Ulloq 27. august 2009

UKA 2009 / 117

 

Siunnersuummut oqaaseqaatit


Oqaaseqaatit nalinginnaasut

1. Aallarniut

Kalaallit Nunaanni Eqqartuussiveqarfik pilersillugu inatsiseqarnerup isumagineqarnissaanut inatsisip nutaap 1. januar 2010-mit atuutilerneratigut unammillernermut inatsisip naleqquttunngorsarnissaanik allannguutissatut siunnersuut siunertaqarfigineqarpoq.


2. Siunnersuummi pingaarnertut immikkoortortat

Siunnersuummiipput unammillernermut inatsisip §§ 26-anut 27-anullu allannguutissatut siunnersuutit.

Aqutsisutut oqartussaaffinnut allanut Unammillernermut aalajangiisartut aalajangiussai maalaarutigineqarsinnaanngillat, inuinnartulli eqqartuussisunut suliassanngortinneqarsinnaallutik.

Unammillernermut aalajangiisartut Kalaallit Nunaanni Eqqartuussiveqarfimmut oqartussaaffittut siullertut suliassanngortinneqarnissaat naapertuunnerpaasutut nalilerneqarpoq, unammilleqatigiinnermut inatsit najoqqutaralugu aalajangiussinerit nalilernissaannut pisariaqartinneqartunik inatsisitigut kredsrettit ilisimasaqassangatinneqanngimmata.


3. Pisortaqarfimmut aningaasaqarnikkut aqutsisoqarnikkullu sunniutit

Siunnersuut pisortaqarfimmut aningaasaqarnikkut imaluunniit aqutsisoqarnikkut sunniuteqassanngitsutut naatsorsuutigineqarpoq.


4. Inuussutissarsiuteqarfimmut il.il. aningaasaqarnikkut sunniutit

Siunnersuut inuussutissarsiuteqarfimmut il.il. aningaasaqarnikkut sunniuteqassanngitsutut naatsorsuutigineqarpoq.


5. Avatangiisinut aamma pinngortitamut sunniutit

Siunnersuut avatangiisinut aamma pinngortitamut tunngasunik sunniuteqassanngitsutut naatsorsuutigineqarpoq.


6. Innuttaasunut aqutsisoqarfikkut sunniutit

Siunnersuut innuttaasunut aqutsisoqarfikkut sunniuteqassanngitsutut naatsorsuutigineqarpoq.


7. Naalagaaffeqatigiinnermut Namminersornermullu attaveqarnerit

Siunnersuut Naalagaaffeqatigiinnermut Namminersornermullu attaveqarnernut sunniuteqassanngitsutut naatsorsuutigineqarpoq.


8. Oqartussaasuni, kattuffinni il.il. tusarniaanerit

Siunnersuut makkunani tusarniaaffiusimavoq: Siulittaasup Naalakkersuisoqarfia, Aningaasaqarnermut Naalakkersuisoqarfik, Ineqarnermut, Attaveqarnermut Angallannermullu Naalakkersuisoqarfik, Kanukoka, Sulisitsisut, Nusuka, SIK, Atuisunut siunnersuisoqarfik, Unammillernermut nakkutilliisoqarfik aamma Nunatsinni Takornariaqarnermut Inuussutissarsiornermullu Siunnersuisoqatigiit.

Sapinngisamik annertunerpaamik tusarniaanermiit akissutaasut siunnersuummut ilanngunneqarsimapput.

 

 

Siunnersuummi malittarisassanut ataasiakkaanut oqaaseqaatit

 

§ 1-imut

Nr. 1-imut

Allatut aqutsisoqarfittut oqartussaaffeqarfimmut Unammillernermut aalajangiisartut aalajangiussineri saqqummiunneqarsinnaanngitsut Unammillernermut inatsisaasumi § 26, imm. 1-imi aalajangerneqarpoq.

Aalajangersimasunik pisoqartillugu § 26, imm. 2-mi aalajangiussinerit arlallit Kalaallit Nunaanni Landsrettimut oqartussaaffittut siullertut inuttut eqqartuussisunut suliassanngortillugit saqqummiunneqarsinnaasut tulleriiaarneqarput.

§ 26, imm. 2-mi allannguutikkut Unammillernermut aalajangiisartut aalajangiussineri Kalaallit Nunaanni Eqqartuussiveqarfik siullertut oqartussaaffeqartuutillugu eqqartussivinnut inuttut eqqartuussisunut suliassanngortillugit saqqummiunneqarsinnaasut erseqqissaavigineqarpoq.


Nr. 2-mut

§ 26, imm. 3-p atorunnaarsinneqarneratigut aalajangiinerit suut tamarmik eqqartuussivinnut saqqummiunneqarsinnaasut erseqqissaavigineqaqqippoq.


Nr. 3-mut

Unammillernermut aalajangiisartut aalangiussinerup erniinnaartumik atuutsilersinnissaanut pisinnaatitaaffeqarnerat erseqqissarneqarpoq.


Nr. 4-mut

§ 27-mi Kalaallit Nunaanni Eqqartuussiveqarfimmut aalajangiussinerup saqqummiunnissaanut piffissaliineq sap. akunnerinik sisamanik sivisussuseqartoq aalajangerneqarpoq.

Kalaallit Nunaanni Landsrettip Kalaallit Nunaanni Eqqartuussiveqarfik siullertut oqartussaaffeqartunngorlugu allannguinikkut inatsit inatsiseqarnerup isumagineqarnissaanut inatsimmut naleqqussarneqarpoq.


§ 2-mut

Inatsisartut inatsisaat 1. januar 2010-mi atuutilissasoq siunnersuutigineqarpoq. Kalaallit Nunaanni Eqqartuussiveqarfiup atuutsilerfigalugu Kalaallit Nunaanni inatsisit isumagineqarnissaanut inatsit nutaaq ullormit 1. januar 2010-mit atuutsilerfeqarmat ulloq taanna toqqarneqarpoq.