23. novembari 2009 UKA 2009/121
allannguutissatut siunnersuut
uunga
Uunga siunnersuut: Nunaoil A/S pillugu Inatsisartut inatsisaat nr. xx ulloq xx qaammat 2009-meersoqSiunnersuutip aappassaaneerneqarnissaanut Naalakkersuisunit saqqummiunneqartoq
Inatsisissatut siunnersuutip taaguutaanut
1. Inatsisissatut siunnersuutip taaguutaa ima oqaasertalerneqassaaq:
”Siunnersuut uunga: Nunaoil A/S pillugu Inatsisartut inatsisaat nr. xx, uu. qqqq 2009-meersoq.”
§ 2-mut2. § 2, imm. 2 ima oqaasertaqassaaq:
”Imm. 2. Namminersorlutik Oqartussat aktiaateqarluni ingerlatseqatigiiffimmut toqqaannartumik toqqaanngitsumilluunniit tamakkiisumik Namminersorlutik Oqartussanit pigineqartumut inatsisartullu inatsisaanni matumani § 01, imm. 3-4, kiisalu § 3 malillugit siulersuisunut pisortanullu minnerpaamik assinginik piumasaqaateqarfiusumut Nunaoil A/S-imi aktiaatit kiisalu aktiaatinik nutaanik pissarsisinnaaneq tamakkiisumik ilaannakortumilluunniit tunniussinnaavaat.”
Paragraffit nutaat3. § 2 kingorna paragraffitut nutaatut ilanngunneqassapput:
”§ 01. Ingerlatseqatigiiffiup ataatsimeersuarnerani ukiunut marlunnut atuuttussamik siulersuisunut ilaasortassanik tallimanik qinigaaqqissinnaasunik qinersisoqartassaaq, taamaattorli § 02 takuuk.
Imm. 2. Naalagaaffik, naalagaaffiup Namminersorlutik Oqartussanut tapiissutaasa nul koruuninut annikillisinneqarnissaasa tungaanut, siulersuisunut ilaasortassamik ataatsimik toqqaasinnaavoq. Periarfissaq tamanna naalagaaffiup atorpagu ataatsimeersuarnermi siulersuisunut ilaasortassanik sisamaannarnik qinersisoqassaaq.
Imm. 3. Ikummatissanik ujarlerneq iluaquteqarniarnerlu eqqarsaatigalugit inatsisitigut, aningaasaqarniarnikkut inuussutissarsiornikkullu pissutsit pillugit qaffasissumik uppernarsaatitalimmik ilisimasaqarneq siulersuisut katitigaaneranni takuneqarsinnaassaaq.
Imm. 4. Siulersuisunut ilaasortaq Inatsisartunut imaluunniit Naalakkersuisunut ilaasortaasinnaanngilaq.§ 02. Siulersuisunut ilaasortaq ataatsimeersuarnermi qinerneqartoq tunuarpat piffissap qinigaaffiup sinneranut ilassutaasumik siulersuisunut qinersinissaq siunertaralugu Naalakkersuisut immikkut ittumik ataatsimeersuarnissamut ataatsimiigiaqqusissapput.
Imm. 2. Tamanna aamma atuuppoq Naalakkersuisut ilisimalerpassuk siulersuisunut ilaasortaq ataatsimeersuarnermi qinerneqartoq,
1) akiliisinnaajunnaartutut nalunaarutigineqarsimasoq,
2) iliuuseqarsimasoq pineqartup siulersuisuni ilaasortaaginnarnissaanik ataqqinassuseerutsitsisumik, imaluunniit
3) sivisuumik napparsimanini allatulluunniit sanngiillinini pissutigalugit siulersuisuni ilaasortatut suliassaminik isumaginnissinnaajunnaarsimappat, imaluunniit erseqqissumik piukkunnarunnaarsimappat.§ 03. Pisortassatut taamaallaat atorfinitsinneqarsinnaapput inuit akileraartarnermut inatsimmik sakkortunerusumik unioqqutitsisimasutut eqqartuunneqarsimanngitsut imaluunniit aningaasanik pinerluuteqarneq nakuusernerluunniit pillugit pinerluttulerinermik inatsimmi aalajangersakkanik unioqqutitsinermut eqqartuunneqarsimanngitsut. Kiisalu inuit minnerpaamik siulersuisunut qaffasissuserititanut nallersuuttumik qaffasissusilimmik suliatigut piginnaaneqarluartutut uppernarsaaserneqarsinnaasut kisimik atorfinitsinneqarsinnaapput, tak. § 01, imm. 3.”
§ 3-mut4. § 3 ima oqaasertaqassaaq:
Ӥ 3. Ingerlatseqatigiiffiup ukiumoortumik nalunaarusiaa akuerisaasoq Inatsisartut ataatsimiititaliaannut ilisimatitsissutitut Naalakkersuisut nassiutissavaat.
Imm. 2. Ingerlatseqatigiiffiup ukiup siuliani sammisarsimasani pillugit ukiumut ataasiartumik ingerlatseqatigiiffik nassuiaammik suliarinnittassaaq kiisalu ukiumut tulliuttumut siunissamullu ungasinnerusumut sammisassatut pilersaarutit kiisalu tamakkunannga aningaasalersuinissanut pilersaarutit pillugit nassuiaateqartassalluni. Nassuiaat ingerlatseqatigiiffimmik aqutsilluarnissaq pillugu ingerlatseqatigiiffiup politikkia pillugu paasissutissanik imaqassaaq. Nassuiaat ukiumoortumik nalunaarusiaq ilanngullugu Naalakkersuisut nassiuttassavaat imm. 1-imi eqqaaneqartoq malillugu.
Imm. 3. Tamakku saniatigut ingerlatseqatigiiffiup Naalakkersuisut aqqutigalugit Inatsisartut ataatsimiititaliatut pilersitaanut ingerlatseqatigiiffimmi iliuuserisimasat ilisimatitsissutigisassavai, inuiaqatigiinni annertuumik pingaaruteqartutut isumaqarfigineqartut imaluunniit ima sunniuteqassappata ingerlatseqatigiiffiup sammisaani aaqqissuussinikkut annertuumik allannguuteqartitsinernik kinguneqartussatut isumaqarfigineqarlutik. Ilisimatitsissut ataatsimiititaliamut nassiunneqassaaq paasissutissanik Naalakkersuisut tigusinerata kingorna ullut 14-it qaangiutsinnagit.
Imm. 4. Suliassani imm. 2-mut 3-mullu ilaatinneqartuni Naalakkersuisut aalajangersinnaavaat ilisimatitsineq tamatumaluunniit ilai isertuussassatut isigineqassasut. Paasissutissat imm. 2-mi oqaaseqatigiit aappaanni pineqartut kikkunnut tamanut saqqummiunneqarsinnaapput.”
Nassuiaatit nalinginnaasut
Allannguutissatut siunnersuutikkut pingaarnertut siunertarineqarpoq ingerlatseqatigiiffiup siulersuisuinik pisortaanillu toqqaasarnermut tunngaviusunik killiliussanik arlalinnik inatsisartut inatsisaata annertusineqarnissaa.
Tunngaviusumik killiliussatigut taakkunatigut ingerlatseqatigiiffiup aqutsisuisa ataatsimut pisariaqartunik piginnaasaqarnissaannik ingerlatseqatigiiffiup (taamalu aamma piginnittut: Namminersorlutik Oqartussat) soqutigisai naammassiniarneqarput.
Tamanna aktiaateqarluni ingerlatseqatigiiffimmut suugaluartumulluunniit Namminersorlutik Oqartussanit pigineqartumut tunngavoq, kisiannili immaqa immikkut pingaaruteqarluni ingerlatseqatigiiffinnut il.il. aningaasaqarniarnermik imminut napatittumik ineriartortitsisinnaanermut Namminersorlutik Oqartussat periarfissaat eqqarsaatigalugit aalajangiisuusumik sunniuteqarsinnaasunut.
Tamanna Kalaallit Nunaata Aatsitassarsiornermi Aningaasaateqarfia pillugu inatsisartut inatsisaata Inatsisartunit ilusilersorneqarneranut aalajangiisuulluinnarsimavoq. Taamaalilluni inatsisartut inatsisaannut pineqartumut siunnersuutip suliarineqarnerani Aningaasaqarnermut Ataatsimiititaliamit isumaqatigiittumit allannguutissatut siunnersuuteqartoqarpoq Naalakkersuisunit ilalerneqartumik.
Isiginiagassat taamaattut ilai aamma aktiaateqarluni ingerlatseqatigiiffik Namminersorlutik Oqartussanit pigineqartoq Nunaoil A/S eqqarsaatigalugu pingaarutilimmik inissisimapput.
Killiliussat inatsimmi aalajangersarneqartussatut siunnersuutigineqartut ingerlatseqatigiiffimmut malittareqqusani tapertalerneqarsinnaassapput sanioqqunneqarsinnaanatilli. Ingerlatseqatigiiffimmi aqutsisunik toqqaasarnermut qulliunerusumik killiliussat inatsisikkut aalajangersarneqarneratigut, ingerlatseqatigiiffik killiliussanik aalaakkaasunik qularnaariffigineqassaaq, taamatullu aamma aatsitassarsiornermut tunngasuni ingerlatseqatigiiffiup tutsuiginartutut ilisimasaqartutullu inissisimaneranik erseqqissaanermut siuarsaanermullu peqataassalluni.
Allannguutissatut siunnersuutikkut taamatuttaaq § 3, imm. 1-ip kalaallisuuani kukkuneq iluarsineqarpoq, soorlu aamma siunnersuutip qulequtaa taaguutinut nutaanut aalajangersarneqarsimasunut naapertuuttunngortinneqartoq. Kiisalu Inatsisartunut ilisimatitsissutaasartuni paasissutissat isertuussassat pillugit aalajangersagaq allanngortinneqarpoq, soorlu aamma aalajangersakkamut tamatumunnga nassuiaatini erseqqissarneqartoq, aalajangersagaq paasitinneqarsinnaatitaaneq pillugu inatsit malillugu suliassaq pillugu paasisaqarsinnaatitaanermut periarfissamik killiliinngitsoq.
Allannguutissatut siunnersuut Namminersorlutik Oqartussanut allaffissornikkut aningaasaqarnikkulluunniit kinguneqassanngilaq.
Aalajangersakkanut ataasiakkaanut nassuiaatit
Nr. 1-imutInatsisissatut siunnersuutip saqqummiunneqarnerata kingorna aalajangerneqarsimavoq inatsisartut inatsisaannut peqqussutaannullu danskisut taaguutit tassaalissasut ”inatsisartutlov” aamma ”inatsisartutforordning.” Allannguutissatut siunnersuutikkut siunnersuutip danskisuuata taaguutaa tamatumunnga naapertuuttunngortinneqarpoq.
Nr. 2-3-mutAllannguutissatut siunnersuummi nr. 2-3-imi siunertarineqarpoq Aatsitassarsiornermi aningaasaateqarfimmi Nunaoil A/S-imilu siulersuisunut pisortanullu piumasaqaatit annertunerusumik assersuunneqarsinnaanissaat.
§ 2, imm. 2-mutAalajangersakkakkut aalajangersarneqarpoq Namminersorlutik Oqartussat aktiaateqarluni ingerlatseqatigiiffimmut toqqaannartumik toqqaannanngitsumilluunniit Namminersorlutik Oqartussanit pigineqartumut Nunaoil A/S-imi aktiaatit (kiisalu aktiaatinik nutaanik pissarsisinnaaneq) tunniussinnaagaat. Tamatumanili piumasaqaataavoq ingerlatseqatigiiffik aktianik tunineqartoq minnerpaamik siulersuisunik pisortanillu toqqaasarneq eqqarsaatigalugu piumasaqaatinik Nunaoil A/S-imut atuuttunik piumasaqaateqarfiussasoq, makku eqqarsaatigalugit:
- siulersuisut piginnaasaat
- pisortap piginnaasai, aningaasatigut pisussaaffinnik naammassinnissinnaanera ataqqinassusialu.
§ 01, imm. 1-imutAalajangersakkami aalajangersarneqarpoq Nunaoil A/S-ip siulersuisui tallimanik ilaasortaqassasut, ukiut marlukkaarlugit qinerneqartartunik. Aalajangersagaq piffissaq atuuffissaq eqqarsaatigalugu Kalaallit Nunaanni Aatsitassarsiornermi Aningaasaateqarfik pillugu Inatsisartut Inatsisaanni § 11, imm. 2-mut naapertuuppoq.
Naatsorsuutigineqartariaqarpoq Naalakkersuisut siulersuisunut ilaasortat tamarmik imaluunniit ilaat qineqqittassagaat. Taamaalilluni siulersuisut sulineranni allannguuteqanngitsumik ingerlaannarsinnaanissaaq qularnaarneqassasoq.
§ 01, imm. 2-mutAalajangersakkakkut naalagaaffik siulersuisunut ilaasortanit tallimanit ataatsimik toqqaasinnaatitaavoq. Taamatulli toqqaasinnaatitaaneq taamaallaat atuutissaaq namminersorlutik oqartussat aatsitassarsiornermit isertittagaasa ima annertutigilernissaasa tungaannut namminersorneq pillugu inatsit naapertorlugu naalagaaffik Namminersorlutik Oqartussanut tapiissuteqartarunnaarluni. Aalajangersagaq inatsisissatut missingiummik Naalakkersuisut tusarniaassutigisimasaanniit aallaaveqarpoq.
§ 01, imm. 1-imi atuuffik qinigaaqqissinnaanerlu pillugit malittarisassat siulersuisunut ilasortamut naalagaaffiup toqqagaanut atuutinngillat. Siulersuisunut ilaasortaq naalagaaffimmit toqqarneqartoq nammineq siulersuisunit tunuarniuteqanngippat, taamaalillunilu naalagaaffiup nammineq aalajangersinnaavaa siulersuisunut ilaasortaatitani qaqugu taarsissanerlugu.
§ 01, imm. 3-mutAalajangersagaq siulersuisut tamarmiusut piginnaasassaannik aalajangersaaviusoq allatut oqaasertalilaarlugu Kalaallit Nunaata Aatsitassarsiornermi Aningaasaateqarfia pillugu Inatsisartut inatsisaanni § 11, imm. 1, oqaaseqatigiit pingajuannut naapertuuppoq. Pissusissamisoortutulli isigineqarsimanngilaq pigisanik nalilinnik aqutsineq aningaasaliisarnerlu pillugit qaffasissumik ilisimasaqarnissamik piumasaqaatip ilanngunneqarnissaa.
Piginnaasaqarnissamik piumasaqaat suliassaqarfik ingerlatseqatigiiffiup ingerlatsivigisaa pillugu siulersuisut annertuumik misilittagaqarnissaannik ilisimasaqarnissaannillu qularnaarinneqataassaaq.
Aalajangersagaq Naalakkersuisut “Kalaallit Nunaanni pitsaasumik ingerlatseqatigiiffimmik aqutsinermut kaammattuutit”-nut naapertuuppoq, tassani aalajangersarneqarmat siulersuisunut ilaasortassanik toqqaasoqartassasoq inunnik suliassamut uppernarsarneqarsinnaasunik piginnaasalinnik, taamatullu aamma siulersuisut katitigaanerisigut qularnaarniarneqartariaqartoq siulersuisut ataatsimut isigalugit ima piginnaasaqassasut suliassaminnik pitsaanerpaamik naammassinnissinnaanerminnut pisariaqartunik.
§ 01, imm. 4-mutSiulersuisunut ilaasortap Inatsisartunut Naalakkersuisunulluunniit ilaasortaasinnaannginnerinik aalajangersagaq, inatsisissatut missingiummik Naalakkersuisut tusarniaatigisimasaannik aallaaveqarpoq. Aalajangersagaq Kalaallit Nunaata Aatsitassarsiornermi Aningaasaateqarfia pillugu inatsimmi § 12, imm. 2-mut naapertuuppoq.
Naalakkersuisut pisussaaffigaat Namminersorlutik Oqartussat piginnittutut soqutigisaasa isumaginissaat Inatsisartunut naalakkersuinikkut akisussaallutik. Siulersuisuni ilaasortaaneq tunngaviusumik soqutigisatigut aporaaffiusinnaavoq Naalakkersuisut (aktiaateqarluni ingerlatseqatigiiffik namminersorlutik oqartussanit pigineqartoq Nunaoil eqqarsaatigalugu) nakkutilliisussatut inissisimanerata, taamatullu aamma Inatsisartut (Naalakkersuisut eqqarsaatigalugit) nakkutilliisussatut inissisimanerata akornanni.
Naalakkersuisut “Kalaallit Nunaanni pitsaasumik ingerlatseqatigiiffimmik aqutsinermut kaammattuutit”-ni kaammattuutigineqarpoq, ingerlatseqatigiiffiit tamakkiisumik ilaannakortumilluunniit namminersorlutik oqartussanit pigineqartut siulersuisuinut atorfilinnik imaluunniit naalakkersuinermik sulialinnik, piffissami pineqartumi nuna tamakkerlugu kommunimiluunniit qinikkatut inissisimasunik qinersisoqartassanngitsoq.
Taamaattorli Nunaoil A/S pillugu Inatsisartut inatsisaata aamma Kalaallit Nunaata Aatsitassarsiornermi Aningaasaateqarfia pillugu Inatsisartut akornanni assersuussisinnaanissaq siunertaralugu ilaasortaasinnaannginnermik aalajangersakkap atorfilinnut kommunalbestyrelsimulluunniit ilaasortanut atuutsinneqannginnissaa toqqarneqarsimavoq. Aalajangersagassarli aporfiussanngilaq assersuutigalugu “Kalaallit Nunaanni pitsaasumik ingerlatseqatigiiffimmik aqutsinermut kaammattuutit” naapertorlugit ingerlatseqatigiiffimmut malittareqqusani siulersuisunut ilaasortaasinnaanermut piumasaqaatinik sakkortusisanik aalajangersaasoqarpat.
§ 02, imm. 1-imutAalajangersakkakkut Naalakkersuisut pisussaatinneqarput siulersuisunut ilaasortaq tunuassagaluarpat ilassutaasumik qinersinissaq siunertaralugu immikkut ittumik ataatsimeersuariaqqusinissamut.
Aalajangersakkamut aktiaateqarluni ingerlatseqatigiiffiit pillugit inatsimmi § 50 tunngavigineqarpoq, tassani aalajangersarneqarluni siulersuisunut ilaasortaq qaqugukkulluunniit siulersuisunit tunuarsinnaasoq.
Aalajangersagaq akornutaassanngilaq Nunaoil A/S-imut malittareqqusani aalajangersarneqassagaluarpat ataatsimeersuarnermi sinniisussanik aalajangersimasunik amerlassusilinnik qinersisoqartassasoq, ilaasortanngortartussanik siulersuisunut ilaasortaq atorfimminik isumaginnissinnaajunnaarallarpat.
Ingerlatseqatigiiffimmut malittareqqusani aalajangersarneqarsimappat sinniisussamik qinersisoqartassasoq, siulersuisunut ilassutaasumik qinersisoqassatillugu orniginakkajussaaq Naalakkersuisut sinniisussat arlaat siulersuisunut ilaasortanngortippassuk.
§ 02, imm. 2
Aalajangersakkakkut Naalakkersuisut pisussaaffilerneqarput siulersuisunut ilaasortap allamik taarserneqarnissaa siunertaralugu immikkut ittumik ataatsimiigiaqqusisarnissamut, Naalakkersuisut ilisimalerpassuk ilaasortaq pineqartoq akiliisinnaajunnaartutut suliarineqartoq imaluunniit iliuuseqarsimasoq pineqartup siulersuisuni ilaasortaaginnarnissaanik ataqqinarunnaarsitsisumik. Tamanna aamma atuuppoq ilaasortaq pineqartoq napparsimanini allatulluunniit sanngiillinini pissutigalugit siulersuisuni ilaasortatut atorfimminik ingerlatsisinnaajunnaarpat, imaluunniit paasineqarpat taamatut sulinissaminut qularnanngitsumik piukkunnanngitsoq.
Aalajangersagaq imarisamigut Kalaallit Nunaata Aatsitassarsiornermi Aningaasaateqarfia pillugu Inatsisartut inatsisaanni § 13, imm. 2-4mut naapertuuppoq. Aalajangersakkakkut siulersuisunut ilaasortat – Kalaallit Nunaata Aatsitassarsiornermi Aningaasaateqarfia pillugu inatsisartut inatsisaannisut - pisussaaffilerneqanngillat tunuartarnissaminnut aningaasaqarnikkut pisussaaffimminik naammassinnissinnaanissamut, ataqqinassuseqarnissamut suliaqarsinnaassutsimullu inatsimmi piumasaqaatit naammassisinnaajunnaarunikkit. Akerlianik aalajangersakkami Naalakkersuisut pisussaaffilerneqarput – Naalakkersuisut ilisimalerpassuk siulersuisunut ilaasortaq akiliisinnaassuseqarnissamut, ataqqinassuseqarnissamut suliaqarsinnaassutsimullu inatsimmi piumasaqaatinik naammassinnissinnaanngitsoq – siulersuisunut ilaasortap pineqartup taarsernissaa siunertaralugu immikkut ittumik ataatsimeersuariaqqusinissamut.
Imm. 2, nr. 1 malillugu pineqartoq akiliisinnaajunnaartutut suliarineqalersimappat siulersuisunut ilaasortap taarserneqarnissaa siunertaralugu Naalakkersuisut immikkut ittumik ataatsimeersuariaqqusissapput.
Tamanna aamma imm. 2, nr. 2 malillugu atuuppoq siulersuisunut ilaasortaq iliuuseqarsimappat siulersuisuni ilaasortatut issiaannarnissamut ataqqinassuseerulluni.
Aalajangersakkat taakku assingi aningaasaateqarfiit pillugit inatsimmi § 13, imm. 3-mi aamma aningaasaateqarfiit inuussutissarsiornermik ingerlatallit pillugit inatsimmi § 14, imm. 3-mi nassaassaapput. Naatsorsuutigineqarpoq ataqqinassutsimik naliliisarnermi najoqqutassat aningaasaateqarfiit aningaasaateqarfiillu inuussutissarsiornermik ingerlatallit siulersuisuinut atuuttut malinneqassasut.
Imm. 2, nr. 3 malillugu siulersuisunut ilaasortamik taarsiinissaq siunertaralugu Naalakkersuisut immikkut ittumik ataatsimeersuariaqqusisassapput pineqartoq napparsimanini allatigulluunniiit sanngiillisimanini pissutigalugu atorfimminik ingerlatsisinnaajunnaarpat. Tamanna nalinginnaasumik assersuutigalugu atuutissaaq pineqartoq ataatsimiinnissamut takkussinnaanngippat imaluunniit silani silagalugu iliuuseqarsinnaanngippat, assersuutigalugu iisartagartornini pissutigalugu.
Tamanna aamma atuuppoq paasineqarpat siulersuisunut ilaasortaq taamatut atorneqarnissamut pisariaqartumik suliassamut atatillugu pikkorissuseqannginnini pissutigalugu piukkunnaateqanngitsutut paasineqarpat.
Aalajangersagaq taamaallaat siulersuisunut ilaasortanut ataatsimeersuarnermit qinerneqartunut atuuppoq. Siulersuisunut ilaasortat naalagaaffimmit toqqarneqartut qaqugukkulluunniit naalagaaffimmit taarserneqarsinnaapput, periarfissarlu tamanna atussanerlugu naalagaaffiup nammineq aalajangigassaralugu.
§ 03-mutAalajangersakkakkut ingerlatseqatigiiffimmi siulersuisut pisortamik/pisortanik atorfinitsitsisarnerat eqqarsaatigalugu piumasaqaatit assigiinngitsut aalajangersarneqarput. Inuit akileraartarnermik inatsisinik annertuumik unioqqutitsisimasutut eqqartuunneqarsimanngitsut imaluunniit pinerluttulerinermik inatsimmi aningaasatigut pinerluuteqarsimaneq persuttaasimanerluunniit pillugit aalajangersakkanik unioqqutitsisimasutut eqqartuunneqarsimanngitsut kisimik atorfinitsinneqarsinnaassapput. Taamatuttaaq taamaallaat inuit suliassamut tunngatillugu qaffasissumik, minnerpaamillu siulersuisunut ilaasortat piginnaasaattut qaffasitsigisumik, uppernarsarneqarsinnaasumik piginnaasallit kisimik atorfinitsinneqarsinnaassapput.
Aalajangersakkakkut inuit minnerpaamik siulersuisut piginnaasaattut qaffasissisulinnik suliamut atatillugu attuumassutilinnik piginnaasallit, taamatullu aamma ingerlatseqatigiiffiup ingerlatsinera eqqarsaatigalugu patajaassutsimik tunniusimanermillu ersersitsisinnaanermut tunngaviusumik ataqqinassuseqarnermik piumasaqaatinik naammassinnissimasut kisimik pisortatut atorfinitsinneqarsinnaanissaat qularnaarneqassaaq.
§ 3-mutImm. 1-imut
Allannguutissatut siunnersuutikkut § 3, imm. 1-ip kalaallisuuani kukkuneq iluarsineqarpoq.
Imm. 2-mutImm. 2-imi aalajangersagaq inatsisissatut siunnersuummut siullermeerinninnermi saqqummiunneqartumut naleqqiullugu allannguuteqanngilaq.
Imm. 3-mutAllannguutissatut siunnersuutikkut ingerlatseqatigiiffimmi iliuutsit inuiaqatigiinnut annertuumik pingaarutilittut imaluunniit ima pissusillit ingerlatseqatigiiffiup ingerlatsinerata aaqqissuussaanerani annertuumik allanngortitsisussatut isigineqartut pillugit Naalakkersuisut Inatsisartut ataatsimiititaliaannut ilisimatitsissuteqartussaatitaanerat piffissalerneqarpoq.
Taamatuttaaq Naalakkersuisut paasissutissanik tigusaqarneranniit kingusinnerpaamik ullut 14-it qaangiutsinnagit Naalakkersuisut ataatsimiititaliaq ilisimatittassavaat.
Imm. 4-mutAalajangersakkap malitsigisaanik Naalakkersuisut (sukumiinerusumik aalajangersakkanik killilerlugu – tamanna pillugu § 3, imm. 2-mut nassuiaatit takukkit) ingerlatseqatigiiffik pillugu ukiumoortumik ingerlaavartumillu nalunaarutaasartut eqqarsaatigalugit Inatsisartut ataatsimiititaliaat nipangiussisussaatissinnaavaat. Nipangiussisussaatitaaneq ilisimatitsissummut tamarmiusumut taassumaluunniit ilaannaanut tunngatinneqarsinnaavoq.
Naalakkersuisut Inatsisartunut Inatsisartullu ataatsimiititaliaannut saaffiginnittarnerat pisortat ingerlatsineranni suliat pilugit paasitinneqarsinnaatitaaneq pillugu inatsisartut inatsisaanni paasitinneqarsinnaatitaaneq pillugu malittarisassanut ilaatinneqarput. Taamaalilluni paasissutissat pineqartut inatsisartut inatsisaanni immikkut pineqarnissamik aalajangersakkanut ilaatinneqanngippata Naalakkersuisut pisussaapput suliamik paasisaqarnissamik noqqaassutit naammassineqarnissaannut.
Naatsorsuutigineqartariaqarpoq paasissutissat kikkut tamat paasitinneqarsinnaanerannut ilaatinneqartut eqqarsaatigalugit Inatsisartut ataatsimiititaliaat pineqartoq Naalakkersuisunit nipangiussisimatitsisussaatinneqartassanngitsoq.