25. november 2009

EM2009/12

 

Uunga siunnersuut:

 
Inatsisartut Ombudsmandiat pillugu Inatsisartut inatsisaat

pillugu

Inatsisit Atortinneqarnerannut Ataatsimiititaliap

ILASSUTITUT ISUMALIUTISSIISSUTAA

Siunnersuutip pingajussaaneerneqarneranut saqqummiunneqartoq

 

Inatsisit Atortinneqarnerannut Ataatsimiititaliaq suliarinninnermini makkuninnga inuttaqarpoq:

Inatsisartunut ilaasortaq Harald Bianco, Inuit Ataqatigiit, siulittaasoq
Inatsisartunut ilaasortaq Isak Hammond, Inuit Ataqatigiit, siulittaasup tullia
Inatsisartunut ilaasortaq Justus Hansen, Demokraatit
Inatsisartunut ilaasortaq Aleqa Hammond, Siumut
Inatsisartunut ilaasortaq Akitsinnguaq Olsen, Siumut
Inatsisartunut ilaasortaq Kim Kielsen, Siumut, ataatsimiititaliami sinniisussaq

Ilassutitut isumaliutissiissuteqarnermut tunuliaqut

Biskoppeqarfiup allaffia aamma Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik tamarmik immikkut novembarip ulluisa 15-ianni 17-iannillu Inatsisartut allaffeqarfiannut saaffiginnissuteqarput, Inatsisartut Ombudsmandiat pillugu Inatsisartut inatsisissaattut siunnersuummi § 9-mut nassuiaatit eqqoqqissaannginnerat malugeqqullugu.

Ajornartorsiut tikkuarneqartoq taamaallaat aalajangersakkamut nassuiaammut attuumassuteqarpoq. Inatsimmi aalajangersagaq (§ 9) eqqortuuvoq.

Ajoraluartumik inatsisissatut siunnersuutip Inatsisartunit siullermeerneqareernerata kingorna - tusarniaanermut akissuteqarnissamut piffissaritinneqartoq sapaatit akunneri arfinillit sinnerlugit qaangiutereersut – paasissutissat aatsaat Inatsisartut Allattoqarfiannit tiguneqarput.

Inatsisissatut siunnersuutip siullermeerneqarnera sioqqullugu naqqiutinik taagorneqartunik agguaassineq aqqutigalugu inatsimmut nassuiaatit allanngortinneqarnissaannut periarfissaqarpoq. Periarfissarli taanna siullermeerinissap aallartinnissaata tungaanut taamaallaat atorneqarsinnaavoq. Taamaalilluni inatsimmut nassuiaatit ilusaannik naqqiinissamut maannangaaq periarfissaqanngilaq. Aamma inatsimmut nassuiaatit allanngortinneqarnissaannik siunnersuutinik saqqummiussinissamut periarfissaqanngilaq.

Taamaattumik ilaatigut tamanna pissutigalugu pingaarutilerujussuuvoq tusarniaavigineqartut piffissaq eqqorlugu akissuteqartarnissaat, taamatullu aamma Naalakkersuisut naalakkersuisoqarfiisa tamanna pisariaqarsorinaraangat tamatumunnga atatillugu suliffeqarfinnit atilerisanit oqaaseqaatinik pissarsiniartarnissaat.

Taamali oqareerluni Inatsisit Atortinneqarnerannut Ataatsimiititaliap ilanngullugu ajornartorsiutip tikkuarneqarsimanera qujassutigaa.

Inatsimmut nassuiaatit marlunnik siunertaqarput: Siullermik inatsisissatut siunnersuutit Inatsisartut aalajangiinissamut tunngavissarisaasa ilagaat. Inatsisissatut siunnersuutip suna siunertarineraa inatsimmut nassuiaatini nassuiarneqartarpoq aammalu inatsisissatut siunnersuutip pingaaruteqarnera kingunerisassaalu nassuiarneqartarlutik. Aappassaanik inatsimmut nassuiaatit oqartussaasunut, eqqartuussivinnut allanullu inatsimmik atuisuusunut nassuiaatitut atorneqartarput.

Ataatsimiititaliap matumani ilassutitut isumaliutissiissuteqarnermigut kissaatigaa inatsisissatut siunnersuummi § 9-p qanoq paasineqarnissaanut tapiliussamik (iluarsiissutaasumillu) ilanngussaqarnissani, tamatumunngalu peqatigitillugu qularnaarlugu inatsisissatut siunnersuutip pingajussaaneerneqannginnerani Inatsisartut eqqortumik tamakkiisuunerpaamillu aalajangiinissamut tunngavissaqarnissaat.

Inatsisissatut siunnersuummi § 9 pillugu

Inatsisissatut siunnersuummi § 9-mi aalajangersagaq nutaajuvoq, Ombudsmandillu piginnaatitaaffiinik killiliinermik imaqarluni, pissutsinik ilagiit ajoqersuutaannut imaluunniit upperisamik nalunaajaanerannut toqqaannartumik toqqaannanngitsumilluunniit tunngasunik Ombudsmandip suliarinnissinnaaneranik mattussisumik. Pissutsit ilagiit ajoqersuutaannut imaluunniit upperisamik nalunaajaanerannut tunngasut taamaattoq aamma siusinnerusukkut Inatsisartut Ombudsmandiata misissuisarsimanerinut ilaatinneqarsimanngillat.

Aalajangersagaq Folketingip Ombudsmandia pillugu inatsimmi § 9-p assigaa.

Aalajangersagaq Inatsisartut Ombudsmandiata piginnaatitaaffiinik killiliinermik allamik aamma imaqarpoq: Ilagiit taamaallaat Inatsisartut Ombudsmandiata piginnaatitaaffiisa iluaniitinneqarsinnaapput ilageeqarnermi pissutsit pillugit aalajangersakkanik Namminersorlutik Oqartussat aalajangersaasinnaatitaatillugit. Tamannali aamma inatsisissatut siunnersuummi § 7-p malitsigereerpaa, tassani aalajangersarneqarmat Namminersorlutik Oqartussani kommuninilu pisortat ingerlatsinerisa ilaat tamarmik Ombudsmandip sulineranut ilaatinneqartut.

Kalaallit Nunaata Namminersorneranut atatillugu pissutsit assigiinngitsut pillugit inatsisikkut nr. 474-ikkut, ulloq 12. juni 2009-meersukkut Folketingip inatsit piginnaatitsissutaasoq (Kalaallit Nunaanni ilagiit pillugit inatsit nr. 264, ulloq 6. maj 1993-imeersoq), 1993-illu kingorna ilageeqarnermut tunngasuni Namminersornerullutik Oqartussat malittarisassiorsinnaanermut allaffissornikkullu oqartussaanerannut tunngaviusimasoq, atorunnaarsippaa. Tamanna Kalaallit Nunaanni Namminersorneq pillugu inatsimmi § 23, imm. 4-p malitsigaa, tassani aalajangersarneqarmat suliassaqarfiit namminersorneruneq pillugu inatsimmi siusinnerusukkut atuuttumi § 5 naapertorlugu tiguneqarsimasut eqqarsaatigalugit Namminersorlutik Oqartussat tassaasut oqartussat inatsisiliorsinnaatitaallutillu atuutsitsisussaatitaasut.

Kalaallit Nunaata Namminersorneranut atatillugu pissutsit assigiinngitsut pillugit inatsisip atuutilernerani Kalaallit Nunaata biskoppeqarfiani biskoppitut atorfilik, inatsimmi § 8 naapertorlugu Kalaallit Nunaanni oqartussani susassaqartuni atorfinitsinneqarnissamik neqeroorfigineqartussaavoq. Kalaallit Nunaanni oqartussani susassaqartuni atorfinitsinneqarnissani biskoppip kissaatiginngippagu, pineqartup naalagaaffimmit atorfeqartitaanera ingerlaannassaaq, suliaminilli ingerlatsinera Kalaallit Nunaanni oqartussani susassaqartuni pissalluni.

Taamaattumik biskoppip naalagaaffimmit atorfeqartitaanera ingerlaannassappat, tamanna Inatsisartut Ombudsmandiata piginnaatitaaffiisa avataaniissaaq, akerlianillu Folketingip Ombudsmandiata piginnaatitaaffiisa iluaniissalluni.

Suliassani ilageeqarnermi oqartussat biskoppip peqqussuteqarneratigut taannaluuniit suleqatigalugu ingerlatsivigisaanni, naatsorsuutigineqarpoq tamatumani misissuisoqassatillugu biskoppilu suli naalagaaffimmit atorfeqartinneqartillugu Inatsisartut Ombudsmandiata pisariaqartitsineq naapertorlugu Folketingip Ombudsmandia pisariaqartitsineq naapertorlugu peqataatittassagaa.

Taamatut oqaaseqarluni Inatsisit Atortinneqarnerannut Ataatsimiititaliap siunnersuut pingajussaaniigassanngortippaa, ataatsimiititaliap isumaqatigiittup inatsisissatut siunnersuutip akuerineqarnissaata inassutigineqarnera aalajangiusimallugu.

 

	Harald Bianco Siulittaasoq Inuit Ataqatigiit
Isak Hammond Inuit Ataqatigiit		Justus Hansen Demokraatit
Aleqa Hammond Siumut		Akitsinnguaq Olsen Siumut