20. august 2009 UKA 2009/121
Siunnersuummut oqaaseqaat
Oqaaseqaatit nalinginnaasut
1. AallarniutNunaoil A/S 1984-imi pilersinneqarpoq, suliassaralugit danskit/kalaallit pisortaasa ataatsimoortumik Kalaallit Nunaanni ikummatissanik sammisaqarneranni peqataasussatut. Selskabi danskit aamma kalaallit inatsisaat makku naapertorlugit pilersinneqarpoq, naalagaaffiup aamma namminersornerusut Nunaoil A/S-ip pilersinnerani ingerlanneqarneranilu naleqqussaasuusut, tamakkununnga ilaallutik selskabip aktiatigut aningaasaatai kiisalu selskabip ingerlanneqarnerani Folketingip aamma Inatsisartut ingerlaavartumik ilisimatinneqartarnissaat:
a. inatsit nr. 595 ulloq 12. december 1984-imeersoq, Kalaallit Nunaanni ikummatissanik sammisaqarnermi selskabimik pilersitsinissaq pillugu, allanngortinneqarluni inatsit nr. 106 ulloq 11. marts 1987-imeersoq, inatsit nr. 1076 ulloq 22. december 1993-imeersoq aamma inatsit nr. 1023 ulloq 23. december 1998-imeersoq aqqutigalugit.
b. Inatsisartut inatsisaat nr. 10 ulloq 22. november 1984-imeersoq, Kalaallit Nunaanni ikummatissanik sammisaqarnermi selskabimik pilersitsinissaq pillugu, allanngortinneqarluni inatsisartut inatsisaat nr. 2 ulloq 2. april 1987-imeersoq, inatsisartut inatsisaat nr. 12 ulloq 28. oktober 1993-imeersoq aamma inatsisartut inatsisaat nr. 12 ulloq 30. oktober 1998-imeersoq aqqutigalugit.
Selskabip ingerlanneqarneranut siunertaq pingaarneq tassaasimavoq, Kalaallit Nunaanni ikummatissanik sammisaqarnerup inerisarneqarnissaanut peqataanissaq, ikummatissanillu sammisaqarnermi aningaasarsiornermut samminerusunik sinaakkusersuinissaq. Nunaoil A/S ikummatissanik akuersissuteqarnerni tamani selskabinut uuliasiortunut Kalaallit Nunaanni tunniunneqartartuni tamani misissuinerup nalaani akiliuteqarnani suleqataasutut peqataasarpoq, piginneqataassutit allanngorartuullutik 8 %-init 12½ %-inut. Misissuinissamut piiaanissamullu akuersissutit 2009-p aallartinnerani 13-inik amerlassuseqarput, sumiiffiillu ikummatissanut akuersissuteqarfiusut ataatsimut annertussuseraat 130.000 km2 missaat.
Tamakku saniatigut Nunaoil A/S-ip Kalaallit Nunaata ikummatissatigut ilimanaateqarnerata ilisimaneqarnerulernissaa suleqataaffigaa, nammineerluni imaluunniit pisortat suleqatillu allat peqatigalugit paasissutissanik katersineq tuniniaanerlu aqqutigalugit. Taamaalilluni Nunaoil A/S KANUMAS-imut peqataavoq, selskabit uuliasiortut Qimusseriarsuarmi, Kalaallit Nunaata Kitaani aamma Tunup Avannaatungaani Grønlandshavet-imi sajuppillatsitsisarnikkut paasissutissanik katersisut suleqatigiiffianni.
Siunnersuuteqarnermi inatsisartut inatsisaat nr. 10 ulloq 22. november 1984-imeersoq atorunnaarsinneqarpoq, Kalaallit Nunaanni ikummatissanik sammisaqarnermi selskabimik isumaginnittussamik pilersitsinissaq pillugu inatsit, taassumunngalu ilutigitillugu Nunaoil A/S pillugu inatsisartut inatsisaat atorunnaarsinneqarluni, takuuk inatsisitigut nalunaarut nr. 87 ulloq 9. februar 1999-imeersoq Kalaallit Nunaanni ikummatsissanik sammisaqarnermi selskabimik isumaginnittussamik pilersitsinissaq il.il. inatsit, Kalaallit Nunaata Namminersornera pillugu inatsisissamut siunnersuummi aalajangersagaq § 26-miittoq aqqutigalugu.
2. Siunnersuutip immikkoortui pingaarneritNaalakkersuisut aamma danskit naalakkersuisuisa akornanni isumaqatigiissutigineqarpoq, Kalaallit Nunaata Namminersornera pillugu inatsisip atuutilernerani naalagaaffiup Nunaoil A/S-imi aktiaatai Namminersorlutik Oqartussat pisiarissagaat. Tamatumunnga Namminersorlutik Oqartussat akiliutigissavaat selskabip 31. december 2007 naleqqatigiisitsinerani selskabip namminerisamik aningaasaataasa naatsorsuutinut ilanngussimasaanni naalagaaffiup piginneqataassutaasa amerlaqataat, taakkununnga ilanngunneqassallutik Nunaoil A/S-imi naalagaaffiup aktiaataasa Namminersorlutik Oqartussat pisiarinissaasa tungaannut naalagaaffiup piginneqataassutitigut akiliutigisimasaasa amerlaqataat.
Siunnersuutip Namminersorlutik Oqartussat piginnaatippai, kisimiilluni piginneqataasutut Nunaoil A/S-imi aktiaatitigut aningaasaatit tamakkiisut pigilissallugit, Inatsisartut inatsisaata 1. januar 2010-mi atuutilerneratigut. Namminersorlutik Oqartussat naalagaaffiup aktiaataanik, ullormit taaneqartumit atuutilersussamik pisinermut atatillugu aningaasaliissutitut kingunerisassai 2009-mut aningaasanut inatsimmi ilassutitut aningaasaliissutinik qinnuteqarnikkut pissarsiarineqassapput.
Inatsisit siunnersuutip akuerineqarnerata taamaatinneqartussat eqqarsaatigalugit, siunnersuutip § 2, imm. 2 aalajangersakkat malillugit aktiaatinik pisinissaq periarfissanngussaaq kiisalu Nunaoil A/S-imi aktiaatinik nutaanik pisisitsinissaq, selskabimut allamut Namminersorlutik Oqartussanit tamakkiisumik pigineqartumut.
3. Aningaasarsiornikkut allaffissiornikkullu pisortanut kingunerisassatKalaallit Nunaanni Namminersorneq pillugu inatsisissatut siunnersuummut oqaaseqaatini nalinginnaasuni taaneqareersutut Naalakkersuisut aamma danskit naalakkersuisui isumaqatigiipput, naalagaaffiup Nunaoil A/S-imi piginneqataassutai namminersorneq pillugu inatsisip 21. juni 2009 atuutilernerani Namminersorlutik Oqartussanut pisiaritissagai.
Taamattaaq Kalaallit Nunaanni Namminersorneq pillugu inatsisissatut siunnersuummut nalinginnaasumik oqaaseqaatini aamma taaneqarpoq, naalagaaffiup piginneqataassutai selskabip 31. december 2007 naleqqatigiisitsinerani namminerisamik aningaasaatit naatsorsornerini naalagaaffiup piginneqataassutaasa amerlaqataanik Namminersorlutik Oqatussat akilissagaat, taakkununnga qaavatigut ilanngullugit Nunaoil A/S-imi naalagaaffiup aktiaataasa namminersornerup pisiarinissaasa tungaannut naalagaaffiup piginneqataassutitigut akiliutigisimasaasa amerlaqataat. Nunaoil A/S-ip 2007-imi ukiumoortumik nalunaarusiaani naleqqatigiisitsinermi ersippoq, ulloq 31. december 2007 namminerisamik aningaasaatit amerlassuseqartut 41.958.000 kr., taakkunannga naalagaaffiup piginneqataassutigalugit 50 %-it, aningaasanngorlugit 20.979.000 kr. Ukioq 2008-mi naalagaaffiup pigineqataassutitut akiliutigai 6 mio. kr.
Inatsisartut 2009-mut aningaasanut inatsisaanni Namminersornerullutik Oqartussat piginneqatigiissutitut akiliutigisassaattut 6 mio. kr. missingersuutigineqarput, naalagaaffiup piginneqatigiissutitut akiliutaasa amerlaqataat.
Selskabip aningaasaataasigut inissisimaneri periarfissiipput naalagaaffik aamma Namminersornerullutik Oqartussat 2009-mi piginneqataassutinut aningaasaliinissaat pinngitsoorsinnaalluni. Taamaalilluni naalagaaffiup aktiaataannut akiliutigineqassapput 26.979.000 kr.
Naalagaaffiup Nunaoil A/S-imi aktiaataasa pisiarinissaasa kinguneraat 2009-mut aningaasanut inatsimmi ilassutitut aningaasaliissutigineqartussatunut ilanngullugit qinnutigineqarnerat. Inatsisartut 2009-mut aningaasanut inatsimmi Nunaoil A/S-imi piginneqatigiissutitut aningaasaliinissamut 6 mio. kr. ilanngunneqareerput, aningaasaliissutillu konto pingaarnermi 10.13.11-mi Aktieselskabinut aningaasanngorlugit aningaasartuutinut Nunaoil A/S-imi naalagaaffiup aktiaataanik pisinissamut qinnuteqaatit amerlineqarput 20.979.000 kr.-nik.
Kalaallit Nunaanni Namminersorneq pillugu inatsisissatut siunnersuummut oqaaseqaatini nalinginnaasuni eqqaaneqarpoq, naalagaaffiup Nunaoil A/S-imi piginneqataassutaanik tunisinermi isertitat namminersorneq pillugu inatsit eqqarsaatigalugu isertitatut nassuiaatinut ilanngunneqanngitsut. Nunaoil A/S-imi Namminersorlutik Oqartussat piginneqataassutaanik tamakkiisumik ilaannakortumilluunniit kingusinnerusukkut tunisineqassagaluarpat, pigisatut allatulli tunisatut isertitatut nassuiaatinut ilaatinneqassapput.
4. Inuussutissarsiornermik ingerlatsisunut innuttaasunulluunniit aningaasaqarnikkut allaffissornikkullu kingunerisassatNaatsorsuutigineqanngilaq siunnersuut inuussutissarsiornermik ingerlatsisunut imaluunniit innuttaasunut aningaasaqarnikkut allaffissornikkullu kinguneqassasoq.
5. Avatangiisitigut pinngortitakkullu kingunerisassatNaatsorsuutigineqanngilaq siunnersuut avatangiisitigut pinngortitakkullu kinguneqassasoq.
6. Naalagaaffeqatigiinnermut aamma Namminersorlutik Oqatussanut attuumassutitKalaallit Nunaanni namminersornerup eqqunneqarneranut atatillugu Kalaallit Nunaanni aatsitassanik sammisaqarnermut pisortat peqataaneranni isertitat eqqarsaatigalugit Naalakkersuisut aamma danskit naalakkersuisuisa akornanni isumaqatigiissummi siunnersuut ilaavoq. Isumaqatigiissummut tassunga ilaatillugu namminersolutik oqartussat qulakkiissavaat, naalagaaffiup Nunaoil A/S-imi aktiaatiminik tunisereernerani, naalagaaffiullu Namminersorlutik Oqatussanut tapiissutai 0 krooninut appartinnissaasa tungaannut, naalagaaffik selskabimi siulersuisuini ilaasortamik ataatsimik toqqaasinnaasoq.
7. Pisortanut kattuffinnullu il.il. tusarniaaneqSiunnersuut pillugu tusarniaaneq makkununnga nassiunneqarpoq; namminersornerusuni naalakkersuisoqarfiit, GrønlandsBANKEN, kukkunersiuisut naalagaaffimmit akuerisat Deloitte, Energistyrelsen, Statsministeriet, Sulisitsisut Peqatigiiffiat aamma Nunaoil A/S. Tamarmiullutik suli tusarniaaneq akissuteqarfiginngilaat.
Ataani pineqartuni tusarniaanermi akissutit imarisai sammisakkaarlugit nassuiaatigineqassapput, kiisalu inassutigisatut tiguneqarsimasut inatsisissatut siunnersuummi matumani qanoq ilanngunneqarniarsimanersut. Oqaaseqaatit inatsisiliornermut tunngalluinnartut ilanngunneqanngillat.
Tusarniaanermi allakkatigut Nunaoil A/S-ip akissuteqarnerani kiisalu oqaasiinnakkut Aatsitassanut Pisortaqarfimmik oqaloqatiginninnernit innersuuppai, saniatigullu siunnersuummut immikkut oqaaseqaateqarani.
Sulisitsisut Peqatigiiffiata siunnersuutip siunertaa oqaaseqaateqarfiginngilaa, namminersorneq pillugu inatsisip akuerineqaqqammersup kinguneriinnarmagu.
Nunaoil A/S-ip inassutigisaatut selskabip pisortaqarnera pillugu aalajangersakkat kiisalu siulersuisut katiterneqarneranni piumasaqaatit siunnersuummit peerneqarput. Aalajangersagaq § 3-tut ilanngussimasoq ima oqaasertaqarsimavoq:”§ 3. Selskabip ataatsimeersuarnerani siulersuisunut inunnik tallimanik (5) ukiunut marlunnut ilaasortaasussanik qinersisoqartarpoq.
Imm. 2. Naalagaaffiup Namminersorlutik Oqartussanut tapiissutigisartagaasa 0 kroninngornissaat tikillugu naalagaaffik siulersuisunut ilaasortanngortitassamik selskabip ataatsimeersuarnerani inummik ataatsimik qinigassanngortitsisinnaavoq.
Imm. 3. Siulersuisut tamarmiullutik inatsisitigut aningaasarsiornikkullu tunngasunik annertuumik ilisimasaqartussaapput kiisalu ikummatissanik misissuinermut piiaanermullu tunngasutigut inuussutissarsiornikkut annertuumik misilittagaqartussaallutik.
Imm. 4. Siulersuisunut ilaasortat Naalakkersuisunut imaluunniit Inatsisartunut ilaasortaasussaanngillat.”Tamatumunnga atatillugu Nunaoil A/S-ip immikkut tikkuarsimavaa, siunertat taakku ajornaatsumik anguneqarsinnaasut, selskabip aqunneqarnera pillugu selskabip malittarisassaani siulersuisullu suleriaasiannik naleqqussaanikkut.
Aalajangersakkani § 3-p peerneqarneranut tassungalu oqaaseqaatinut atatillugu Inatsisiliorfik oqaaseqarpoq, Kalaallit Nunaanni Aatsitassanut Aningaasaateqarfik pillugu inatsisissatut siunnersuummi innersuussinermi tunngavigisami, Inatsisartunut imaluunniit Naalakkersuisunut ilaasortat siulersuisunut ilaasortaannginnissaat pillugu, eqqarsaatigissallugu peqqutissaqarsinnaasoq, aningaasaateqarfiup aqunneqarnerani allaffissorneranilu inatsisartut inatsisaanni tassani kapitali 7-imi aalajangersakkat allat Nunaoil A/S-mut najoqqutassaasinnaasut. Tamannali kissaatigineqanngippat, taaneqaannarsinnaavoq, selskabip maleruagassai piginnittuunermut pissutsit nutaat atuutilersut naapertorlugit allanngortinneqarsinnaasut.
Sulisitsisut Peqatigiiffiata (GA) orniginartippaa inatsisartut inatsisaanni Nunaoil A/S-ip aqunneqarnera pillugu isummerneqartuuppat, taamaaliornikkut Nunaoil A/S-ip pisortaanut piumasaqaatit aatsitassanut aningaasaateqarfimmi akuerineqaqqammersumi aqutsisunut piumasaqaatit assingi piumasaqaatigineqarsinnaasut. GA’p tamanna pissusissamisoorsoraa, Nunaoil A/S, uuliamik nassaartoqassappat, aatsitassanut aningaasaateqarfimmut akiliisartussaammat pingaaruteqartoq, aqutsisunullu taama piumasaqaateqartoqanngippat assigiissaartutut sunniuteqassanani.
Nunami immini tunngasunut Siulersuisoqarnermullu immikkoortortap tikkuarpaa, siunnersuummi taakkununngaluunniit atasunut oqaaseqaatini toqqaannartumik ersinngitsoq, sooq § 2, imm. 2-mi aktiaatinik tamakkiisumik ilaannakortumilluunniit aktieselskabimut tunisinissamut periarfissaqartoq, Kalaallit Nunaanni Namminersorlutik Oqartussanit toqqaannartumik toqqaannanngitsumilluunniit tamakkiisumik pigineqartunut. Taamattaaq eqqaaneqanngilaq pineqartup inatsisitigut periarfissaani siunertat suut eqqarsaatigineqassanersut, aalajangersakkami imaaliallaannaq nalilerneqarsinnaasumik.
Nunami immini tunngasunut Siulersuisoqarnermullu immikkoortortap inassutigisai aalajangersakkami § 2, imm. 2-mi oqaaseqaatini itinerusumik nassuiaateqarnerusumillu oqaasertaliinikkut malinneqarput.
Inatsisileriffiup apeqquteqaatigaa, eqqarsaatigineqarnersoq Namminersorlutik Oqartussat aatsitassanut inatsisip nutaap akuerineqarnerani kiisalu Aatsitassat pillugit Isumasioqatigiit atorunnaarsinneqarnerisigut aatsitassarsiornerup siunissami tiguneqarneranut atatillugu naalakkersuinikkut Nunaoil A/S-imik nakkutilliisussanik immikkut ataatsimiititaliamik pilersitsineqassanersoq.
Sammisaq taanna eqqarsaatigalugu Nunami immini tunngasunut Siulersuisoqarnermullu immikkoortortap paasissutissat ujartorpai, § 3, imm. 1 aamma 3-mi ataatsimiititaliaq suna innersuussutigineqarnersoq.
Tamanna tunngavigalugu § 3-mut oqaaseqaatit itisilerneqarput, tassani erseqqinnerusumik erseqqissaatigineqarluni, tulluarnerusutut isumaqarfigineqartoq Inatsisartut namminneq aalajangerpassuk, aatsitassarsiornerup tiguneqarnerani maanna siunissamilu suliassat Nunaoil A/S-imut tunngasut, naalakkersuinikkut suliarineqarnissaat.
Siunnersuummut oqaaseqaatit eqqarsaatigalugit GA isumaqarpoq, malugineqaqqusariaqartoq, naatsorsuutigineqassasoq landskarsip ukiumoortumik aningaasaliissutigisartagai ullumikkornit 6 mio. kr.-nik amerlanerusunik akiliisoqartassasoq, selskabip ingerlanneqarnera qulakkeerniarlugu, tassalu ingerlatsinermi aningaasartuutit pisariaqartut naalagaaffiup akiliutigisartagaasa amerlaqataat.
Tamatumani malugeqquneqassaaq Nunaoil A/S-imut ukiumoortumik aningaasatigut tapiissuteqartarnermi apeqqutaasoq, ukiunut tulliuttunut aningaasanut inatsisissatut siunnersuutini Inatsisartut suliarinnittarnerannut atatillugu isummerfiginnittarneq.
Aalajangersakkanut ataasiakkaanut oqaaseqaatit
§ 1-imut§ 1-imi aalajangersakkatut siunnersuummi pineqarpoq Kalaallit Nunaanni ikummatissanik sammisaqartarneq selskabip suliassarissagaa kiisalu suliassat Kalaallit Nunaanni avataanilu tamatumunnga atatillugu pissusissamisoortut suliarisassagai. Selskabip ingerlanneqarneranut siunertaq pingaarneq tassaassaaq ikummatissanik misissuinerup nalaani akuersissutini Kalaallit Nunaanni uuliasiortunut tunniunneqartartuni akiliuteqarnani suleqataanissaq, ikummatissanillu sammisaqarnerup ineriartornera ilutigalugu selskabi piiaanermut akuersissutini suleqataasutut akileeqataasartutullu suleqataalluni peqataasassasoq. Tamakku saniatigut Kalaallit Nunaata ikummatissatigut ilimanaateqarnera pillugu paasissutissanik ilisimasanillu pissarsiorneq selskabip suliaanut pingaarutilinnut suli ilaassaaq.
§ 2-mutImm. 1-imut
Piginnittuunissamut pissutsit pillugit aalajangersakkat malitsigissavaat naalagaaffiup Nunaoil A/S-imi aktiaataanik Namminersorlutik Oqartussat pisinissaat, soorlu Kalaallit Nunaanni Namminersorneq pillugu inatsisip atuutilernerani danskit aamma kalaallit naalakkersuisuinit isumaqatigiissutigineqartutut.
Imm. 2-mut
Aalajangersakkami inatsisit periarfissaasa iluanni Naalakkersuisut aalajangersinnaasut, selskabip sammisai suliffeqarfiup nutaamik aaqqissuunneratigut aaqqissuussinerup allanngortinneqarnissaanut aalajangiisinnaasut. Siunissami suliffeqarfiup aaqqissuunneqarnerani aaqqissuussinikkut allannguinissamut aalajangiinissamut periarfissat imaluunniit piginneqatigiinnikkut aaqqissuussinermi taamaallaat naatsorsuutigineqarsinnaavoq, ikummatissanut akuersissutip misissuinermit qalluinermut ikaarsaariarnerani. Qalluinermut ikaarsaariarneq selskabip sammisaanik annertuumik allanngortitsineqassaaq, aningaasanillu pissarsinissamik kinguneqartussaalluni selskabi ikummatissanik tunisassiornermi peqataasinnaassappat. Taamaalilluni aalajangersagaq periarfissiissaaq, inatsisit periarfissiinerisa iluanni, suliffeqarfissuarmi imaluunniit piginneqatigiinnerup aaqqissuunneqarnerani allannguinissaq aalajangiunneqarpat, siunnersuummi taaneqartutut selskabip siunertai eqquutsinniarlugit tamanna siunertaqarnerussappat.
§ 3-mutAatsitassanik sammisaqarneq aningaasarsiornikkut inuussutissarsiornikkullu Kalaallit Nunaannut pingaaruteqarnerujartornissaa naatsorsuutigineqarpoq, Namminersorlutik Oqartussallu siunissami aatsitassarsiornermik tigusineranut atatillugu Inatsisartunut pissusissamisuussaaq ataatsimiititaliamik immikkut pilersitsisoqarnissaa, sammisami naalakkersuinikkut paasisaqarnissamik nakkutilliinissamillu isumaginnittussamik. Siunnersuummi siunertarineqanngilaq, Inatsisartut siunissami aatsitassanut ataatsimiititaliamik immikkut ittumik pilersitsinissaannut aalajangernissaannut akornusiinissaq imaluunniit Inatsisartut ataatsimiititaliaasa allat akornanni akisussaaffiit suliassallu agguataarnerinut akornusiinissaq siunertarineqarnani.
Inatsisartut Aningaasaqarnermut Ataatsimiititaliaata Inatsisartut aamma Naalakkersuisut pillugit inatsisartut inatsisaat § 16 a aqqutigalugu Naalakkersuisut aningaasaliissutissatut qinnuteqaataat aamma aningaasanik tapiisarneq imaluunniit selskabimut qularnaveeqqusiiniarluni qinnuteqaatit tunngavigalugit selskabi pillugu paasissutissanik Naalakkersuisut pissarseqqullugit peqqusisarnerannut periarfissanik siunnersuut allannguinngilaq. Inatsisartut aamma Naalakkersuisut pillugit inatsisartut inatsisaat § 16 a malillugu Aningaasaqarnermut Ataatsimiititaliap Naalakkersuisut najoqqutassanik, takussutissanit nalunaarusianik assigisaannillu sunilluunniit Naalakkersuisut pissarsinissaannik peqqusinnaavaat, ataatsimiititaliap suliarinninneranut pisariaqartitatut atorfissaqartitatullu isumaqarfigisaanik.
Taamattaaq siunnersuutip Inatsisartut Kukkunersiuinermut Ataatsimiititaliaa Inatsisartut aamma Naalakkersuisut pillugit inatsisartut inatsisaat § 17 a malillugu Naalakkersuisut Namminersorlutik Oqartussat piginneqatigiissutitigut soqutigisaanni Naalakkersuisut misissuinermik ingerlatsinissaannut piginnaatitsissut allanngortinngilaa.
Imm. 1-imutNaalakkersuisut selskabip ukiumoortumik nalunaarusiaanik Inatsisartunut ilisimatitsissutitut nassiussisarnissaannut pisussaaffiat imm. 1-imi maannamut aalajangersakkap ingerlateqqiinnassavaa, taamaattorli siunissami ataatsimiititaliamut Inatsisartut pilersitaanut nassiussineqartartussaalluni.
Imm. 2-mutManna tikillugu selskabimut pisussaaffik, selskabip ukiup siuliani suliarisimasani kiisalu siunissami sammisassatut pilersaarutini kiisalu taakkununnga aningaasaliissutissatut pilersaarutini pillugit ukiumoortumik nassuiaateqartarnissaa pillugu imm. 2-mi aalajangersagaq ingerlateqqinneqassaaq. Kalaallit Nunaanni ikummatissanik sammisaqarnermik isumaginnittussamik il.il. selskabi pillugu inatsisip, takuuk inatsisitigut nalunaarut nr. 87 ulloq 9. februar 1999-imeersoq, tamatigut ukiumoortumik nassuiaammik Energiministerimut nassiussisarnissaanik maannamut pisussaaffik kiisalu selskabip ukiumoortumik nalunaarusiaanik Folketingip ataatsimiititaliatut pilersitaanut nassiussisarnissamik pisussaaffik atorunnaarsinneqarpoq.
Imm. 3-mutImm. 3-mi aalajangersagaq tassaavoq, iliuusissanik inuiaqatigiinnut pingaaruteqartut imaluunniit Nunaoil-ip sammisaanik aaqqissuussinikkut annertuumik allannguuteqartussanik, Inatsisartut ataatsimiititaliaanut paasissutissiisarnissaanut pisussaaffik. Tunngaviusumik tamakku tassaasinnaapput ikummatissat pillugit akuersissutinut peqataalernissanut imaluunniit taamaatitsinissanik aalajangernerit, kiisalu pisortaanermik taarsiisoqassagaluarpat, assigisaannilluunniit aalajangernerit.
Imm. 4-mut:Imm. 2 aamma imm. 3 malillugit ilisimatitsissutini paasissutissat ilaat imaqarsinnaapput pisut apeqqutaatillugit isertuunneqartussaasunik. Tamakku tassaapput paasissutissat niueqatigiinnermi isertuussassatut isumaqarfigineqartut, kiisalu paasissutissat imarisaat malillugit tamanut saqqummiunneqartariaqanngitsut.
Taamaattoqartillugu Naalakkersuisut imaluunniit ataatsimiititaliap siulittaasua aalajangersinnaavoq, ilisimatitsissut aamma taassuma eqqartorneqarnissaa isertuussatut sammineqassasoq.
§ 4-mutSiunnersuutigineqarpoq Inatsisartut Inatsisaat atuutilissasoq 1. januar 2010.
Kalaallit Nunaanni ikummatissanik sammisaqarnermi suliarinnittussamik il.il. selskabi pillugu inatsisartut inatsisaat nr. 10 ulloq 22. november 1984-imeersup atorunnaarsinneqarnerata kinguneraa, naalagaaffiup Nunaoil-imi aktiaatai Namminersorlutik Oqartussanut tunineqassasut, Kalaallit Nunaanni Namminersorneq pillugu inatsisip 21. juni 2009 atuutilerneranut atatillugu.