12. oktober 2009

UKA 2009/123

 

Inatsisissatut siunnersuummut oqaaseqaatit

 

Oqaaseqaatit nalinginnaasut

 

1. Inatsisissatut siunnersuummut tunuliaqutaasut

Akitsuutinut killiliussap kiilumut 13 koruuniniit kiilumut 11,70 koruuninut appartinneratigut naatsorsuinermut tunngaviusunik allanngortitsinissamik siunnersuummut tunngavilersuutaavoq nunap karsiata isertittagaasa annertusineqarnissaannik kissaateqarneq.

Naatsorsuutigineqarpoq allanngortitsinikkut ukiumut pissarsiarineqartartut 9 mio. koruuninik amerleriassasut.

2. Inatsisissatut siunnersuutip imarisai

Inatsisissatut siunnersuutip aningaasanut tunngatillugu allanngortitsinerit taamaallaat imarai.

3. Pisortanut aningaasatigut allaffissornikkullu kingunerisassai

Allaffissornermut tunngatillugu kinguneqassanngilaq. Aningaasaqarnermut tunngatillugu 2010-mi akitsuutit procentiat 4,3-p missaaniissasoq naatsorsuutigalugu 9 mio. koruuninik isertitsissutaanerulissasoq, raajanit akitsuutinit ataatsimut isertitassat 36 mio. koruunit missaannut naatsorsorneqarlutik.

Raajanut akitsuutit aningaasartuutit allat assigalugit umiarsuaatillit isertitaannit akileraarusigassaatitaasunit ilanngaatigineqarsinnaapput, taamaammat umiarsuaatillit akileraarutinut tunngavissaat annikillissallutik. Taamaammat raajanut akitsuutinut aningaasartuutinik amerlisitsineq ataatsimut isigalugu akileraarutinut akiliutit annikilleriarnerannik kinguneqassaaq, annertunerpaamik 2,7 mio. koruuninik annertussuseqartussamik, tassa umiarsuaatillit tamarmik 2010-mi akileraarusigassaatitaasunik isertitaqarsinnaassappata.

Umiarsuaatillit ataasiakkaat akileraartarnermut tunngatillugu annertuunik amigartooruteqartarnertik saqqummiuttarmassuk naliliisoqarpoq selskabinut akileraarutini 1,0-imiit 1,5 mio. koruuninut pissarsiassanit annaasaqarneq pissusiviusutigut sunniutaassasoq.

4. Inuussutissarsiortunut aningaasaqarnermut allaffissornermullu kingunerisassai

Avataasiorluni aalisarnermut aningaasarsiornerannut kinguneqartussaassaaq, tassami umiarsuaatillit ataatsimut sinneqartoorutaat raajanut akitsuutinut aningaasartuutaanerulersutigut ikilisinneqartussaammata. Akitsuutit amerleriaataat 9 mio. koruunit missaannut naatsorsorneqarput.

Umiarsuarmi sulisut piginneqataallutik aalisartutut aningaasarsiaqartitaassappata taakkuttaaq aningaasarsiassaannik naatsorsuineq sioqqullugu akitsuutit aningaasarsianut tunngavigisanit tamarmiusunit ilanngaatigineqartillugit attorneqartussaassapput.

5. Avatangiisinut pinngortitamullu kingunerisassai

Avatangiisinut pinngortitamullu kinguneqassanngilaq.

6. Innuttaasunut allaffissornikkut kingunerisassai

Siunnersuut innuttaasunut allaffissornikkut kinguneqartussaanngitsutut nalilerneqarpoq.

7. Naalagaaffeqatigiinnermut Namminersorlutillu Oqartussanut pissutsit

Inatsisissatut siunnersuut naalagaaffeqatigiinnermut tunngasortaqanngilaq.

8. Oqartussaasunik kattuffinnillu tusarniaaneq

Siunnersuut ukununnga tusarniaassutigineqarpoq:

Aningaasaqarnermut Naalakkersuisoqarfik,

Inuussutissarsiornermut Suliffeqarnermullu Naalakkersuisoqarfik,

Aalisarnermut, Piniarnermut Nunalerinermullu Naalakkersuisoqarfik,

KANUKOKA,

KNAPK,

Nunatsinni Sulisitsisut Peqatigiiffiat,

Royal Greenland A/S,

Polar Seefood,

NUSUKA aamma

SIK

Inatsisissatut siunnersuut oqaaseqaatit ilanngullugit aammattaaq Nanoq-mi, tusarniaassutinik nittartagaqarfimmi, avammut saqqummiunneqarpoq.

Inatsisissatut siunnersuut oqaaseqaatitaalu Naalakkersuisut inatsisilerinermut allaffiani aamma Inatsisartut inatsisilerinermut allaffiani misissortinneqareerpoq.

Taakku oqaaseqaataat siunnersuummi ilanngullugit suliarineqarput.

 

Tusarniaaneq:

Tusarniaanermut killiliussap naanerani tusarniaanermut akissutit ukuninngaanniit tiguneqarput:

Aalisarnermut, Piniarnermut Nunalerinermullu Naalakkersuisoqarfik, Royal Greenland, Polar Seafood, Nunatsinni Sulisitsisut Peqatigiiffiat, AP (Sinerissamut Qanittumi Avataanilu Aalisariutaatillit Peqatigiiffiat), KANUKOKA, Qaasuitsup Kommunia, Qaqqata Kommunia aamma Kommuneqarfik Sermersooq.

Killiliussap naareernerani ulloq 16. september 2009-mi SIK-miit tusarniaanermut akissut tiguneqarpoq.

NUSUKA-mit, KNAPK-mit aamma Inuussutissarsiornermut Suliffeqarnermullu Naalakkersuisoqarfimmit tusarniaanermut akissutinik tigusaqartoqanngilaq.

Tusarniaaffigineqartut akissuteqarnerminni raajanut akitsuutip allanngortinneqarnissaanik aamma aalisakkanut (saarullinnut qaleralinnullu ) akitsuutip allanngortinneqarnissaanik siunnersuutit ataatsimoortillugit sammisimavaat. Siunnersuutinut tamanut ataatsimut isiginnilluni oqaaseqaatit aamma immikkut oqaaseqaatit saqqummerput. Matumani raajanut akitsuutit pillugit ataatsimut isiginnilluni oqaaseqaatit immikkullu oqaaseqaatit ilanngunneqassapput.

AP-mit aamma Royal Greenlandimit kiisalu ilaatigut Polar Seafoodimit ataatsimut isiginnilluni oqaaseqaatit.

Polar Seafoodimit aamma Royal Greenlandimit tusarniaanermut akissutit annertunerusutigut assigiipput. Marluullutik isumalluutinut kinguaassiorsinnaasunut akitsuusiinissaq tunngaviusumik akerleraat (paarlattuanik nunguttussanut – assersuutigalugu oliamut aatsitassanullu) akitsuusiisoqarnissaa akerlerinngilaat.

Tusarniaaffigineqartunit pingasuusunit nunarsuarmi aningaasaqarnikkut ajornartorsiorneq, silap pissusaanut tunngatillugu pissutsit inuiaqatigiillu ilusiligaanerannut tunngatillugu ataatsimut isigalugu aningaasartuutit qaffasiffigereeqisaanni qaangerniagassat innersuussutigineqarput. Taaneqarpoq akitsuusiinerup unammillersinnaassuseqarneq ajortup tungaanut sunnertussaagaa.

Akitsuusiisoqarnissaanut taarsiullugu tusarniaaffigineqartut marluullutik allatut aaqqissuussisoqarnissaa siunnersuutigaat, inuussutissarsiortut tamarmiullutik aalisagaqassutsimik uumassusilinnut tunngatillugu nakkutilliinermut uumassusilinnullu tunngatillugu nakkutilliinermut atatillugu aningaasartuutit ilaannut matusissutissanik akileeqataasartussanngorlugit. Oqaatigineqarpoq tamanna tunitsivissarsiornermut tunngatillugu pitsaasumik kinguneqarsinnaassasoq, assersuutigalugu aammattaaq oqartussaasuniit ataatsimut isiginnilluni Marine Stewardship Councilip kalaallit qaleraliinik raajaannillu (aamma immaqa saarulliinik aalisakkanillu allanik) akuersissuteqarnissaa angusinnaajumallugu.

AP-p raajanut akitsuutit allanngortinneqarnissaannut immikkut oqaaseqaatai.

AP allappoq assigiinngitsunut aningaasartuutit qaffariarsimasut, ukiuni kingullerni marlunni raajanut TAC-p annikillisinneqaratarsinnaaneranik pissuteqartumik. Assigiinngitsunut aningaasartuutit siunnersuut malillugu suli qaffariartussapput unammillersinnaassuseqarnerlu ajorseriartillugu.

Polar Seafoodip raajanut akitsuutip allanngortinneqarnissaanut immikkut oqaaseqaatai.

Polar Seafood akitsuutit nunanut allanut niuertunik nammagassiisussat iluaqutaasinnaanerannut isumaqataasinnaanngilaq, aalisarnermi kisiartaalluni nunanut allanut niuernermi pingaarutilimmik inuussutissarsiutaammat. Kaaviiaartitat aallaavigalugit akitsuusiinissaq iluaqutaasinnaanngilluinnarpoq. Tikkuarpaat avataasiorlutik raajarniartut maannakkut naleqqussarluakkanik aalisariutaateqalersimasut. Kiisalu Polar Seafoodip naatsorsuutigigaa 2009-mi ingerlatsinermut 2008-mut raajarniarfiulluarsimasumut paarlattuanik amigartooruteqarnissani.

Nunatsinni Sulisitsisut Peqatigiiffiat

Raajanut akitsuutinut tunngatillugu Sulisitsisut Peqatigiiffiata akitsuutit kaaviiaartitanut tunngatinneqartussat ataatsimut isigalugu eqqarsarnartoqartippai, minnerunngitsumik nioqqutissat nunanut allanut tunisassat pineqartillugit, tassami ilaatigut aalisarnermik inuussutissarsiuteqartut unammillersinnaassuseqarnerat ajorseriartissammassuk, taamatullu ingerlatseqatigiiffiit aningaasarsiornerat pingaartinneqanngimmat.

Sulisitsisut Peqatigiiffiata oqaatigaattaaq 9 mio. koruunit pissarsianut amerleriaataasussatut naatsorsuutigineqartut ilarpassui pisortat karsiinit allatigut peerneqartussaammata akileraarutitigut isertitassat annaaneqarnerannik pissuteqartumik, taamatullu Royal Greenland A/S pissarsiaqaataanerusussatut naatsorsuutigineqartut 40 procentii tikillugit sunnerneqartussaammat. Tikkuarpaattaaq aningaasartuuteqarnerulernerup allallu kingunerisinnaammassuk umiarsuaatillit ilaasa umiarsuaatiminnik nunanut allanut tunisinerusulernissaat, ingerlatseqatigiiffinnillu unerartitsinerat. Sulisitsisut Peqatigiiffiat aalajangersakkanut ataasiakkaanut oqaaseqaateqarsimanngilaq.

SIK

SIK-p tusarniaanermut akissutaani taamaallaat aalisakkanut akitsuutit eqqartorneqarsimapput.

KANUKOKA

Ataatsimut isigalugu KANUKOKA isumaqarpoq, ajunngilluinnartoq inuiaqatigiit isumalluutaat akitsuusiinikkut iluaqutiginiarneqassappata, kisianili eqqarsarnartoqartoq nunatsinni inuussutissarsiutit pingaarnersaat Royal Greenland A/S sallersaralugu aningaasaqarnikkut nammagassinneqassappat. Ingerlatseqatigiiffik akiitsoqareeqisoq.

Qaasuitsup Kommunia

Raajanut akitsuutit allanngortinneqarnissaannut siunnersuummut oqaaseqaatissaminik nassiussaqarsimanngilaq.

Qeqqata Kommunia

Naalakkersuisut allannguutissatut siunnersuutaannut tunngaviatigut isumaqataavoq, oqaatigaluguli kommunit akileraarutitigut isertitassaminnik annaasaqassasut. Naatsorsuutigineqarpoq kommuninut utertitsilluni taarsiisoqassasoq, allannguutissatut siunnersuut akuersissutigineqariarpat.

Kommuneqarfik Sermersooq

Kommunip nuannaarutigaa siunnersuutit inatsiseqartitsinermut tunngatillugu tunngavissiissammata Kalaallit Nunaat kalaallit isumalluutaannik umiarsuaatillit atuinerannut akiliisitsisalissammat.

Raajanut akitsuusiinissaq pillugu siunnersuummut tunngatillugu kommunip eqqumiigaa Naalakkersuisut aammattaaq raajanik pisassiissutinut akuersissutinullu akitsuusiinianngimmata, isumaqatigissanerarlugulu isumalluutinik akitsuusiisarnermut aammattaaq raajat ilanngunneqarnissaannik siunnersuuteqartoqassappat, kalaallinut inuiaqatigiinnut iluaqutaasumik aammattaaq isumalluutit uumassusillit Kalaallit Nunaanniittut inuiaqatigiinnit pigineqarnerat naapertorlugu.

Piniarnermut, Aalisarnermut Nunalerinermullu Naalakkersuisoqarfik

Raajanut akitsuutit allanngortinneqarnissaat pillugu siunnersuummut Naalakkersuisoqarfik oqaaseqaateqarsimanngilaq

Naalakkersuisut oqaaseqaataat

Naalakkersuisut maluginiarpaat aalisarnermik inuussutissarsiutillit ataatsimut isigalugu isumalluutit uumassusillit akitsuuserneqarnissaannut akerliummata maluginiarlugittaaq inuussutissarsiortunit kattuffinnillu akerliliinerit allat.

Naalakkersuisut akitsuutit atuutilersinneqartut sunniutissaat eqqumaffiginiarpaat. Naalakkersuisut piareersimapput allatut aaqqiissutissanik nassaarniarnissaminnut, aalisarnermik aalisagaqassutsimillu nakkutilliinermut akileeqataasarnissamik siunnersuutit innersuussutigalugit.

Naalakkersuisut taamatuttaaq paasivaat kommunit isumalluutit akitsuusigaanissaannut akuersaartumik isummersimammata maluginiarlugulu kommunit taarsiivigineqarsinnaanertik naatsorsuutigigaat, tassa akileraarutinit isertitatik ikileriassagaluarpata.

 

 

Siunnersuummi aalajangersakkanut ataasiakkaanut oqaaseqaatit

 

§ 1-imut

Nr. 1-imut 2-mullu

Taamaallaat allanngortinneqarpoq inatsit nr. 20, 25. oktober 1990-imeersumi, Inatsisartut inatsisaat nr. 19, 11. december 2003-meersukkut kingullermillu Inatsisartut inatsisaat nr. 12, 2. november 2006-imeersukkut allanngortinneqartumi § 4.

Taamaallaat tunisinermi akit § 4-mi aalajangersarneqartut allanngortinneqartut, taamaalilluni akitsuutitigut isertitassat raajanut 1 kiilunut kiilumut akiniit 11,70 koruuniniit naatsorsorneqartalissallutik. Tamakku kingunerisaannik taamatuttaaq akinut aallaavissatut nalilersuisarneq allanngortinneqassaaq.

Tamakku kingunerisaannik 45 procentinik annertunerpaamik akitsuusiisarnissaq aalaakkaasunngortinneqassaaq, tunisinermi aki agguaqatigiissillugu 56,70 koruuninngoraangat.

Nr. 3-mut 4-mullu

Tunisinermi akit allanngortinneqarnerisa kingunerisaannik taamatuttaaq akinut aallaavissatut nalilersuisarneq iluarsiivigineqassaaq.

Nr. 5-imut

Namminersornermut nuunnerup kingunerisaanik Inatsisartut inatsisaanni oqaatsit atorneqartut allanngortinneqassasut siunnersuutigineqarpoq.

 

Til § 2

Siunnersuutigineqarpoq Inatsisartut inatsisaat ulloq 1. januar 2010-mi atuutilissasoq.