19. november 2008

UKA 2008/6

 

Uunga

allannguutissatut siunnersuut

Uunga siunnersuut: Kalaallit Nunaata Aatsitassarsiornermi Aningaasaateqarfia pillugu Inatsisartut Inatsisissaattut siunnersuut

Pingajussaaneerinissamut Aningaasaqarnermut Ataatsimiititaliamit saqqummiunneqartoq.

§ 6-imut

1. Imm. 4 ima oqaasertalerneqarpoq:
"Imm. 4. Namminersornerusut aatsitassarsiornermik sammisanut aningaasaliissutaat, aatsitassarsiornermik sammisanut aningaasartuutaat kiisalu suliassat tiguneqartut isumaginerannut aningaasartuutit ukiumi aningaasaliiffiusumi inatsisartut aningaasanut inatsisaanni imaluunniit ilassutitut aningaasaliissutini missingersuusiorneqarsimasunit ikinneruppata, aningaasat nikingassutaasut amerlaqataat landskarsimit aningaasaateqarfimmut nuunneqassapput."

2. Imm. 4-ip kingorna immikkoortutut nutaatut ilanngunneqarpoq:
"Imm. 5. Landskarsip aningaasaateqarfiullu akornanni aningaasanik imm. 4 malillugu nuussineq siulersuisut aamma Naalakkersuisut isumaqatigiinnerisigut pissaaq, taamaattorli ukiumi aningaasaliiffiusumi landskarsip naatsorsuutaasa akuersissutigineqareernerini qaammatinit 6-init kingusinnerusumi pisinnaanani.".

3. Imm. 5-ip nutaap kingorna immikkoortutut nutaatut ilanngunneqarpoq:
"Imm. 6. Landskarsip aamma aningaasaateqarfiup akornanni aningaasanik nuussineq, Namminersornerullutik Oqartussat missingersuusiortarnerat pillugu inatsit aamma Inatsisartut Aningaasanut inatsisaat mianeralugit aatsaat pisinnaavoq.".

§ 12-imut

4. Imm. 1-imi "Siulittaasoq, siulittaasup tullia aamma ilaasortaq ataaseq Kalaallit Nunaanni Danmarkimiluunniit najugaqartuussapput" atorunnaarput.

§ 22-imut

5. Imm. 2-ip kingorna immikkoortutut nutaatut ilanngunneqarpoq:
"Imm. 3. Siulersuisut suleriaasertik, aningaasaateqarfiup pisariaqartitaanut naleqquttuaannarnissaa aammalu ingerlatseqatigiiffinnik aqutsilluarnissamut akuerisaasumut naapertuuttuaannarnissaa qulakkeerniarlugu, ukiumut ataasiarlutik misissortassavaat. Suleriaasissami siulersuisuni siulittaasup suliassaanut sulinissamik suliassanullu nassuiaat aammalu qullersaasut siulersuisunut nalunaarusiortarnissaannut suleriaasissat allassimassapput".

6. Imm. 3-ip nutaap kingorna immikkoortutut nutaatut ilanngunneqarpoq:
"Imm. 4. Siulersuisut qaammatit pingasukkaarlugit nalunaarutinik, paasissutissanik aningaasaateqarfiup ingerlanneqarneranut ineriartorneranullu pingaaruteqarsinnaasunik imaqartunik tamanut saqqummiussisassapput.".

§ 23-imut

7. § 23, imm. 2 ima oqaasertalerneqarpoq:
"Imm. 2. Pisortaq siulersuisunit atorfinitsinneqassaaq soraarsinneqassallunilu siulersuisunut siulittaasup allakkatigut tunngavilersukkamik inassuteqarneratigut. Pisortassatut taamaallaat inassutigineqarsinnaapput inuit akileraartarnermut inatsimmik sakkortunerusumik unioqqutitsisimasutut eqqartuunneqarsimanngitsut imaluunniit aningaasanik pinerluuteqarneq nakuusernerluunniit pillugit pinerluttulerinermik inatsimmi aalajangersakkanik unioqqutitsinermut eqqartuunneqarsimanngitsut. Kiisalu inuit minnerpaamik siulersuisunut qaffasissuserititanut nallersuuttumik qaffasissusilimmik suliatigut piginnaaneqarluartutut uppernarsaaserneqarsinnaasut kisimik inassutigineqarsinnaapput, tak. § 11, imm.1.

Allattoqarfiup sulisuinik atorfinitsitsineq soraarsitsinerlu pisortap isumagisussaavaa."

§ 28-imut

8. Imm. 1-imi oqaaseqatigiinni siullerni "Naalakkersuisut" allanngortinneqarput "Siulersuisut"-nut.

9. Imm. 4-p kingorna immikkoortutut nutaatut ilanngunneqarpoq:
"Imm. 5. Aqutsisut aningaasaateqarfiup isertitaasa aningaasartuutaasalu ineriartornerat pillugu nalunaarusianik qaammatit pingasukkaarlugit aningaasaateqarfiup siulersuisuinut Naalakkersuisunullu nassiussisassapput."

10. Imm. 5-ip nutaap kingorna immikkoortutut nutaatut ilanngunneqarpoq:
"Imm. 6. Aqutsisut qaammatit pingasukkaartumik ukiukkaartumillu nalunaarusiaat suliffeqarfimmut aningaasaqarnermik misissueqqissaarinermik immikkut ilisimasalimmut arlaannaannulluunniit attuumassuteqanngitsumut akuerisaasumullu aammalu Naalakkersuisunit toqqarneqarsimasumut nalilerneqartussanngorlugit nassiunneqassapput. Tassani nalilerneqassaaq aningaasaateqarfiup aningaasaliinerinit iluanaarutit uuttuummut aalajangersimasumut sanilliullugit naammaginartuunersut. Taamatuttaaq nalilerneqassaaq aningaasaateqarfiup aningaasaliineri ileqqorissaarnikkut illersorneqarsinnaasumik tunngaveqarluni pisarnersut. Suliffeqarfiup arlaannaannulluunniit attuumassuteqanngitsup naliliineri aningaasaateqarfiup siulersuisuinut Naalakkersuisunullu nassiunneqassapput, tamatumalu peqatigisaanik tamanut saqqummiunneqassallutik."

§ 33-imut

11. § 33, imm. 1 ima oqaasertalerneqarpoq:
"Imm. 1. Aningaasaateqarfiup naatsorsuutai kukkunersiuisumit landskarsip naatsorsuutaanik kukkunersiuisuusumit aammalu kukkunersiuisumit naalagaaffimmit akuerineqartumit siulersuisunit toqqarneqartumit kukkunersiorneqassapput."

§ 39-imut

12. § 39, imm. 1, imatut oqaasertalerneqarpoq:
"Imm. 1. Siulersuisut ukiumoortumik aningaasaateqarfiup sulinera pillugu nalunaaruteqartassapput. Nalunaarut nunani tamalaani pitsaassusissatut akuerisaasut malillugit suliarineqartassaaq aammalu aningaasaateqarfik pillugu pissutsit pingaaruteqartut tamaasa pillugit paasissutissanik piffissamik eqquisunik erseqqissunillu tamanut ammasumik paasissutissiinissamik qulakkeerissalluni, ilanngullugit aningaasaateqarfiup aningaasaqarnikkut inissisimanera, angusai aqunneqarneralu. Paasissutissani ilaatinneqassapput suleriaatsinut nassuiaatit aammalu siulersuisunut ilaasortanik ataasiakkaanik toqqaanermi tunngavissatut atorneqartut kiisalu siulersuisut qullersallu aningaasarsiaqartinneqarneri aammalu soraarnermut atatillugu aaqqissuussinerit pillugit paasissutissat. Aammalu allassimassaaq siulersuisunut ilaasortat ataasiakkaat piginnaasanik immikkut ittunik sorlernik aningaasaateqarfimmut tunniussinersut. Kiisalu nalunaarusiami allassimassaaq siulersuinut ilaasortanik siulersuisullu siulittaasuannik nammineq naliliisarneq aammalu avataaneersumik immikkut ilisimasalimmik naliliisitsisarneq siulersuit sulinerannut atuutsinneqarnersoq. ".

13. § 39, imm. 2, imatut oqaasertalerneqarpoq:
"Imm. 2. Naalakkersuisut siulersuisunik tusarniaareernermikkut nalunaarusiap imarisassai pillugit maleruagassanik erseqqinnerusunik aalajangersaasinnaapput.".

9. Imm. 2-ip kingorna immikkoortutut nutaatut ilanngunneqarpoq:
"Imm. 3. Aningaasaateqarfiup ukiumoortumik naatsorsuutaasa nalunaarutaatalu Naalakkersuisunut saqqummiunneqarneranut peqatigitillugu Inatsisartut Aningaasaqarnermut Ataatsimiititaliaanut aamma Inatsisartut Kukkunersiuinermut Ataatsimiititaliaanut nassiunneqarnissaa siulersuisut isumagissavaat. Aningaasaateqarfiup ukiumoortumik naatsorsuutai nalunaarutaalu Naalakkersuisunut nassiunneqarnerannit ullut 14-it qaangiunneranni tamanut saqqummiunneqassapput.".

 

Nassuiaatit

Nr. 1-imut, 2-mut aamma 3-mut.

Aningaasaateqarfiup pigisai pappiaqqanut nalilinnut inissinneqassapput. Aningaasanik tigoriaannarnik pisariaqartunik nunap karsianut aningaasaqarnikkut naleqqunnerpaamik nuussinissamut atugassaqarnissaq qularnaarniarlugu § 6, imm. 5-imi aalajangersakkakkut siunnersuutigineqarpoq, aningaasaateqarfimmit nunap karsianut aningaasanik nuussinissamut piffissaq siulersuisut aamma Naalakkersuisut tamanna pillugu isumaqatigiissuteqarnerisigut pisassasoq, taamaattorli ukiumut aningaasaliiffiusumut Nunap Karsiata naatsorsuutaasa akuersissutigineqarnerinit qaammatinit 6-init kingusinnerusumi pisinnaanani.

Aningaasaqarnermut ataatsimiisitaliap aappassaarinissamut isumaliutitsiissutaani erseqqissarneqarpoq aatsitassarsiornermut aningaasaliinermut imaluunniit suliassaqarfinnik nutaanik tigusinermut atatillugu atuinerussutaasunut matusissutissatut nunap karsianut nuussineq, missingersuusiornermut inatsimmi aningaasanut inatsimmi aningaasaliissutinik imaluunniit ilassutit aningaasaliissutit Inatsisartut aningaasaqarnermut ataatsimiisitaliaanniit akuerineqarsimasunit sippuinnginnissamik inerteqquteqarnermut akerliussanngitsoq erseqqissarneqartariaqartoq. Siunnersuutigineqarpoq § 6 imm. 6-imi aalajangersakkakkut Kalaallit Nunaata Aatsitassarsiornermi Aningaasaateqarfia pillugu Inatsisartut Inatsisissaattut siunnersuummi erseqqissarneqassasoq, missingersuusiornermut inatsit pisuni tamaginni mianerineqartassasoq. Tamanna paasineqassaaq aningaasaliinissamut maleruagassat atuuttut malillugit ilassutitut aningaasaaliissuteqarnissamik akuersissuteqartoqarsimatillugu aatsaat, nunap karsiata aamma aningaasaateqarfiup akornanni atuinerussutinik atuinikinnerussutinilluunniit nalimmassaasoqarsinnaasoq.

Nr. 4-imut

Allannguutissatut siunnersuutigineqartukkut Kalaallit Nunaanni Danmarkimilu kisimi pinnani nunarsuarmili tamarmi najugalinnik siulersuisunut ilaasortassarsiortoqarsinnaavoq. Taamaalilluni siulersuisunut ilaasortassarsiornermi tunngavissaq siamasinnerusoq qulakkeerneqassaaq.

Nr. 7-imut

Allannguutissatut siunnersuutigineqartukkut qulakkeerneqassaaq aningaasaateqarfiup pisortaa siulersuisut piginnaasaasa assinginik suliatigut pisariaqartunik piginnaasaqarnissaa. Aammattaaq qulakkeerneqassaaq piumasaqaatinik ataqqinassutsimut tunngasunik pisortap eqquutsitsinissaa, tamannalu aningaasaateqarfiup nalinginnaasumik ingerlatsinerata patajaatsuuneranik pimoorunneqarneranillu oqariartuuteqarnissaq eqqarsaatigalugu pisariaqartinneqarpoq.

Nr. 5-imut, 6-imut, 9-mut, 10-mut, 12-imut aamma 13-imut.

Aningaasaqarnermut ataatsimiisitaliap aappassaarinissamut isumaliutitsiissutaani "ingerlatseqatigiiffinnik aqutsilluarnissamik kaammattuutit" innersuussutigineqarput. Aningaasaqarnermut Ataatsimiititaliaq isumaqarpoq kaammattuutit taakkua inatsisissatut siunnersuummi, ilaatigut siulersuisut suleriaasissaata imarisassaannut piumasaqaatinik aalajangersaanikkut ersarinnerutinneqartariaqartut, ilanngullugit siulersuisunut ilaasortanik toqqaanermi tunngaviusussat aamma aningaasaateqarfimmi pissutsinut tunngatillugu ammanerunissamik piumasaqaatit, ilanngullugit siulersuisunut qullersanullu aningaasarsiaqartitsineq.

Kalaallit Nunaata Aatsitassarsiornermi Aningaasaateqarfia pillugu Inatsisartut Inatsisissaattut siunnersuummi § 22-p, § 28-p aamma § 39-p oqaasertalersornerisa allanngortinneqarnissaannut siunnersuutitigut, inatsisissatut siunnersuummi siulersuisut katitigaanerat suliassaallu pillugit, ukiumoortumik nalunaarummi paasissutissiissutigineqartussatut piumasaqaatit aamma aningaasaateqarfimmi pissutsit pillugit qaammatit pingasukkaarlugit nalunaarutinik tamanut saqqummiussisarnissaq pillugu aammalu naalakkersuinikkut akisussaaffeqartut annertunerusumik paasisaqarsinnaanissaat pillugu aalajangersakkat, ingerlatseqatigiiffinnik aqutsilluarnissamik kaammattuutinut tunngaviusunut oqaatigineqartunut naleqqussarneqarput.

Nr.8-imut

Kalaallit Nunaata Aatsitassarsiornermi Aningaasaateqarfia pillugu Inatsisartut Inatsisissaattut siunnersuummi § 28 imm. 1-imi "Naalakkersuisut" uunga "Siulersuisut" allanngortinneqarpoq. Siunnersuummi allannermi kukkusoqarsimavoq aammalu oqaatsimi siunnersuutigineqartumi aalajangersakkap imarisaa ingerlatseqatigiiffinnut inatsit malillugu siulersuisut nalinginnaasumik akisussaaffinnik suliassaminnillu isumaginninnissaannut naapertuuttunngortinneqarpoq. Siulersuisunik toqqaanermi qularnaarneqartussaq tassarpiaavoq, ilaatigut aningaasaateqarfiup pigisaannik aqutsisussanik piginnaassuseqarnerpaanik toqqaasinnaanissamut, ilaasortat naleqquttumik pisariaqartumillu ilisimasaqarlutillu misilittagaqassasut.

Nr.11-mut

Aalajangersakkamut oqaasertaliunneqaqqaartoq ima kukkusumik paasineqarsinnaavoq; kukkunersiuisoq landskarsip naatsorsuutaanik kukkunersiuisuusoq kukkunersiuisumik aningaasaateqarfiup naatsorsuutaanik kukkunersiuisussamik toqqaanermi peqataassasoq. Taamaattoqartussaanngilarli. Allannguutissatut siunnersuutigineqartukkut oqaatsit ersarinnginnerat tamanna iluarsineqarpoq.