6. oktober 2008 UKA 2008/66
Umiarsualivimmiinnermut aamma umiarsuarni takornarianik angallassisuni ilaasut akileraarutaat pillugit inatsisartut inatsisaata allanngortinneranik Inatsisartut inatsisissaattut siunnersuut
pillugu
ISUMALIUTISSIISSUT
Inatsisartut Akileraartarnermut Akitsuusiisarnermullu Ataatsimiititaliaannit saqqummiunneqartoq
Siunnersuutip aappassaaneerneqarnerani saqqummiunneqartoq
Inatsisartut Akileraartarnermut Akitsuusiisarnermullu Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Emilie Olsen
Inatsisartunut ilaasortaq Aleqa Hammond
Inatsisartunut ilaasortaq Isak Davidsen
Inatsisartunut ilaasortaq Esmar Bergstrøm
Inatsisartunut ilaasortaq Palle Christiansen
Siunnersuutip siullermeerneqarnera tunngavigalugu Akileraartarnermut Akitsuusiisarnermullu Ataatsimiititaliap siunnersuut una misissuataarpaa.
Siunnersuutip imarisaaInatsisissatut siunnersuutip kingunerissavaa 1. januar 2009-miit atuutilersumik umiarsuarni takornarianik angallassissutini ilaasumut ataatsimut aamma angallassinernut Danmarkimiit, Savalimmiuniit nunanilluunniit allanit aallaaveqartumik angallaseriaatsit marluk atorlugit aaqqissuussinernut ilaasumut ataatsimut akileraarutigitinneqartup 450 koruuniniit 525 koruuninut qaffanneqarnera.
Siunnersuutip Inatsisartuni siullermeerneqarneraSiullermeerinermi siunnersuut partiinit tamanit taperserneqarpoq.
Takornariartitsinermik inuussutissarsiornerup iluani inuussutissarsiutinik ingerlatsisut assigiinngitsut, assersuutigalugu takornariaqarnermut allaffiit aammalu assassukkanik sanalukkanillu tuniniaasartut assigiinngitsut siunissami siamasinnerusumik tusarniaaffigineqartarnissaat ingerlanneqartalertariaqartoq Inuit Ataqatigiit tikkuarpaat.
Umiarsuarni takornarianik angallassissutini ilaasunut, ilaatigut takornariat amerlassusaannut ilaatigullu najukkami inuiaqatigiit takornariaqarnermut atatillugu tunisassiaannik takornariartut piserusussuseqarnerannut akitsuutit qanoq ililluni sunniuteqarnerlunngitsumik annertusineqarsinnaanerisa qulaajaaffiginissaanut inuit taakku ilassuteqarsinnaasut Inuit Ataqatigiit isumaqarput.
Naalakkersuisut tamanna tusaatissatut tiguaat oqaatigalugulu siunissami tusarniaasarnissani soqutigisaqaqatigiit amerlanerusut ilaatinneqartarumaartut.
Umiarsuarni takornarianik angallassissutini ilaasunut akitsuutinik assigisaanillu siunissami allannguisinnaanerit piffissami siusissukkut saqqummiunneqartalernissaat Akileraartarnermut Akitsuusiisarnermullu Ataatsimiititaliamit Naalakkersuisunut kaammattuutigineqassaaq, taamaalilluni inuussutissarsiutinik ingerlataqartut kalluarneqartut akinik aalajangersaasarnerminni allannguutinik ilanngussinissaminnut periarfissaqarsinnaaqqullugit. Umiarsuarni takornarianik angallassissutini angalanissat angalanissap ingerlanneqarnissaa qaammaterpassuarnik sioqqutsisumik inniminnerneqakkajullutillu akilerneqartarput. Taamaattumik 2009-p ingerlanerani angalanissat ilarpassui inniminnerneqareersimassasut naatsorsuutigineqarsinnaavoq, taamaattumik umiarsuarnik takornariutinik piginnittut akitsuutit qaffariaataat pisisartuminnut immikkut ittumik akilersinniarsarinngikkunikkit saniatigut aningaasartuutit namminneq akilissallugit toqqartariaqassavaat. Ilaasumut ataatsimut qaffariaat 75 kr.-iusoq tusaannarlugu annertugisassaanngikkaluarpoq, umiarsuilli takornariutit 2000-it tikillugit ilaasoqarsinnaanerat eqqarsaatigigaanni aningaasat amerlangaatsiartunngorsinnaapput.
Saqqummiussissutit inatsissatullu siunnersuutit kalaallisuuini qulequttat akoranni assigiinngissuseqartoqartoq ataatsimiititaliap paasivaa. Atortussat Inatsisartunut saqqummiunneqartussat suliarineqarneranni annertunerpaamik mianersuussilluartoqartarnissaa ataatsimiititaliamit inassutigineqassaaq.
Akileraartarnermut Akitsuusiisarnermullu Ataatsimiititaliap innersuussutaaSiuliini oqaatigineqartut aammalu siullermeerinermi oqaaseqaatigineqartut tunngavigalugit Akileraartarnermut Akitsuusiisarnermullu Ataatsimiititaliap isumaqatigiittup siunnersuut akuersissutigineqassasoq innersuussutigaa.
Taama oqaaseqaateqarluni Akileraartarnermut Akitsuusiisarnermullu Ataatsimiititaliap siunnersuut Inatsisartunut aappassaaniigassanngortippaa
Emilie Olsen
Aleqa Hammond
Isak Davidsen
Esmar Bergstrøm
Palle Christiansen