Kalaallit Nunaanni efterskolinut kiisalu efterskolimiinnermut tapiissuteqartarneq pillugu Namminersorlutik Oqartussat nalunaarutaat nr. 13, 3. september 2009-meersoq.

Efterskolit pillugit Inatsisartut inatsisaanni nr. 13-imi, 5. december 2008-meersumi § 1, imm. 3, § 2, imm. 2, § 3, § 13, imm. 4, § 14, § 17 kiisalu § 19 naapertorlugit makku aalajangersarneqarput:

 

Kapitali 1
Tapiissutisinissamut piumasaqaatit

§ 1. Kalaallit Nunaanni efterskolimiinnermut tapiissutit Naalakkersuisunit imaluunniit pisortaqarfinnit suliffeqarfinnilluunniit Naalakkersuisunit piginnaatitaasunit aningaasanut inatsimmi aningaasaliissutigineqartut iluannit aningaasaliissutigineqartarput.
Imm. 2. Tapiiffigineqarnissamut piumasaqaatit makku naammassineqarsimassapput
1) efterskoli ilinniartup atualerfissaa Naalakkersuisunit akuerisaassaaq, aamma
2) tapiiffigineqarnissamut qinnuteqaat piffissaq eqqorlugu tunniunneqarsimassaaq, tak. § 3.
Imm. 3. Nalaakkersuisut imaluunniit pisortaqarfiit suliffeqarfinnilluunniit Naalakkersuisunit piginnaatitaasut immikkut ittunik pissutissaqartillugu imm. 2, nr. 2 saneqqussinnaavaat.
Imm. 4. Efterskolimiinneq maanaannaq taamaatinneqarpat, imaluunniit ilinniartoq efterskolimiilernissap aallartinnerani takkutinngitsoorpat, tapiissuteqartarneq erngerluni unitsinneqassaaq.
Imm. 5. Ilinniartitaanermut naalakkersuisoqarfik tapiissutit utertinneqarnissaannik piumasaqaateqarsinnaavoq tapiissutit siunertanit akuersissutigineqartunit allaanerusunut atorneqarsimappata.

Qinnuteqaateqarnermi periaatsit

§ 2. Angajoqqaatut oqartussaatitaasut namminneerlutik ilinniartup efterskolernissaa qinnuteqaatigissavaat.
Imm. 2. Tapiiffigineqarnissamik qinnuteqarnermi qinnuteqarfissiaq ilinniartitaarnermut naalakkersuisoqarfimmit suliarineqarsimasoq atorneqassaaq.
Imm. 3. Qinnuteqarfissiaq kommunimi ilinniartup atuarfigisaani atuartitaanermut ingerlatsivimmit tunniunneqassaaq.
Imm. 4. Qinnuteqartup tapiiffigineqarnissamik qinnuteqaat atuartitaanermut ingerlatsivimmut nassiutissavaa, tassunga ilanngullugit ilinniartup ilinniartunngortussatut akuerisaaneranut efterskolimit uppernarsaat.
Imm. 5. Atuartitaanermut ingerlatsiviup tapiiffigineqarnissamik qinnuteqaat, ilanngussat imm. 4-mi taaneqartut aamma misilitsissimanermut uppernarsaatip imaluunniit karakterit kingulliit uppernarsaataasa assilinerat Naalakkersuisunut imaluunniit pisortaqarfinnut suliffeqarfinnulluunniit Naalakkersuisunit piginnaatitaasunut nassiutissavai.

§ 3. Qinnuteqaat efterskolimiinnissap ukioq aallartiffissaa sioqqullugu kingusinnerpaamik 1. december atuartitaanermut ingerlatsivimmit tiguneqareersimassaaq.
Imm. 2. Qinnuteqaat ukiumi efterskolimiinnissap aallartiffissaani kingusinnerpaamik januarip 15-iani Naalakkersuisunit imaluunniit pisortaqarfinnit suliffeqarfinnilluunniit Naalakkersuisunit piginnaatitaasunit tiguneqareersimassaaq.

§ 4. Naalakkersuisut imaluunniit pisortaqarfiit suliffeqarfiilluunniit Naalakkersuisunit piginnaatitaasut tapiissutit akuersissutigineqarsimanersut ukiumi efterskolimiinnissap aallartiffissaani kingusinnerpaamik martsip 15-iani qinnuteqartunut nalunaarutigissavaat.
Imm. 2. Naalakkersuisut imaluunniit pisortaqarfiit suliffeqarfiilluunniit Naalakkersuisunit piginnaatitaasut tapiissutit tunniunneqartut pillugit efterskolimut nalunaaruteqassapput ukiumi efterskolimiinnissap aallartiffissaani kingusinnerpaamik martsip 15-iani.
Imm. 3. Naalakkersuisut imaluunniit pisortaqarfiup suliffeqarfiulluunniit Naalakkersuisunit piginnaatitaasup atuartitaanermut ingerlatsivimmut qinnuteqaatit ingerlatsiviup nassiussaasa aalajangiiffigineri pillugit nalunaaruteqassaaq ukiumi efterskolimiinnissap aallartiffissaani kingusinnerpaamik martsip 15-iani.

§ 5. Ilinniartup angalanissaata piareersarnissaa atuartitaanermut ingerlatsiviup isumagissavaa. Naalakkersuisut imaluunniit pisortaqarfiit suliffeqarfiilluunniit Naalakkersuisunit piginnaatitaasut ilinniartut angalanissaannik aaqqissuisuusimappata najukkami atuarfimmik ingerlatsivimmut bilitsit kingusinnerpaamik majip 15-iani nassiunneqassapput.

Efterskolimiinnermik maanaannaq taamaatitsineq

§ 6. Efterskolimi ilinniartup Kalaallit Nunaanni efterskolernini maanaannaq unitsikkumalissappagu angerlarnissaanut aningaasaliisoqartinnagu efterskolip pisortaata ilinniartumik oqaloqateqarnissaq isumagissavaa.
Imm. 2. Oqaloqatigiinneq pissaaq ilinniartup efterskoliani angerlarnissamik kissaateqarnerup nalunaarutigineqarnerata kinguninngua. Oqaloqatigiinnermi peqataassapput efterskolimi sulisoq ataaseq, ilinniartoq, ilinniartorlu 18-it inorlugit ukioqarpat angajoqqaavi imaluunniit ilinniartup ilaqutariit atassuteqarfigisai.

 

Kapitali 2
Tapiissutinik innersuussineq

§ 7. Efterskolit pillugit Inatsisartut Inatsisaat nr. 13, 5. december 2008-meersumi § 12 naapertorlugu tunngaviusumik tapiissutit innersuunneqassapput Naalakkersuisunit efterskolillu akornanni isumaqatigiissuteqarnerit malillugit.
Imm. 2. Taxameteri malillugu tapiissutit, ukiumi aningaasaliiffiusumi ukiumut ilinniartorisassat amerlassusissaattut anguneqartut naapertorlugit naatsorsorneqartut Naalakkersuisut efterskolillu akornanni isumaqatigiissuteqarnerit naapertorlugit tunniunneqassapput. Ilinniartut efterskolimiinnissap aallartinnerani 18-inik ukioqalereersimasut, efterskolip ukiumoortumik ilinniartuisa amerlassusaannut ilanngunneqarsinnaapput, efterskolimiinnissaq ilinniartup kommunimi atuarfigisaani perorsaanikkut tarnillu pissusiinik siunnersortimit imaluunniit ilinniarneq pillugu siunnersuisumit allakkatigut oqaaseqaateqarnikkut inassutigineqarsimappat.
Imm. 3. Taxameteri malillugu tapiissutit annikillisinneqassapput efterskolip ukiumut ilinniartui qaammatip naanerani ikilisimappata. Tamannali efterskolinut pilersinneqarlaanut atuutinngilaq, tak. Efterskolit pillugit Inatsisartut inatsisaat nr. 13, 5. december 2008-meersumi § 13, imm. 3.
Imm. 4. Taxameteri malillugu tapiissutit annikillisinneqassapput sapaatip-akunnerinik 40-nik ikinnerusunik ilinniartitsisoqarpat, tak. Efterskolit pillugit Inatsisartut inatsisaat nr. 13, 5. december 2008-meersumi § 11, nr. 1 aamma 3.
Imm. 5. Ilinniarfiup ingerlatsinini unitsippagu, tapiissutit ukiumi atuarfiusumi naammassineqartumi kingullermi ukiumut ilinniartut amerlassusaannut naleqqiullugit naatsorsorneqassapput.

Immikkut ilinniartitsinermut aamma allatigut immikkut perorsaanikkut ikiorsiinissamut tapiissutit

§ 8. Angajoqqaat timikkut tarnikkulluunniit innarluutilimmik efterskolimi ilinniartuutillit akiliutissaat aalajangerneqassaaq, aningaasanut inatsimmi tapiissutissatut qaffasinnerpaatut taaneqartoq aallaavigalugu.

§ 9. Efterskolit pillugit Inatsisartut inatsisaat nr. 13, 5. december 2008-meersumi § 17 naapertorlugu immikkut ilinniartitsinermut aamma allatigut immikkut perorsaanikkut ikiorsiinermut tapiisoqassaaq, ilinniartoq nalinginnaasumik atuartitsinerup iluani isumagineqarsinnaanngitsumik ineriartornermigut immikkut isumassortariaqarpat imaluunniit ikiorsertariaqarpat.
Imm. 2. Immikkut ilinniartitsinermut imaluunniit allatigut perorsaanikkut ikiorsiinermut ilaapput
1) ilinniarfiup atuartitsissutaasa iluanni immikkut aaqqissuussamik ilinniartitsineq, imaluunniit
2) tarnikkut, timikkut imaluunniit maluginiutitigut ajornartorsiuteqarnerit sunniutaat ikiorsiiviginiarlugit killilerniarlugilluunniit sammisassanik suleriaatsinillu ilinniartitsineq sungiusarnerlu.

Tapiissutinik utertitsineq unitsitsinerlu

§ 10. Efterskolip inatsimmi tapiissuteqarnissamut piumasaqaatit imaluunniit inatsit malillugu allaffissornikkut maleruagassat eqquutinngippagit, Naalakkersuisut aalajangiisinnaapput tapiissutinik uninngatitsiniarlutik, tapiissutit tamakkiisumik ilaannakortumilluunniit unitsinniarlugit imaluunniit tamakkiisumik ilaannakortumilluunniit utertitassanngortinniarlugit. Efterskoli tapiissutinik tamakkiisumik ilaannakortumilluunniit pisartagaqaannarnissaminut immikkut akuerineqarnissamik qinnuteqarsinnaavoq.
Imm. 2. Naalakkersuisut tapiissutinik uninngatitsisinnaapput imaluunniit atorunnaarsitsisinnaallutik efterskolip akiliisinnaajunnaartutut nalunaarutigineqarnissaa piumasarineqarpat imaluunniit akilersuinerminik unitsitsippat, imaluunniit efterskolip ingerlatsinerata unitsinneqarnissaa aarleqqutigineqarpat.
Imm. 3. Aammattaaq Naalakkersuisut tapiissutinik utertitsinissamik piumaqasarsinnaapput, tapiissutinik naatsorsuinermi tunngavigineqartut imaluunniit tapiissutit naatsorsornerat allakkut kukkusimappata.
Imm. 4. Tapiissutit atorunnaarsinneqartut utertinneqartulluunniit Nunatta Karsianut nakkassapput.
Imm. 5. Tapiissutit annertunaarlugit tunniunneqartut tapiissutissanit tulliuttunit ilanngaanneqarsinnaapput.

§ 11. Efterskolip Efterskolit pillugit Inatsisartut inatsisaanni nr. 13, 5. december 2008-meersumi § 7, imm. 2 piumasaqaatinik eqquutitsinnginnera pissutigalugu Naalakkersuisut § 10, imm. 1 naapertorlugu tapiissutit tamakkiisumik atorunnaarsinneqarnissaat aalajangiuppassuk, efterskoli tapiissutinik pisartagaqaleqqissinnaavoq efterskolinut nutaanut maleruagassat malillugit, tak. § 7.

 

Kapitali 3
Naammagittaalliorsinnaaneq

§ 12. Tapiissutit pillugit aalajangiinernut naammagittaalliutit Ilinniartitaanermut Naalakkersuisoqarfimmut suliakkiissutigineqarsinnaapput. Naammagittaalliutit aalajangiinerup kingorna kingusinnerpaamik sapaatip-akunnerisa sisamat qaangiunneranni Ilinniartitaanermut Naalakkersuisoqarfimmit tiguneqareersimassapput.

Atuutilerfissaa pillugu aalajangersagaq

§ 13. Nalunaarut 1. september 2009-mi atuutilissaaq, ukiumiillu atuarfiusumit 2009/2010-miit sunniuteqalissalluni.

Namminersorlutik Oqartussat, ulloq 3. september 2009.

Mimi Karlsen

/

Lise Lennert Olsen