25. november 2008

UKA 2008/111

 

Allannguutissatut siunnersuut

uunga

Uunga siunnersuut: Pilersaarusiorneq aamma nunaminertat atorneqartarnerat pillugu Inatsisartut peqqussutaat

Pingajussaanneerinissamut Naalakkersuisunit saqqummiunneqartoq.

§ 1

1. § 32, imm. 3 imatut oqaasertalerneqassaaq:
"Isumaqatigiilluni aaqqiisoqarsinnaanngippat imm. 1 naapertorlugu taarsiissuteqarnissaq pinngitsaaliissummik taarsiinertalimmik arsaarinnissuteqartarnermut ataatsimiititaliamit aalajangersarneqassaaq, tak. pigisanik aalaakkaasunik arsaarinnissuteqartarneq pillugu Inatsisartut inatsisaat."

2. § 38 imatut oqaasertalerneqassaaq:
"Pilersaarutinut aamma nunaminertanut naammagittaalliuuteqartarfimmik suliamut attuumassuteqanngitsumik, pingasunik ilaasortalimmik Naalakkersuisut pilersitsissapput. Naalakkersuisup pilersaarusiornermut aamma nunaminertat atorneqarnerannut akisussaasuusup inassuteqarneratigut siulittaasoq tassungalu sinniisissaq toqqarneqassapput. Siulittaasoq pilersaarusiornermut nunaminertallu atorneqarnerinut inatsisinik immikkut ilisimasaqartuussaaq, imaluunniit inatsisilerituutut soraarummeersimasuussalluni. Naammagittaalliuuteqartarfimmut ilaasortaq ataaseq taassumalu sinniisissaa Kalaallit Nunaanni inatsisartut inassuteqarnerisigut Naalakkersuisunit toqqarneqartassaaq, aammalu naammagittaalliuuteqartarfimmut ilaasortaq ataaseq taassumalu sinniisissaa KANUKOKA-p inassuteqarneratigut Naalakkersuisunit toqqarneqartassaaq.
Imm. 2. Pilersaarutinut aamma nunaminertanut naammagittaalliuuteqartarfimmi ilaasortat ilaasortaanerminnut peqatigitillugu Naalakkersuisunut ilaasortaassanngillat.
Imm. 3. Pilersaarutinut aamma nunaminertanut naammagittaalliuuteqartarfimmi piffissaq qinigaaffiusoq Inatsisartut piffissaq qinigaaffigisaat malittassavaa. Inatsisartunut nutaamik qinersinerup kingorna naammagittaalliuuteqartarfimmi ilaasortassanik nutaanik qinersinissap tungaanut, naammagittaalliuuteqartarfimmi ilaasortat atuuttassapput.
Imm. 4. Pilersaarutinut aamma nunaminertanut naammagittaalliuuteqartarfik suliamut ilisimasalinnik peqataatitaqarsinnaavoq.
Imm. 5. Pilersaarutinut aamma nunaminertanut naammagittaalliuuteqartarfiup atuunneranut Naalakkersuisut sukumiineruusunik aalajangersaasinnaapput."

3. § 38 kingorna ilanngunneqassaaq:
"§ 38a. Naammagittaalliuuteqartarfiup atortorissaarutit pisariaqartitai Naalakkersuisunit atugassiissutigineqassapput, aammalu allattoqarfittut ikiorsiinerit pisariaqartinneqartut isumagissallugit.
Imm. 2. Naammagittaalliuuteqartarfiup sulinerani aningaasartuutissat, tassunga ilanngullugit suliamut atatillugu siulittaasup ilaasortallu akiliutigigallagaannut, kiisalu allaffissornermut il.il. aningaasartuutit Naalakkersuisunit akilerneqartassapput. Pilersaarutinut aamma nunaminertanut naammagittaalliuuteqartarfimmut ilaasortat Inatsisartunut Naalakkersuisunullu il.il. ilaasortat akissarsiaqartinneqarnerat il.il. pillugu Inatsisartut inatsisaanni maleruagassat malillugit akissarsiaqartinneqassapput, ullormusiaqartinneqassapput aammalu angalanermut aningaasartuutinut taarsiiffigineqartassallutik."

 

Allannguutissatut siunnersuummi aalajangersakkanut ataasiakkaanut nassuiaatit

§ 1-imut

Nr. 1-imut

Aalajangersagaq iluarsineqarpoq, tassani Inatsisartut peqqussutaanni atuuttumi kukkusumik innersuussisoqarsimammat. Innersuussut eqqortoq tassaavoq pinngitsaaliissummik taarsiinertalimmik arsaarinnissuteqartarneq pillugu Inatsisartut inatsisaat nr. 25, 30. oktober 1992-imeersoq.

Nr. 2-mut

Inatsisartut Attaveqaqatigiinnermut Ineqarnermullu Ataatsimiititaliaata siunnersuutip aappassaanneerneqarnissaanut isumaliutissiissuteqarneranut atatillugu oqaatigineqarpoq, pilersaarutinut aamma nunaminertanut naammagittaalliuuteqartarfimmik pilersitsinissaq pillugu § 38-mi aalajangersakkap peqqussutissatut siunnersuummi erseqqissarneqarnissaa kissaatigineqartoq.

Imm. 1-imut

Pilersaarutinut aamma nunaminertanut naammagittaalliuuteqartarfimmik pilersitsinermi innuttaasut naammagittaalliuutaasa aaqqissuussaanermi immikkut aalajangiisinnaassuseqartumi, tamatuminngaannaq siunertaqarfiusumi suliarineqartarnissaasa qulakkeerneqarnissaa siunertarineqarpoq. Naammagittaalliuuteqartarfik Naalakkersuisup pilersaarusiornermut nunaminertallu atorneqartarnerannut akisussaasuusup innersuussuteqarneratigut Naalakkersuisunit toqqarneqartumik siulittaasoqassaaq, ilaasortallu sinneri marluk aamma Naalakkersuisunit toqqarneqassapput, taakkuli Inatsisartut aamma KANUKOKA-p innersuussuteqarnerisigut toqqarneqassapput.

Imm. 2-mut

Naammagittaalliuuteqartarfimmi ilaasortat pingasuusut arlaannaalluunniit naammagittaalliuuteqartarfimmi ilaasortaanerminnut peqatigitillugu Naalakkersuisunut ilaasortaassanngillat. Pilersaarutinut aamma nunaminertanut naammagittaalliuuteqartarfimmi ilaasortaq pilersaarutinut aamma nunaminertanut naammagittaalliuuteqartarfimmi ilaasortassatut toqqarneqarnermi kingorna Naalakkersuisunut ilaasortanngussagaluarpat, taassuma sinniisissaa ilaasortanngussaaq. Taamatut pisoqassappat imm. 1 naapertorlugu Naalakkersuisut sinniisissamik nutaamik toqqaassapput.

Imm. 3-mut

Suliassaqarfinni allani pisarnertut naammagittaalliuuteqartarfimmi piffissap qinigaaffiusup Inatsisartut qinigaaffiat malissavaa.

Imm. 4-mut

Pilersaarutinut aamma nunaminertanut apeqqutinut tunngatillugu pilersaarutinut aamma nunaminertanut naammagittaalliuuteqartarfimmut kiortissatut suliamik ilisimasalik ataaseq amerlanerusulluunniit ataatsimiititaliamit peqataatinneqarsinnaapput. Naammagittaalliuuteqartarfimmut sulianik ilisimasalinnik aalajangersimasunik peqataatitaqartarnissaq naleqqutissaaq. Tamatuma saniatigut naammagittaalliuuteqartarfiup suliani ataasiakkaani sulianut ilisimasalinnik allanik aggersaanissartik toqqarsinnaavaat.

Imm. 5-imut

Aalajangersakkami Naalakkersuisut pilersaarutinut aamma nunaminertanut naammagittaalliuuteqartarfimmi sulinermut maleruagassanik sukumiinerusunik aalajangersaanissamut inatsisitigut tunngavissiorneqarput. Assersuutigalugu matumani pineqartut tassaasinnaapput aalajangiisartut ataatsimiittarnerisa akulikissusissaannut, suleriaasissamut, oqaluuserisassat aalajangersarneqarnissaannut, ataatsimiigiaqqusisarnernut, suleqataatinneqartunut akissarsiaqartitsinermut, nalinginnaasumik amerlanerussuteqartoqarneratigut aalajangiisinnaanermut il.il. maleruagassat. Naalakkersuisut naammagittaalliuuteqartarfimmut ilitsersuisussaatitaanngillat. Naammagittaalliuuteqartarfimmi sulinerup ingerlanissaa naammagittaalliuuteqartarfiup allattoqarfittut kiffartuussisuusumit allaffissornikkut ikiorserneqarluni aalajangersartassavaa.

Nr. 3-mut

Aalajangersagaq nutaajuvoq.

Imm. 1-imut

Pilersaarutinut aamma nunaminertanut naammagittaalliuuteqartarfiup allattoqarfittut kiffartuunneqarnera Naalakkersuisunit isumagineqassaaq. Tassani Naalakkersuisoqarfiup, pilersaarusiornermut nunaminertallu atorneqarnerannut suliassaqarfiup inissisimaffigisaata pilersaarusiornermut tunngavissatut najoqqutassanik pisariaqartinneqartunik ikiorsiisarnissaa siunnerfigineqarpoq, taakkununngalu pilersaarutit tunngavissat atuuttut ilaapput.

Imm. 2-mut

Pilersaarutinut aamma nunaminertanut naammgittaalliuuteqartarfiup sulineranut atatillugu aningaasartuutit Inatsisartunut Naalakkersuisunullu il.il. ilaasortat akissarsiaqartinneqarnerat il.il. pillugu Inatsisartut inatsisaanni maleruagassat malillugit Nunap Karsianit akilerneqartassapput. Tamatumunnga aningaasartuutit Naalakkersuisoqarfimmit, pilersaarusiornermut nunaminertallu atorneqarnerannut suliassaqarfiup inissisimaffigisaanik akilerneqartarnissaat siunnerfigineqarpoq. Tassalu aningaasartuutit Avatangiisinut Aqutsisoqarfimmut aningaasaliissutitut killiliussat iluanni akilerneqartassapput ("Inatsisartut 2009-mut aningaasanut inatsisissaattut siunnersuut"-mi konto 75.01.01 "Avatangiisinut Aqutsisoqarfik, Allaffissorneq").