14. maj 2008 UPA 2008/130
Uunga allannguutissatut siunnersuut
Siunnersuut: Kalaallit Nunaanni namminersorneq pillugu siunnerfiliisumik innuttaasunik taasisitsinissaq pillugu Inatsisartut inatsisaat
Aappassaaneerinissamut Inatsisartut Inatsisit Atortinneqarnerannut Ataatsimiititaliaannit saqqummiunneqartoq.
§ 2-mut1. § 2 ima oqaasertaqassaaq:
"§ 2. Qinersisartut siunerfiliilluni innuttaasunik taasisitsinermi "Aap" imaluunniit "Naamik" akissutigissavaat, apeqqummut:Kissaatigaajuk Kalaallit Nunaanni namminersorneq Namminersorneq pillugu kalaallit qallunaallu isumalioqatigiissitaasa namminersornermik inatsisissatut missingiusiaattut imalik piumasaqaatitaqartorlu eqqunneqassasoq?"
Nalinginnaasumik nassuiaatit
Inatsisit Atortinneqarnerannut Ataatsimiititaliami suliarinneqqinnissaq siunertaralugu siunnersuummik aappassaaneerineq taamaatinneqarpoq, tamatumani kaammattuutigineqarluni innuttaasunik taasisitsinissap qulequtaanik erseqqissaanissaq ajornannginnersoq ataatsimiititaliamit isumaliutigineqassasoq.
Innuttaasunik taasisitsinissami qulequtarineqartussap erseqqissarneqarnissaanik kissaateqarnerup malinneqarnissaa allannguutissatut siunnersuutip matuma siunertaraa.
Taamatut erseqqissaateqarnissaq kissaatiginartoq Inatsisit Atortinneqarnerannut Ataatsimiititaliaq isumaqarpoq – tamatumani aamma eqqarsaatigineqarluni piffissami aggersumi paasisitsiniaanissaq. Innuttaasunik paasisitsiniaanissami suna taasissutigineqassanersoq ilisimaneqartariaqarpoq – tassa namminersornermik aaqqissuussinerup suna imarineraa suullu piumasaqaataanersut.
Allannguutissatut siunnersuut aningaasatigut allaffissornikkullu kinguneqaateqanngilaq.
Aalajangersakkanut ataasiakkaanut nassuiaatit
Nr. 1-imut
Allakkami Inatsisit Atortinneqarnerannut Ataatsimiititaliap inatsisissatut siunnersuut pillugu isumaliutissiissutaanut siullermut ilanngussatut ilanngunneqartumi Naalakkersuisut siulittaasuata oqaatigisaatut pisortatigoortumik periusissat malillugit Kalaallit Qallunaallu Namminersorneq pillugu Isumalioqatigiissitaata isumaliutissiissutaa tunngavigalugu Naalakkersuisut danskillu naalakkersuisuisa akornanni isumaqatigiinniarnerit maanna ingerlanneqalissapput.
Kalaallit Qallunaallu Namminersorneq pillugu Isumalioqatigiissitaat nunatsinni Naalakkersuisut danskillu naalakkersuisuisa peqatigiillutik pilersitaraat, naatsorsuutigineqartariaqarporlu aallartitat taakku marluusut isumalioqatigiissitat isumaqatigiinniarnerata ingerlanneqarnerani danskit naalakkersuisui nunatsinnilu Naalakkersuisut ilisimatinneqartarsimallutillu pisortatiguunngikkaluamik naalakkersuisut piginnaatitsissuteqarnissaat qulakkeerneqartarsimasoq.
Taamaattumillu naatsorsuutigineqarpoq isumalioqatigiissitat isumaliutissiissutaat, taassumalu ilaatut namminersorneq pillugu inatsisissatut siunnersuut nunatsinni Naalakkersuisunit danskillu naalakkersuisuinit taperserneqarsinnaasoq.
Nunatsinnili Naalakkersuisut danskillu naalakkersuisui isumalioqatigiissitat kaammattuutaannik saneqqutsinissamik aalajangersinnaanerat aarleqqutigineqarsinnaavoq.
Tamannali allannguutissatut siunnersuummik matumani pineqartumik Inatsisartut akuersissutiginninnissaannut akornutaasussatut nalilerneqanngilaq. Naatsorsuutigisat akimorlugit isumalioqatigiissitat kaammattuutaanik saneqqutsinissaq nunatsinni Naalakkersuisut danskillu naalakkersuisuisa aalajangiutissagaluarpassuk innuttaasunik taasisitsinissami qulequtaq allannguutissatut inatsimmik siunnersuut ukiakkut ataatsimiinnissami aggersumi saqqummiunneqarlunilu akuersissutigineqartoq aqqutigalugu allanngortinneqarsinnaavoq. Taamaattoqassappat namminersorneq pillugu aaqqissuussinerup naatsorsuutigisamit allaanerusumik imaqartinneqalernera pillugu innuttaasut (saneqqutsinerup erseqqinnerusumik imarisaa suussusialu apeqqutaatillugu) ilisimatinneqartariaqassapput.