15. august 2008 UKA 2008/66
Inatsisissatut siunnersuummut nassuiaatit
Nassuiaatit nalinginnaasut
1. Inatsisissatut siunnersuummut tunuliaqutaasut2006-imi ukiukkut ataatsimiinnermi (UKI2006/11) umiarsuit takornarianik angallassissutit ilaasunik angallassinerannut akileraarutip 300 kr.-iniit 450 kr.-inut qaffanneqarnissaa inatsisartut akuersissutigaat.
2005-imiit 2007 ilanngullugu umiarsuarni takornarianik angallassissutini ilaasartut amerlatsikkiartuaarsimapput. Umiarsuarni takornarianik angallassissutini ilaasut 2005-imi 16.447-upput, 2006-imi 22. 051-iullutik 2007-imilu 23.904-allutik.
Ilaasorineqartartut amerliartornerisa uppernarsarpaa umiarsuarni takornarianik angallassissutini ilaasunut akileraarutip 2006-imi qaffanneqarnerata kingorna, takornariaqarnerup inerisaavigineqarneranut pitsaanngitsumik sunniuteqannginnissaanik ilimasunneq siuningaarmagu.
Greenland Tourismip, Inuussutissarsiornermut, Suliffeqarnermut inuussutissarsiutinullu Ilinniartitaanermut Naalakkersuisoqarfiup aamma Aningaasaqarnermut Nunanullu allanut Naalakkersuisoqarfiup nalilersimavaat umiarsuarni takornarianik angallassissutini ilaasumut ataatsimut akileraarutip 75 kr.-inik suli qaffanneqarsinnaasoq umiarsuit takornarianik angallassissutaasartut siunissami suli amerlanerit tikittarnissaannut sunniuteqanngitsumik. Umiarsuit takornarianik angallassisartut aningaasanik amikkisanngitsunut aningaasarlu apeqqutaatinnagu misigisaqarnissamik pingaarnerutitaqartunut saaffiginnippoq. Tassunga atatillugu umiarsuarni takornarianik angallassissutini ilaasunut akileraarut akip ataatsimoortup ilaminiinnannguaraa.
2. Inatsisissatut siunnersuutip imarisaiInatsisissatut siunnersuutip 1. januar 2009-miit sunniuteqartumik kingunerissavaa umiarsuarni takornarianik angallassissutini ilaasunut akileraarutip ilaasumut ataatsimut, aamma ilaasunut angallasseriaatsit marluk atorlugit Danmarkimiit, Savalimmiuniit nunanilluunniit allaniit angalasunut, 450 kr.-iniit 525 kr.-inut qaffanneqarnera.
Suliassaqarfimmi ingerlatsisut 2008-imi upernaakkut ilisimatinneqarput umiarsuarni takornarianik angallassissutini ilaasunut akileraarutip qaffanneqarnissaa pillugu Naalakkersuisut siunnersuummik saqqummiussissagunartut.
3. Aningaasaqarnikkut allaffissornikkullu pisortani sunniutaasussat:Umiarsuarni takornarianik angallassissutini ilaasut ukiuni kingullerni amerliartorsimapput, taamaammallu takornarianut angallassissutinut ilaasut 2009-mi missingerlugu 25.000-it ilimagineqarput.
Taamaammat inatsisissatut siunnersuutip ukiumut 1,9 mio. koruunit missigisaannik nunap karsianut isertitaqartitsinerunissaa ilimagineqarpoq.
4. Aningaasaqarnikkut allaffissornikkullu inuussutissarsiutinik ingerlataqartunut sunniutaasussat:Inatsisissatut siunnersuut inuussutissarsiutinik ingerlataqartunut aningaasaqarnikkut allaffissornikkullu sunniuteqassanngilaq.
5. Avatangiisinut pinngortitamullu sunniutaasussat:Inatsisissatut siunnersuut avatangiisinut pinngortitamullu sunniuteqassanngilaq.
6. Allaffissornikkkut innuttaasunut sunniutaasussat:Inatsisissatut siunnersuut innuttaasunut allaffissornikkut sunniuteqassanngilaq.
7. Naalagaaffeqatigiinnermut namminersornermullu tunngasut:Inatsisissatut siunnersuut naalagaaffeqatigiinnermut namminersornermulluunniit tunngasunut ingerlatsinernut sunniuteqassanngilaq.
8. Oqartussaasunit kattuffinniillu tusarniaaneq:Siunnersuut KANUKOKA-mut, Greenland Tourism, Inuussutissarsiornermut Suliffeqarnermut Inuussutissarsiutinullu Ilinniartitaanermut Naalakkersuisoqarfimmut aamma Attaveqarnermut Avatangiisinullu Naalakkersuisoqarfimmut tusarniaassutigalugu nassiunneqarsimavoq.
Tusarniaanermut akissuteqaatit Akileraartarnermut Akitsuusiisarnermullu Ataatsimiititaliamut ingerlatinnqarput.
KANUKOKA aamma Inuussutissarsiornermut Suliffeqarnermut Inuussutissarsiutinullu Ilinniartitaanermut Naalakkersuisoqarfik siunnersuummut uparuaatissaqannginnerarput.
Greenland Tourism & Business Council (GTE), Kalaallit Nunaanni takornariartitsinermik suliaqarneq ataatsimut isigalugu uniarsuarni takornarianik angallassissutini ilaasumut ataatsimut akileraarutip 1. januar 2009-imiit 525 koruuninut qaffaanermik attassisinnaasutut siusinnerusukkut naliliisimanertik innersuussutigaat. Tamatumani akileraarutit taamaasillutik nunarsuarmi qaffasinnerpaanut ilaalerput, asseqanngitsunik ornittakkanut assingusunut aamma assersuussinernut sanilliukkaanni. Taamaammat sivikinnerpaamik ukiuni tulliuttuni pingasuni qaffaaqqinnissaaq mianersuutigisariaqassaaq Kalaallit Nunaata unammillersinnaassuseqarnerata innarlerneqannginnissaa eqqarsaatigalugu. GTE-p naliliinerivaa akileraarummik qaffaanerup umiarsuaatileqatigiiffiit mikisunik umiarsuaateqartut umiarsuaatileqatigiiffissuarnut angisuunik umiarsuaateqartunut sanilliullugit sakkortunerusumik eqqussagai, umiarsuaatileqatigiiffiit mikinerusut umiarsuaatileqatigiiffissuarnut naleqqiullugit aningaasaqarniarnikkut periarfissakinnerukkajummata. Umiarsuillu tamakkua mikinerusut Kalaallit Nunaanni pissutsinut naleqqunnerusuupput arlaqartuni tikittoqarsinnaanermut killeqartumik periarfissaqarfiusunut. Akileraarummik qaffaanerup dollarip nalikillisimaarnera, sillimmasiinerit akitsornissaannik ilisimatitsissuteqarnerit uuliallu ikummatissap akiata qaffakkiartornera nalaarpai. Ilimagineqarporli akileraarut 525 koruuniugaluartoq umiarsuaatileqatigiiffinnut amerlanerpaanut Kalaallit Nunaannut tikittarneq aningaasarsiorluaataaginnassasoq. GTE-llu aamma oqaatigaa Kalaallit Nunaanni takornarianik ilaasoqartunik angallanneqartartut amerliartuinnarnissaat ilimanarmat tamatumuunalu akileraarutinik isertitat amerleriarnissaat, ornittakkani aningaasat isertitat tamakkua ilaasa inuussutissarsiummut ornittakkanilu naammassisaqarsinnaanerup allileriffigineqarneranut, periarfissanillu pitsanngorsaanermut tuniniakkanillu ineriartortitsinermut tapiissutinut atorneqarnissaannik ilimasunneq alliartussasoq.
Attaveqarnermut Avatangiisinullu Naalakkersuisoqarfik qaffaanissamut tunngaviusumik akerliliissutissaqanngilaq. Naalakkersuisoqarfiup isertitat amerleriaataasa takornarianik angallassissutinut ilaasorpassuarnut niusarfiit pitsanngorsaaviginissaanut atorneqarnissaasa naleqquttuunera uparuaatigaa.
Aalajangersakkanut ataasiakkaanut nassuiaatit
§ 1-imut
Nr. 1-imutSiunnersuutigineqarpoq umiarsuarni takornarianik angallassisuni ilaasumut ataatsimut aamma angallasseriaatsit marluk atorlugit ilaasumut ataatsimut akileraarutigitinneqartoq 450 kr.-imiit 525 kr.-imut qaffanneqassasoq. Inatsisissatut siunnersuummut nassuiaatit nalinginnaasut innersuussutigineqarput.
§ 2-mutSiunnersuutigineqarpoq inatsisartut inatsisaat 1. januar 2009-mi atortuulissasoq.