25. september 2009

UKA 2009/125

 

Inatsisissatut siunnersuummut nassuiaatit

Nalinginnaasumik nassuiaatit

 

1. Inatsisissatut siunnersuutip tunuliaqutaa

Demokratit, Kattusseqatigiit aamma Inuit Ataqatigiit naalakkersuisooqatigiinnissamut isumaqatigiissutaanni ilaatigut atuarneqarsinnaavoq Naalakkersuisut meeqqat inuusuttullu immikkut pingaartinneqartut. 

Taamaattumik Naalakkersuisut kissatigaat meeqqanut ileqqaarutinik aaqqissuussineq atorunnaarsinneqassasoq, taarsiullugulu ukiut tamaasa eqqartukkamut immikkoortinneqartartut 18 mio. koruunit missigisaat, meeqqanut inuusuttunullu ikiorsiissuteqarfigineqarnissamik pisariaqartitsisunut iliuutsinut atorniarlugit. 

2. Inatsisissatut siunnersuutip imarisai

Meeqqanut ileqqaakkat pillugit inatsisip atorunnaarsinneqarnera

Inatsisissatut siunnersuutip meeqqanut ileqqaakkat pillugit inatsit nr. 13, 2. november 2006-imeersoq atorunnaarsippaa. Aaqqissuussinerup ingerlanneqarnissaa pillugu Inatsimmi tun-ngavissaq malillugu nalunaarusiorneqarsimavoq. Taannattaaq atorunnaarsinneqassaaq. 

Atorunnaarsitsineq, meeqqanut ileqqaakkanut immikkoortitat tunniunneqarnerat

Inatsisissatut siunnersuut meeqqanut ileqqaakkanut immikkoortitat 48 mio. koruunit missigisaasa, aaqqissuussinerup pilersinneqarneraniilli pilersinneqarsimasut tunniunneqarnissaannik imaqarpoq. Siunnersuutigineqarpoq ingerlatsisuusup (GrønlandsBANKEN-ip) 31. december meeqqanut ileqqaarutinut immikkoortitani uninngasuutigisai kontomut meeqqap pigisaanut, tigusiffigineqarsinnaasumut, nuussagai. Kontolu aningaaserivimmi kontunut nalinginnaasumik malittarisassani pineqartunut ilaassalluni. 

Tamatuma saniatigut siunnersuutigineqarpoq aningaasat meeqqanut ileqqaakkanut immikkoortitaniisinnaasut, nuunneqarsinnaanngitsut nunap karsianut utertinneqassasut. Amigartoorneqassagaluarpat, amigartoorutit Nunap karsianit matussusiivigineqassapput. Tamannali ilimagineqanngilaq, maannakkut taakkunani annikitsumik sinneqartooruteqarmat. 

Atoruunnarsitsinermik ingerlatsineq 

Aqqissuussinerup atorunnaarsikkiartortinnera aningaaseriviup suliassaanut ilaagaluartoq, atorunnaarsitsiartuaarnermi annikinnerusunik ingerlatassaqartussaassaaq. Taamaattumik siunnersuutigineqarpoq Naalakkersuisut tamanna pillugu isumaqatigiissuteqarnissamut pisinnaatinneqassasut. 

3. Aningaasat tungaasigut allaffissornikkullu pisortanut sunniutissai. 

Siunnersuut pisortanut allaffissornikkut annertunerusumik sunniuteqartussatut  ilimagineqanngilaq.

Meeqqanut ileqqaakkanik aaqqissuussinerup pilersinneqarneranut atatillugu ukiuni tallimani ingerlatsinissamut GrønlandsBANKEN isumaqatigiissuteqarfigineqarsimavoq. Inatsisissatut siunnersuut akuersissutigineqassappat, tamatuma atorunnaarsinnissaa pillugu GrønlandsBANKEN isumatiginiarneqassaaq. Atorunnaarsitsinermut aningaasartuutaasinnaasut 2009-mi meeqqanut ileqqaakkanik aaqqissuussinermut aningaasaliissutaasut iluanni aningaasartuutaanissaat ilimagineqarpoq. 

4. Aningaasat tungaasigut allaffissornikullu inuussutissarsiutinik ingerlatsisunut sunniutissai. 

Siunnersuut allaffissornikkut inuussutissarsiutinik ingerlataqartunut sunniuteqartussatut ilimagineqanngilaq. Aningaasat tungaasigut juullimut niuerneq aqqutigalugu annikitsumik iluaqusiinissaat ilimagineqarpoq. 

5. Avatangiisinut pinngortitamullu sunniutissai. 

Avatangiisinut pinngortitamullu sunniuteqartussaanngilaq. 

Innuttaasunut allaffissornikkut sunniutissai. 

Siunnersuutip allaffissornikkut innuttaasunut sunniuteqarnissaa ilimagineqanngilaq. 

7. Naalagaaffeqatigiinnermut Namminersortuunermullu tunngasut.

Inatsisissatut siunnersuut naalagaaffeqatigiinnermut attuumassuteqanngilaq. 

8. Oqartussaasunit soqutigisaqaqatigiiffinniillu tusarniaaneq.

Siunnersuut makkununnga tusarniaassutigineqarsimavoq: 

Aningaasaqarnermut Naalakkersuisoqarfik,

Isumaginninnermut Naalakkersuisoqarfik,

Peqqinnissaqarnermut Naalakkersuisoqarfik.

Attaveqarnermut Najugaqarnermullu Naalakkersuisoqarfik, 

Kultureqarnermut, Ilinniartitaanermut, Ilisimatusarnermut ilageeqarnermullu Naalakkersuisoqarfik. 

KANUKOKA aammalu

GrønlandsBANKEN.

Inatsisissatut siunnersuut nassuiaatitalerlugu aamma NANOQ –mi tusarniaanermut isaarissami saqqummiunneqarpoq. 

 

Tusarniaaneq

Tusarniaanerup naanerani Naalakkersuisut akissuteqaatinik taaneqartunit makkuninnga tigusaqarsimapput, Kultureqarnermut, Ilinniartitaanermut, Ilisimatusarnermut ilageeqarnermullu Naalakkersuisoqarfik, Attaveqarnermut Najugaqarnermullu Naalakkersuisoqarfik, Peqqinnissaqarnermut Naalakkersuisoqarfik, Isumaginninnermut Naalakkersuisoqarfik aammalu GrønlandsBANKEN.

Naalakkersuisoqarfiit taaneqartut siulliit pingasut inatsisissatut siunnersuummut oqaaseqaateqanngillat.

Isumaginninnermut Naalakkersuisoqarfimmit inassutigineqarpoq GrønlandsBANKEN, kontomik erniarissaartitsisumik kontomik piginnittup 18-inik ukioqalernissaata tungaanut pituttuisussamik pilersitsinissaq siunertaralugu isumaqatigiinniarfigineqassasoq.

Aaqqissuussineq nammineq kajumissuseq tunngavigalugu ingerlanneqassaaq GrønlandsBANKEN-illu isumaqatigiinniarfigineqarnerata saniatigut Namminersorlutik Oqartussat pineqartumut peqataassanngilat.

Naalakkersuisut oqaaseqaataat.

Isumaginninnermut Naalakkersuisoqarfiup apeqquteqaataa Naalakkersuisut GrønlandsBANKEN-imut saqqummiussimavaat taakkulu akissuteqarput aaqqiissuteqarneq pineqartumut tunngasoq, meeqqanut ileqqaakkanut aaqqissuusinermut attuumassuteqartinneqanngitsumik immikkut inatsisiliornikkut pisinnaasoq. Aningaaserivimmit aamma oqaatigineqarpoq erniagissaartitsinermik piumasaqaat Nanoq kontomut aaqqissuussinermut eqqaanartuusoq Namminersorluni Oqartussallu erniagissaartitsinissamut aningaasalersueqataarusunngippata ernialersuineq niuernerup nalinginnaasup iluani pissasoq.

Tassunga tunngatillugu Naalakkersuisunit oqaatigineqassaaq angajoqqaat massakkut (kajumissuseq naapertorlugu) meeqqaminnut Nanoq-kontomik pilersitsisinnaasut, takuuk aningaaserivinni ileqqaakkat akileraarutitigut oqilisaaffigineqarnissaat pillugu inatsit (aningaaserivimmit Nanoq-kontomut aaqqissuussineq eqqaaneqartoq). Aaqqissuussineq taanna Isumaginninnermut Naalakkersuisoqarfimmit siunnersuutigineqartumut naapertuuppoq.

GrønlandsBANKEN-imiit akissuteqaat inatsisissatut siunnersuummut ilanngunneqarpoq.

Inatsisissatut siunnersuut Inatsisilerinermut Allaffimmut tusarniaassutigineqarsimavoq.

Taakkuttaaq oqaaseqaataat inatsisissatut siunnersuumut ilanngunneqarput

KANUKOKA-mit akissuteqartoqarsimanngilaq.

Tusarniaanermi akissutit Inatsisartut Akileraartarnermut Akitsuusiisarnermullu Ataatsimiititaliaanut ingerlateqqinneqassapput.

 

 

Inatsisissatut siunnersuummi aalajangersakkanut ataasiakkaanut nassuiaatit. 

 

§ 1-imut

Aalajangersakkami aalajangerneqarpoq pisassaqartup meeqqanut ileqqaarutinut immikkoortitani pisassarisani 31. december 2009-mi atorneqarsinnaanngorlugit aningaasat pisassaqartup GrønlandsBANK-imi kontoreriigaanut ikineqarnerisigut, pissagai, pisassaqartullu 40 %-ii kontoqareersimallutik. Pisassaqartoq GrønlandsBANK-imi nalinginnaasumik kontoqanngippat, meeqqanut ileqqaakkanut immikkoortitanit pisassarisai kontomut nalinginnaasumit, aamma pisassaqartup aqqani pilersinneqartussamut nuunneqassapput. Tamatumuuna qulakkeerneqassaaq aningaasat kontomut pisassaqartup pigisaanut nuunneqarnissaat. Erseqqinnerusumik tamanna pillugu aalajangersakkat, Naalakkersuisut, § 3 naapertorlugu, GrønlandsBANKEN-imik isumaqatigiissutaanni aalajangersarneqassapput. 

Aningaasat atorneqarsinnaasuussapput akileraarusigaassanatillu.

§ 2-mut.

 

Aningaaseriviup aningaasat immikkoortitanit ”tigusai” ernialersorneqassapput. Pisassaqartoq inatsimmik tunngaveqartumik inatsisillu atuuttut naapertorlugit ernialersorneqarnissaminut illersugaavoq. Aalajangersagaq, nalunaarummi § 2 naapertorlugu ernialersuisarneq assigaa.

Tamatumalu kingorna konto, kontut allat assigalugit, nalinginnaasumik ernialersorneqalissaaq.

Meeqqanut ileqqaarutinut immikkoortitanut piginnittuuneq Namminersorlutik Oqartussaniimmat, aningaasat sinneruttuusinnaasut Nunatta Karsianut ikineqassapput taakkulu pisassaqartup meeqqanut ileqqaarutinit pisassaminik qanoq ilisumik tunniunneqanngitsoorsimassagaluarpata tunniunneqarnissaalu piumasaqaatigissagaluarpagit Namminersorlutik Oqartussat pisussaaffitsik naammassisinnaaqqullugu sillimmatitut uninngasuutigineqassapput.  

Eqqarsaatigineqarsinnaavoq pappiaqqanik aningaasanik nalilinnik pigisat tunineqarneranni annaasaqaataasumik tunineqartut, aktianik tuniniaaneq ajortup tungaanut ingerlassappat. Amigartoorutaasinnaasut Nunatta karsianit matuneqassapput. Tamannali pisussatut ilimagineqanngilaq. Maannakkut aaqqissuussinermi annikitsumik sinneqartoorneqarpoq, sinneqartoorutillu Nunatta karsianut nakkartinneqassapput. 

§ 3-mut.

Immikkoortitat peerneqarnissaat pillugu isumaqatigiissuteqarnissaq pisariaqassaaq. Naatsorsuutigineqarpoq isumaqatigiissut tamanna GrønlandsBANK-imut isumaqatigiissutaassasoq. Maannakkut ingerlatsinissaq pillugu isumaqatigiissut 2011-imi aatsaat ukiumik ataatsimik sioqqutsilluni ilisimatitsinikkut atorunnaarsinneqarsinnaavoq. Taamaammat Naalakkersuisut isumaqatigiissut pillugu isumaqatigiinninniaqqinnissamut pisinnaatinneqassapput, atorunnaarsinneqarnissaa siunertaralugu, immikkoortitat inaarutaasumik 1. januar 2012-imi naatsorsorneqarneranni.

Naatsorsuutigineqarpoq isumaqatigiissut ilaatigut, pisassaqartut sumiinnerat imaaliallaannaq nassaarineqarsinnaanngippat, pisassaqartumik qinaasinissamut tunngatillugu aalajangersakkanik imaqassasoq, tamatumani aamma taamaattoqassappat iliuutsit suut aallartinneqassanersut. 

Aammattaarlu isumaqatigiissut, atorunnaarsitsineq tunniussinerillu peqataasunut tamanut naleqquttumik qanoq ingerlanneqassanersut aalajangersakkanik imaqassaaq. 

§ 4-mut.

Siunnersuutigineqarpoq Inatsisartut inatsisaat 31. december 2009-mi atuutilissasoq. Tamatuma kingunerisaanik siunnersuutigineqarpoq, inatsit maannakkut atuuttoq aammalu tassunga atasumik nalunaarut tamatumunnga peqatigitillugu atorunnaarsinneqassasut. 

Piaartumik atulersinneqarnissaanut tunngaviusoq tassaavoq Akileraartarnermut Aqutsisoqarfimmut, meeqqanut ileqqaakkat immikkoortitat tunniunneqarnissaat pillugu saaffiginnissutit imaaginnavimmata, pingaartumik inuusuttuniit, aalajangersakkat atuuttuusut (ilinniagaqarneq, ineqarneq il.il. pillugit piumasaqaatit) naapertorlugit aningaasanik tiguserusuttunit.