilimmulluunniit angajoqqaatut oqartussaassuseqarallartoq, inuk annertuumik innarluutilik nammineer-sinnaajunnaarsitaasimappat, kiisalu pisariaqassappat paaqqinniffimmi sulisut suleqatigalugit.

§ 52.  Angalanissaq inuit annertuumik innarluutillit sapinngisamik nammineerlutik aaqqissuuttassavaat,  matumani ilanngullugu aalajangertassallugu angalaneq ukiup qanoq ilinerani pissanersoq. Ilaqutariinni pisut immikkut ittut/nalliuttorsiornerit annertuumik innarluutillip peqataaffigissallugit kissaatigisai ataqqineqassapput.
Imm. 2.  Inuup innarluutillip angalanissani namminnerluni aaqqissuussinnaanngippagu, piffissat angalaffiusussat, innarluutilik nammineq, angajoqqaatut oqartussaassuseqartoq innarluutilimmulluunniit angajoqqaatut oqartussaassuseqarallartoq, paaqqinnittarfimmi sulisut aammalu annertuumik innarluutillip qanigisani tikeraagassai suleqatigalugit,  kommunalbestyrelsip aalajangertassavai.

§ 53.  Inuk annertuumik innarluutilik tikeraarluni angalanerminut atatillugu immikkut ikorfartorneqarnissaminik pisariaqartitsippat, matumani oqalutseqartitsineq ilanngullugu, qinnuteqaateqareernikkut kommunimi najugarisami kommunalbestyrelsi tamatumunnga ikiorsiissuteqarsinnaavoq.
Imm. 2.  Inuit annertuumik innarluutillit Danmarkimiittut eqqarsaatigalugit inuk pineqartoq nammineq paaqqinnittarfimmiluunniit najugarisami sulisut tassaapput immikkut ikorfartuutissat pillugit qinnuteqaateqartussat. Qinnuteqaat taanna Kalaallit Nunaanni kommunimut najugaqarfimmut nassiunneqassaaq.

§ 54.  Inuup annertuumik innarluutillip § 50  tunngavigalugu tikeraarsinnaatitaanini atorsinnaanngippagu tassunga taarsiullugu pineqartup qanigisatut ilaqutaa annertuumik innarluutilimmut pineqartumut tikeraarluni angalanerminut atatillugu aningaasar-tuutinut ikiorsiiffigineqarsinnaavoq
Imm. 2.  Inuup annertuumik innarluutillip nammineersinnaassuseqartup qanigisamisut ilaquttani kina tikeraartissatut kissaatiginerlugu sapinngisamik nammineerluni aalajangissavaa.
Imm. 3.  Inuk pineqartoq 18-it inorlugit ukioqarpat angajoqqaatut oqartussaassuseqartoq aalajangiissaaq. Inuk pineqartoq nammineersinnaassusiiagaasimappat angajoqqaatut oqartussaassuseqarallartoq kommunalbestyrelsi suleqatigalugu aalajangiissaaq. Inuk annertuumik innarluutilik aalajangiinermi sapinngisamik annertunerpaamik nammineerluni peqataatinneqassaaq.

§ 55.  Inuit annertuumik innarluutillit 18-it inorlugit ukiullit angajoqqaatut oqartussaassuseqartumut attaveqarnerisa ingerlaavartuunissaa siunertaralugu pisariaqarfiisigut ukiumoortumik suli ataasiarlutik tikeraarsinnaanissaat akuerineqarsinnaavoq. Taamaattorli angalaneq meeqqap katsorsarneqarneranut akornutaassanngilaq.
Imm. 2.  Inuup annertuumik innarluutillip 18-it inorlugit ukiullip nammineerluni tamanna kissaatigippagu, angajoqqaatut oqartussaassuseqartumut pinnani qanigisatulli ilaquttamut allamut tikeraarnissaa akuersissutigineqarsinnaavoq. Taamaattorli piumasarineqarpoq angajoqqaatut oqartussaassutsimik tigummisaqartup tamatumunnga isumaqataanissaa.
Imm. 3.  Inuup annertuumik innarluutillip tamanna nammineerluni kissaatigippagu annertuumik innarluutillip tikeraarnissaanut taarsiullugu angajoqqaatut oqartussaassuseqartoq qanigisatulluunniit ilaqutaasoq alla annertuumik innarluutilimmut tikeraassasoq akuersissu-tigineqarsinnaavoq. Taamaattorli piumasarineqarpoq angajoqqaatut oqartussaassutsimik tigummisaqartup tamatumunnga isumaqataanissaa.

§ 56.  Inuk annertuumik innarluutilik 18-it inorlugit ukiulik paaqqinnittarfimmut allamut nuuppat pineqartup angalanermut periarfissaata aappaa angajoqqaatut oqartussaassuseqartup paaqqinniffimmut nutaamut tassunga tikeraarnissaanut nuunneqarsinnaavoq.

§ 57.  Angerlarsimaffigisatut najukkamut tikinniarnerup ajornakusoortuunera, ikiorsiinissamut atortorissaaruteqarnissamulluunniit periarfissat amigaatigineqarnerat pissutigalugit inuit annertuumik innarluutillit ilaquttaminnut qaniginerpaasaminnut tikeraarsinnaanngippata, taarsiullugu angerlarsimaffigisatut najugarisap qanittuaniittumut illoqarfimmut pineqartup, angallassisut qanigisatullu ilaqutaanit ataatsip angalanissaat akuersissutigineqarsinnaavoq.
Imm. 2.  Angalanermut ineqarnermullu aningaasartuutit tamakkiisumik ilaannakortumilluunniit ikiorsiissutigineqassapput. Aammattaaq angallassisut ilaqutaanngitsut eqqarsaatigalugit taakku ullormusiaat kiisalu angallassinermut aningaasarsiaqarsimappata aningaasarsiaat aamma sulinikkut isertitassaraluamikkut annaasaat ikiorsiissutitigut matussuserneqassapput.

§ 58.  Pissutsit immikkut ittut atuutsillugit annertuumik innarluutillit § 50-mi pineqartunut ilaatinneqartut assersuutigalugu qanigisatut ilaquttap napparsimarulunneranut, toquneranut ilisaaneranulluunniit atatillugu Kalaallit Nunaanni imaluunniit Kalaallit Nunaannut angalanissamut ikiorserneqarsinnaapput.
Imm. 2.  Pissutsit immikkut illuinnartut atuutsillugit annertuumik innarluutillip § 50-imi pineqartunut ilaatinneqartup, qaniginerpaasaata angalanissaannut ikiorsiisoqarnissaa akuersissutigineqarsinnaavoq, assersuutigalugu innarluutillip pingaarutilimmik ullorsiorneranut imaluunniit napparsimarulunneranut atatillugu.
Imm. 3.  Inuit § 50-mi pineqartunut ilaatinneqartut nunagisami avataaniitillutik toquppata illerfiisa angallanneqarnerinut aningaasartuutit tamakkiisumik ilaannakortumilluunniit matussutissaqartinneqarnissaat akuersissutigineqarsinnaavoq.

§ 59.   Inuk annertuumik innarluutilik Kalaallit Nunaanni najugaqartoq aamma § 50-mi § 55-milu pineqartunut ilaatinneqanngitsoq nammineq akilikkaminik namminerlu suliniuteqarnermigut feriarpat, angallassisoqartinnani feriarsinnaanani, angallanneqarnissaanut ikiorsii-ssuteqartoqarnissaa akuersissutigineqarsinnaavoq.
Imm. 2.  Angallassisoqarnermut aningaasartuutit makku tamakkiisumik ilaannakortumilluunniit akilerneqarnissaat akuersissutigineqarsinnaaput:
1)  Angalanermut- najugaqarnermut aningaasartuutit
2)  Ullormusiat
3)  Angalaqataasumut aningaasarsiat
4)  Sulinikkut isertitassaraluanik annaasaqaatit.
Imm. 3.  Inuit annertuumik innarluutillit 18-inik taakkulunniit sinnerlugit ukioqartut aalajangersagaq manna tunngavigalugu taamaallaat ukiut pingasukkaarlugit ikiorserneqarsinnaapput.
Imm. 4.  Inuit annertuumik innarluutillit 18-it inorlugit ukioqartut aalajangersagaq manna tunngavigalugu ukiut tamaasa ikiorserneqarsinnaapput.

§ 60.  § 50, § 55, § 57 § 59-ilu tunngavigalugit tikeraarnermut feeriarluni angalanernut ikiorsiissuteqarneq sivisunerpaamik ullunik unnuanillu qulingiluanik sivisussuseqartunut akuersissuteqartoqarsinnaavoq, piffissaq tikeraarnerup angalanerulluunniit ulluisa amerlassusii apeqqutaatinnagit. Feriarluni ulloq aallarfiusoq, kiisalu naggataa naatsorsuinermut ilanngunneqassanngillat.

 

Kapitali 3
Aqutsineq

§ 61.  Kommunalbestyrelsip inuit annertuumik innarluutilillit siunnersorneqarneranni, ilitsersorneqarneranni ikorfartorneqarnerannilu tapersersuisassaaq kiisalu ikiorsiissutissat suut neqeroorutigineqarsinnaanerinik paasisitsiniaanerni ikiuisassalluni.
Imm. 2.  Kommunalbestyrelsip nalilersussavaa atortutigut ikiorsiissutit suut aallartinneqarta-riaqarnersut, inuit annertuumik innarluutillit sapinngisamik nalinginnaasumik inuuneqarneq qaninnerpaajullugu inuusinnaaqqullugit.
Imm. 3.  Kommunalbestyrelsi inunnut annertuumik innarluutilinnut taamaallaat ikiorsiissuteqarsinnaavoq, inatsit alla tunngavigalugu ikiuisinnaanermut periarfissaqanngippat.

§ 62.  Atortutigut ikiorsiissutit toqqarneqartassapput inuk annertuumik innarluutilik ikiorsiissutinik tigusaqartussaq suleqatigalugu.
Imm. 2.  Suliamik ingerlatsisup suliassaraa inuup annertuumik innarluutillip imaluunniit angajoqqaatut oqartussaassusillip imaluunniit angajoqqaatut oqartussaassuseqarallartup, inuk innarluutilik 18-it inorlugit ukioqarsimappat nammineersinnaajunnaarsinneqarsimappat, ilisimatinnissaat ikiorsiissuteqarnerup suna kingunerineraa aammalu toqqagassat suut piunersut, taamaalilluni pineqartup ikiorsiissutissat toqqarneqartut ilisimaniassammagit.

§ 63.  Inummut annertuumik innarluutilimmut ikiorsiissuteqarnissamik kommunalbestyrelsimut qinnuteqaatit tamarmik paasisisutissanik pineqartup aqqanik, najugaanik aamma cpr. nr.-anik imaqassapput.
Imm. 2.  Ersarissumik nalunaarutigineqassaaq ikiuinissaq qanoq ittoq qinnuteqaatigineqarnersoq. Ikiorsiinissaq katsorsartinnerup ingerlaneranut ilaappat, taava iliuusissatut pilersaarusiaq suliarineqarsimasoq ilanngunneqassaaq.
Imm. 3.  Qinnuteqaat aamma inuup innarluutaanut, piginnaassuseqarneranut, ilinniagaqarsimaneranut, inuussutissarsiutaanut kiisalu inuttut isumaginninnikkut atugaanut tunngasunik paasissutissanik imaqassaaq.

 

Kapitali 4
Kisitsisinngorlugit paasissutissat

§ 64.  Kisitsisinngorlugit paasissutissanik il.il. paasissutissiineq kommunalbestyrelsip suliarissavaa.
Imm. 2.  Kisitsisinngorlugit paasissutissat imaqarput qanoq ukioqarnermik, arnaanermik angutaanermilluunniit, sumi najugaqarnermik, qanga ilanngunneqarsimanermik, ikiorsiissu-tinik atuilernermik, qanga akuersissuteqarsimanermik aamma akuersissutip atuuffiata sivisussusianik.
Imm. 3.  Kisitsisitigut paasissutissat ataavartumik malinnaasinneqassapput Naalakkersuisunullu nassiunneqartassallutik ukiut tamaasa kingusinnerpaamik 1. marts.
Imm. 4.  Naalakkersuisut imm. 3-mi kisitsisitigut paasissutissat nassiunneqartartut saniatigut sukkulluunniit kommunalbestyrelsi qinnuvigisinnaavaa kisitsisitigut paasissutissanik nassiusseqqullugu, tak. imm. 2.
Imm. 5.  Naalakkersuisut imm. 2-mi taaneqartut saniatigut sukkulluunniit qinnutigisinnaavai kisitsisitigut paasissutissat allat.

 

Kapitali 5
Maalaaruteqarsinnaaneq

§ 65.  Kommunalbestyrelsip aamma Naalakkersuisut nalunaarut manna malillugu aalajangiineri suliassanngorteqqinneqarsinnaapput Isumaginninnermi Naammagittaalliuteqartarfimmut isumaginninnerup aqunneqarnera aaqqissugaaneralu pillugut inatsisartut peqqussutaani aalajangersakkat tunngavigalugit.  

 

Kapitali 6
Atortuulersitsineq

§ 66.  Nalunaarut manna 1. januar 2011 aallarnerfigalugu atortuulersinneqarpoq.
Imm. 2.  Nalunaarut manna atuuppoq aningaasatigut atugassiissutinut imm. 1-imi ulloq taaneqartutut nalunaarutigineqartoq malillugu.
Imm. 3.  Tamatumunnga peqatigitillugu Annertuumik innarluutillit ikiorserneqartarnerat pillugu Namminersornerullutik Oqartussat nalunaarutaat nr. 9, 4. april 2008-meersoq atorunnaarsinneqarpoq.

§ 67.  Tikeraarluni angalanerit, feriarluni angalanerit aamma pisunut immikkut ittunut il.il. atatillugu angalanerit pillugit kapitali 2-mi aalajangersakkat aamma atuupput inunnut nalunaarutip matuma atortuulersinneqannginnerani Kalaallit Nunaanni isumaginninnermut oqartussaasunit Danmarkimi innarluutilittut isumagineqartussatut inissinneqarsimasunut, tamatumalu kingorna danskisut siusinaartumik pensionisiaqalersinneqarsimasunut.

Kalaallit Nunaanni Namminersorlutik Oqartussat, ulloq 16. decemberi 2010

Maliina Abelsen

/

Konny Olesen