19. september 2008

UKA 2008/99

 

Inatsisissatut siunnersuummut nassuiaatit

 

Nassuiaatit nalinginnaasut

1. Aallaqqaasiut:

Kalaallit Nunaanni namminersornerup eqqunneqarnissaa pillugu najoqqutassiisumik inuit taasisinneqarnissaat pillugu Inatsisartut inatsisaata allannguuteqartinneqarnissaa pillugu Inatsisartut inatsisaattut siunnersuut saqqummiunneqarpoq, Inatsisartummi inatsisaanni maanna atuuttumi kalaallisoortaata danskisoortaatalu akornanni § 2-mi, § 5-imi aamma § 6-imi naapertuuttoqanngimmat. Inatsisartut inatsisaat Inatsisartut 2008-mi upernaakkut ataatsimiinneranni immikkoortutut UPA 2008/130-tut oqaluuserineqarpoq.

2. Siunnersuutip immikkoortortai pingaarnerit:

Siunnersuutip immikkoortortaasa pingaarnersaraa Inatsisartut inatsisaata kalaallisoortaata danskisoortaatalu akornanni naapertuuttoqarnerulernissaata pilernissaa.

3. Pisortanut aningaasaqarnikkut allaffitsigullu aqutsinerup kingunerisassai:

Siunnersuut pisortanut aningaasaqarnikkut allaffitsigullu aqutsinermut sunniuteqaataanavianngilaq. Taasinermi atortussat piffissaagallartillugu suliarineqarnissasa nassiussuunneqarnissaasalu isumannaarneqarnissaat pillugu, inunnik taasisitsinissap piareersarneqarnerani piumasaqaataassaaq, siunnersuutip kalaallisoortaata danskisoortaatalu akornanni naapertuuttoqarnerunissaa.

4. Inuussutissarsiuteqartunut allanullu aningaasaqarnikkut allaffitsigullu aqutsinerup kingunerisassai:

Siunnersuut inuussutissarsiuteqartunut allanullu aningaasaqarnikkut allaffitsigullu aqutsinermut kinguneqartinneqarnavianngilaq.

5. Avatangiisinut pinngortitamullu kingunerisassat:

Siunnersuut avatangiisinut pinngortitamullu kinguneqartinneqarnavianngilaq.

6. Innuttaasunut allaffitsigut aqutsinermut kingunerisassai

Siunnersuut innuttaasunut allaffitsigut aqutsinermut kinguneqartinneqarnavianngilaq.

7. Naalagaaffeqatigiinnut namminersornermullu attuumassuteqarneq:

Siunnersuut naalagaaffeqatigiinnut namminersornermullu attuumassuteqarneq pillugu siunnersuut immikkut oqaaseqaateqarfigineqarnissaa pilernavianngilaq.

8. Oqartussaasut, soqutigisaqaqatigiit allallu tusarniaavigineqarnerat:

Siunnersuut – siunnersuutip sumut sammisuunera eqqarsaatigalugu – oqartussaasunut allanut soqutigisaqaqatigiinnullu tusarniaassutigineqanngilaq.

 

Inatsisissatut siunnersuummi aalajangersakkanut ataasiakkaanut nassuiaatit

 

§ 1-imut

Nr. 1-imut

Inatsisartut inatsisaata kalaallisoortaani taasinissamut sammineqartussaq imatut oqaasertalerneqarpoq:

"Namminersorneq pillugu inatsisissatut siunnersuummi pineqartut tunngavigalugit nammi-nersorneq eqqunneqassasoq isumaqatigaajuk?"

Inatsisartut inatsisaata danskisoortaani taasinissamut sammineqartussat imatut oqaasertalerneqarpoq:

"Ønsker du at der indføres selvstyre i Grønland med det indhold og de betingelser, som er skitseret i Grønlandsk-dansk Selvstyrekommissions udkast til selvstyrelov?"

Inatsisartut inatsisinik atuutsitsinermut Ataatsimiititaliaata Kalaallit Nunaanni namminersornerup eqqunneqarnissaa pillugu najoqqutassiisumik inuit taasisinneqarnissaat pillugu Inatsisartut inatsisaannut ilassutaasumik isumaliutissiissutaani aappassaaneerinninnissamut Naalakkersuisut inatsisissatut siunnersuutaanut Inatsisartut inatsisinik atuutsitsinermut Ataatsimiititaliaat allannguutissatut siunnersuummik saqqummiussaqarpoq. Taasisitsinissami sammineqartussaq kalaallisoortaani imatut oqaasertaligaavoq:

"Kissaatigaajuk Kalaallit Nunaanni namminersorneq Namminersorneq pillugu kalaallit qallunaallu isumalioqatigiissitaasa namminersornermik inatsisissatut missingiusiaattut imalik piumasaqaatitaqartorlu eqqunneqassasoq?"

Taasisitsinissamut sammineqartussap oqaasertalerneqarnera allannguutissatut siunnersuummi § 2-tut ilanngunneqarpoq, imaalilluguli kalaallit oqaasiat "namminersorneq" peerneqarluni, oqaasertaliussarmi oqaaseqatigiiaani kukkusumik marloriarlugu atorneqartussaassammat.

Nr. 2-mut

Inatsisip kalaallisoortaani kukkusumik atuarneqarsinnaavoq, inunnik taasisitsineq allakkatigut ingerlanneqassasoq. Allannguutissatut siunnersuummi kukkuneq iluarsineqarpoq.

Nr. 3-mut

Kalaallisoortaani oqaaseq "siunnersuut" amigaataavoq. Allannguutissatut siunnersuummi kukkuneq iluarsineqarpoq.

 

§ 2-mut

Siunnersuutigineqarpoq, Inatsisartut inatsisaat 1. oktober 2008-mi atuutilissasoq.