7. maj 2008 UPA 2008/130
Inatsisissatut siunnersuummut nassuiaatit
Nalinginnaasumik nassuiaatit1. Aallarniut:
Ulloq 13. januar 2004 Naalakkersuisut aamma danskit Naalakkersuisui aalajangerput kalaallinik danskinillu atorfilinnik inuttalimmik suleqatigiissitamik pilersitsiniarlutik, kalaallit danskillu namminersorneq pillugu ataatsimoorussamik isumalioqatigiissitaannik pilersitsinissamut siunnersuusiortussanik. Isumalioqatigiissitap siunnersuusiortussaavaa qanoq iliorluni kalaallit namminersornerata naalagaaffeqatigiinnerup iluani annertunerulersinneqarsinnaanera.
Isumalioqatigiissitami suliassat allassimaffiat Naalakkersuisut siulittaasuannit aamma statsministerimit atsiorneqarpoq ulloq 21. juni 2004, taamalu kalaallit danskillu namminersorneq pillugu isumalioqatigiissitaat pilersinneqarluni.
Suliassat allassimaffiata aallaqqaataani allassimavoq:
"Danskit naalakkersuisuisa aamma Kalaallit Nunaanni naalakkersuisut kissaatigimmassuk Kalaallit Nunaata Danmark-illu akornanni sapinngisamik annertunerpaamik naligiissumik ingerlatsisoqarnissaa, kiisalu inuiaat kalaallit nammineersinnaassusiat sapinngisamik annertunerpaatikkusunneqarmat, naalagaaffeqatigiinnerup atuuttup iluani, ...."
Ukiut sisamangajaat isumalioqatigiissitaq sulereersoq ulloq 6. maj 2008 Kalaallit Danskillu naalakkersuisuisa isumalioqatigiissitap siulittaasoqarfianiit isumaliutissiissut tiguaat.
Isumaliutissiissummi ilaatigut atuarneqarsinnaapput namminersornermik kissaateqarnerup oqaluttuassartaa tunuliaqutaasullu. Tamatumalu saniatigut suliarineqarsimavoq Kalaallit Nunaata namminersulernissaanut inatsisissatut siunnersuut. Inatsisissatut siunnersuut naatsorsuutigineqarpoq Inatsisartunut saqqummiunneqarumaartoq inuiaat kalaallit siunnerfiliisumik taasisinneqareersimatsiarpata.
Kalaallit Nunaanni namminersorneruneq 1979-imi eqqunneqartussanngormat tamanna sioqqullugu innuttaasunik siunnerfiliisumik taasisitsisoqarpoq, namminersornerunerup eqqunneqarnissaa pillugu. Maanna siunnersuutigineqarpoq inatsit taanna maanna atuuttoq taarserneqassasoq namminersorneq pillugu inatsimmik nutaamik. Taamaattumillu pissusissamisoortutut isigineqarpoq namminersornerup eqqunneqarnissa pillugu Kalaallit Nunaanni innuttaasut siunnerfiliisumik taasisitsinikkut aperineqarpata.
Inatsisartut inatsisissaattut siunnersut una saqqummiunneqarpoq ukioq manna november-ip 25-ani innuttaasunik siunnerfiliisumik taasisitsisoqarnissaa siunertaralugu, taamaaliortoqareerpat Inatsisartut Kalaallit Nunaata namminersulernissaa pillugu inatsisissatut siunnersuummut oqaaseqaateqarsinnaassammata.
2. Siunnersuummi qulequttat pingaarnerit:Siunnersuummi Kalaallit Nunaanni namminersorneq pillugu innuttaasunik siunnerfiliisumik taasisitsinissami aalajangersakkat tunngaviusussat saqqummiunneqarput. Siunnersuummilu tunngaviusutigut maanna Inatsisartunut qinersisarnermi periutsinik allannguisoqarnissaanik saqqummiussisoqanngilaq. Taamaattumillu taasisitsineq Naalakkersuisut siulittaasuata Naalakkersuisoqarfianiit ataqatigiissaarneqassaaq, soorlu periuseq Inatsisartunut qinersisarnerni ilisimaneqareersoq.
Ilutigitillugulu siunnersuummi ulloq taasisitsiviusussaq aalajangersarneqarpoq. Tamatumalu ilanngullugu kingunerissavaa, aningaasaliissutit aningaasanut inatsimmi konto-mi pingaarnermi 10.06.10.-mi immikkoortinneqarsimasut, - Partiit qineqqusaarnissaannut tapiissutit, qinnutigineqarsinnaanerat tunniunneqarsinnaanerallu inatsisartut inatsisissaattut siunnersuutip matuma akuersissutigineqareerneratigut.
3. Pisortat ingerlatsinerannut allaffissornikkut aningaasaqarnikkullu sunniutissai:Naatsorsuutigineqarpoq Namminersornerusunut taasisitsinerup ingerlanneqarneranut teknik-imut tunngasunik taaneqarsinnaasunut aningaasartuutaasussat 400.000 kr.-it missiliussagaat. Aningaasartuutissat taakkua aningaasanut inatsimmi konto-mi pingaarnermi 10.11.10.-mi, qinersinernut aningaasartuutit, immikkoortinneqareersimapput.
Tamatumalu saniatigut konto-mi pingaarnermi 10.06.10-mi, Partiit qineqqusaarnissaannut tapiissutit, - aningaasartuuteqartoqassaaq 1.520.000 kr.-it angullugit. Konto 10.01.09.-mi, Namminersorneq pillugu allaffeqarfimmi, paasisitsiniaanermik ingerlatsinermut aningaasartuutissanut immikkoortitsisoqarsimavoq. Konto-mi tassani 2008-mi 4,3 mio. kr.-it missaanik aningaasartuuteqartoqassaaq, tassanilu paasisitsiniaanerup saniatigut akissarsianut ingerlatsinermullu aningaasartuutinik aamma matussusiisoqassalluni.
Kiisalu kommunit taasisitsinerup ingerlanneqarneranut aammalu taasinerup inernerinik kisitsinernut aningaasartuuteqassapput. Tassunga atasumik aningaasartuutissat inatsisartunut, kommunalbestyrelsinut il.il. qinersisoqartillugu aningaasartuuteqartarnertulli kommuninit akilerneqassasut naatsorsuutigineqarpoq.
4. Aningaasaqarnikkut allaffissornikkullu inuussutissarsiornermut il.il. kingunissai:Siunnersuut inuussutissarsiornermut il.il. aningaasatigut allaffissornikkullu kinguneqartussaanngilaq.
5. Avatangiisinut pinngortitamullu kingunissai:Siunnersuut avatangiisinut pinngortitamullu kinguneqartussannngilaq.
6. Innuttaasunut allaffissornikkut kingunissai:Siunnersuut innuttaasunut allaffissornikkut kinguneqassanngilaq.
7. Naalagaaffeqatigiinnermut namminersornermullu:Siunnerfiliisumik innuttaasunik taasisitsineq namminersornerup eqqunneqarnissaanut taamalu naqisimaneqanngitsumik naalakkersugaanerup ineriartortinneqarnerata ilagaa.
8. Pisortanut kattuffinnullu tusarniaasimaneq il.il.Siunnersuut, - qanoq ittuunera naapertorlugu, - pisortanut allanut kattuffinnulluunnit tusarniaassutigineqarsimanngilaq.
Inatsisissatut siunnersuutip immikkuualuttortaanut nalinginnaasumik nassuiaatit
§ 1-mutSiunnersuutigineqarpoq namminersornerup Kalaallit Nunaanni eqqunneqarnissaa pillugu siunnerfiliisumik innuttaasunik taasisitsisoqassasoq 25. november 2008.
Ulloq pineqartoq aalajangiunneqarpoq siunertarineqarmat Inatsisartut oqaaseqaateqarnissaat pisinnaasoq Kalaallit Nunaanni namminersorneq pillugu inatsisissatut siunnersuutip folketing-imi oqaluuserineqarnissaa sioqqullugu.
Inatsisartut aalajangersimassappata naalagaaffeqatigiinnermi oqartussaasunut nalunaarutiginiarlugu Kalaallit Nunaanni namminersorneq pillugu inatsississatut siunnersuut Folketing-imi akuersissutigineqassasoq kissaatigineqartoq, naatsorsuutigineqarpoq Folketing-ip inatsisissatut siunnersuut suliarisinnaagaa namminersorneq 21. juni 2009-mi atortuulersinneqarsinnaanngorlugu.
§ 2-mutTaasisitsinermi oqaluuserisaq tassaavoq "Nunatsinni Namminersorneq atuutilissasoq kissaatigaajuk?". Oqaluuserisami innersuussisoqanngilaq folketingimi inatsisissatut siunnersuummut, Inatsisartut oqaaseqarfigisassaannut, taamatut innersuussinerup taasisitsinermi oqaluuserisaq paatsuunganartunngortiinnaqinammagu. Ilutigitillugulu naatsorsuutigineqarpoq paasisitsiniaaneq aallartinneqareersimasoq ingerlateqqinneqassasoq annertusarneqarlunilu, taamaaliornikkut innuttaasut taasisitsinerup nalaani "namminersorneq" suunersoq paasilluarsimalerlugu peqataalersimassasut, taamalu namminersornerup periarfissai kingunerisinnaasaalu ilisimasaqarfigilersimassallugit.
§ 3-mutSiunnersuutigineqarpoq kinaluunniit ullormi taasisitsiviusumi Inatsisartunut qinersisarnermi piumasaqaataasunik naammassinnissinnaasoq, aammalu Inatsisartunut qinersisarnermi qinersisinnaanermut allattorsimaffimmi nalunaarneqarsimasoq taasisitsinermi peqataasinnaasoq. Killilersuisoqarsimanngilaq annertusaasoqarsimananiluunniit inunnut Inatsisartunut qinersinermi qinersisinnaasunut sanilliullugu. Innuttaasut taasisinneqarnerata inernera Inatsisartut suliami isummernissaanni tunngaviliisuulluni ilaatinneqartussaammat pissusissamisoorpoq innutaasut taasisitsinermi peqataatinneqartut Inatsisartunut qinersinermi peqataasinnaasut assigippatigit.
§ 4-mutTaasisitsinerup piareersarneqarnera ingerlanneqarneralu, taasisitsinerup naammassinerani kisitsineq, taakkuninngalu nalunaaruteqarneq, kiisalu maalaaruteqarneq il.il. ingerlanneqassaaq Kalaallit Nunaanni Inatsisartunut qinersisarnermi inatsisartut inatsisaat naapertorlugu, taamaattoq qinersinermi ataatsimiititaliap nikingassutaasinnaasutut pisariaqartutut aalajangersagai tunngavigalugit.
Kalaallit Nunaanni Inatsisartunut qinersisarnermut inatsit qinersinermi ataatsimiititaliamit saneqqunneqarsinnaavoq inatsimmi pineqartumi partiinut, qinigassanngortittunut sinniisussanullu tunngasutigut, innuttaasut taasisinneqarneranni uani taamaallaat apeqqut " Nunatsinni Namminersorneq atuutilissasoq kissaatigaajuk?" isummerfigineqartussaammat. Qinersinermut ataatsimiititaliap pisinnaatitaaffii Inatsisartunut qinersisarneq pillugu Inatsisartut inatsisaanni atuarneqarsinnaapput.
§ 5-mutTaasisitsineq allakkatigut ingerlanneqassaaq. Namminersornerullutik Oqartussat taasisitsinermi taasivissap suliarineqarnera isumagissavaat. Aalajangersakkami uani taasisitsiviup imarisassai aalajangersarneqarput. Taasisitsinermut aallagartami naqinneqarsimassaaq "Siunnerfiliilluni innuttaasunik taasisitsineq", kiisalu taasissutigineqartut siunnersuummi § 2-mi allassimasut naapertorlugu naqinneqarsimassapput krydsiliiffissaqartumik "Aap" aamma "Naamik", kalaallisut danskisullu allassimasunik.
§ 6-mutTaasisitsineq naammassippat taasinerup inernera avammut saqqummiunneqassaaq aammalu Inatsisartunut nassiunneqassalluni. Taasisitsineq siunnerfiliisumik taasisitsineruvoq, taamaattumillu inernera tunngaviatigut Inatsisartunik pitussisuunani.
Namminersornerullutik Oqartussat kalaallit danskillu ataatsimoorussamik isumalioqatigiissitaata Kalaallit Nunaanni namminersulernissaq pillugu inatsisissatut siunnersuusiaanut oqaaseqaateqartussaapput. Taamaattumik Naalakkersuisut Inatsisartunut aalajangiiffigisassatut siunnersuummik saqqummiussaqartussaapput, Namminersornerullutik Oqartussat Kalaallit Nunaanni namminersornerup eqqunneqarnissaanut siunnersuutaasumut oqaaseqaatigisassaannik.
§ 7-mutSiunnersuutigineqarpoq inatsisartut inatsisaat 1. juni 2008 atortuulersinneqassasoq.