4. november 2008 UKA 2008 /155
Inatsisissamut siunnersuummut oqaaseqaatit
Nassuiaatit nalinginnaasutSiunnersuummi pineqarpoq ukiumoortumik pisassiissutit avataasiortuniit sinerissami qanittumi aalisarnermut nuunneqarnissaat periarfissinneqassasoq. Siunnersuut malillugu aalajangersagaq tamanut atuuttoq pineqanngilaq, akerlianilli immikkut ittumik aaqqissuussinissaq, taamaallaat siumut isigaluni atorneqarnisaa pineqarluni, tamannami pissammat nunami suliffissuarnut tunisassiassanik pilersuinerup qulakkeerneqarnissa siunertaralugu.
Ukiumi atuuttumi matumani oktoberip qiteqqunnerani ima pisoqarpoq, sinerissamut qanittumi aalisariutaatileqatigiiffiit arlallit pisasiissutitut pissarsiatik tamakkerlugit aalisareermatigik taamaattumillu aalisarnertik allatut ajornartumik unitsittariaqarlugu. Taamatut pisoqarnera aalisariutaatillit arlallit sukkasuumik qanilliartorpaat, ilimagisariaqarporlu nunatsinni raajaleriffiit katillugit tallimaasut arlaat ataaseq amerlanerilluunniit piaartumik matusariaqalissallutik, massakkut pisoq iliuuseqarfigineqanngippat.
Peqatigitillugu oqaatigineqarsinnaavoq, avataasiorlutik aalisartitseqatigiiffit arlallit pisassiissutitik tamakkerlugit suli aalisanngimmatigik ukiumilu atuuttumi matumani tamakkernissat aalisarnissaat angumerinavianngimmatigilluunniit. Tassa pisassiissutit kilisaatinit avataasiortuniit sinerissamut qanittumi aalisariutinut nuunneqarnissaannut tunngavissaq tassaneereerpoq, tulaassassat annertussusii akuerineqarsinnaasut annerpaaffissaatut Naalakkersuisut aalajangigaat tamatuma kalluanngikkaluarluguluunniit.
Pisassiissutit nalinginnaasumik tunineqarsinnaaneranni atugassarititaasut atorlugit ajornartorsiutip aaqqiiviginiarnissaa ajornarsisoq takuneqarsinnaavoq, imaammat sinerissamut qanittumi aalisartitsisut pisassiissutinik suli sinneqartut, sinnimik ilaminnut amigaatilinut tunerusuttanngimmatigik. Tamanna ilaatigut pissuteqarpoq juullip qaammataani aalisarnissamut periarfissaqarusunnermik ilaatigullu ukiumi tulliuttumi raajartassiissutit suli ikileriartinneqarnissaat annilaangassutigineqarmat, tamannalu pissutaalluni pisassiissutit nikississinnaanerat pillugu inatsisitigut aalajangersakkat atuuttut iluanni ukioq manna pisassiissutit ukiup tullianut nuunneqarnissaat qinnuteqaatigineqarsinnaammat.
Pisortanut aningaasaqarnikkut allaffissornikkullu sunniutissatSiunnersuut allaffissornikkut annertuumik kinguneqaateqassasoq naatsorsuutigineqanngilaq. Taamatuttaaq siunnersuut aningaasaqarnikkut pisortanut kinguneqaateqartussatut naatsorsuutigineqanngilaq. Siunnersuutilli akuersissutigineratigut sinerissamut qanittumi raajarniarnerup unitsinneqarnissaata aammalu tunisassiorfiit ukiup sinnerani matunissaasa pinngitsoortinneqarnissaat naatsorsuutigineqarpoq. Taamaalillunilu siunnersuut toqqaannanngikkaluamik pisortanut pitsaasumik kinguneqassaaq, suliffissaaleqilernermummi atatillugu isumaginninnikkut ikiorsiissuteqartariaqarnissaq siunnersuutip akuersissutigineqarneratigut killersimaarneqassammat.
Pisortanut kattuffinnullu tusarniaaneq:Siunnersuut tusarniaassutigineqarsimanngilaq.
Inatsisissatut siunnersuummi aalajangersakkanut ataasiakkaanut nassuiaatit
§ 1-imutNr. 1-imut
Aalajangersagaq una atorneqartassaaq, sinerissap qanittuani aalisartut ukiumut pisassiissutinik nungutseqqajaalerneranni, avataasiortunullu kinguppattassiissutit suli sinneqarpata. Taamatut pisoqartillugu Naalakkersuisut pisinnaatinneqassapput, avataasiortunut pisassiissutinik sinerissap qanittuani kinguppanniartunut nuussisinnaanissaminnut.
§ 2-mutSiunnersuutigineqarpoq allannguutit tamanut nalunaarutigineqarneratigut ingerlaannaq atuutilernissaat taamaalilluni ullormi inatsisip akuersissutigineqarfiani atuuttussanngorlugit.