10. november 2008

UKA 2008/152

Inatsisissatut siunnersuummut oqaaseqaatit

Oqaaseqaatit nalinginnaasut

1. Aallaqqaasiut:

1.1 Tunuliaqutarisaq:

Kalaallit Nunaanni efterskoleqalernissaq Naalakkersuisut nikerartut aamma Inatsisartuni partiit ilaasortallu tungaanniit ukiuni arlalinni kissaataavoq. Kisianni ukiuni siuliini aningaasatigut periarfissat nassatarisarsimavaat, efterskolit atuartitsivissaannik ineqarfissaannillu pilersitsinissamut ingerlatsinermullu atugassanik aningaasaliisoqarsinnaasarsimanngimmat.

2005-imi Inatsisartut upernaakkut ataatsimiinneranni taamani Naalakkersuisuusut "Danmarkimi efterskolertarnermut tapiissuteqartarnerup aaqqissugaaneranik naliliineq pillugu nalunaarusiaq" saqqummiuppaat. Nalunaarusiami tikkuarneqarpoq, inuusuttut Danmarkimi efterskolernermi tapiiffigineqarnissamut naammattunik qallunaatut piginnaasaqanngitsut ilinniartitaanikkut neqeroorfigineqarnissaat pisariaqartinneqartoq. Aammattaaq tikkuarneqarpoq, Kalaallit Nunaanni inuusuttunut efterskolernermikkut qallunaat oqaasiisigut piginnaasaminnik annertusaanissamik pingaarnerpaatitsinngitsunut allatut ittumik naapertuuttumillu neqeroorusiortoqarnissaa pisariaqartinneqartoq. Nalunaarusiami aammattaaq tunngavilersorneqarpoq, Danmarkimi efterskolernissamik neqeroorutaasartunit allaanerusumik imaqartunik pilersitsinissaq pisariaqartinneqartoq, kiisalu tunngavilersorneqarluni ilinniartitaanikkut neqeroorutip inuusuttunut Kalaallit Nunaata avataaneersunut pilerinarsinnaasup pilersinnissaa pisariaqartinneqartoq. Pisariaqartitsinerit qulaani eqqaaneqartut innersuullugit inassutigineqarpoq Kalaallit Nunaanni efterskolit pilersinnissaat siunertaralugu piaarnerpaamik inatsitigut aningaasaqarnikkullu sinaakkusiisoqassasoq.

Naalakkersuisut ilinniartitaanermut pilersaarutissatut siunnersuutaanni december 2005-imeersumi nassuiarneqarpoq, ilinniagaqassagaanni ilaatigut piumasarineqartut pisariaqartumik qallunaat tuluillu oqaasiinik piginnaasaqarnissaq. Kisianni inuusuttut ataatsimut amerlassusaannut naleqqiullugu amerlavallaat ilinniakkaminnik naammassinnittanngillat - oqaatsitigut piginnaasat killeqarnerat pissutigalugu. Naalakkersuisut siunnersuutigaat, qallunaatut oqaasiliunerusunut ilinniakkatigut neqeroorutit saniatigut, innuttaasunut kalaallisuinnaq oqaasilinnut ilinniakkatigut neqeroortoqassasoq, inuusuttunut Danmarkimi efterskolerniartunut tapiisarnermik aaqqissuussineq attatiinnaraluarlugu.

Taamatut periusissamik pilersaarusiornerup ilaatut Naalakkersuisut ilaatigut Kalaallit Nunaanni efterskolinik pilersitsinissamik periarfissiinissaq qularnaarumavaat, taannalu sallerpaatillugu tassaassaaq inuusuttunut naammattumik qallunaatut oqalussinnaannginnertik pissutigalugu Danmarkimi efterskolinut isersinnaanngitsunut neqeroorutaasoq. Inassutigineqarpoq Kalaallit Nunaanni efterskolip sallerpaatillugu qiteritissagai qallunaat tuluillu oqaasii, aappaattulli aamma kalaallit oqaasii - Kalaallit Nunaanni inuusuttunut kalaallisut oqalussinnaanngitsunut -neqeroorutigalugit. Pingajuattut atuartitsissutaasut tassaasinnaapput ilaatigut inuusuttunut pilerinartut ilaatigullu Kalaallit Nunaanni inuussutissarsiutinut ineriartortitanut sammisut - soorlu takornariaqartitsinermut.

Naalakkersuisut ilinniartitaanermut pilersaarutissatut siunnersuutaanni december 2005-imeersumi qularnaarneqarpoq 2006-imi 2007-imilu 0,5 mio. kr. sumiiffinni ataasiakkaani qitiusumiillu inerisaanissamut immikkoorsisoqarnera. 2008-mi aamma 2009-mi ukiut aningaasaliiffiusut tamaasa 4 mio. kr. immikkoortinneqarput pilersitsinermut ingerlatsinermullu Namminersornerullutik Oqartussaniit tapiissutissatut.

2006-imi 2007-illu aallartinnerani taamanikkut Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiusup Kalaallit Nunaanni efterskoliliornissamut pilersaarusiat tallimat tiguai. Pilersaarusiat taakkua aallaavigalugit Naalakkersuisut toqqarpaat Qasigiannguani 2009-mi efterskoliliornissaq taperserumallugu. Tulliullugu Kultureqarnermut, Ilinniartitaanermut, Ilisimatusarnermut Ilageeqarnermullu Pisortaqarfiup Qaqortumi Sulisartut Højskoliat isumaqatigiissuteqarfigaa ukiumi atuarfiusumi 2008/09-mi utaqqiisaasumik efterskolitut atuartitsinissaq pillugu. Sulisartut Højskolianni utaqqiisaasumik efterskolitut atuartitsinissap siunertaraa 2008-mi ukioqatigiiaat marluiusut meeqqat atuarfianniit anisussat ilinniarfissarsinissaannik ajornartorsiutaajunnartut ikiorsiiffiginissaat.

Taamaattoq tassunga atatillugu eqqaaneqassaaq inatsisiliornissamik suliniutip matuma nalinginnaasumik efterskoliliornissamut sinaakkutissat pilersimmagit. Taamaalilluni efterskolit pisortatigoortumik namminersortumillu ingerlassat pilersinneqarsinnaanerat periarfissinneqarpoq.

1.2 Siunertaq:

Efterskolit suliffeqarfiupput imminnut pigisut, pingaartitatut namminneq toqqakkatik aallaavigalugit inuusuttunut 14-it 17-illu akornanni ukioqartunut nerisaqarlunilu ineqarfiit aqqutigalugit atuartitsinermik neqerooruteqartut. Efterskolit, meeqqat atuarfiinut atuarfinnullu namminersortunut naleqqiullugit, immikkut illuinnartunik ilikkariartornissamut avatangiiseqartitsipput, tassami minnerpaamik ulluni tallimani ullut tamaasa atuartitsinerup saniatigut, ilinniartitsisut atuartullu sapaatip-akunnerisa ulluini unnuaanilu arfineq-marlunni tamani ataatsimoornissaminnut periarfissaqarput, atuarfiit nerisaqarfiullutillu ineqarfiunerat aqqutigalugu. Ulluinnarni atuartitsinerup efterskolillu aaqqissugaanerata, efterskolit nallernissaqanngitsumik periarfissippai, atuartut nalinginnaasumik atuartitsissutinilu sammisassanik ilikkariartorneranni, ilinniartitsisut atuartitsineranni aamma sammisassat pilersaarusiaariinngitsut pilersaarusioriikkallu aqqutigalugit efterskolimilu ataatsimoorneq aqqutigalugu ataqatigiissitsinissamut.

Efterskolit inuusuttut atuartitaasussaatitaanerisa piviusunngortinnissaanut peqataasinnaapput, meeqqat atuarfianni inaarutaasumik naliliinerit ingerlannissaat neqeroorutigalugit.

Ukiuni kingullerni qulini Danmarkimi efterskolernissaq annertusiartortumik soqutigineqarpoq. Inuusuttut Kalaallit Nunaanni efterskolernissamut periarfissaqanngimmata, qinnuteqartut tamarmik Danmarkimi efterskolinut innersuunneqartariaqartarput.

Sulisartut Højskoliata ukiumi atuarfiusumi 2008/09-mi efterskolitut atuartitsinissaq neqeroorutigimmagu qinnuteqartut katillugit 347-upput. 10. klassimi atuartut 147-t, 2008-mi junimi meeqqat atuarfianni naammassisussat Sulisartut Højskolianni efterskolerniarlutik qinnuteqarput. 11. klassimi atuartut 128-t, 2008-mi junimi meeqqat atuarfianni naammassisussat efterskolerumallutik qinnuteqarput, inuusuttullu 53-it meeqqat atuarfianni naammassereernikut qinnuteqarlutik.

Kalaallit Nunaanni efterskolimik pilersitsinermi siunertaavoq atuartut nalinginnaasumik inerikkiartornerannut pitsaanerpaanik sinaakkusiinissaq, ataatsimoornermut avatangiisit demokratiskiusumik peroriartornermut silarsuarmilu ataatsimoorfiusumi allanik ataqqinninnermik innuttaaqataanermillu siuarsaasut avatangiiseralugit - tassanilu piumasaqaataasunut ilaapput ataatsimoornerup, akisussaanerup ilinniartitaanermilu ataatsimoorfinnut nammineq peqataanissamut piareersimanissaq.

1.3 Inatsissatut siunnersuutip suliarinera:

Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup Kalaallit Nunaanni efterskolini ilinniartitsinermik pilersitsiniarnermik suliaqarnermi attaveqarfigai Oqaatsinik Pikkorissarfik, kommunit, Knud Rasmussenip Højskolia, Sulisartut Højskoliat aamma Danmarkimi efterskolit. Annermik Oqaatsinik Pikkorissarfik Danmarkimi efterskolit pillugit ilisimasaminik tunniussaqarnikuuvoq.

1.4 Inatsisit atuuttut:

Maanna efterskolit aqutarineqarput Meeqqat atuarfiat pillugu Inatsisartut inatsisaanni nr. 1-imi, 6. juni 1997-imeersumi, § 10, imm. 5 aamma § 11, naapertorlugit, tak. Atuarfik pillugu Inatsisartut inatsisaat nr. 8, 21. maj 2002-meersoq, Inatsisartut peqqussutaatigut nr. 7-ikkut, 7. maj 2007-imeersukkut allanngortinneqartoq.

Aalajangersakkani taakkunani periarfissinneqarpoq Naalakkersuisut erseqqinnerusumik aalajangersagaat tunngavigalugit atuartunut atuartitaasussaajunnaareersunut efterskolinik pilersitsisoqarsinnaasoq, aamma Naalakkersuisut Danmarkimi efterskolernermut atatillugu aningaasartuutinut tapiissuteqarsinnaasut.

Efterskolit pillugit inatsisit ataatsimoortikkumallugit taamaalillunilu paasiuminarnerutikkumallugit inatsisissatut siunnersuut manna aammattaaq Danmarkimi efterskolernermut tapiissutit pillugit kapitalimik ilaqarpoq.

Danmarkimi efterskolernermut tapiissutit ullumikkut aqutarineqarput Danmarkimi efterskolernermut tapiissutit pillugit Namminersornerullutik Oqartussat nalunaarutaat nr. 26, 15. januar 2004-meersoq aqqutigalugu. Nalunaarut taanna inatsisissatut siunnersuutip akuerineqarnerani atuutiinnassaaq.

2. Siunnersuutip pingaarnersai:

Efterskolit pillugit Inatsisartut inatsisissaattut siunnersuut manna arlalitsigut Højskolit pillugit Inatsisartut peqqussutaannut nr. 9-mut, 21. maj 2002-meersumut assinguvoq. Kalaallit Nunaanni efterskolit pillugit siusinnerusukkut inatsiseqarnikuunngilaq. Inuusuttut efterskolerniartut Danmarkimi efterskolinut innersuuttariaqartarlutik.

Efterskolit pillugit Inatsisartut inatsisissaattut siunnersuummut matumunnga ilaapput atuartitsineq ataatsimoornerlu, tamatigoortumik qaammarsaanissamik pingaarnertut siunnerfeqartut aamma Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmit akuerisaasut. Atuartitsineq sallerpaatillugu tamatigoortuussaaq, atuartitsissutit imaluunniit atuartitsissutit qanitariissut ataasiakkaat pingaarnerusumik inissisimasinnaapput, tamatigoortuunissamilli pingaarnerutinneqarsinnaanatik. Efterskolit atuartitsinerat pingaartitatut toqqammavissamik nammineq toqqakkamik aallaaveqassaaq.

Ukioq atuarfiusoq 2008/09 aallarnerfigalugu atuartunut 80-it missaanniittunut Qaqortumi Sulisartut Højskolianni efterskolitut atuartitsinissaq pilersaarutaavoq. Aammattaaq Qasigiannguit Kommuniata Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik suleqatigalugu ukioq atuarfiusoq 2009/10 aallarnerfigalugu efterskolimik pilersitsinissaq pilersaarutigaa. Qasigiannguani efterskolimik pilersitsiniarnerup pisariaqalersippaa efterskolinik imminnut pigisutut ingerlanneqartunik siulersuisunillu qullersaallutik aqunneqartunik pilersitsinissaq siunertaralugu inatsisitigut tunngaviliinissaq.

Inatsisissatut siunnersuutip Kalaallit Nunaanni efterskolinik - atuartitsinermik ataatsimoornermillu neqerooruteqartunik, tamanut qaammarsaanermik pingaarnertut anguniagaqartunik Naalakkersuisunillu akuerisaasunik - pilersitsinissaq inatsitigut tunngavissippaa. Efterskolit ingerlatsinerat namminneq pingaartitatut toqqagaq aallaavigalugu aaqqissuunneqassaaq, suliffeqarfittullu imminut pigisutut ingerlanneqassallutik, qullersaallutillu aqutsisuusunik siulersuisoqarlutik.

Inatsisissatut siunnersuut kapitalinut 6-inut agguagaavoq. Kapitali 1-imi pineqarput efterskolinik nassuiaat siunertaallu. Kapitali 2-miipput ilinniartunngortitsinermut malittarisassat efterskolillu aqunneqarnerat pillugu qitiusumit aalajangersakkat. Kapitali 3-mi Naalakkersuisut efterskolinik akuersinissaat malittarisassiuunneqarpoq. Kapitali 4-mi efterskolinut tapiisarnermi malittarisassat aalajangersarneqarput. Kapitali 5-imi Kalaallit Nunaata avataani efterskolernermut tapiissutit malittarisassiuunneqarput. Kiisalu kapitali 6-ip imarivai nakkutilliineq, misileraaneq atuuttuulersitsinerlu pillugit aalajangersakkat assigiinngitsut.

Nutaatut inatsissatut siunnersuummi aalajangersakkat Naalakkersuisut periarfissippaat efterskolinut akuerisaasunut tapiissuteqarnissaannut - aningaasat Inatsisartut Aningaasanut Inatsisaanni aalajangersarneqartut iluanni. Tapiissutit efterskolip ingerlatsineranut ukiumoortumik tunngaviusumik tapiissutitut tunniunneqassapput. Siunnersuutip aamma periarfissippaa taxameteri malillugu Naalakkersuisut tapiissuteqarsinnaanerat, efterskolip ukiumut ilinniartuisa amerlassusaat kisitsimmik, ukiumoortumik Inatsisartut Aningaasanut Inatsisaanni aalaajangerneqartumik, amerlisarnerat aallaavigalugu, taamatuttaaq ilinniartut efterskolimut akiliutissaannik annikillisaatissamik, isertitat aallaavigalugit aalajangerneqartumik, tapiissuteqarnissaq periarfissinneqarpoq. Naalakkersuisut ilinniartut efterskolernerup aallartinnerani, kipitinnerani naammassineranilu angalanerinut tapiissuteqassapput. Aammattaaq Naalakkersuisut efterskolit pisortaasa ilinniartitsisuisalu pikkorissarnerinut ilinniaqqinnerinullu tapiissuteqarsinnaapput.

3. Aningaasaqarnikkut allaffissornikkullu pisortanut sunniutaasussat:

Kalaallit Nunaanni efterskolimik ingerlatsinermut Namminersornerullutik Oqartussat nalinginnaasumik tunngaviusumik tapiissutaat tassaasapput kr. 5.600.000. Nalinginnaasumik tunngaviusumik tapiissutit saniatigut, taxameteri malillugu tapiissutit ilinniartumut ataatsimut sapaatip-akunneranut tassaassapput kr. 525. Kalaallit Nunaanni efterskolernermut taxameteri malillugu tapiissutinut aningaasartuutissat Inatsisartut 2008-mut Aningaasaqarnermut Inatsisaanni konto 40.10.12-ip ataani ilaapput.

Ukiumi atuarfiusumi 2008/09-mi angajoqqaat akiliutissaat aalajangiunneqarpoq tassaassasoq ilinniartumut ataatsimut sapaatip-akunneranut kr. 450.

Ukiumi atuarfiusumi 2008/09-mi angajoqqaat akiliutaannik annikillisaanissamut Namminersornerullutik Oqartussat tapiissutissaat 2008-mut Inatsisartut Aningaasaqarnermut Inatsisaanni konto 40.10.12-ip ataani aalajangiunneqarpoq tassaassasoq sapaatip-akunneranut kr. 281. Ukioq atuarfiusoq 2009/10 aallarnerfigalugu Namminersornerullutik Oqartussat angajoqqaat akiliutissaannik annikillisaanissamut tapiissutaat 2009-mut Inatsisartut Aningaasanut Inatsisaat aqqutigalugu pisassaaq, annertussusissaanullu aalajangiisuussallutik angajoqqaat ilinniarnerup aallartinnissaa ukiunik marlunnik sioqqullugu isertitarisimasaasa annertussusaat.

Ukiumi atuarfiusumi 2008/09-mi efterskolimi ilinniartumut ataatsimut aningaasartuutaasussat katillugit sapaatip-akunneranut tassaassapput kr. 1.256. Ataatsimut aningaasartuutit tassaapput Namminersornerullutik Oqartussat taxameteri malillugu tapiissutaat tassaasut ilinniartumut ataatsimut sapaatip-akunneranut kr. 525, angajoqqaat ilinniartumut ataatsimut sapaatip-akunneranut akiliutaat tassaasut kr. 450 kiisalu angajoqqaat akiliutaannik annikillisaanissamut Namminersornerullutik Oqartussat tapiissutaat tassaasut ilinniartumut ataatsimut sapaatip-akunneranut kr. 281. Ataatsimut aningaasartuutit naatsorsorneranni nalinginnaasumik tunngaviusumik tapiissutit kr. 5.600.000-iusut siulianilu eqqaaneqartut ilaanngillat, taamatullu ilaanngillat ilinniartut illoqarfigisaminniit efterskolimut aamma efterskolimiit illoqarfigisaminnut angalanerinut aningaasartuutit.

Kalaalit Nunaanni efterskolertitsilluni atuartitsinerup piviusunngortinnissaanut ukiumi atuarfiusumi ilivitsumi aningaasartuutissat tamarmiusut naatsorsoraanni - Namminersornerullutik Oqartussat nalinginnaasumik tunngaviusumik tapiissutaat ilanngullugit - ukiumi atuarfiusumi 2008/09-mi ima isikkoqassapput:

Nam. Oqart. nalinginnaasumik tunngaviusumik tapiissutaat	kr. 5.600.000
Taxameteri malillugu atuartumut ataatsimut sap. ak.-ni 42-ni ilinniartunut 80-inut tapiissutit, sap.ak.-nut kr. 525	kr. 1.764.000
Sap. ak.-nut angajoqqaat akiliutaat kr. 450 ilinniartunut 80-inut sap. ak.-ni 42-ni	kr. 1.512.000
Nam. Oqartussat angajoqqaat akiliutaasa annikillisinnissaannuttapiissutaat sap. ak.-nut kr. 281, ilinniartunut 80-inut sap.ak.-ni 42-ni	kr.    944.000
I alt	kr. 9.820.000

Sulisartut Højskoliani ukiumi atuarfiusumi 2008/09-mi efterskolertitsineq katillugit akeqassaaq kr. 9.820.000.

Efterskolertitsinerup qanoq annertutigisumik Nunatta Karsia sunnerumaarneraa paasiniassagaanni, angajoqqaat akiliutaat 1.512.000 kr-iusut ilanngaattariaqarput, taamatullu Namminersornerullutik Oqartussat angajoqqaat akiliutissaannik annikillisaanissamut tapiissutaat ilinniartumut ataatsimut sapaatip-akunneranut 281 kr-iusoq, atuartunullu 80-inut sapaatip-akunnerini 42-ni akilerneqartussaq ukiumullu 944.000 kr-iusoq ilanngaattariaqarluni. Namminersornerullutik Oqartussat angajoqqaat akiliutissaannik annikillisaanissamut tapiissutaat 2008-mut Inatsisartut Aningaasanut Inatsisaanni konto 40.10.12-imi ilaareerpoq.

Taamaalilluni Nunatta Karsia - tassalu pisortat - ukiumi atuarfiusumi 2008/09-mi 7.364.000 kr-nik aningaasartuuteqartussanngussaaq, inatsissatut siunnersuut Inatsisartuni akuersissutigineqassappat. Aningaasartuutissat taakku 2008-mut Inatsisartut Aningaasanut Inatsisaanni konto 40.01.08-p ataani ilaareerput.

Oqaatsinik Pikkorissarfik aamma Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik siusinnerusukkut isumaqatigiissuteqareerput, Oqaatsinik Pikkorissarfiup Danmarkimi Kalaallit Nunaannilu efterskolernermut aningaasaliissutit aqutarissagai.

Inatsisissatut siunnersuummi siunnersuutaavoq Naalakkersuisut aalajangersinnaagaat, ilinniartunut tapiissutit kommunalbestyrelsimit imaluunniit Namminersornerullutik Oqartussat ataanni suliffeqarfimmit immineertumit aqutarineqassasut.

4. Inuussutissarsiornermut aningaasaqarnikkut allaffissornikkullu sunniutaasussat:

Inatsisissatut siunnersuut inuussutissarsiornermut aningaasaqarnikkut aamma allaffissornikkut ingerlatsinermut sunniuteqassanngilaq.

5. Avatangiisinut pinngortitamullu sunniutaasussat:

Inatsisissatut siunnersuut avatangiisinut pinngortitamullu sunniuteqassanngilaq.

6. Innuttaasunut sunniutaasussat:

Efterskolit pillugit inatsisissatut siunnersuut inuusuttut amerlanerit ilikkariartornissaat inerikkiartornissaallu periarfississavaa.

7. Sunniutaajunnartut allat:

Naatsorsuutigineqarpoq efterskolertitsinermik pilersitsinerup nassatarissagaa inuit pisariaqartut atuartitsinermut, allaffissornermut efterskolimilu ilinniartunik nakkutilliinermut atorfinitsinnissaat.

 

8. Naalagaaffeqatigiinnermut namminersornerunermullu tunngasut:

Inatsisissatut siunnersuut Naalagaaffeqatigiinnermut namminersornerunermullu sunniuteqanngilaq.

9. Pisortanut kattuffinnullu tusarniaaneq:

KANUKOKA
Naalakkersuisoqarfiit tamarmik
IMAK
SIK
ILIK
GA
NUSAKA
ASG
AK
Horsfeldt & Partners
Ilinniartitaanermut Ministeeriaqarfik
Efterskolit Allatseqarfiat
Oqaatsinik Pikkorissarfik
Inerisaavik
Ilisimatusarfik
Ilinniarfissuaq
Sulisartut Højskoliat
Knud Rasmussenip Højskolia
KUR
MIPI
PIP
KNAPK
KIK
AVALAK
Statsministeeria
Inatsisilerinermut Allaffik
Inatsisartut Allattoqarfiat, Inatsisilerinermi immikkoortoqarfik
Tusarniaanermit akissutit.

Tusarniaanermi akissutit nalinginnaasumik siunnersuut ataatsimut isigalugu ilalerillutik oqaaseqaataapput. Tusarniaanermit akissutit sapinngisamik annertunerpaamik siunnersuummut ilanngunneqarput. Tulliuttumi oqaaseqaatit pingaarnerit ersersinneqarput. Naalakkersuisoqarfiup oqaaseqaatai uingasumik allataapput.

Naalakkersuisoqarfiup Inatsisartut efterskolit pillugit inatsisissaattut siunnersuut Statsministeeriaqarfimmut saqqummiuppaa. Statsministeeriaqarfiup maluginiarpaa Atuarfik pillugu Inatsisartut peqqussutaanni nr. 1, 6. juni 1997-imeersumi § 10. imm. 5 naapertorlugu ersimmat "Naalakkersuisut erseqqinnerusumik aalajangersagaat naapertorlugit atuartunut ukiumikkut atuartitaasussaatitaanermik qaangeereersunut efterskolinik pilersitsisoqarsinnaasoq". Tamanna tunuliaqutaralugu Namminersornerullutik Oqartussat nalilerpassuk efterskoleqarnermut tunngasut tiguneqareersimasut, naliliinerit qulaani pineqartut aallaavigalugit Statsministeeriaqarfik isumaqarpoq, Namminersornerunermut inatsimmi § 4 naapertorlugu oqartussaaffimmik tigusinertut isigisariaqartoq, taamaammallu pineqartumut atatillugu inatsisiliorneq Inatsisartut peqqussutaatigut pinnani Inatsisartut inatsisaatigut pisariaqartoq, tak. Namminersorneruneq pillugu Inatsimmi § 4, imm. 4.

Naalakkersuisoqarfiup nalilerpaa efterskolinut tunngasut Meeqqat aturfiat pillugu Inatsisartut peqqussutaata nr. 1, 6. juni 1997-imeersup akuersissutigineqarneratigut oqartussaaffigineqalersut. Inatsisilerinermut allaffiup aammattaaq oqaatigaa, Namminersornerullutik Oqartussat aalajangersinnaagaat, atuartitsinermut tunngatillugu inatsisiliornikkut ingerlatsinikkullu oqartussaaneq, tassunga ilanngullugit atuartunik ukiumikkut atuartitaasussaajunnaareersunik atuartitsineq aamma efterskolinut tunngasut, Namminersornerullutik Oqartussasut nuussasut, tak Namminersorneruneq pillugu inatsimmi § 4, imm. 1, Kalaallit Nunaanni Namminersornerullutik Oqartussat pillugit inatsimmut nr. 577-imi, 29. november 1978-imeersumut ilanngussami pkt. 11-imut sanilliullugu. Pineqartup tigunissaa Inatsisartut inatsisaata akuersissutigineratigut pissaaq.

Taamaalilluni Statsministeeriaqarfik efterskolit pillugit inatsisiliornerup Inatsisartut inatsisissaannut siunnersuutitut ilusilerneqarnera pillugu oqaaseqaateqanngilaq.

Ilinniartitaanermut ministeeriaqarfik siunnersuummut tunngatillugu oqaaseqaateqanngilaq.

Siunnersuummi oqaaseqaatit nalinginnaasut pillugit oqaaseqaatit:

Kalaallit Nunaanni Sulisitsisut Peqatigiiffiata oqaatigaa, efterskolit ataatsimoortumik Nunatta Karsianut sunniuteqarnissaat eqqunngitsoq, angajoqqaat akiliutaasa appartinnissaannut tapiissutit, Nunatta Karsianut sunniutaasussat ataatsimoortut naatsorsornerinut ilaanngimmata.

Tassunga tunngatillugu oqaatigineqassaaq, angajoqqaat akiliutaasa appartinnissaannut tapiissutit naatsorsuinermut ilaareermat. Eqqorpoq - soorlu Kalaallit Nunaanni Sulisitsisut Peqatigiiffiata IMAK-killu tikkuaraat - ilinniartut efterskolit aallartinnerini naammassinerinilu angalanerinut aningaasartuutissat ilaatinneqanngimmata. Taamaaliortoqarpoq tamatumunnga aningaasartuutissat siumoortumik ilisimaneqanngimmata, illoqarfinnut angerlarsimaffiusunut ataasiakkaanut bilitsit akii assigiinngissinnaaqimmata.

Kalaallit Nunaanni Sulisitsisut Peqatigiiffiat isumaqarpoq, angajoqqaat akiliutiviat sapaatip-akunneranut ilinniartumut ataatsimut 731 kr-iusoq, taassumalu assigigaa angajoqqaat annerpaamik qaammammut 3.143,30 kr-inik akiliuteqartarnissaat.

Tamanna eqqunngilaq. Angajoqqaat akiliutaat Namminersornerullutik Oqartussat akiliutit apparsarnissaannut tapiissutaat ilaanngullugu ukiumi atuarfiusumi 2008/09-mi sapaatip-akunneranut ilinniartumut ataatsimut 450 kr-ussasoq aalajangiunneqarpoq.

IMAK-kip tikkuarpaa, Nunatta Karsiata qanoq sunnerneqarumaarneranik naatsorsuineq eqqunngitsoq, angajoqqaat akiliutaasa appartinneqarnissaannut tapissutissaq ilanngunneqarsimanngimmat.

Tassunga atatillugu ilisimatitsissutigineqassaaq, ukiumi atuarfiusumi 2008/09-mi angajoqqaat akiliutaasa appartinneqarnissaannut tapiissut ilaatinneqanngimmat, aningaasat pineqartut 2008-mut Inatsisartut Aningaasanut Inatsisaanni konto 40.10.12-mi ilaareermata.

Knud Rasmussenip Højskoliata tusarusuppaa inatsisissatut siunnersuut manna Højskolit pillugit Inatsisartut peqqussutaannut nr. 9, 21. maj 2002-meersumut qanoq sunniuteqarumaarnersoq.

Tassunga tunngatillugu ilisimatitsissutigineqassaaq, inatsisissatut siunnersuut manna højskolinut sunniuteqassanngimmat, højskolit efterskolillu tamarmik immikkut ilinniartunut ukiumikkut anguniagaasutigullu assigiinngitsunut saaffiginnittuummata.

Kalaallit Nunaanni Sulisitsisut Peqatigiiffiat isumaqarpoq, nalinginnaasumik atuartitsineq § 1, imm. 1-imi qitiutillugu pingaarnerpaatittariaqartoq tulliullugillu qaammarsaaneq il.il..

Tassunga tunngatillugu Naalakkersuisut eqqaassavaat, aalajangersakkani ataasiakkaani oqaasertaliussat tulleriiaarneri siunertarisap pingaarnerniit tulleriiaagaaneratut isigineqassanngimmata.

Aningaasaqarnermut Nunanullu Allanut Naalakkersuisoqarfiup inassutigaa piumasaqaatigeqqullugu, ilinniartut oqaatsitigut pisinnaasaasa nukittorsarneqarnissaat efterskolit ilinniartitsinermik neqeroorutaannut ilaassasoq, taamatullu inatsisissatut siunnersuummi oqaaseqaatitaaniluunniit ilanngullugu nassuiartariaqartoq, ilinniartut inerikkiartornerannut tunngatillugu efterskolernerminni sunik ilimagisaqarfigineqarnersut, taakkununnga ilaatillugit ilinniagassatigut inuttullu inerikkiartornermut tunngasut.

Tassunga tunngatillugu oqaatigineqassaaq, efterskolit siunertaat oqaatsitigut ilisimasassanut tunngasuinnaanngimmata, taamaammat ilinniartut oqaatsitigut pisinnaasaasa nukittorsarneqarnissaasa immikkoortillugu ilanngunnissaat kissaatigineqanngilaq.

Siunnersuutip kapitalia 1 - nassuiaat siunertarlu - pillugu oqaaseqaatit

Aningaasaqarnermut Nunanullu Allanut Naalakkersuisoqarfiup kissaatigaa Kalaallit Nunaanni Danmarkimilu efterskolernerup assigiinngissutai assigiissutaalu nassuiarneqassasut.

Aallaavittut Danmarkimi Kalaallit Nunaannilu efterskolernerit assigiinngissuteqanngillat, kisianni Kalaallit Nunaanni efterskolinik pilersitsinerup siunertaasa ilagaat, tassuunakkut saaffigisat allat neqeroorfigineqarsinnaalernissaat, soorlu inuusuttut oqaatsitigut akimmiffiit pissutigalugit allanilluunniit pissuteqarlutik Danmarkimi efterskolersinnaanngitsut.

Knud Rasmussenip Højskolia isumaqarpoq § 1-ip ataani ilinniartunik efterskolimeereernerup kingorna ilinniaqqissinnaaneq pillugu ilitsersuisarnissaq piumasaqaatigisariaqartoq, inuunerlu pillugu nalinginnaasumik paasititsiniaasarnissaq piumasaqaataasariaqartoq.

Tassunga tunngatillugu ilisimatitsissutigineqassaaq efterskolit namminneq pingaartitatigut tunngavissatik ilusilersortussaammatigik. Aammattaaq Naalakkersuisoqarfiup malugeqqussavaa efterskolit § 1, imm. 4 naapertorlugu pisussaaffigimmassuk, ilinniartunut atuartitaasussaatitaasunut atuartitsinermik meeqqat atuarfianni nalinginnaasumik piumasaqaataasunut nallersuussinnaasumik atuartitsinissaq, tamatumalu nassatarissammagu ilinniartut ilinniarnermik ilaatut ingerlaqqeriarnissat pillugit pissusissamisuuginnartumik ilinniartitaanissaat, kiisalu efterskolit siunertaanneereerpoq efterskolit atuartitsinermik ataatsimoornissamillu neqerooruteqassasoq, ilinniartut inuttut tamakkiisumik inerikkiartornissaat, kiisalu nalinginnaasumik perorsarneqarlutillu ilinniarnissaat siunertaralugu.

IMAK isumaqarpoq, kapitali 1-imi allaqqasariaqaraluartoq ilinniarfiit immikkut atuartitsinermik immikkullu perorsaanikkut ikiorsiinermik neqeroorsinnaasut.

Tamanna pisariaqartutut isigineqanngilaq, tassami Naalakkersuisut § 17 naapertorlugu immikkut atuartitsinermut immikkullu perorsaanikkut ikiorsiinermut tapiisarnissaq pillugu aalajangersagaliorsinnaapput. Tassaniipportaaq ilinniarfiit atuartitsinermik taamaattumik ikiorsiinernillu neqeroorsinnaanerat pillugu aalajangersagaliornissamut pisinnaatitaaneq.

Efterskolit Allatseqarfiata (Efterskolernes Sekretariat) ernummatigaa efterskolit pisortanit pilersitat namminersortullu akornanni atugassarititaasut assigiinngittuunissaat.

Tassunga atatillugu eqqaaneqassaaq, piumasaqaatit atugassarititaasullu assigiissammata efterskole qanorluunniit pilersinneqarsimagaluarpat.

Aningaasaqarnermut Nunanullu Allanut Naalakkersuisoqarfiup siunertamut naapertuuttuusorinngilaa, suliffeqarfik pisortanit pisortallu aningaasaataat kisiisa isumalluutigalugit pilersitaq, suliffeqarfittut imminut pigisutut pilersinneqassappat. Naalakkersuisoqarfiup paarlaallugu siunnersuutigaa efterskolit pisortanit ingerlanneqarlutillu pigineqassasut, soorlu qitiusumik ilinniarfiit tamarmik taamaattut.

Tassunga tunngatillugu oqaatigineqassaaq Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfiup efterskolit pisortanit ingerlanneqarlutillu pigineqarnissaannik inassuteqaat isumaqatiginngimmagu. Erseqqissarneqassaaq efterskolit ilaatigut angajoqqaat akiliutaannit aningaasalersorneqassammata, taamaalillunilu pisortaniinnaq aningaasalersorneqassanatik. Naalakkersuisoqarfik isumaqarpoq efterskolit suliffeqarfittut imminnut pigisutut pilersittariaqartut, taamaaliornikkullu efterskolit tunngaviusumik atuarfinnut namminersortunut sanilliunneqarlutik, taamaaliornikkut efterskolit namminneq pingaartitatut tunngavissatik aalajangersinnaammatigik. Aammattaaq Naalakkersuisoqarfiup malugeqqussavaa, efterskolit tapisissagunik, piumasaqaatit arlaqartut piviusunngorteqqaartariaqarmatigik, tak. Inatsisissatut siunnersuummi kapitali 4.

Kalaallit Nunaanni Sulisitsisut Peqatigiiffiata aamma IMAK-kip kaammatuutigaat oqaatsit "peroriartorneq" aamma "atuartitsineq" "perorsaanermut" "ilinniartitaanermullu" taarsiullugit atorneqassasut.

Tassunga tunngatillugu eqqaaneqassaaq aalajangersagaq siunertatut aalajangersagaammat, tassanilu erseqqissarneqarmat efterskole perorsaasuunngitsoq, taamaallaalli ilinniartut nalinginnaasumik perorsagaanerannut peqataasoq Danmarkimi efterskolit assigalugit.

IMAK aamma Aningaasaqarnermut Nunanullu Allanut Naalakkersuisoqarfik isumaqarput, efterskolinit piumasaasariaqartoq ilinniartitsinermik meeqqat atuarfianni nalinginnaasumik piumasaqaataasunut nallersuussinnaasumik ilinniartunut neqerooruteqassasut.

Tamanna siunnersuummi § 1, imm. 4-mut ilanngunneqarpoq.

Aningaasaqarnermut Nunanullu Allanut Naalakkersuisoqarfik isumaqarpoq, "Atuarfitsialaap" ilai naapertuuttut imaluunniit pingaartitatut tunngavia inatsisissatut siunnersuummi atortariaqaraluartut, eqqaaneqarluni efterskole tunngavimmigut tassaasoq tunngaviusumik ilinniartitaanerup nanginnera.

Naalakkersuisoqarfiup oqaatigissavaa efterskolip nammineq pingaartitatut tunngavigisassani aalajangersassammagit, taakkualu "Atuarfitsialaap" pingaartitatut tunngavigisaasa assigisariaqanngilaat. Taamaattorli aamma oqaatigineqassaaq efterskolit siunertaata meeqqat atuarfianni pingaartitatigut tunngavigisai annertuut imarereermagit.

Siunnersuutip kapitalia 2 - ilinniartussanik akuersineq - pillugu oqaaseqaatit

Sulisartut Højskoliata aamma Knud Rasmussenip Højskoliata siunnersuutigaa, eqqarsaatigisariaqartoq højskolip efterskolillu akuleriisillugit allatorluinnarluunniit akuleriisitsilluni ingerlatsisoqarsinnaanerata periarfissinnissaa.

Siunnersuut taama oqaasertaqartillugu ajornaquteqanngilaq suliffeqarfiit imminnut pigisut efterskolinik højskolinillu ataatsikkut ingerlatsinissaat.

Horsfeldt & Partners-ip aamma Knud Rasmussenip Højskoliata Naalakkersuisut § 2, imm. 2 malillugu ilinniartussanik tulleriiaarinermut malittarisassaliorsinnaanermut periarfissaqarnerat ernummatigaat, isumaqarlutillu Naalakkersuisut taama piginnaatinneqartariaqanngitsut. Paarlaallugu inassutigineqarpoq ilinniartussanik tulleriiaarineq, ilinniartunngorumalluni qinnuteqartitsinermi periutsitut, tassaasariaqartoq siulersuisut ataasiakkaat suliassaat, tulleriiaarinissamut immikkut malittarisassiornikkut.

Naalakkersuisoqarfiup ilisimatitsissutigissavaa, aalajangersakkap taamaallaat Naalakkersuisut periarfissimmagit, efterskolit oqaaseqartereernerisigut, qinnuteqarnermi aamma ilinniartussanik akuersinermi periusissat pillugit malittarisassiornissamut. Taamaalilluni Naalakkersuisut ilinniartussanik tulleriiaarinerpiaq oqartussaaffiginngilaat. Aalajangersakkap sallerpaatillugu siunertaraa efterskolit ataasiakkaat ilinniartuisa nunamit tamarmeersuunissaasa qularnaarnissaat.

Horsfeldt & Partners-ip siunnersuutigaa § 6-imut ilanngunneqassasoq, efterskolip pisortaa perorsaanikkut, allaffissornikkut aningaasaqarnikkullu akisussaasuusoq aamma efterskolip ulluinnarni aqunneqarneranik inerisarneranillu isumaginnittuusoq.

Naalakkersuisoqarfiup tamanna siunertamut naapertuuttuusorinngilaa, tassami allaffissornikkut aningaasaqarnikkullu akisussaaffik inaarutaasumik siulersuisuniippoq, taamatullu siulersuisut akisussaaffigaat efterskolip pisariaqartumik inarisarnissaa.

IMAK siunnersuivoq, § 7, imm. 2-mut ilassutitut aalajangersaasoqassasoq, ilinniarfiup pisariaqartitsineq naapertorlugu naammattunik ilinniarsimasunik sulisoqarnissaa, aamma ilinniarfiup sulinini naammaginartumik aningaasaqarnikkut toqqammaveqarluni aallartissinnaassagaa.

Naalakkersuisoqarfiup tamanna pisariaqarsorinngilaa, paasissutissat taakku ilaatigut ileqqoreqqusami ilaatigullu tapiiffigineqarnissamik qinnuteqaammi ersittussaammata.

IMAK ilutigisaanik siunnersuuteqarpoq, nr. 9-mik nutaamik ilanngussisoqassasoq, suliffeqarfiup atorunnaarsinneqarneranut tunngatillugu aalajangersakkamik ilanngussisoqarluni.

Naalakkersuisoqarfiup tamanna pisariaqarsorinngilaa, suliffeqarfimmik atorunnaarsitsinerup tamanna pillugu aningaasaateqarfinnut inatsisit nalinginnaasut maleruaqqusaat malinneqarumaarmata.

Kalaallit Nunaanni Sulisitsisut Peqatigiiffiat isumaqarpoq, naatsorsuuserinermut tunngatillugu malittarisassatigut minnerpaaffiliisoqartariaqartoq, tassuunakkut uppernarsineqarsinnaaqqullugu Naalakkersuisut tapiissutaat efterskolit ingerlatsinerannut siunertaasut piviusunngortinnissaannut atorneqartut.

Tassunga tunngatillugu eqqaaneqassaaq, Naalakkersuisut tapiissutinut atatillugu naatsorsuusiortarnermut atuuttunik nalinginnaasunik malittarisassiornikuummata.

Efterskolit Allatseqarfiat (Efterskolernes Sekretariat) isumaqarpoq eqqarsaatigisariaqartoq, Naalakkersuisut ileqqoreqqusaannaanngitsut aammali siulersuisut ulluinnarni suleriaasissaat akuersissutigisassannginneraat. Tamatuma saniatigut Aningaasaqarnermut Nunanullu Allanut Naalakkersuisoqarfik isumaqarpoq, siunnersuummi nassuiartariaqaraluartoq, qanoq iliorluni siulersuisut inuttalersorneqassanersut qanorlu piumasaqaateqarfigineqassanersut.

Naalakkersuisoqarfiup malugeqquaa, pissutsit pineqartut siunertamut naapertuuttutut isigineqanngimmata, tassami efterskolit ataasiakkaat namminneq ulluinnarni aqunneqarnertik aaqqissuuttussavaat, taamaalillunilu aamma ulluinnarni pisortaqarneq, tassungalu atatillugu ulluinnarni suleriaasissat siulersuisullu toqqarneqartarnerat ilannguttussaallugit.

Efterskolit Allatseqarfiat (Efterskolernes Sekretariat) isumaqarpoq, siulersuisut § 6-imi atorfinitsitsisartunngortinneqartariaqartut, isumaqaramik siulersuisutut akisussaaneq siulersuisutullu peqataaneq taamaaliornikkut qaffassarneqassasoq taamaaliornerlu isumaqatigiinnginnernik pinaveersaartitsisinnaasoq.

Naalakkersuisoqarfiup tamanna siunertamut naapertuuttutut isiginngilaa, paarlattuanimmi taamatut aaqqissuussineq siulersuisut ulluinnarnilu pisortaasup akornanni - sulisunut naleqqiullugu - isumaqatigiinnginnernik pilersitsisinnaavoq. Siunertamut naapertuuttuusorineqarpoq ulluinnarni pisortaq - siulersuisunut akisussaalluni - nammineerluni ilinniarfiup sulisuinik atorfinitsitsillunilu soraarsitsisinnaappat.

Siunnersuutip kapitalia 3 - efterskolinik akuersineq - pillugu oqaaseqaatit

Efterskolit Allatseqarfiat (Efterskolernes Sekretariat) allappoq, inatsisissatut siunnersuummi § 7 ima paasillugu, akuersinissamut piumasaqaatit erseqqissarneqartut, kisiannili inatsitigut piumasaqaataanngitsoq Kalaallit Nunaanni efterskolip akuerineqarnissaa, efterskolip piumasaqaataasut piviusunngortikkaluarpagilluunniit.

Efterskolit akuerineqarnissaasa inatsitigut piumasaqaataannginnerat ilumoorpoq, tassami efterskolit akuerineqarnerat pisassaaq pisariaqartitsinerup aningaasaqarnikkullu periarfissat nalilereernerisigut.

Siunnersuutip kapitalia 4 - efterskolinut tapiissutit - pillugu oqaaseqaatit

Kalaallit Nunaanni Sulisitsisut Peqatigiiffiat isumaqarpoq, kapitali 4-p qulequtaani erseqqissaasoqartariaqartoq, ersarissumik saqqummersillugu pineqarmata Kalaallit Nunaanni efterskolit.

Tassunga atatillugu Naalakkersuisoqarfiup oqaatigissavaa, siunnersuutip atuuffissaa tassaammat Kalaallit Nunaat, taamaammallu annertunerusumik erseqqissaanissaq pisariaqanngimmat.

Kalaallit Nunaanni Sulisitsisut Peqatigiiffiat isumaqarpoq, aalajangersagaliortoqartariaqartoq kommunit efterskolernermut tapiissuteqarsinnaalersillugit.

Naalakkersuisoqarfiup tamanna siunertamut naapertuuttuusorinngilaa, kommunit taamaaliornissamik kissaateqarlutik oqaaseqanngimmata.

Sulisartut Højskoliata eqqaavaa, sapinngisamik taxameteri malillugu tapiissutit angajoqqaallu akiliutaat pinaveersaartariaqartut, paarlattuanillu efterskolit aningaasaqartinneqartariaqartut ilisimariinngisat amerlavallaat pinaveersaarlugit.

Tassunga atatillugu Naalakkersuisoqarfiup ilisimatitsissutigissavaa, efterskolinut taxameteri malillugu tapiissutit ilisimanngivissorneqartussanngimmata, tassami tapiissutit taakku tunniunneqartassapput efterskolit ilinniartuisa amerlassusaat malillugit, taamaattorli annerpaamik efterskolit ilinniartorisinnaasamittut nalunaarutigisaat naapertorlugit. Angajoqqaat akiliutaannut atatillugu oqaatigineqassaaq, angajoqqaat aningaasaqarnikkut ingerlalluartut qitornaasa kisimik efterskolertarnissaannik ernummateqarneq, annertunngitsutut isigisariaqarmat, tassami Inatsisartut inatsisissaattut siunnersuummi matumani aalajangersagaqarmat, ilinniartut efterskolernerannut akiliutissat isertitat malillugit appartinneqarsinnaanerannut tapiissuteqartarnissamik.

Sulisartut Højskoliata aammattaaq eqqaavaa, sapinngisamik angajoqqaat akiliutaat pinaveersaartariaqartoq, sissuertariaqartorlu taamaallaat ilaqutariit aningaasarissaartut qitornaasa kisimik efterskolertalinnginnissaat. Aammattaaq eqqaaneqarpoq Namminersornerullutik Oqartussat - angajoqqaat akiliuteqartassappata - akiliutissaraluanut akerneqanngitsunut qularnaveeqqusiisariaqartut.

Isertitat aallaavigalugit akiliutissat aalajangerneqartarnerisigut pinaveersaarniarneqarpoq, ilaqutariit aningaasarissaartut meeraasa kisimik efterskolertannginnissaat. Akiligassat qularnaveeqquserneqarnissaat siunertamut naapertuuttuunngitsutut isigineqarpoq, taamaaliornikkut angajoqqaat meeqqamik efterskolernerinut akisussaaffiiagaassammata, aamma taamatut aaqqissuussinerup nassatareriaannaammagu amerlavallaat akiliiumajunnaarnerat. Aammattaaq ilinniartunut Danmarkimi efterskolertunut atatillugu taammatut aaqqissuussisoqarnikuunngilaq.

Horsfeldt & Partnersip tikkuarpaa taxameteri malillugu tapiissutit angajoqqaallu akiliutaat isiginiartariaqartut ilinniartut sapaatip-akunnerisa naanerini feerianilu angerlarsinnaannginnerinut naleqqiullugit, tamatuma nassatarimmagu efterskolit aningaasartuuteqarnerusarnerat, perorsaanermut atasumik najuuttariaqarnerit, nerisaqartitsineq aamma atortut nalinginnaasumik nungullajaarneruneri/aserfallatsaalineruneri nassatarisarlugit. Knud Rasmussenip Højskoliata tamannarpiaq aamma tikkuarpaat, aamma Danmarkimi Kalaallillu Nunaanni kulturikkut assigiinngissutit tikkuarlugit annermillu Kalaallit Nunaanni efterskolinut atatillugu kulturikkut misilittagaqannginneq tikkuarlugu.

Naalakkersuisoqarfiup ilisimatitsissutigissavaa siunnersuummi pissutsit pineqartut eqqarsaatigineqareermata taxameteri malillugu tapiissutit angajoqqaallu akiliutaat nalilersorneqarmata.

Efterskolit Allatseqarfiat (Efterskolernes Sekretariat) isumaqarpoq, § 9-mi aalajangersagaqartariaqartoq ukioq naatsorsuuseriffik naatsorsuutillu tunniunneqarnissaannut piffissaliussaq pillugit, taamatullu ilinniarfiup naatsorsuutaasa kukkunersiortarnerannut tunngatillugu.

Naalakkersuisoqarfiup ilisimatitsissutigissavaa Namminersornerullutik Oqartussat naatsorsuuserinermut malittarisassaat nalinginnaasut maleruarneqassammata.

IMAK isumaqarpoq § 10, nr. 1 aamma 2 taarsertariaqartut imaalersillugit: "Pisortanut, pisortat tulliinut ilinniartitsisunullu akissarsiarititat atorfinitsitaanermilu atugassarititaasut Naalakkersuisut isumaqatigiissutaat aalajangersagaalluunniit malissavaat, soraarnerussutisiaqarnermut tunngasut ilanngullugit". Aammattaaq Aningaasaqarnermut Nunanullu Allanut Naalakkersuisoqarfik siunnersuuteqarpoq, efterskolit qitiusumik ilinniarfittut (brancheskolitut) ingerlanneqassasut, tassuunakkut Naalakkersuisut isumaqatigiinniarsinnaatitaaneq tigussammassuk.

Tassunga atatillugu Naalakkersuisoqarfiup oqaatigissavaa, aalajangersakkap siunertarimmagu, efterskolit suliffeqarfittut imminnut pigisutut isumaqatiginiagassanut naapertuuttunut namminneerlutik isumaqatigiissuteqarniarnissamut periarfissaqarnissaat.

Aammattaaq IMAK isumaqarpoq § 10, nr. 4-mi Naalakkersuisut ilikkagassatut anguniagassanik akuersinissaat piumasaqaatitut ilannguttariaqartoq.

Tassunga tunngatillugu Naalakkersuisoqarfiup eqqaassavaa, efterskolit suliffeqarfittut imminnut pigisutut ilikkagassatut anguniagassat aalajangersartussaammatigik, taamaattorli ilinniartunut suli atuartitaasussaatitaasunut atatillugu piumasaalluni atuartitsineq nalinginnaasumik meeqqat atuarfianni piumasaqaataasunut nallersuussinnaasasoq.

KANUKOKA-p ernumanartippaa tapiissutit annertussusaasa ukiumoortumik aalajangiunneqartarnissaat, tassami kattuffik isumaqarpoq, taamanna efterskolimut nalorninartunik nassataqassasoq, piffissamullu ungasinnerusumut pilersaarusiortarnissaq ajornakusoortilersinnaagaa.

Naalakkersuisoqarfiup tamanna ernumanartutut isiginngilaa. Piffissaq ungasinnerusoq eqqarsaatigalugu pilersaarusiornermi imaassinnaavoq ilaatigut akimmiffiusinnaasoq, kisiannili tamannarpiaq pissutigalugu ilimagisariaqarpoq tapiissutit ukiumiit ukiumut annertuumik allannguuteqartannginnissaat. Taamaattorli tapiissutit annertussusaat aalajangerneqartartussaassapput qaqugukkulluunniit sillimmatigisat taakkualu ukiumoortumik aningaasanut inatsisitigut pingaarnersiorneri aallaavigalugit.

Sulisartut Højskoliata § 13 naapertorlugu taxameteri malillugu tapiissutit - ukiup atuarfiusup siuliani ilinniartut amerlassusaat naapertorlugit naatsorsorneqartartussat - agguaanneranni annertunerusumik eqaassuseqarnissaq kissaatigaa.

Tassunga atatillugu Naalakkersuisoqarfiup malugeqqussavaa, Naalakkersuisut siunnersuummi § 13, imm. 4 naapertorlugu periarfissaqarmata, efterskolinut tapiissutit naatsorsorneqartarnerat, tunniunneqartarnerat aqutarinerallu pillugit - tassunga ilanngullugit ukiumut ilinniartut sapaatip-akunnerisalu atuartitsiviit naammassineqartut ikinneruneranni tapiissutit annikillisinneqarsinnaanerat - aalajangersagaliornissamut.

Kalaallit Nunaanni Sulisitsisut Peqatigiiffiat aamma IMAK isumaqarput efterskolit Kalaallit Nunaannut attuumassuteqartuunissaat piumasaasariaqartoq, tassuunakkut Naalakkersuisunit qularnaarneqaqqullugu efterskolinut akuerisaasunut tapiissutit Kalaallit Nunaanniiginnarlutillu Kalaallit Nunaanni atorneqarnissaat.

Naalakkersuisoqarfiup tassunga atatillugu eqqaassavaa efterskolit sumiiffinnut atasiakkaanut pituttugaammata sumiiffinni ataasiakkaani suliniuteqarneq aallaavigalugu angajoqqaallu nunatsinniittut tunuliaqutaralugit. Taamaammat tapiissutit Kalaallit Nunaanniiginnannginnissaat ernummatigissallugu pissuteqarpasinngilaq.

Kalaallit Nunaanni Sulisitsisut Peqatigiiffiata ernummatigaa txameteri malillugu tapiissutinik aalajangiisarneq tamannalu annerpaaffeqassanersoq.

Naalakkersuisoqarfiup tassunga tunngatillugu oqaatigissavaa taxameteri malillugu tapiissutit ilinniartullu amerlassusaat imminnut atammata, taamaalillunilu ukiut tamaasa tapiissutit annertussusaannut apeqqutaassammat ukiumi aningaasaliiffiusumi efterskolimi inissat amerlassusissaat.

Kalaallit Nunaanni Sulisitsisut Peqatigiiffiata ernummatigaa, Naalakkersuisut isertitat malillugit ilinniartunut tamanut tapiissuteqaqquneqarsinnaanerat, tassami Kalaallit Nunaannut attuumassuteqarnissaq piumasaqaataanngimmat.

Naalakkersuisoqarfiup eqqaassavaa, Kalaallit Nunaannut attuumassuteqarnissaq erseqqinnerusumik nassuiarneqanngimmat, tassami assersuutigalugu Danmarkimi ilinniartut ataasiakkaat Kalaallit Nunaanni efterskolersinnaanissaat periarfissikkumaneqarpoq, soorlu ilinniartut kalaallit Danmarkimi efterskolernissaminnut periarfissaqartut. Taamaammat Kalaallit Nunaannut attuumassuteqarnissaq piumasarineqanngilaq.

Kalaallit Nunaanni Sulisitsisut Peqatigiiffiat aamma SIK isumaqarput, tapiissuteqarnermi angajoqqaat malunnaatilimmik isertitamikkut allanngortoorsinnaanerat sillimaffigisariaqartoq.

Siunnersuut taanna inatsisissatut siunnersuummut ilanngunneqarpoq.

Kalaallit Nunaanni Sulisitsisut Peqatigiiffiat aamma IMAK siunnersuipput, § 15-imi allassimasariaqaraluartoq Naalakkersuisut angerlarsimaffiup efterskolillu akornanni juullikkunilu angalanernut akiliuteqassasut.

Naalakkersuisoqarfiup eqqaassavaa, siunnersuut allanngortinneqarmat, Naalakkersuisut ilinniartunut aallartinneranni, ilinniarnerminnik kipititsineranni naammassinerannilu angalanernut aningaasartuutit akilertussanngorlugit taamatullu qanigisat perulunneranni toqunerannilu angalanernut aningaasartuutit akilissallugit. Juullikkunni angalanernut atatillugu Naalakkersuisut siunnersuutigaat, periuseq maannamut atuuttoq attatiinnarneqassasoq, taamaalillunilu ilinniartut juullikkunni angalanerminni akiliunneqartassanngitsut – tamannalu assigiimmik Danmarkimi Kalaallillu Nunaanni efterskolertunut atuutissasoq.

Sulisartut Højskoliata tikkuarpaa § 15-imut qanigisat toquneranni angalanerit ilannguttariaqartut. Tamanna siunnersuummut ilanngunneqarpoq.

IMAK-kip qularnaarusuppaa, aalajangersakkap nassatarissanngikkaa aningaasat meeqqat atuarfiannut atugassat sunnerneqarnerat. Knud Rasmussenip Højskoliata apeqquserpaa § 16-ip nassatarisaanik suut anguneqarumaarnersut.

Efterskolini sulisut ilinniaqqinnerinut ingerlaqqiffiusumillu ilinniarnerinut aningaasanik immikkoorsineq ukiumoortumik aningaasanut inatsitigut pisassaaq.

Horsfeldt & Partners isumaqarpoq, § 16, imm. 1-imut teknikkikkut allaffissornikkullu sulisut sulisullu allat ilannguttariaqartut, aamma imm. 1-imi taaneqartunut ilisarititsilluni ilinniaqqilluni ingerlatsinissanut tapiisoqarnissaa pisussaaffiusariaqartoq.

Tassunga tunngatillugu Naalakkersuisoqarfiup eqqaassavaa, siunertaanngimmat efterskolini sulisunut assigiinngitsunut pikkorissartitsinernut ilinniaqqinnernullu siumoortumik aalajangereersimasunut Naalakkersuisut tapiisarnissaat. Taamaammat Naalakkersuisut siunnersuutigaat efterskolit atuarfiit namminersortut assigalugit Inerisaaviup Ilinniarfissuullu pikkorissartitsinerinut qinnuteqarnissamut periarfissaqassasut.

Aammattaaq Horsfeldt & Partners-ip siunnersuutigaa efterskolit immikkut atuartitsiffiusut pillugit nutaamik aalajangersagaliortoqassasoq, taanna malillugu efterskolit immikkut saaffiginnittut pilersinneqarsinnaalissapput efterskolinullu nalinginnarnut naleqqiullutik immikkut tapiiffigineqarsinnaallutik.

Tassunga atatillugu eqqaaneqassaaq, Ilinniartitaanermut Naalakkersuisoqarfiup Ilaqutariinnut Peqqinnissamullu Naalakkersuisoqarfik suleqatigalugu ajornartorsiut eqqartorsimammassuk, aamma suleqatigiissitanik pilersitsisoqarnikuummat, inuit qulaani pineqartut pitsaanerusunik neqeroorfigineqarsinnaanissaat siunertaralugu.

Horsfeldt & Partners-ip aammattaaq inassutigaa, immikkut atuartitsinermut immikkullu perorsaanikkut ikiorsiinermut tapiissutit aalajangersaaffigineqarnissaasa tungaannut, Naalakkersuisut efterskolit tapiiffigisassagaat, ilinniartup meeqqat atuarfiani ukioq kingulleq angajullerni atuarnermini tapiissutigisimasaasa annertoqqataanik.

Tamanna siunertamut naapertuuttutut isigineqangilaq.

Knud Rasmussenip Højskoliata kissaatigaa aningaasat ukiumi aningaasaliiffiusumi atunngitsut ukiup tullianut nuunneqartassasut, aningaasaliissutaasunut sunniuteqanngitsumik.

Tamanna siunnersuummi § 18, imm. 2-mut ilanngunneqareerpoq.

Inatsisartut Allattoqarfianni inatsisilerinermut immikkoortup siunnersuummi § 18, imm. 2 oqaaseqarfigaa, tassanilu ujartorlugit siunnersuummi aningaasaliissutit atorneqanngitsut ukiup naatsorsuiffiup tullianut nuunneqarsinnaanissaannut periarfissiinerup tunuliaqutarisai..

Naalakkersuisoqarfiup erseqqissassavaa, efterskolit - tunngaviusumik atuarfiit imminnut pigisut assigalugit - sinneqartoorutimik ukiup naatsorsuuseriffiusup tullianut ileqqaarnissaq periarfissarisariaqaraat. Taamaaliornikkut efterskolit namminneerlutik katersisinnaapput, assersuutigalugu atuartitsinermi atortussanik, atortunik pisattanillu ukiumi aningaasaliiffiusumi matussuserneqarsinnaanngitsunik pisinissaminnut.Taamaattoq erseqqissarneqassaaq tapiissuteqarnermut piumasaqaataammat, atuartitsineq tapiiffigineqartoq naammassineqassasoq malittarisassat atuuttut naapertorlugit, aamma ilinniartut tapiiffigineqartut amerlassusaat naapertorlugit, taamatuttaaq efterskolit akuerisaassagunik sinneqartoorutimik qanoq atornissaat nassuiartussaammassuk, akuersissullu tunuartinneqarsinnaammat efterskolip § 7, imm. 1-imi piumasaqaatit naammassisinnaajunnaarpagit. Kiisalu tapiiffigineqarnissamut piumasaqaataavoq, efterskolit sammisassanut pilersaarutaat Naalakkersuisunit akuerineqarsimassasoq, tak. § 10, nr. 4.

KANUKOKA-p malugeqquaa, sumiiffinni ataasiakkaani Siunnersuisarfiit (PPR) kommunimi efterskoliliortoqarpat suliassaqarnerulissasut, tamannalu Naalakkersuisut § 16 naapertorlugu malittarisassiorneranni ilanngullugu eqqarsaatigisariaqartoq. KANUKOKA-p tamanna pillugu siunissami suleqatigiinnissaq peqataaffigerusuppaa.

Naalakkersuisoqarfiup ilisimatitsissutgissavaa, tamanna pillugu suleqatigiinnissaq siunertaammat.

Inatsisartut Allattoqarfiani inatsisilerinermut immikkoortup maluginiarpaa inatsisissatut siunnersuutip Kalaallit Nunaanni avataanilu efterskolernermut tapiisarnerit pillugit malittarisassai equngassuteqartut. Taamaalilluni inatsisissatut siunnersuutip §§ 14 aamma 15-iani Naalakkersuisut Kalaallit Nunaanni efterskolernermut tapiisarneri pillugit pingaarnerusutigut malittarisassanik aalajangersaasoqarpoq, kisiannili Kalaallit Nunaata avataani efterskolernermut atatillugu Naalakkersuisut tamakkiisumik malittarisassiorsinnaatitaallutik, tak. § 20, imm. 2.

Oqaaseqaammut tassunga atatillugu § 20 ilaneqarpoq.

Siunnersuutip kapitalia 6 – aalajangersakkat assigiinngitsut – pillugit oqaaseqaatit

Kalaallit Nunaanni Sulisitsisut Peqatigiiffiat isumaqarpoq, § 21-mi nakkutilliineq taaneqartoq qanoq kinguneqassanersoq erseqqissartariaqartoq.

Naalakkersuisoqarfiup erseqqissassavaa, efterskolit ulluinnarni ingerlatsinerannik aqutsineq siulersuisunit pisortamillu ingerlanneqassammat, tak. §§ 4, 5 aamma 6, aammattaaq tapiissuteqartoqassappat piumasaqaatit piviusunngortinneqarsimasariaqarput, tak. § 9. Aaammattaaq § 1, imm. 4-mi aalajangersagaqarpoq, efterskolit ilinniartunik suli atuartitaasussaatitaasunik atuartitsissasut meeqqat atuarfianni nalinginnaasumik piumasaqaataasunut naapertuuttumik. Aalajangersakkat taakku Naalakkersuisut efterskolinik nakkutilliinerannut tunngaviussapput, tak. § 21.

Kalaallit Nunaanni Sulisitsisut Peqatigiiffiata aamma IMAK-kip ernummatigaat, efterskolit misiliilluni pilersitat inatsitigut inissisimanerat, siunertamullu naapertuutinngitsutut isigalugu siunnersuut aatsaat 1. januar 2009-miit atuutuulissappat.

Naalakkersuisoqarfiup oqaatigissavaa ukiumi atuarfiusumi 2008/2009-mi efterskolitut atuartitsineq højskolit ingerlassaat, misileraalluni atuartitsinertut ingerlanneqarmat, Naalakkersuisut, Sulisartut Højskoliata aamma Knud Rasmussenip Højskoliata akornanni isumaqatigiinnerup kingorna, taamaalillunilu malittarisassat højskolinut atuuttut ataanni inissisimammata.

Horsfeldt & Partners-ip eqqaavaa, inatsissap oqaasertaasigut isummerfigineqarsimanngimmat, ilinniartoq assersuutigalugu Kalaallit Nunaanni efterskolereeruni Danmarkimi efterskolernissaminut qinnuteqarlunilu tapiiffigineqarsinnaassanersoq.

Tassunga tunngatillugu eqqaaneqassaaq, pissutsit pineqartut inatsisip pingaarnertut atuuffissaanut - tassalu Kalaallit Nunaanni efterskolernermut - ilaanngimmata, taamaattorli pineqartut pillugit Naalakkersuisut malittarisassaliorsinnaammata inatsisissatut siunnersuummi § 20, imm. 2 naapertorlugu.

Horsfeldt & Partners-ip aammattaaq inerikkiartornermikkut innarluutillit Danmarkimi efterskolissatillutik alakkaasinnaanerinut tunngasut oqaaseqaateqarfigai.

Tamannattaaq Naalakkersuisut § 20, imm. 2 naapertorlugu malittarisassiuussinnaasaasa ilagaat.

Kiisalu Horsfeldt & Partners-ip eqqaavaa, ilaqutariit meeqqaminnik arlalinnik marlulissanilluunniit ataatsikkut ukiulluunniit malitsiinnarlugit efterskolertuutillit, meeqqap aappaanut 50 %-imik annertusisamik tapiiffigineqartariaqaraluartut.

Pineqartoq Aningaasanut Inatsisikkut aaqqiivigineqassaaq.

 

Inatsisissatut siunnersuutip aalajangersagaanut ataasiakkaanut oqaaseqaatit

§ 1-imut

Aalajangersakkami ersarissarneqarpoq efterskolit ingerlatsinerannut siunertaammat atuartitsinermik ataatsimooqatigiinnermillu neqerooruteqarnissaq, tamatigoortumik qaammarsaanissaq demokratiskiusumillu peroriartornissaq pingaarnertut anguniagaralugit. Atuartitsineq tamatigoortuussaaq. Imaappoq atuartitsissutini anguniakkat atuartitsinerup tamatigoortumik imaqarnissaanut naleqqiullugit pingaarninngussanngitsut. Efterskole suliffeqarfiuvoq imminut pigisoq, atuartut tamarmiusumik inuttut inerikkiartornissaannik, inersimasunngoriartornerannik, nalinginnaasumik perorsagaanissaannik ilinniarnissaannillu suliaqartoq, pingaartitatut tunngaviit efterskolip siulersuisuisa namminneq toqqagaat aallaavigalugit.

Aammattaaq Kalaallit Nunaanni efterskolit aammattaaq siunertaraat inunnut, Danmarkimi efterskolinit neqeroorfigineqartartunit allaanernut saaffiginninnissaq. Imaappoq ilinniartunut, Danmarkimi efterskolertilluni tapiiffigineqarnissamut naammattumik qallunaat oqaasiinik piginnaasaqanngitsunut, allamilluunniit peqquteqarlutik Kalaallit Nunaanniiginnarusuttunut saaffiginnikkamik.

Imm. 1-imut

Aalajangersakkami tassani aalajangerneqarpoq Kalaallit Nunaanni efterskolit tassaasut suliffeqarfiit imminnut pigisut, atuartitsinermik ataatsimooqatigiinnermillu neqerooruteqarfiusut. Ilinniartut efterskolimi najugaqarlutillu atuartinneqartussaammata, efterskolit ilinniarfinnut allanut naleqqiullugit nallernissaqanngitsumik periarfissaqarput, ilinniartut inuttut tamakkiisumik inerikkiartortinnissaat siunertaralugu sulinissaminnut. Taamaammat efterskolit atuartitsinerminni ataatsimooqatigiinnermilu ilinniartup demokratiskiusumik peroriartornissaata ineriartornissaatalu sulissutiginissaa periarfissaqarfigilluarpaat, najukkami, nunagisami nunarsuarlu tamakkerlugu isiginneriaatsit aallaavigalugit.

Demokratiskiusumik peroriartornerup siunertaraa ilinniartup tamakkiisumik inuttut inerikkiartornissaanik inersimasunngoriartorneranillu ikorfartuinissaq, sapinngisarlu naapertorlugu ilinniartup nammineq ilisimasai misilittagaalu aamma angajoqqaat perorsaanerat siusinnerusukkut angerlarsimaffimmi pisimasoq ataqatigiisilissallugit. Demokratiskiusumik peroriartornerup aammattaaq efterskolimi atuartitsinerup ilinniartullu atuarfimmit, angerlarsimaffimminit najukkaminillu ilisimariigaasa ataqatigiissilernissaat sapinngisamik annertunerpaamik ikorfartussavaa.

Imm. 2-mut

Efterskolip ilinniartitsinermini atuartitsissutini ataasiakkaanik imaluunniit atuartitsissutinik qanitariissunik ilinniartitsineq pingaartissinnaavaa. Kisiannili ilinniartitsinerup tamatigoortumik iluseqarnissaa efterskolip ingerlatsinerani tamarmi annertuumik pingaartinneqassaaq. Taamaammat ilinniartitsineq ataatsimoornerillu tamarmik neqeroorutigineqassapput ilinniartup silappaarissutsimigut, timikkut, inooqatigiinnikkut misigissutsimigullu ineriartornissaanik annertusaanissaq siunertaralugu. Ilinniartitsinermi tamarmi ilinniartup ineriartornissamut periarfissai piginnaasaalu pingaartillugit ilaatinneqassapput.

Assersuutigalugu atuartitsineq taamaallaat atuartitsissutini ilisimasariaqartunik tunngaveqassanngilaq, inooqatigiissutsikkut misigissutsitigullu piginnaasat minillugit. Efterskolimi ilinniartitsineq pitsaasoq tassaavoq ilinniartitsineq ilinniartumi ilikkariartornermik ineriartornermillu pilersitsisoq, aamma ilinniartup silappaarissutsikkut, inooqatigiinnikkut, timikkut misigissutsitigullu piginnaasaanut atassusiisoq. Ilutigisaanik tamatigoortumik ilinniartitsineq ilinniartitsinermi ersarississaaq sammisat mernguernartut, timersuutit eqqumiitsuliornermullu attuumasut attaveqatigiinnermi aaqqissuussaasumik naqisimaneqanngitsumillu aaqqissuussinerit aqqutigalugit.

Tamatigoortumik perorsaaneq ilinniartitsinerlu, atuartitsinerup tamatigoortumik peroriartortitsineranik aamma taaneqartartoq, amerlanertigut tassaasarpoq ilinniartitsinerup ilaa tigussaasuunngitsoq. Ilinniartitsinerup ilaa tigussaasuunngitsoq tamanna, atuarfinni suliaqartuusut ilaannit taaneqartarpoq "ilikkagassatut pilersaarut ersinngitsoq", tassami ilinniartitsinerup ilaa tamanna nalinginnaasumik ilinniartunut ilinniartitsisunullu takussaasuusanngilaq.

Kisianni efterskolip ilinniartitsinerani ilinniartitsinerup ilaa taanna ersarissunngortinneqassaaq, efterskolit ataasiakkaat namminneq toqqakkaminnik pingaartitatut tunngavigisaata ersarissumik oqaasertalerneratigut. Efterskolip nammineq toqqakkaminik pingaartitatut tungavissaminik oqaasertalersuineratigut siunertaanngilaq, ilinniartut efterskolip pingaartitai namminneq pingaartitamittut ineriartortissagaat. Efterskolip pingaartitaasa ersarissunngortinnerisigut siunertaavoq ilinniartut namminneerlutik pingaartitaminnik oqariartuuteqarsinnaalernissaat, namminneerlutik eqqarsaatersuutitik naapertorlugit.

Efterskolip nammineq toqqakkaminik pingaartitatigut tunngavissaminik oqaasertaliinera ilutigalugu, ilinniartitsinerup tigussaasuunngitsortaanik - imaluunniit "ilikkagassatut pilersaarutinik ersinngitsunik" - ersarissaanissamut pingaarutilimmik sakkussaqartoq. Ilutigisaanillu efterskolip pingaartitatigut tunngavigisaa ataatsimoornermi aaqqissuussanik namminerlu toqqakkanik sammisaqarnissamut tunngavissiivoq, efterskolip anguniagaanut pingaartitaanullu naapertuuttumik. Pingaartitatigut tunngaviit ersarissakkat demokratiskiusumik peroriartornerup - efterskolip ilinniartitsinerata ataatsimooqatigiinnerullu siuarsagassaasa ilagisaata - pingaaruteqarluinnartumik toqqammavigai.

Ilinniartut angajoqqaallu efterskolimut qinnuteqartoqannginnerani nalunngeriissavaat pingaartitat suut ilinniartitsinermut ataatsimooqatigiinnermullu tunngaviunersut. Ilinniartut angajoqqaallu ataasiakkaat efterskolip pingaartitatigut tunngavii isumaqatiginngikkaluarpatigilluunniit, efterskolip demokratiskiusumik tunngaviisa qularnaassavaat ilinniartitsinerup ataatsimooqatigiinnerullu ilinniartunik tamanik inissaqartitsinissaq, pingaartitatigut tunngaviit isumaqatigineqanngikkaluarpataluunniit. Efterskolip pingaartitatigut tunngaviisa ersarissuunerisigut ilinniartut, ilinniartitsisut angajoqqaallu periarfissinneqassapput efterskolip pingaartitai pillugit oqallinnissamut, tassuunakkullu nammineq pingaartitat oqariartuutiginissaat periarfissinneqassalluni, demokratiskiusumik peroriartornermi tunngaviit naapertorlugit.

Imm. 3-mut

Efterskole akuerisaassaguni taamaalillunilu Namminersornerullutik Oqartussanit tapiissutinik qinnuteqarsinnaalissaguni Naalakkersuisunit - imaluunniit ulluinnarni Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfimmit - akuerisaasariaqarpoq § 7, imm. 1-imi aalajangersakkat naapertorlugit.

Imm. 4-mut

Aalajangersakkami efterskolit atuartitsinerisa pingaarnerusutigut sinaakkutissaat aalalajangersarneqarput. Aalajangersakkami efterskolit pisinnaatinneqarput ilinniartitsinermik neqeroornissaannut pisussaaffilerneqarlutillu atuartitsinerup meeqqat atuarfiani nalinginnaasumik piumasaqaataasunut nallersuussinnaanissaanik. Aalajangersagaq ima paasineqassaaq efterskolit atuartitsissutit qanitariissut – meeqqat atuarfianni fagit pissusissamisuuginnartumik aguuaanneqarfigisinnaasaasa - iluanni neqerooruteqassasut. Piumasaanngilaq meeqqat atuarfiani atuartitsissutaasartut tamarmik neqeroorutaanissaat.

Imm. 5-imut

Aalajangersakkami aalajangerneqarpoq ilinniartut atuartitaasussaatitaasut meeqqat atuarfianni inaarutaasumik naliliinernut misilitsinnernullu qaqugukkulluunniit atuuttunut piareersaataasumik atuartitsinermik neqeroorfigineqassasut. Aalajangersakkap qularnaarniarpaa efterskolini atuartitsinerup pitsaassusaata meeqqat atuarfiannisut attatiinnarneqarnissaa, efterskolit atuartitsinermik namminneq ilusilersuisinnaanerannik killilersunngikkaluarlugit.

Imm. 6-imut

Aalajangersakkami aalajangerneqarpoq ilinniartut ukiumikkut atuartitaasussaatitaajunnaareersut meeqqat atuarfianni inaarutaasumik naliliinernut misilitsinnernullu qaqugukkulluunniit atuuttunut innersuunneqarsinnaasut. Aalajangersakkap ilinniartut ukiumikkut atuartitaasussaatitaajunnaareersut periarfissippai – pisussaaffilinngikkaluarlugit – meeqqat atuarfianni inaarutaasumik nalilertinnissamut misilitsinnissamullu.

Imm. 7-imut

Aalajangersakkami aalajangiunneqarpoq Naalakkersuisut efterskolit pisortaat pisinnaatissagaat, inaarutaasumik naliliinerit misilitsinnerillu pillugit malittarisassat qaqugukkulluunniit meeqqat atuarfiannut atuuttut naapertorlugit naliliinernik misilitsinnernillu ingerlatsisinnaatillugu.

Imm. 8-mut

Aalajangersakkap Naalakkersuisut pisinnaatippaat efterskolip inaarutaasumik naliliinermut misilitsinnermullu malittarisassat meeqqat atuarfiannut qaqugukkulluunniit atuuttut naapertorlugit ingerlatsisinnaaneranik atorunnaarsitsinissamut, efterskolip malittarisassat qaqugukkulluunniit meeqqat atuarfianni inaarutaasumik naliliinermut misilitsinnernullu atuuttut maleruanngippagit. Aalajangersakkakkut qularnaarniarneqarpoq naliliinerit misilitsinnerillu ingerlanneqartut qaffasissusaasa appartinneqannginnissaat.

§ 2-mut

Imm. 1-imut

Aaalajangersakkami tassani aalajangerneqarpoq, efterskolip nammineerluni ilinniartoriniakkani akuerisassagai. Tamanna efterskolip suliffeqarfittut imminut pigisutut pilersinneqarlunilu ingerlanneqarnissaanut naapertuuppoq, tak. § 4.

Imm. 2-mut

Naalakkersuisut pisinnaatinneqarput ilinniartussanik qinnuteqartitsinermi akuersinermilu periusissat pillugit malittarisassiornissamut. Tamannali aatsaat pisinnaavoq efterskolit oqaaseqaateqartereernerisigut. Aalajangersakkami siunertarineqarpoq ilinniartut Kalaallit Nunaanniit tamarmeersuunissaasa qularnaarnissaat, aamma ilinniarfimmut suna akikinnerunersoq apeqquttaatillugu ilinniartortaartoqartannginnissaa anguniarlugu. Taamaattoq "-sinnaapput" atorneratigut tikkuarumaneqarpoq, aallaavittut efterskolit namminneerlutik imm. 1 malillugu ilinniartussaminnik akuersisassasut.

§ 3-mut

Aalajangersakkami aalajangerneqarpoq, efterskolimi ilinniartoq ukiut 8-t naammassillugit atuarsimassasoq imaluunniit 14-inik ukioqalersimassalluni 18-inillu ukioqalereersimassanani. Naalakkersuisut aalajangersagaliorsinnaapput, immikkut pisoqartillugu qaqugukkut 18-inik ukioqalereersimasut ilinniartutut akuerineqarsinnaanersut. Immikkut pisoqartillugu 18-inik ukoqalereersimasunik ilinniartunngortitsisinnaanissamut pisinnaatitsinermut tunuliaqutaavoq, inuusuttut 18-inik ukioqalereersimagaluartut efterskolersinnaanissaannut periarfissiinissamik kissaateqarneq.

§ 4-mut

Aalajangersakkami aalajangerneqarpoq efterskolit - højskolit assigalugit - suliffeqarfittut imminnut pigisutut ingerlanneqassasut. Tamatuma nassataraa efterskolimik aqutsisoqassappat siulersuisunik pilersitsisoqartariaqartoq. Siulersuisut Naalakkersuisunut akisussaassapput, ingerlassanut Nunatta Karsianit aningaasaliiffigineqartunut naleqqiullugu. Taamaattoq aalajangersagaq § 6-imi aalajangersakkamut atatillugu isiginiarneqassaaq, tassani ersimmat efterskolip pisortaa tassaasoq perorsaanikkut aamma efterskolip ulluinnarni aqutarineranut akisussaasoq.

Siunnersuutip oqaasertalernera tunngavigalugu ajornaquteqanngilaq assersuutigalugu højskolip pioreersup efterskolimik ingerlatsisinnaanera.

§ 5-imut

Imm. 1-imut

Aalajangersakkami pineqarput siulersuisut suliassaasa ilaat - efterskolip ingerlatsineranut aamma piffissaq ungasinnerusoq eqqarsaatigalugu ineriartortinnissaanut atatillugu. Siulersuisut efterskolip piffissami qaninnerusumi ungasinnerusumilu ingerlatsinissaanut siulersuisut tunaartarisassaliussapput. Aammattaaq siulersuisut isumagissavaat piffissami aalajangersimasumi - soorlu ukioq atuarfiusoq tamaat - ingerlatassat pilersaarusiorneqarnissaat. Ingerlatassatut pilersaarusiat Naalakkersuisunut akuerisassatut saqqummiunneqassapput. Siulersuisut Naalakkersuisunut akisussaaffigaat, ingerlanneqartut § 1-imi siunertaq pillugu aalajangersakkanut naapertuuttuunissaat, taakkununnga ilanngullugit ilinniartitsinerup tamatigoortuunissaa, atuartitsinermik ataatsimoornissamillu neqerooruteqarnissaq, atuartut inuttut tamakkiisumik inerikkiartornissaat, kiisalu nalinginnaasumik perorsarneqarlutillu ilinniarnissaat siunertaralugu tamanut paasissutissiinissamik demokratiilu tunngavigalugu peroriartornissamik pingaarnertut anguniagaqarnissaq, ingerlatsinerullu tamatuma efterskolip pingaartitatut nammineerluni toqqagai tunngavigalugit aaqqissuunneqarnissaa, tak. § 1.

Imm. 2-mut

Aalajangersakkami aalajangerneqarpoq siulersuisut kisimik pisortamik atorfinitsitsinissamut soraarsitsinissamullu pisinnaatitaallutillu akisussaasut.

Imm. 3-mut

Aalajangersakkap erseqissarpaa, siulersuisut efterskolimut ileqqoreqqusaliussasut. Siulersuisut Naalakkersuisunut ileqqoreqqusap akuersissutiginissaa inassutigissavaat, tak. § 7, imm. 2. Aammattaaq siulersuisut suliassaraat ulluinnarni suleriaasissiornissaq. Aalajangersakkap taassuma qularnaassavaa, siulersuisut sulinerannut tunngavissiortoqarnissaa, tassunga ilaallutik siulersuisut katitigaanerat ingerlatassaallu allat, tassuunakkut aalajangiinissamut pitsaanerpaanik tunngavissiisoqaqqullugu.

§ 6-imut

Imm. 1-imut

Aalajangersakkami aalajangersarneqarpoq pisortaq tassaasoq efterskolip ingerlatsineranut perorsaanikkut qullersaalluni akisussaasuusoq, taamaalillunilu pisortap siulersuisut aalajangersagaasa piviusunngortinnissaat isumagisassarigaa. Aammattaaq pisortap pisussaaffigaa, efterskolimi ulluinnarni aqutsinerup allaffissornikkut ingerlatsineq, naatsorsuuserineq kukkunersiuinerlu pillugit malittarisassat atuuttut naapertorlugit ingerlanneqarnissaa, kiisalu aqutsinerup siulersuisut tunaartarisassaliaat naapertorlugit isumagineqarnissaa pisussaaffigaluguttaaq.

Imm. 2-mut

Aalajangersakkami aalajangerneqarpoq, pisortap efterskolimi sulisut sinnerisa atorfinitsinnissaat soraarsinnissaallu akisussaaffigigaa. Sulisunik atorfinitsitsineq pissaaq, efterskolip ingerlatsinissaa pillugu ingerlatassatullu pilersaarutit siulersuisut aalajangersagaasa tunaartarisassaliaasalu piviusunngortinneqarnissaat siunertaralugu. Pisortap efterskolimik ulluinnarni aqutsinermigut ilisimalluarnerpaavaa, qanoq iliorluni nukissat pitsaanerpaat suliassat isumaginissaannut atorneqassanersut. Taamaammat siunertamut naapertuunnerpaavoq pisortap efterskolip sulisui atorfinitsittarpagit, tassuunakkut suliamut tunngasutigut ikorfartoqatigiinneq pitsaanerpaaq pilersinneqaqqullugu.

§ 7-imut

Imm. 1-imut

Aalajangersakkami Naalakkersuisut efterskolit akuerinissaannut sinaakkutissanik aalajangersaasinnaanerat aalajangersarneqarpoq. Naalakkersuisut taamaallaat efterskolit akuerisinnaavaat, efterskolip ileqqoreqqusaa, tak. Imm. 2, Naalakkersuisunit akuerineqarsimappat, efterskolilu naapertuuttunik inissaqarlunilu atortoqarpat

"Akuerisinnaavaat"-mik oqaasertaliinikkut, pineqanngilaq akuerisaanissaq inatsisitigut pisinnaatitaaffiusoq, tassami efterskolinik akuersinermut ilaatigut tunngaviusussaapput piumasaqaatit taaneqareersut aamma Aningaasanut Inatsimmi siunertamut aningaasaliussat.

Imm. 2-mut

Aalajangersakkami aalajangerneqarpoq ileqqoreqqusap minnerpaamik suut imarissanerai. Siulersuisut namminneq qulequttat naapertuuttut ileqqoreqqusamut ikkussinnaavaat. Assersuutigalugu siulersuisut suleriaasissaat ileqqoreqqusamut ilanngunneqarsinnaavoq.

Nr. 1-imut

Aalajangerneqarpoq suliffeqarfiup imminut pigisup aqqa ileqqoreqqusami ilanngunneqassasoq.

Nr. 2-mut

Aalajangerneqarpoq efterskolip ileqqoreqqusaani suliffeqarfiup imminut pigisup angerlarsimaffia ilanngunneqassasoq.

Nr. 3-mut

Aalajangerneqarpoq suliffeqarfiup imminut pigisup siunertaa efterskolip ileqqoreqqusaani ersissasoq.

Nr. 4-mut

Aalajangerneqarpoq ileqqoreqqusani ersissasut suliffeqarfiup imminut pigisup pigisaasa pilersinneqarnerminilu imminerisaminik aningaasaataasa annertussusaat.

Nr. 5-imut

Aalajangerneqarpoq pilersitsisoq allalluunniit immikkut pisinnaatitaaffeqarpat iluaqutissaqarluniluunniit tamanna ileqqoreqqusami allassimassasoq.

Nr. 6-imut

Aalajangerneqarpoq siulersuisunut ilaasortat katitigaanerat amerlassusaallu, qanoq toqqarneqartarnerat piffissallu atuuffiisa sivisussusaa ileqqoreqqusami allassimassasoq.

Nr. 7-imut

Aalajangersakkami aalajangerneqarpoq naatsorsuinermut malittarisassat ileqqoreqqusami allassimassasut.

Nr. 8-mut

Aalajangersakkami aalajangerneqarpoq, ileqqoreqqusani allassimassasoq sinneqartoorutit qanoq atorneqassasut.

Imm. 3-mut

Aalajangersakkap erseqqissarpaa, efterskolip siuilersuisuisa qaammatisiutit malillugit ukiumi efterskolip aallartiffissaatut pilersaarutaasumi kingusinnerpaamik 1. marts ileqqoreqqusat akuerisaasut Naalakkersuisunut nassiutereersimassagaat. Siulersuisut ileqqoreqqusanik ukiup atuarfiusup aallartinnginnerani Naalakkersuisunut nassiussinissaannut pissutaavoq, Naalakkersuisut qularnaarumammassuk, efterskolip ingerlanneranut aqutsisussamik sulisinnaassuseqartumik siulersuisoqarnera.

§ 8-mut

Imm. 1-imut

Aalajangersakkami aalajangiunneqarpoq, Naalakkersuisut efterskolimik akuersissummik atorunnaarsitsisinnaasut, taassuma § 7, imm. 1-imi piumasaqaataasut piviusunngortissinnaajunnaarpagit. Aamma Naalakkersuisut akuersissummik atorunnaarsitsisinnaapput efterskolip ilinniartitsinera ingerlassaaluunniit allat § 1-imi siunertatut aalajangersakkanut akerliuppata.

Imm. 2-mut

Naalakkersuisut akuersissummik atorunnaarsitsisinnaapput, efterskolip ilinniartitsinera pissutsillu allat § 1-imi siunertatut aalajangersakkanut, tak. § 7, imm. 1, naggatit aappaat, ersarissumik akerliusutut nalilerneqarpata, taamaattorli aatsaat pissutsit efterskolit siunertaannut naapertuutinngitsut aaqqiiviginiarlugit sakkortunnginnerusunik aaqqiissuteqaqqusilluni peqqusisoqareersimappat. Taamaalilluni aalajangersakkap matuma qularnaarpaa efterskolip siulersuisuisa ilinniartitsinerup pissutsilluunniit allat § 1-imi aalajangersakkanut akerliusut aaqqinniarnissaannut periarfissaqarnissaat, Naalakkersuisut akuersissummik atorunnaarsitsilinnginneranni.

§ 9-mut

Aalajangersakkami aalajangerneqarpoq, efterskole inatsit manna naapertorlugu tapiiffigineqarsinnaassaguni Naalakkersuisunit akuerisaasariaqartoq aamma tapiinissamut piumasaqaatit §§ 10 – 11-miittut piviusunngortissagai.

§ 10-mut

Aalajangersakkami aalajangersarneqarpoq, Naalakkersuisut efterskolinut akuerisaasunut tapiissuteqartartut aningaasat Inatsisartut Aningaasanut Inatsisaanni aalajangersarneqartut iluanni (tunngaviusumik tapit, taxameteri malillugu tapit, ilinniartut akiliutaannik apparsaanissamut isertitat aallaavigalugit tapit). Ilinniartunut akiliutip appartinnissaanut isertitat aallaavigalugit tapiissuteqartarnissamik aalajangersakkap ilaatigut qularnaassavaa, ilaqutariit aningaasarissaartut meeraasa kisimik efterskolertannginnissaat.

Efterskolimut akuerisaasumut tapiisoqartarpoq piumasaqaatit nr. 1 – 4-mi taaneqartut tunngavigalugit.

Nr. 1-imut

Aalajangersakkami aalajangiunneqarpoq pisortamik ilinniartitsisunillu akissarsiaqartitsinerit Naalakkersuisut isumaqatigiinniarfigisinnaasaasa iluanni atorfinnut assingusunut malittarisassat naapertorlugit pissasut. Aammattaaq aalajangersakkap qularnaassavaa, atorfinitsitsinermi atugarissarititaasut allat allakkatigut isumaqatigiissutigineqarsimanissaat. Aalajangersakkamut siunertaavoq ilaatigut sulisut akissarsianut tunngasutigut atorfininnermilu atugassarititaasutigut allatigut pisinnaatitaaffiisa qularnaarnissaat. § 10, nr. 1-imi taamaallaat efterskolit pisortaat ilinniartitsisuilu aalajangersaaffigineqarput, aalajangersakkakkut siunertarineqarmat efterskolit namminneerlutik isumaqatiginiaqatigisassanik naapertuuttunik isumaqatigiinniarnissaannut periarfissinnissaat.

Nr. 2-mut

Aalajangersakkap qularnaassavaa efterskolip pisortaata ilinniartitsisuisalu naammaginartunik soraarnerussutisiaqarnissaat.

Nr. 3-mut

Siulersuisut isumagissavaat ukiumoortumik nalunaarusiorneq, naatsorsuutit saqqummiunnerinut ilutigitillugu. Aalajangersakkap siunertaraa Naalakkersuisut efterskolimik akueriseqqinnissaminnut pitsaanerpaamik toqqammavissaqarnissaasa qularnaarnissaat.

Nr. 4-mut

Aalajangersakkap aalajangiuppaa, efterskolip ingerlatsinissamut pilersaarutaata Naalakkersuisunit akuerisaanissaa. Aalajangersakkap siunertaraa efterskolit namminneq pingaartitatigut tunngavigisaminnik malinninnerisa qularnaarnissaat.

§ 11-mut

Aalajangersakkami aalajangersarneqarpoq Naalakkersuisut tapiissutaat aalajangiunneqartassasut aningaasaliussat Inatsisartut Aningaasanut Inatsisaanni aalajangiunneqartut iluanni. Efterskolinut tapiissuteqarnissamut piumasaqaataavoq, sapaatip-akunnerini 40-ni tapiiffigineqarsinnaasumik atuartitsisoqassasoq, atuartitsinerlu aaqqissuunneqassasoq efterskolernertut minnerpaamik sapaatip-akunnerinik 40-nik sivisussusilittut, aamma ilinniartitsinerup tapiiffigineqarsinnaasup iluani ukioq kaajallallugu ilinniartut minnerpaamik 24-ussasut.

§ 12-imut

Aalajangersakkami aalajangersarneqarpoq, Naalakkersuisut efterskolinut tamanut ukiumoortumik tunngaviusumik tapiissuteqartassasut. Tunngaviusumik tapiissutit annertussusaat ukiumoortumik Inatsisartut Aningaasanut Inatsisaanni aalajangersarneqartassaaq.

§ 13-imut

Imm. 1-imut

Aalajangersakkami aalajangersarneqarpoq, Naalakkersuisut efterskolimut taxameteri malillugu tapiissuteqartassasut, efterskolip - ukiumi atuarfiusumi Aningaasanut Inatsisip siuliani naammassisumi - ukiumut ilinniartuisa amerlassusaat kisitsimmik, ukiumoortumik Aningaasanut Inatsimmi aalaajangerneqartumik, amerlisarnerat aallaavigalugu.

Imm. 2-mut

Aalajangersakkami aalajangersarneqarpoq, efterskolip ukiumut ilinniartui naatsorsorneqassasut tassaatillugit ukiumi ataatsimi sapaatip-akunnerini pikkorissarfiusuni tamani atuartut amerlassusiisa katinnerat 40-mik agguarlugu. Sapaatip-akunnera pikkorissarfik tassaatinneqassaaq ullut-unnuallu pikkorissarfiit arfineq-marluk.

Imm. 3-mut

Aalajangersakkami aalajangersarneqarpoq, efterskolinut pilersinneqarlaanut, sulilu ukioq Aningaasanut Inatsisiliorfiusoq sioqqullugu tapiiffigineqanngitsunut ilinniartut akuerisatut aalajangikkat amerlassusaat aallaavigineqassasoq.Ilinniartut akuerisatut amerlassusaat ima paasineqassaaq, isumaqatigiissutigineqarsimasut ilinniartut amerlassusaat efterskolimi annerpaamik inissaqartinneqartutut tigusinnaasaat.

Imm. 4-mut

Aalajangersakkami aalajangersarneqarpoq, Naalakkersuisut efterskolinut tapiissutit naatsorsornissaat, tunniunnissaat aqutarinissaallu pillugit malittarisassanik aalajangersaasinnaasut. Aammattaaq Naalakkersuisut ukiumoortumik ilinniartut ikinnerutillugit sapaatip-akunnerisalu atuartitsiviusut ingerlanneqartut ikinneruneranni tapiissutit ikilisinnissaat pillugit malittarisassanik aalajangersaasinnaapput.

§ 14-imut

Ilinniartunut tapiissutit pillugit aalajangersakkanut atatillugu malugeqquneqarpoq, Nunatsinnut attuumassuteqartuunissaq ersarinnerusumik nassuiarneqanngimmat, tassami assersuutigalugu ilinniartut Danmarkimeersut Kalaallit Nunaanni efterskolersinnaanerat periarfissikkumaneqarpoq, soorluttaaq ilinniartut Kalaallit Nunaanneersut Danmarkimi efterskolersinnaasut.

Imm. 1-imut

Aalajangersakkami aalajangersarneqarpoq, Ilinniartut efterskolernerminni akiliutissaasa annikillisinnissaannut, isertitat aallaavigalugit aalajangerneqartunik, Naalakkersuisut tapiissuteqartassasut. Tapiissutit inummut ataatsimut tapiissutitut, Naalakkersuisunut ilinniartup akiliutaata appartinneqarnissaanik qinnuteqartoqareerneratigut, tunniunneqartarput. Ukiumoortumik Aningaasanut Inatsimmi ilinniartunut tapip annertussusissaa Naalakkersuisut aalajangissavaat.

Imm. 2-mut

Aalajangersakkami ersarissarneqarpoq, ilinniartut akiliutaannik annikillisaanissamut tapiissutit efterskolimut tunniunneqassasut.

Imm. 3-mut

Aalajangersakkami aalajangersarneqarpoq, Naalakkersuisut aalajangersinnaagaat ilinniartunut tapiissutit kommunalbestyrelsimit aqunneqassasut. Taamaalillutik Naalakkersuisut ilinniartunut tapit aqutarinerinut akisussaaffiup tunniunnissaanut periarfissinneqarput.

Imm. 4-mut

Aalajangersakkami aalajangerneqarpoq, Naalakkersuisut ilinniartunut tapit Namminersornerullutik Oqartussat ataanni suliffeqarfimmit immineertumit allaffissornikkut isumagineqassasut, ilinniartunullu tapit allaffissornikkut ingerlannissaannut pisussaaffiliisinnaallutik

Imm. 5-imut

Aalajangersakkami erseqqissarneqarpoq, Naalakkersuisut ukiumoortumik Aningaasanut Inatsisitigut skalatut aalajangertassagaat isertitatigut tunngaviusut isertitallu aallaavigalugit ilinniartumut tapip aningaasartaasa akornanni naleqqiussissutissaq. § 14-imi oqaaseq "ilinniartut akiliutissaat" atorneqarpoq, tassaasoq ilinniartumut aningaasartuutissaasut tamarmiusut. Aningaasat angajoqqaat akiligassat taaneqarput "angajoqqaat akiliutaat", tassaasoq imm. 6 naapertorlugu naatsorsorneqartussaq, taamaattorli angajoqqaat isertitaasa malunnaatilimmik allanngornerisigut allanngortinneqarsinnaasoq.

Aammattaaq angajoqqaat isertitamikkut tunngavissaata appartinnissaat Naalakkersuisunit aalajangersarneqassaaq, ilinniartup efterskolernerup aallartinnerani qatanngutaasa 18-it inorlugit ikiullit amerlassusaat aallaavigalugu. Aalajangersakkap taassuma qularnaassavaa angajoqqaat isertitamikkut tunngavigisaasa aamma qatanngutit 18-it inorlugit ukiullit amerlassusaasa ilinniartup efterskolimi ilinnialernissaanik akornusiinnginnissaat.

Imm. 6-imut

Aalajangersakkami erseqqissarneqarpoq, angajoqqaat isertitaannut tunngaviusoq tassaammat ullorsiutit malillugit ukiup piffissap tapiiffiusup aallartiffiata siornatigut ukiut aappaanni nammineerluni isertitarisat. Aalajangersakkap assersuutigalugu nassatarivaa, ilinniartup akiliutissaanik annikillisaanissamut tapiissutit, isertitat tunngavigalugit naatsorsorneqartussat, ukiumi atuarfiusumi 2009/10-mi annertussusissaat naatsorsorumallugu angajoqqaat 2007-imi isertitaat aallaavigineqassammata.

Imm. 7-imut

Aalajangersakkami matumani imm. 6-imi aalajangersakkat sanioqqunneqarsinnaanerat periarfissinneqarpoq, angajoqqaat isertitaat malunnaatilimmik allannguuteqarsimappata.

§ 15-imut

Imm. 1-imut

Aalajangersakkami aalajangerneqarpoq, Naalakkersuisut ilinniartup angerlarsimaffimminiit efterskolimut aamma efterskolimiit angerlarsimaffimminut angalaneranut aningaasartuutit akilissagaat. Angalaneq Naalakkersuisunit akilerneqassaaq efterskolernerup aallartinnerani, kipitinnerani naammassineraniluunniit.

Imm. 2-mut

Aalajangersakkami aammattaaq periarfissinneqarpoq Naalakkersuisut, ilinniartup qanigisami perulunneranni toqunerannilu angerlarsimaffimminut utimullu angalanerani aningaasartuutinik matussusiinissaat. Qanigisat tassaapput aappaariunnagaq, nammineq meeqqat, angajoqqaatut oqartussaasut/pilersuisuiusut, qatanngutit aamma aanaa/aataakkut. Peruluttoqarnera toqusoqarneraluunniit nakorsamit uppernarsaaserneqassaaq.

Malugeqquneqarpoq qanigisanut nassuiaataasut qulaaniittut tamatigut tamakkiisuunavianngimmata, taamaammallu pisuni ataasiakkaani pisariaqalersinnaammat qulaani eqqaaneqartunik allaanerusumik ilaqutariissutsit erseqqissumik nalilersornissaat.

Imm. 3-mut

Aalajangersakkami aalajangiunneqarpoq, tapiissutit angalanernut atatillugu tunniunneqassammata, efterskolimullu aningaasartuuteqartuusumut tunniunneqassallutik.

§ 16-imut

Imm. 1-imut

Aalajangersakkami aalajangerneqarpoq, efterskolit pisortaasa ilinniartitsisuisalu ilinniartuarnissaat siunertaralugu pikkorissaanernut Naalakkersuisut tapiissuteqarsinnaasut, meeqqat atuarfianni pisortanut ilinniartitsisunullu atugassarititaasut assingannik. Aalajangersakkami uani pisortat ilinniartitsisullu kisimik ilaatinneqarput.

Imm. 2-mut

Aalajangersakkap erseqqissarpaa, Naalakkersuisut pisortat ilinniartitsisullu ilinniaqqinnerminni piffissap ilaa tamakkiisumilluunniit sulinngiffeqartut akissarsiaqartinnerinut tapiissuteqarsinnaasut. Efterskolini ilinniartitsisut pisortallu pikkorissarnernut ilinniaqqinnernullu assersuutigalugu Ilinniarfissuarmit Inerisaavimmillu neqeroorutigineqartunut peqataasinnaapput.

Imm. 3-mut

Aalajangersakkap aalajangerpaa, tapiissutit imm. 1 aamma 2 naapertorlugit tunniunneqartut efterskolimut aningaasartuuteqartuusumut tunniunneqassasut.

§ 17-imut

Aalajangersakkami aalajangerneqarpoq, Naalakkersuisut immikkut atuartitsinermut aamma allatigut immikkut perorsaanikkut ikiorsiinissamut tapiisarnissaq pillugu malittarisassaliorsinnaasut, ilinniartut immikkut atuartinneqarnissamik aamma immikkut perorsaanikkut ikiorserneqarnissamik pisariaqartitsisut pineqarlutik.

§ 18-imut

Imm. 1-imut

Aalajangersakkami aalajangerneqarpoq, efterskolini siulersuisut siunertamik iluanni Naalakkersuisunit tapiissutit isertitallu allat ataatsimut isigalugit atornissaat namminneq aalajangersinnaagaat. Aalajangersakkap erseqqissarpaa, siulersuisut aningaasaliissutinik atuisinnaatitaanerat killilerneqartoq, tapiissutinut tunngaviusut naapertorlugit tapiissutit atorneqassallutik, pineqarlutik atuartitsineq aamma atuartut amerlassusaat.

Imm. 2-mut

Aalajangersakkami erseqqissarneqarpoq, efterskole suliffeqarfittut imminut pigisutut, ukiumi naatsorsuiffiusumi aningaasanik atunngisanik ukiumut naatsorsuiffiusumut tullermut nuussisinnaasoq. Aalajangersakkap siunertaraa aningaasat ukiumi aningaasaliiffiusumi atorneqanngitsut ukiumut naatsorsuuseriffiusumut tullermut nuunneqarsinnaanissaat, aningaasaliissutaasunut sunniuteqanngikkaluartumik.

§ 19-imut

Aalajangersakkap Naalakkersuisut pisussaaffilerpai tapiissutinik utertitsinissaq unitsitsinissarlu pillugit malittarisassanik aalajangersaanissamut. Taamaalilluni Naalakkersuisut pisinnaatinneqarput assersuutigalugu tapiissutinik utertitsinissaq unitsitsinissarlu pillugit aalajangersagaliornissamut, efterskolit ingerlatassat tapiissuteqarnermut tunngaviusut ingerlatinngippatigik, Naalakkersuisullu nakkutilliinerminni uparuaanerat maleruanngippassuk.

§ 20-mut

Imm. 1-imut

Aalajangersakkami Danmarkimi efterskolernernut tapiissutit pillugit aalajangersakkat maanna atuuttut ingerlateqqinneqarput, aalajangersarneqarlunilu Naalakkersuisut Danmarkimi efterskolernermut aningaasartuutinut tapiissuteqarsinnaasut, soorluttaaq ilinniartut akiliutaasa annikillisinnissaannut tapiisoqarsinnaasoq, aamma ilinniartut angalanerinut aningaasartuutit akilerneqartassasut.

Aammattaaq siunnersuutip erseqqissarpaa, pineqartut tassaammata aningaasartuutit aningaasaliissutinut pituttorsimasut (Tapiissutinik aningaasaliineq), taamaalillunilu ukiumoortumik Aningaasanut Inatsisini sinaakkusiunneqartut qaangerlugit tapiisoqarsinnaanngimmat. Qinnuteqartut ataasiakkaat qinnuteqaataasa suliarineranni imaluunniit tapiissutisiassaasa tunngavissaasa naatsorsorneranni allannguinissaq anguniarneqanngilaq, taakku maannamutut kontomi pingaarnermi 40.10.12-imi ersissapput.

Imm. 2-mut

Aalajangersakkami ingerlateqqinneqarput, Naalakkersuisut tapiissutip tunniunneqarnissaa pillugu malittarisassanik aalajangersaasinnaanerat, ilutigisaanillu tapiisarnissamut tunngaviusumik piumasaqaataasoq erseqqissarneqarluni, tassunga ilanngullugit tapiisarnissamut piumasaqaatit, tapiissutit annertussusaat, qinnuteqarnermi periusissat aamma maalaarnissamut aqqutissat. Naalakkersuisut innersuutigissavaat Meeqqat atuarfiat pillugu Inatsisartut peqqussutaanni nr. 1, 6. juni 1997-imeersumi § 10, imm. 5 aamma 11, tak. Atuarfik pillugu Inatsisartut peqqussutaat nr. 8, 21. maj 2002-meersoq, Inatsisartut peqqussutaatigut nr. 7, 7. maj 2007-imeersukkut allanngortinneqartoq, taanna malillugu Danmarkimi efterskolernermut aningaasartuutinut tapiissuteqartoqartarmat.

§ 21-mut

Aalajangersakkami aalajangerneqarpoq, Naalakkersuisut nakkutilliisuusut. Ulluinnarni Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik nakkutilliinermik ingerlatsisuussaaq. Nakkutilliinerup isumaginissaanut atatillugu Naalakkersuisut efterskolinut saaffiginnillutik paasissutissanik pisariaqartunik piniarsinnaapput.

Naalakkersuisut nakkutigissavaat, efterskolit §§ 1 – 6-imi aamma § 18, imm. 1-imi piumasaqaatinik piviusunngortitsinerat.

§ 22-mut

Aalajangersakkap Naalakkersuisut pisinnaatippai, Inatsisartut inatsisaanni aalajangersakkanik sanioqqutitsinissamut, aningaasaliissutaasut iluanni misileraalluni ingerlatsinermut atatillugu. Aalajangersakkap siunertaraa inuiaqatigiinni ineriartornerup pisariaqartitsilernera naapertorlugu misileraalluni ingerlatsinernik pilersitsisoqarsinnaanissaata qularnaarnissaa.

§ 23-mut

Imm. 1-imut

Siunnersuutigineqarpoq Inatsisartut inatsisaat atuutilissasoq 1. januar 2009. Tamatumunnga pissutaavoq siunissami efterskoliujumaartut ukiumi atuarfiusumi 2009/10-mi Inatsisartut Inatsisaat manna naapertorlugu aallartisarsinnaanissaannik periarfissinneqarnissaat.

Imm. 2-mut

Aalajangersakkami aalajangerneqarpoq, meeqqat atuarfiat pillugu peqqussummi nr. 1-imi, 6. juni 1997-imeersumi § 10, imm. 5 aamma § 11 inatsisip atuuttuulernerani atorunnaarsinneqassasut.

Imm. 3-mut

Aalajangersakkami erseqqissarneqarpoq, meeqqat atuarfiat pillugu peqqussummi nr. 1-imi, 6. juni 1997-imeersumi § 10, imm. 5 aamma § 11 naapertorlugit malittarisassat aalajangersarneqarsimasut atorunnaarsinneqarnissamik imaluunniit taarserneqarnissamik tungaannut atuuttuussasut.