6. november 2009

UKA2009/92

 

Meeqqat atuarfiat pillugu Inatsisartut peqqussutaata allanngortinneqarnera pillugu Inatsisartut peqqussutaat nr. xx,xx. Xx2009-imeersoq pillugu siunnersuut
(Perorsaanermut aamma tarnip pissusaanut tunngasunik siunnersuinerup kommuninut suliassanngortinneqarnera)

 
Pillugu

Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliap

ISUMALIUTISSIISSUTAA

 Aalajangiiffigissassatut siunnersuutip aappassaaneerneqarnissaanini saqqummiunneqartoq

Kultureqarnermut, Ilinniartitaanermut, Ilisimatusarnermut Ilageeqarnermullu ataatsimiititaliaq suliarinninnermini ukuninnga inuttaqarpoq:

Juliane Henningsen, Inuit Ataqatigiit
Harald Bianco, Inuit Ataqatigiit
Andreas Uldum, Demokraatit
Malik Berthelsen, Siumut
Naja Petersen, Atassut

UKA2009-i ulloq 7. oktober 2009 Kultureqarnermut, ilinniartitaanermut, Ilisimatusarnermut Ilageeqarnermullu ataatsimiititaliaq siunnersuummik misissuataarinnippoq.

Siunnersuutip imarisai

Suleqatigiissitap KANUKOKA-mit kiisalu Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmit inuttaqartup innersuussutigivaa, perorsaanermut aamma tarnip pissusaanut tunngasunik siunnersuinerup (PPR) kommuninut tunniunneqarnissaat. Aaqqissuusseqqinnermut ataatsimiititaliap isumaliutissiissutaanut atatillugu PPR-ip kommuninut tunniussinissamik innersuussineranut atatillugu suleqatigiissitaq pilersinneqarpoq.

Siunnersuut Inatsisartunit akuersissutigineqarpat tamatuma PPR-ip kommuninut tunniunneqarnissaanik kinguneqassaaq. Taamaattorli maluginiarneqassaaq atuutsitsilernissamut piffissaliisoqarsimannginnera siunnersuummi takuneqarsinnaanngimmat. Tamanna kingusinnerusukkut peqqussutissap nalunaarutigineqarnerani pisinnaassaaq. Piffissaliisoqarsimannginneranut pissutaavoq ataatsimut tapiissutit pillugit isumaqatigiinniarnerit Namminersorlutik Oqartussat kommunillu akornanni suli naammassineqarsimanngimmata.

Inatsisartut siunnersuummik suliarinninnerat

suliassaqarfimmik tunniussinissaq Nunatta karsianut aningaasatuuteqarnerunermik kinguneqaateqanngitsumik pisinnaanissaa Inuit Ataqatigiit qularnartoqartippaat. Taamaattorli suliassaqarfiup Namminersorlutik Oqartussanit kommuninut nuunneqarnissaa pillugu siunnersuummut Inuit Ataqatigiit tapersiipput innersuusutigalugulu, tunniussinermut atatillugu aningaasaqarnikkut ajornartorsiutaasinnaasunut ataatsimiititaliaq upalungaarsimassasoq.      

Ullumikkut meeqqat atuartinneqarnerannut kommunit akisussaafimmik tigummereermata PPR-imut akisussaaffik kommuninut nuunneqarnissaa pissusissamisoortutut Siumumit isigineqarpoq. Aammattaaq tunniussineq ingerlaannartumik pissanngitsoq Siumumit taperserneqarpoq.

kommunit PPR-imik tigusinissaat Demokraatit akornutissaqartinngilaat. Taamaattorli tunniussinerup kingorna PPR-ip sullissinermini qaffasissusaa pillugu malitseqartitsisoqassasoq Demokraatinit piumasarineqarpoq tassami tunniussinerup kingunerisaanik sullissinerup appariaateqarnissaa Demokraatinit akuersaarneqarsinnaanngimmat.

PPR-ip kommuninut tunniunneqarnissaa Atassutip taperserpaa. Tunniussinerli tunngavigalugu kommunit aningaasaqarnikkut artukkerneqannginnissat ilutigalugu erseqqissarlugu.

Kattusseqatigiit Partiiata siunnersuut ataatsimut isigalugu tapersersorpaat atuutilernissaanulli piffissaliussap kommuninut tapiissutit pillugit isumaqatiginninniarnerit utaqqimaarneqarnissaat pitsaasutut isigalugu.

Ataatsimiititaliap siunnersuummik suliarinninnera

Siunnersuummik atuutilersitsinissaq isumaliutissiissummik tunniussinermi pisinnaammat, kommuninut tapiissutit pillugit Namminersorlutik Oqartussat kommunillu isumaqatigiinniarnerata utaqqimaarneqarnerat ataatsimiititaliamit maluginiarneqarpoq. Taamatut periuseqarnermut una tunngavilersuutigineqarpoq:

”Naalakkersuisut pingaartippaat aaqqissuussaanermut ataatsimiititaliap kajumissaataa malillugu Inatsisartut inatsisitigut tunngavissaqalernissaat, tassalu PPR_ip kommuninut suliassannortinneqarnissaa. Atuutsitsilernissamut piffissamik aalajangiisinnaanerup periarfissaqalersippaa isumaqatigiissusiortoqarsinnaanera kommunillu pitsaanerusumik suliassanngortitsinerup tigunissaanut piareersarsinnaanerat”.

Aaqqissuussaanermut ataatsimiititaliap innersuussutaasa inatsitigut aalajangersarneqarnissaanik Naalakkersuisut kissaateqarnerat ataatsimiititaliap paasisinnaavaa. Siunnersuummili aningaasaqarnikkut sinaakkutissanik ilisimasaqannginneq ataatsimiititaliap sulineranut atatillugu naammaginnanngitsutut isigalugu. Maannakkulli aningaasaqarnikkut sinaakkusiussat iluini siunnersuutip piviusunngortinneqarsinnaanera pillugu Naalakkersuisut naliliisimanerat ataatsimiititaliamit taamaattoq ilisimaneqarpoq. Tamanna tunuliaqutaralugu siunnersuummik akuersissutiginninneq Namminersorlutik Oqartussanut aningaasartuuteqarnerulersitsissanngitsoq ataatsimiititaliamit naatsorsuutigineqarluinnarpoq.

Siunnersuut Inatsisartunit tamanit tapersersorneqartoq ataatsimiititaliap maluginiarpaa. Aammattaaq siunnersuut ataatsimiititaliamit tapersersorneqarpoq. PPR-ip kommuninut tunniunneqarnerani kommunit suliniutaanni  meeraq qitiutinneqarnerulernissaanik kinguneqassasoq ataatsimiititaliaq Naalakkersuisutullu isumaqarpoq.

Tunniussinerup kingunerisaanik PPR-ip suliaasa pitsaassusaasa appartinneqannginnissaata qulakkeerneqarnissaa pillugu PPR-imik kommuninut tunniussinerup nalilerneqarnissaanik Demokraatit siunnersuutaat ataatsimiititaliamit pitsaasutut isigineqarpoq. Taamaattumik Naalakkersuisut isumaliutissiissummut akissumminni oqaaseqaatiminni tassunga tapersiinissaanik ataatsimiititaliap qinnuigissavai.

Aammattaaq PPR-ip kommuninut tunniunneqarneranut atatillugu suliat pillugit, matumani aningaasaqarnermut tunngasortai ilanngullugit ingerlaavartumik ilisimatinneqartarnissamik ataatsimiititaliaq qinnuteqarpoq.

Ataatsimiititaliap inassuteqaataa

Ataatsimiititaliap isumaqatigiittup siunnersuut oqaaseqaatitalik akuersissutigineqartussatut inasssutigaa.

Taama oqaaseqarluni Ataatsimiitialiap siunnersuut aappassaaniigassanngortippaa.

 

	Juliane Henningsen Siulittaasoq
Harald Bianco Siulittaasup tullia		Andreas Uldum
Malik Berthelsen		Naja Petersen