7. oktober 2008 UKA 2008/68
Akileraaruserinermik ingerlatsineq pillugu inatsisartut inatsisaata
allanngortinnera pillugu inatsisartut inatsisissaattut siunnersuutpillugu
ISUMALIUTISSIISSUT
Inatsisartut Akileraartarnermut Akitsuusiisarnermullu Ataatsimiititaliaannit saqqummiunneqartoq
Siunnersuutip aappassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Emilie Olsen
Inatsisartunut ilaasortaq Aleqa Hammond
Inatsisartunut ilaasortaq Isak Davidsen
Inatsisartunut ilaasortaq Esmar Bergstrøm
Inatsisartunut ilaasortaq Palle Christiansen
Siunnersuutip siullermeerneqarnera tunngavigalugu Akileraartarnermut Akitsuusiisarnermullu Ataatsimiititaliap siunnersuut una misissuataarpaa.
Siunnersuutip imarisaaInatsisissatut siunnersuut UKA2008/67-imut "Aningaasarsianit akileraarutit pillugit Inatsisartut inatsisaata allanngortinneranik Inatsisartut inatsisissaattut siunnersuut"-mut atatillugu isigineqassaaq. Siunnersuutip pineqartup suliffeqarfiit sermimik imermillu ujarlerlutillu avammut niuernissaq siunertaralugu iluaqutiginninnissamut akuerineqartut suliffeqarfinnut aatsitassat pillugit inatsit naapertorlugu ujarlermut iluaqutiginninnissamulluunniit akuerineqartunut akileraarutitigut naligiisilersippai.
Suliffeqarfinnit kalluarneqartunit suliffeqarfiit isertitaannit iluanaarutiniillu akileraarutit nunatta karsianut isertitsissutaasalernissaat siunnersuutip nassatarissavaa, tamanna nilannik imermillu avammut niuerutiginninerup ilusiligaanerata assinganik inuiaqatigiit ataatsimoorullugu pinngortitamit pisuussutaanik aallaaveqarluni aatsitassanik piiaanertut isiginneriaaseqarneq aallaavigalugu.
Siunnersuutip Inatsisartuni siullermeerneqarneraSiunnersuut siullermeerinermi Siumumit, Atassummit, Demokraatinit aamma Kattusseqatigiit Partiiannit taperserneqarpoq.
Siunnersuutip ilaa suliffeqarfiit sermimik imermillu ujarlerlutillu avammut niuernissaq siunertaralugu iluaqutiginninnissamut akuerineqartut suliffeqarfinnut aatsitassat pillugit inatsit naapertorlugu ujarlermut iluaqutiginninnissamulluunniit akuerineqartunut akileraarutitigut naligititaalernissaannut tunngasoq Inuit Ataqatigiinnit taperserneqanngilaq. Tamanna kommunit isertitassatigut ikilisaaffigineqartariaqannginnerannik isumaqarnermit aallaaveqarpoq.
Ikinnerussuteqartutut oqaaseqaat kingulianiittoq isumaliutissiissummut ilanngunneqassasoq Inuit Ataqatigiit kissaatigaat:
"Inuit Ataqatigiit ikinnerussuteqartutut oqaaseqaataat: siunnersuut suliffeqarfiit sermimik imermillu ujarlerlutillu avammut niuernissaq siunertaralugu iluaqutiginninnissamut akuerineqartut suliffeqarfinnut aatsitassat pillugit inatsit naapertorlugu ujarlernermut iluaqutiginninnissamulluunniit akuerineqartunut akileraarutitigut naligititaalernissaannut tunngasoq Inuit Ataqatigiinnit taperserneqanngilaq. Tamanna kommunit isertitassatigut ikilisaaffigineqartariaqannginnerannik isumaqarnermit aallaaveqarpoq.
Kommuninut aaqqissuussaanermik nutaamik akuersissuteqaqqammerpugut, tamatumani Namminersornerullutik Oqartussat suliassanik amerlanerusunik kommuninut nuussissallutik, suliassallu nuunneqartut tamangajammik aningaasartuuteqarfiusariaqarput kommunillu ima inissisimasariaqarlutik suliassat isumaginissaannut akissaqarlutik.
Suliassat sorliit kommuninit tiguneqassanersut pillugu Naalakkersuisut maannamut oqaaseqaateqanngillat, oqaaseqaateqarlutillu kingusinnerusukkut tamanna paasineqassasoq. Naalakkersuisut maanna pilersaarummik suliaqartariaqartut Inuit Ataqatigiit isumaqarput, taamaalilluni suut tiguniarnerlugit, qanoq aningaasartuuteqassanerlutik kiisalu isertitat suut naatsorsuutigisinnaanerlugit kommunit ilisimaniassammassuk.
Aningaasartuutit inuiaqatigiinni karsimit inuiaqatigiinni karsimut allamut nuussinerinnakkut inuiaqatiigiittut sipaaruteqarnavianngilagut.
Aammattaaq aningaasartuutit inuiaqatigiinni karsimit inuiaqatigiinni karsimut allamut nuussinitsigut isertitagut tamarmiusut amerlinavianngillat".
Saqqummiussissutit inatsissatullu siunnersuutit kalaallisuuini qulequttat akoranni assigiinngissuseqartoqartoq ataatsimiititaliap paasivaa. Atortussat Inatsisartunut saqqummiunneqartussat suliarineqarneranni annertunerpaamik mianersuussilluartoqartarnissaa ataatsimiititaliamit inassutigineqassaaq.
Akileraartarnermut Akitsuusiisarnermullu Ataatsimiititaliap innersuussutaaAtaatsimiititaliami amerlanerussuteqartut Siumumeersut, Demokraatineersut Atassummeersullu siunnersuut akuersissutigineqassasoq inassutigaat. Ataatsimiititaliami ikinnerussuteqartup Inuit Ataqatigiinneersup siunnersuut itigartitsissutigineqassasoq inassutigaa.
Taama oqaaseqaateqarluni Akileraartarnermut Akitsuusiisarnermullu Ataatsimiititaliap siunnersuut Inatsisartunut aappassaaniigassanngortippaa
Emilie Olsen
Aleqa Hammond
Isak Davidsen
Esmar Bergstrøm
Palle Christiansen