24. november 2009 UKA09/95
ILASSUTITUT ISUMALIUTISSIISSUT
Uunga siunnersuut: Aalisarneq pillugu Inatsisartut inatsisaata allanngortinneqarnera pillugu Inatsisartut inatsisaat.
(Naalakkersuisut aappassaaneerneqarnissaanut saqqummiussaat)
pillugu
Aalisarnermut ataatsimiititaliap
ISUMALIUTISSIISSUTAA
Inatsisartut Aalisarnermut, Piniarnermut Nunalerinermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Hans Aronsen, siulittaasoq, Inuit Ataqatigiit
Inatsisartunut ilaasortaq Andreas Uldum, siulittaasup tullia, Demokraatit
Inatsisartunut ilaasortaq Anders Olsen, Inuit Ataqatigiit
Inatsisartunut ilaasortaq Hans Enoksen, Siumut
Inatsisartunut ilaasortaq Siverth K. Heilmann, Atassut
1. Allannguutissatut siunnersuutip ataatsimiititaliamit suliarineqarneraAtaatsimiititaliap ataatsimiinnermini ulloq 24. november allannguutissatut siunnersuut oqaaseqafigalugu suliaraa.
2. Ataatsimiititaliap inassutaaAtaatsimiititaliami amerlanerussuteqartut Inuit Ataqatigiinneersut aamma Demokratineersut allannguutissatut siunnersuut akuerineqassasoq inassutigaat.
Ataatsimiititaliami ikinnerussuteqartup Siumumeersup allannguutissatut siunnersuut itigartitsissutigineqassasoq inassutigaa, siunnersuullu pillugu ima oqaaseqaateqarlutik:
Aalisarnermi inatsisissaq pillugu suliaq assut sinerissami aalisartut eqaarsaatigalugit Siumumiit ilungersunarluinnartutut isigalugu makkuninnga oqaaseqarfigissavarput, aammalu oqaatigissavara akerliunniannarluta akerliunnginnatta isumaqataannginnitsinnullu tunngavilersuutigut tikissavakka uku oqaaseqarfigilaariarlugit tassalu Inatsisissami allanngutissatut siunnersuutigineqartut.
Siumumiit apeqqusinngisaannarparput pisuussutit uumassusillit illersorneqarlutik siunissami iluaqutigineqarlutik inuiannit kalaallinit iluaqutigineqarnissaat atorluarneqarnissaallu.
Aammalu inatsimmik ersarissumik tunngavissineqarluni aalisarnerup ingerlanneqarnerani paasissutissat tutsuiginartut pissarsiarisarnissaat, kiisalu pisortanut paasissutissanik tunniussisussaatitanermik piumasaqarneq tuungaviatigut Siumumiit isumaqatigisinnaagaluarlugu allatut ajornartumik itigartittariaqassallugu oqaatigeerissavarput. Imaaanngilaq taakku akerlerigatsigit Siumumiimmi pingaartittuarsimavarput pisuussutit uumassusillit akisussaassuseqartumik atorneqarlutillu iluaqutigineqarnissaat.
Kisianniliuna inatsisissap suliarineqarnerani pissutsit akuersaarsinnaanngisagut makku pissutigalugit aalisarnermut inatsisissaq akuersaarnianngikkipput.
Siumumiit suli ilungersuutigeqqinniarparput pisassanik aqutsinermi siunnersuuteqarnermilu atuisut ilisimasaasa, tassalu aalisartut piniartullu aamma siunnersuinermut atorluarneqarnissaat assut kissaatigigatsigu makku pissutigalugit.
Uumassusilinnik iluaquteqarnissaq illersorneqarsinnaasumik ingerlanneqassappat ilisimatuut kisimik siunnersuisarneri aallaavigineqassappata ernumatigaarput atuisut ilisimasaasa atorneqaratik qarsupiinnarneqartarnissaat.
Assersuutigalugu aanna uppernarsaatissaq piffissami kingullermi Qaanaami piniartut aavernut pisasseqqinneqarnissaminnut qinnuteqarnerminni ilisimasaasa soqutigineqanngivillutik siunnersuinermi atorneqaratilluunniit tusaaneqaratillu qaanngiinnarneqarmata. Aammalu Tunumi piniartut nannut pillugit ilisimasaat aamma taamatorpiaq soqutigineqaratik qaangiinnarneqartarmata.
Taamaattuminguna Siumumiit ilungersuukkipput atuisut aalisartut piniartullu ilisimasaasa aamma ilanngullugit ilisimatuut siunnersuineranni atorneqartarnissaasa qularnaarlugit inatsimmut ikkunneqarnissaat, tassami taakkuupput piniartut aalisartullu pinngortitamik uummassusilinnillu aamma ullut tamaasa atuiuarnermikkut ilisimasaqarnerpaajusut ilisimatuunik atorluarneqarsinnaalluartut.
Taavalu umiatsiararsortut aalisarnermut akuersissummut akilisalernissaat Siumumiit isumaqataaffiginngilluinnarparput makku pissutigalugit. Sinerissami aalisagarniarnermi akit appariartuinnarfiini eqqunngilluinnarmat umiatsiararsortut akuersissummut akiliisalernissaat.
Aammalu ukiap ingerlanerani puisit amiinut akit apparneqarput suli inuuniarnikkut ilungersunartorsiortitsinerulersumik, aammalu piniakkanik killilersuinerup Naalakkersuisuniit ingasattumik sukaterneqarnerani umiatsiararsortut akiliisinnaanerat killeqarluinnartoq suli ilungersunarnerulissaaq, naak Aalisarnermut piniarnermullu naalakkersuisoq aalisarnermi inatsisissap siullermeernerani oqalukkaluartoq umiatsiararsortut 1.milliuniit qulaallugit isertitaqartarmata 1500.00 kruunninnguanik akiliigaluarunik maluginavianngikkat.
Taamatullu oqarneq Aalisarnermut naalakkersuisumiit umiatsiararsortut pisoorsuunerarlugit uagut Siumumiit isumaqatiginngivipparput, nalunnginatsigu inuuniarnikkut ilaatigut ullormiit ullormut piffissap killerpiaani inuuniarsarisut allaat motoriarangamik ilaat ingerlariaqqinneq sapilersartut aningaasarsiornertik killeqanngaarmat.
Taavalu angallatit sinerissami aalisagarniartut tassalu pujortuleeqqaniit qummut aamma akuersissummut akiliisalissapput tassalu saarullinnut qaleralinnut nipisanut saattussanullu aalisarniarunik taakkununnga tamatigut immikkut 1500.00 kruunit akileqqaartalissapput tamannalu Siumumiit akuersaarsinnaanngilarput.
Sinerissami rejerniartut tamarmik aamma tons-imut ataatsimut 60.00 kruunimik akiliisalissapput sinerissami aalisariutit rejerniutit nutaanngilisimapput imminullu akilersinnaasumik ingerlasinnaanerat killeqartorujussuupput aserfallatsaaliinerit akisuallaarnerat pissutigalugu taamaattumik aamma ilaasa akiliisinnaanerat killeqarmat sinerissami rejerniartut pisassaminnut akiliisarnissaat Siumumiit akuersaarsinnaanngilarput.
Taavalu akiliisitsinissamik piumasaqarneq ulloq akiliiffissamik killissaqartitsivoq tassalu akuersissut akilerneqareersimassaaq kingusinnerpaamik 1.januar kikkut umiatsiararsortut akissaqassappat ukiup taamaalinerani akuersissummik pisinissaminnut ilaat akissaqassapput kisiannili ilarpassui akissaqarnavianngillat.
Aammalu rejerniartut pisassamik amerlassusiannut ukiup aallaqqaataani akilereersimassapput kisiannili aamma periarfissinneqassallutik kingusinnerpaarpaamik 1.april akiliisinnaatitaallutik.
Sinerissami umiatsiararsortut angallatillu aalisagarniartut aammalu rejerniartut akiliissinneqassapput akuersissutinut tamannalu assigiinngisitsineruvoq akuersaarneqarsinnaanngitsoq tassami avataani qaleralinniat saarullinniallu akiliutissaat 22.million kruunit Naalakkersuisut peerpaat, kisiannili umiatsiararsortut sinerissami angallataatillit rejerniartullu akiliisinneqassapput tamannalu Siumumiit akuerisinnaanngilluinnarparput.
Taamatut Siumumiit oqaaseqarluta aalisarnermi inatsisissaq akerleralugu taasissaagut isumaqaratta innuttaasut avaqqutiinnarlugit inatsisissaq aalajangersarniarneqartoq.
Ataatsimiititaliami ikinnerussuteqartup Atassummeersup allannguutissatut siunnersuut itigartitsissutigineqassasoq inassutigaat, siunnersuullu pillugu ima oqaaseqaateqarlutik:
Imm. 95-ip siullermeerneqarnerani Atassummit isummat oqaaseqaatillu saqqummiussagut aalajangiusimavagut. Atassut isumaqarpoq kalaallit aalisarneranni atuisut akiliuteqartinneqartarnissaat atuutilersissallugu piffissaanngitsoq. Inuussutissarsiummi arlaatigut akiliuteqartarnissaq Atassutip tunngaviatigut tapersersorsinnaavaa. Kisiannili tamanna ilimagisat misigissuserlu tunngavigalugu atuutilersinneqartariaqanngilaq. Atassut isumaqarpoq atuisut akiliuteqartarnerat inuussutissarsiortut akilisinnaassuseqarnerisa aningaasarsiornikkut peqqissaartumik sukumiisumillu misissoqqissaareerneratigut aatsaat atuutilersissinnaasariaqartoq, taamaalilluta inuussutissarsiutip aningaasarsiornera innarlissannginnatsigu, tamatumanittaaq nunatta isertitaqarnissamut periarfissaqarnera.
Atassutip aammaarluni Inatsisartunut ilaasortat nunarsuarmi aningaasarsiorluarnerpaat annertuumik ajornartorsiuteqarmata erseqqissaaviginiarpai, tamannalu soorunami nunarsuarmi niuffaffimmi aalisarnermik inuussutissarsiortut akinut pissarsiaannut sunniuteqassaaq. Aalajangiisartutut tuaviupilulluta aalajangiisariaqanngilagut, inuussutissarsiuppullu pingaarnerpaaq aningaasarsiornikkut ulorianartorsiortillugu. Tamatuma saniatigut Atassut isumaqarpoq umiatsiararsortut akuersissummut 1.500 kr.-nik akiliissanngitsut. Imaassinnaavoq aalisartut ilaat pissutissaqarluartumik taamatut akiliisinnaasut. Taamaattorli naliliinerput tunngavigalugu umiatsiararsortut amerlasuut kaasarfimminnnit 1.500 kr.-it amoriaannaanngilaat. Taamaattumik isitsinnit isigalugu umiatsiararsorlutik aalisartut akuersissummut akiliuteqartarnissaat inuuniarnikkut tulluartuunngilaq, taamaattumillu ataatsimilluunniit tamanna tapersersorsinnaanngilarput. Taamaattumik Atassummit Inatsisartut aalisarnermik inuussutissarsiortut akiliuteqartarnissaannik allannguutissatut siunnersuummik tapersersuinnginnissaannik kaammattorusuppagut, aningaasarsiornikkummi ajornartoorneq pissutigalugu tamanna tulluartutut isiginngilarput, kiisalu aalisarnermik inuussutissarsiortut taamatut aningaasatigut immikkut nammatassinneqarnerisigut taamatut artukiinermi nammataqarsinnaanerinut misissueqqissaarnerup amigaataanera uparuarusullugu.
Taama oqaaseqarluni siunnersuummillu siuliani allassimasunut paasinninnerit tunngavigalugit Inatsisartut Aalisarnermut, Piniarnermut Nunalerinermullu Ataatsimiititaliaata siunnersuut Inatsisartunut aappassaaniigassanngortippaa.
Siulittaasoq/Siulittaasup tullia