19. oktober 2009 UKA2009/98
Meeqqanut tapiissutit pillugit Inatsisartut inatsisissaattut siunnersuut
pillugu
Ilaqutariinnermut Ataatsimiititaliap
ISUMALIUTISSIISSUTAA
Inatsisissatut siunnersuutip aappassaaneerneqarnerani saqqummiunneqartoq
Ilaqutariinnermut Ataatsimiititaliaq suliarinninnermini ukuninnga inuttaqarpoq:
Inatsisartunut ilaasortaq Debora Kleist, Inuit Ataqatigiit
Inatsisartunut ilaasortaq Jane Petersen, Inuit Ataqatigiit
Inatsisartunut ilaasortaq Astrid Fleischer Rex, Demokraatit
Inatsisartunut ilaasortaq Ruth Heilmann, Siumut
Inatsisartunut ilaasortaq Naja Petersen, Atassut, sinniisussaq
UKA 2009-mi ulloq 2. oktober inatsisissatut siunnersuutip Inatsisartuni siullermeerneqarnerata kingorna Ilaqutariinnermut Ataatsimiititaliap misissorpaa.
ApeqqutitApeqqutit arlallit akineqarnissaat pillugu Isumaginninnermut Naalakkersuisoq Ilaqutariinnermut Ataatsimiititaliamit qinnuigineqarpoq. Ilaqutariinnermut Ataatsimiititaliap apeqqutaasa nuutinneri Isumaginninnermullu Naalakkersuisup akissuteqaatai isumaliutissiissummut matumunnga ilanngussatut ilanngunneqarput.
Akissuteqaatit tigusimanerat Ilaqutariinnermut Ataatsimiititaliap uppernarsarpaa.
Siunnersuutip siunertaa imarisaalu.Inatsisissatut siunnersuut ilaatigut UPA 2006/68-mi 2006-mi upernaakkut ataatsimiinnermi akuerineqartumik aallaaveqarpoq.
Siunnersuummi meeqqanut tapiissutit ingerlaannartumik pisariinnerusumillu tunniunneqartalernissaat siunniunneqarmat Ilaqutariinnermut Ataatsimiititaliap pitsaasutut isigaa. Meeqqanut tapiissutinik kingusinaartumik qinnuteqarneq qinnuteqanngivinnerluunniit pissutigalugit innuttaasut meeqqanut tapiissutisinissamut pisinnaatitaaffeqartut annaasaqartarnerat Isumaginninnikkut Naammagittaalliuuteqartarfiup suliaatigut ilisimaneqarput. Naak suliat taakku qanoq annertutiginersut Naalakkersuisut ilisimaqqissaanngikkaluaraat meeqqanut tapiissutinik pisinnaatitaasut tamarmik meeqqanutt tapiissutinik pisarnissaat qulakkeerneqartariaqartoq Ilaqutariinnermut Ataatsimiititaliaq isumaqarpoq.
Meeqqanut tapiissutit qaammatikkaarlugit tunniunneqartalernerisigut meeqqanut iluaqutaassasoq Ilaqutariinnermut Ataatsimiititaliaq isumaqarpoq, meeqqanummi tapiissutit tamanna siunertarimmassuk.
Aningaasanut inatsimmi meeqqanut tapiissutinut aningaasaliissutigineqartut malinnaavigeqqissaarneqaqqullugit aammalu inatsisip ukiup ataatsip atuutereernerani inatsisissatut siunnersuut naliliivigeqqullugu Isumaginninnermut Naalakkersuisoq tassunga ilanngullugu Naalakkersuisoqarfik kaammattorneqarput. Matumani siunertarineqarpoq inatsit ingerlalluarnersoq nutaamillu iluseqalernermigut naapertuuttuunersoq paasissallugu.
Naak meeqqanut tapiissutit tunniunneqartarnerat ingerlaannartussanngoraluartoq, § 9-mi siunnersuut naapertorlugu paasissutissiinissamut innuttaasut pisussaaffiat inatsimmi atuuttumi atuuttoq ingerlatiinnarneqarmat Ilaqutariinnermut Ataatsimiititaliap naammagisimaarlugu maluginiarpaa. Tamatumunnga atatillugu Naalakkersuisunut ilaasortap akissuteqaataani oqaaseqaatit Ilaqutariinnermut Ataatsimiititaliap tusaatissatut tiguai.
Allannguutissatut siunnersuuteqarnissamut pisariaqartitsineqSiunnersuutip 1. januar 2010-mi atuutilersinneqarnissaa Ataatsimiititaliap qularutigivaa taamaattumillu siunnersuutip aappassaaneerneqarnissaanut, taamaanngippallu pingajussaaneerneqarnissaanut allannguutissatut Naalakkersuisut siunnersuusioqqullugit ataatsimiititaliamit isumaqatigiittumit kaammattorneqarput, tamatumalu kingorna inatsit 1. marts 2010-mi atuutilissalluni. Taamaalilluni malittarisassanut nutaanut illuatungeriit tamarmik pitsaanerusumik piareersarnissaannut periarfissinneqassapput.
InassuteqaatOqaatigineqartut ilanngullugit siunnersuut akuerineqassasoq ataatsimiititaliap isumaqatigiittup inassutigaa.
Taama oqaaseqarluni Ilaqutariinnermut Ataatsimiititaliap siunnersuut Inatsisartunut aappassaaniigassanngortippaa.
Debora Kleist
Siulittaasoq
Jane Petersen
Astrid Fleischer Rex
Ruth Heilmann
Naja Petersen,
Knud Kristiansen sinnerlugu