17. april 2009 UPA 2009/112
Inatsisissatut siunnersuummut nassuiaatit
Nassuiaatit nalinginnaasut1. Aallaqqaasiut:
Naalakkersuisut siulittaasuata nalunaarutigaa Inatsisartunut qinersisoqassasoq, ullorlu qinersivissaq 2. juni 2009-imut aalajangiullugu.
UPA 2005/25-mi "Inatsisartut Naalakkersuisullu pillugit Inatsisartut inatsisissaattut siunnersuut"-mik suliarinninnermi suleqatigiissitamit nassuiaat" Inatsisartut oqaluuseraat. Nassuiaammi Inatsisartunut qinersisitsisoqartarnissaa pillugu apeqqut ilaatigut pineqarpoq. Nassuiaatip Inatsisartuni oqaluuserineqarnerani suleqatigiissitap nassuiaasersuinerit inernerillu angusai pillugit nalornissuteqartoqarneranik saqqummersoqanngilaq.
Suleqatigiissitap nassuiaataani atuarneqarsinnaavoq, Inatsisartut Naalakkersuisullu pillugit inatsisip pisuni naalakkersuisut ataasiakkaat, Inatsisartut tamarmiusut imaluunniit naalakkersuisut siulittaasuata ilaasortaajunnaarsinneqarneranni Inatsisartunut qinersisoqarnissaanik erseqqissumik aalajangersaanissamut periarfissiinnginnera, Naalakkersuisulli siulittaasuata peqqutaasuni allani kissaatigippagu Inatsisartunut qinersisitsissasoq, tamanna piffissap qinigaaffiup naannginnerani pissagaluarpat.
Inatsisartunut qinersisarneq pillugu Inatsisartut inatsisaata aalajangersaavigaa, Inatsisartunut ilaasortat ukiunut sisamanut qinigaasarnissaat. Kingullermik 15. november 2005-mi qinersisoqarpoq. Taamaalilluni 2. juni 2009-imi qinersisoqarneratigut inatsisitigut qinigaaffissap piffissartaa nalinginnaasumik ukiut sisamaasussaq qaammatinik tallimanik sivikillineqassaaq. Taamatut nikingasoortitsineq inatsisitigut tunngavissaqartinneqartariaqarpoq, tamannalu qinersisarneq pillugu inatsimmiinngitsoq imaluunniit Inatsisartut Naalakkersuisullu pillugit inatsimmiinngitsoq nalilerneqarpoq.
Taamaalilluni inatsisissatut siunnersuutip 2. juni 2009-imi Inatsisartunut qinersisitsinissap inatsisitigut tunngaviata nalornisoorutigineqarsinnaannginnera qularnaarpaa.
2. Pisortanut aningaasaqarnikkut allaffissornikkullu sunniutaasussat:Inatsit naapertorlugu kingusinnerpaamik 2009-imi Inatsisartunut qinersisoqartussaagaluarpoq. Qinersinerup siuartinneqarnera aningaasaqarnermut allaffissornikkullu sunniuteqassanngilaq maannamut naatsorsuutaareersutut iinnassaaq.
Qinersisarneq pillugu inatsimmi maleruagassat naapertorlugit inatsisartunut qinersinissap piareersarneqarnissaanut ingerlanneqarnissaanullu allaffissornikkut nukissanik atuinermut atuinissamillu kommunit nalinginnaasumik aningaasartuuteqassapput.
Inatsisartunut qinersisoqarnerani nalinginnaasumik annertussusilinnik Nunatta karsia qinersinermi atortunut allanullu allaffissornikkut nukissanik atuissaaq, tassunga ilaalluni Valgnævnip allattoqartinneqarnera.
2009-mut aningaasanut inatsimmi konto pingaarnermi 10.06.10-mi Partiit qineqqusaarnissannut tapiissutit 3.5 mio. kruunit miss. aningaasaliissutissatut immikkoortinneqarsimapput qinersinermut atatillugu naalakkersuinikkut sulinermut peqataatitaqarnissamut tapiissutitut. Konto pingaarnermi 10.11.10 qinersinermut aningaasartuutinut 450.000 kruunit immikkoortinneqarput Namminersornerullutik Oqartussani qinersinermut aningaasartuutinut.
3. Inuussutissarsiuteqartunut aningaasaqarnermut allaffissornikkullu sunniutissat:2009-mi qinersisoqarnissaani toqqaannartumik aningaasatigut allaffissornermut inuussutissarsiuteqartunullu sunniuteqarnerlunnerunissaa ilimagineqanngilaq 2009-mi kingusinnerusukkut qinersisoqarnissaaninngarnit.
4. Avatangiisunut pinngortitamullu sunniutissat:Siunnersuutip avatangiisinut pinngortitamullu sunniuteqarnissaa ilimagineqanngilaq.
5. Innuttaasunut allaffissornermut sunniutissat:Siunnersuutip innuttaasunut allaffissornikkut sunniuteqarnissaa ilimagineqanngilaq.
6. Naalagaaffeqatigiinnermut namminersornermullu pissutsit:Siunnersuut naalagaaffeqatigiinnermut namminersornermullu sunniuteqarnissaa siunniunneqanngilaq.
7. Oqartussaasut soqutigisaqaqatigiillu tusarniaavigineqarnerat:Siunnersuut tusarniaassutigineqanngilaq, siunnersuummi taamaallaat inatsisartunut qinersisoqarnissaanut aalajangersaanermik tunngassuteqarmat, takuuk nalinginnaasumik nassuiaammi aallaqqaasiut.
Inatsisissatut siunnersuummi aalajangersakkanut ataasiakkaanut nassuiaatit
§ 1-imutNaalakkersuisut siulittaasuata aalajangiiffigaa, 2. juni 2009-imi inatsisartunut qinersisoqassasoq. Taamatuttaaq nalinginnaasumik nassuiaammi aallaqqaasiut innersuussutigineqarpoq.
Ulluliussap aalajangersaavigineqarnerani pingaartumik qinersinissap piareersarneqarneranut atatillugu eqquutsinneqartussani qinersisarneq pillugu inatsimmi killissarititaasut sianiginiarneqarsimapput. Assersuutigalugu qinersisarneq pillugu inatsimmi aalajangersarneqarpoq, partiit nutaat qinersinissamut qineqqusaarnissamik kissaateqartut qinersinissap pilinnginnerani sapaatit akunneri tallimat nallertinnagit Valgnævnimut nalunaarutigineqarnissaat. Tamatumunngalu naliliinissamut ilanngunneqarpoq inatsisartunut qinersinissap piareersarneqarnera pillugu suliassanut tunngassuteqartut.
§ 2-mutSiunnersuutip kingunerissavaa, qinigaasarnerup piffissartaa ukiunut sisamanut aalajangersagaasoq, maanna qinersinissaq pineqartoq eqqarsaatigalugu nikingassammat. Taamatuttaaq nalinginnaasumik nassuiaammi aallaqqaasiut innersuussutigineqarpoq.
§ 3-mutSiunnersuutigineqarpoq inatsisartut inatsisissaata 17. april 2009-imi atuutilernissaa. Inatsisip 17. april 2009-imi atuutilernissaaniit qinersinissamut aningaasartuutit matussuserneqarnissaat inatsimmi tunngavissaqartinneqarpoq.