6. november 2009 UKA 2009/126
Naartunermi, erninermi meeravissiartaarnermilu sulinngiffeqartarneq pillugu Inatsisartut inatsisissaattut siunnersuut
pillugu
Ilaqutariinnermut Ataatsimiititaliap
ISUMALIUTISSIISSUTAA
Inatsisissatut siunnersuutip aappassaaneerneqarnerani saqqummiunneqartoq
Ilaqutariinnermut Ataatsimiititaliaq suliarinninnermini ukuninnga inuttaqarpoq:
Inatsisartunut ilaasortaq Debora Kleist, Inuit Ataqatigiit
Inatsisartunut ilaasortaq Jane Petersen, Inuit Ataqatigiit
Inatsisartunut ilaasortaq Astrid Fleischer Rex, Demokraatit
Inatsisartunut ilaasortaq Ruth Heilmann, Siumut
Inatsisartunut ilaasortaq Naja Petersen, Atassut, sinniisussaq
Ulloq 13. oktober 2009-mi Inatsisartuni siullermeerinerup kingorna inatsisissatut siunnersuut Ilaqutariinnermut Ataatsimiititaliap misissorpaa.
ApeqqutitApeqqutit arlallit akineqarnissaannik Ilaqutariinnermut Ataatsimiititaliap Isumaginninnermut Naalakkersuisoq qinnuigaa. Naalakkersuisunut ilaasortap akissutaata nuutinnera Ilaqutariinnermut Ataatsimiititaliap apeqquteqaataanut ilanngullugu isumaliutissiissummut matumunnga ilanngussatut ilanngunneqarpoq.
Pisariaqarnera naapertorlugu akissut isumaliutissiissummi Ilaqutariinnermut Ataatsimiititaliamit ilanngunneqartassaaq.
Siunnersuutip siunertaa imarisaalu.Naartunermi, erninermi meeravissiartaarnermilu sulinngiffeqartarneq pillugu siusinnerusukkut inatsisiliaasarsimasut ataatsimoortinneqarnerat siunnersuutip matuma pingaarnertut imaraa. Siunnersuulli ataasiakkaanik ilassuserneqarpoq, soorluttaaq maleruagassaasimasut oqaasertalersorneqarnerat sukateriffigineqarlunilu erseqqissaavigineqarsimasoq, taamaaliornikkut inatsit ersarinneroqqullugu atuisunillu atoruminarneroqqullugu.
Siunnersuummi nutaatut ilanngunneqartut tassaapput:
1) Piffissamik sulinngiffeqarfiusumik kipititsisarneq pillugu maleruagassat
2) Nalunaarsugaasumik inooqatigisap sulinngiffeqartarnera ullormusiaqartarneralu pillugit maleruagassat
3) Meeravissiartaartut aammalu meeravissiartaarnissaq siunertaralugu angajoqqaarsiat sulinngiffeqartarnerat pillugu maleruagassat
Ilaqutariinnermut Ataatsimiititaliap oqaaseqaataiSiullermeerinermi siunnersuutip tapersersorluarneqarnera innersuussutigalugu ajornartorsiuteqarfiit ataasiakkaaginnaat Ilaqutariinnermut Ataatsimiititaliamit oqaaseqarfigineqassapput.
Inatsisiliassat nutaat ilisimaneqareersut ilanngullugit eqqarsaatigalugit kommunini sulianik ingerlatsisunut pikkorissartitsinissamik neqeroorutit pilersaarusiorneqartarnissaat Ilaqutariinnermut Ataatsimiititaliap kaammattuutigissavaa, taamaaliornikkut maleruagassat aalajangersimasut atuutilinnginneranni sulianik ingerlatsisartut pikkorissarnissamik sapinngisamik neqeroorfigineqartaqqullugit. Maleruagassiassat pikkorissarnerillu pilersaarutaasut kommuninit Namminersorlutillu Oqartussanit ataqatigiissaariffigineqartanerisa nukittorsarneqarnissaa pisariaqarpoq.
Siunnersuummi nutaartaasut Ilaqutariinnermut Ataatsimiititaliamit tamakkiisumik taperserneqarsinnaapput. Erninermut, meeravissiartaarnermut aammalu meeravissiartaarnissaq siunertaralugu angajoqqaarsiaanermut atatillugu sulinngiffeqartarnermi eqaannerusumik periarfissaqartitsisoqartariaqartoq Ilaqutariinnermut Ataatsimiititaliaq isumaqarpoq. Pisuni immikkut ittuni sulinermut attuumassuteqartuni peqataanissap aammalu toqqakkatut atuuffimmik ingerlatsisinnaanerup mattunneqarnissaa erninermut atatillugu sulinngiffeqartitsisarnermi siunertarineqanngilaq. Taamatuttaaq ilinniartut ilinniarnermik ilaannik, soorlu specialinik allannermik aammalu soraarummeernernik aalajangersimasunik ingerlatsinissamut sulinngiffeqarnerminnik taamaatitsinngikkaluarlutik killilimmik periarfissaqartariaqarput.
Meeravissiartaartut aammalu nalunaarsugaasumik inooqataasut sulinngiffeqarnissamut periarfissinneqarnerat pitsaalluinnartutut Ilaqutariinnermut Ataatsimiititaliamit isigineqarpoq.
Angajoqqaarsiat erseqqissumik taasamik annertussusilimmik erninermut atatillugu sulinngiffeqarnissamik siunnersuutikkut aamma ammaanneqarnerat Ilaqutariinnermut Ataatsimiititaliamit tamakkiisumik taperserneqarpoq, tamannalu meeqqat ilaqutariinni paarineqartut angajoqqaarsiallu atugaasa nukittorsarneqarnissaannik anguniagaqarnerup ilaatut isigineqarluni. Kiisalu inissiinerit patajaannerullutillu pitsaassuseqarnerusumik ingerlanneqarnissaannut aalajangersagaq peqataaqataassaaq. Tassunga atatillugu inatsisitigut pisussaaffigalugu iliuusissatut pilersaarutit kommuninit suliarineqarnissaat aalajangiisuulluinnarpoq, taakkumi angajoqqaarsiat sulinngiffeqarsinnaaneranni tunngaviusumik piumasaqaataammata.
Naalakkersuisut akissuteqaataanni allassimasutut allannguutissatut siunnersuummik saqqummiussinissaq pitsaasutut Ilaqutariinnermut Ataatsimiititaliamit isigineqarpoq.
Tamatuma saniatigut ataatassat meeqqamik meerarivinngisaminnik inooqatillit meerassamik sulinngiffeqassutiginissaannut periarfissinneqarnissaat siunnersuutikkut ammaanneqartariaqartoq Ilaqutariinnermut Ataatsimiititaliaq isumaqarpoq.
Ataataviusoq erninermut atatillugu sulinngiffeqarnissamik kissaateqanngippat periarfissaqanngippalluunniit angajoqqaassat taama periarfissinneqartariaqartut ataatsimiititaliamit amerlanerussuteqartut, Inuit Ataqatigiit, Atassut Demokraatillu isumaqarput.
Ataatassat meeqqamik meerarivinngisaminnik inooqatillit meerassamik sulinngiffeqassutiginissaannut ataatavittulli periarfissinneqartariaqartut ikinnerussuteqartoq Siumumeersoq isumaqarpoq.
Kiisalu piniartut nuliaattut eqqumiitsuliortutullu inissisimasut inatsimmi erseqqissaavigineqarnissaat Siumumit pisariaqartutut isigineqarpoq, taakkumi namminersortutut aamma sulisuusutut isigineqartariaqarmata.
Naalakkersuinermik suliaqartut isummernerat aappassaaneerinissamut Naalakkersuisunit isummerfigineqassasoq aammalu tamanna pillugu allannguutissatut siunnersuummik saqqummiussisoqassanersoq isumaliutigeqqullugu Ilaqutariinnermut Ataatsimiititaliamit kaammattuutigineqarpoq.
Inatsimmut nassuiaatit itisilerutaasut Ilaqutariinnermut Ataatsimiititaliamit qujassutigineqarput, nassuiaatilli taakku maleruagassanut nutaanut ilitsersuummi ilanngunneqarnissaat taperserneqarpoq.
InassuteqaatNaalakkersuisut allannguutissatut siunnersuutigilersaagaat ilanngullugit inatsisissatut siunnersuut akuersissutigineqassasoq ataatsimiititaliap isumaqatigiittup inassutigaa.
Taama oqaaseqarluni Ilaqutariinnermut Ataatsimiititaliap siunnersuut aappassaaniigassanngortippaa.
Debora Kleist
Siulittaasoq
Jane Petersen
Astrid Fleischer Rex
Ruth Heilmann
Naja Petersen
Knud Kristiansen sinnerlugu