Meeqqamik paarisassamik inissiinermi sulinngiffeqartarneq pillugu Namminersorlutik Oqartussat nalunaarutaat nr. 3, 26. februar 2010-imeersoq

Naartunermi, erninermi meeravissiartaarnermilu sulinngiffeqartarneq ullormusiaqartarnerlu pillugit Inatsisartut inatsisaat nr. 14, 7. december 2009-imeersoq § 14, imm. 5 tunngavigalugu imatut aalajangersaavigineqarpoq:

 

Meeqqamik paarisassamik inissiinermut atatillugu sulinngiffeqartarneq

§ 1.  Meeqqanik inuusuttunillu ikiorsiisarneq pillugu inatsisartut peqqussutaat naapertorlugu meeqqamik pingasut inorlugit ukiulimmik ilaqutariinnut inissiisoqartillugu, meeqqap tiguneranut atatillugu, angajoqqaarsiat arlaata sulinngiffeqarnissaa, kommunalbestyrelsip aalajangiivigisinnaavaa.
Imm. 2.  Meeraq, ilaqutariinnut innissinneqartoq, pingasut aamma aqqaneq-marluk akornanni ukioqarpat, sulinngiffeqarneq sapaatip akunneri marluk angullugit sivisussuseqarsinnaavoq.
Imm. 3. Imm. 1 imaluunniit 2 malillugu sulinngiffeqarneq taamaallaat akuerineqarsinnaavoq, inissiineq ukioq ataaseq sivisunerusumilluunniit sivisussuseqassappat, tamanna meeqqanik inuusuttunillu ikiorsiisarneq pillugu inatsisartut peqqussutaanni iliuusissatut pilersaarusiornermi aalajangersakkat naapertorlugit pisinnaavoq.

§ 2.  Kommunalbestyrelsi sulinngiffeqarnissamut akuersissuteqarsinnaavoq, meeqqamik paarsinissamut akuersissuteqarnermi, angajoqqaarsiat arlaata angajoqqaarsianngornermi meeqqap angerlarsimaffimmi paarineqarnissaa, meeqqamut pisariaqartoq kommunalbestyrelsip nalilerpagu.
Imm. 2.  Angajoqqaarsiat, angerlarsimaffiup avataani tamarmik suliffeqarpata, arlartik sulinngiffeqassanersoq, namminneq aalajangissavaat.
Imm. 3.  Kisimiittumut paarsinissamut akuersissummik tunniussinermi, angerlarsimaffiup avataani suliffeqartumut kommunalbestyrelsi sulinngiffeqarnissamut akuersissuteqarsinnaavoq.
Imm. 4.  Angerlarsimaffiup avataani suliffeqarnermut ilaapput aalajangersimasumik suliffeqarneq, atuarneq, ilinniagaqarneq, il. il.

§ 3.  Meeqqamik ataaseq inorlugu ukiulimmik ilaqutariinnut inissiisoqartillugu, nalinginnaasumik piffissaq sulinngiffeqarfiusussaq tamakkerlugu sulinngiffeqartitsisoqartarpoq, tamanna Naartunermut, erninermut meeravissiartaarnermullu atatillugu sulinngiffeqartarneq ullormusiaqartarnerlu pillugit Inatsisartut inatsisaanni § 7 imm. 1 aamma 2 naapertorlugit pisinnaavoq.
Imm. 2. Meeqqamik ataaseq pingasullu akornanni ukiulimmik ilaqutariinnut inissiisoqartillugu, sulinngiffeqarnissap sivisussusissaa meeqqamut iliuusissatut pilersaarusiaq tunngaviusussaq naapertorlugu nalilersuereernermi akuersissutigineqartarpoq, tamanna meeqqanik inuusuttunillu ikiorsiisarneq pillugu inatsisartut peqqussutaat naapertorlugu pisinnaavoq.
Imm. 3. Meeqqamik pingasut aamma aqqaneq-marluk akornanni ukiulimmik inissiisoqartillugu, sapaatip akunneri marluk angullugit sulinngiffeqartitsisoqarsinnaavoq, tamanna § 1, imm. 2 naapertorlugu, meeqqamik ilaqutariinnut, siornatigut meeqqap attaveqarfigisimanngisaanut inissiisoqartillugu.

§ 4.  Akissarsiortut, § 1, imm. 1 imaluunniit 2 naapertorlugu sulinngiffeqartut, piffissaq meeqqamik tigusivissartik sulinngiffeqarfissamillu sivisussusissaa, pineqartup paasiniariarpagu tamanna sulisitsisorisamut nalunaarutigissavaa.
Imm. 2.  Sulisitsisorisamut nalunaarnissaq pissaaq piffissaq sulinngiffeqarfiusussaq kingusinnerpaamik sapaatip akunnerinik arfineq-pingasunik sioqqullugu. Pinartumik pisoqartillugu piffissaq sulinngiffeqarfiusussaq sioqqutitsiarlugu nalunaarutiginninneq pisinnaavoq.

Atuutilersinneqarnera

§ 5.  Nalunaarut manna 1. marts 2010-imi atuutilissaaq. Ilutigitillugu naartunermut, erninermut meeravissiartaarnermullu atatillugu sulinngiffeqartarneq ullormusiaqartarnerlu pillugit Inatsisartut inatsisaat nr. 40, 23. december 1996-imeersoq atorunnaarsinneqarpoq.

Kalaallit Nunaanni Namminersorlutik Oqartussat, ulloq  26. februar 2010

Maliina Abelsen

/

Konny Olesen