27. november 2008

UKA 2008/156

Inatsisissatut siunnersuummut nassuiaatit

Nassuiaatit nalinginnaasut

1. Inatsisissatut siunnersuummut tunuliaqutaasut

Kommunalbestyrelsit nunaqarfinni aqutsisut il.il. pillugit inatsit maanna atuuttoq 1994-imi atortussanngortinneqarpoq kingusinnerusukkullu allannguuteqartinneqarluni inatsisartut inatsisaat nr. 6, 12. juni 1995-imeersukkut (Kommunit Nakkutilliisoqarfiat), inatsisartut inatsisaat nr. 8, 14. november 2004-imeersukkut (Aningaasaqarnermut ataatsimiititaliat annertusisamik piginnaatinneqarnerat) aammalu inatsisartut inatsisaat nr. 19, 20. november 2006-imeersukkut (Oqarasuaatikkut ataatsimiittarnerit). Naalakkersuisut inatsisissatut siunnersuutikkut ugguuna kissaatigaat allannguutit inatsimmut ataatsimut katersorneqarnissaat.

Kiisalu Naalakkersuisut ukiakkut 2007-imi isumasioqatigiissitsipput kommunaldirektørinit misilittagaqarluartunit aamma Kalaallit Nunaanni Kommuneqarfiit Kattuffiannit (Kanukoka-mit) peqataaffigineqartumik. Isumasioqatigiinnermi kommunalbestyrelsit, nunaqarfinni aqutsisut il.il. pillugit inatsisartut inatsisaat tamarmiusoq misissorneqarpoq misilittakkallu saqqummiunneqartut inatsisissatut siunnersuummi ilanngunneqarput. Taamatuttaaq inatsisissatut missingersuutaagallartoq Kanukokamut kommuninullu tusarniaassutigineqarsimavoq. Tusarniaanermi akissutigineqartut tunngavigalugit inatsisissatut siunnersuutip allaffissornikkut suliareqqinneqarnissaa pisariaqalersimavoq. Missingersuummut siulliusumut kommunit aamma Kanukoka-p allannguutissatut siunnersuutaat matumani siunnersuummi tamakkiisumik ilanngunneqarput.

Kommunini aqutsinermut inatsisissatut siunnersuut maanna inatsisartut ataatsimiinneranni Naalakkersuisunit saqqummiunneqarsimavoq (UKA 2008/61) Inatsisartut Aaqqissuusseqqinneq pillugu Ataatsimiititaliaata isumaliutissiissutaa tunngavigalugu Naalakkersuisut inatsisissatut siunnersuut tunuartippaat, ataatsimiittitaliap siunnersuutaat tunngavigalugit aaqqissuunnissaa siunertaralugu. Inatsisissatut siunnersuutip maanna saqqummiunneqartup Ataatsimiititaliap siunnersuutaat amerlanerit tunngavigalugit suliarineqarpoq.

Nakkutilliineq nalinginnaasoq Nunap iluani pissutsinut allaffeqarfimmi ingerlanneqartoq Kommunillu Nakkutilliisoqarfianni nakkutilliineq ingerlanneqartoq maanna kommunalbestyrelsit, nunaqarfinni aqutsisut il.il. pillugit inatsisartut inatsisaanni atuuttumi piginnaatitsineq ersarinngilaq. taamaanneralu Nunap iluani pissutsinut allaffeqarfimmi kommunit ingerlanneqarneranni nakkutilliinermut atatilligu arlalitsigut ajornartorsiuteqartarnernik kinguneqartarsimavoq. Taamaattumik inatsisissatut siunnersuummi nalinginnaasumik nakkutilliinermi aammalu Kommunit Nakkutilliisoqarfiata nakkutilliinerata piginnaatitaaffiinik ersarissumik avissaarsimanissaanik Naalakkersuisut siunnersuuteqarput.

Naalakkersuisuttaaq kommunalbestyrelsit, nunaqarfinni aqutsisut il.il. pillugit inatsisartut inatsisaat manna atuuttoq sukumiisumik misissorsimavaat, inatsisip ersarinnerulernissaa paasiuminarnerulernissaalu siunertaralugit.

2. Inatsisissatut siunnersuutip imarisai

2.1 Aalajangersakkat nalinginnaasut

Kommunit aqunneqarnerat pillugu aalajangersakkat nalinginnaasut kapitalimi matumani aalajangersarneqarput. Aalajangersakkat maanna aalajangersakkanut atuuttunut naapertuuttuupput. Kommunini suliassaqarfiit aaqqissuuteqqinneqarnerat pillugu inatsisartut inatsisaata atortussanngortinneqarnerata kingunerisaanik tulluarsaalluni naqqiissuteqartoqartarnissaa siunnersuutigineqarpoq. Taamattaaq siusinnerusukkut siunertamut aalajangersagaq inatsimmi allassimasuugaluartoq nassuiaatinut nuunneqassasoq siunnersuutigineqarpoq.

2.2 Kommunalbestyrelsi

Kommunini ataasiakkaani kommunalbestyrelsimi ilaasortat amerlassusiat aammalu kommunalbestyrelsit inissitsitertarnerat kapitalimi uani aalajangersarneqassasut siunnersuutigineqarpoq.

Aammattaaq kommunalbestyrelsit sulinerat aalajangersarneqarpoq. Akissarsiaqartitsinernut aalajangersakkat immikkut kapitalimut nutaamut (kapitali 8) siunnersuummi nuunneqarput. Tassunga tunngatillugu immikkoortoq "2.9 Akissarsiat" takuuk.

Kommunerujussuanngortussani kommunalbestyrelsit annertunerusumik ammasumik sulineri ingerlanneqassasut naalakkersuisut pingaartippaat, taamaattumillu siunnersuutigalugu kommunalbestyrelsini ilaasortat ataasiakkaat kommunalbestyrelsimi suliaqarnermi allagaatinik suliamut attuumassuteqartut annertunerusumik misissuisinnaanngornissaat. Kiisalu Naalakkersuisut siunnersuutigaat piffissaliussanik aalajangersaasoqassasoq ullormut oqaluuserisassat aammalu kommunalbestyrelsip ataatsimiinnerini allagaatitigut atortussat kommunalbestyrelsimi ilaasortanut nassiunneqareertarnissaannut atatillugu.

2.3 Borgmesterip aamma borgmesterip tulliata atuunnerat

Kommunimi ingerlatsinerup ersarinnerulernissaanik Naalakkersuisut kissaateqarnerisa kingunerisaanik suliani kinguartinneqarsinnaanngitsuni imaluunniit apeqquserneqarsinnaanngitsuni aalajangiisoqartillugu borgmesterip kommunalbestyrelsimik aalajangiinerup kingornagut ilisimatitsisarnissaanik aalajangersagaqalissasoq Naalakkersuisut siunnersuutigaat.

Borgmesteri pillugu kapitalimi aalajangersakkat sinneri siunnersuutigineqarpoq tulluarsaalluni naapertuussarneqassasut kommunini suliassaqarfiit aaqqissuuteqqinneqarnerat pillugu Inatsisartut inatsisaata akuersissutigineqarnerata kinguneranik, aammalu inatsisiliornermi paasinarnerusumik aammalu atuaruminarnerusumik anguniagaqarneq aallaavigalugu.

2.4 Ataatsimiititaliat ilaalu ilanngullugit

Naalakkersuisut siunnersuutigaat ataatsimiititaliani sulinermi aalajangersakkat tulluarsaalluni naapertuussarneqassasut kommunini suliassaqarfiit aaqqissuuteqqinneqarnerat pillugu Inatsisartut inatsisaata akuersissutigineqarnerata kinguneranik. Taamattaaq naqqiissuteqartoqarpoq inatsisit paasinarnerusumik aammalu atuaruminarnerusumik anguniagaqarneq aallaavigalugu.

2.5 Kommunip aningaasaqarnikkut ingerlatsinera

Naalakkersuisut siunnersuutigaat attartortarneq aamma attartoriaaseq leasing nalinginnaasumik attartortarnermut allatigullu pisussaaffiliisarnernut sanilliunneqartalissasut. Maanna kommuniusut attartorneq aamma attartoriaaseq leasing atorlugu ingerlatsisarnerit aningaasanut ingerlatsinerminnut atatillugu maannamiit annertunerusumik atortarnissaat kissaatigivaat. Taamaattumik Naalakkersuisut assigiimmik attartorneq aamma attartoriaaseq leasing atorlugu qaqugukkut akuersisoqartassanersoq maleruagassiorniarpaat, taamaalilluni kommunalbestyrelsit qinnuteqaataat ataasiakkaat aalajangiisuujunnaarsillugit attartorneq imaluunniit leasing atorneqassanersoq akuersissuteqarnermi.

Siunissami kommunit angissusiat isigimaarlugu taamalu aningaasaqarnikkut ingerlatsinerminni suli eqaannerusumik ingerlatsisinnaalernissaat tunngavigalugit, Naalakkersuisut siunnersuutigaat siunissami kommunit naatsorsuutaat kukkunersiuisunit naalagaaffimmiit akuerineqartunit taamaallaat kukkunersiorneqartalissasut. Kapitalip sinnerani naleqqussaaneq siusinnerusukkut taaneqareersutut periuseqarluni ingerlanneqassasoq siunnersuutigineqarpoq.

2.6 Nunaqarfinni siulersuisut

Naalakkersuisut siunnersuutigaat siunissami nunaqarfinni marlunni amerlanerusuniluunniit ataatsimoortumik nunaqarfimmi aqutsisoqalissasoq. Naalakkersuisulli arajutsisimanngilaat nunaqarfeqarmat innuttaqqortuujusunik imaluunniit avinngarussimasumik inissisimasunik, taamaattumillu taamatut ataatsimoorfeqarnissamut annertuumik ajornartorsiuteqarsinnaasunik. Taamaattumik Naalakkersuisut siunnersuutigaat nunaqarfinnut taama inissisimasunut immikkut akuersissuteqartoqarsinnaaneranik periarfissaqassasoq.

Naalakkersuisut aammattaaq kissaatigaat naqissusissallugu nunaqarfinni siulersuisut kommunalbestyrelsimiit piginnaatitaanikkut sulissasut, taamaattumillu siunnersuutigalugu iluarsaaqqinnermi ilanngunneqassasoq kommunalbestyrelsi nunaqarfinni siulersuisut ingerlatsinerini nakkutiginnittussaatitaassasut.

2.7 Nakkutilliineq

Siusinnerusukkut eqqaaneqareersutut Naalakkersuisut kissaatigaat kommunit ingerlatsinerinik nakkutilliineq ersarinnerulissasoq. Nalinginnaasumik nakkutilliinerup Kommunillu Nakkutilliisoqarfiani nakkutilliinermi aalajangersakkat immikkoortinneqarnissaanik Naalakkersuisut taamaattumik siunnersuuteqarput.

Nalinginnaasumik nakkutilliineq Nunap iluani pissutsinut allaffeqarfimmiit ingerlanneqassasoq siunnersuutigineqarpoq, tassaniimmat ulluinnarni kommuninut attaveqartarneq, aammalu tamatumuunakkut ulluinnarni ingerlatsinerup malinnaavigineqarnissaa periarfissaqarluni.

Taamaasillunilu kommunit aqunneqarnerinik nalinginnaasumik nakkutilliineq taamatut allannguuteqartitsinikkut naalakkersuisoqarfinnik nalinginnaasumik nakkutilliinermut naleqqersuunneqarsinnaalissaaq.

Naalakkersuisut siunnersuutigaat Kommunit Nakkutilliisoqarfiat kommuninik nakkutilliinermi aatsaat akuliunneqartassasoq inatsisitigut unioqqutitsisoqarneranik nalinginnaasumik nakkutilliinermi pineqaatissiisoqartariaqarneranik naliliisoqartillugu, inatsisinik unioqqutitsisoqarneranik tunngavewqartumik.

Nunaqarfinni siulersuisut kommunalbestyrelsiniit piginnaatitaaffeqarnikkut sulipput. Nunaqarfinni siulersuisut kommunalbestyrelsimiit piginnaatitaaffilerneqarnerup iluani sulineq kommunalbestyrelsip nakkutigisassarissavaa.

Nalinginnaasumik nakkutilliinerup aamma Kommunit Nakkutilliisoqarfiata nakkutilliinerata taamaallaat kommunalbestyrelsip ingerlatsineranik toqqaannartumik susassaqarfigissavaat.

2.8 Akissarsiat

Naalakkersuisut kissaatigisimavaat akissarsiaqarnermi tunngassuteqartut tamaasa kapitalimi immikkut katersorneqassasut, taamaaliornikkut aalajangersakkanik tamakkiinerusumik isiginnittoqarsinnaalersillugu.

Naalakkersuisut inatsisissatut siunnersuummi kommunini akissarsiaqartitsineq pillugit isumaqatigiinniarsinnaatitaaneq Kanukokamit aamma Naalakkersuisunit tigummiinnarneqassasoq siunnersuutigaat.

2.9 Pineqaatissiisarneq aamma taarsiissuteqartitsisarneq
Naalakkersuisut siunnersuutigaat pineqaatissiisarneq aamma taarsiissuteqartitsisarnerni aalajangersakkat atuuttut ingerlatiinnarneqassasut. Aalajangersakkat kapitalimi ataatsimi katersorneqarput inatsisit atuaruminarnerunissaat paasiuminarnerunissaallu anguniarlugu.

2.10 Atortuulersitsineq

1. januar 2009 kommunit kattussuunnerat ilutigalugu inatsisissatut siunnersuut atortuulersinneqassasoq siunnersuutaavoq.

3. Pisortanut aningaasaqarnikkut allaffissornikkullu kingunerisassai

Kommunit ikinnerulernerisa kingunerissavaa ingerlatsinerup perrannerulernera, taamalu suliat naammassineqartarnerini pitsaassuseq annertunerusoq anguneqarluni. Aammattaaq immikkoortut annertunerulernerini periarfissaqalissaaq immikkut ilisimasat pitsaanerusumik iluaqutigineqarsinnaalernerat, taamaalillunilu sulisut immikkut pisinnaasallit tigummiinnarneqarsinnaalerlutillu suliat sukkanerusumik ingerlanneqarsinnaalerneri, taamalu ingerlatsineq ersarinnerulerluni, taamaalillunilu innuttaasut inatsisitigut illersuugaanerat annertunerulersinneqarluni.

Kommunini ingerlatsiviit annerusut 2009-miit Namminersornerusuniit sulianik nussuineq piareersassavaat. Naalakkersuisut naatsorsuutigaat Namminersornerusuniit kommuninut ingerlatsinermi sulianik nussuinikkut innuttaasunut sulianik naammassinnittarneq qaninnerulissasoq aammalu marloqiusamik allaffissorneq pinngitsoorneqassasoq.
Siunnersuut kommunalbestyrelsimi kommunillu iluani namminermi suliaqarnerup annertunerulernissaanik kinguneqassanngitsoq naatsorsuutigineqarpoq, soorluttaaq inatsisissatut siunnersuutip kingunerisaanik annertunerusunik aningaasartuuteqarnissaq naatsorsuutigineqanngitsoq. Naartunermi, erninermi meeravissiartaarnermilu Inatsisartut inatsisaata kommunalbestyrelsinut nunaqarfinnilu siulersuisuinut atuuttussap sivitsorneqarnera pillugu aningaasatigut siunniutissaa naatsorsorneqarsimanngilaq.

4. Aningaasarsiornikkut allaffissornikkullu aaqqissuussinerit inuussutissarsiornermut il.il. kingunerisassai

Siunnersuut inuussutissarsiornermut il.il. aningaasaqarnikkut allaffissornikkullu kinguneqassanngilaq.

5. Avatangiisinut pinngortitamullu kingunerisassat

Siunnersuut avatangiisinut pinngortitamullu kinguneqassanngilaq.

6. Allaffissornerup innuttaasunut kingunerisassai

Kommunit qitiunerusumik inississapput aammalu nutaanik isumagisassaqalissallutik, tassa innuttaasut pisortanut pingaarnertut saaffigisartagalerilissammatsigit. Inatsisissatut siunnersuut aaqqissuussaanermut iluarsaaqqinnermut nangitsineruvoq, aammalu qitiusumik ingerlatsinerujunnaarnermut ersersitsinerusuussalluni, innuttaasullu inatsisitigut isumannaannerusumik inissisimalernerannik kinguneqassalluni.

Tamanna innuttaasunut ataasiakkaanut isumaqassaaq oqartussaasunut attuumassuteqartunut ajornannginnerusumik saaffiginnissinnaalerneq, aammalu sukkanerusumik eqaannerusumillu sulisunit immikkut pikkorissutsikkut piginnaasaqartunit sulianik ingerlatsinermik taamaalillunilu innuttaasunut ataasiakkaanut inatsisitigut isumannaannerusumik inissisimanermik kinguneqassalluni. Siunnersuutillu innuttaasut periarfississavai kommunini aalajangersaasarnernut sunniuteqarnerusinnaalersillugit, sumiiffinni siunnersuisoqatigiinni peqataanermikkut.

7. Kingunerisassat pingaarutillit allaasinnaasut

Siunnersuut allanik pingaarnerusunik kinguneqassanngilaq.

8. Naalagaaffeqatigiinnermut namminersornermullu attuumassuteqartut

Inatsisissatut siunnersuut kommunini suliassaqarfiit aaqqissuuteqqinneqarnerat pillugu inatsimmut (UKA 2007/30) aallartinneqartumut ilaavoq. Naalakkersuisut isumaqarput inatsisissatut siunnersuut Namminersornermut Ataatsimiititaliap innersuussutaasa kingorna suliniutinut aallartinneqarsimasunut ilaalluni aningaasaqarnikkut nammineerneruleriartornermut ilalersuissasoq. Naalakkersuisut aamma isumaqarput siunnersuutip Kalaallit Nunaata danskit aningaasatigut ataatsimoortumik tapiissutaannik pisariaqartitsinera annikinnerulersissagaa, pisortat ingerlatsinermut aningaasartuutaasa ikinnerulersinnerisigut.

Inatsisissatut siunnersuut ingerlatsinermi sipaaruteqartitsissaaq, aammalu qanimut oqartussaaqataanermut nukittorsaasuussalluni. Kommunimi ingerlatsineq innuttaasumut qaninnerulissaaq taamaaliortoqarneratigullu sukkanerusumik eqaannerusumillu sullissisinnaanermik periarfissiissalluni.

9. Pisortanik kattuffinnik il.il tusarniaaneq

Siunnersuut siullermik tusarniaassutigineqarluni nassiunneqarpoq 4. december 2007, KANUKOKA-mut kommunit sinnerlugit, Kommunit kukkunersiuisoqarfiannut kommunernes revision-imut (KR), Deloitte-mut, AK-mut, IMAK-imut, PIP-mut, Sundhedskartellet-imut, ASG-mut, SIK-mut GA-mut aamma Namminersornerullutik Oqartussat iluannut, tusarniaaffiup akineqarnissaa 15. januar 2008 killeqartillugu.

Tusarniaanermi akissuteqartut makkuupput: Kommunernes Revision, Ivittuut Kommuneat, Maniitsup Kommunea, Aningaasaqarnermut Pisortaqarfik, Avannaani Aaqqissuusseqqinnermi Allattoqarfik, Akileraartarnermi Pisortaqarfik, IMAK, GA, AK, PIP, SIK aamma KANUKOKA kommunit sinnerlugit.

PIP, Aningaasaqarnermut Pisortaqarfik aamma AK nassiussamut oqaaseqaateqanngillat.

Manna inatsisissatut siunnersuut tusarniaassutigineqarpoq 26. maj aallarnerfigalugu Inatsisissatut siunnersuut iluarsartuutaq (mannamut siunnersuutigineqarsimasup akerlianik imaqartoq kommunalbestyrelsinut sumiiffinni sinniisoqarnissamik pilersitsisinnaanermik periarfissiisoq) KANUKOKA-mut maanna kommuniusunut taamalu aammalu kommunerujussuassani ikaarsaariarnermi ataatsimiititalianut kiisalu KANUNUPE-mut tusarniaassutigineqarsimavoq 4. juli 2008 killigitillugu Tusarniaanermi akissutini ikaarsaariarnermut ataatsimiititalianiit ersippoq Kujataata kommunia siunnersuutaasunut oqaaseqaatissaqanngitsoq.

Kangia/Kitaani ikaarsaariarnermut ataatsimiititaliaq isumaqarpoq § 4-mi periarfissaqartitsisoqartariaqartoq kommunalbestyrelsimi inissitsiterfiusumik ataatsimiinneq kommunalbestyrelsi pisortatigoortumik atuutilinngikkaluartoq ingerlanneqarsinnaasunngorlugu. Inatsisitigut taamatut periarfissaqartitsineq kommunalbestyrelsinut qinersisarnermut inatsimmiinnani kommunit aqunneqarnerannut Inatsisartut inatsisaanniittariaqarluni.

§ 6-imi Borgmesterimik qinersisarnermi aalajangersagaq ersarinnerusumik allaaserineqartariaqartoq.

Ikaarsaariarnermi ataatsimiititaliap akuersaarsinnaanngilaa § 8 imm. 6 naapertorlugu Naalakkersuisut kommunalbestyrelsit iluminni ingerlatsinerannut akulerussinnaatitaanissaat.

Oqarasuarnikkut atortorissaarutit atorlugit najuussinnaannginnermi kommunalbestyrelsip ataatsimiinnerini peqataasinnaaneq § 11, imm. 1 naapertorlugu taamaallaat peqquteqavilluni najuussinnaannginnermi atorneqarsinnaavopq. Kisiannili tamatumani aalajangersakkat kommunalbestyrelsimit namminermit aalajangersarneqarsinnaasariaqarput, assersuutigalugu kommunalbestyrelsip suleriaasiani, tassanilu aalajangersarneqarluni assersuutigalugu qaqugukkut oqarasuaatit atorlugit ataatsimeeqataasoqarsinnaanersoq.

§ 23, imm. 4-mik allannguineq tusarniaanermi akissutaasunik tunngaveqarpasinngilaq. Borgmesterimik tunuartitsinissamik aalajangerneq kommunini naqisimaneqanngitsumik ingerlatsinermut inuttullu ima oqimaatsigivoq, tunuartitsineq eqqartuussivitsigut misilinneqarsinnaasariaqarluni. Suliami pissutsit Kommuninut nakkutilliisoqarfimmut saqqummiunneqartussaanerannik aalajangersagaq tassaavoq ataatsimiittartunut eqqartuussivittut oqartussaassuseqanngitsunut inatsisinillu atortitsinermik ilisimasaqartuunissamik piumasaqarfigineqanngitsunut suliassanngortitsineq, tamannalu Borgmesterimik tunuartitsinermi Borgmesterip iluarisarsiortoqannginnissaanut inatsisitigut illersugaanissaanut naammattumik isumannaarinerunngilaq.

§ 25, imm. 1, nr. 1-imi maanna aningaasaqarnermut ataatsimiititaliaq aningaasarsiornermut allaffissornermullu tunngasunik nakkutiginnittussaatitaalerpoq. Akuersaarneqarsinnaanngilaq aningaasaqarnermut ataatsimiititaliaq imatut nukittorsarneqassasoq, allaat kommunalbestyrelsiaqqatut ingerlalersinnaalluni, tamatumami kingunerissammagu aalajangigassat ataatsimiititaliami matoqqasumik ataatsimiittumi aalajangersarneqartarnerat, innuttaasut, tusagassiorfiit imaluunniit kommunalbestyrelsimi ikinnerussuteqartut najuuffiginngisaannik. Kiisalu § 26-i imm. 1-imi aveqqasut sisamat aveqqasut 5-iannik ilasariaqarpoq.

§ 33-imi kommunalbestyrelsimut ilaasortaanngitsunik kommunimi suliassaqarfinnut toqqaasoqarsinnaanera peerneqarsimavoq. Meeqqerivippassuit kommunerujussuanngortuni eqqarsaatigigaanni ajornarluinnassaaq kommunalbestyrelsimi ilaasortat siulersuisuni tamani issiatitaqarnissaat.

Kangia/Kitaani kommunip nunaqarfinni siulersuisunik ataatsimoorussanik pilersitsisinnaaneq tapersersorpaa.

Kangia/Kitaani ikaarsaariarnermut ataatsimiititaliami amerlanerussuteqartut sumiiffinni siunnersuisoqatigiinnik pilersitsisinaanermut periarfissaq tapersersunngilaat. Allanik periarfissaqarpoq, innuttaasut naqisimaneqanngitsumik ingerlatsinermut peqataatinneqarnissaannut.

Ikinnerussuteqartut inassuteqaatigaat sumiiffinni siunnersuisoqatigiinnik/nunaqarfinni siulersuisunik pilersitsisinnaanermut siunnersuusiortoqassasoq, pilersitsinernilu erseqqissaatigineqassasoq pisussaaffinnik pisinnaatitaaffinnillu tunniussisoqartassasoq, innuttaasut oqartussaaqataanerat sunniuteqarsinnaanerallu ajorseriartikkumanagu.

Qeqqani ikaarsaariarnermut ataatsimiititaliap iluarisimaarlugu maluginiarpaa sumiiffinni siunnersuisoqatigiinnik pilersitsinissamut periarfissaq eqqunneqartoq, sumiiffinni innuttaasut sapinngisamik ulluinnarni inuunerminnut sunniuteqarsinnaanerat aqqutissiuunneqarsinnaaqqullugu, taamaasillunilu oqartussaaqataaneq aqqutissiuunneqarluni.

Qeqqani ikaarsaariarnermut ataatsimiititaliaq isumaqarpoq naalakkersuinermik suliaqartut akissarsiassaat ikaarsaariarnermi ataatsimiititaliani kingornalu kommunalbestyrelsini sulinerannut naapertuuttuusariaqartut.

Avannaani ikaarsaariarnermut ataatsimiititaliamit nuannaarutigineqarpoq ataatsimoorussanik nunaqarfinni siulersuisunik kiisalu sumiiffinni siunnersuisoqatigiinnik illoqarfinni pilersitsinissamut periarfissaqartitsisoqarnera.

Ikaarsaariarnermut ataatsimiititaliap kissaatigaa arlaannut attuumassuteqarneq pissutigalugu suleqataasinnaanngittarnermut tunngasumik maleruagassat kommunit aqunneqarnerannut inatsimmi ersarissarneqartariaqartut, tassungalu atatillugu ikinnerussuteqartut aamma illersorneqartariaqartut.

KANUNUPE-p tusarniaanermi akissummini oqaatigaa nunaqarfinni siulersuisut oqartussaaffii annertusarneqartariaqartut. KANUNUPE-p maluginiarpaa siunnersuummi § 53, imm. 2,

tassani ersimmat kommunalebestyrelsi nunaqarfinni siulersuisunut aningaasanik atugassiisinnaasoq. Ilanngullugulu iluarisimaarneqarpoq inatsisissatut siunnersuummi § 50, imm. 2-mi Naalakkersuisut pisinnaatinneqarmata nunaqarfinni siulersuisut isorliunerusuniittut, nunaqarfinnilu anginerusuniittut maannakkutut ingerlaannarsinnaasut.

KANUNUPE-p iluarisimaarlugu oqaatigaa nunarfinni siulersuisuni ilaasortat kommunerujussuarnik pilersitsereernerup kingorna qinikkanut allanut naligiissinneqassammata.

Naalakkersuisut tusarniaanermi akissutit tiguneqareerneranni § 4 allannguuteqartinngilaat. Naalakkersuisut nalilerpaat qinersineq pillugu maalaarutit ilaasortallu qinigaasinnaassusiannut apeqqutit nalilersorneqarnerat naammassineqareersimasariaqartoq, kommunalbestyrelsinngortut inissititsinnginneranni, taamaaliornikkut eqqortumik inissititsertoqarnissaa anguniarlugu.

Naalakkersuisut § 6-imi annertunerusumik ersarissaasoqarnissaa pisariaqartinngilaat.

Naalakkersuisut § 8 imm. 6-imut maalaarutit paasillugit aalajangersagaq taanna uani siunnersuummi ilaatinneqanngilaq.

Naalakkersuisut § 11, imm. 3-mut atatillugu maalaarutaasut tusaatissatut tigullugit kommunalbestyrelsit suleriaatsiminni oqarasuarnermi atortorissaarutinik atuisinnaanermik periarfissanik aalajangersaasoqartarnissaa aqqutissiuuppaat.

Kommunini aalajaatsumik aqutsisoqarnissaa eqqanaarumallugu Naalakkersuisut pissusissamisoortinngilaat Borgmesterimik suliunnaarsitsinerit eqqartuussivinni misilinneqartarnissaat. Taamaattumillu eqqartuussivitsigut misilinneqartitsisinnaaneq § 23, imm. 4 naapertorlugu periarfissaanngilaq. Aalajangersagarlu atorneqarsimanngisaannarpoq.

Naalakkersuisut pissutissaqartinngilaat § 25, imm. 1-imi siunnersuut aningaasaqarnermut ataatsimiititalianut tunngasoq allanngortissallugu. Aalajangersakkami isumannaarneqarpoq Aningaasaqarnermut ataatsimiititaliat kommunimi ingerlatsinermut tunngasuni malinnaasinnaanerat, tamannami ataatsimiititaliap suliassaasa pingaarnersarimmassuk.

Naalakkersuisut ilanngullugu maluginiarpaat tusarniaanermi oqaaseqaatigineqartuni amerlanerussuteqartut sumiiffinni siunnersuisoqatigiinnik pilersitsisinnaaneq tapersersoraat.

Naalakkersuisut maanna inatsisartut ataatsimiinneranni (UKA 2008/61) inatsisissatut siunnersuummi kissaatigineqarsimasoq akuersaarsimavaat. Inatsisartut Aaqqissuussineq pillugu Ataatsimiititaliaa isumaqatigiillutik Naalakkersuisut kaammattorsimavaat sumiiffinni sinniisut pillugit aalajangersakkat inatsisissatut siunnersuummit peerneqassasut. Inatsisissatut siunnersuutip matumani pineqartup kommunalbestyrelsit sumiiffinni sinniisunik pilersitsisinnaanerat atorunnaarsippaa.

Inatsisartut Aaqqissuusseqqinneq pillugu Ataatsimiititaliaata kissaataat malillugit Naalakkersuisut allannguutissatut siunnersuutit ataasiakkaat ilanngussimavaat taakkunanngalu tulliuttuni taaneqartut ukuupput:

• Kommunalbestyrelsini aamma nunaqarfiit siulersuisuini ilaasortat naartunermi, erninermi meeravissiartaarnermilu kajumissaatisianik annaasaqaratik sulinngiffeqarnissamut pisinnaatitaalissapput

• Kommunit ukiumoortumik aningaasartuutissanut missingersuutaasa tamanut saqqummiunneqarnissaannut piffissaliussaq ullunut 14-inut sivitsorneqassaaq (siunnersuummi siullermi piffissaliussaq ullut arfineq marluupput)

• Kommunip aqqanik allannguisarnermut periaaseq pillugu aalajangersagaq peerneqarpoq, Kalaallit Nunaata nunap immikkoortortaanut kommuneqarfinnullu aggorneqarneranik Inatsisartut inatsisaanut sanilliullugu aalajangersakkamut naapertuutinnginnissaa pinngitsoortinniarlugu.

• Kommunalbestyrelsip nutaamik qinikkap inissitsiternissaa pillugu aalajangersagaq erseqqissarneqassaaq: Inissitsiterluni ataatsimiinneq ingerlanneqassaaq qinersinermi ataatsimiititaliami qinersineq pillugu malaarutaasimasinnaasunik aammalu ilaasortanngortut qinigaasinnaanerat pillugu naliliisoqareerneratigut.

• Innuttaasut qinikkatut pisortanillu toqqagaasarnerat pillugu aalajangersagaq peerneqarpoq, tamanna qinikkatut pisortanillu toqqakkatut suliaqarneq pillugu nalunaarummut atuuttumut sanilliullugu aalajangersakkat aporaannissaat pinngitsoortinniarlugu.

 

Aalajangersakkanut ataasiakkaanut oqaaseqaatit

§ 1-mut

Aalajangersagaq maanna § 2-mut atuuttumut imarisamigut naapertuuppoq.

Imm. 1-imut

Aalajangersakkap naqissuserpaa kommunalbestyrelsip kommunimi suliassaatinut akisussaasuunera.

Imm. 2-mut

Aqutsinermut malittarisassaq taamaallaat imaqassaaq kommunalbestyrelsimi ilaasortat amerlassusaannik, borgmesterip tulliisa qassiunissaannik, ataatsimiititaliat ataavartut amerlassusissaannik taakkualu oqartussaaffissaannik, nunaqarfinni siulersuisut qassiunissaannik taakkualu ilaasortaasa amerlassusaannik oqartussaaffigisassaasalu suunissaannik.

Aammattaaq anguniagaavoq matumani inatsimmi paragraf-it aqutsinermut malittarisassami uteqqinneqartassanngitsut, assersuutigalugu aningaasaqarnermi ataatsimiititaliap sunik oqartussaaffeqarneranik.

Imm. 3-mut

Kommunalbestyrelsip anguniassavaa, suleriaatsimi aalajangersakkat tamarmik Kommunalbestyrelsimut suleriaasissami katersorneqassasut, tamakkulu aalajangersakkat aqutsinnermut malittarisassamiissanngitsut.

Imm. 4-mut

Suleriaasissamut aammalu aqutsinnermut malittarisassat nassiunneqarnissaanut piumasaqaat tunulequtaqarpoq Naalakkersuisut kommunalbestyrelsip suleriaasiani aalajangersakkanik aamma inatsisit atuutsinneqarnerannik nakkutilliinermik ingerlataqarmata. Kommunalbestyrelsip suleriaatsimut malittarisassaq aamma aqutsinermut ileqqoreqqusaq Naalakkersuisunut nassiutinngippagit sulineq nalinginnaasumik malittarisassaq imaluunniit aqutsinermut nalinginnaasumik malittarisassat kommunalbestyrelsip sulinerani paatsuungasoqartillugu atorneqassapput. Periutsit taamaattut aamma atuutissapput kommunalbestyrelsip suleriaasissaq aamma aqutsinermik malittarisassat aalajangersarsimagaluarlugit taakkua Naalakkersuisunut nassiussimanngippagit.

Imm. 5-mut

Aalajangersakkap siunertaraa qulakkiissallugu kommunalbestyrelsimi aqutsinermut suleriaatsimullu malittarisassaqartuaannarnissaa.Aalajangersagarli kommunalbestyrelsip kommunimi namminerisamik aqutsinermut suleriaatsimullu malittarisassaqarnissaanut pisussaaffeqarneranik atorunnaarsitsinngilaq.

Kiisalu suleriaatsimut aqutsinermullu malittarisassat nalinginnaasut maleruagassat qanoq paasineqarnissaannik nalornisoornermi isummertarnermut atorneqartussaapput.

§ 2-mut

Aalajangersagaq maannamut atuuttumut § 4-mut naapertuuppoq.

Imm. 1-mut

Kommunip ilisarnaataanik oqartussat atuinerisa avataanni atuinissamik kommunalbestyrelsip akuersissummik tunniussitinnani qulakkeertariaqarpaa ilisarnaammik allanit atuineq imatut pissasoq, atorneqarnera kommunit oqartussaaffiinut ersarissumik attuumassuteqannginnera tamanit nalornisoqarsinnaajunnaarlugu.

Kommunalbestyrelsip siumoorlugu qulakkiissavaa suliffeqarfinnut namminersortunut kommunip ilisarnaataa kisimiitillugu ilisarnaatitut imaluunniit ilisarnaatitut pingaarnertut biilini imaluunniit allakkat pappiliartaani ilisarnaatitut kisimiitillugu atorneqannginnissaa.

Qinnuteqaat kommunalbestyrelsimut nassiunneqassaaq, akuersissullu tunniunneqarpat tamanna imaqassaaq ilisarnaat qanoq sivisutigisumik atorneqassanersoq.

Kommunalbestyrelsip akitsuummik akiliutissamik ataasiartamik aalajangersaasinnaavoq imaluunniit piffissamut aalajangersimasumut akilertagassatut, kommunip ilisarnaataata qanoq atorneqarnissanut akuersissuteqarneq qanoq ittuunersoq naapertorlugu.

Assersuutigalugu naqitiganngorlugu ilisarititsiniutitut imaluunniit takoqqusaarutitut kommunip ilisarnaataata atorneqarnissaa akuersissutigineqarpat, tamanna ataasiartuuppat, ataasiartumik akilerneqarnissaa aalajangerneqarsinnaavoq, piffissamili sivisuumi, soorlu puussiani ataasiarlugu atorneqartartuni ilisarnaatitut atorneqarpat piffissami aalajangersimasumi akilertagassatut aalajangerneqarsinnaalluni.

Kommunalbestyrelsip kommunip ilisarnaataata atorneqarnissaanut qinnuteqaatip suliarineqarneranut atatillugu aningaasartuutaasut qaangerlugit akiliutissamik annertussusiliisinnaanngilaq.

Akiliut kommunip isertittagaatut allatulli missingersuusiorneqassaaq, missingersuusiallu akuersissutigineqareersut avataatigut aalajangiivigineqassaguni ilassutitut akuersissutigineqartariaqarsinnaavoq.

Kommunip ilisarnaataanik atuinissamik akuersissummi ersarissumik takuneqarsinnaasariaqarpoq piumasaqaataasut suut malillugit ilisarnaammik atuinermut akiliut aalajangersarneqarsimanersoq, taamaasillunilu misissorneqarsinnaalluni akuersissutit naligiissuseq tunngavigalugu tunniussisoqarsimasut.

§ 3-mut

Aalajangersakkap maannamut § 5-imi aalajangersagaq taarserpaa.

Imm. 1-imut

Siunnersuutigineqarpoq siunissami Avannaata kommuniani aamma Tunup/Kitaata kommuniani kommunalbestyrelsit 21-t tikillugit qinerneqarsinnaasut aammalu Qeqqata kommuniani aamma Kujataata kommuniani 15-nit tikillugit qinerneqarsinnaallutik. Aalajangersagaq aaqqissuusseqqinnerup maanna ingerlanneqartup kingunerivaa.

Imm. 2-mut

Siunnersuutigineqarpoq kommunalbestyrelsimi ilaasortat amerlassusissaat assigiinngiijaartumik kommuninngortussat angissusissaat naapertorlugu amerlassuseqartinneqassasut.

Naalakkersuisut siunnersuutigaat qinersinissaq sioqqullugu ukioq naatinnagu kommunalbestyrelsinngortussat amerlassusissaat kommunalbestyrelsip aalajangertassagaa.

Ilaasortat amerlassusiat 2-mik agguarneqarsinnaassanngilaq aqutsinermilu malittarisassami allassimassalluni. Suliassaqarfiit aaqqissuuteqqinneqarnerata ingerlanneqartup siunertaasa ilagivaat allaffissornermi aningaasartuutaasuniit ilanngaasoqassasoq inuussutissarsiornerup ineriartortinneqarneranut nuunneqartussanik. Tamanna tunuliaqutaralugu kommunini suliassaqarfiit aaqqissuuteqqinneqarnerat pillugu Inatsisartut inatsisaanni kommunini sisamani kommunalbestyrelsit amerlassusaasa qaffasinnerpaaffissaannik ilanngussisoqarpoq. Naalakkersuisut isumaqarput qaffasinnerpaaffissaliinerup ingerlateqqinneqarnissaa pingaaruteqartoq, kisiannili kommuuni kommunalbestyrelsimi ilaasortat amerlassusaannik ikinnerusunik aalajangiussaqassappat akornutissaqartinnagu.

§ 4-mut

Aalajangersagaq maannamut atuuttumut § 6-mut naapertuuppoq.

Imm. 1-mut

Ersarissarneqarpoq kommunalbestyrelsip nutaamik qinigaasup inissitsiterluni ataatsimiinnissaa, aatsaat ingerlanneqarsinnaasoq Qinigaasinnaassuseq pillugu Ataatsimiititaliap kommunalbestyrelsimi ilaasortat qinigaasinnaanerisa misilinneqarneri naammassereerpagit.

Kommunalbestyrelsimi ilaasortat qinigaassut, kommunalbestyrelsi atuuttuusoq ingerlaannassaaq, qinigaasinnaassutsip misilinneqarnerisa naammasinissaata tungaanut. Kommunalbestyrelsip inissititerluni ataatsimiinnissaanut qaaqqusissut allakkatigut pissaaq, tamatumani fax-i imaluunniit e-mail atorneqarsinnaavoq.

Imm. 2-mut

Ataatsimiinneq inummit ataatsimiigiaqqusisumit aqunneqassaaq. Aalajangersakkami inissitsiterluni ataatsimiinnermut ilaasortaq qaaqqusisoq peqataasinnaanngippat periusissaq sillimaffigineqarpoq. Aalajangersakkami isumaqatigiinniarnerni eqqartorneqartuni taamaallaat inissititerneq ataatsimiinneq pineqarpoq, tassunga ilanngullugu borgmesterimik qinersineq.

§ 5-mut

Aalajangersagaq maanna atuuttumut § 21, imm. 2, nr. 2-mik nangitsineruvoq, § 19-milu borgmesterip allaffissornermut pisortatut atuuffianut tunngasuulluni matumanilu inatsisartut inatsisaanni kisiartaalluni kommunip allaffissornera pillugu aalajangersagaalluni.

Aalajangersakkap aalajangiuppaa, allaffissorneq kommunalbestyrelsi qullersaralugu aqutseriaatsimut ilaasoq. Allamik immikkut inatsimmi aalajangersaasoqarsimatinnagu kommunalbestyrelsi ingerlatsivinnut nammineerluni aalajangersagaliorsinnaavoq.

Aalajangersakkami tassani kissaatigineqarpoq erseqqissassallugu kommunalbestyrelsip aamma aningaasaqarnermut ataatsimiititaliap sulisunik atorfinitsitsisarnerni soraarsitsisarnernilu suliassaasa avissimanerat, taamaasillunilu kommunalbestyrelsip taamaallaat kommunaldirektøri atorfinitsittarlugulu soraarsissinnaagaa, aningaasaqarmermulli ataatsimiititaliap sulisorqarnermi pissutsit allat aqussallugit, tak. § 25, imm. 1, nr. 2.

§ 6-mut

Aalajangersakkap imm. 1-4-aa, maannamut atuuttumut § 8-mut naapertuuppoq.

Imm. 1-imut

Aalajangersakkap naqissuserpaa inissitsiterluni ataatsimiinnermi borgmesterimik qinersineq siulliulluni oqaluuserisassaniissasoq.

Siusinnerusukkut kiap borgmesterimik qinersineq aquttussaagaa aalajangersaavigineqarsimanngilaq. Tamanna maanna siunnersuummi ersarissumik § 4, imm. 2-mi allassimalerpoq, tassani ersimmat kommunalbestyrelsimi ilaasortaq inissitsiterluni ataatsimiinnissamut qaaqqusisuusoq tassaasoq borgmesterimik qinersinermi aqutsisuussussaq.

Imm. 2-mut

Aalajangersakkap naqissuserpaa, borgmesterimik qinersinermi amerlanerussuteqarnissaq piumasaqaataasoq. Siullermeerluni qinersinermi amerlanerussuteqartoqanngippat qinerseqqittoqassaaq. Qinersinermi tamatumani qinigassani amerlanerussuteqavittoqanngippat aamma nutaamik qinersisoqaqqissaaq amerlanerpaanik qinerneqarsimasut marluk akornanni. Qinersisoqaqqinnerani naligiittumik taasisoqarpat makitsisoqassaaq. Makitsisitsineq kommunalbestyrelsimut ilaasortamit inissitsiterluni ataatsimiinnermi aqutsisuusumit ingerlanneqassaaq.

Imm. 3-mut

Aalajangersakkami viceborgmesterimik qinersineq maleruagassiorneqarpoq, viceborgmesterimillu qinersineq borgmesterimik qinersinertut ingerlanneqassasoq aalajangersarneqarluni. Aammattaaq naqissuserneqarpoq borgmesterinngorlaap qinersineq aqussagaa. Borgmesteri peqanngippat qinersineq kommunalbestyrelsimi ilaasortap inissitsiternissamut qaaqqusisuusup aqussavaa.

Imm. 4-mut

Aalajangersakkami maleruagassiorneqarpoq aaqqissuussineq kommunalbestyrelsip aalajangernera naapertorlugu 1. viceborgmesterimik aamma 2. viceborgmesterimik qinersisoqarnissaanik imaqartoq. Taamaattoqartillugu § 34 naapertorlugu d’Hondt-ip naatsorsueriaasia atorlugu qinersineq ingerlanneqassaaq. Aalajangersakkap erseqqissarpaa viceborgmesterimik ataatsimik qinersisoqartillugu amerlanerussuteqarneq tunngavigalugu qinersineq ingerlanneqassasoq, kisiannili 2. viceborgmesterimik qinersinermi kisitsisit agguarnerat naapertorlugu qinerseriaaseq (forholdstalsvalg) atorlugu qinersineq ingerlanneqassasoq.

Imm. 5-imut

Aalajangersakkap erseqqissarpaa, borgmesterimik aamma viceborgmesterimik qinersineq kommunalbestyrelsip qinigaaffianut tamarmiusumut atuuttuusoq. Taamaalilluni aallaaviatigut imaappoq; kommunalbestyrelsip atuuffiata iluani kommunalbestyrelsip borgmesteri aamma viceborgmesteri tunuartissinnaanngikkaa imaluunniit peersissinnaanngikkaa. Akerlianik § 23 naapertorlugu borgmesteri suliassaminik naammassinnikkumanngippat kommunalbestyrelsip tunuartitsisinnaanera periarfissaqarpoq.

§ 7-mut

Aalajangersagaq maannamut atuuttumut § 9-mut naapertuuppoq.

Imm. 1-imut

Aalajangersakkap naqissuserpaa, kommunalbestyrelsimut qinersinermi qinigaasunut borgmesteritut aamma viceborgmesteritut qinigaanermik akuersissuteqartussaaneq pisussaaffiusoq. Tamatumani pissusissamisoortutut isigineqarpoq kommunalbestyrelsimut ilaasortassatut qinigaasut kommunalbestyrelsimut qinigassanngortinnermikkut aamma borgmesteritut imaluunniit viceborgmesteritut qinerneqarsinnaaneq akuersissutigisimammassuk. Qinigassanngortittoq kingornagut borgmesteritut imaluunniit viceborgmesteritut qinigaanissamik kissaateqanngippat qinigassanngortittariaqanngilaq.

Imm. 2-mut

Aalajangersakkap kommunalbestyrelsi periarfissippaa borgmesteri imaluunniit viceborgmesteri qinigaaffiup sinnerani atuuttussaajunnaartitsisinnaanermut, borgmesteri imaluunniit viceborgmesteri atorfimmit tunuarniuteqassappat. Tunuarniuteqarnerup akuersissutigineqarneri suliani ataasiakkani nalilersuinikkut pisassaaq.

Imm. 3-mut

Aalajangersakkap naqissuserpaa, borgmesterimik imaluunniit viceborgmesterimik nutaamik § 6 naapertorlugu qinersisoqassasoq, borgmesterip imaluunniit viceborgmesterip atorfik qimappagu. Aammattaaq erseqqissarneqarpoq, kommunini 2. viceborgmestereqartuni viceborgmesteritut inuttaaruttoq d’Hondt-ip naatsorsueriaasaa naapertorlugu eqimattat (suleqatigiit) viceborgmesteriusimasumik toqqaasimasut aamma nutaaq toqqassagaat.

§ 8-mut

Aalajangersagaq § 10-p maannamut atuuttup imarisaanut naapertuuppoq.

Imm. 1-imut

Ukiumut naatsorsuuseriffiusumut tamarmiusumut kommunalbestyrelsi ataatsimiinnissami missingersuummik aalajangersaasassaaq. Ataatsimiittarnissamut pilersaarut ukiup siuliata naanerani saqqummiuneqartassaaq. Saqqummiussineq kommunip nittartagaani imaluunniit piffimmi aviisimi saqqummiuneqarsinnaavoq.

Ataatsimiinnissanut pilersaarut aammattaaq Nalaakkersuisunut nassiunneqartassaaq, kommunit nakkutigineqarneranut atatillugu ilisimatitissutigineqassammat qaqugu kommunalbestyrelsip ataatsimiinneri ingerlanneqassasut, aamma Naalakkersuisut ataatsimiinnerni najuukkusuppata.

Imm. 2-mut

Aalajangersakkap qulakkeerpaa ataatsimiinnerit pilersaarusiornerinut atatillugu annerpaamik kommunalbestyrelsi nutaamik qinigaasup kiffaanngissuseqarnissaata qulakkeerneqarnissaa. Pissusissamisuussanngilarmi kommunalbestyrelsi qinigaarlaaq kommunalbestyrelsip atorunnaartup ataatsimiinnissami pilersaarutaanik tunngaveqarluni ingerlatissappat.

Imm. 3-mut

Kommunalbestyrelsip immikkut ittumik ataatsimiinnissanut qaaqqusisinnaatitaaneq borgmesterimiippoq. Taamaattoq borgmesteri pisussaatitaavoq kommunalbestyrelsimi immikkut ataatsimiigiaqqusinissamut kommunalbestyrelsimi ilaasortat 1/3-iisa tamanna piumasaqaatigippassuk.

Immikkut ittumik ataatsimiinnissamik nalunaarut kommunip innuttaannut aamma Naalakkersuisunut ataatsimiinnissaq sioqqullugu periarfissaqarpat nalunaarutigineqassaaq. Kommunalbestyrelsip ataatsimiinnissaanut qaaqqusinerit avammut ilisimatitsissutigineqarnerat aamma ullormut oqaluuserisassat avammut saqqummiunneqarnerat kommunip nittartagaanut ingerlanneqartassasut aalajangiussimappagu, kommunip nittartagaani immikkut ittumik ataatsimiinnissat aamma saqqummiunneqarneri ataatsimiinnissaq sioqqullugu ingerlanneqartassapput. Avammut saqqummiussineq piffimmi aviisini ingerlanneqarpat saqqummiussinissamut piumasaqaatit eqqarsaatigalugit eqaannerusumik ingerlatsisoqassaaq.

Imm. 4-mut

Siunnersuutigineqarpoq aalajangersagaq allanngortinneqassasoq ullormut oqaluuserisassat aamma ataatsimiinnermi atortussat nassiunnissaannut piffissamik aalajangersimasumik killeqartitsinermik ilanngussinikkut. Piffissaliineq ilanngunneqarpoq qulakkeerniarlugu ataatsimiinnissaq sioqqullugu kommunalbestyrelsimut ilaasortat suliassamut pitsaasumik paasisaqarsimanissaat. Aalajangersagaq aammattaaq sunniuteqassaaq kommunalbestyrelsip ataatsimiittarneri pillugit ammanerusumik ingerlatsinissamut, soorunami nipangiussisussaatitaaneq tamatumani ilanngullugu eqqarsaatigineqassalluni.

Imm. 5-imut

Aalajangersagaq kommunalbestyrelsip sulinermini avammut ammasuunissaanut nukittorsaataassaaq. Suliassat allattorsimaffiat saqqummiunneqartussaq ullormut oqaluuserisassanut missingersuut pinngitsoorani assigisariaqanngilaa. Imarisaanut allattorsimaffilli minnerpaamik suliassat sunik imaqarnerinik imaqassaaq. Allattorsimaffimmi suliassat ammasumik ataatsimiinnermi aamma matoqqasumik ataatsimiinnermi suliassatut aalajangersarneqarsimasut ilanngunneqassapput, soorunami nipangersimasussaatitaaneq eqqarsaatigereerlugu.

Ataatsimiinnermi aalajangersarneqartunut imaqarniliap saqqummiunneqarnerani nipangiussisimasussaatitaanermut inatsimmi pisussaatittaaffik kisimi killiliisuuvoq. Ataatsimiinnermi matoqqasumi aalajangiineq pippat, taanna nammineq kisimi pissutaatinneqarsinnaanngilaq aalajangiinerup imaqarniliamut avammut saqqummiunneqartumut ilanngunneqannginneranut.

§ 9-mut

Aalajangersagaq maannamut atuuttumut § 11-mut naapertuuppoq.

Imm. 1-imut

Suleriaassissami nalinginnaasumi matup matuneqarnissaanik malittarisassanik ikkussisoqarsinnaavoq. Matunik matusineq atorneqartariaqarpoq suliassani inunnut ataasiakkaanut aammalu suliffiit unammillersinnaanerannut tunngassuteqartunik suliaqartoqartillugu.

Kommunimi atorfillit kommunalbestyrelsip kiffartuunneqarnissaanik pisariaqartitsisoqartillugu soorunami ataatsimiinnermi matoqqasumi peqataasinnaapput.

Imm.2-mut

Aalajangersakkap kommunalbestyrelsi periarfissippaa inuit kommunalbestyrelsip avataaniittut kommunalbestyrelsip matoqqasumik ataatsimiinneranut aggersaasinnaanngorlugit. Tamatumani piumasaqaatigineqarpoq pineqartoq suliarineqartumi paasissutissiisinnaassasoq pineqartorlu kommunalbestyrelsip akisussaassuseqartumik pisariaqartumik suliassami aalajangiinissaanut ilisimasaqartuussasoq.

Naqissuserneqassaaq aalajangersakkami siunertaanngimmat aalajangersassallugu, inuit aalajangersakkami immikkoortoq 2 malillugu aggersarneqartut kommunalbestyrelsip piumasaqarneranik malinnittussaanerat, tamanna ataasiakkaani immikkut aammalu pineqartup kommunalbestyrelsimut pisussaatitaaffii pillugit aalajangerneqartariaqarmat inatsisit allat naapertorlugit. Aalajangersakkami imm. 2-a malillugu kommunalbestyrelsimi ilaasortaq attuumassuteqarnini pissutigalugu aalajangeeqataasinnaajunnaarsimasoq aggersarneqarsinnaassanngilaq.

Imm. 3.-mut

Aalajangersakkap naqissuserpaa kommunalbestyrelsimi ilaasortanut, atorfilinnut, allanullu matoqqasumik ataatsimiinnermi peqataasunut nipangiussimasusaatitaaneq atuummat pinerluttulerinermi Inatsimmi. Tamanna kommunalbestyrelsini matoqqasumi ataatsimiinnerni atuuppoq, taamattaaq ataatsimiititaliani ataavartuni aamma immikkut ataatsimiititaliani isumalioqatigiissitalianilu atuulluni.

Imm. 4.-mut

Aalajangersakkami Naalakkersuisunut innersuusisoqartillugu, Naalakkersuisut nammineerlutik pineqanngillat, kisiannili nakkutilliisoqarfimmit aallartitaannut ataatsimiinnerni matoqqasuni peqataasinnaatitaasut pineqarput. Ataatsimiinnerni matoqqasuni suliani peqataasinnaatitaaneq taamattaaq atuuppoq suliassaqarfinni inatsisini immikkut nakkutilliisoqartussaaneranik aalajangiisimasoqartillugu, soorlu inunnik isumaginninnermut tunngasuni.

§ 10-mut

Aalajangersagaq maannamut atuuttumut § 13-imut naapertuuppoq.

Pingaarnertut aalajangersagaavoq kommunalbestyrelsimi suliarineqartut ataasiaannartumik suliarineqartassasut, inatsimmi allamik aalajangersaasoqarsimatinnagu.

Aqutsinermik ileqqoreqqusap akuersissutigineqarnera, tak. § 1, imm. 2, aamma missingersuutip akuersissutigineqarnera, tak. § 41, kommunalbestyrelsimi marloriarluni suliarineqartassaaq.

§ 11-mut

Aalajangersagaq maannamut atuuttumut § 12, imm. 2 aamma 3-mut naapertuuppoq.

Imm. 1-mut

Kommunalbestyrelsi aalajangiisinnaassuseqarpoq ilaasortat affaat ataatsimiinnermi peqataappata. Piumasaqaataavoq ataatsimeeqataasuni aalajangertoqassatillugu amerlanerussuteqarnissaq. Taamattaaq naqissuserneqassaaq inatsisini aalajangersagaqarmat allanik aalajangersaanerni periutsinik allanik piumasaqaateqartunik.

Imm. 2-mut

Aalajangersakkami aalajangerneqarpoq aalajangersakkami § 15, imm. 1 naapertorlugu ilaasortaq ataatsimiinnermi ornigulluni peqataasinnaanngippat oqarasuaatikkut imaluunniit isiginnaarutitsigut aammalu telefaxikkut ataatsimiinnermi peqataanissamut ilaasortaq periarfissaqartinneqartoq. Telefaxikkut piumasaqaat ilanngunneqarpoq aalajangiinermi imaqarniliami atsiornissaq qulakkeerniarlugu, tak. § 16, imm. 1.

Imm. 3-mut

Aalajangersakkami aalajangiunneqarpoq kommunalbestyrelsip suleriaatsiminni maleruagassiorsinnaagaat ataatsimiinnerit oqarasuaatikkut ataatsimiinnertut, videokonference-tut kiisalu telefax-ikkut ingerlanneqarsinnaanerat. Aalajangersagaq aamma siunissamut qulakkeerinninniarneruvoq attaveqaatitsigut teknologi atorneqarsinnaasussaq iluaqutigineqarsinnaasoq, minnerpaamilli isumannaarneqartariaqartoq ilaasortat isummernerisa tiguneqarnissaat ataatsimeeqataasunillu tamanit paasineqarnissaat. Aammattaaq qulakkeerneqassaaq attaveqaatitsigut teknologip atorneqarnerani aalajangiinermi imaqarniliap atsiorneqarsinnaaneranut periarfissaqassasoq, tak. § 16, imm. 1.

§ 12-mut

Imm. 1-mut

Aalajangersagaq nutaajuvoq, aalajangersakkallu aamma ilagivaa, kommunimi ingerlatsinerup ammanerusumik aamma ersarinnerusumik ingerlatsinissap qulakkeerneqarnissaanik Naalakkersuisut kissaataat.

Kommunalbestyrelsimi ilaasortat kommunip allaffissornerani suliat inaarutaasumik ilusilinnik misissuisinnaanerat periarfissippai. Sulianut misissuisinnaanermut siunnersuut naapertorlugu taamaallaat tunniussisoqarsinnaavoq, kommunalbestyrelsimi ilaasortap ilaasortatut sulinerminnut atatillugu misissuinerani, aammalu suliassat naammassineqareersimasut pineqartillugit. Taamaalilluni missingersuutinik, notat-inik taamaaqataanillu kommunip allaffissorneraniit tunniussisoqarsinnaanngilaq, aammalu aningaasaqarnermut

ataatsimiititaliami ilaasortaanngitsunut aningaasaqarnermut ataatsimiititaliap suliaanut tunngasunik tunniussisoqarsinnaanani.

Imm. 2-mut

Aalajangersakkami siunnersuutaavoq suliamik paasisaqarnissamik kissaateqarnerit borgmesterimut saaffiginnissutigineqartassassut.

Imm. 3-mut

Aalajangersakkami siunnersuutigineqarpoq Borgmesterip sulianut paasissutissiisinnaanermi itigartitsissuteqarsinnaasoq, sulianik kinguarsaasoqassappat, imaluunniit taamaaliorneq ajornartorsiutinik pilersitsisinnaappat. Assersuutigineqarsinnaapput allakkatigut suliat ataatsimut inissisimanngippata imaluunniit allakkatigut suliat annertoorujussuuppata.

Itigartitsineq sunaluunniit soorunami toqqammavilersorluarsimassaaq.

Imm. 4-mut.

Siunnersuut naapertorlugu suliamut atugassat nuutinneri nassiunneqarsinnaapput. Naalakkersuisulli siunnersuutigaat suliat nuutinnerinik tunniussinissamut kommunalbestyrelsi aalajangersaasinnaanissaanik periarfissaqassasoq. Aalajangersakkap kommunalbestyrelsi periarfissippaa suliamut nuutitanik tunniussinissami najoqqutassanik nalinginnaasunik aalajangersaasinnaalersillugu taamaalillunilu suliani aalajangersimasuni nuutitsinerit amerlassusaannik nalinginnaasumik killiliisinnaalersillugu. Killiliineq taamaallaat nuutitat qassiusinnaanerinut attuumassuteqarpoq, taamaalillunilu nammineerluni ingerlatsivimmut ornigulluni suliamut attuumassutilinnik qimerluuisinnaanermut attuumassuteqarani.

§ 13-mut

Aalajangersagaq maannamut inatsisartut inatsisaannut atuuttumut § 12, imm. 1-imut naapertuuppoq.

Ilaasortap siunnersuutaa suliassaappat kommunalbestyrelsip oqartussaaffiginngisaanut tunngassuteqartoq imaluunniit siunnersuutip aalajangiivigineqarnissaa inatsisinik unioqqutitsilluni aalajangiinerusussaappat kommunalbestyrelsi pisussaassaaq siunnersuutip oqaluuserineqarnissaa itigartitsissutigissallugu, kisianni siunnersuut kommunip suleriaasissaa naapertorlugu piffissaq eqqorlugu saqqummiunneqarsimappat oqaluuserisassanut ilanngunneqarnissaa borgmesterip itigartissinnaanngilaa.

Oqaaseqatigiit aappaanni erseqqissarneqarpoq, kommunimi ataatsimiititaliat nammineerlutik oqartussaaffeqartinneqanngitsut, tamanna inatsisiliornermi erseqqissumik aalajangersarneqarsimatinnagu.

Aalajangiisinnaatitaanermik piginnaatitaaffik kommunalbestyrelsimiippoq, taamaalillunilu ataatsimiititaliani nammineerluni aalajangiisinnaaffeqassappat tamanna inatsisitigut toqqammaveqartariaqarpoq.

§ 14-imut

Aalajangersagaq maannamut inatsimmut atuuttumut § 15-imut naapertuuppoq.

Imm. 1-mut

Aalajangersagaq isigineqassaq pisortat ingerlatsinerat pillugu Inatsisartut inatsisaannut suliassani aalajangersimasuni soqutigisaqarneq pissutigalugu aalajangeeqataasinnaannginnermut pissutissaatitaasussanik aalajangersaaffiusumut atatillugu.

Siunnersuummi matumani ilaasortap aalajangeeqataasinnaannginneranik aalajangiinissami periusissat taamaallaat pineqarput. Ilaasortat ilaata soqutigisaqarnini pissutigalugu aalajangeeqataasinnaannginnissaa pillugu apeqqut nakkutilliisutut oqartussaasut misilitassaraat, inaarutaasumilli aalajangiinnissaq eqqartuussisuniippoq nakkutilliisutut oqartussaasunut killilersuutinut pituttorsimanngitsumi, tak. siunnersuutip § 67-a. Naalakkersuisut pisinnaatitaanngilllat kommunalbestyrelsip suliamik ingerlatsinera naapertuunnersoq pillugu naliliissallutik, imaluunniit tamanna eqqortumik ingerlatseriaaseqarneq tunngavigalugu ingerlanneqarnersoq nalilissallugu, soorluttaaq kommunit aalajangiineranik atorunnaarsitsisinnaanermut Naalakkersuisut periarfissaannik killiliiffigineqartut.

Soqutigisaqarneq pissutigalugu aalajangeeqataasinnaannginnermut maleruagassanik nalinginnaasunik siunnersuut imaqanngilaq. Soqutigisaqarneq pissutigalugu nalinginnaasumik aalajangeeqataannginnissamut tunngavissaqarnersoq pisuni ataasiakkaartuni pisortat maleruagassaataat nalinginnaasut naapertorlugit aalajangiisoqartassaaq.

Imm. 2-mut

Aalajangersakkap naqissuserpaa soqutigisaqarneq pissutigalugu aalajangiisinnaanngitsoqarneranik pasinartoqartillugu kommunalbestyrelsimut ilaasortap nammineerluni nalunaaruteqartussaatitaanera.

Imm. 3-mut

Aalajangersakkap siunertaraa qulakkeerneqassasoq kommunalbestyrelsimi naalakkersuinikkut oqartussaanerup nikisinneqannginnissaa ilaasortat ilaata soqutigisaqarnini pissutigalugu aalajangeeqataasinnaatitaanngitsutut oqaatigineqarneratigut.

Ilaasortat ilaat soqutigisaqarnini pissutigalugu aalajangeeqataasinnaatitaannginnerup saniatigut allamik peqquteqarluni najuutinngippat sinniisussap aggersarneqarnissaa pillugu apeqqut aalajangiiffigineqassaaq § 15 malillugu, ilaasortaq najuutinngitsoq soqutigisaqarnini pissutigalugu aalajangeeqataasinnaatitaanngitsutut oqaatigineqassagaluarpalluunniit.

Imm. 4-mut
Aalajangersakkami siunertaavoq qulakkeerneqassasoq, aalajangeeqataasinnaannginneq pissutigalugu sinniisussap aggersarneqarnissaa pillugu maleruagassat atornerlunneqannginnissaat, suliassami kommunalbestyrelsimi amerlanerussuteqarluartut aalajangiiviginiagaata aalajangiivigineqarnissaa pinngitsoortinniarlugu imaluunniit inatsisiliornerup imaluunniit isumaqatigiissutit inatsisitigut pisussaaffeqarfiusut pissutissaqartippassuk piffissap aalajangersimasup iluani aalajangiisoqarnissaa.

Taamaattorli suliassap suliarineqarnissaata kinguartinneqarnissaa pisortat imaluunniit namminersortut soqutigisaannut annertuumik ajoqutaassappat ilaasortaq soqutigisaqarnini pissutigalugu aalajangeeqataasinnaatitaanngitsoq suliassap oqaluuserineqarnerani peqataatinneqarsinnaavoq kommunalbestyrelsi aalajangiisinnaajunnaassanngippat, tak. ingerlatsinermut inatsisip § 4-ni imm. 2.

§ 15-mut

Aalajangersagaq maannamut atuuttumut § 16-imut naapertuuppoq.

Imm. 1-imut

Aalajangersakkami pineqarpoq ilaasortap ataatsimiinnermut ataatsimut najuutinnginnissamut pisinnaatitaanera aamma sinniisussap ataatsimiinnermut ataatsimiigiaqquneqarsinnaanera.

Suleqatigiit ilaasortamik qinigaasitsisimasut piumasaqaateqarsinnaapput sinniisussap ataatsimiinnissamut ataatsimut ataatsimiigiaqqusinissamut. Tamatumani apeqqutaanngilaq suleqatigiit pineqartut kingusinnerusukkut atorunnaarsinneqarsimanersut imaluunniit allanngortinneqarsimanersut, tassa qinigaaqatigiissimasut akornanni sinniisussap ataatsimiigiaqquneqarnissaanik piumasaqaateqarnissaq isumaqatigiinngissutaalissappat tamanna aalajangiivigineqartariaqarmat amerlanerussuteqartut aalajangiinerisigut.

Borgmesterip ataatsimiinnissamut nalinginnaasumik piareersaaneranut atatillugu ingerlaannartumik sinniisussamik aggersaasoqarneq ajorpoq. Tamatuma kinguneraa, kommunalbestyrelsimi ataatsimiinnissat piffissaalluartillugu suleqatigiit pilersaarusiortarnissaq sillimaffigisariaqaraat.

Naqissuserneqassaaq inissitsitissalluni ataatsimiinnissamut aamma kommunip missingersuusiaasa aappassaaneerlugit oqaluuserineqarnissaanut sinniisussamik aggersaatitsinissamik piumasaqaateqartoqarsinnaammat, naak peqataasinnaannginneq taaneqartunik peqquteqanngikkaluartoq, kisiannili assersuutigalugu kommunalbestyrelsimi ilaasortaq angallanneq pissutigalugu anngussinnaannginnera pissutigalugu.

Tamanna pissuteqarpoq ataatsimiinnerni taakkunani pingaarutilerujussuarnik aalajangiivigisaqartarneq, taamaattumillu ilaasortap ataatsip najuutinnginneranik pissuteqartumik sunnerneqartariaqanngitsumik.

Imm. 2-mut

Aalajangersagaq peqqusivoq pissutissaqavilluni sivikinnerpaamik qaammatini marlunnik sivisussuseqartumik peqataasinnaannginnermi sinniisussamik ingerlaannartumik ataatsimiigiaqqusinissamik. Aalajangersagaq atuutilersinneqarnikuuvoq sinniisussanik ataatsimiigiaqqusisarnermi periutsit eqaannerulersinniarlugit paasinarsigaangat pissutissaqavilluni kommunalbestyrelsimi ilaasortatut isumagisassat piffissami sivisungaatsiartumi sivikinnerpaamillu qaammatini marlunni, imaluunniit agguaqatigiisillugu kommunalbestyrelsip ileqquusumik ataatsimiinnerini marlunni, sivisussuseqartussaasumik peqataaffigineqarsinnaanngippata.

Maleruagassarli isigineqassanngilaq kommunalbestyrelsimi ilaasortat sulinngiffeqarallernermut assingusumik najuutinnginnissaminnut nalunaaruteqarnissaannut nalinginnaasumik tunngavissatut, tamannami kommunalbestyrelsimi ilaasortatut inuiaqatigiinni sullissisuuneranut akerliummat. Piffissami pissutissaqavilluni ataannartumillu najuussinnaanngikkallarneq peqqutaasariaqarpoq. Assersuutigalugu piffissap ingerlanerani ilaasortaq ataatsimiititaliat ataatsimiinneranni najuuttarsinnaaguni kommunalbestyrelsip ataatsimiinnerini ataatsimeeqataanngitsoortarnissaanut pissutissaqanngilaq.

Akornutigisap pigallartuunera aalajangiisuunngilaq, tassami piffissap qinigaaffiup sinnerani ataatsimeeqataanngitsoortarnissap assigiinnassammagu ilaasortap kommunalbestyrelsimiit tunuarnissaata akuerineqarnissaa, tassalu:

1. sinniisussap kommunalbestyrelsimi ilaasortanngortinneqarnissaa
2. ilaasortap najuutinngitsup qinigaaqatigisimasaasa ataatsimiititaliani inissat inuttaqanngitsut inuttalissagaat.

Ilaasortaq kommunimi najukkaminiit nuukkallarpat kommuninut qinersisarnerni inatsimmi kommunalbestyrelsimiit tunuarnissaq pillugu maleruagassat malinneqartussaapput.

Imm. 3-mut

Kommunalbestyrelsimi suleqatigiit piumasaqarnerisigut imm. 1 naapertorlugu, imaluunniit borgmesterip imm. 2 naapertorlugu sulissuteqarneratigut sinniisussamik ataatsimiigiaqqunesineqaraluarpalluunniit kommunalbestyrelsi pisussaavoq aalajangiivigissallugu sinniisussap ataatsimiigiaqquneqarnissaanut piumasaqaataasut naammassineqarsimanersut isummerfigissallugu. Pingaartumik pineqarput ilaasortap kingoraarneqartup najuutinngikkallarnissaanut pissutaasut tunngavissaqarnersut imaluunniit sinniisussaq aggersarneqarsimanngippat tamanna pisariaqarnersoq.

Kommunalbestyrelsip aalajangiinera nakkutilliisutut oqartussaasunit misilinneqarsinnaatitaavoq, pisariaqartinneqarsimappallu eqqartuussivinnut ingerlateqqinneqarsinnaalluni.

Imm. 4-mut

Aalajangersakkap naqissuserpaa, sinniisussaq kommunalbestyrelsimi ilaasortap piffissami atorfissarisaminit pisinnaannginnerani taamaallaat atuuffeqassasoq.

Imm. 5-mut

Borgmesteritut qinigaasup piffissami sivisunerusumi peqannginnissaani kiap borgmesteritut atuunnissaa pillugu apeqqummi kommunalbestyrelsip pituttorsimanani aalajangiisinnaanissaa siunnerfigalugu aalajangersagaq ilanngunneqarpoq. Borgmesterip isumagisassaanik borgmesterip tulliata tigusisinnaanera, tak. § 22, taamaallaat pineqarpoq borgmesterip pisinnaanngikkallarnera qaammatinik sisamanik taakkuluunniit inorlugit sivisussuseqartussaasutut nalilerneqarpat.

Borgmesterimik nutaamik matumani aalajangersagaq malillugu qinersisoqarsimanngippat, borgmesterimik qinersisoqassanngilaq borgmesterip najuutinngikkallarnera qaammatinik sisamanik sivisunerusumik sivisussuseqaraluarpalluunniit. Taamaattumik borgmesterimik nutaamik aatsaat qinersisoqassaaq kommunalbestyrelsip siumoortumik nalilerpagu borgmesteri piffissamit tassannga sivisunerusumik peqassanngitsoq.

Malittarisassaq manna malillugu borgmesterimik nutaamik qinersisoqarsimappat taanna borgmesterip najuutinngikkallarfissaanut tamarmiusumut qinigaassaaq, taamaattumillu tunuartinneqarsinnaassanani, § 23-mi piumasaqaataasut naammassineqarsimanngippata.

§ 16-imut

Aalajangersagaq maannamut atuuttumut § 14-imut imarisamigut naapertuuppoq.

Imm. 1-imut

Aalajangersakkami naqissuserneqarpoq kommunalbestyrelsip ataatsimiinnerani aalajangiinermik imaqarniliamik suliarinnittoqartassasoq. Aalajangiinermi imaqarniliaq ataatsimiinnermi peqataasunit atsiorneqassaaq ataatsimiinnerup kinguninnguatigut.

Aalajangersakkattaaq naqissuserpaa, allaanerusumik isummertut isummernertik imaqarniliamut ilaatinneqassasoq piumasarisinnaagaat.

Imm. 2-mut

Imaqarniliap ataatsimiinnerup kinguninnguatigut atsiorneqarnissaa borgmesterip akisussaaffigivaa. Taamatut pisussaatitsineq pingaartumik pisariaqarpoq kommunalbestyrelsimi ilaasortat ataatsimiinnermi nammineerlutik najuutinngippata, kisiannili tele-kkut attaveqaatit iluaquatigalugit peqatasimatillugit.

Aalajangiinermi imaqarniliap kommunalbestyrelsimut ataatsimiinnermut peqataanngitsumut fax-iutigineqarsinnaavoq. Tamatuma kingorna kommunalbestyrelsimi ilaasortap aalajangiinermi imaqarniliaq atsiussavaa taannalu borgmesterimut utertillugu faxerutigalugu.

Imm. 3-mut

Aalajangersakkap naqissuserpaa, imaqarniliaq atsiorsimasoq kingusinnerpaamik qaammat ataaseq qaangiutsinnagu atsiorneqarnerata kingorna nakkutilliisutut oqartussanut nassiunneqassasoq.

§ 17-imut

Aalajangersagaq maannamut atuuttumut § 32-mut naapertuuppoq.

Kommunalbestyrelsip ataatsimiinnerinut piareersaassalluni aggersaassallunilu borgmesterip akisussaaffigivaa. Ataatsimiinnissamut piareersaaneq tassaavoq ullormut oqaluuserisassanik suliaqarneq aammalu kommunalbestyrelsimut ataatsimiinnermi suliassanik ataasiakkaanik paasissutissanik suliarinninneq. Taamattaaq borgmesterip pisussaaffigivaa isumaqatigiinniarnerni aamma taasinerit aqussallugit kiisalu aalajangiinerit imaqarniliamut ilanngunnissaat isumagissallugu.

§ 18-imut

Imm. 1-imut

Aalajangersagaq inatsimmut maannamut atuuttumut § 33, imm. 1-mut naapertuuppoq, aalajangersarlugulu borgmesteri suliani apeqquserneqarsinnaanngitsuni aalajangiisinnaasoq aammalu suliani kommunalbestyrelsip ataatsimiinnissaanut utaqqinneqarsinnaanngitsunik aalajangiisinnaasoq. Piumasaqaataasoq taamaallaat naammassineqarsimassaaq, borgmesterip suliaq apeqquserneqarsinnaanngitsutut isigippagu aammalu ilaasortat allat tamarmik suliap apeqquserneqarsinnaanngitsutut isigineqassasoq nalilerpassuk. Naammassisassami aalajangersimasumi kommunalbestyrelsimi amerlanerussuteqartoqarnissaa qularnanngitsutut isigineqarpat borgmesterip nammineerluni suliaq aalajangiiffigisinnaavaa amerlanerussuteqarneq qularutigineqanngippat.

Assersuutigalugu suliaq kinguartinneqarsinnaanngitsutut taaneqarsinnaavoq illoqarfimmi ikuallannersuarmik nalaataqarnissaamik ernumanartoqarpat, taamaalillunilu erngertumik ikiorserneqarnissamik pisariaqartitsisoqarpat.

Suliani apeqquserneqarsinnaanngitsuni assersuutigineqarsinnaavoq kommunalbestyrelsi assigisaani qanittukkut aalajangiisimappat.

Imm. 2-mut

Aalajangersagaq nutaajuvoq ilanngunneqarnissaalu Naalakkersuisut kissaatigaat pisortat ingerlatsiviini ammanerusmik ingerlatsisoqarnissaanik kissaateqarneq tunulequtaralugu. Siusinnerusukkut borgmesteri imm. 1-imi aalajangersarneqarsimasunik toqqammaveqarluni aalajangiinernik kommunalbestyrelsimut nalunaaruteqartussaatitaasimanngilaq.

§ 19-imut

Imm. 1-imut

Aalajangersagaq maannamut atuuttumut § 33, imm. 2-mut naapertuuppoq.

Kommunip allaffissornikkut ulluinnarni aqutsinera borgmesterimit ingerlanneqarpoq. Imaappoq borgmesterip akisussaaffigivaa kommunip suliassai naleqqunnerpaamik naammassineqartassasut. Suliassat naammasineqarnissaat ingerlatsivinnut agguaataarneqarnissaat soorunami borgmesterip akisussaaffigivaa, kisiannili borgmesterip suliassat naammassineqarnissaat pingaarnertut akisussaaffigivaa.

Kommunimut suliassanik nutaanik takkuttoqarpat ataatsimiititaliamut attuumassuteqartumut aqutsinermut ileqqoreqqusaq naapertorlugu suliassaqarfiusumut qaninnerpaamut inissinneqassapput. Aqutsinermi ileqqoreqqusami suliassap inissinneqarnissaa nalornissutigineqartillugu kommunalbestyrelsi tamatumunnga aalajangiisariaqarpoq pisariaqarpallu aqutsinermi ileqqoreqqusami allanngortitsisariaqassaaq. Ataatsimiititaliat avataanni suliassat nalinginnaasumik borgmesterip suliassaatut isigineqarsimasut tassaasimapput sulianik piareersaanerit aamma suliassat kommunalbestyrelsip iluanni pissutsinut tunngasut, kisianni tamakku suliassat borgmesterip suliassaatut aamma inissinneqarsinnaalluarput, borgmesterip kommunalbestyrelsimut siulittaasutut inissisimanera innersuussutigalugu, tak. § 17.

Imm. 2-mut

Aalajangersagaq inatsimmut maannamut atuuttumut § 33, imm. 3-mut naapertuuppoq, aalajangersarlugulu borgmesterip akisussaaffigigaa aningaasaliissuseqartoqartinnagu aningaasartuuteqartoqassanngitsoq imaluunniit isertitaqartoqarsimassanngitsoq. Aningaasaliissut tassaavoq ukiumut missingersuummi aningaasartuutissatut aalajangiunneqarsimasoq.

§ 20-mut

Aalajangersagaq maannamut atuuttumik § 34-mik nangitsineruvoq

Imm. 1-imut

Aalajangersakkap naqissuserpaa borgmesteri kommunip allaffissornikkut qullersatut akisussaasutut ataatsimiititaliani tamani ataatsimiinnerni peqataasinnaatitaasoq. Aalajangersakkap taamatuttaaq naqissuserpaa, ataatsimiititaliani ataatsimiinnermut ullormi oqaluuserisassanik aammattaaq imaqarnilianik borgmesteri nassinneqartassasoq. Aalajangersagaq aammattaaq ima isigineqassaaq kommunimi aalajangiinerni nalinginnaasumik annertunerusumik paasisitsisoqartarnissaanik kissaateqarnermik.

Borgmesterip ataatsimiititaliani ataavartuni ataatsimiinnermi peqataasarnissaata avataatigut aammattaaq ataatsimiititaliaagallartuni aammalu siunnersuisoqatigiinni ataatsimiititaliani peqataasarnissaanut ilaavoq.

Imm. 2-mut

Aalajangersakkap naqissuserpaa, borgmesteri kommunip allaffissorneranut qullersatut inissisimanermigut ataqatigiissaarinermik atuuffeqartoq. Aalajangersagaq siunnersuutigineqartumut § 29, imm. 2-mut ataatsimiititaliat suliani attuumassuteqartuni ataatsimiititaliat allat aalajangersinnaassuseqarfiini attuumassuteqartunut isumasioqatigiittussaatitaanerannut ilaasutut isigineqassaaq.

Imm. 3-mut

Aalajangersagaq kommunip ingerlanneqarneranut atatillugu borgmesterip ataqatigiissaarisinnaaneranik nukittorsaanermut atavoq. Borgmesteri akuliussinnaavoq suliani ataatsimiititaliani suliarineqartuni sulianilu allaffissornikkut suliarineqartuni. Pineqartumi kingullermi kommunalbestyrelsimut saqqummiussineq pisassaaq ataatsimiititaliaq attuumassuteqartoq aqqutigalugu, pisariaqarpallu suliaq kommunimut aningaasatigut kinguneqartussaatillugu aningaasaqarnermut ataatsimiititaliaq aqqutigalugu.

Akuliussinnaanermut pisinnaatitaaffiup atorneqarnera annertunerusumik tunngavilersortariaqanngilaq, taamaallaalli borgmesteri isummersimassaaq kommunalbestyrelsi suliamut isummertussaanera pissusissamisuussasoq. Akuliussinnaanermut pisinnaatitaaffik assersuutigalugu atorneqarsinnaavoq suliaq tunngaviatigut isummernissamik ima imaqartigippat borgmesteri isumaqarpat suliarineqartoq kommunalbestyrelsimit isummerfigitittariaqarsoralugu imaluunniit aamma ataatsimiititaliap aalajangernera borgmesterip isumaqatiginngippagu.

Ataatsimiititaliap aalajangiuppagu suliaq borgmesterip akuliuffigisimasaa ingerlateqqinniarnagu, taava kommunalbestyrelsimut saqqummiussisussaatitaaneq ataatsimiititaliap pisussaaffigisaa atorunnaassaaq. Tamatumani soorunami akornusissanngilaa kommunalbestyrelsimi ilaasortat suliamik kommunalbestyrelsimut saqqummiusisinnaanerat, tak. § 13.

§ 21-imut

Aalajangersagaq maannamut inatsisimmi atuuttumut § 35-mut naatsorsuuppoq, pineqaranilu kommunip taaneqartuni iliuusaata inatsisitigut atorsinnaatitaaffiinut tunngasunut, kisiannili qanoq iliornissamut aalajangersagaalluni, kommunip suut qanorlu toqqammavigalugit tigusisinnaatitaanera akiliisinnaatitaaneranut aalajangersagaalluni, tamakkunatigut qanoq ingerlanneqartarneri apeqqutigineqartarsimammat, minnerunngitsumik aningaaserivinninngaaniit aammalu allagartat kommunit illuuttaannut tunngasuni nalunaarsortarnerannut atasuni.

Inuk alla allagartanik inatsimmi aalajangersakkami taaneqartunik atsiortussaq pisariaqanngilaq kommunalbestyrelsimut ilaasortaasariaqartoq kommunimiluunniit atorfeqartariaqartoq, taannali pineqartoq taamaallaat isumaqatigiissuteqarsinnaasusssassaaq nammineersinnaanermut iliuuseqarsinnaanermullu piumasarisat nalinginnaasut naammassisimagunigit.

Inuit atsiortut kinaassusiannut uppernarsaatit uppernarsaatitut takuneqarsinnaassapput kommunalbestyrelsip aalajangiinermi imaqarniliaani.

§ 22-imut

Aalajangersagaq maannamut atuuttumut § 36-mut naapertuuppoq.

Imm. 1-imut

Aalajangersagaq borgmesterip tulliata sulineranut atatillugu maleruagassanut erseqqissaataavoq. Aalajangersakkami aalajangiiffigineqanngilaq qanoq pisoqartillugu borgmesteri tunuarallartassasoq, tamatumani pisut ataasiakkaat aalajangersimasut naliliiffigineri aallaaviusassammat. Borgmesterip aalajangertassavaa pineqartup suliassani qanoq ilinikkut suliarisinnaanngikkai.

Kommunalbestyrelsip ataatsimiinnerini borgmesterip borgmesterip tullia kissaatigisinnaavaa ataatsimiinneq aqoqullugu borgmesterip oqarasuaatikkut imaluunniit videokkut isiginnaarutikkut ataatsimiinneq aqukkusunngippagu, tak. § 11, imm. 2.

Imm. 2-mut

Aalajangersakkami erseqqissarniarneqarpoq borgmesterip qaammatisiummi ulluusuni (kalenderdage) minnerpaamik 21-ni borgmesteritut suliassani ingerlassinnaanngippagit kommunalbestyrelsip borgmesterip tullia pisussaaffilersinnaavaa borgmesterip suliaanik tamanik tigusinissaanik, allaffeqarfimmi aqutsineq taamalu aningaasaqarnermut ataatsimiititaliamut siulittaasuuneq ilanngullugit, taamalu pisoqartassalluni borgmesterip nammineq borgmesterip tullia qinnuvigisimanngippagu suliani tigoqqullugit.

§ 23-imut

Aalajangersagaq maannamut atuuttumut § 63, imm. 1-4-mut naapertuuppoq.

Imm. 1-imut

Aalajangersagaq siusinnerusukkut nakkutilliineq pillugu kapitalimi inissisimagaluarpoq. Naalakkersuisulli isumaqarput aalajangersagaq borgmesteri pillugu kapitalimi inissinneqarpat naleqqunnerusoq.

Aalajangersakkami pineqarpoq suliassamik ataatsimik imaluunniit suliassat ikitsunnguusunik killeqartunillu borgmesteri suliarinninngikkussanngippat. Taama pisoqarsinnaanera akuerineqarsinnaanngilaq, borgmesteri aalajangersimasumik akissarsiaqartinneqarpat, tunuartinneqarsinnaananili. Aalajangersakkami borgmesterimut suliassaminik naammassinnikkusunngitsumut kommunalbestyrelsi immikkut akuliussinnaaneranut periarfissiivoq.

Imm. 2-mut

Borgmesterimik tunuartitsigallarneq immaqalu kingusinnerusukkut soraarsitsineq aatsaat pisinnaavoq borgmesteri annertuumik imaluunniit arlaleriarluni suliassaminik naammassinnikkusunngippat. Annertuumik imaluunniit arlaleriarluni suliassanik naammassinninngikkusunnginneq ima paasineqassaaq, piumasaqaatit taakkua marluullutik ataatsikkut naammassineqarsimasut tunuartitsigallarneq kingusinnerusukkullu soraarsitsinermik kinguneqartoqassappat. Soorunami pisuni ataasiakkaani nalilersuisoqassaaq, naammassinninngikkusunneq qanoq annertutigissanersoq, tunuartitsigallarnermik kinguneqartariaqarluni. Taamattaaq naammassinninngikkusunneq annikinnerusoq kisiannili arlaleriarlugu naammassineqarusunngippat taamatut pisuni ataasiakkaani nalilersuereernikkut tunuartitsigallarnermik aammalu soraarsitsinermik kinguneqarsinnaanera naammassaaq.

Imm. 3-mut

Aalajangersakkami aalajangerneqarpoq tunuartitsigallarnermik aalajangernermi Naalakkersuisut tunuartitsigallarnermik aalajangerneq misilissagaat taamalu misissussallugu eqqortumik aalajangersimaneq tunngaveqarnersoq.

Imm. 4-mut

Soraarsitsinermik aalajangiineq eqqartuussisunut ingerlateqqinneqarsinnaanngilaq. Tamatumani kommunimi patajaatsumik aqutsisoqarnissaa qulakkeerniarlugu pivoq. Akissarsiaqarnernik apeqqutit § 66, imm. 2-mi aalajangersarsimapput.

§ 24-imut

Imm. 1-imut

Aningaasaqarnermut ataatsimiititaliaq eqqarsaatigalugu aalajangersagaq maannamut atuuttumut § 18, 1-mut naatsorsuuppoq aalajangersarlugulu kommunalbestyrelsi aningaasaqarnermi ataatsimiititaliamik pilersitsissasoq.

Imm. 2-mut

Aalajangersakkap maannamut atuuttup § 21, imm. 1 nangippaa, aalajangersarlugulu borgmesteri aningaasaqarnermi ataatsimiititaliamut siulittaasuussasoq.

Imm. 3-mut

Aalajangersakkap maannamut atuuttumut § 18, imm. 2-mut ilaannakortumik nangitsineruvoq, siunertaralugulu ersarissassallugu, aningaasaqarnermi ataatsimiititaliami 2-mik agguarneqarsinnaanngitsumik ilaasortaqassasoq. Aammattaaq aningaasaqarnermi ataatsimiititaliap ilaasortaasa amerlassusaat kommunalbestyrelsimi ilaasortat amerlassusaata affaat qaangissanngilaat. Taamattaaq kommunalbestyrelsi aningaasaqarnermi ataatsimiititaliap ilaasortaannut sinniissussanik qinersissapput.

Imm. 4-mut

Aalajangersagaq maannamut atuuttumut § 18, imm. 4-mut allannguuteqarluni naapertuuppoq, tamatumanilu pineqarpoq aningaasaqarnermi ataatsimiititaliamut inunnik toqqaanissamik piginnaatitsissummik inerteqquteqarneq, kommunalbestyrelsi imaluunniit aqutsinissamik ileqqoreqqusap avataani aalajangersakkat naapertorlugit sinniisoqartussaaneranut tunngatillugu. Akerlianik § 31, imm. 3-mi taaneqartut immikkut ataatsimiititaliat, aningaasaqarnermi ataatsimiititaliamut qinikkat kommunalbestyrelsimi ilaasortaasussaapput, tamanna peqquteqarpoq ataatsimiititaliaq inatsit naapertorlugu kommunalbestyrelsi sinnerlugu aalajangernissamik piginnaatitaammat, akerlianillu immikkut ataatsimiititaliat taamaallaat killilimmik piginnaatitaaffeqarmata sulianut aalajangersimasunut atatillugu imaluunniit kommunalbestyrelsimut, aningaasaqarnermi ataatsimiititaliamut imaluunniit ataatsimiititalianut ataavartunut piareersaanernik suliaqartarmata imaluunniit siunnersuinermik ingerlatsisarmata.

Aalajangersakkap naggataata ersarissarpaa, ataatsimiititalianut inunnik qinersinerni kommunalbestyrelsi toqqaasinnaanngitsoq qinigaanerit kommunalbestyrelsip atuuffianit sivikinnerusumik atuuffeqartussanik

§ 25-imut

Imm. 1-imut

Aalajangersagaq maannamut atuuttumut § 21, imm. 2-mut naapertuuppoq.

Inatsisartut inatsisaat naapertorlugu aningaasaqarnermi ataatsimiititaliaq taamaallaat inatsisitigut pilersinneqarnissaa piumasaqaataammat, aningaasaqarnermi ataatsimiititaliap suliassai inatsisartut inatsisaanni toqqaannartumik allassimanissaat eqqortuunerussasoq nalilerneqarpoq, aqutsinermik ileqqoreqqusanilu allassimassanatik.

Aalajangersakkap qulakkeerpaa aningaasaqarnermi ataatsimiititaliaq ataqatigiissaarinissaq eqqarsaatigalugu piginnaassutsinik sakkortuunik piginnaatitaassasoq, taamaalilluni immikkoortualukkaartumik aqutsisoqalinnginnissamik ineriartortoqalernissaa pinngitsoorumallugu. Pingaaruteqarpoq aningaasaqarnermi ataatsimiititaliami aamma kommunalbestyrelsimi kommunip suliassaani amerlasuuni tamakkerlugu isiginninnermik qulakkeerisoqassasoq taamaalilluni suliassat pimoorussamik tulleriiarsinnaanerinik periarfissaqarsinnaaqqullugu.

Nr. 1 pillugu:

Aalajangersakkap naqissuserpaa aningaasaqarnermi ataatsimiititaliaq ataqatigiissaarisutut ingerlatsiviusoq aammalu naqissuserlugu aningaasaqarnermi ataatsimiititaliap oqaaseqaatai aningaasaqarnermi suliani tamani aamma allaffissornermi suliani piniarneqartassasut tamakkua kommunalbestyrelsip aalajangiunneqarnissaanut saqqummiunneqartinnagit.

Nr. 2 pillugu:

Aalajangersagaq ilaatigut kommunit ingerlatsinerannik atuuttumik naqissuseqqiineruvoq, ilaatigullu kommunip aqunneqarnerani kommunaldirektøritut atorfik qanoq pingaaruteqartigineranik erseqqissaassutaalluni.

Nr. 3 pillugu:

Aalajangersakkap naqissuserpaa aningaasaqarnermi ataatsimiititaliaq kommunip suliassaani tamani karseqarnermut aamma naatsorsuuserinermut attuumassutilinnut suliassanut tamanut akisussaasuusoq aammalu naalakkersuisut konto-t ingerlannerinik maleruagassanik atuuttuni aalajangersagaanni eqqortitsinissap qulakkeerneqarnissaa ilanngullugu.

Nr. 4 pillugu:

Aalajangersakkap erseqqissarpaa aningaasaqarnermi ataatsimiititaliap aningaasaqarnermut aammalu immikkoortukkuutaani pilersaarusiornermut atatillugu pilersaarusiornissamut suliassai. Aningaasaqarnermi ataatsimiititaliaq aammattaaq pineqartuni nalinginnaasumik maleruagassanik aalajangiissasoq pisussaaffilerneqarpoq. Maleruagassat ataatsimiititalianut tamanut aalajangiinerinut pituttuisuupput.

Nr. 5 pillugu:

Aningaasaqarnermut ataatsimiititaliaq peqquneqassaaq nalinginnaasumik ileqqoreqqusanik aalajangersaaqqullugu. Ileqqoreqqusat pilersinneqartut ataatsimiititaliat allat aalajangiinerminni pinngitsooratik malittarisassavaat.

Imm.2-mut

Aalajangersagaq maannamut atuuttumut § 21, imm. 3-mut naapertuuppoq, aalajangersagarlu aningaasaqarnermi ataatsimiititaliap piginnaatitaaffii aamma ingerlatsiviit allat oqartussaaffiinut ilaqarsinnaaneranik aalajangersaalluni. Kommunalbestyrelsi aqutsinermik ileqqoreqqusani aalajangiisinnaavoq assersuutigalugu inuussutissarsiornemi suliassat aningaasaqarnermi ataatsimiititaliami ingerlanneqarsinnaasut ingerlatseriaaseq tamanna kommunalbestyrelsip qinerpagu ataatsimiititaliaq taagorneqassaaq inuussutissarsiornermut aamma aningaasaqarnermut ataatsimiititaliaq.

Imm. 3-mut

Aalajangersagaq maannamut inatsisartut inatsisaannut atuuttumut § 23, imm. 5-mut naapertuuppoq, kommunimullu missingersuusiornermi suliaqarnermut annertuumik pingaaruteqarmat siunertaralugu kommunalbestyrelsimi ilaasortat aningaasaqarnermi ataatsimiititaliami ilaasortaanngitsut missingersuutit suliarineqarnerannut pitsaanerusumik apeqqutinut paasisaqarsinnaaqullugit.

§ 26-imut

Imm. 1-imut

Aalajangersagaq maannamut atuuttumut § 18, imm. 1-mut naapertuuppoq, aalajangersarlugulu kommunit nammineerlutik ataatsimiititaliat aaqqissuuneqarnerannik pilersaarusiussasut suliat naammassineqarnissaannut immikkut inatsiseqarnermi piumasaqaataasut naapertorlugit.

Aalajangersakkap kinguneranik aqutsinermi ileqqoreqqusaq nalinginnaasoq ataatsimiititaliat ataavartut taakkualu suliassaannik malittarisassanik ataasiakkaanik imaqanngilaq, kisiannili Naalakkersuisut nakkutilliisutut oqartussatut aqutsinermik ileqqoreqqusat kommunini ataasiakkaani immikkut inatsiseqarneq naapertorlugu pisussaaffiit akerliunersut misissorsinnaassavaat.

Imm. 2-mut

Aalajangersagaq maannamut atuuttumut § 18, imm. 2-mut ilaatigut nangitsineruvoq, siunertaralugulu ersarissassallugu ataatsimiititalianik ataavartunik ilaasortat amerlassusaat 2-mik avinneqarsinnaassanngitsut. Aammattaaq ataatsimiititaliani ataavartuni ilaasortat amerlassusaat kommunalbestyrelsimi ilaasortat affaat sinnerlugit amerlassuseqassanngillat. Aammattaaq kommunalbestyrelsi aningaasaqarnermi ataatsimiititaliami ilaasortat sinniisussaannik qinersissaaq. § 36-ip aalajangersarpaa qaqugukkut sinniisussamik aggersaasoqartassasoq.

Imm. 3-mut

Aalajangersagaq ilaatigut maannamut atuuttumut § 18, imm. 4-mut nangitsineruvoq, aalajangersarlugulu ataatsimiititaliani ataavartunut qinersineq aningaasaqarnermi ataatsimiititaliamik qinersinerup kingorna pissasoq.

Aalajangersakkap naggataani taamattaaq § 24, imm. 4-mi aalajangerneqarpoq, ataatsimiititalianut inunnik qinersinermi aalajangiisoqarsinnaanngitsoq, qinersinerit kommunalbestyrelsip atuuffiata naannerusumik atuuttussamik.

§ 27-imut

Aalajangersagaq maannamut atuuttumut § 24-mut naapertuuppoq

Imm. 1-imut

Inatsimmi atuuttumi amerlanerussuteqarluni qinersinermi aalajangersagaq maanna inatsisissatut siunnersuummi § 35, imm. 1-mi allassimalerpoq.

Immikkoortoq 2-mi ersarissarneqarpoq, ataatsimiititaliani ataavartuni ilaasortaasut tamarmik ataatsimiititaliami siulittaasutut qinerneqarsinnaanermik pisussaaffeqartut. Ataatsimiititaliami ataavartuni ilaasortaaneq ilaasortaanermut sanilliullugu siulittaasoq kommunalbestyrelsip atuuffianut tamarmut qinerneqarneq ajorpoq, taamaalillunilu amerlanerussuteqarluni qinersinikkut ataatsimiititaliami ataavartuni taarserneqarsinnaassalluni.

Immikkoortoq 3-mi siunertarineqarpoq ataatsimiititaliami siulittaasup suliassai borgmesterip suliassaanut nallersuutissallugit, tak. inatsimmi siunnersuutip § 17-ia.

Imm. 2-mut

Aalajangersakkap siunertaraa ataatsimiititaliap sulinera eqaannerusumik ingerlanneqarsinnaaqqullugu, minnerunngitsumik ataatsimiititalianut ataatsimiinnissamik aggersaaneq ilaatigut ajornartorsiuteqarfiusinnaammat, assersuutigalugu ataatsimiititaliamik ilaasortat nunaqarfimmi najugaqarpata.

Immikkoortoq 1-mi ataatsimiititaliap siulittaasuata sulianik aalajangiisinnaanera, ataatsimiititaliamut ataavartumut saqqummiunneqartussaagaluartumut pineqarpoq. Ataatsimiititaliami ataavartumi siulittaasoq kommunip allaffissornerata ilaanut ulluinnarni aqutsisutut assersuuneqanngilaq taamaalillunilu aalajangersakkap ataavartumik ataatsimiititaliap piginnaatitaaffiata aammalu borgmesterip allaffissornermi ulluinnarni aqutsisuatut pisinnaatitaaffiisa killiinik allanngortitsinngilaq.

Ataatsimiititaliap ataavartup siulittaasua sulianik nukinginnartunik aammalu suliani apeqquserneqarsinnaanngitsuni aalajangiisinnaanermik piginnaatitaaffiup avataatigut tunineqarusuppat, tamanna ataatsimiititaliap ilaasortat tamarmik isumaqatigiissutigippassuk pisinnaavoq.

Suliani oqaariaatsip "apeqquserneqarsinnaanngitsoq" nassuiarneqarnerani piumasaqaataavoq, ataatsimiititaliap siulittaasuata nalilissagaa, ataatsimiititaliami ilaasortat tamarmik, tassalu amerlanerussuteqartuinnaanngitsut suliaq apeqquserneqarsinnaanngitsutut isigissagaat.

Immikkoortup 2-mi suliassani nukinginnartuni pisoqartillugu borgmesterimut ilisimatitsisussaatitaaneq toqqammaveqarpoq borgmesterip ataqatigiissaarinissamut periarfissinneqassammat aammalu ataatsimiititaliap ataavartup ingerlatsineranut borgmesterip akuliunnissaanut pisinnaatitaafeqarneranik toqqammaveqarpoq. Ataatsimiititaliami siulittaasoq inatsit naapertorlugu pisinnaatitaaffeqarpat, assersuutigalugu meeqqanut inuusuttunullu ikiorsiisarnerit pillugu Inatsisartut inatsisaat nr. 1, 15 april 2003-meersoq naapertorlugu, borgmesteri siumoortumik nalunaarfigineqassanngilaq.

Imm. 3-mut

Aalajangersakkap ersarissarpaa siulittaasutut immikkut piginnaatitaaffiit ataatsimiititaliat aqunneqarneri toqqammaviatigut allanngortinneqanngitsut. Taamaalillunilu siulittaasoq ataavartumik ataatsimiititaliat aalajangiinerannik malinnaasussaavoq. Ataatsimiititaliamut atatillugu siulittaasup suliassarai ataatsimiinnerit piareersarneri, ataatsimiinnerni aggersaaneq, ataatsimiinnerni aqutsineq il.il.

§ 28-imut

Aalajangersagaq maannamut atuuttumut § 23, imm. 1-4, aamma imm. 6-imut naapertuuppoq.

Imm. 1-imut

Aalajangersakkap naqissuserpaa ataatsimiititaliat sulinerat ataatsimiinnerni ingerlanneqassasoq. Aalajangersagaq ersarissaataavoq, ataatsimiititaliaq ataavartoq kommunalbestyrelsi assigalugu ataatsimeeqatigiisitatut aaqqissuusaasoq.

Tele atorlugu attaveqaatinik teknologi atorlugu aalajangersakkanik peqartoqanngilaq taamaattumillu pisut ataasiakkaat naapertorlugit kommunalbestyrelsi naliliisassaaq suut tele-kkut attaveqaatitigut teknologi atorneqartassanersut.

Imm. 2-mut

Aalajangersagaq maannamut inatsimmi atuuttumut § 23, imm. 1-mut naapertuuppoq, ataatsimiinnermi suleriaasissaq pillugu. Immikkorluinnaq ataatsimiititaliat ataavartut siulittaasup tullissaannik qinersinissaat pisariaqartunganngilaq.

Suleriaasissamik piumasaqaat ima isumaqanngilaq kommunalbestyrelsip assigisaanik allassimasumik suleriaaseqartoqassasoq. Aalajangersagaq pingaarnerusumik isumaqarpoq, ataatsimiititaliap ataavartup ingerlariussissaanik aalajangersakkamik kommunalbestyrelsi pisussaaffeqanngimmat.

Imm. 3-mut

Aalajangersagaq maannamut inatsimmi § 23, imm. 3-mut naapertuuppoq, nalinginnaasumillu § 16-mut innersuussinikkut aalajangersaalluni, ikinnerussuteqartut pisussaaffiinik aammattaaq kommunalbestyrelsini imaqarnilianut tunngatillugu aamma ataatsimiititaliami atuuttuusoq aammattaaq § 16-mut innersuussutip naqissuserpaa imaqarniliaq atsiorneqarneraniit kingusinnerpaamik qaammat ataaseq qaangiutsinnagu Naalakkersuisunut assilineranik nassitsisoqassasoq.

Imm. 4-mut

Aalajangersagaq maannamut inatsimmut atuuttumut § 23, imm, 4-mut naapertuuppoq,

naammassisumillu aalajangersarlugu qaqugukkut ataatsimiititaliami ilaasortaanngitsut ataatsimiititaliap ataatsimiinnerini najuussinnaatitaasut, tassami aallaaviummat ataatsimiititaliani ataatsimiinnerit matoqqasuuneri.

Immikkoortoq 1-ip ataatsimiititaliaq periarfissippaa ingerlatsisoqarfimmi ikiorsiinissamik piumasaqarsinnaalersillugu, kisiannili borgmesterip allaffissornermi ulluinnarni qullersatut aqutsisutut, pisariaqarpat ataatsimiititaliaq pineqartoq tusarniareerlugu aammalu ataatsimiititaliap siulittaasua oqaloqatigereerlugu, aalajangissallugu allatseqarnermi ikiorteqarneq sorleq ikiorsiissutaassanersoq aalajangissallugu. Ataatsimiititaliap ataavartup allatsitut toqqagaasup ataatsimiititaliap ataatsimiinnera peqataaffigissagaa kissaatiginngippagu, ataatsimiititaliap ataavartup tamanna akerlilersinnaavaa, taamaattorli borgmesterip tamanna akerlilerpagu allamik allatsimik toqqaasinnaanngilaq. Ataatsimiititaliami ataavartumik borgmesterillu allatseqarneq pillugu isumaqatigiinngissutaasoq kommunalbestyrelsimit aalajangiiffigineqassaaq.

Aammalu kommunimi atorfilik kommunalbestyrelsimit ataatsimiititaliamut ataavartumut allatsitut toqqagaasoq, ataatsimiititaliami ataavartumit ataatsimiinnernut peqataanissaa akerlilersinnaavaa, kisiannili ataatsimiititaliap ataavartoq kommunalbestyrelsi allatsissatut aalajangiinera malinnissaanut pisussaatitaassaaq suliat ingerlatsivimmi suliarineqarnerini ataatsimiititaliap ataavartut ataatsimiinnerisa aamma avataanni.

Ataatsimiititaliaq ataavartoq aamma atorfilinnik aggersaasinnaavoq paasissutissanik oqaatsitigut nassuiaasinissaq imaluunniit assigisaanik tigusaqarnissaq siunertaralugu.

Ataatsimiititaliaq ataavartoq ataatsimiititaliami ataavartumi allatsip avataatigut atorfilinnik allanik peqataasoqarnissaanik akuersissummik nalinginnaasumik tunisisinnaanngilaq. Atorfillit ataatsimiititaliap ataatsimiinneranut paasissutissiissallutik aggersarneqartut ataatsimiinnerni pisussaatitaapput peqataassallutik, kommunalbestyrelsi imaluunniit borgmesteri allamik aalajangersimanngippat.

Immikkoortup 2-ani pineqarpoq atorfilittaanngitsut ilaatigut kommunalbestyrelsimi ilaasortat allat ilanngullugit, ataatsimiititaliani peqataasinnaatitaaneri. Aalajangersakkap erseqqissarpaa inuit pineqartut taamaallaat ataatsimiititaliap ataatsimiinnerinut aggersarneqarsinnaasut suliami aalajangersimasumik paasissutissiinissaannik toqqammaveqarpat. Akerlianik kommunimi atorfilinnut, atorfeqartuunngitsut ataatsimiititaliat ataavartut isumaqatigiinniarneri najuuffigisinnaavaat taasisitsinerilli najuuffigisinnaanagit.

Aalajangersakkami anguniarneqarpoq ataatsimiititaliani ataatsimiinnerit sulisuunngitsuniit peqataaffigineqarnissaat killilersorneqassasoq minnerunngitsumik anguniarlugu ataatsimiititaliat ataatsimiinnerini ataatsimiititaliami ilaasortat kommunalbestyrelsimi ilaasortaasut avataatigut peqataasannginnissaat, taamaalillugu isumaqatiginninniarnerit kommunalbestyrelsip ataatsimiinnerini ammasuniit ataatsimiititaliami ataatsimiinnerni matoqqasuusunut nuunneqarnissaat ernumassutigineqarsinnaammat.

Imm. 5-imut

Aalajangersagaq maannamut inatsimmut atuuttumut § 23, imm. 6-imut naapertuuppoq, isigineqassallunilu nalinginnaasumik kommunit aalajangeeriaasaat aammanerulernissaannik kissaateqarneq tunulequtaralugu.

§ 29-imut

Aalajangersagaq maannamut atuuttumut § 25-imut naapertuuppoq.

Imm. 1-imut:

Aalajangersakkakkut aalajangerneqarpoq ukiumut missingersuummi akuerineqartumi killiliunneqartut iluanni ataatsimiititaliap ataavartup susassaqarfini pisussaaffigissagai. Aalajangersakkakkut aammattaaq aalajangiunneqarpoq naqissuserpaa ukiumut missingersuummi akuerineqarsimasut sipporneqartussanngornerat ataatsimiititaliap paasippagu taava ilassutitut aningaasaliissutissanik pinngitsoorani qinnuteqartoqassasoq.

Imm.2-mut:

Aalajangersakkakkut aalajangerneqarpoq ataatsimiititaliaq ataavartoq ataatsimiititalianik attuumasuteqartunik isumaqatiginninniartassasoq, ilaatigut aningaasaqarnermut ataatsimiititaliamik, ataatsimiititalianik ataavartunik allanik aammalu ataatsimiititaliat allat aalajangiisoqartinnagu isumaqatiginniartassagai. Pisariaqartillugu Aataatsimiititaliap ataavartup isumaqatiginninniartoqartillugu pisariaqalerpat borgmesteri isumaqatiginninniarnerni ilanngutsissinnaavaa.

Imm. 3-mut:

Aalajangersakkakkut aalajangerneqarpoq tamanna kissaatigineqaraangat ukiumut missingersuutinut aammalu missingersuusianut siunnersuutinut ataatsimiititaliaq ataavartoq ilanngussisassasoq. Ataatsimiititaliaq ataavartoq ilanngussaqarnissaminut pisussaavoq aningaasaqarnermut ataatsimiititaliap tunniussinissamut killissarititaa tikitsinnagu.

§ 30-imut

Aalajangersagaq maannamut atuuttumut § 26-imut naapertuuppoq.

Aalajangersakkakkut aalajangerneqarpoq ataatsimiititaliami ilaasortaq kinaluunniit kommunalbestyrelsimut suliassanngortitsisinnaasoq, taamaalillugulu aalajangiisinnaassuseq ataatsimiititaliamiit nuussinnaallugu.

Taamaattorli suliassat inatsit naapertorlugu ataatsimiititaliami ataavartumi suliassarititaasut suliassanngortinneqarsinnaanngillat.

§ 31-imut

Imm. 1-mut:

Aalajangersagaq § 18, imm. 3-mik ilaatigut ingerlatitseqqiinneruvoq.

Aalajangersakkakkut aalajangiunneqarpoq ataatsimiititaliami ataavartumi qinersinerup kingorna ataatsimiititalianik allanik, isumalioqatigiissitalianik il.il. qinersisoqassasoq.

Imm. 2-mut:

Aalajangersakkap naggataani § 25, imm. 4-mi aalajangersarneqartoq naapertorlugu kommunalbestyrelsi ataatsimiititalianut il.il. inunnik qinersinerni aalajangiisinnaanngitsoq qinigaaffiit kommunalbestyrelsip atuuffianiit sivikinnerusumik atuutissasut.

Imm. 3-mut:

Aalajangersagaq maannamut inatsisartut inatsisaanni atuuttumi § 18, imm. 7-mut naapertuuppoq, siunertatullu erseqqissassallugu kommunalbestyrelsi taamaallaat pisinnaatitaaffeqartoq immikkut ataatsimiititaliat taakkua qanoq katiternissaannik aammalu qanoq suliaqarnissaanik.

Malittarisassat nalinginnaasut ataatsimiititalianut imm. 1-mi taaneqartunut atuuttut ataatsimiititaliani, isumasioqatigiissitaliani assigisaanilu atuutinneqartussaanersut aalajangersimasumik akineqarsinnaanngillat. Taamaattoq oqaatigineqassaaq malittarisassat taamaattut pisortatigut sullissinermi nalinginnaasumik tunngaviusutut malittarisassaappata, assersuutigalugu oqaluuserisassat aamma imaqarniliat suliarineqartarnerannut, kommuni pisussaassaaq aalajangersakkat taaneqartut immikkoortoq 1 naapertorlugu pilersinneqartuni atussallugit.

Ataatsimiititaliat piullugit aalajangersakkat ataatsimoortut sinnerisa kapitali 3-miittut ataatsimiititaliat pillugit atuunnissaat naatsorsuutigineqassaaq kommunalbestyrelsi allanik aalajangiisimanngippat, malittarisassat aningaasaqarnermut ataatsimiititaliami ataatsimiititalianilu ataavartuni toqqaannartumik aalajangersartakkat eqqaassanngikkaanni, pingaarnerusumillu taaneqassapput malittarisassat inissitsiterluni ataatsimiinnermi atorneqartartut.

§ 32-imut

Aaqissuusseqqinnermut ataatsimiititaliap isumaliutersuummini siunnersuutigai qinikkat sulineranni aaqqissuusinermi periarfissanik nutaanik pilersitsisoqassasoq, imaalillugu kommunini ataasiakkaani oqallisigineqarlunilu eqqarsaatigineqassasoq aaqqissuussinerup qanoq ittup qinikkat sullissineranni pitsaanerpaasussap anguneqarsinnaajumaarnera.

Siunnersuummi kommunalbestyrelsi periarfissinneqarpoq aqutsinissaq kissaatigineqartoq aaqqissuutissallugu inatsisip § 25-at aamma § 26-at killiliisoralugit, piumasaqaatini aningaasaqarnermut ataatsimiititaliaq aalajangersimasunik suliassaqarnermi kommunip pisariaqartitai naapertorlugit aqutseriaatsimik aaqqissuusisinnaasoq. Aqutseriaaseq aqutsinermik malittarisassani aalajangersarneqassaaq, tak. § inatsimmi 1, imm. 2.

§ 33-imut

Aalajangersakkap maannamut atuuttoq § 18, imm. 8 taarserpaa, erseqqissarlugulu kommunip ataatsimiititaliaanut il.il. qinigaaneq inuiaqatigiinnut kiffartuussinerummat. Siunnersuutikkulli pingaarnertut atorunnaassaaq kommunalbestyrelsi atuuffimmini kommunip innuttaanut allanut qinigaaffimminik tunniussisinnaanera. Tamanna pissuteqarpoq kommunerujussuanngortumi akisussaaffiit annertusinerisa kingunerannik inuit qinigaasimanngitsut akisussaaffilerneqarnissaaat aammalu aalajangiisinnaalernissaat nakkutilliinermik oqartussaasut misissuinissamik aammalu pineqaatissiinissamik pisinnaatitaaffeqartutut inissisimasuni siunertaqarsorinanngimmat.

Aalajangersakkakkut anguniarneqanngilaq pisinnaasitsissutinik nalinginnaasunik allannguinissaq, ilaatigut nunaqarfimmi siulersuisut pineqartillugit.

Imm. 2-mut:

Imm. 1-imi malittarisassamik pingaarnermik matuma kingorna siulersuisunut, ataatsimiititalianut, siunnersuisoqatigiinnut il. il. atortussaatitsinngitsoortoqassaaq inatsisiliani allani erseqqissumik aalajangersaavigineqarsimappat, tassa kommunalbestyrelsi ilaasortarinngisaminik toqqaasinnaanngorlugu, assersuutigalugu ulluunerani paaqqinnittarfinnik sullissinerni.

§ 34-imut

Aalajangersagaq inatsimmi atuuttumi § 27-mut naapertuuppoq.

Imm. 1-mut:

Aalajangersakkakkut aalajangerneqarpoq ataatsimiititaliamut ilaasortanik marlunnik amerlanerusunilluunniit qinersisoqartillugu qinersisaaseq d’Hondt atorlugu (amerlanerussuteqarneq tunngavigalugu qinersisarneq) ataatsimiititaliani tamani immikkut atorneqartassasoq tamannattaaq atuuppoq isumasioqatigiissitanut, siulersuisunut il.il. qinersisarnerni.

Imm. 2-mut:

Aalajangersakkakkut aalajangerneqarpoq ataatsimiititaliani borgmesterip ilaasortaaffiginngitsuugassarinngisaani amerlassutsit eqqarsaatigalugit qinigaaffimmi suleqatigisaminut borgmesteri ilaatinneqartassasoq. Amerlanerussuteqarniarluni qinersinermi erserpat borgmesterip qinigaaffimmi suleqataasa pingasuusariaqarnerat taava borgmesterip saniatigut ilaasortassanik marlunni qinersisoqartassaaq. Eqimattami borgmesteri ilaatinneqareerluni pingasunik ilaasortaqassappat, marlunnik ilaasortanik allanik ataatsimiititaliamut qinersisoqassaaq. Tamanna aamma isumasioqatigiissitanut, siulersuisunut, il.il. atuuppoq.

Imm. 3-mut:

Aalajangersakkami kommunalbestyrelsip ilaasortami ilaasortaringisamilu akornanni ataatsimiititalianut assigisaannullu qinersinermini killiffeqarpat aalajangersagaq una iluarsiissutigineqatassaaq.

Amerlanerussuteqarneq naapertorlugu inunnik arlalinnik qinersisoqassatillugu qinersisoqassatillugu tunngaviusumik naatsorsuutigineqartarpoq qinerneqartussat tamarmik naligiimmik inissisimassasut imaalillugu, suleqatigiiaat tamarmik inissat inuttalernissaannut assigiimmik kiffaanngissuseqassasut. Tamatuma malitsigaa suleqatigiiaat inissanik imaluunniit inissamik kingullermik inissittoqartussaatillugu qinersisinnaanermut periarfissaat killeqarnerussammata, pissutigalugu pisuni aalajangersimasuni ilaasortat periarfissaat nungussimasinnaammata. Aalajangersagaq assersuutigalugu ataatsimiititalianut § 31, imm. 3 naapertorlugu pilersinneqartunut attuumassuteqarpoq.

Imm. 4-mut:

Aalajangersagakakkut amerlassuteqarneq naapertorlugu qinersisarnerni periuseq d’Hondts-ip periusaanik taaneqartartoq ingerlateqqinneqarpoq.

Aalajangersagaq malittarisassamik ilassuserneqarpoq, kattusseqatigiit inissamik inuttaqanngitsumik inuttaleerusunngippata taava inissaq kattusseqatigiinnit allanit d’Hondts-ip periusaa malillugu pissarsiarineqartassaaq.

Malittarisassap atuutinnerani nalornisoqartarmat inatsisip matuma akuerineqarneranut atatillugu ilitsersuummik nassiussisoqassaaq, tamatumani dŽHondts-ip periusaa qanoq atorneqassaneqartassanersoq erseqqissumik takutinneqartassaaq.

§ 35-imut

Aalajangersagaq maannamut atuuttumut § 28-mut naapertuuppoq.

Imm. 1-mut:

Aalajangersakkakkut aalajangerneqarpoq qinigassanngortittumik qinersinermi amerlanerussuteqartoqassasoq. Qinigassanngortittut ilaannaalluunniit siullermeerluni taasinermi amerlanerussuteqartunit taaneqanngippat, taaseqqittoqassaaq. Taasinikkut tamatumuuna aamma qinigassanngortittoq ataaseq amerlanerussuteqavissumik taaneqanngippat taaseqqittoqassaaq qinigassanngortittut marluk amerlanerpaanik taaneqarsimasut akornanni, taasinerlu taanna naligiiffiulluni inerneqarpat makitsisoqartassaaq. Makitsineq borgmesterimit ingerlanneqartassaaq.

Imm. 2.-mut:

Aalajangersakkakkut aalajangerneqarpoq kommunimi sulilerumallutik qinnuteqartut arlallit akornanni ataatsimiititaliani toqqaanissami imaluunniit kommunalbestyrelsimi taasinissami immikkut periaaseqarnissaq.

Atorfinitsitsinissamut atatillugu oqaluuserinninnermi tunngavissatut qinnuteqartut pillugit paasissutissat tamarmik saqqummiunneqassapput, toqqaanissamilu taakku arlaat kinaluunniit siunnersuutigineqarsinnaavoq. Taamaattumik toqqaanissaq, tamanna isumaqatigiinngissutigineqanngippat, qinnuteqartut ilaannaanut, soorlu ataatsimiititaliamit imaluunniit allaffimmit inassutigineqarsimasunut, tunngatinneqarsinnaanngilaq.

§ 36-imut

Aalajangersagaq maannamut atuuttumut § 29-mut naapertuuppoq.

Imm. 1-mut:

Aalajangersakkakkut sillimaffigineqarpoq, ataatsimiititaliami ilaasortaq qinigaaffiup iluani ilaasortaajunnaarpat taamaalillunilu ilaasortamik allamik taarserneqartussangorluni.

Aalajangersakkakkut aalajangerneqarpoq suleqatigiinnut ilaasortaq tunuartoq aamma tassaassasoq ilaasortamik nutaamik qinerseqataasussaq.

Imm. 2-mut:

Kommunalbestyrelsip ataatsimiitarnerinit ataatsimiititaliat amerlanerusunik ataatsimiittarmata, ataatsimiititalianili ilaasortat tamatigorluinnangajak ikittuinnaat peqataasarnerisa kingunerannik tamakkiisumik peqataasoqartarnissaa pisariaqartinneqartarmat, tak.§ 26. imm. 2-mut nassuiaatit, sinniisussap killilersorneqanngitsumik ataatsimiititaliamut ataatsimiigiaqquneqarrsinnaanera ilanngunneqarpoq.

Taamaakkaluartorli kommunalbestyrelsimut ilaasortap taamatut sulinini ingerlatiinnartillugu piffissap ilaani ataatsimiititaliamit imminut tunuartikkallarsinnaanngilaq, aamma tak. § 15, imm. 2-mut nassuiaatit, tamatumani aningaasaqarnermut ataatsimiititaliamut aammalu ataatsimiititalianut ataavartunut qinigaanerit pisussaaffiummata. Qinigaaffimmi suleqatigiit aalajangigassaraat sinniisussamik ataatsimiigiaqqusinermut piumasaqaatit naammassineqarsimanersut.

Qinigaaffimmili suleqatigiit pisussaanngillat ataatsimiititaliami inissaq inuttaqanngikkallartoq ilaasortap najuutinngitsup sinniisussaanut tunniutissallugu.

Aalajangersagaq taamaallaat atorneqassaaq ilaasortanut ataatsimiititaliami ilaasortassatut qinigaasimasunut, atorneqassananili pinngitsoorani ilaasortaasussanut, soorlu borgmesteri pinngitsoorani aningaasaqarnermut ataatsimiititaliamut ilaasortaasussaasoq. Taamaattumik borgmesterip najuussinnaanngikkallarnerani aningaasaqarnermut ataatsimiititaliamut ilaasortamik nutaamik qinersisoqarsinnaanngilaq, ulluinnarnili allaffiup aqunneqarnera, tak. siunnersuutip § 22, imm. 2, borgmesterip tullianit ingerlanneqalersimappat borgmesterip tullia aningaasaqarnermut ataatsimiititaliamut aamma siulittaasunngussaaq.

Borgmesterip tullia aningaasaqarnermut ataatsimiititaliamut ilaasortaareerpat borgmesterillu suliaanik suliaqalerpat ataatsimiititaliami inissaq ataaseq inuttaarutissaaq.

§ 37-mut

Imm. 1-imut:

Aalajangersagaq inatsisip maannamut atuuttup § 30, imm. 1-annik ingerlatitseqqinneruvoq suliassallu aalajangersimasut ataatsimiititaliani oqaluuserineqarnerini aalajangeeqataasinnaannginneq pillugu masskkumut periaasiusartut inatsisikkut tunngavilerlugit ataatsimiititaliani tamani atorneqartassaaq.

Malittarisassat kommunalbestyrelsinut atuuttut, tak. § 14-imut nassuiaatit, assigalugit aalajangeeqataasinnaajunaarsitaanissaq ilumut pissutissaqarnersoq pillugu aalajangiiniarnerit pisortat ingerlatsineranni suliat sulirineqartarnerat pillugu Inatsisartut inatsisaanni malittarisassat naapertorlugit pisassapput.

Periaatsikkut inatsimmik tunngaveqalersukkut tassuuna pineqarput ataatsimiititaliani kommunalbestyrelsimilu aalajangeeqataasinnaajunaarsitaanerit pillugit apeqqutit malittarisassat assigiit malittugit suliarineqartarnissaat.

Imm. 2-mut:

Kommunalbestyrelsimi ilaasortat borgmesterimut nalunaartussaatitaanerat pillugu § 14-imi imm, 2-anni aalajangersakkanut aalajangeeqataasinnaajunnaarsitsinissaq nalornisoorfiutillugu aalajangersagaq una assinguvoq.

Imm. 3-mut:

Aalajangersakkakkut qularnaarniarneqarpoq ilaasortaq ataatsip aalajangeeqataasinnaajunnaarsinneqarneratigut kommunalbestyrelsimi pissaanerup oqimaaqatigiinnerata nikisinneqartannginnissaa.

Kommunalbestyrelsimi ikinnerussuteqartut amerlanertigut ataatsimiititaliani ataasiinnarmik ilaasortaatitaqartarnerat eqqarsaatigalugu aalajangersarneqarpoq § 14, imm. 3-mi aamma

imm. 4-mi ikinnerussuteqartunut qularnaveeqqutit aamma ataatsimiititaliani sulinermi atorneqartassasut.

Imm. 4-mut:

Matumuuna imm. 3-annut nassuiaatit innersuussutigineqarput.

Kommunalbestyrelsip ataatsimiititaliai nalinginnaasumik ilaasortakitsuusarmata naleqquttuusorineqanngilaq malittarisassat § 14, imm. 4-iittut - naak ilaasortaq ataaseq aalajangeeqataasinnaajunnaarsitaanini pissutigalugu najuutinngikkaluartoq aammalu sinniisusaa ataatsimiititaliap suliassaminik ingerlatsinissaanut aggersarneqarsimanngikkaluartoq suliap naammassineqarnissaanik ilaasortat pingajorarterutaasa marluk (2/3) piumasaqaateqarsinnaanerannut tunngasut - nussuinnassallugit.

§ 38-imut

Aalajangersagaq inatsimmut atuuttumi § 31-annut naapertuuppoq.

Imm. 1-mut:

Aalajangersakkakkut aalajangerneqarpoq ataatsimiititaliani ilaasortat pisortat ingerlatsivianni ataatsimiititaliap akisussaaffigisaani sullisinertik sapinngisamik akissarsiaqaatigissanngikkaat. Taamaattorli periarfissiisoqarpoq ataatsimiititaliami ilaasortaq suliassamik tigusisinnaasoq, suliassaq tamanut ammasumik suliarinnittussarsiorneqareersimappat. Aammattaaq ilaasortaq qaqutiguinnaq pisartunik akilerneqarluni sulisarsinnaavoq pisortatigut ingerlatat ilaani ataatsimiititaliamit akisussaaffigineqartumi pissutsinik immikkut ittunik pisoqartillugu. Tamanna atuutinneqarsinnaavoq ilaasortaq kisimiilluni suliassap naammassineqarnissaanut pisinnaasat pisariaqartut ilaasortap kisimi naammassisinnaappagit.

Imm. 2-mut:

Aalajangersagaq ilanngunneqarpoq periaatsit tulluanngitsutut assersuutissat arlallit tunngavigalugit, tassa inuit appasinnerusumi atorfeqartut imaluunniit nunaqarfinni atorfeqartut nalinginnaasumik kommunini qinikkatut pisortanut allaffimmiluunniit pisortanut toqqaannartumik qanittumilluunniit attaveqanngitsut kommunit ataatsimiititaliaani ataavartuni ilaasortaasinnaasarsimanngimmata. Taamaattumik ilanngussisoqarpoq qanoq ungasitsigisumiinneq killiliiffigineqartalissasoq, pingaartumik siunertaralugu inuit sulianut attuumassuteqarnertik pissutigalugu ataatsimiititaliani ilaasortaasinnaajunnaarsinneqarsinnaasut taamalu suliarinneqataasinnaanngitsut, imaluunniit ataatsimiititaliami ilaasortaanerisa nassatarissappassuk ilaasortap pineqartup nammineq suliffigisaminut nakkutilliisooqataalernissaa. Pingaartumik sulisoq qulliunerusumik atorfeqarluni sulisuuppat nangaanartoqassaaq, marloqiusamimmi inissittoqartannginnissaa pillugu sianigisassat ilagaat immikkoortortaqarfimmi akisussaaffeqarluni sulisup ataatsimiititaliami aalajangeeqataasinnaasutut inissinnginnissaa, taamalillunilu ilaasortap suliassanut nammineq inassuteqaqataaffigisimasaminut aalajangeeqataasussaajunnaarnissaa.

Nr.1-mi pineqarput ataatsimiititaliat ataavartut suliassaqarfiini pisortat aamma sulisut atorfeqarnermi periaatsit malillugit, suliassat allattorsimaffiat imaluunniit oqartussaaffiit agguataarneqarnerat malillugit suliallit immikkoortortaqarfinni pisortanut paarlattaasartussat. Immikkoortortaqarfinni pisortatut assersuutigineqarsinnaapput isumaginninnermi pisortat, atuarfiit pisortaat aamma kommuneingeniørit. Nr. 2-mi inuit pineqartut naliliiffigineqassapput taakku suliaasa imarisaat tunngavigalugit. Kommunalbestyrelsit ataasiakkaat namminneq ingerlatsinertitk qanoq aaqqissuutissallugu annertuunik periarfissaqartitaapput, tamakkununnga ilanngullugit sulisuni sunik suliassaqassanersut atorfimminnilu qanoq taaguuteqassanersut, killiliiniarnermili atorfiit qanoq taaguuteqarneri kisimik pingaartinneqartussaanngillat. Pingaartinneqartariaqarput aaqqissugaanermi oqartussaaffiillu agguataarneqarneranni atorfiit imarisaasa nalunaarsorneqarneri il.il. tunngavigalugit pineqartut qanoq pisinnaatitaaffeqartigineri aalajangiutissallugit. Pingaaruteqarluinnarpoq atorfilik nalinginnaasumik pisortatut akisussaaffeqarnersoq namminerlu sulisunik siulersugaqarnersoq. Atorfiup aningaasarsiaqarnerup tungaatigut inissisimanera aamma aalajangeeqataasuusinnaavoq.

Sulisunut nr. 2-mi aalajangersakkat malillugit ataatsimiititaliani ataavartuni ilaasortaasinnaanngitsunut assersuutitut taaneqarsinnaapput allattoqarfinni pisortat, immikkoortortaqarfinni pisortat, allaffinni pisortat allallu immikkut sulisoqarnermut akisussaaffllit. Aamma sullissivinni pisortat allallu sullissivinni allaffissornikkut pisortatut suliaqartitat ataatsimiititaliani ataavartuni sullissivimmut akisussaasuni ilaasortaasinnaanngillat.

Imm. 3-mut:

Nr. 1-mi pineqarput sulisut tamarmik aningaasaqarnermut ataatsimiititaliap suliassaataanik, aningaasaqarnermut immikkoortoqarfiup, akissarsianut sulisoqarnermullu immikkoortoqarfiup suliassaataanik suliallit aningaasaqarnermut ataatsimiititaliamut ilaasortaasinnaatitaassussaannginneri.

Nr. 2-mi pineqarput pingaartumik sulisut ingerlatsiviup ilaani, nr. 1-mut ilaanngikkaluartuni, aningaasaqarnermut ataatsimiititaliamit akisussaaffigineqartuniittut, assersuutigalugu inuit pilersaarusiornermik suliallit aamma immikkoortoqarfinni aningaasaqarnermut ataatsimiititaliamit toqqaannartumik akisussaaffigineqanngikkaluarlutik tassunga attuumassuteqartuni, assersuutigalugu akileraaruserivimmi inunnillu allattuiffinni sulisut.

Nr. 3-mi immikkoortoqarfinni pisortat pineqartut, imm. 2-mi nr.1-imi pineqartut assiginagit immikkoortoqarfimmi pisortamut paarlattaaginnartut aningaasaqarnermut ataatsimiititaliamut ilaasortaasinnaanerat akornutissaqartinneqanngilaq.

Imm. 4-mut

Aalajangersagaq inatsisimmi atuuttumi § 31, imm. 4-mik ingerlatitseqqinneruvoq, tamatumuuna inatsisitigut aalajangiunneqarluni aapparisaq pissutigalugu aalajangeeqataasinnaajunnaarneq atortuusassasoq tamatuma pisortat ingerlatsineranni suliat suliarineqartarnerat pillugu inatsimmi aalajangersarneqarnerata kinguneranik. Aappariinnerni katissimanertut assersuunneqarsinnaasuni paasineqassaaq aappariinneq sivisunerusumik ingerlanneqarsimasoq imaluunniit aappariit najugaqatigiippata.

§ 39-mut

Aalajangersagaq maannamut atuuttumi § 38-mut naapertuuppoq. Kommunini ukioq naatsorsuiffiusoq Namminersornerullutik Oqartussat ukiumoortumik naatsorsuiffiannut naapertuutiinnassaaq.

§ 40-mut

Aalajangersagaq maannamut atuuttumi § 39-mut naapertuuppoq.

Imm 1-mut:

Aalajangersakkakkut aalajangerneqarpoq aningaasaqarnermut ataatsimiititaliaq pisussaasoq ukiumut naatsorsuiffiusussamut ukiunullu arlalinnut missingersuusiorfiusunut missingersuusiortassalluni. Ukiunut arlalinnut missingersuusiaq ukiunit pingasunit sivikinnerutinneqassanngilaq. Aalajangersakkakkut siunertarineqarpoq kommunip missingersuutinik suliaqartarnerinut atatillugit pilersaarusiortarnissat pingaaruteqassusiisa erseqqissisinnissaat.

Imm. 2-mut:

Aalajangersakkap erseqqissisippaa siunnersuummi § 43, imm. 2 peqatigalugu aningaasartuutit isertitallu suulluunniit missingersuusiorneri akuerineqareersimassasut. Aalajangersakkakkuttaaq kommuni pissussaaffilerneqarpoq aningaasanik tigoriaannagassanik aningaasallu oqimasaqatigiissinnerannut misingersuusiortarnissamut, tamatumalu kommunip aningaasanik tigoriaannarnik nalinginnaasumik aqutsineranut pingaaruteqaannarani aammattaaq kommuni pisussaaffilerpaa naalakkersuinikkut anguniagassanik aalajangiisarnissaanut, soorlu kommunimut akiligassat ikilisinniarneqarnerannut.

Imm. 3-mut:

Aalajangersakkakkut kommuni aningaasartuutissatut isertitassatullu naatsorsuutigisaviit tunngavigalugit missingersuusiortarnissaminut pisussaaffilerneqarpoq. Taamaalilluni aalajangersagaq una malillugu kommuni inatsisinut naapertuutinngitsumik iliussaaq pisortat ikiorsiissutaannit aningaasartuutissat ikinaarlugit akileraarutitigulluunniit isertitassat amerlanaarlugit missingersuusiorunigit, sinneqartooqqusinermik § 4-mi piumasarisaq saneqqunniarlugu.

Kommunalbestyrelsit inatsisitigut pituttorsimanngitsuni aningaasaliissutissanik immikkoortitsissapput ukiup missingersuusiorfiup iluani qinikkat anguniagaannut tulleriiaarnerinullu naleqquttumik, aammali saniatigut aningaasanik killiliillutik immikkoortitsisinnaapput ingerlatsinermut sanaartornermullu aningaasaliissutit iluanni imaluunniit ingerlatsinermut sanaartornermullu sillimmasersinnaallutik, missingersuummut akuerisamut sanilliullugu aningaasartuutit isertitalluunniit naatsorsuutigeriinngisat sillimaffiginiarlugit.

Kommunip aningaasanik pisassai pillugit, pingaartumik akiligassalinnit, kommunalbestyrelsi piviusorsiortumik naliliinissaminut taamaalilluni aamma pisussaaffeqalerpoq.

Imm. 4-mut:

Aalajangersakkakkut aalajangerneqarpoq kommuni ingerlatsinermi aningaasanillu tigoriaannarnik amigartooruteqarsinnaanermut taamaallaat missingersuusiorsinnaasoq,

1. amigartoorutissaq immikkut taarsigassarsinani aningaasalersorneqarsinnaappat,
2. ukiup missingersuusiorfiup iluani tamarmi ilaannaaniluunniit taarsigassarsiaqarsimaneq pisinnaappat Naalakkersuisunit akuerineqarani imaluunniit,
3. missingersuut akuersissutigitinnagu taarsigassarsinissamik Naalakkersuisunit akuerineqareersimagaanni.

Naalakkersuisut siunnersuutigat aalajangersakkap attartornermut atornermullu isumaqatigiissutinik assngusunik ilaneqarnisaa.

Naalakkersuisut attartornernut atornermullu attartoriaaseq leasing atorlugu sukumiinerusumik aalajangersaanissamut, tak. § 44, attartornernut aamma leasing atorlugu attartoriaaseq aqqutigalugu isumaqatigiissusiornermi ikinnerpaaffissaliinissat aalajangersarneqartassapput.

Imm. 5-imut:

Aalajangersagaq isigineqassaaq Namminersornerullutik Oqartussat kommunillu missingersuusiornermi periaatsinik il.il. erseqqissumik ilitsersuusiornissaminnik kissaataannut piviusunngortitsinertut.

Nakkutilliisuutitat kommunit missingersuusiornerini sukumiisumik malitassiorsinnaatitaalernerannut atatillugu periarfissaqalerportaaq missingersuusiornermi maleruagassat pisarialimmik eqaallisinnissaannut, taamaalilluni inuiaqatigiit ineriartornerat malillugu naleqqussarneqarsinnaanngorlutik.

Aalajangersakkakkut piumasarineqanngilaq Naalakkersuisut allaffeqarfiataluunniit missingersuusiornermi ilitsersuutit allassagaat, soorlu imaalluarsinnaavoq kommunit kattuffiannit allanneqartut, kingornatigullu Naalakkersuisunit nalunaarusiornikkut atortussaatinneqalerlutik.

§ 41-mut

Aalajangersagaq maannamut atuuttumut § 40-mut naapertuuppoq.

Imm 1-mut:

Aalajangersagaq § 10-mut immikkut aalajangersagaavoq, tamatumuuna aalajangersarneqarmat suliassap kommunalbestyrelsimi ataasiaannarlugu suliarineqarnissaa piumasarineqarluni. Ukiumut missingersuut aamma ukiunut arlalinnut missingersuusiaq kommunip allaffissornikkut sulinissaanut toqqammaviuvoq, taamaattumillu pingaaruteqarpoq ukiumut missingesuutip sukumiisumik suliarineqartarnissaa.

Imm. 2-mut :

Aalajangersakkakkut aalajangerneqarpoq kommunalebestyrelsip missingersuutit pillugit suleriaatsini nammineerluni pilersaarusiortassagaa, tamatumani ilaassallutik allanngortitsinissanut siunnersuutit saqqummiunneqartarnissaannut periaatsit.

Naalakkersuisulli nalinginnaasumik suleriaasissami aalajangersakkanik pineqartuni inatsisit atuuttut tunngavigalugit ilassuteqarsinnaapput, tassalu missingersuutit siullermeerilluni suliarineqarnerini nalinginnaasumik oqallisigineqartassasut, aappassaaneerinninnermilu suliarinninnermi immikkoortukkuutaarilluni aningaasaliissuteqarnissami tulleriiaarinerit kommunalbestyrelsimi isummerfigigalugit oqallinneqartassasoq.

Avissaarsimatitsinerup tamatuma ingerlatiinnarnissaa kissaatiginarpoq, taamaaliornikkut ukiumut missingersuummut ilaasortat ataqatigiissumik isummersinnaalissammata aammalu pingaarnersiuisumik saqqummiussisoqarsinnaassammat, taamattaaq ukiunut arlalinnut missingersuusiamut tunngatillugu kommunalbestyrelsimi ilaasortat allat kissaataannut ilisimaneqalersunut isummersinnaalersillugit.

Kommunalbestyrelsi siullermeerinninnermi missingersuummi tunngavigisaasunik allanngortitsisinnaavoq, tamatumalu kinguneranik aningaasaqarnermut ataatsimiititaliaq aappassaaneerinninnissamut akiumut missingersuusiami nalimmassaasinnaassalluni.

Kommunalbestyrelsi suleriaatsimik aalajangersaasimanngippat nalinginnaasumik suleriaaseq atorneqassaaq.

Imm- 3-mut:

Aalajangersakkakkut aalajangerneqarpoq ukiumut missingersuutip aalajangiiffiginissaata ullulerneqarnera.

Aalajangersakkap immikkoortuata aappaanni Naalakkersuisut ukiumut missingersuutip akuersissutigineqarneranut atatillugu immikkoortiterinissamik aalajangersaasinnaanerinut aalajangersakkami aamma nakkutilliisutut taasat aalajangersakkanik suliaqarsinnaaneri nalunaarneqarpoq.

Aamma Naalakkersuisut nalinginnaasumik ingerlatsinermi taasisarnerit tulleriiaarneqarnissaat pillugu malittarisassanik aalajangersaasinnaapput. Ukiumut missingersuummi immikkoortiterinissami malittarisassat aalajangiunneqarnerini Naalakkersuisut § 40, imm. 2-mut aamma 4-mut pituttorsimapput, taamaalillunilu ukiumut missingersuut isertitanik, aningaasartuutinik aammalu aningaasaqarnikkut nikingassutinik imaqassalluni. Tamatuma kingunerissavaa ukiumut missingersuut siunnersuutitut ataatsimoortutut taasissutigineqartussaassanngitsoq, tamannami nallersuutissammat aalajangersimasumik ingerlatsinermut aammalu aningaasat tigoriaannaat qanoq inissisimanissaannik taasisoqarnera, tassa § 40, imm. 2 naapertorlugu ukiumut missingersuummut ilaanngimmat, kisiannilu tamatuma kinguneralugu. Sinneqartoornissamik apeqqutip oqallisigineqarnera ukiumut missingersuutip siullermeerneqarnerani oqallisigissallugu pissusissamisoorpoq, tamannalu kommunalbestyrelsip kiffaanngissuseqarluni iliuuseqarsinnaaneranut killiliisuuvoq.

Ukiumut missingersuutip taarsigassarsinissamik ilaqarnissaanik, tamatumanilu kommunalbestyrelsip Naalakkersuisunit akuersissummik siumoortumik tunniussaqartoqarsimatinnagu aalajangiiffigisinnaanngisaanni, § 40, imm. 4-mi inerteqqutaaneranik piumasaqaatip aamma kinguneraa aalajangiinissami periaaseq ima ingerlanneqassasoq: § 40, imm. 4 naapertorlugu aningaasartuutit imaluunniit ikinnerusunik isertitaqarnissap qaqugukkut aalajangernissaa kommunalbestyrelsimi ilaasortanit erseqqissumik ilisimaneqarnissaa.

Ukiumut missingersuutip qanoq assigiinngiiaartigisunik amerlassusilersaonissaanut aalajangerneqarnerani ataatsimoortukkaartumik anigaasartuutinik isertitanillu missingersuusiisarnissamik aammalu ukiumut missingersuut qanoq annertutigisumik kontut immikkuutaartinneqarnissaannik imaqarsinnaaneranik aalajangersaasoqarsinnaavoq. Taakku periusitut killiunneqarnissaat nalinginnaasumik iliuuseqarnissamut kiffaanngissuseqarnermik annikillisitsisinnaaneri pissutigalugit qanoq immikkoortukkaartigisumik qaffasiffilerneqarnerisa assigiinngippaallarnissaat naleqquttutut isigineqanngilaq.

Aalajangersagaq § 40, imm. 5 pillugu immikkut aalajangersakkatut aamma isigineqassaaq, aalajangersakkanillu siamasinnerusunik aalajangersaanissaq ukiunut missingersuusiorneq pillugu nalunaarusiornissami pissaaq.

Imm. 4-mut:

Aalajangersagaq Naalakkersuisut nakkutilliisussaatitaanerisa kinguneraat.

§ 42-mut

Aalajangersagaq maannamut atuuttumut § 41-mut naapertuuppoq.

Imm 1-imut:

Aalajangersakkakkut aalajangerneqarpoq ukiumoortumik missingersuusiap aamma ukiunut arlalinnut missinersuusiap akuerineqarnerisa kingorna kingusinnerpaamik ullut 7-t qaangiutsinnagit pisortatigoortumik saqqummiunneqassasoq. Aalajangersagaq kommunalbestyrelsip aalajangiisarnerisa avammut ammaannerunissaannut ilapittuutaassaaq.

Imm. 2-mut:

Aalajangersagaq qanimut oqartussaaqataanerup nukittorsarnissaanik siunertaqarpoq. Missinersuusiami paasissutissat qanoq imaqarnissaannik immikkut piumasaqaateqartoqanngilaq, taamaallaalli imarisaa ilisimatitsissutinik kikkunnut illersuinanilu akerliunngitsunik imaqassaaq. Ilisimatitsissutit kommunalbestyrelsimi ilaasortanit imaluunniit kommunalbestyrelsimi partiinit ilaasortaaffeqartunit qinikkatut nammineq ilaliussanik ilaqassanngillat, atuagassianik imaluunniit takussutissanik saaqummiinissaq kommunip suliassarinngimmagu isummanik qinikkat nammineq isummersuutaannik imaqartunik ilaqassanngillat.

Missinersuummili ilisimatitsissutit aamma ukiunut tulliuttunut missingersuutinut ilisimatitsissutit saniatigut kommunip nalinginnaasumik suliaqarfiinik ilisimatitsissutinik imaqarsinnaavoq.

§ 43-mut

Aalajangersagaq maannamut atuuttumut § 42-mut naapertuuppoq.

Imm 1-imut:

Aalajangersakkakkut aalajangerneqarpoq missingersuummut aalajangiiffigineqarsimasumut kommunalbestyrelsi pituttorneqartoq, taamaalillunilu taamaallaat imm. 2 naapertorlugu aningaasartuutigineqarsinnaasoq imaluunniit isertitaqarfiusinnaasoq tamakku missingersuusiami ilaatinneqarsimappata.

Imm. 2-mut:

Aalajangersagaq aningaasalissuteqartarnissamut pisinnaatitaassutsip allanut tunniunneqarsinnaaneranut inerteqqutaavoq. Taamaattorli ajoqutissaqartinneqanngilaq aningaasaliissutaasut aalajangersimasut ilaannik kommunalbestyrelsi atuisinnaatitsisinnaasoq aningaasaqarnermi ataatsimiititaliamit akuersisoqarsimatillugu.

Kommunalbestyrelsip missingersuummi nuussisoqarsinnaaneranik pisinnaatitsisinnaanera immikkoortumi 1-imi pingaarnertut aalajangersakkami ilanngunneqarpoq.

Aalajangersakkami siunertaavoq missingersuusiami nuussiterisoqarsinnaanernik suleriaaseq eqaallisassallugu. Piumasaqaavorli aningaasaqarnermut ataatsimiititaliaq ataatsimiititalianut attuumassuteqartunut kommunalbestyrelsip pisinnaatitaanera naapertorlugu apeqqutini isumaqatiginninniaqqaartassasoq, tak. § 29, imm. 2.

Kommunalbestyrelsip pisinnaatitsinerani erseqqissumik nalunaarneqassaaq suna pineqarnersoq, tassunga ilaallutik aningaasat amerlassusissaat killilerneqarsimanersoq, ataatsimiititat sorliit aningaasaliiffiilluunniit sorliit pineqarnersut. Taamaattorli periarfissaqanngilaq aningaasaqarnermut ataatsimiititaliaq pisinnaatissallugu ingerlatsinermut aningaasaliissutinit sanaartornermut aningaasaliissutinut, killormulluunniit, nuutsisinnaanermut.

Imm. 3-mut:

Ilassutitut aningaasaliissuteqarnerup aningaasalersornissaa aalajangiinermi imaqarniliami erseqqissumik nalunaarneqassaaq, tassanilu pineqarlutik aningaasartuutissatut isertitassatullu akuersissutit, taamaalillunilu inatsisinik saneqqutsinerussalluni soorlu aningaasalersuinissamik apeqqutip ukiumut missingersuusiorfimmut tullermut kinguartinnera imaluunniit aningaasalersuinissamik apeqqutip ukiup ilaani sipaarniuteqarfissatut pilersaarummut kinguartinneqarneranik aalajangerneq.

Missingersuuti akuersissutigineqarneranut atatillugu kommunalbestyrelsip nalunaarutigisimappagu suliassat suut aningaasaliissutinit aalajangersimasunit matuneqassanersut, taava aningaasartuutissartalimmik aningaasaliissuteqarnermut atatillugu aningaasaliissutinut taakkununnga taarsiullugu sipaarniutissani nalunaarneqassaaq, suliassanut pilersaarutinut sunut allannguut sunniuteqassanersoq aamma ilanngullugu.

Immikkoortup aappaani erseqqissarneqarpoq missingersuusiornermi piviusorsiornissamik piumasaqaat aammalu § 40, imm. 3-mi amigartooruteqartumik missingersuusiornissamut inerteqqut ilassuteqarluni aningaasaliissuteqarnerni atorneqartassasoq.

§ 44-mut

Siunnersuutip § 44-ata imaa § 43-mut maannamut atuuttuusumut naapertuuppoq.

Nr. 1-ip kommunip taarsigassarsisinnaaneranut il.il periarfissai aalajangersarpai. Siusinnerusukkut aaqqissuussinermi aallaaviusimavoq kommunip taarsigassarsisinnaanermut il.il. periarfissaqartitaanngilluinnarnissaa, kisiannili nakkutilliisuutut oqartussat nalinginnaasumik immikkut akuersissuteqartarsimanerat siunertarineqartutut ingerlanngitsoq paasinarsisimavoq, nakkutilliisutut oqartussanit akuerineqaqqaaratik aningaaserivinni kontominnik tigusivallaartarsimasut aammalu Namminersornerullutik Oqartussat akiligassaannik uninngatitsisarnermikkut annikigisassaanngitsunik akiligassaqalersimammata, taamatullu kommunit atuivallaarnermikkut aningaasanik taarsiisinnaajunnaarnissaannik pinngitsoortitsiniarneq ingerlanneqarsinnaanani.

Taamatut akiligassaqartalernerit nakkutilliisutut oqartussat ingerlaavartumik kukkunersiuisarnermikkut aammalu aningaaserivinnut Namminersornerullutillu Oqartussanut taarsigassarsinissamut nutaanik isumaqatigiissusiortarnermikkut akueriinnartariaqartarsimavaat, kommunit pineqartut akiliisinnaajunnaarsinnaanerat pinngitsoortinniarlugu.

Ajornartorsiut kommuninut missingersuusiat pillugit aalajangersakkat tulluarnerusut atorlugit aammalu nakkutilliisut oqartussanut tulluarnerusunik pillaatissiissutissanik periarfissaqartitsilernikkut kommuninit aalajangersakkat akerlianik piaaralutik akiitsoqalersimasunut anigorniartariaqarpoq.

Taamattaaq nammagassat suliassallu agguataarneqarnerisa eqaannerusumik aaqqinnerisigut ilaatigut kommunit periarfissarissaarnerulissapput aningaasartornarnerpaaffinni, tassa inunnik isumaginninnermi atuarfeqarnermilu, kiffartuussinerup pitsaassusissaa namminneq aalajangissallugu, ilaatigullu Namminersornerullutik Oqartussanut akiligassanut tunngatillugu maannakkut maleruagassanik allanik suliaqarnissamut, taakku aqutsinermi atorsinnaalluartuussapput pisariaqanngitsumik akiligassaqalernissaq pinngitsoorniarlugu.

Paasinarpoq kommunit taarsigassarsisinnaanissaannut atatillugu sakkortuumik inatsisiliuussineq kommunit akiligassaqalertarnerannik unikaallatitsinavianngitsoq, akerlianilli allaffissornikkut aqukkuminaatsumik kommunit missingersuusiortarnerannut aammalu aningaasatigut aqutsinerannut atatillugu nakkutilliisutut oqartussat suliassinneqassapput aammalu naapertuutinngitsumik akisussaaqataatinneqalissallutik.

Taarsiullugu innersuussutigineqarpoq kommunit taarsigassarsisinnaanerat Naalakkersuisunit malittarisassiuunneqassasoq tamatumuunakkut ullumikkornit eqaannerusumik suleriaaseqartoqalersinnaaqqullugu, tamatumuunakkullu Naalakkersuisut periarfissaqarsinnaaqqullugit inuiaqatigiinni aningaasarsiornikkut ineriartornermut naapertuuttumik kommunit taarsigassarsisarsinnaassasut.

Kommunit taarsigassarsisinnaanerat assigalugu maannamut aqutsinissamut inatsisip atuuttup Inatsisartunit akuersissutigineratigut kommunit akiligassannut sillimmataasinnaanerannut, aningaasanut akiligassanut aningaasaliisinnaanerminnik uppernarsaasiisinnaanerannut aammalu akiligassanut allanut pisussaaffeqalersinnaanerannut, attartornernut aamma attartortitsinernut [tassa akilersillugu atukkiussinernut] aammalu akiligassanut allanut pisussaaffeqalersinnaanerannut, tamatumanilu aamma ataatsimoortumik nammaqatigiilluni akiligassaqalersinnaanermut, kiisalu aamma inatsisitigut pituttugaanngitsunik aningaasatigut tapiissuteqarnissamik neriorsuinerni, assersuutigalugit inuutissarsiornermi siunertanut ineqarnermut akiliutinik annikillilerinernut, Naalakkersuisut maleruaqqusaliorsinnaanissaat matumani Inatsisartut pissusissamisoorsoraat.

Aalajangersakkalli siunnertarinngilaa aalajangersassallugu, suut nr. 2, 3 aamma 4-mi allassimasut naapertorlugit ikiorsiissutitut tapersissallugit, tamanna pillugu kommunip inuussutissarsiornermut tunngatillugu akuusarnera tunngavigalugu immikkut inatsisitigut aalajangersagaqarmat.

Aalajangersakkat nr. 2, 3 aamma 4-mi aalajangerneqarsimasut taamaallaat iliuusaannut aamma taakkua annertussusaannut killiliisuussapput. Nalinginnaasumik akuersissutinut taamaattunut oqaatigineqassaaq pissutsit naapertorlugit Naalakkersuisut piumasaqaateqarsinnaapput, assersuutigalugu kommunip aningaasatigut aqutsineranut imaluunniit missingersuusiat aalajangersarneqarnerannut. Taamatut piumasaqaateqarsinnaanerup annerusumik siunertaraa inatsisitigut killissarititaasut aammalu missingersuutigisimanngisanik aningaasaqarnikkut kommunit akiligassaqalinnginnissaat sillimaffigereerniarlugu.

§ 45-mut

Aalajangersagaq imarisamigut maannamut atuuttumut § 44-mut naapertuuppoq.

Imm 1-mut:

Aalajangersakkakkut aalajangerneqarpoq kommunip naatsorsuutiminik allattuinermini aningaasaatimi qanoq aqunneqarnerinik piviusorsiortumik takusassiaqarnissaa. Naatsorsuutinik allattuineq piviusumik paasissutissiissaaq kommunalbestyrelsip aalajangiinerisa aamma kommunip ingerlatsineranik aammalu ukiumut missingersuutip akuersissutigineqarsimameranut tunngatillugu.

Imm.2-mut:

Aalajangersagaq innersuussivoq aningaasaateqarfiit aningaasaataannik inissiinissamik aalajangersakkanut, tak. Justitministeriap nalunaarutaa nr. 49, 15. marts 1987, allanngortinneqartoq nalunaarut nr. 144, 16. 1988-meersukkut aammalu nalunaarut nr. 294, 3. maj 1989-simeersukkut. Matumani Inatsisartut inatsisaanni siunniussimaneqannginnera pissutigalugu kommunip inuussutissarsiornernut aningaasaliinissaannut periarfissaqarnerisa aalajangersorneqarnissaanut tunngatillugu, kommunip aningaasaataanik inissiinissamik periarfissat obligationinut killilerneqarput, oqaatigineqassaarlu justitministeriap nalunaarutaani tamanna ilaatinneqanngimmat aningaasaateqarfiit aningaasaataannik obligationinut allanngortinneqarsinnaasunut tunngatillugu.

§ 46-mut

Aalajangersagaq maannamut atuuttumut § 45-mut naapertuuppoq.

Aalajangersakkakkut aalajangerneqarpoq § 47-mi aalajangersagaq peqatigalugu qanoq ililluni kommunip naatsorsuutai suliarineqartassasut akuersissutigineqartassasullu.

Imm. 1-mut:

Aningaasaqarnermut ataatsimiititaliaq kommunalbestyrelsimut naatsorsuutinik saqqummiussisuusassaaq. Naatsorsuutit kommunip aningaasaqarnikkut pisussaaffiinik aammalu missingersuutit aamma naatsorsuutini nikingassutinik oqaaseqaatinik nassuiaataasunik imaqartassapput. Naatsorsuutit saqqummiunneqarnerini taamatuttaaq oqaaseqaatinik ilaqartinneqartassapput aningaasaqarnikkut iliuuserisat allat attuumassuteqartunik, ilaatigut kommunip aningaasaliissuteqarnissamut pilersaarutai aammalu ukiunut arlalinnut missingersuutit il.il. ilaatinneqassallutik, assersuutigalugu ukiunut arlalinnut sivisussuseqartunik suliniutinik aammalu allanik sivisunerusumik suliassanut tunngassuteqartunik ilaqartinneqartarlutik.

Imm. 2-mut:

Aalajangersakkap erseqqissarpaa naatsorsuutit saqqummiunneqarnerani kommunalbestyrelsip inissisimanera. Naatsorsuutit imm. 1 naapertorlugu aningaasaqarnermut ataatsimiititaliami saqqummiunneqartussaammata, taamaaliornikkut kommunalbestyrelsimi aalajangiinissamut periaatsit aqqutigissanngilaat. Akerlianik kommunalbestyrelsip taamaallaat isummerfigissavaa, kommunalbestyrelsip kissaatigissappagu naatsorsuutini immikkoortut imaluunniit naatsorsuutinut kukkunersiorneqarnerannut atatillugu oqaaseqaatit, tamatumalu kingorna kukkunersiuisunut aammalu Naalakkersuisunut nassiunneqartassallutik.

Imm. 3-mut:

Aalajangersakkakkut aalajangerneqarpoq naatsorsuutit saqqummiunneqarneranut Naalakkersuisut sukumiinnerusumik aalajangersagaliortassasut ilaatigut naatsorsuutit saqqummiunneqarnissaanut killissarititaq ilanngullugu.

§ 47-mut

Imm 1-mut:

Aalajangersakkap erseqqissarpaa siusinnerusuummi aalajangersakkamut sanilliullugu, kommunalbestyrelsi oqaaseqaatinut isummerlunilu naatsorsuutinut naggataarutaasumik akuersissasoq. Aalajangersagaq maannamut atuuttumut § 45, imm. 4-mut naapertuuppoq, ukiumut naatsorsuutinut kukkunersiuisut oqaaseqaataannut tunngatillugu.

Aalajangersagassatut siunnersuut malillugu kommunalbestyrelsip kukkunersiuisut oqaaseqaataasa akineqarnissaa allaffeqarfimmut ataatsimiititalianulluunniit isumagisassanngortissinnaanngilaa.

Ukiup naatsorsuiffiup ingerlanerani kukkunersiuineq pillugu § 48-mut, imm. 3-mut 5-imullu oqaaseqaatit innersuussutigineqarpput.

Imm. 2-mut:

Aalajangersagaq maannamut atuuttumut § 45, imm. 5-imut naapertuuppoq kukkunersiuisut nalunaarutaat kommunalbestyrelsillu tassunga akissutaannut tunngatillugu. Kommunalbestyrelsip aalajangernera kukkunersiuisullu oqaaseqaataat nakkutilliisutut oqartussanut nassiunneqartassapput, siunissami nakkutilliisutut oqartussat aamma Kommunit Nakkutilliisoqarfiata immikkoortinneqarnissaasa kingunerannik.

Imm. 3-mut:

Aalajangersagaq naatsorsuutit missingersuutitulli kommunip innuttaanit takuneqarsinnaanissaanut tunngatillugu maannamut § 42-mut atuuttumut naapertuuppoq.

Takuneqarsinnaanera arlalitsigut qulakkeerneqarsinnaavoq minnerpaamilli allaganngorlugu takuneqarsinnaanngorlugu kommunip allaffiani, kiffartuussiveqarfinni, nunaqarfinni allaffinni assigisaanilu saqqumitinneqartassaaq.

§ 48-mut

Aalajangersagaq maannamut atuuttumut § 46-mut naapertuuppoq.

Imm 1-mut:

Kukkunersiuisunut immikkut piumasaqartoqanngilaq taamaallaalli naalagaaffimmit Naalakkeruisuniillu akuerisaasimassapput. Siunissami kommuninngortussat angissusaat naapertorlugit Naalakkersuisut isumaqarput kukkunersiuisut sulinerannut annertunerusumik piumasaqaateqartoqassasoq siunnersuutigalugulu siunissami kukkunersiuisartunit naalagaaffimmit akuerisaasunit taamaallaat inatsisit malillugit kommunini naatsorsuutit kukkunersiorneqartalissasut. Kukkunersiuisut sulinerminni nakkutigissavaat kommunip aalajangernerinut akisussaaqataalinnginnissartik. Kukkunersiuisut naalagaaffimmit akuerisaanissaannik piumasaqarneq aatsaat atuutilissaaq 1. januar 2012, tak. § 72, imm. 3.

Imm. 2-mut:

Kommunip kukkunersiuisuisa akisussaaffigaat misissussallugu nalinginnaasumik aamma immikkut naatsorsuinermut kukkunersiuinermullu aalajangersakkat malinneqarnersut.

Imm. 3-mut:

Aalajangersakkap kukkunersiuisut naalagaaffimmit akuerisaasut nalunaaruteqaqqaaratik karsi misissussallugu aammalu kommunip naatsorsuuserinikkut ingerlatsinera sukumiisumik misissussallugu aammalu misissuinermi periaatsini kommunip atulersimasaani suleriaatsip eqqortup qulakkeerneqarnissaa anguniassallugu.

Imm. 4-mut:

Aalajangersakkakkut ersseqqissarneqarpoq kommunalbestyrelsi kukkunersiuisunut paasisitsinissamik pisussaaffeqaannanngitsoq aammali uppernarsaanissamik pisussaaffeqartoq. Kingulliullugu taaneqartumi kukkunersiuisut namminneerlutik uppernarsaatissanik ujaasisarnissaannut pingaaruteqarpoq. Paasissutissat pisariaqartut tassaasinnaapput naatsorsuutinik allattuinermi ilanngussat imaluunniit angalanerni aningaasartuutit.

Imm. 5-mut:

Aalajangersakkakkut erseqqissisinneqarpoq kukkunersiuinermi oqaaseqaatit kukkunersiuinernut ingerlaavartunut atatillugu tunniunneqarsimasut ukiumut naatsorsuutit kukkunersiorneqarneranni oqaaseqaatitut suliarineqartassasut.

§ 49-imut

Imm 1-mut:

Aalajangersagaq maannamut atuuttumut § 47-mut naapertuuppoq.

Kommunimi nakkutilliinnermut tunngatillugu kasse og regnskabsregulativimut malitsitsinermut apeqqummut ilaanngilaq kisiannili malinninnginneq kukkunersiuisut oqaaseqaateqarnerannik kinguneqarsinnaalluni, tamatumunngalu nakkutilliisuutitanit oqartussanit malersorneqarsinnaalluni, imaammat kommunalbestyrelsi kukkunersiuisut oqaaseqaataannik inatsit naapertorlugu malitsitsinissaminik pisussaatitaammat tak. § 48, imm. 1 aamma 2, aammalu imm. 5.

Imm. 2-mut:

Aalajangersagaq maannamut atuuttumut § 48-mut naapertuuppoq, siunertaralugulu qulakkiissallugu kommunit kontolersuinerinut, naatsorsuutit saqqummiunneqarnerinut aammalu kukkunersiuisut suleriaasaannut aalajangersakkanik assigiiaartunik suliaqartoqarsinnaasoq. Assigiiaartumik aalajangersagaqarnerup siunertaraa minnerunngitsumik qulakkiissallugu assersuunneqarsinnaasunik aningaasaqarnikkut pissutsinik paasissutissanik tunniussisoqarsinnaaqqullugu, kommunit suliaasa ingerlanneranut atatillugu. Taamaattut aalajangersakkat pingaarutillit ilaat missingersuusiornermi aamma naatsorsuusiornermi periaatsini pioreersumi nassaassaareerput, maanna Kanukoka-p Namminersornerullutik Oqartussat sinnerlugit aqutaanni. Pisortatigoortumik nalunaarut aqqutigalugu aalajangersakkami malittarisassat kommuninit saneqqunneqarsinnaajunnaassapput, taamattaaq aalajangersakkat assersuutigalugu piffissamik killiliinernik ilassuteqartinneqarsinnaapput.

§ 50-imut

Imm 1-mut:

Aalajangersagaq maannamut atuuttumut § 49, imm. 1-mut naapertuuppoq, taamaattorli ilassutigalugu nunaqarfiit amerlanerusulluunnit nunaqarfimmi aqutsisunik kattussisinnaaneq siunnersuutaalluni. Aammattaaq Naalakkersuisut siunnersuutigaat nunaqarfiit sorliit ataatsimut nunaqarfimmi aqutsisoqassasut kommunalbestyrelsip aalajangissagaa. Nunaqarfiit sorliit ataatsimoorussamik nunaqarfimmi aqutsisoqassanersut kommunalbestyrelsip

nammineerluni aalajangissavaa, taamatuttaaq kommunimi nunaqarfinni siulersuisut 3-nik imaluunniit 5-nik ilaasortaqassanerinik aalajangernissaq ammatinneqartoq.

Imm. 2-mut:

Aalajangersagaq nutaajuvoq ilanngunneqarnissaalu siunnersuutigineqarpoq nunaqarfiit amerlasuunik innuttaqartut imaluunniit avinngarusimasuniittut immikkut akuersissuteqarfigineqarsinnaasut ataatsimoorussamik nunaqarfinni aqutsisoqarnermut tunngatillugu. Immikkut akuersissut kommunalbestyrelsimit Naalakkersuisunut qinnuteqareernikkut tunniunneqartassaaq, Naalakkersuisut piumasaqaatit naammassineqarsimasutut isumaqarfigippatigit.

Imm. 3-mut:

Siunertaqarsorinanngilaq nunaqarfiit aqutsisuisa siulittaasuannik qinersinermi sukumiisunik periaaseqartoqarnissaa, tamatumani qinersinermi nunaqarfiit aqutsisuisa ilaasortaasa ikinneri pissutigalugit borgmesterimut qinersinermit pingaartorsiorpalunnginnerusumik ingerlanneqarsinnaassammat.

Nunaqarfiit aqutsisuinut kikkut qinerneqarsinnaanerinik aalajangersakkat immikkut qinersinermi inatsisikkut aalajangersarneqarput.

Imm. 4-mut:

Aalajangersagaq maanna Inatsisartut inatsisaanni atuuttumi § 3, imm. 1-mut naapertuuppoq. Inatsisissatut siunnersuummi nunaqarfinni siulersuisut kommunalbestyrelsimit pisinnaatitsineq naapertorlugu sulisarnissaasa erseqqissarneqarnissaa Nasalakkersuisunit pingaartinneqarpoq. Taamaattumik Naalakkersuisut siunnersuutigaat nunaqarfiit aqutsisui pillugit aalajangersakkat Inatsisartut inatsisaanni immikkut kapitalimi katersorneqassasut.

Aalajangersagarli kommunalbestyrelsip qanoq atsigisumik pisinnaatitsisinnaaneranut tunngassuteqartuni nalornissutigineqarsimavoq. Pingaartumik nalornissutigineqarsimavoq kommunalbestyrelsi aningaasaliissutinik qanoq amerlatigisunik atuinissamik nunaqarfinnut pisinnaatitsisinnaanersoq. Tamatuma kingunerisaanik nunaqarfinni siulersuisut pisinnaatitsissummik tunineqarpata kommunalbestyrelsip allaffissornikkut nukissat nunaqarfiit aqutsisuinut qulakkeertussaavai, kommunalbestyrelsip nunaqarfinni siulersuisunik nakkutilliisussaatitaanera pissutigalugu. Kommunalbestyrelsi nunaqarfinni siulersuisunut aalajangiisinnaanermik tunniussaqartoq allaffissornikkut suliassanik naammassinnissinnaanermik qulakkeerinnissimanngitsoq siunnersuummi kapitali 9 naapertorlugu akisussaatinneqarsinnaavoq.

§ 51-imut

Aalajangersagaq maannamut atuuttumut § 50-imut naapertuuppoq.

Imm. 1-mut:

Aalajangersagaq suleriaasissamut minnerpaanik piumasaqaatinik arlalinnik saneqqunneqarsinnaanngitsunik atuutilersitaqarpoq.

Tunngaviusumik ingerlatsinikkut malitsitsinermi periaatsit pineqartut tassaapput ingerlatsinermi inatsisip piumasaqaatai naapertorlugit suliat.

Kommunalbestyrelsimi sulinertut nunaqarfinni siulersuisut atuunnerat pillugu periaatsinik aalajangersakkanik sukumiisunik atuutitsisoqarnissaa tulluartuusorinanngilaq. Aalajangersagaq aamma periarfissiivoq nunaqarfimmit nunaqarfimmut pissutsit assigiinngiiaartorujussuusut kommunalbestyrelsit pitsaanerusumik sillimaffigisinnaalernissaannut. Nunaqarfinni siulersuisut suleriaasissaasa aalajangersarneqarnerat kommunalbestyrelsimi suliarineqassaaq, takussutissaassallunilu nunaqarfiit annertunerusumik aalajangiisinnaanermik pisinnaatinneqarnerinik, taamaattumillu allaffissornikkut suleriaatsinik erseqqissunik nunaqarfinni siulersuisut sulinerannut aalajangersagaqarnissaq pingaaruteqarpoq, aalajangersakkanut kommunalbestyrelsip nammineerluni periaasiinut ataqatigiissaarneqarsimasunik.

Nunaqarfinni siulersuisut suleriaasissaasa aalajangersarneqarnerannut atatillugu nunaqarfinni siulersuisut tusarniaafigineqarsimasariaqarput, tak. § 52. Nunaqarfinni siulersuisuni ilaasortat akissasiaqartinneqarnerat § 55 naapertorlugu ingerlanneqartassaaq.

Imm. 2-mut:

Aalajangersagaq nalinginnaasumik aalajangeeqataasinnaanermut aalajangersagaavoq, ilanngunneqarlunilu nunaqarfinni siulersuisut annertunerusumik pisinnaatinneqarnissaannik ilimasuuteqarnerup kingunerisaanik.

Aalajangersakkakkut aammattaaq erseqqissarneqarpoq Naalakkersuisut kommunini arlalinni allaffinni allaffissornikkut ikiortit nunaqarfinni siulersuisunut aamma ilaasortaasunut ajornartorsiuteqartarneq pillugu apeqqutilliisoqartarsimammat.

Imm. 3-mut:

Aalajangersagaq imaqarpoq kommunalbestyrelsimi ataatsimiititaliani ikinnerussuteqartut pisinnaatitaaffii pillugit nunaqarfinni siulersuisuni ilaasortanut aamma atuutinneqarnissaanik qulakkeerinnimmat, tak. § 30.

Aalajangersagaq taamaallaat atuuppoq suliassani nunaqarfinni siulersuisunut aalajangiisinnaanermik oqartussaafilerneqarsimasuni. Suliassani nunaqarfinni siulersuisut siunnersuutip § 52-a naapertorlugu, kinguliiniittut tak., kommunalbestyrelsimut innersuussummik imaluunniit tassunga oqaaseqaateqartoqartillugu, nunaqarfinni siulersuisuni ikinnerussuteqartut ikinnerussuteqarluni oqaaseqaammik imaqarniliamut ilanngusisinnaatitaaneq atorsinnaavaat.

§ 52-imut

Aalajangersagaq maannamut atuuttumut § 51-imut naapertuuppoq.

Aalajangersakkakkut aalajangersarneqarpoq nunaqarfinni siulersuisut nunaqarfimmi pissutsinut attuumassuteqartuni kommunalbestyrelsimut innersuussutinik nassitsisinnaatitaaffeqarnerinik. Aammattaaq aalajangersakkap kommunalbestyrelsi pisussaaffilerpaa kommunalbestyrelsimi suliassani nunaqarfinni pissutsinut attuumassuteqartuni suliaqarnerni nunaqarfinni siulersuisut tusarniaavigineqartarnissaannik.

§ 53-imut

Aalajangersagaq maannamut atuuttumut § 52-imut naapertuuppoq.

Imm. 1-imut:

Aalajangersakkakkut aalajangerneqarpoq nunaqarfinni siulersuisut aatsaat aningaasartuuteqarsinnaasut kommunalbestyrelsip aningaasaliissuteqareerneratigut. Aalajangersagaq § 43, imm. 2-mut attuumassuteqarpoq kommunalbestyrelsimi aningaasaliisinnaanermut pisinnaatitaaffimmik aalajangersaasumik.

Taamaalilluni kommunalbestyrelsit nunaqarfinni siulersuisunut aningaasaliisinnaanngillat pisinnaatitsissutip imm. 3 naapertorlugu tunniunneqarsimasut avataasigut.

Imm.2-mut:

Aalajangersakkap siullertut nalunaarpaa, kommunip missingersuusiaatigut nunaqarfinni siulersuisut ingerlatsinikkut aningaasaliiffigineqarsinnaasut. Aalajangersakkap aappaattut nalunaarpaa aningaasaliissutaasunik nunaqarfinni siulersuisut atuisinnaatitaanerat.

Aalajangersakkalli nalunaanngilaa nunaqarfinni siulersuisuni allaffissornikkut pisinnaassuseq qanoq annertutigissanersoq, tamanna aalajangerneqassammat § 50, imm. 4 aallaavigalugu.

Illuatigulli atuisinnaatitaaneq pisariaqartitsivoq, soorlu imm.1 naapertorlugu ingerlaannartumik aalajangiisinnaanermik pisinnaatitsinerup kingunerissagaa atuisinnaatitsineq pissasoq aningaasaliissutaasutut killigititaasut iluanni.

Taamaalilluni massakkutulli nunaqarfiit siulersuisuinut aalajangiisinnaatitaanermik tunniussisoqarsinnaavoq aningaasaqarnikkut akisussaaffeqarnermik malitseqanngikkaluartumik. Nunaqarfinni siulersuisut aningaasaliissutit atorneqarsinnaatitaasut nungullugit atorsimalerpatigit, aalajangiisinnaassuseq aningaasaliissutaasunut taakkununnga attuumassuteqartoq taamaalilluni aamma atortussaajunnaassaaq. Kommunalbestyrelsili, soorlu nalunaarneqartutut iliuuseqarsinnaassusermik annertunerusumik imm. 2 naapertorlugu aningaasatigut pisinnaatitsineq qaangerlugu tunniussinnaassavaa imaluunniit aningaasanik atorneqarsinnaasunik amerlanerusunik ilassutitut aningaasaliissuteqarsinnaalluni. Tamannali qaqutiguinnaq pisinnaasariaqarpoq, siunertaammat aningaasanik atuisinnaasunik illikartitsinerup nunaqarfinnut allaffissornikkut oqilisaassutaanissaa killiliilluni aqutsinerup atulerneratigut. Killiliilluni aqutseriaatsimut akerliussaaq aqutsinikkut ingerlanerliorneq pissutigalugu aalajangiisinnaassusermik tunniussinikkut ingerlanerliorneq "nersorniarneqassappat". Aningaasat atorneqarsinnaatitaasut ingerlatsinerliorneq pissutigalugu nungunneqarpata tamatigut kingunerisariaqarpaa ilassutissanik aningaasaliissuteqaqqittoqannginnera aammalu ilassutaasumik aalajangiisinnaassusermik tunniussisoqaqqinnginnera. Aningaasaliissutit killingi tikillugit atuineq pisassaaq pineqartumik inatsisiliornermi killiliunneqartut iluanni. Tamatumani pingaaruteqarput kultureqarnermut aamma qaammarsaanerup kiisalu isumaginninnerup tungaatigut attuumassuteqartuni aningaasanik atuisinnaatitsissutissanik illuartitsisarnerit.

Imm. 3-mut:

Aalajangersakkap siunertaraa nunaqarfinni siulersuisut suliaannik kommunalbestyrelsip ilisimasaqarnissaa qulakkiissallugu. Nunaqarfinni siulersuisut suleriaasissaanni ilassutaasunik ilanngusisoqarsinnaassaaq uppernarsaatit misissorneqartarneranni iliuusissanik annertunerusunik, aamma imm. 2 naapertorlugu taaneqartuni nunaqarfik aningaasatigut piginnaatinneqarsimanngikkaluartoq.

§ 54-imut

Imm. 1-imut:

Aalajangersagaq maannamut atuuttumut § 53-imut naapertuuppoq, nunaqarfinni siulersuisut siulittaasuat tassaasoq nunaqarfinni siulersuisut ingerlatsinerannut akisussaasoq. Inatsimmi innersuussutigineqarput inatsimmi matumani malittarisassat aammalu pisortat ingerlatsineranni sulat suliarineqartarnerat pillugu Inatsisartut inatsisaannut aammalu pisortat ingerlataanni ammasumik ingerlatseriaaseqarneq pillugu inatsit.

Aalajangersakkap aamma kingunerissavaa nunaqarfinni siulersuisut siulittaasuata kommunalbestyrelsimut attaveqaatitut atuuttuaannartussaanera.

Imm. 2-mut:

Aalajangersagaq nutaajuvoq ilanngunneqarnissaalu siunnersuutigineqarluni erseqqissarniarlugu kommunalbestyrelsi nunaqarfinni siulersuisunik nakkutilliisuusussaasoq. Massakkumut nakkutilliisuutitatut oqartussat nunaqarfinni siulersuisunik toqqaannartumik nakkutilliinissaminnik periarfissaqassanngillat kisiannili nakkutilliineq kommunalbestyrelsi aqqutigalugu ingerlattussaallugu. Naalakkersuisut nunaqarfinni siulersuisut suliaannik paasisaqarusullutik kissaateqarpata tamanna kommunalbestyrelsi aqqutigalugu pisassaaq. Kommunalbestyrelsi nunaqarfinni siulersuisunut pisinnaatitsisuuvoq, kisiannili taamaaliornikkut suliat, aningaasaliissutit aamma pisinnaatitsissutit naapertorlugit ingerlanneqarnerannik akisussaaffimmik tunussisinnaanngilaq.

§ 55-imut

Imm. 1-imut:

Aalajangersagaq maannamut atuuttumut § 17, imm. 1-imut naapertuuppoq, nunaqarfinni siulersuisut akissarsiaqartinneqarneri pineqartillugit.

Naalakkersuisut aalajangersakkami siunnersuutigaat kommunalbestyrelsini ilaasortat akissarsiaqartinnerat pillugu aalajangersakkamiit aalajangersagaq avissaartinneqassasoq, taamaaliornikkut ersarissarniarlugu nunaqarfinni siulersuisut kommunalbestyrelsip akisussaaffigigaat.

Imm. 2-mut:

Aalajangersagaq maannamut atuuttumut § 17, imm. 2 naapertuuttumik nunaqarfinni siulersuisut ilassutinik akissarsiaqartissinnaasariaqarput. Ilassutitut akissarsiat kommunalbestyrelsimit akuerineqartut ataasiakkaat nalilersuiffigereernerisigut tunniunneqarsinnaapput. Naliliinerni siulittaasup akisussaaffia aamma suliaqarnikkut nammatai immikkut isiginiarneqartassapput.

Imm. 3-imut:

Naartunermi, erninermi meeravissiartaarnermilu inatsit tamatumunnga tunngasoq naapertorlugu nunaqarfinni siulersuisut sulinngiffeqarnissamut pisinnaatitaapput akissarsiaminnik annaasaqaratik. Tamanna Inatsisartut Aaqqissuusseqqinneq pillugu Ataatsimiititaliaata kissaataa malillugu ilanngunneqarsimavoq.

§ 56-imut

Imm. 1-imut:

Aalajangersakkap maannamut inatsisartut inatsisaanni § 54, imm.1 taarserpaa.

Inatsisissatut siunnersuut manna naapertorlugu Naalakkersuisut kommunit ingerlatsinerinik nalinginnaasumik nakkutilliisuussapput. Naalakkersuisut kommuninik aqutsinermi malittarisassanik tigusisartussaapput, tak. § 1, imm. 4, kommunalbestyrelsip qaqugukkut sumilu ataatsimiinnissaanik ilisimatinneqartassallutik, tak. § 8, imm. 1 aamma 3, kommunalbestyrelsip matoqqasumik ataatsimiinnerani peqataatitaqarsinnaallutik tak. § 9, imm. 4, aamma Naalakkersuisut kommunalbestyrelsit ataatsimiinnerannit imaqarnilianik tigusaqartartussaapput tak. § 16, imm. 3, kiisalu Naalakkersuisut ilisimatinneqartassapput kukkunersiuisut nalunaarutaannut akissuteqaaatit pillugit, tak. §§ 46 imm. 2 aamma 47, imm.2.

Imm.2-mut:

Aalajangersagaq nutaajuvoq, ilanngunneqarnissaa siunnersuutigineqarpoq immikkut naammagittaalliornissamut periarfissaqartoqarnera erseqqissarniarlugu imaluunniit suliani aalajangersimasuni nakkutilliinermik oqartussaqarfeqartoqartillugu Naalakkersuisut pineqartuni nakkutilliisuusinnaassanngitsut. Assersuutigalugu taaneqarsinnaavoq inunnik isumaginninnermi inatsit naapertorlugu Isumaginninnermi sulianut Naammagittaalliuuteqartarfimmi aalajangiiffiusimasumi naammagittaalliuutigineqarsimasut taamaalilluni nakkutilliisuutitatut oqartussaasunut anngunneqarsinnaasarnatik.

Imm. 3-mut:

Aalajangersagaq nutaajuvoq, ilanngunneqarnissaa siunnersuutigineqarpoq Naalakkersuisut nakkutilliisussaatitaanerata atorfinitsitsinermi malittarisassat pineqartillugit atuutinnginnera erseqqissarniarlugu.. Apeqqutit atorfinitsitsinermi malittarisassanut tunngasut pineqartillugit tamakku atorfinitsitsisarnernik isumaginnittunut innersuunneqartassapput.

§ 57-imut

Imm. 1-imut:

Aalajangersagaq nutaajuvoq, siunnersuutaallunilu ilanngunneqassasoq Naalakkersuisut nakkutilliinerannut atatillugu atortut kommunalbestyrelsimit piumasarineqartut pinngitsoorani tunniuneqartartussaanerat erseqqissarniarlugu. Kommunalbestyrelsi aamma pisussaavoq nakkutilliisuutitatut oqartussanut uppernarsaatit piumasarineqartut tamaasa tunniuttassallugit, pineqartut qanorluunniit ilusilerlugit saqqummiunneqaraluarpata.

Imm. 2-mut:

Aalajangersagaq nutaajuvoq, siunnersuutaallunilu ilanngunneqassasoq kommunit aningaasaqarnikkut ingerlatsinerini immikkut pisoqartillugu Naalakkersuisut misissuinissaaminnut periarfissaqaqqullugit.

Imm. 3-mut:

Aalajangersagaq nutaajuvoq, siunnersuutaallunilu ilanngunneqassasoq sulianik pilertornerusumik Naalakkersuisut Kommunit Nakkutilliisoqarfiannut apuussisinnaanerat periarfissaqaqqullugu, piffissaliussap kissaatigineqartup iluani Naalakkersuisut nakkutilliinermut atatillugu uppernarsaatinik tigusaqarqarsimatinnagit. Piffissamik aalajangiineq pisut ataasiakkaat naapertorlugit ingerlanneqartassaaq aammalu suliap qanoq paasiuminartiginera sumiiffimmilu sumi inissisimanera apeqqutaatillugit.

Imm. 4-mut:

Aalajangersagaq nutaajuvoq, siunnersuutaallunilu ilanngunneqassasoq kommunalbestyrelsip suliamik paasissutissiineranut atatillugu sulinerup iluani pappilissat, sulinerup iluani pappilissatut inissisimaneri innarlinngikkaluarlugit Naalakkersuisunut tunniunneqarsinnaaniassammata.

Imm. 5-imut:

Aalajangersagaq nutaajuvoq, siunnersuutaallunilu ilanngunneqassasoq nakkutilliinermut atatillugu Naalakkersuisut suliaqarneranni atugassarititanik pitsaanerpaaniik qulakkeerinnittoqaqqullugu. Aalajangersakkap qulakkiissavaa nakkutilliinermi suliamut imaluunniit suliarineqarusuttumut tunngasuni ilisimasaqassutsip aammalu suliami paasissutissat eqqortut paasissutissiissutigineqarsinnaaqqullugit.

Nakkutilliisutut oqartussat assersuutigalugu akileraartarnermi paasissutissanik oqartussanit attuumassuteqartunit piumasaqartarsinnaassapput.

§ 58-imut

Aalajangersagaq nutaajuvoq, siunnersuutaallunilu ilanngunneqassasoq Naalakkersuisut nalinginnaasumik nakkutilliisuusuunermik suliaqarnerat erseqqissarniarlugu, taamaalillunilu taamaallaat suliap suussusia naapertorlugu Kommunit Nakkutilliisoqarfiannut anngunneqarnissaa aalajangersinnaallugu pineqaatissiisoqarnissamik isumaliuteqarnissaq siunertaralugu.

§ 59-imut

Aalajangersagaq maannamut atuuttumut § 55-imut naapertuuppoq.

Imm. 1-imut:

Aalajangersakkakkut aalajangerneqarpoq Kommunit Nakkutilliisoqarfiata katiterneqarnerata qulakkiissagaa ingerlaavartumik sulinerup Naalakkersuisunut Inatsisartunullu annertuumik attuumassuteqannginnissaa.

Imm. 2-mut:

Nalinginnaasumik nalunaarneqarpoq ilaasortap peqataasinnaannginnerani sinniisussap aggersarsinnaaneranik periarfissaqarnera aammattaaq aalajangeeqataasinnaannginnermi sinniisussap aggersarneqarsinnaanera. Sinniisussat toqqarneqarnerini imm. 1-imi pineqartuni oqaasissaqartitaasut aamma ilaasortanik nalinginnaasunik toqqaasuusut toqqaasuussassapput.

§ 60-imut

Aalajangersagaq maannamut atuuttumut § 56-imut naapertuuppoq.

Imm. 1-imut:

Aalajangersakkakkut aalajangerneqarpoq minnerpaamik ukiumut ataasiarluni ataatsimiittoqartassasoq. Aalajangersakkakkut aamma aalajangiunneqarpoq Kommunit Nakkutilliisoqarfiat ataatsimiissinnaasoq siulittaasup imaluunniit ilaasortat pingasut tamanna pisariaqartippassuk, taamaattorli minnerpaamik ukiumut ataasiarluni. Siulittaasoq ataatsimiigiaqqusisussaatitaavoq, tak, imm. 2, taamaalillunilu aamma ilaasortat pingasut piumasaqarneritigut ataatsimiigiaqqusisussaatitaalluni.

Imm. 2-mut:

Siulittaasoq ataatsimiinnernut aggersaasussaatitaavoq aammalu piffissamik sumilu ataatsimiittoqarnissaanik aalajangiisussaalluni.

Imm. 3-mut:

Aalajangersakkakkut aalajangersarneqarpoq siulittaasoq pisussaasoq ataatsimiinnermi suut suliarineqassanerinik Kommunit Nakkutilliisoqarfiata ilaasortai ilisimatissallugit aammalu paasissutissat suliassanut attuumassutillit nassiussorneqarnissaat isumagissallugu.

Imm. 4-mut:

Kommunit Nakkutilliisoqarfiata siulittaasuata ataatsimiinnermi aalajangernerit imaqarniliorneqarnissaat pisussaaffigaa ataatsimiinnerit tamarmik naammassinerisa kinguninnguagut erngertumik ilaasortanit peqataasunit atsiorneqartartussamik. Kommunit Nakkutilliisoqarfianni ilaasortaq kinaluunniit imaqarniliamut allaanerusumik isumaqarnerminik ilanngusisinnaatitaavoq, soorlu kommunalbestyrelsimi ilaasortat pisinnaatitaaffiat § 16, imm.1 naapertorlugu.

§ 61-imut

Aalajangersagaq maannamut atuuttumut § 57-imut naapertuuppoq.

Imm. 1-imut:

Aalajangersakkakkut aalajangerneqarpoq Kommunit Nakkutilliisoqarfiat aalajangiisinnaassuseqartoq, Nakkutilliisoqarfiup siulittaasua aammalu minnerpaamik ilaasortat marluk najuuppata.

Imm. 2-mut:

Aalajangersakkakkut aalajangerneqarpoq aalajangernerit amerlanerussuteqarnikkut pisassasut. Aamma aalajangersakkakkut aalajangerneqarpoq taasinerni naligiittoqartillugu siulittaasup taasinera aalajangiisuusassasoq.

Aalajangersakkakkuttaaq aalajangerneqarpoq Nakkutilliisoqarfiup ilaasortaata kialuunniit aalajangerniarnerup ingerlanneqarnera unitsissinnaagaa suliaq Naalakkersuisunut tamarmiusumut aalajangigassanngoqqullugu piumasaqarnermigut.

Imm. 3-mut:

Aalajangersakkakkut erseqqissarneqarpoq kommunimi kommunalbestyrelsimut ilaasortaaffigisami pissutsit Nakkutilliisoqarfimmi oqaluuserineqartillugit tamanna aalajangeeqataasinnaajunnaarnermik kinguneqartassasoq.

§ 62-imut

Aalajangersagaq maannamut atuuttumut § 58-imut naapertuuppoq.

Imm. 1-imut:

Aalajangersakkap Nakkutilliisoqarfiup siulittaasua suliarineqartuni apeqquserneqarsinnaanngitsuni suliarineqartunilu kinguartinneqarsinnaanngitsuni aalajangiisinnaanngorlugu pisinnaatippa.

Aammattaaq aalajangersarneqarpoq Nakkutilliisoqarfiup siulittaasuata Nakkutilliisoqarfiup aalajangigaasa piviusunngortinneqartarnissaat akisussaaffigigaa.

Imm. 2-mut:

Nakkutilliisoqarfiup siulittaasuata aalajangigai Nakkutilliisoqarfiup ataatsimiinnerani tulliuttumi saqqummiunneqartassapput.

Imm. 3-mut: Aalajangersakkami allanneqarpoq Nakkutilliisoqarfiup allattoqarfia Naalakkersuisunit toqqakkanik inuttaqartinneqassasoq, taamaattorli Naalakkersuisut allaffissorneranni ilaatinneqarnissaat pisariaqanngitsoq.

Allattoqarfiup sulinermini Naalakkersuisunut pituttorsimannginnissaa naatsorsuutigineqarpoq, taamaalillunilu Nakkutilliisoqarfiup siulittaasuanut taamaallaat attuumassuteqarluni aammalu ingerlatsinermi aalajangersakkat nalinginnaasut tunngavigalugit suliassani ataasiakkaani suliassallu aalajangersimasut ilaanni allattoqarfik sinnerluni aalajangiisinnaanngorlugu kissaateqartarsinnaalluni..

§ 63-imut

Aalajangersagaq maannamut atuuttumut § 60-imut naapertuuppoq, aalajangersarlugulu Nakkutilliisoqarfiup sulinerani aningaasartuutit landskarsimit akilerneqartassasut.

§ 64-imut

Aalajangersagaq maannamut atuuttumut § 61, imm. 1 aamma 2-mut naapertuuppoq.

Imm. 1-imut:

Aalajangersakkap naqissuserpaa, kommunalbestyrelsip, aningaasaqarnermi ataatsimiititaliap imaluunniit taakkua ilaasortaannit imaluunniit ataatsimiititaliap ataavartup, imaluunniit taassuma ilaasortaanit aalajangiinerit Nakkutilliisoqarfiup atorunnaarsissinnaagai.

Imm. 2-mut:

Aalajangersakkap Nakkutilliisoqarfik periarfissippaa erseqqinnerusumik piumasarisat arlallit tunngavigalugit kommunimi aalajangikkamik atorunnaarsitsigallarsinnaanngorlugu, tassa imm. 1 naapertorlugu atorunnaarsinneqavissaneranik aalajangerneqarnissap tungaanut.

Aalajangersagaq atulersinneqarpoq kommunip aalajangernera inatsisinik tulluartumik eqqortitsilluni aalajangiisoqarsimaneranik paasiniaanissamut Nakkutilliisoqarfik pisariaqartitaanik piffisalerumallugu, tassa aalajangernerup piffissap ingerlanerani piviusunngortinneqarsimanerata kinguneranik atorunnaarsitsisariaqalernissaq pinngitsoortumallugu.

Malittarisassakkut peqqussutigineqarpoq aalajangigaq piviusunngortinneqarsimasoq taamaallat atorunnaarsinneqarsinnaasoq piumasarisat erseqqinnerusumik tunngavissiissutit malillugit, tamannalu pissuteqarpoq aalajangigaq piviusunngortitaasimasoq aallaavittut innuttaasunit tatigineqarsinnaasariaqarmat.

Aalajangikkat piviusunngortinneqarsimasut atorunnaarsinnissaannut inerteqqut taamaattoq isumaqarfigineqarpoq killilertariaqartoq soorlu pissutsit nr.1-miitut 2-miittullu naammassineqarsimagaangata. Taamaalilluni tunngavissaqanngilaq ingerlatsinermi aalajangikkap inatsisitigut eqqunngitsup innuttaasup eqqunngitsuliorfigineqarsimasup atorunnaarsikkumallugu kissaatigisaata atorunnaarsikkallarnissaanut inerteqquteqarnissaq. Taamatut pisoqartillugu maalaaruteqarfissaqanngippat pingaarutilinnillu allanik mianerisassaqanngippat pingaartumik inuttaasunik allanik, aalajangernermik piviusunngortitsinerup kommunalbestyrelsip atorunnaarsitsinissaa piviusunngortittariaqanngilaa, taamaaliornikkullu innuttaasup inatsisitigut inissisimanera pitsaannginnerulersillugu.

Innuttaasumit atorunnaarsitsinissamik imaluunniit atorunnaarsitsigallarnissamik piumasaqaatit allagaanissaat piumasarineqarmat nalinginnaasumik ingerlatsiveqarfinnit aalajangernerit iluaqusiisut piviusunngortinneqarsimasullu atorunnaarsinnissaat pisariaqanngilaq.

§ 65-imut

Imm. 1-imut:

Aalajangersakkap maannamut atuuttuusup § 17, imm. 1 taarserpaa.

Akissarsiat suut matussusissaneraat inatsimmi toqqaannartumik allanneqassasut Naalakkersuisut siunnersuutigaat. Naalakkersuisut misilittagaqarfigaat akissarsiat aalajangersarsimasut suut matussusertarneraat sukumiinerusumik aalajangersarneqarsimannginneri pissutigalugit kommunini allaffissornikkut annertuumik ajornartorsiutigineqartartoq. Namminersorlutik inuussutissarsiuteqartunut, namminersortuni akissarsiaqarlutik sulisunut aammalu pisortat suliffeqarfiutaanni sulisut kommunimi qinikkatut sulinissamik sammisaqalernissaasa kajungernarnerulersinnissaa siunertaralugu akissarsiat aalajangersarneqarnerisa qaffasissusissaasa qulakkeerneqarnisaat siunertaasariaqarpoq. Akissarsiani aalajangersimasuni sulinerup annertussusaa soorunami eqqarsaatigineqartariaqarpoq. Naalakkersuisut imm. 7 naapertorlugu akissarsiat qaffasissusissaat pillugu nalunaarusiussapput.

Borgmesterip akissarsiai § 66, imm. 1, nr. 1-imi aalajangersagaavoq. Borgmesterip tulliinik akissarsiaqartitsineq pillugu § 66, imm. 1, nr. 2 innersuussutigineqarpoq.

Imm. 2-mut:

Aalajangersagaq maannamut atuuttumut § 17, imm. 2-mut naapertuuppoq, kommunalbestyrelsilu periarfissillugu ataatsimiititaliat ataavartut siulittaasuinut naliliinerit ataasiakkaat tunngavigalugit akissarsianik ilassutissanik aalajangersaasinnaaneranik. Aalajangersagaq eqqarsaatigineqarpoq atorneqartassasoq siulittaasoq suliassanik nalinginnaasutut suliarineqartussanit immikkuullarissuteqartunik suliaqaraangat.

Imm. 3-mut:

Aalajangersagaq maannamut atuuttumut § 18, imm. 4-mut naapertuuppoq, ilanngunneqarlunilu akissarsiat aalajangersimasut sinniisunut nuunneqarsinnaanerat qulakkeerumallugu sinniisoq kommunalbestyrelsimi sivikinnerpaamik qaammatinik marlunnik ilaasortaasimatillugu, ilaasortap aalajangersimasup ataatsimeeqataasinnaannginnera § 15, imm. 1-imut imaluunniit § 15, imm. 2-mut innersuussutigineqaraluarpalluunniit.

Imm. 4-mut:

Aalajangersagaq maannamut atuuttumut § 17, imm. 5-imut naapertuuppoq, aalajangersakkamullu imm. 4-mut assingusuulluni. Aalajangersagaq atuuttuuvoq kommunalbestyrelsimut ilaasortanut, ataatsimiititaliani ataavartuni sivikvinnerpaamik qaammatini 2-ni siulittaasuuffeqarsimasunut.

Imm. 5-imut:

Aalajangersagaq maannamut atuuttumut § 17, imm. 6-imut naapertuuppoq, aalajangersakkamilu qinigaasut atorfimmut tunngatillugu angalanermik ingerlataqartut, qanorluunniit akissarsiaqartinneqaraluarpata, uninnganermut aamma angalanermut ajunngitsorsiaqarnissamut pisinnaatitaanerannik periaaseq nalinginnaasoq ingerlateqqinneqarpoq.

Aalajangersagaq pingaaruteqarpoq kommunalbestyrelsimi aamma ataatsimiititaliat ataatsimiinneranni nunaqarfimmiut peqataasarneranni. Tassungali atatillugu eseqqissarneqassaaq Naalakkersuisut naatsorsuutigimmassuk kommunerujussuarni ataatsimiinnerni telekkut attaveqaatit annertunerusumik atorneqalissasut.

Imm. 6-imut:

Aalajangersakkap naqissuserpaa akissarsiat aalajangersimasut, akissarsianut ilassutit, ataatsimiinnersiat aamma sulinermi akissarsianik annaasaqarnernut matussutissat kiisalu taakkua akilerneqartarnerannut aamma missingersuusiortarnerannut aalajangersakkanik sukumiinerusunik Naalakkersuisut suliaqassasut. Akissarsiat amerlassusiisa aalajangersarneqarneranni aaqqissuusseqqinneq pillugu Inatsisartut aalajangernerat maannamut aningaasartuutit sanilliullugit sipaaruteqarnissanik kinguneqarnissaa aallaaviussaaq.

Akissarsianut aningaasartuutit taamaalilluni maannakkut kommunit aningaasartuutaannut killigititaasut qaangersinnaanngilaat.

Imm. 7-imut:

Aalajangersagaq maannamut atuuttumut § 17, imm. 8-mut naapertuuppoq, ilanngunneqarlunilu kommunalbestyrelsimut, nunaqarfiit aqutsisuinut, aammalu sumiiffinni siunnersuisoqartigiinni ilaasortaasut tamarmik naligiissinneqarnissaat qulakkeerumallugu.

Imm. 8-imut:

Naartunermi, erninermi meeravissiartaarnermilu inatsit tamatumunnga tunngasoq naapertorlugu kommunalbestyrelsit sulinngiffeqarnissamut pisinnaatitaapput akissarsiaminnik annaasaqaratik. Tamanna Inatsisartut Aaqqissuusseqqinneq pillugu Ataatsimiititaliaata kissaataa malillugu ilanngunneqarsimavoq.

§ 66-imut

Aalajangersagaq maannamut atuuttumut § 37-imut naapertuuppoq.

Imm. 1-imut:

Inatsisip matuma atulersinneqarneranut atatillugu kommunani qinikkanut akissarsiassat aalajangersarneqartarnerisa nalinginnaasumik allanngortiterneqarnissaat siunertaavoq.

Borgmesterit akissarsiaasa aalajangersarneqartarneranni borgmesterip kommunalbestyrelsimi ilaasortatut sulinera sillimaffigineqariissaaq.

Nr.2-mi aalajangersagaq maannamut atuuttumut § 37, imm. 2-mut naapertuuppoq, borgmesterit tulliisa aammalu pisariaqassappat kommunalbestyrelsimi ilaasortat allat borgmesterit peqataasinnaannginnerini atuutsinneqarneri pillugit malittarisassanik aalajangiinissaq Naalakkersuisunit isumagisassanngorlugu, tak. § 23, imm. 4-mut nassuiaatit.

Imm.2-mut:

Aalajangersagaq maannamut atuuttumut § 63, imm. 5-imut naapertuuppoq.

§ 24 naapertorlugu borgmesterip tunuartinneqarneranut atatillugu akissarsiat annikillisinneqarnissaanut imaluunniit akissarsiaarutitinneqarnissaanut tunngasumik kommunalbestyrelsi aalajangiisinnaavoq. Aalajangiineq pissaaq naammassinnikkusunnginnerup annertussusaa qanorlu ittuussusaa sillimaffigereerlugit.

Imm. 3-mut:

Kommunalbestyrelsip aalajangiinera Imm. 2 naapertorlugu kommunalbestyrelsip aalajangiinera borgmesterip piumasaqarneratigut kommunalbestyrelsip eqqartuussisunut tunniunneqarneqanik kinguneqartassaaq.

§ 67-imut

Imm. 1-imut:

Aalajangersagaq maannamut atuuttumut § 65-imut naapertuuppoq.

§ 68-imut

Imm. 1-imut

Aalajangersagaq maannamut atuuttumut § 59-imut naapertuuppoq aalajangersarlugulu Nakkutilliisoqarfiup ilaasortai akissarsiaqartinneqassasut aalajangersakkat Inatsisartunut aamma Naalakkersuisunut il.il. ilaasortanut akissarsiat pillugit Inatsisartut inatsisaat naapertorlugu. Aaqqissuussineq ajunngitsumik ingerlanneqarsimavoq taamaattumillu allannguuteqangitsumik attatiinnarneqarluni.

§ 69-imut

Imm. 1-imut:

Aalajangersakkakkut aalajangiunneqarpoq kommunalbestyrelsimi ilaasortat sulianik pineqartunit akisussaaffigineqartunik suliarinnikkusunngitsunut Nakkutilliisoqarfiup pinngitsaalisaasumik akiliisussanngortissinnaagai. Aalajangersagaq assersuutigalugu atorneqarsinnaavoq kommunalbestyrelsi § 68 naapertorlugu Naalakkersuisunut paasissutissanik aammalu pappilissanik uppernarsaatinik tunniussiumanngippat.

Imm. 2-mut:

Aalajangersakkakkut aalajangerneqarpoq Nakkutilliisoqarfiup kommunalbestyrelsimut ilaasortanut kommunip annaasaqarsimaneranut akisussaasunut taarsiissuseqarnissaq siunertaralugu eqqartuussisunut tunniussisinnaanera. Taarsiissuteqarnissamik suliassanngortitsinermut atatillugu annaaneqartut aamerlassusissaannik aalajangersimasunik killiliisoqarsinnaanngilaq. Taarsiissuteqarnissamik suliassanngortitsinissami annaasaqaatit qanoq amerlatiginissaat pisuni ataasiakkaani nalilersorneqartassaaq.

Imm. 3-mut:

Aalajangersakkakkut siunertarineqarpoq taarsiissuteqartarnerni akiliisitsisarfimmik eqqartuussisutigut suliassiinissamut taarsiussinnaasumik pilersitsisoqarnissaa. Taamaakkaluartoq suliassiinissamut piumasaqaatit naammassineqarsimasussaapput, tassa imaappoq kommuni anaasaqarsimassaaq, aammalu ilaasortaq taarsiissuteqarnissaminut akisussaasuussaaq Kalaallit Nunaanni eqqartuussisarnerni aalajangersakkat nalinginnaasut naapertorlugit.

Pineqanngilaq ilaasortat akiligassap annertussusianik akisussaaqatigiillutik akiliisussaaqaatigiinnissaat, akiliutissallu amerlassusissaat ilaasortanut ataasiakkaanut aalajangerneqartassallutik.

Ilaasortat arlallit akiliisussanngortinneqarpata taakkulu ilaannaasa akiliinissaq akuersaarumappassuk, taava Nakkutilliisoqarfiup suliassaq taakkununnga tunngatillugu uninngatikkallarsinnaavaa ilaasortanut akiliinissamik kissaateqarsimanngitsunut eqqartuussiviup aalajangiinissaata tungaanut.

Kalaallit Nunaata eqqartuussiviata nalunaarutigaa uani aalajangersagaq malillugu pinngitsaaliilluni akiliisussanngortitsineq ingerlaannaq pisinnaasoq Kalaallit Nunaanni eqqartuussiveqarnermi inatsimmi kap.VII, § 1, imm. 3 malillugu.

Imm. 4-mut:

Aalajangersakkami malittareqquneqarpoq ilaasortaq pinngitsoorani isumaqataalluni taaseqataassasoq aalajangigassamut kommunalbestyrelsip aalajangiiffigisariaqagaatut ilaasortap nalunngeriigaanut nalunngereersimasariaqagaanulluunniit, akerlianilli ilaasortaq aalajangigassamut akerliulluni taasissasoq nalunngikkuniuk nalunngittariaqaruniulluunniit tamanna inatsisinik saneqqutsinerusoq.

Ilaasortaq taarseeqataannginnerminut akisussaatitaaginnarani aammali pissutissaqarani ataatsimeeqataasimanngikkuni ilisimallugulu ilisimasariaqarluguluunniit ataatsimeeqataasimagaluaruni inatsisinik sanioqqutitsilluni aalajangerneq akornusersinnaagaluarlugu pinngitsoortissinnaagaluarluguluunniit.

§ 70-imut

Aalajangersagaq maannamut atuuttumut 62-imut naapertuuppoq.

Imm. 1-imut:

Aalajangersagaq periarfissiivoq annaasaqarnikkut taarsiissutissanik ikililerisinnaanermik, tassa pisuussuteqarneq sakkukinnerulersitsinissamik ersersitsippat, ajoqusiinerup annertussusia aallatigullu pissutsit tunngavigalugit.

§ 71-imut

Aalajangersagaq maannamut atuuttumut § 67-imut naapertuuppoq.

Imm. 1-imut:

Aalajangersakkakkut aalajangerneqarpoq Inatsisartut inatsisaat manna aqqutigalugu unioqqutitsinerit annertuut pinerluuteqarnertut isigineqartussanngornerat kommunit aalajangigaannik atorunnaarsitsisarnermik atorunnaarallartitsisarnermillu, pinngitsaaliiluni akiliisitsisarnernut, inuttullu akisussaaffeqarnermut malittarisassanut siunertaqarluartumik ilassutaasoq, aammalu tassaalluni Naalakkersuisunut ilaasortat akisussaaffeqarnerannik malittarisassanut isumatusaartumik naleqqiunneqartoq.

Imm. 2-mut:

Aalajangersagaq ilanngunneqarpoq aqutsineq pillugu inatsit pillugu politiinut nalunaarutiginnittarnerit tunngavissaqanngitsut, suulluanngippallaartut nalorninartullu pinngitsoortikkumallugit.

§ 72-imut

Imm. 1imut:

Siunnersuutigineqarpoq inatsisissatut siunnersuut 1. januar 2009-mi kommunit kattunnissaasa atortuulersinneqarneranut peqatigitillugu atortussanngortinneqassasoq.

Imm. 2-mut

Maannamut kommunalbestyrelsit, nunaqarfínni aqutsisut il.il. pillugit Inatsisartut inatsisaata nr. 20-ip, 3. november 1994-imeersup tamatumunnga peqatigitillugu atorunnaarsinneqarnissaa siunnersuutigineqarpoq.

Imm. 3-mut:

Kommunernes Revision (tassa Danmarkimi kommunit kukkunersiuisui) ukiorpassuit ingerlaneranni kommunit naatsorsuutaannik kukkunersiuisuusimapput. Kisiannili maannakkuugallartoq kukkunersiuisut pillugit inatsimmi kukkunersiuisoqarfiit kukkunersiuisunit naalagaafimmit akuerisaasunit taamaallaat pigineqarsinnaaneranik aalajangersagaq Kommunernes Revision A/S-imit naammassineqarsinnaanngilaq. Kommunernes Revision A/S kukkunersiuisut pillugit inatsisip aalajangersagaanik naammassinninniarluni sulissuteqarpoq, kisiannili tamanna aatsaat naammassisinnaavaa 2011-p naanerani.

Taamaattumik siunnersuutigineqarpoq kukkunersiuisunut piumasaqaatit sakkortusineqarnissaat aatsaat 1. januar 2012-imiit atuutilissasoq.

Imm. 4-mut:

Naalakkersuisut naatsorsuutigaat piffissami qanittumi Inatsisartut inatsisaata matuma kingunerisaanik nutaanik nalunaarusiortoqassasoq, kisiannili nalunaarutit maannamut atuuttut atuutitinneqarallassasut nutaanik taarseneqarnissaasa atorunnaarsinneqarnissaasaluunniit tungaanut.

Nalunaarutit maannamut atuuttuusut tassaapput:

1) Kommunit missingersuusiortarnerat, naatsorsuutaat, kukkunersiorneqartarnerat aamma karsii naatsorsuuseriveqarnerallu pillugit nalunaarut nr. 29, 18. september 1995-imeersoq

2) Borgmesterit utoqqalillutik tunuartarnerini qinigaajunnaareeraluarlutillu taakku aappaasa qitornaasalu pensionisiassaat pillugit nalunaarut nr. 23 12. september 1997-imeersoq.

3) Kommunini il. il. Namminersornerullutik Oqartussat suliassaqarfiini kukkunersiuisarnerit pillugit nalunaarut nr. 14 23. august 1999-imeersoq.

4) Kommunalbestyrelsinut nunaqarfinnilu aqutsisunut il. il., borgmesterinut taakkulu tulliinut akissarsiaqartitsinerit pillugit nalunaarut nr. 35 5. oktober 2001-imeersoq.