Inatsisissatut siunnersuummut oqaaseqaatit

Oqaaseqaatit nalinginnaasut

 

1. Aallaqqaasiut:

Namminersornerullutik Oqartussat missingersuutaat pillugit Inatsisartut inatsisaat nr. 8, 29. oktober 1999-imeersumi Inatsisartut inatsisaat nr. 1, 23. maj 2000-imeersukkut allanngortinneqartumi § 10-mi aalajangersakkami allassimavoq, Aningaasanut inatsit ukiup aningaasanut inatsisip atuuffissaata siuliani 15. november nallertinnagu akuersissutigineqareertassasoq. Aalajangersagaq taamaattoq Inatsisartut Naalakkersuisullu pillugit inatsisartut inatsisaanni § 23, imm. 2-mi allassimavoq.

Taamaattoq 2010-mut aningaasanut inatsisissatut siunnersuut pillugu aningaasanut inatsisissalerineq siumut naatsorsuutigineqartunit ajornakusoornerusimavoq sivitsuloornerusimallunilu. Taamaammat Inatsisartut aningaasanut inatsisissatut siunnersuutip suliarineqarneranut pisariaqartinneqartumik piffissaqartinniarlugit illersorneqarsinnaasumillu sulisinnaaqqullugit siunnersuutigineqarpoq 2010-mut aningaasanut inatsisissap akuersissutigineqarnissaanut killiliussaq sivitsorneqassasoq.

Tamatuma kingunerisaatut piffissaliussat allat arlallit aamma sivitsorneqartariaqassapput:

Aningaasarsianit akileraarutit pillugit Inatsisartut inatsisaanni (§ 61, imm. 2-mi) aalajangersarneqarpoq, nunamut tamarmut akileraarutinut procenti atugassaq qaammatisiutit malillugit ukioq akileraarfiusoq sioqqullugu 15. november tikitsinnagu Inatsisartut aalajangertassavaat. Ileqquusutut procenti akileraarusiissutissaq aningaasanut inatsisissap ilaatut aalajangersarneqartarpoq. Taamaattumik aningaasanut inatsisissap aalajangiiffigineqarnissaanut piffissaliussaq assigalugu ukioq manna piffissaliussaq ulloq 28. novemberimut sivitsorneqassasoq siunnersuutigineqarpoq.

Kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit Namminersornerullutik Oqartussat nalunaarutaat nr. 29, 18. september 1995-imeersumi aalajangersagaqarpoq ukiumut aningaasaliiviusumut tulliuttumut kommunit missingersuutaat kingusinnerpaamik 1. decembarimi akuersissutigineqartassasut. Aningaasanut inatsisissap akuersissutigineqarnissaanut siunnersuutigineqartutut killiliussamik sivitsuinerup kommunit aalajangersakkamik tassannga malinninnissaat ajornakusoortunngortissavaa. Taamaammat siunnersuutigineqarpoq aammattaaq 2010-mut kommunit missingersuutaannik akuersissuteqarnissamut killiliussaq sivitsorneqassasoq.

Aningaasarsianit akileraarutit pillugit Inatsisartut inatsisaanni (§ 62, imm. 2-mi) aalajangersarneqarpoq, procenti kommunimut akileraarutissaq qaammatisiutit malillugit ukioq akileraarfissaq sioqqullugu 1. december tikitsinnagu kommunalbestyrelsip aalajangissavaa. Aningaasanut inatsisissap aalajangiiffiginissaanut piffissaliussap sivitsornissaanut siunnersuut atortussanngortinneqarpat, aalajangersakkap kommuninit malinneqarnissaa ajornakusoortilissavaa. Taamaattumik 2010-mut procentip akileraarusiissutissap aalajangersarneranut piffissaliussaq sivitsorneqassasoq siunnersuutigineqarpoq.

Meeqqat kommunip ulluunerani paaqqinnittarfiutaaniinnerinut kommunillu aaqqissugaanik ulluunerani angerlarsimaffimmi paaqqinniffinniinnerinut akiliuteqartarneq pillugu Namminersornerullutik Oqartussat nalunaarutaat nr. 18, 14. september 2006-imeersumi (§ 1, imm.1-mi) aalajangersarneqarpoq, meeqqat kommunip ulluunerani paaqqinnittarfiutaaniinnerinut kommunillu aaqqissugaanik ulluunerani angerlarsimaffimmi paaqqinniffinniinnerinut akit ukiumi tulliuttumi atuuttussat kommunalbestyrelsip kingusinnerpaamik novembarip qaammataani aalajangersartassavai. Aningaasanut inatsisissap aalajangiiffiginissaanut piffissaliussap sivitsornissaanut siunnersuut atortussanngortinneqarpat, aalajangersakkap kommuninit malinneqarnissaa ajornakusoortilissavaa. Taamaattumik 2010-mut akit aalajangersarnerannut piffissaliussaq sivitsorneqassasoq siunnersuutigineqarpoq.

2. Siunnersuutip pingaarnersai:

Siunnersuutigineqartukkut 2010-mut Aningaasanut inatsisissap aalajangiiffiginissaanut piffissaliussaq ulloq 28. november 2009-mut sivitsorneqassaaq. Tamatuma kingunerisaatut piffissaliussat allat arlallit Inatsisartunut kommunalbestyrelsinullu atuuttut aamma sivitsorneqartariaqassapput, takukkit aallaqqaasiut aamma aalajangersakkanut ataasiakkaanut oqaaseqaatit.

3. Pisortanut aningaasaqarnikkut allaffissornikkullu kingunerisassai:

Aningaasanut inatsisip aalajangiiffigineranut nalinginnaasumut naleqqiullugu kommunit ukiumut tullermut missingersuutinik aalajangiinissamut sivikinnerusumik piffissalerneqarput. Aalajangersimavissortumik 2009-mi 2010-mut Aningaasanut inatsisissap aalajangiiffigineraniit kommunit missingersuutaasa aalajangiiffiginissaanut piffissaliussamut ullut quliupput, nalinginnaasumik ullut 15-niusaraluartut.

4. Namminersortunut il.il. aningaasaqarnikkut allaffissornikkullu kingunerisassai:

Namminersortunut il.il. aningaasaqarnikkut allaffissornikkullu kinguneqassanngilaq.

5. Avatangiisinut pinngortitamullu tunngatillugu kingunerisassai:

Avatangiisinut pinngortitamullu tunngatillugu kinguneqassanngilaq.

6. Innuttaasunut allaffissornikkut kingunerisassai:

Siunnersuut innuttaasunut allaffissornikkut kinguneqassanngilaq.

7. Naalagaaffeqatigiinnut aamma Namminersorlutik Oqartussanut tunngasut:

Siunnersuut Naalagaaffeqatigiinnut imaluunniit Kalaallit Nunaata inatsiseqarnikkut inissisimaneranut tunngatillugu kinguneqassanngilaq.

8. Oqartussaasunik kattuffinnillu tusarniaaneq:

Siunnersuut tusarniaassutigineqanngilaq. Inatsisileriffiup siunnersuut inatsisilerinermut tunngatillugu suliaraa, tassanngaanniillu oqaaseqaatit suliarineqarneranut ilanngunneqarput. Tamatuma saniatigut suliap ingerlanerani Namminersorlutik Oqartussani naalakkersuisoqarfiit suliamut attuumassuteqartut attaveqarfigineqartarsimapput soorluttaarlu kommunit ilisimatinneqarsimasut, taassumalu nassatarisimanagu allannguutissanik ilanngussinissaq.

 

Inatsisissatut siunnersuummi aalajangersakkanut ataasiakkaanut oqaaseqaatit

§ 1-imut

1. Siunnersuutigineqarpoq Inatsisartut 2010-mut aningaasanut inatsisissaat kingusinnerpaamik ulloq 28. november 2009-mi akuersissutigineqassasoq. Taamaalilluni missingersuutinut inatsimmi § 10-mi aamma Inatsisartut Naalakkersuisullu pillugit inatsisartut inatsisaanni § 23, imm. 2-mi killiliussaq atuuttoq saneqqunneqassaaq.

2010-mut nunamut tamarmut procenti akileraarusiissutissaq kingusinnerpaamik ulloq 28. november 2009-mi aalajangersaaffigineqassasoq siunnersuutigineqarpoq. Taamaalilluni Aningaasarsianit akileraarutit pillugit Inatsisartut inatsisaanni § 61, imm. 2-mi (15. november) piffissaliussaq atuuttoq saneqqunneqassaaq.

Siunnersuutigineqarpoq 2010-mut kommunit missingersuutaat kingusinnerpaamik ulloq 15. decembarimi akuersissutigineqassasut. Taamaalilluni Kommunit missingersuusiortarnerat, naatsorsuutaat, kukkunersiuisarneq aamma karseqarnerat naatsorsuuseriveqarnerallu pillugit Namminersornerullutik Oqartussat nalunaarutaat nr. 29, 18. september 1995-imeersumi killiliussaq atuuttoq (1. december) saneqqunneqassaaq.

2010-mut kommunimut procentip akileraarutissaq kingusinnerpaamik ulloq 15. december 2009 aalajangersarneqassasoq sinnersuutigineqarpoq. Taamaalilluni Aningaasarsianit akileraarutit pillugit Inatsisartut inatsisaanni § 62, imm. 2-mi (1. december) piffissaliussaq atuuttoq saneqqunneqassaaq.

Kiisalu siunnersuutigineqarpoq, meeqqat kommunip ulluunerani paaqqinnittarfiutaaniinnerinut kommunillu aaqqissugaanik ulluunerani angerlarsimaffimmi paaqqinniffinniinnerinut 2010-mut akit kingusinnerpaamik ulloq 15. december 2009 aalajangersarneqassasut. Namminersornerullutik Oqartussat nalunaarutaanni § 1, imm.1-mi, meeqqat kommunip ulluunerani paaqqinnittarfiutaaniinnerinut kommunillu aaqqissugaanik ulluunerani angerlarsimaffimmi paaqqinniffinniinnerinut akiliutinut (kingusinnerpaamik novemberimi) piffissaliussaq atuuttoq taamaalilluni saneqqunneqassaaq.

§ 2-mut

Siunnersuutigineqarpoq inatsit akuersissutigineqarniariarluni atuutilissasoq allamillu iliuuseqartoqartinnagu ulloq 1. januar 2010-mi atuukkunnaassalluni.