8. maj 2008

UPA 2008/49

 

Piniarneq aallaaniarnerlu pillugit Inatsisartut inatsisaata allanngortinnera pillugu Inatsisartut inatsisissaattut siunnersuut

pillugu

Inatsisartut Aalisarnermut Piniarnermut Nunalerinermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Aalisarnermut, Piniarnermut Nunalerinermullu Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Jonathan Motzfeldt, Siumut (siulittaasoq)
Inatsisartunut ilaasortaq Augusta Salling, Atassut (siulittaasup tullia)
Inatsisartunut ilaasortaq Ole Thorleifsen, Siumut
Inatsisartunut ilaasortaq Ane Hansen, Inuit Ataqatigiit
Inatsisartunut ilaasortaq Jens B. Frederiksen, Demokraatit

Siunnersuutip siullermeerneqarnerani Inatsisartut Aalisarnermut, Piniarnermut Nunalerinermullu Ataatsimiititaliaata aalajangiiffigisassatut siunnersuut misissorpaa.

Siunnersuutip imarisaa

Naalakkersuisut piniarneq aallaaniarnerlu pillugit Inatsisartut inatsisaata allanngortinneqarneranik Inatsisartut inatsisissaattut siunnersuut saqqummiuppaat. Inatsisissatut siunnersuut allannguutinik assigiinngitsunik pingasunik imaqarpoq: Aalajangiisinnaanermut kommuninut pisinnaatitsissutip erseqqissarnera, inuussutissarsiutigalugu piniarsinnaanermut allagartap pissarsiarinissaanut immikkut akuersissuteqarsinnaanerup periarfissaqarnerulernerunera kiisalu inuussutissarsiutigalugu piniartut takornariartitsinermit aammalu ilisimatusarnerni ikiuunnernit isertitaqarsinnaanerat, tamanna inuussutissarsiutigalugu piniarsinnaanermut allagartap annaariataarsinnaaneranik kinguneqartinnagu.

Inatsisartut Aalisarnermut, Piniarnermut Nunalerinermullu ataatsimiititaliaata isumaliutissiissutaa (UPA2007/129) saqqummiunneqarpoq. "Piniartut takornarianut sullissinerminni saniatigut isertitaqaannarnissaat maleruagassani atuuttuni aqqutissiuunneqartariaqartoq" Ataatsimiititaliap isumaqatigiittup tamatumani inassutigaa.

Maannakkut inatsit atuuttoq § 4, imm. 2, nr. 2, 50 – 50 %-imik piumasaqaammik aamma taaneqartartoq naapertorlugu nutarterineq aallartippoq.

Inatsimmi politikkikkut piumasaqaatit qulaani taaneqartut ilanngunneqarput, taamaalilluni inuussutissarsiutigalugu piniartut aalisartullu maannakkut takornariartitsinermit aammalu ilisimatusarnerni ikiuunnernit isertitaqarsinnaalissallutik, tamanna inuussutissarsiutigalugu piniarsinnaanermut allagartap annaaratarsinnaaneranik kinguneqartinnagu, tassa taakkunannga isertitat, isertitat naatsorsorneranni ilanngunneqartussaassanngimmata.

Inatsisissatut siunnersuut makkuninnga tusarniaassutigineqarpoq:

• KANUKOKA,
• KNAPK,
• Piniarnermut Siunnersuisoqatigiit,
• Inuussutissarsiornermut Pisortaqarfik,
• Avatangiisinut Pinngortitamullu Pisortaqarfik
• Akileraartarnermut Pisortaqarfik,
• Suliffeqarnermut, Inuussutissarsiutinullu Ilinniartitaanermut Pisortaqarfik,
• KANUAANA,
• Pinngortitaleriffik,
• Nunatsinni Takornariaqarnermi Inuussutissarsiornermilu Siunnersuisoqatigiit,
• Aningaasaqarnermut Pisortaqarfik.

Kommunit assigiinngitsut makku immikkoortissinnaassagaat Aalisarnermut, Piniarnermut Nunalerinermullu Naalakkersuisoqarfiup naatsorsuutigaa:

1. isertitat akileraarusigassat nalinginnaasut naatsorsornerannut atatillugu isertitat tamarmiusut aamma
2. 50-50%-imik piumasaqaat naapertorlugu inuussutissarsiutigalugu piniarsinnaanermik allagartaqalernissamut qinnuteqaateqartup pisinnaatitaanerata naliliiviginerani isertitat tamarmiusut isertitanullu tunngaviit naatsorsuinermut ilaatinneqassapput.

Inatsit ulloq 1. januar 2008-mit kingumoortumik atuutilissasoq siunnersuutigineqarpoq.

Siunnersuutip Inatsisartuni siullermeerneqarnera

Siullermeerinermi Inatsisartunit partiit tamarmik siunnersuummut tapersiipput. Inuussutissarsiutigalugu piniartut piniarnermut allagartartik annaanngikkaluarlugu takornarianut ilisimatusartunullu sullissilersinnaalermata partiit tamarmik naammagisimaarlugu oqaatigaat.

Inatsit sooq kingumoortumik atuutilissanersoq Demokraatit Naalakkersuisunut nassuiaqquaat.

Inatsisip ulloq 1. januar 2008-mit kingumoortumik atortinneqalernissaanut innuttaasunit iluaqutigineqarnissaa matumani kisimi eqqarsaatigineqartoq Naalakkersuisunit oqaatigineqarpoq. Inuussutissarsiutigalugu piniartup assersuutigalugu takornariaqarnermik suliaqarluni isertitai piffissami 2008 januaarip aallaqqaataanit inatsisip atuutilernissaata tungaanut isertitassatut maannamut killissarititaasut angugajalersimassavaa, taamaaliornikkut piniartup piffissami matumani isertitassatut killigitinneqartoq qaangigajalersimagaluarlugu, inuussutissarsiutigalugu piniarnermut allagartartik annaanngikkaluarlugu, takornarianik suliaqarneq ingerlatiinnarsinnaaqqullugu.

Aalisarnermut, Piniarnermut Nunalerinermullu Ataatsimiititaliap inassuteqaataa

Siuliani oqaatigineqartut ilanngullugit siullermeerinermilu siunnersuummut oqaaseqaatit ilanngullugit Aalisarnermut, Piniarnermut Nunalerinermullu Ataatsimiititaliap isumaqatigiittup akuersissutigineqassasoq inassutigaa.

Taamatut oqaaseqarluni Inatsisartut Aalisarnermut, Piniarnermut Nunalerinermullu Ataatsimiititaliaata siunnersuut Inatsisartunut aappassaaniigassanngortippaa.

 

	Jonathan Motzfeldt Siulittaasoq
Augusta Salling		Ole Thorleifsen
Ane Hansen		Jens B. Frederiksen