Aasaanerani nalunaaquttap atorneqarnerata aalajangersarneqarnera pillugu Namminersorlutik Oqartussat nalunaarutaat nr. 15, 20. oktober 2009-meersoq

Aasaanerani nalunaaquttap atorneqarnera pillugu Inatsisartut inatsisaat nr. 14, 19. oktober 1989-imeersumi § 1 naapertorlugu aalajangersarneqarpoq:

 

§ 1. Piffissamik immikkut naatsorsueriaaseq, aasaanerani nalunaaquttap atorneqarnera, atorneqassaaq piffissami martsimi sapaatit akunnerisa naanerannit kingullermiit oktobarimi sapaatit akunnerisa naanerannut kingullermut. Aasaanerani nalunaaquttap atorneqarnerata aallartinnera unitsinneqarneralu nunatsinni piffissamut nalinginnaasumut Ittoqqortoormiinullu aalajangersarneqassapput. Kalaallit Nunaat Pituffiup eqqaani sakkutooqarfimmut Danmarkshavnimullu aasaanerani nalunaaquttap atorneqarneranut malittarisassanik aalajangersaasanngilaq.
Imm. 2. Aasaanerani nalunaaqutaq ukiup sinneranut naleqqiullugu nalunaaquttap akunneranik ataatsimik siuartinneqassaaq.
Imm. 3. Aasaanerani nalunaaquttap atorneqarnerata aallartinnera unitsinneqarneralu nunarsuarmi piffissalersuinermut Universal Time Coordinated-imik (UTC) taaneqartartumut naleqqiullugit aalajangersarneqassapput, taanna nunani tamalaani atugaavoq apeqqutaatillugu suut nunarsuaq kaajallallugu piffissaqarfinnut 24-nut agguarneqarsimanersut. Piffissaqarfiit tamarmik nalunaaquttap akunneranik ataatsimik sivisussuseqarput.
Imm. 4. Kalaallit Nunaanni piffissap nalinginnaasup UTC-llu akornanni piffissat assigiinngissutaat aasaanerani nalunaaquttap akunnerinik marlunnik kingulliuvoq. Kalaallit Nunaanni piffissap nalinginnaasup UTC-llu akornanni piffissat assigiinngissutaat ukiup sinnerani nalunaaquttap akunnerinik pingasunik kingulliuvoq. Ittoqqortoormiit UTC-llu akornanni aasaanerani piffissaq assigiinngissuteqanngilaq. Ittoqqortoormiit UTC-llu akornanni piffissat assigiinngissutaat ukiup sinnerani nalunaaquttap akunneranik ataatsimik kingulliuvoq.

§ 2. Aasaanerani nalunaaquttap atorneqarnera aallartittarpoq martsimi sapaat kingulleq nalunaaqutaq 01.00 UTC. Piffissami tassani Kalaallit Nunaanni piffissaq nalinginnaasoq malillugu arfininngorneruvoq nalunaaqutarlu 22.00-nngorluni, taamaammat nalunaaqutaq 23.00-imut inissinneqassaaq.

§ 3. Ittoqqortoormiini aasaanerani nalunaaquttap atorneqarnera aallartittarpoq martsimi sapaat kingulleq nalunaaqutaq 01.00 UTC. Piffissami tassani Ittoqqortoormiini nalunaaqutaq 00.00-nngortarpoq, taamaammat nalunaaqutaq 01.00-imut inissinneqassaaq.

§ 4. Aasaanerani nalunaaquttap atorneqarnera unittarpoq oktobarimi sapaat kingulleq nalunaaqutaq 01.00 UTC. Piffissami tassani Kalaallit Nunaanni piffissaq nalinginnaasoq malillugu arfininngorneruvoq nalunaaqutarlu 23.00-nngorluni, taamaammat nalunaaqutaq 22.00-imut inissinneqassaaq.

§ 5. Ittoqqortoormiini aasaanerani nalunaaquttap atorneqarnera unittarpoq oktobarimi sapaat kingulleq nalunaaqutaq 01.00 UTC. Piffissami tassani Ittoqqortoormiini nalunaaqutaq 01.00-nngortarpoq, taamaammat nalunaaqutaq 00.00-imut inissinneqassaaq.

§ 6. Namminersorlutik Oqartussat aasaanerani nalunaaquttap atorneqarnerata aallartittarnera unitsinneqartarneralu pillugit Namminersorlutik Oqartussat nittartagaanni ukiunut tallimanut tulliuttunut ingerlaavartumik paasissutissiisarnerit nutartertassavaat.

§ 7. Nalunaarut atuutilerpoq ulloq 20. oktober 2009.
Imm. 2. Peqatigitillugu atorunnaarsinneqarpoq aasaanerani nalunaaquttap aalajangersarneqarnera pillugu Namminersornerullutik Oqartussat nalunaarutaat nr. 19, 5. oktober 2006-imeersoq.

Namminersorlutik Oqartussat, ulloq 19. oktober 2009

Kuupik Kleist

/

Peter Schultz