29. september 2009 UKA 2009/82
Inatsisissatut siunnersuummut nassuiaatit
Nalinginnaasumik nassuiaatit
1. Aallarniut:
a) Siunnersuutip siunertaa tunuliaqutaaluNamminersorlutik Oqartussat tapiissutit aqqutigalugit naalakkersuinikkut suliniaqatigiiffinnut aningaasalersuisarnerannut maleruagassat atuuttut inatsisissatut siunnersuutikkut erseqqissaavigineqarput.
Naalakkersuinikkut sulinermut aningaasatigut tapiissuteqartarneq pillugu Inatsisartut inatsisaat siulleq 1995-imi akuersissutigineqarpoq. Taanna tikillugu naalakkersuinikkut suliniaqatigiiffinnut tapiissutit aningaasanut inatsimmi sinaakkusiussatut aningaasaliissutitut aammalu maleruagassat Inatsisartut immikkut inatsisiliaanni aalajangersarneqartut tunngavigalugit tunniunneqartarsimapput. Tapiissutit ilaat (partiimut ataatsimut 210.000 kr.-it) partiip allattaanut tapiissutitut immikkut atugassanngortinneqartarput.
Tapiissuteqartarnermut inatsit atuuttoq 2001-imi akuersissutigineqarpoq, tamatumalu kingorna 2003-mi 2005-imi kiisalu 2006-imi allanngortinneqarluni. Inatsisip kingullermik allanngortinneqarneratigut partiit tamarmik aningaasanik tunngaviusunik ukiumut 300.000 kr.-inik tapiiffigineqartarput, taakkulu saniatigut ilaasortanut ataasiakkaanut naatsorsuullugu 125.000 kr.-it tunniunneqartarlutik.
Tapiissuteqartarnermik inatsisaaqqaartup 1996-imi atuutilerneratigut naalakkersuinikkut sulinermut pisortat aningaasatigut tapiissutigisartagaat partiinut tallimanut agguataarlugit (qinersinermut tapiissutit ilanngunnagit) 2,5 mio. kr.-erluinnarnik amerlassuseqarput. Tamatuma kingorna inatsimmik allannguisarnikkut pisortat partiinut tapiissutaat partiinut tallimanut agguataarlugit (qinersinermut tapiissutit ilanngunnagit) ukiumut 5,3 mio. kr.-erluinnarnik amerlassuseqalersimapput. Taamaasillutillu tapiissutit piffissami 1996 – 2009-mi marloriaatit sinnerlugit amerleriarsimapput.
Tamatumalu saniatigut partiinut toqqaannanngikkaluamik (inatsisitigut tunngavissinneqanngitsumik) tapiissutit ilaatigut Inatsisartut allaffeqarfiata missingersuutai aqqutigalugit partiinut siunnersortit aningaasarsiaqartinneqarnerisigut annertuumik annertusaavigineqarsimapput. Toqqaannanngikkaluamik tapiissutit ullumikkut ima annertussuseqarlutillu pissuseqarput tapiissuteqartarnermik inatsimmut naapertuuttuunerat nalorninarluni tamatumalu peqatigisaanik naalakkersuinermik suliniaqatigiiffinnut pisortanit tapiissutigineqartartut tamakkiisut pillugit tamat paasisaqarsinnaanerannut akimmisaartitsillutik.
Ilaatigut naalakkersuinikkut suliniaqatigiiffinnut pisortat tapiissutaannut inatsisitigut killiliussanik aalajangersimasunik pilersitseqqinnissaq ilaatigullu tapiissutit tamat oqartussaaqataaneranni inatsisitigut akuerisaasumik tunniunneqassappata pisariaqartumik pisortat tapiissutaasa ersarissunngorteqqinnissaat inatsisissatut siunnersuutikkut matumuunakkut siunertarineqarpoq.
Toqqaannanngikkaluamik tapiissutit Namminersorlutik Oqartussanit tapiissutigineqarsinnaatitaasut allattoqqissaarneqarnerisigut inatsisitigut inissisimaneq erseqqissoq inatsisip allanngortinneqarneratigut pilersinneqarpoq. Tamatuma kingorna inatsisitigut tunngavissinneqarsimanngitsunik toqqaannartumik toqqaannanngitsumillu tapiissuteqartoqarsinnaajunnaassaaq.
Taama allannguineq Inatsisartut allaffeqarfiata partiillu soqutigisaanut naapertuuttutut nalilerneqarpoq. Allaffeqarfimmi pisortat nakkutigisinnaanngisaanik allaffeqarfiup sulisuanik aningaasaataanillu partiit allattoqarfiisa siumut naatsorsuutigineqariinngitsumik atuisinnaanerannik aarleqquteqarunnaarneq pissutigalugu allaffeqarfiup missingersuutaanik Inatsisartut allaffeqarfiat kukkunersiuisullu aqutsisinnaanerat nakkutilliisinnaanerallu siunissami pisariinnerulissaaq. Illuatungaatigullu akiliuteqarnatik sullississutinik atortunillu sorlernik atuisinnaanertik pillugu partiit ersarissunik malittarisassaqalissapput, soorluttaaq partiit aningaasaqarnikkut aaqqissuussisinnaanikkullu kiffaanngissuseqarnerat siunnersuutikkut isiginiarneqartoq.
b) Partiit allaffeqarfiinut ullumikkut toqqaannanngikkaluamik tapiissutaasartutTaaneqareersutut Inatsisartut allaffeqarfiannut missingersuutit aqqutigalugit partiinut siunnersortit ukiuni kingullerni aningaasarsiaqartinneqartarsimapput. Taamaalillutillu partiinut siunnersortit Inatsisartut allaffeqarfiannit atorfeqartitaasarsimapput, tassanngaanniilli ilitsersorneqarsinnaatitaanatik. Taama ilusiliisimaneq tapiissuteqartarnermik inatsimmik sanioqqutsinerusoq soorluttaaq atorfinitsitsisarnermi maleruagassat eqqarsaatigalugit ersarissumik ajornartorsiutitaqartoq nassuerutigineqartariaqarpoq.
Aamma allatigut partiit allattoqarfiisa aningaasaqarnerat Inatsisartullu missingersuutaat tamakkiisumik ullumikkut immikkoortinneqarsimanngillat. Allaffissornikkut aningaasartuutit ataasiakkaat partiit gruppiinut toqqaannartumik attuumassuteqartut Inatsisartunut missingersuutit aqqutigalugit akilerneqartarput.
Assersuutigalugu aalajangiiffigisassatut siunnersuutit aammalu oqaaseqartartut oqaaseqaatissaasa nutserneqarnerannut partiit aningaasartuutaat Inatsisartut allaffeqarfiannit akilerneqartarput. Akileeqqusissutit fakturat nassiunneqartut eqqortuunersut imaluunniit akissarsiassatut akileeqqusissutit sullississutigineqartunut naapertuunnersut Inatsisartut naatsorsuuseriviata nalilissallugit periarfissaqarfiginngilaa. Tamanna partiimit pineqartumit taamaallaat misissorneqarsinnaavoq, aningaasartuulli partiimit nammineq akilerneqartussaanngilaq, taamaattumillu taamatut misissuinissaminut immikkut tunngavissaqartutut kajumissuseqartutulluunniit partii misigisimassanani. Taamatuttaaq akinik qaffasinnerusunik (nukinginnartunik suliaqarnermi akigitinneqartartunik) akiliuteqartoqaqqunagu atortussanik nutserneqartussanik siusissukkut nassiussinissamut taama aaqqissuussisimanikkut partiit kajumissuseqalersinneqarneq ajorput.
Aammattaaq partiit allatseqarfiisa allaffissornikkut ingerlatsinerisa annertunerpaartaa Inatsisartut allaffeqarfiata missingersuutai aqqutigalugit ullumikkut aningaasalersorneqarpoq.
2. Siunnersuummi immikkoortut pingaarnerit:Aningaasat partiinut naalakkersuinermik suliaqartunut Inatsisartullu allaffeqarfiannut Nunatta Karsianit atugassiissutigineqartut immikkoorluinnartuunerata siunissami ersarissuullunilu nassuiarluagaanissaa siunnersuutip siunertaraa.
Partiinut toqqaannartumik toqqaannanngikkaluamillu tapiissuteqassagaanni tamatuma inatsisitigut ersarissumik tunngavissinneqarsimasariaqarnera aammalu inatsisitigut tunngavissaq pisariaqartoq pigineqartinnagu Namminersorlutik Oqartussat, tassunga ilanngullugu Inatsisartut allaffeqarfiata taama tapiissuteqarnissamut pisussaatitaannginnerisa erseqqissarneqarneratigut taama immikkoortitsineq inatsisissatut siunnersuutikkut qulakkeerneqassaaq.
Inatsisissatut siunnersuummi killiliineq naapertorlugu sullississutit uku partiinut il.il. siunissami akeqanngitsumik tunniunneqarnissaannut tunngavissaqassanngilaq:
· Nammineq nutserisorisat nutserisulluunniit avataaneersut, siunnersortit aammalu allatsit il.il. aningaasarsiaannut taarsiissutit taakkuninngaluunniit akiliineq kiisalu sulisorisanut ajunngitsorsiassanik
qanoq ittuugaluanik, tassungalu ilanngullugu taakku nerisaqartinneqarnerannut akiliuteqarneq.
· Telefonimik atuineq.
· Allaffimmi atortut elektriskiusut elektroniskiusulluunniit, soorlu inuit ataatsiakkaat printerii, kopimaskinat, telefonit angallattakkat, atortorissaarutit AV-t, qarasaasiaq atorlugu seqersittakkat,
scannerit, telefonit ataatsimiissutit, faxit ilaallu ilanngullugit.
· Allaffimmi atortut soorlu printerinut kopeerutinullu pappilissat, printerit qalipaatissartaat, aqerluusat assigisaallu.
· Softwarenik atuisinnaanermut uppernarsaatit, aviisit atuakkallu.
Sullississutit uku Namminersorlutik Oqartussanit akeqanngitsumik suli atugassiissutigineqarsinnaapput:· Allaffiit ataatsimiittarfiillu Inatsisartunut ilaasortat inatsisartutut sulinerannut atatillugu atorneqartut, tassunga ilanngullugu allaffeqarnermut atatillugu atortut, soorlu toqqorsiviit mikinerusut, iggaviit
mikinerusut, atisaajartarfiit, perusuersartarfiit, printeriisiviit il.il.
· Allaffiit imermik, innaallagissamik kiassarnermillu pilersorneqarnerat.
· Allaffiit iluisa silataasalu aserfallatsaalinerat.
· Allaffinnik eqqiaaneq.
· Allaffiit attaveqarnermut atortulersuutaat, soorlu internetsimut aamma telefoninut il.il. ikkuffiit.
· Allaffiit internetikkut attaveqarnerannut ingerlatsinermut aningaasartuutit, taakku aningaasatigut teknikikkullu killissarititaasut erseqqinnerusumik aalajangersarneqartut iluanniippata.
· Qaraasiakkut atortorissaarutinut nalinginnaasunut aalajangersimasunut ikiorteqarneq, taakku Namminersorlutik Oqartussat qarasaasiaqarnikkut attaveqaataannut atanilerneqarsimappata
aammalu Namminersorlutik Oqartussat attaveqaqatigiinnermut isumannaallisaanermullu nalinginnaasumik malittarisassaannut sukkulluunniit atuuttunut eqquutsitsippata.Tunngaviusumik isigalugu allaffimmi nalinginnaasumik pequtit, assilissat, nivinngaaviit, nillataartitsiviit assigisaallu, nerinermi atortut il.il. allaffimmi atortorissaarutit ilaattut akeqanngitsumik atugassiissutigineqarsinnaapput, tamatumanili allaffiit, ataatsimiittarfiit atortorissaarutillu allat partiinit siunissami akilerneqartalernissaat pillugu partiit isumaqatigiissuteqarfigineqarnissaat naatsorsuutigineqarpoq.
Tamatuma saniatigut siunnersuutip nassatarisaanik aningaasartuutaanerussutissanut taarsiutissanik partiinut tapiissutit qaffanneqarnissaannik inatsisissatut siunnersuut ilaqartinneqarpoq. Taakku naatsorsorneqarneranni allaffiit, ataatsimiittarfiit assigisaallu pequtsersorneqarnerisa nammineq akisussaaffigineqalernissaat pillugu isumaqatigiissuteqaatissatut naatsorsuutigisaq ilanngullugu eqqumaffigineqarsimavoq.
Aningaasat inatsisissatut siunnersuummi pineqartut Nunatta Karsiata naatsorsuutai aammalu Inatsisartut ukiumoortumik nalunaarusiaat aqqutigalugit tamanit manna tikillugu tamakkiisuunngikkaluamik takuneqarsinnaasimapput. Aningaasat atorneqarnerannik tamat takunnissinnaanerat tapiissutinik atuineq pillugu naatsorsuutinik nassiunneqartunik Inatsisartut Siulittaasoqarfiata tamanut saqqummiussisarneratigut qulakkeerniarneqarpoq.
3. Kalaallit Nunaanni Namminersorlutik Oqartussanut aningaasaqarnikkut allaffissornikkullu kinguneqaatissat:
3.1 Aningaasaqarnikkut kinguneqaatissatInatsisissatut siunnersuut ataatsimut isigalugu Nunatta Karsianut kinguneqaateqassanngilaq. Kontomilli pingaarnermit 01.10.10-mit, Inatsisartunut tunngasumit, missingersuutitut aningaasaliissutinit kr. 3.145.000-it kontomut pingaarnermut 01.06.11-imut, Naalakkersuinikkut suliniaqatigiiffinnut aningaasatigut tapiissuteqartarnermut tunngasumut, nuunneqartussaassapput.
Ukiut kingulliit sisamat ingerlaneranni suliassanut inatsisissatut siunnersuummi pineqartunut atatillugu agguaqatigiissillugu aningaasartuutaasarsimasut qanillattorlugit aningaasat naatsorsorneqarsimapput. Inatsisartulli ingerlatsinermut aningaasartuutaasa ikilisarneqarnissaannik Inatsisartut UKA 08-mi aalajangigaata ilanngunneqarnissaa siunertaralugu manna tikillugu aningaasartuutaasartut ilaat, aningaasarsianut attuumassuteqanngitsut, naatsorsuineq sioqqullugu 10 %-imik ikilisinneqarsimapput. Taamaaliornikkut sipaaruteqarnissap Inatsisartunit akuersissutigineqartup naligiimmik agguataarneqarnissaa qulakkeerneqarpoq.
Partiit allaffeqarfianni sulisut, soorlu partiinut siunnersortinik atorfinitsitsineq soraarsitsinerlu kiisalu akissarsianik sulisunillu aqutsineq inatsisissatut siunnersuutip kingunerisaanik partiinut naalakkersuinermik suliaqartunut pissusissaatut sulisitsisunngortussanut nuunneqassapput. Tassunga atatillugu isumaqatigiissutit il.il. pisariaqartut aaqqinnissaat partiit namminneq pisussaaffigaat. Partiit allaffeqarfianni sulisunut, tassunga ilanngullugu partiit siunnersortaannut aningaasartuutit tamarmik inatsisip atortuulerneratigut partiinut nuunneqassapput. Tassunga aamma ilaapput sulisooreersut suliunnaarnerannut atatillugu angalanerannut pequtaasalu nuunneqarnerannut aningaasartuutit. Allannguut partiinut aningaasartuutaaqqunagu suliassap tamatuma nuunneqarnerani aningaasat partiit allattoqarfiisa manna tikillugu akissarsianut aningaasartuutigisartagaattut annertussuseqartut Inatsisartut kontoannit pingaarnermit partiinut tapiissutinut kontomut pingaarnermut nuunneqassapput. Aningaasanut nuussassanut tamakkiisunut immikkoortumi siuliani allassimasunut aningaasat taakku ilanngunneqarput.
Allaffinni pequtit il.il. allaffinni atortulersuutit ilanngullugit manna tikillugu akeqanngitsumik atugassanngortinneqarsinnaanerat inatsisissatut siunnersuutikkut akimmisaartinneqanngilaq. Allaffiit ataatsimiittarfiillu pequtsersorneqarnerat aammalu atortulersuutit allat partiinit namminernit akilerneqartalertussanngorlugit partiit isumaqatigiissuteqarfigineqarnissaat naatsorsuutigineqarpoq. Pequtit manna tikillugu partiinut atugassiissutigineqartarsimasut Inatsisartut allaffeqarfianni pequtinut nalunaarsorsimaffimmi ilaapput Inatsisartunillu pigineqaannassallutik. Siunissami aserfallatsaaliineq nutaanillu pisineq partiinit nammineq aningaasalersorneqassaaq.
3.2 Allaffissornikkut kinguneqaatissatInatsisartut allaffeqarfiannut partiinut siunnersortit akissarsiaqartinneqarnerannut atorfeqartinneqarnerannullu, partiit nutserisitsinermut aningaasartuutaannut, ingerlatsinermut aningaasartuutinut assersuutigalugu pequtinut, allaffimmi atortunut pigisanullu, IT-mut atortulersuutit il.il. tunngasumik qinnuteqaatinut atatillugu suliassanik ullumikkut ingerlaavartumik isumaginnittartumut allaffissornikkut oqilisaassinermik inatsisissatut siunnersuut nassataqassaaq. Taamatuttaaq partiit allatseqarfiini sulinerup oqileriarneranik inatsisissatut siunnersuut kinguneqassaaq.
Inatsisartuni partiit inissiat normuinik amerlanngitsuinnarnik pisortat inissiaatileqatigiiffiannit ullumikkut atugassinneqarsimapput. Inatsisissatulli siunnersuut akuersissutigineqassappat partiit nammineq sulisorisaat amerlineqassasut naatsorsuutigineqartariaqarpoq. Taamaattumillu pisortat inissiaatileqatigiiffiannik ataatsimik arlalinnilluunniit isumaqatiginninniareernikkut partiit sulisorisaannut inissiat normuinik amerlanerusunik atugassiinissaq pisariaqarsinnaassaaq.
4. Inuussutissarsiornermik ingerlataqartunut aningaasatigut allaffissornikkullu kinguneqaatissat:Siunnersuut inuussutissarsiornermik ingerlataqartunut kinguneqaateqanngilaq.
5. Avatangiisinut pinngortitamullu kinguneqaatissat:Siunnersuut avatangiisinut pinngortitamullu kinguneqaateqanngilaq.
6. Innuttaasunut allaffissornikkut kinguneqaatissat:Siunnersuut innuttaasunut kinguneqaateqanngilaq.
7. Kinguneqaatit annertuut allat:Siunnersuut annertuunik allanik kinguneqaateqanngilaq.
8. Naalagaaffeqatigiit Namminersorlutillu Oqartussat akornanni pissutsit:Siunnersuut Naalagaaffeqatigiinnut Namminersorlutillu Oqartussanut kinguneqaateqanngilaq.
9. Oqartussaasut kattuffiillu tusarniaaffigineri:Siunnersuut innuttaasunut inuussutissarsiornermillu ingerlatsisunut kinguneqaateqanngimmat tusarniaassutigineqanngilaq.
Siunnersuummi aalajangersakkanut ataasiakkaanut nassuiaatit
§ 1-imutNr. 1-imut.
Tapiissuteqartarnermik inatsimmi § 1, imm. 4 pillugu.Aalajangersagaq nuttajuvoq aammalu naalakkersuinikkut sulinermut aningaasatigut tapiissuteqartarneq pillugu Inatsisartut inatsisaat naapertorlugu Kalaallit Nunaanni Namminersorlutik Oqartussat partiinut, kattusseqatigiinnut kisimiillutillu qinigaasunut aningaasatigut tapiissutigisinnaasaat tamakkiisut tassani erseqqissaatigineqarlutik.
Kalaallit Nunaanni Namminersorlutik Oqartussanik oqarnermi pineqarput Naalakkersuisut aammalu Inatsisartut kiisalu taakku allaffeqarfii. Inatsisartut allaffeqarfiata partiillu allatseqarfiisa akornanni killiliinermut erseqqissaaneq taamaallaat sunniuteqassaaq, taakkumi toqqaannanngikkaluamik tapiissutitut taaneqarsinnaasunik ullumikkut aningaasartuuteqarfiusarmata.
Aalajangersakkakkut aalajangersarneqarpoq Namminersorlutik Oqartussat toqqaannartumik toqqaannanngikkaluamilluunniit aatsaat tapiissuteqarsinnaasut, tamanna inatsimmi erseqqilluinnartumik tunngavissinneqarsimappat, tassunga ilanngullugit Inatsisartut inatsisaanni aalajangersakkat sinneri kiisalu inatsisit allat, soorlu aningaasarsiaqartitaanermut inatsit. Missingersuutit ileqquliussalluunniit aqqutigalugit tunngavissiisoqarsimappat tamanna naammanngilaq.
Aningaasatigut toqqaannartumik tapiissuteqarnerup saniatigut aningaasatigut toqqaannanngikkaluamik iluaqutissinneqarnermut, soorlu pitsaasumik atugassaqartitsilluni taarsigassarsinermut qularnaveeqqusiinermullu kiisalu sullississutinut, pigisanut atuisinnaatitaanernulluunniit akeqanngitsunut imaluunniit akinut akikinaakkanut aalajangersagaq aamma tunngassuteqarpoq. Akerlianilli niuernermi akigitinneqartut atorlugit Inatsisartut allaffeqarfiat aqqutigalugu pisiassanik sullissussutinilluunniit partiit pissarsisinnaanerannut aalajangersagaq akimmisaartitsinngilaq.
Assersuutigalugu Inatsisartunut nioqqutinik pilersuisut partiit allattoqarfiannut pappilianik kopeerutinik akuttunngitsumik pilersuisarnissaat isumaqatigiissutigineqarsinnaavoq, tassa taamaaliornermi Inatsisartut aningaasartuutaat partiimit pineqartumit tamakkiisumik matussuserneqarpata.
Aammattaaq assersuutigalugu atortunik elektroniskiusunik allaffeqarfik peqatigalugu ataatsimoorluni pisinermi pisiarineqartut amerlassusiat apeqqutaatillugu akikilliliissutigineqartut ilaannik partiit pissarsisinnaanerat aalajangersakkamut akerliunngilaq.
Inatsisissatut siunnersuutip nassatarisaanik assersuutigalugu oqaaseqartartut oqaaseqaataannik ilaasortallu siunnersuutaannik nutserisitsineq siunissami partiit namminneq akilertalissavaat. Tamatumani taakku Inatsisartut atugassaattut piffissaq eqqorlugu nutserneqarnissaannut partiit pisussaaffeqarnerat allanngunngilaq.
Ataatsimiititaliat isumaliutissiissutaannik aammalu partiit ikinnerussuteqarlutik oqaaseqaatigiunnagaannik nutserineq Inatsisartut allaffeqarfiannit suli isumagineqartassaaq. Ikinnerussuteqarlunili oqaaseqaatip partiip nammineq nutserisuannit nutserneqassasoq partiimit kissaatigineqarpat, tassunga aningaasartuut partiimit nammineq akilerneqassaaq.
Tapiissuteqartarnermik inatsimmi § 1, imm. 5 pillugu.Aalajangersagaq nutaajuvoq imarivaalu imm. 4-mi ilaatinneqanngtsut, taassumalu kinguneraa Inatsisartunut ilaasortat inatsisartutut sulinerannut atatillugu allaffiit aammalu ataatsimiittarfiit assigisaallu Namminersorlutik Oqartussanit akeqanngitsumik atugassiissutigineqarsinnaanerat. Taamaalillunilu Inatsisartunut ilaasortat partiillu allaffeqarfiini sulisut Inatsisartut atortulersuutaannut atatillugu partiit gangiini allaffinnik akiliutitaqanngitsumik atuisinnaanerannik periuserineqartoq attatiinnarneqarsinnaavoq.
“Assigisaallu”-mik oqarnermi pineqarput init ataatsimiittarfiit assigalugit “allaffeqarnermi atortulersuutit”-nut ilaasutut isigineqarsinnaasut. Tamatumani pineqarlutik toqqorsiviit mikinerusut, iggaviit mikinerusut, atisaajartarfiit, perusuersartarfiit, printeriisiviit il.il. Tamakku aatsaat atugassanngortinneqarsinnaapput Inatsisartut allaffeqarfiannut taama atugassanngortitsineq immikkut aningaasartuutaanngippat.
Allaffimmi atortulersuutit aalajangersagaq una malillugu atugassanngortinneqartut Inatsisartut ataatsimiinnerannut ataatsimiititaliallu sulinerannut attuumaqqissaanngikkaluamik partiit naalakkersuinikkut allanik ingerlatsinerannut killilersugaanngitsumik atorneqarsinnaapput.
Ininik aalajangersimasumik annertussusilinnik, illuutini aalajangersimasuni quleriilluunniit arlaanni aalajangersimasuni Namminersorlutik Oqartussat inatsisitigut pisussaaffigalugu atugassiisussaatitaanerannik aalajangersagaq kinguneqanngilaq. Tamatumani inatsisikkut tunngavissaatinneqarpoq manna tikillugu periuserineqarsimasup ingerlaannarsinnaanera aammalu maanna annertussusiusup annertusineqarnissaa aatsaat pisinnaasoq Inatsisartuni pissutsit tamanna tunngavississinnaappassuk, minnerunngitsumik Inatsisartunut ilaasortat naammaginartumik sullinneqarnerisa ingerlaannarnissaa qulakkeerniarlugu inatsisartutigoortumik sulineq ima annertuseriarsimappat allaffittut atukkat annertusineqartariaqarlutik. Taamatut annertusisitsineq aatsaat pisinnaavoq Naalakkersuisut qitiusumik aqutsisoqarfiannik siumoortumik isumaqatigiissuteqarnikkut, taakkumi allaffinnik atukkaminnik tunniussisariaqassammata.
Allaffiit Inatsisartunit partiinut il.il. atugassiissutigineqartut assigiimmik pinnittussaanermik tunngavik aallaavigalugu ilaasortaqaqqortussuseq naapertorlugu partiinut, kattusseqatigiinnut kisimiillutillu qinigaasunut agguaanneqassapput, tamatumanili gruppit mikinerit kisimiillutillu qinigaasut eqqarsaatigalugit minnerpaaffiliinissaq qulakkeerneqarsinnaassalluni.
Allaffinnik ataatsimiittarfinnillu akeqanngitsumik atuinermi manna tikillugu pisarnertut imeq, innaallagiaq kiassarnerlu aammalu illup iluanik silataanillu aserfallatsaaliineq ilaatinneqarsinnaapput. Taamatuttaaq allaffinnik eqqiaanermut imaluunniit attaveqarnermi teknikikkut atortulersuutinut internetimut telefonimullu ikkuffinnut aningaasartuutit allaffeqarfimmit naatsorsuusiuunneqartariaqanngillat.
Assersuutigalugu allaffimmik atortulersuutinik tamanik atortorissaaruteqartinneqartumik aalajangersimasumik akeqartitsilluni attartornermut isumaqatigiissummi ilaatinneqarsinnaasut iluanni sullississutit ingerlanneqarsinnaappata attaveqaatinik (internet, fastnettelefoni) atuinermi ingerlatsinermut aningaasartuutit allaffinnik aamma ataatsimiittarfinnik assigisaannillu akeqanngitsumik atuinermut ilaatinneqarsinnaapput. Atuineq Namminersorlutik Oqartussat suliassaqarfimmut aningaasartuutaannut annertuumik sunniuteqanngippat piumasaqaat tamanna aallaavigalugu internetimut atanilerneqarneq akeqanngitsumik atugassiissutigineqarsinnaavoq. Fastnetimut telefonit aallaavittut isigalugu akeqanngitsumik sullississutigineqarsinnaasut avataanniipput, atuinermi apeqqutaatillugu akiligassat nalinginnaasumik annertusinnaasarmata.
Inatsisissatut siunnersuut malillugu tunngaviusumik isigalugu allaffimmi nalinginnaasumik pequtit, assilissat, nivinngaaviit, nillataartitsiviit assigisaallu, nerinermi atortut il.il. allaffimmi atortorissaarutit ilaattut akeqanngitsumik atugassiissutigineqarsinnaapput, tamatumanili allaffiit, ataatsimiittarfiit atortorissaarutillu allat partiinit siunissami akilerneqartalernissaat pillugu partiit isumaqatigiissuteqarfigineqarnissaat naatsorsuutigineqarpoq.
Taguutip “Allaffiit aamma ataatsimiittarfiit assigisaallu” aallaavittut isigalugu avataaniipput allaffimmi atortut elektriskiusut elektroniskiusulluunniit, soorlu inuit ataatsiakkaat printerii, kopimaskinat inunnit ataasiakkaanit aammalu ataatsimoorussatut pigineqartut, qarasaasiat angallattakkat, telefonit angallattakkat, atortorissaarutit AV-t, qarasaasiaq atorlugu seqersittakkat, faxit ilaallu ilanngullugit. Tamanna aamma atuuppoq allaffimmi atortut soorlu printerinut kopeerutinullu pappilissat, printerit qalipaatissartaat, aqerluusat assigisaallu kiisalu softwarenik atuisinnaanermut uppernarsaat, aviisit atuakkallu eqqarsaatigalugit.
Pisariinnerusussaq pillugu allaffinni qarasaasiat, qarasaasiat angallattakkat aammalu printerit attaveqaammut atasut Inatsisartunut ilaasortanit ataasiakkaanit atorneqartartut taguummut “allaffiit aamma ataatsimiittarfiit assigisaallu” ilaasutut suli isigineqarput. Tamatumunnga pissutaavoq Inatsisartunut ilaasortat attaveqaammut ataatsimoorussamut atanilerneqarnerat tamatumalu nassatarisaanik ingerlatsinikkut isumannaatsuuneq patajaatsuunerlu inatsisartutigoortumik sulinermut tamarmiusumut pitsaaqutaasutut nalilerneqarmat, taamaattumillu IT-mut sulisunik aningaasanillu annertuunik ingerlaavartumik atuinngikkaluarluni atortorissaarutinik assigiissaakkanik aammalu atortunut antivirusiliilluni qulakkeerinnittariaqarneq pisariaqarpoq. Taamaalillunilu Inatsisartunut ilaasortat qarasaasiaannut nalinginnaasunut aammalu attaveqaatinut atasunik printeriinut ikiorsiinermut aningaasartuutit Inatsisartut allaffeqarfiat aqqutigalugu akilerneqartarnerat ingerlaannassaaq. Atortut atorneqarnerannut ilitsersuutinik assersuutigalugulu atornerluinnermi taakkununnga atuinermut killilersuuteqarsinnaanermik aalajangersaasinnaanissamut Inatsisartut allaffeqarfiata periarfissaqarnera ingerlaannassaaq.
Inatsisartunut ilaasortat partiillu allaffeqarfiini sulisut Namminersorlutik Oqartussat qarasaasiakkut ataatsimoorullugu attaveqaataannut atanilerneqarpata pissutsit immikkut ittut atuutilersarput. Attaveqarnermi aaqqiissutinik assigiissakkanik aammalu qarasaasianut ataatsimoorullugit attaveqaatinut atanilikkanut isumannaallisaatinik immikkut ittunik Namminersorlutik Oqartussat ingerlatsipput. Taamaalillunilu softwarenut attaveqaatinullu aalajangersimasunut aaqqiissutit assigiissakkat pigineqassapput, soorlu aqutseriaatsit, isumannaallisaanermut programmit, mail (qarasaasiakkut allaqatiginnissut), sulianik ingerlatsisarnermi aqutseriaaseq allaffinnilu softwaret allat. Aaqqiissutit assigiissakkat taakku partiinit toqqarneqarpata allaffinni attaveqaatinut ilaasutut isigalugu atortulersuutinik softwarenillu ikkussuinermut, aserfallatsaaliinermut allatigullu ikiorsiinermut allaffeqarfik akeqanngitsumik ikiuussinnaavoq. Aaqqiissutinulli assigiissagaanngitsunut akeqanngitsumik sullissisoqarsinnaassanngilaq.
Inatsisartunut ilaasortat partiillu allatseqarfiisa atugassaattut kopeerivinnik ataatsimoorussanik partiit torsuusaanni ullumikkut peqarpoq. Inatsisissatut siunnersuut naapertorlugu kopeeriviit taakku ingerlatsivigineqarnerat Inatsisartut allaffeqarfiannit isumagineqarunnaassaaq, tassungalu ilaapput printerit qalipaatitassaannut kopeerinermilu pappilianut aningaasartuutit. Tamatuma kingorna kopeeriviit ingerlanneqarnerannut aningaasartuutit partiinut naalakkersuinermik suliaqartunut nuunneqassapput. Partiit namminneq naliliinertik pisariaqartitsinertillu naapertorlugu kopeeriviit ingerlanneqarnerat ikiorserneqarnissarlu pillugit suleqatigiinnisamik Inatsisartut allaffeqarfiannik nioqquteqartartumilluunniit avataaneersumik isumaqatigiissuteqarsinnaapput. Qarasaasiatigut attaveqarnermik agguaassisarnermillu atuilerneq pissutigalugu kopeeriviit pingaaruteqassusiat ukiuni aggersuni annikilliartussasoq naatsorsuutigineqarpoq.
Aalajangersagaq partiit Inatsisartunulluunniit ilaasortat sullississutinik pissarsinissamut inatsisitigut nutaamik piumasaqaateqarsinnaanerannik piginnaatsitsinngilaq.
Nr. 2-mut 3-mullu.Partiinut, kattusseqatigiinnut kisimiillutillu qinigaasunut tunngaviusumik tapiissutit 350.000 kr.-inik aammalu qinigaasunut ataasiakkaanut tapiissutit 45.000 kr.-inik aalajangersakkakkut qaffanneqarput. Inatsimmik allannguinikkut partiinut aningaasartuutaanerussutaalersut taarsiissuteqartinniarlugit qaffaaneq pivoq, tak. inatsisissatut siunnersuummut nalinginnaasumik nassuiaatit.
Nr. 4-mut.Aalajangersagaq nutaajuvoq. Aningaasat maanna Inatsisartut allaffeqarfiannit partiinut nuunneqartussatut siunnersuutigineqartut atorneqarnerat pillugu Nunatta Karsia aammalu Inatsisartut ukiumoortumik nalunaarusiaat aqqutigalugit manna tikillugu tamat paasisaqarsinnaasarsimapput. Partiilli naalakkersuinermik suliaqartut aningaasaqarnerannik tamat manna tikillugu paasisaqarsinnaasarsimanngillat. Taamaalillunilu nuussinikkut tamat paasisaqarsinnaanerata maannamut sanilliullugu annikilleriarsinnaanera aarleqqutigineqarsinnaavoq. Tamanna naapertuutinngitsutut isigineqarpoq. Ajornartorsiut taanna pinngitsoortikkumallugu aningaasatigut tapiissutitut tunniunneqartut atorneqarnerat pillugu naatsorsuutinik nassiunneqartunik Inatsisartut Siulittaasoqarfiata tamanut saqqummiussinissamik peqquneqarnissaa aalajangersakkami matumani siunnersuutigineqarpoq. Taamaalilluni partiip ukiumut naatsorsuutaanik tamarmiusunik nassiussinissaq partiimit toqqarneqarpat, taakku tamanut saqqummiunneqassapput. Naatsorsuutilli pisortanit tapiissutigineqartunut tunngasuinnarnik imallit partiip nassiussinnaavai. Tamanut saqqummiussineq assersuutigalugu Inatsisartut nittartagaatigut pisinnaavoq.
Nr. 5, 6 aamma 7-imutAllannguinikkut Inatsisartut inatsisaanni oqaatsit atorneqartut Kalaallit Nunaanni Namminersorneq pillugu inatsimmi nr. 473-imi, 12. juni 2009-meersumi oqaatsinut atorneqartunut naapertuuttunngortinneqarput.
§ 2-mutInatsisip 1. januar 2010-mi atortuulernissaa siunnersuutigineqarpoq, tassa aningaasat ukiuata aggersup aallartinnerani.