7. oktober 2008 UKA 2008/67
Aningaasarsianit akileraarutit pillugit inatsisartut inatsisaata allanngortinneranik Inatsisartut inatsisissaattut siunnersuut
pillugu
ISUMALIUTISSIISSUT
Inatsisartut Akileraartarnermut Akitsuusiisarnermullu Ataatsimiititaliaannit saqqummiunneqartoq
Siunnersuutip aappassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Emilie Olsen
Inatsisartunut ilaasortaq Aleqa Hammond
Inatsisartunut ilaasortaq Isak Davidsen
Inatsisartunut ilaasortaq Esmar Bergstrøm
Inatsisartunut ilaasortaq Palle Christiansen
Siunnersuutip siullermeerneqarnera tunngavigalugu Akileraartarnermut Akitsuusiisarnermullu Ataatsimiititaliap siunnersuut una misissuataarpaa.
Siunnersuutip imarisaaInatsisissatut siunnersuut maleruagassanut atuuttunut sanilliullugu allannguutinik pingasunik imaqarpoq:
Siullertut inatsisinik avaqqussisinnaanermik periarfissaqarnerup matuneqassaaq, taassuma nunani allani ernianut aningaasartuutit Kalaallit Nunaanni aningaasarsiarineqartunit akileraartartumit ilanngaataalersinnaanera malitsigissallugu. Aappaatullu inuit umiarsuarni timmisartunilu sulisartunut tunngassuteqartoq erseqqissarneqarlunilu annertusineqassaaq, tamanna suliassaqarfimmi inatsisitigut maleruagassat ersarinnerusut pilersinnissaat aammalu akileraarutinit iluanaarutissat ikiliartortinnissaannut periarfissaqarnermik akiuiniarneq siunertaralugu. Pingajuattut suliffeqarfiit sermimik imermillu ujarlerlutillu avammut niuernissaq siunertaralugu iluaqutiginninnissamut akuerineqartut suliffeqarfinnut aatsitassat pillugit inatsit naapertorlugu ujarlermut iluaqutiginninnissamulluunniit akuerineqartunut akileraarutitigut naligititaalissasut siunnersuutigineqarpoq.
Siunnersuutip Inatsisartuni siullermeerneqarneraSiunnersuut siullermeerinermi Siumumit, Atassummit, Demokraatinit aamma Kattusseqatigiit Partiiannit taperserneqarpoq.
Siunnersuutip ilaa suliffeqarfiit sermimik imermillu ujarlerlutillu avammut niuernissaq siunertaralugu iluaqutiginninnissamut akuerineqartut suliffeqarfinnut aatsitassat pillugit inatsit naapertorlugu ujarlermut iluaqutiginninnissamulluunniit akuerineqartunut akileraarutitigut naligititaalernissaannut tunngasoq Inuit Ataqatigiinnit taperserneqanngilaq. Tamanna kommunit isertitassatigut ikilisaaffigineqartariaqannginnerannik isumaqarnermit aallaaveqarpoq.
Siunnersuut Demokraatit taperserpaat, inatsimmili "avaqqunneqarsinnaasoq" siuliani taaneqartoq innersuussutigalugu apeqqutit tulliuttut akineqarnissaat kissaatigineqarpoq:
1. Akileraartarneq pillugu inatsimmi avaqqunneqarsinnaasoq taanna qanoq sivisutigisumik piusimava ?
2. Akileraartarneq pillugu inatsimmi avaqqunneqarsinnaasoq taanna ilisimaneqalersoq patsisaalluni kalaallit inuiaqatigiit aningaasanik qanoq amerlatigisunik annaasaqarsimappat ?
3. Aningaasat annaaneqarsimasut nunatta karsianut akilersinniarneqarnissaat Naalakkersuisunit siunertarineqarpa?
4. Aningaasat annaaneqartut naalakkersuinikkut kimit akisussaaffigineqarpat ?
5. Nunatta karsianit aningaasanik amerlanerusunik annaasaqaqqittoqaqqunagu akileraartarneq pillugu inatsisip sinneranik nutarterineq Naalakkersuisunit aallartinneqarsimava ?Apeqqutinut siulianiittunut Naalakkersuisut akissuteqaataat isumaliutissiissummut matumunnga ilanngussatut ilanngunneqarput.
Saqqummiussissutit inatsissatullu siunnersuutit kalaallisuuini qulequttat akornanni assigiinngissuseqartoqartoq ataatsimiititaliap paasivaa. Atortussat Inatsisartunut saqqummiunneqartussat suliarineqarneranni annertunerpaamik mianersuussilluartoqartarnissaa ataatsimiititaliamit inassutigineqassaaq.
Ikinnerussuteqartutut oqaaseqaat kingulianiittoq isumaliutissiissummut ilanngunneqassasoq Inuit Ataqatigiit kissaatigaat:
"Inuit Ataqatigiit ikinnerussuteqartutut oqaaseqaataat: siunnersuutip ilaa suliffeqarfiit sermimik imermillu ujarlerlutillu avammut niuernissaq siunertaralugu iluaqutiginninnissamut akuerineqartut suliffeqarfinnut aatsitassat pillugit inatsit naapertorlugu ujarlernermut iluaqutiginninnissamulluunniit akuerineqartunut akileraarutitigut naligititaalernissaannut tunngasoq Inuit Ataqatigiit tapersinngilaat. Tamanna kommunit isertitassatigut ikilisaaffigineqartariaqannginnerannik isumaqarnermit aallaaveqarpoq, inatsimmi avaqqunneqarsinnaasut periarfissaajunnaartinneqarnissaannut siunnersuutip tunngasortaa Inuit Ataqatigiinnit tamakkiisumik taperserneqarpoq.
Kommuninut aaqqissuussaanermik nutaamik akuersissuteqaqqammerpugut, tamatumani Namminersornerullutik Oqartussat suliassanik amerlanerusunik kommuninut nuussissallutik, suliassallu nuunneqartut tamangajammik aningaasartuuteqarfiusariaqarput kommunillu ima inissisimasariaqarlutik suliassat isumaginissaannut akissaqarlutik.
Suliassat sorliit kommuninit tiguneqassanersut pillugu Naalakkersuisut maannamut oqaaseqaateqanngillat, oqaaseqaateqarlutillu kingusinnerusukkut tamanna paasineqassasoq. Naalakkersuisut maanna pilersaarummik suliaqartariaqartut Inuit Ataqatigiit isumaqarput, taamaalilluni suut tiguniarnerlugit, qanoq aningaasartuuteqassanerlutik kiisalu isertitat suut naatsorsuutigisinnaanerlugit kommunit ilisimaniassammassuk.
Aningaasartuutit inuiaqatigiinni karsimit inuiaqatigiinni karsimut allamut nuussinerinnakkut inuiaqatiigiittut sipaaruteqarnavianngilagut.
Aammattaaq aningaasartuutit inuiaqatigiinni karsimit inuiaqatigiinni karsimut allamut nuussinitsigut isertitagut amerlinavianngillat".
Aappassaaneerinninnermut allannguutissatut siunnersuummik saqqummisusilersaarlutik Naalakkersuisut nalunaarutigaat. Aningaasarsianit akileraarutit pillugit inatsisip oqaasertalersorneqarnerata qallunaat kalaallillu akornanni marloriaammik akileraarusigaannginnissamik isumaqatigiissummut nutaamik ilassutaasumut naleqqussarneqarnissaa alannguutissatut siunnersuutip siunertaraa .
Akileraartarnermut Akitsuusiisarnermullu Ataatsimiititaliap innassuteqaataaAllannguutissatut siunnersuummi aappassaaneerinninnermut saqqummiunneqartussatut nalunaarutigineqartumi allassimasutut iluseqartillugu siunnersuut akuersissutigineqassasoq ataatsimiititaliami amerlanerussuteqartut Siumumeersut, Demokraatineersut Atassummeersullu inassutigaat.
Siunnersuut itigartitsissutigineqassasoq ataatsimiititaliamit ikinnerussuteqartut Inuit Ataqatigiinneersut inassutigaat.
Taama oqaaseqaateqarluni Akileraartarnermut Akitsuusiisarnermullu Ataatsimiititaliap siunnersuut Inatsisartunut aappassaaniigassanngortippaa
Emilie Olsen
Aleqa Hammond
Isak Davidsen
Esmar Bergstrøm
Palle Christiansen