30. oktober 2009

UKA 2009/116

 

Erngup nukingata innaallagissiornermut atorneqartarnera pillugu Inatsisartut inatsisissaattut siunnersuut
(Ineqarnermut, Attaveqarnermut Angallannermullu Naalakkersuisoq)

pillugu

Ineqarnermut Attaveqarnermullu Ataatsimiititaliap

ISUMALIUTISSIISSUTAA

Inatsisissatut siunnersuut aappassaaneerneqarnerani saqqummiunneqartoq

 

Ataatsimiititaliaq kingullermik suliarinninnermini ukuninnga inuttaqarpoq:

Inatsisartunut ilaasortaq Justus Hansen, Demokraatit, siulittaasoq
Inatsisartunut ilaasortaq, Olga P. Berthelsen, Inuit Ataqatigiit, siulittaasup tullia
Inatsisartunut ilaasortaq Anders Olsen, Inuit Ataqatigiit
Inatsisartunut ilaasortaq Kim Kielsen, Siumut,
Inatsisartunut ilaasortaq Ruth Heilmann, Siumut, sinniisussaq

Ulloq 6. oktober 2009-mi siullermeerinerup kingorna  ataatsimiititaliap siunnersuut erseqqinnerusumik naliliiffigaa, imalu oqaaseqaateqarniarluni:

Siunnersuummut tunuliaqutaasut

Ukiuni kingullerni pinngortitami isumalluutitta aningaasaqarnikkut imminut napatissinnaaneq anguniarlugu inuussutissarsiutinik ineriartortitsinermut atorluarneqarnissaat annertusiartortu­mik siunnerfigineqarsimasoq siunnersuuteqartoq siunnersuummut nassuiaatini aallarniutiga­lugu allappoq. Siusinnerusukkut aatsitassanik misissueqqaarnissamut piaanissamullu tunngavissanik pilersitsisoqartarsimasoq, taamatullu innuttaasunut inuiaqatigiillu aningaasaqarnerannut iluaqutaasumik erngup nukinganik isumalluutinik tunngaveqarluni suliffissuarnik ineriartortitsinissamut inatsisissatut siunnersuummi matumani tunngavissiisoqartoq siunnersuuteqartup aamma paasissutissiissutigaa.

Tamanna tunngavigalugu erngup nukingata innaallagissiornermut atorneqartarnera pillugu Inatsisartut inatsisissaannik siunnersuusiortoqarpoq. Siunnersuutip atuutilerneratigut Kalaallit Nunaanni nukissiornermut isumalluutissat mingutsitsiviunngitsut niuernerpalaartumik atorluarneqarnissaannut killissarititaasut pilersinneqassasut, avataaniit aningaasaliisoqarsinnaa­nera ammaanneqassasoq aammalu inuussutissarsiutinik nungusaataanngitsunik tunngaveqartunik nutaanik pilersitsinissaq ammaanneqassasoq siunnersuuteqartoq isumaqarpoq. Tamatuma peqatigisaanik siunnersuutip atuutilerneratigut Namminersorlutik Oqartussat erngup nukinganik isumalluutinik aamma erngup nukinganik innaallagissiorfinnik siunissamut ungasissumut atuisinnaanissaat, piffissamut killilikkamik akuersissutitigut aamma erngup nukinganik innaallagissiorfiit akeqanngitsumik Namminersorlutik Oqartussanut tunniunneqarsinnaanerisigut qulakkeerneqassasoq siunnersuuteqartoq aamma isumaqarpoq.

Killiliussatut inatsit pineqarmat suliassaqarfik pillugu maleruagassat erseqqinnerusut pilersikkumallugit Naalakkersuisut nalunaarutinik arlalinnik suliaqarnertik ingerlakkaat siunnersuuteqartup erseqqissaatigaa.

Tusarniaanermit akissutit

Siunnersuutip ataatsimiititaliami suliarineqarnerani atugassatut tusarniaanermut akissutit nuutinneri ataatsimiititaliap piniarpai. Tusarniaanerit marluk ingerlanneqarsimapput, taakkulu pillugit allakkianik ataatsimiititaliaq tigusaqarpoq.

Siunnersuummik suliarinninneq

Inatsisartuni siullermeerinermi siunnersuut ilalerneqarluartoq ataatsimiititaliamit maluginiar­neqarlunilu paasineqarpoq siunnersuut matumani pineqartoq assut isumaqatigiissutaasoq.

Pissutsit marluk Inatsisartut immikkoortumik suliarinninneranni immikkut sammineqartut ataatsimiititaliap maluginiarpaa.

Siullermik pisinnaatitaaffimmik pigisaqartup illoqarfinni qanittuni inuiaqatigiinnut nukimmik pilersuinissamut pisussaaffilerneqarsinnaaneranut apeqqut aappaattullu aningaasanut inatsiseqarfiusumi 2010-mi aningaasanut inatsisissatut siunnersuummi erngup nukinganik misissueq­qaarnernut (konto pingaarneq 73.95.02) aningaasaliissutaasut nassatarisaannik nunatta avannaani erngup nukinganik nukissiorfiliornissamik pilersaarutit ukiunik qulinik kinguaattoornissaannik oqaatigineqartut pillugit apeqqut.

Apeqqummut siullermut tunngatillugu apeqqut taanna siunnersuummi aalajangersakkat ataasiakkaat nassuiaataanni tamakkiisumik akineqartoq ataatsimiititaliaq isumaqarpoq.

Apeqqutip aappaanut tunngatillugu Ineqarnermut, Attaveqarnermut Angallannermullu Naalakkersuisumik ataatsimiititaliap ataatsimeeqateqarnerani 2010-mi aningaasanut inatsim­mut aningaasaliissutit kingunerisaannik erngup nukinganik nukissiorfiliornissamik pilersaarutit ukiunik qulinik kinguartoornissaannik oqaatiginninneq ilisarisinnaanngikkini Naalakker­suisunut ilaasortap ataatsimiititaliamut paasissutissiissutigaa. Kontomut pingaarnermut taaneqartumut aningaasaliissutitut immikkoortinneqartut 2009-mi aningaasanut inatsimmi qaffariaateqartut, qaffariarnerlu taanna 2010-mi aningaasanut inatsisissatut siunnersuummi ukiunilu missingersuusiorfinni aalajangiusimaneqartoq Naalakkersuisunut ilaasortap paasissutissiissutigaa. Taamaattumillu siunnersuummut ataatsimiititaliap tapersiinerata allanngortin­nissaanut ataatsimiinneq pissutissaqalersitsinngilaq.

Tamanna tunngavigalugu ataatsimiititaliap isumaqatigiittup siunnersuut Inatsisartunit akuersissutigineqassasoq inassutigaa.

Taama oqaaseqarluni Ineqarnermut Attaveqarnermullu Ataatsimiititaliap inatsisissatut siunnersuut Inatsisartunut aappassaaniigassanngortippaa.

 

	Justus Hansen, Siulittaasoq Demokraatit
Olga P. Berthelsen, Siulittaasup tullia Inuit Ataqatigiit		Anders Olsen Inuit Ataqatigiit
Kim Kielsen, Siumut		Ruth Heilmann, Siumut