10. oktober 2008 UKA 2008/128
Peqqussutissatut siunnersuut pillugu oqaaseqaatit
Oqaaseqaatit nalinginnaasut
1. Aallaqqaasiut:Inuit Kalaallit Nunaanni aalajangersimasumik najugaqartut annertuumillu innarluuteqartut aammalu immikkut ittunik pisartakkanik pisariaqartitsisut kiisalu utoqqalinermi pensionisiat pillugit peqqussut malillugu utoqqalinermi pensionisianik tigusinissamut ukiussanut sukkulluunniit atuuttut malillugit tigusisinnaasut peqqussummi tassani malittarisassat malillugit ikiorneqarnissaasa qulakkeerneqarnissaat allannguutissatut siunnersuummi anguniarneqarpoq.
Annertuumik innarluutilinnut ikiorsiisarneq pillugu inatsisartut peqqussutaat naapertorlugu inuit 63-it ataallugit ukiullit kisimik peqqussummi pineqarput.
Utoqqalinermi pensionisiat pillugit inatsisartut peqqussutaat atuuttoq malillugu utoqqalinermi pensionisianik tigusaqarnissamut ukiunut killissarititat 65-iupput; taamaakkaluartoq utoqqalinermi pensionisiat pillugit inatsisartut peqqussutaanni ikaarsaariarnermi aalajangersakkamik ikkussisoqarpoq, tassanilu ukiunut killissarititat 2008-mi 63-iullutik, 2009-imi 64-iullutik kiisalu 1. januar 2010-imi 65-iullutik. Annertuumik innarluutilik utoqqalinermi pensionisiat pillugit inatsisartut peqqussutaannut ilanngunneqartoq, utoqqalinermi pensionisiat pillugit inatsisartut peqqussutaanni inummut tapit pillugit malittarisassat naapertorlugit ikiorsiissutinik tunineqarsinnaassaaq.
Siunnersuummik matuminnga peqanngikkaluarpat inuit annertuumik innarluutillit 2009-mi 63-inik ukioqalersussat annertuumik innarluutillit pillugit inatsisartut peqqussutaanni malittarisassani imaluunniit utoqqalinermi pensionisiat pillugit Inatsisartut peqqussutaanni inummut tapit pillugit malittarisassani ilaatinneqarnavianngikkaluarput.
2. Aningaasaqarnikkut allaffissornikkullu kingunerisassatAllannguut 2009-imi 1,96 mio. kr.-nit missaannik 2010-milu 3,92 mio. kr.-inik aningaasartuutaanerunissaanik kinguneqassasoq ilimagineqarpoq.
Aningaasartuutaanerussutissat massakkorpiaq inuit 14-it 1946-mi inuillu 15-it 1947-mi inunngortut innarluutillit pillugit peqqussut malillugu ikiorserneqartartut tunngavigalugit naatsorsorneqarput.
Ukiut allanngortinnerinut atatillugu aningaasartuutaanerusussat AIS 2009-mut aningaasaliissutinut sinaakkutissat iluaniissinnaassasut naatsorsuutigineqarpoq.
Allannguutissatut siunnersuutip kingunerisaanik kommunit aamma Ilaqutariinnermut Peqqissutsimullu Naalakkersuisoqarfimmut allaffissornikkut annikitsuinnarmik kinguneqassasoq naatsorsuutigineqarpoq.
3. Oqartussaasunit, kattuffinnit il.il. tusarniaaneq.Allannguutissatut siunnersuut Aningaasaqarnermut Aqutsisoqarfimmut tusarniaassutigineqareerpoq.
Peqqussutissatut siunnersuummi aalajangersakkat ataasiakkaat pillugit oqaaseqaatit
§ 1-mut
Nr. 1-mutAalajangersakkakkut erseqqissarneqarpoq inuit Kalaallit Nunaanni aalajangersimasumik najugaqartut immikkut pisartakkanik immikkut ittunik pisariaqartitsisut utoqqalinermi pensionisiaqalernissamut ukiut killissaattut aalajangersarneqarsimasoq sukkulluunniit atuuttoq inorlugit ukiullit peqqussummi matumani malittarisassat malillugit ikiorserneqarsinnaasut.
Utoqqalinermi pensionisiaqalernissamut ukiut 2009-mi 64-iussapput, 1. januar 2010-miillu 65-iussallutik. Annertuumik innarluutillit tamatuma kingornatigut utoqqalinermi pensionisiat pillugit Inatsisartut peqqussutaanni inummut tapit pillugit malittarisassat tunngavigalugit ikiorserneqartalissapput.
§ 2-mutInatsisartut peqqussutaat 1. januar 2009-mi atortuulissasoq siunnersuutigineqarpoq.