30. oktober 2009

UKA 2009/115

 

Sanaartornermi neqerooruteqartarneq pillugu Inatsisartut inatsisissaattut siunnersuut
(Ineqarnermut, Attaveqarnermut Angallannermullu Naalakkersuisoq)

pillugu

Ineqarnermut Attaveqarnermullu Ataatsimiititaliap

ISUMALIUTISSIISSUTAA

Inatsisissatut siunnersuut aappassaaneerneqarnerani saqqummiunneqartoq

 

Ataatsimiititaliaq kingullermik suliarinninnermini ukuninnga inuttaqarpoq:

Inatsisartunut ilaasortaq Justus Hansen, Demokraatit, siulittaasoq
Inatsisartunut ilaasortaq, Olga P. Berthelsen, Inuit Ataqatigiit, siulittaasup tullia
Inatsisartunut ilaasortaq Anders Olsen, Inuit Ataqatigiit
Inatsisartunut ilaasortaq Kim Kielsen, Siumut,
Inatsisartunut ilaasortaq Ruth Heilmann, Siumut, sinniisussaq

Ulloq 6. oktober 2009-mi siullermeerinerup kingorna  ataatsimiititaliap siunnersuut erseqqinnerusumik naliliiffigaa, imalu oqaaseqaateqarniarluni:

Siunnersuummut tunuliaqutaasut

Sanaartornermut tunngasuni neqerooruteqartitsisarnermi siunissami tunngavissat inatsisissatut siunnersuutikkut matumani pineqartukkut aalajangersarneqartut, taamaalillunilu sanaartornermut tunngasuni neqerooruteqartitsisarnermut maanna inatsisaasoq, suliariumannittussarsiuussisarnermut inatsit 1992-imeersoq, Inatsisartut inatsisaat nr. 3, 6. april 1992-imeersoq taarserneqartoq siunnersuuteqartup oqaatigaa.

Sanaartugassat suliariumannittussarsiuunneqarnissaat pillugu piumasaqaammik suliariumannittussarsiuussisarnermut inatsit imaqanngitsoq aammalu inatsit tassatuaasoq periusissat pillugit inatsit, tassanilu suliariumannittussarsiuussinermi neqerooruteqartitsinissap atorneqarnissaanik toqqaasoqarsimatillugu suliariumannittussarsiuussinermi periuserineqartussanut maleruagassat aalajangersarneqartut siunnersuuteqartup oqaatigaa.

Inatsisissatut siunnersuut una pisortat sanaartugassaannut aammalu sanaartugassanut pisor­tanit tapiiffigineqartunut isumaqatigiissutinut atuuppoq. Siusinnerusumut sanilliullugu neqerooruteqartitsisut namminersortut siunnersuummi matumani maleruagassanik atuinissamut pisussaaffeqanngillat, taakkuninngali atuinissamut periarfissaqarlutik.

Sanaartortitsisut namminersortut isumaqatigiissuteqarfigisassaminnik toqqaanerminni niuernermik nalinginnaasumik tunngaveqartarput, pisortalli aningaasalersugaannik sanaartortoqartillugu qitiutinneqartut taakkuuneq ajorput, tassa pisortat oqartussaasut inuiaqatigiinnut tunngasut assigiinngitsorpassuit isumagisassaralugillu mianerisassarimmatigit.

Pisortat sanaartugassaataannut neqerooruteqartitsissatillutik tunngaviit pingaarnerit sanaartor­titsisut siunissami malitassaat inatsisissatut siunnersuummi allassimapput. Neqerooruteqartitseriaatsit inatsisissatut siunnersuummi atorneqartut tamakkuninnga ingerlatseriaatsinik ilisimaneqareersunik aallaaveqarput.

Tusarniaanermit akissutit

Siunnersuutip ataatsimiititaliami suliarineqarnerani atugassatut tusarniaanermut akissutit nuutinneri ataatsimiititaliap piniarpai. Kiisalu tusarniaaneq pillugu allakkiamik ataatsimiititaliaq tigusaqarpoq.

Siunnersuummik suliarinninneq

Inatsisartuni siullermeerinermi siunnersuut ilalerneqarluartoq ataatsimiititaliamit maluginiar­neqarlunilu paasineqarpoq siunnersuut matumani pineqartoq assut isumaqatigiissutaasoq.

Neqerooruteqartitsisarnermut tunngasumik suliassanik pisariusunik eqqartuussivimmut assingusumik aalajangiisinnaasumik ilinniakatigut immikkut ilisimasalinnik inuttaqartussamik Neqerooruteqartitsinermi Maalaaruteqartarfimmik Naalakkersuisut pilersitsinissaanerat pillugu siunnersuummi aalajangersagaq assut iluarisimaarneqartoq ataatsimiititaliap aamma maluginiarpaa.

Taamatuttaaq sanaartugassat § 1, imm. 2-mi pineqartut sanaartorneqarneranni ilinniartoqassanersoq pillugu Naalakkersuisut maleruagassiorsinnaanerat siunnersuutikkut matumuuna periarfissinneqarpoq. Ataatsimiititaliap paasinninnera malillugu siunnersuuteqartup taama piginnaatitsissuteqarnikkut anguniagaa pingaarneq tassaavoq kalaallinik sanasunik ilinniartitsinerup siuarsarneqarnissaa.

Aalajangersagaq taanna pillugu Unammilleqatigiinnermut Nakkutilliisoqarfiup tusarniaanermut ilanngussaa ataatsimiititaliamit maluginiarneqarpoq. Aalajangersagaq taanna nunat allat neqerooruteqartitsisarneq pillugu inatsisaannut sanilliulluni immikkut illuinnartoq Unammilleqatigiinnermut Nakkutilliisoqarfik isumaqarpoq. Unammilleqatigiinnermut Nakkutilliisoqarfik aamma isumaqarpoq isumaqatigiissutissat unammillissutigilluarneqarnissaat aalajangersakkap pinngitsoortissinnaagaa, taamatummi piumasaqaateqarnikkut neqeroorute­qarusuttut ikilisinnaammata. Taamaattumik neqerooruteqartitsisarneq pillugu inatsimmi nalinginnaasumik piumasaqaataanera peerlugu ilinniartoqarnissamik piumasaqaat suliassanut nassuiaatini ataasiakkaani ilanngunneqarnissaa Unammilleqatigiinnermut Nakkutilliisoqarfiup kaammattuutigaa.

Tassunga atatillugu illuliassanut sanaartugassanullu neqeroortitsisarneq pillugu Namminer­sornerullutik Oqartussat nalunaarutaanni nr. 15-imi, 5. juli 2007-imeersumi maleruagassat neqerooruteqartitsisarnermut inatsit naapertorlugu aalajangersarneqartut inatsillu taanna aqqutigalugu atorunnaarsinneqartut aqutsinikkut aalajangersagaq aqqutigalugu ingerlatiinnar­neqarnissaannik Naalakkersuisut aalajangernerat ataatsimiititaliamit taperserneqarpoq.

Tamanna tunngavigalugu ataatsimiititaliap isumaqatigiittup siunnersuut Inatsisartunit akuersissutigineqassasoq inassutigaa.

Taama oqaaseqarluni Ineqarnermut Attaveqarnermullu Ataatsimiititaliap inatsisissatut siunnersuut Inatsisartunut aappassaaniigassanngortippaa.

 

	Justus Hansen Siulittaasoq Demokraatit
Olga P. Berthelsen Siulittaasup tullia Inuit Ataqatigiit		Anders Olsen Inuit Ataqatigiit
Kim Kielsen Siumut		Ruth Heilmann Siumut