12. maj 2008 UPA 2008/130
Namminersornerup eqqunneqarnissaa pillugu innuttaasunik taasititsinissaq pillugu inatsisissatut siunnersuut
pillugu
Inatsisartut Inatsisinik Atortitsinermut Ataatsimiititaliaata
ISUMALIUTISSIISSUTAA
Siunnersuutip aappassaaneerneqarneranut saqqummiunneqartoq
Inatsisartut Inatsisinik Atortitsinermut Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Otto Jeremiassen, Siumut (Siulittaasuugallartoq)
Inatsisartunut ilaasortaq Asii Chemnitz Narup, Inuit Ataqatigiit
Inatsisartunut ilaasortaq Lene Knüppel, Demokraatit
Inatsisartunut ilaasortaq Vittus Mikaelsen, Siumut
Inatsisartunut ilaasortaq Godmand Rasmussen, Atassut (Sinniisoq)
Inatsimmut oqaaseqaatinut itisiliissutaasunik erseqqissaataasunillu allakkanik Naalakkersuisut siulittaasuannit Inatsisinik Atortitsinermut Ataatsimiititaliaq tigusaqarpoq, tassuunakkut qinnuiginnittoqarluni taakku ataatsimiititaliap isumaliutissiissutaanut ilanngunneqassasut, taamaalillunilu Inatsisartut siunnersuummik suliarinninnerannut ilaatinneqarlutik. Allakkiaq – annertunerusumik oqaaseqarfiginagu Inatsisinik Atortitsinermut Ataatsimiititaliamit tusaatissatut tiguneqartoq – isumaliutissiissummut ilanngussatut ilanngunneqarpoq.Namminersorneq pillugu Ataatsimiititaliarsuup isumaliutissiissutaa pillugu Inatsisartut aalajangiiffigisassaattut Siunnersuummik (UKA 2003/14) suliarinnittussatut ataatsimiititaliamit suligasuartitamit innuttaasunik taasisitsinissamik inassuteqaat siunnersuummi akuersaarneqartoq Inatsisinik Atortitsinermut Ataatsimiititaliap paasivaa. Inatsisartut isumaqatigiittut inassuteqaat tamanna isumaqatigaat.
Taamaattumik annertunerusumik oqaaseqaateqarnani siunnersuutip akuersissutigineqarnissaa Inatsisit Atortinneqarnerannut Ataatsimiititaliap inassutigaa, taamaaliornermigut innuttaasunik taasisitsinissaq sioqqullugu aalajangiinissamut tamakkiisumik innuttaasut tunngavissaqarnissaat qulakkeeqqullugu Naalakkersuisut Ataatsimiititaliamit kaammattorneqarlutik.
Taamaalilluni siunnersuut Inatsisartunut aappassaaniigassanngortinneqarpoq.
Otto Jeremiassen
Siulittaasuugallartoq
Vittus Mikaelsen
Asii Chemnitz Narup
Lene Knüppel
Godmand Rasmussen