12.november

UKA09/96

 

Nunalerinermik inuussutissarsiornerup siuarsarneqarnissaa pillugu Inatsisartut inatsisissatut siunnersuut nr. Xx  xx. 2009-imeersoq
(Naalakkersuisunut ilaasortaq Ane Hansen, Inuit Ataqatigiit)

pillugu

Aalisarnermut ataatsimiititaliap

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

 

Inatsisartut Aalisarnermut, Piniarnermut Nunalerinermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Hans Aronsen, Siulittaasoq, Inuit Atagatigiit
Inatsisartunut ilaasortaq Andreas Uldum, Siulittaasup tullia, Demokraatit
Inatsisartunut ilaasortaq Anders Olsen, Inuit Atagatigiit
Inatsisartunut ilaasortaq Hans Enoksen, Siumut
Inatsisartunut ilaasortaq Siverth K. Heilmann, Atassut

 

1. Siunnersuutip siullermeernera.

Siunnersuut partiit tamarmik akornanni ataatsimut isigalugu Inatsisartuni tapersersorneqartoq Ataatsimiititaliap maluginiarpaa.

2. Siunnersuutip imarisaa.

Nunalerinerup imminut akilersinnaanera isiginiarlugu nunalerinermik inuussutissarsiummut tapiissuteqartarnermi sinaakkusiornissamut aalajangersaanissaq siunnersuummi pingaarnertut anguniarneqarpoq. Maannakkut tapiissuteqartarnermik aaqqissuussinermi periaaserineqartup allanngortinnissaa siunnersuummi siunertarineqanngilaq. Taarsigassarseriaatsit amerlassusaasa killilernerisigut aningaasat pitsaanerpaamik atorniarneqarnerat siunnersuummi anguniarneqarpoq, taamaalilluni nunaateqarnermik inuussutissarsiuteqarnermut siunissami taarsigassarseriaatsit marlut atorneqassallutik. Tassaapput inuussutissarsiutip siuarsarneqarnissaa pillugu taarsigassarsisitsineq aamma ingerlatsinermut aningaasartuutinut taarsigassarsisitsineq. Siunnersuut malillugu Naalakkersuisut inuussutissarsiut siuarsarniarlugu taarsigassarsiat akilerneqarnissaannut tapiissuteqarsinnaapput, taamaalilluni taarsigassarsisup nammineq akilersuineranut sanilliullugu taarsigassarsiat sukkanerusumik nalikillilerneqarsinnaallutik. Pineqartoq aningaasatigut iluanaaruteqarnissaa ilimasaarutigineqarmat taamatut iliuuseqarneq taarsigassarsisup taarsigassarsinermi isumaqatigiissummik naapertuinissaanut

kaammattuutaasussatut Naalakkersuisunit naatsorsuutigineqarpoq. Peqqussummut atuuttumut sanilliullugu suusupaginnittoqarnerani Naalakkersuisut iliuusissatut periuserisinnaasaat assigiinngitsut killilerneqarput, tamatumammi kingunerisaanik peqqussummi atuuttumi akilersuinerluttunut pillaammik ernialiisarnerup kissaatigineqartutut sunniuteqanngitsoortartoq takuneqarsinnaammat. Aammattaaq pissutsit immikkut ittut pineqartillugit ukiut marlut tungaannut inuussutissarsiutit siuarsarniarlugit taarsigassarsianut akilersuutinik kinguartitsisinaannermik siunnersuut imaqarpoq. Pissutsini immikkut ittuni akiliinissamut piffissaliussaq suli kinguartinneqarsinnaavoq. Inatsisissatut siunnersuut malillugu taarsigassarsinermi isumaqatigiissut suli eqqortinneqarsimanngippat periarfissaq tassatuaavoq taarsigassarsianik atorunnaarsitsineq, qularnaveeqqutillu tuniniarnissaat siunertaralugu tigusineq. Aammattaaq aaqqissuussinermut atuuttumut sanilliullugu siunnersuummi siamasinnerusumik isiginninniartoqarlunilu anguniagaqartoqarpoq, inatsisissatummi siunnersuummi oqariaatsit ”nunalerineq” aamma ”nunalerinermik inuussutissarsiuteqarneq” uumasuutinik ingerlatsinertut kinguaassiortitsinertullu, kiisalu orpinnik naatsitsinertut, naatitanik naatsitsinertut aamma ivikkanik naatsitsinertut paasisariaqarmata, tamatumalu saniatigut amernik meqqunillu atuinermut ingerlatsiviit aamma nassuiaatigineqarlutik.  

3. Siunnersuutip tusarniaassutigineqarnera

Siunnersuut manna tusarniaassutigineqarpoq ulloq 08. april 2009 akissuteqarnissamut killissarititaq ullormut 15. juli 2009-mut tigusassanngorlugu. Ukualu tusarniaanermut ilaatinneqarsimapput; Kalaallit Nunaanni Kommuneqarfiit Kattuffiat (KANUKOKA), Savaatillit Peqatigiit Suleqatigiissut (SPS), Konsulenttjenesten for Landbrug, Sulisitsisut Peqatigiiffiat (GA), Nunaqavissut Sulisitsisut Kattuffiat (NUSUKA) aamma Sulinermik Inuutissarsiuteqartut Kattuffiat (SIK). Tusarniaanermi piffissaq killigititaasup qaangiunnerani oqaaseqaatinik Inuussutissarsiornermut aamma Suliffissaqartitsinermut Naalakkersuisoqarfimmit (matuma kingorna ISN) aamma ataatsimoorussamik tusarniaanermut akissuteqaammik Nunaateqarnermut Siunnersuisoqatigiinnit aamma SPS-ip siulersuisuinit tigusisoqarpoq. Ataatsimiititaliaq isumaqarpoq tusarniaaneq pitsaasumik ingerlanneqarsimasoq, aamma tusarniaanermit akissutit siunnersuummut nalinginnaasumik oqaaseqaatinut peqqisaartumik oqaaseqaasiorneqarsimasut. Taamaattumik naalakkersuisoqarfimmit tusarniaaneq maligassiuinertut isigisariaqarpoq.

4. Siunnersuutip ataatsimiititaliami suliarineqarnera

Nunalerinermi pissutsit maanna atuuttut naleqqussarnissaat aamma inuussutissarsiummi atuisunut pitsaanerusumik atugassaqartitsinissaq inatsisissatut siunnersuummi anguniarneqarpoq. Kalaallit Nunaanni nunalerineq ineriartupilooqaaq, tamannalu inuiaqatigiinnut inuussutissarsiummullummi annertoqisumik piumasaqarfiuvoq. Ineriartorneq ingerlasoq qularnaarniarlugu sinaakkusiussatut piumasaqaatit ataavartumik nalequssarnissaat pitsaanerpaanissaallu pingaaruteqartuusut Ataatsimiititaliaq isumaqarpoq. Nunalerineq aallartissallugu ineriartorteqqissallugulu akikitsuinnaanngilaq, taamaattumillu aallarnisarnermut, annertusaanermut, narsaatinik nutaanik naggorissaanermut il.il. taarsigassarsinissamut naammattumik aningaasaliisoqartarnissaa pingaaruteqarpoq. Imminut pilersornerulersinnaaneq periarfissaavoq, taamaalillunilu nunami maani pinngortitami isumalluutit amerlaqisut nungusaataanngitsumik atuinikkut imminut annertunerusumik napatitsisoqarsinnaalluni, naluneqanngitsutummi nunalerinermik inuussutissarsiuteqarneq annertoqisumik periarfissaqartitsivoq. Taamatuttaaq nunalerineq suliffissaqartitsinermut pitsaasumik sunniuteqaqataasinnaavoq, aaqqissuulluakkamimmi ingerlatsinikkut ukioq

kaajallallugu suliffiusinnaasunik amerlanerusunik pilersitsisoqarsinnaammat. Kujataani periarfissat avaqqunneqarsinnaanngillat, taamaattumillu inuussutissarsiutip siunissami periarfissaritai siuarsarniarlugit misilittagaalereersut atorluarnissaat pissusissamisoorportaaq. Inuussutissarsiutitsinnik ingerlatsinerup minnerunngitsumik aningaasarsiornermi ineriartornermut pilersitseqataasinnaasut pitsanngorsarnissaat nunatsinni tamatta soqutigisaraarput, taamaalilluta aningaasarsiorneq imminut napatinnerusoq aamma ilapittuutaassammat. Taamaattumik suli imminut pilersornerunissaq ineriartortinniarlugu nunalerinerup tungaatigut pitsaasumik ineriartortitsinissamik pilersitsinissamut kissaateqarpugut – minnerunngitsumik tunisassiat tunisassianik eqqussuinermut killiliisut siuarsaaviginissaat periarfissaatinniarlugu. Taamaattumik inatsisissatut siunnersuutip matuma periarfissiinneratigut nunalerinermut sinaakkutissatut piumasaqaatinik pitsaasunik atugassaqartitsinissaq Ataatsimiititaliap pisariaqartutut isigaa.   

5. Ataatsimiititaliap inassutaa

Ataatsimiititaliap isumaqatigiittup siunnersuut akuersissutigineqassasoq inassutigivaa.

Taamatut oqaaseqarluni Aalisarnermut ataatsimiititaliap siunnersuut siuliani tunngavilersuutit innersuussutigalugit aappassaaniigassanngortippaa.

Siulittaasoq/Siulittaasup tullia