22. november 2009 UKA 2009/95
Allannguutissatut siunnersuut
uunga
Uunga siunnersuut: Aalisarneq pillugu Inatsisartut inatsisaata allanngortinneqarnera pillugu Inatsisartut inatsisaat.Naalakkersuisut aappassaaneerneqarnissaanut saqqummiussaat.
§ 1-mut.1. § 1, nr. 2-mi § 14, imm. 5 imatut oqaasertalerneqassaaq:
“Imm. 5. Naalakkersuisut sinerissap qanittuani aalisarnermi aalisarsinnaanermut akuersissutinik tunniussinermut kiisalu akuersissutinik allanik tunniussinermut atatillugu akiliuteqarnissamik piumasaqarsinnaapput, annertussusissaat aalisarsinnaanermut akuersissutinik tunniussinermut akuersissuteqartarnermullu atatillugu allaffissornermut aningaasartuutit tunngavigalugit aalajangersarneqartunik. Taamaattorli sinerissap qanittuani raajarniarnermut akuersissutinut akiliisoqartassanngilaq.”
Nassuiaatit nalinginnaasut
Allannguutissatut siunnersuut saqqummiunneqarpoq Aalisarneq pillugu inatsisartut inatsisissaata allannguutissaanut siunnersuutip siullermeerlugu suliarineqarnera tunngavigalugu.
Inatsisip oqaasertaani siullermeerlugu suliarineranut tunngatillugu allannguuteqanngilaq. Allannguutit taamaallaat inatsip nassuiaatitaanut tunngapput.
Inatsisissatut siunnersuumut tunngatillugu siullermeerinninnermi oqaatigineqartut innersuussutigineqarput, atuisut akiliuteqartittalernissaanut tunngatillugu umiatsiaararsortut atugarisaat pingaarnerutillugu eqqartorneqarpoq.
Naalakkersuisut inatsisissatut siunnersuutip oqallisigineqareernerani oqaaseqaatigineqartut naapertorlugit inatsisissatut siunnersuutip oqaaseqaatitaani allannguutissanik suliaqarpoq.
Avataasiortut eqqarsaatigalugit aalisakkanut tamanut qalerualinnullu pisassiissutit aamma sinerissap qanittuani raajartassanut pisassiissutit eqqarsaatigalugit allannguuteqanngillat. Tamatuma kingorna sinerissap qanittuani aalisariummut akuersissummut ataatsimut 1.500 kr.-inik akiliisoqartalissalluni, qaleralinniarnissamut, saattuarniarnissamut nipisanniarnissamut aamma saarullinniarnissamut akuersissummik tunniussisoqartillugu. Qeerarniarnerit, suluppaagarniarnerit, nataarnarniarnerit uugarniarnerillu tassunga ilanngunneqarput.
Sinerissap qanittuani umiatsiaararsorluni aalisarnermut tunngatillugu allannguutip kingunerisaanik tamakkiisumik akuersissummut siunissami 1.500 kr.-inik akiliuteqartassapput. Tamakkiisumik akuersissut taanna atorlugu umiatsiaararsortut qaleralinniarsinnaatitaassapput, saattuarniarsinnaatitaassapput, nipisanniarsinnaatitaassapput, saarullinniarsinnaatitaassapput, qeerarniarsinnaatitaassapput, suluppaagarniarsinnaatitaassapput, nataarnarniarsinnaatitaassapput kiisalu uugarniarsinnaatitaassaallutik. Tassunga tunngatillugu ilisimatitsissutigineqassaaq atuisut akiliuteqartalernissaannut malittarisassat nalunaarutikkut erseqqinnerusut massakkut suliarineqaleruttormata.
Tamatumunnga atatillugu nalunaarutigineqarpoq, allannguutip kingunerissagaa akuersissutinut akiliutit 400.000 kr.-inik ikileriarneri.
Aalajangersakkanut ataasiakkaanut oqaaseqaatit
Nr. 1-mut
§ 14, imm. 5-mut
Oqaaseqaatini allannguut siulleq pivoq qup. 4-mi immikkoortumi atuisut akiliuteqartittarnerisa atuutilersinneqarneranut tunngasuni. Immikkoortup ataani imatut oqaasertalimmi: ”Pisassiissutit agguaanneqartut agguaqatigiissillugit 180.000 tonsit tunngavigigaanni aalisakkanut/qalerualinnullu akitsuut tonsimut ataatsimut 60 kr.-iulluni taava iluanaarut kr. 10.800.000-iussaaq. Taakkua saniatigut saattuarniarnissanut, saarullinniarnissanut, nipisanniarnissanut qaleralinniarnissanullu akuersissutinut ataasiakkaanut 1.500,00 kr.-nit aningaasaliissutigineqarput, taakku 2.115.000 kr.-nik naleqarput.” Tassani akigititaq kr. 2.115.000 akigititamut kr. 1.879.500-mut allanngortinneqassaaq.
Immikkoortup tulliani imatut oqaasertalimmi: ”Aalisarsinnaanermut akuersissut ataaseq 1.500 kr.-qartinneqarpat avataasiorlunilu aalisarnermi akitsuut tonsimut ataatsimut 60 kr.-iutinneqarluni, atuisunut akiliutigitinneqartut katillugit kr. 12.915.000-iussapput.” kisitsit kr. 12.915.000 kr. kisitsimmut 12.679.500-mut allanngortinneqassaaq.
Oqaaseqaatini qupperneq 10-11-mi immikkoortoq una ikkunneqassaaq:
"Aalisarnissamut akuersissutip tunniunnerani akiliuteqarnissamut tunngatillugu umiatsiaararsortut angallatillu allat assigiinngissuteqarput. Umiatsiaaqqat akuersissummik tamatigoortumik tunineqassapput taamaasillutillu akiliuteqassallutik ataasiaannarlutik, sinerissalli qanittuani aalisartut allat tamarmik, sinerissap qanittuani kinguppannik aalisartut kisimik pinnatik, aalisakkanut assigiinngitsunut, qalerallit, saattuat, nipisat, saarulliit (taakkununnga ilaatinneqassapput qeeqqat, suluppaakkat, nataarnat uukkallu) aalisakkanut tamanut immikkut aalisarnissamut akuersississummut akiliuteqartassallutik."
Immikkoortoq taanna ikkunneqassaaq qup. 10-11-mi immikkoortumi ”Nr. 2-mit nr. 7-imut” oqaaseqatigiit ”Aamma immikkoortoq pisortanut aningaasarsiornikkut allaffissornikkullu kingunerisassai takuuk.”