31. oktober 2008

UKA2008/98

 

Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutissaattut siunnersuut

pillugu

Inatsisartut Kultureqarnermut Ilinniartitaanermullu Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Kultureqarnermut, Ilinniartitaanermut Ilageeqarnermullu Ataatsimiititaliaat suliarinninnermini ukuninnga inuttaqarpoq:

Inatsisartunut Ilaasortaq Kristian Jeremiassen, Atassut, siulittaasoq
Inatsisartunut Ilaasortaq Emilie Olsen, Atassut
Inatsisartunut Ilaasortaq Per Rosing-Petersen, Siumut, siulittaasup tullia
Inatsisartunut Ilaasortaq Aleqa Hammond, Siumut
Inatsisartunut Ilaasortaq Juliane Henningsen, Inuit Ataqatigiit
Inatsisartunut Ilaasortaq Kuupik Kleist, Inuit Ataqatigiit
Inatsisartunut Ilaasortaq Olga Berthelsen, Inuit Ataqatigiit

UKA 2008-mi siullermeerinerup kingorna Inatsisartut Kultureqarnermut Ilinniartitaanermut Ilageeqarnermullu Ataatsimiititaliaata siunnersuut siuliani taaneqartoq misissorpaa.

Siunnersuutip imarisaa

Siunnersuut Naalakkersuisut ataqatigiissumik ilinniartitaanermut, ineriartornermi ilinniartitaanermilu suliniutinut qaffasissutsini tamani pitsanngorsarnissaat nukittorsarneqarnissaallu eqqarsaatigalugit, anguniagaasa ilaannut kissaatitut isigineqassaaq. Siunnersuut suli atualinngitsunut aaqqissuusseqqinneruvoq, tamatumanilu ukioqanngitsuniit arfinilinnut ukiulinnut paarsinermiit perorsaanikkut inerikkiartuutaasoq immikkut isiginiarneqarluni. Meeqqanut suli atualinngitsunut perorsaanikkut inerikkiartuutaasunik ulluunerani neqerooruteqartarneq pillugu Inatsisartut peqqussutaani inatsisip atuuttup annersaa Inatsisartut peqqussutissaani ataatsimoorlugu allanneqartussaammat, siunnersuut malittarisassanik pisariunnginnerulersitsisussaassaaq.

Siunnersuut kommunini meeqqanut pilersaarusiornissamik piumasaqaammik aamma imaqarpoq, perorsaanikkut ineriartortitsinermut, ilisimatusarnermut, naliliinermut uppernarsaasersuinermullu ingerlatsinissaq, kiisalu ulluunerani neqeroorutit aqunneqarnerannut ilusissaq nutaaq, angajoqqaat tamarmik ulluunerani neqeroorutinut oqartussaaqataalernissaannik periarfissiisoq.

Tusarniaaneq

Siunnersuut piffissami 19. juunimiit 23. juulip tungaanut tusarniaassutigineqarpoq piffissallu asaanerani sulinngiffeqarnerup nalaaniinnera eqqarsaatigalugu tamanna minnerpaamik piffissaliinertut isigineqarsinnaavoq. Tusarniaanermut akissutit arlallit piffissamik iluatsitsivallaanngitsutut aamma assuarlerneqarput.

Siunnersuutip aningaasatigut kingunerisinnaasai

Immikkoortoq 4-mi inatsisissatut siunnersuummi nalinginnaasumik oqaaseqaatini siunnersuutip aningaasatigut pisortanut allaffissornikkullu aqutsinermi kingunerisinnaasai nassuiaatigineqarput. Tassani 2009-mut aningaasanut inatsisissami aningaasat meeqqerivitsialammut immikkoortitsisoqarsimasoq paasissutissiissutigineqarpoq.

Aningaasanut inatsisissatut siunnersuummi nalinginnaasumik oqaaseqaatini ilinniartitaanermut sillimmatini pilersaarummi "Meeqqerivitsialammut" atugassanngortinneqarsimasut, Kultureqarnermut Ilinniartitaanermullu ataatsimiititaliamit paasineqarpoq. Aningaasalli Aningaasaqarnermut Ataatsimiititaliamit taamaallaat akuersissutigineqarpata atugassanngortinneqarsinnaapput. Inatsisissatut siunnersuutip maanna ilusimisut allannguutigissanngilaa.

Siunnersuummi § 4, imm. 3-mi perorsaanikkut-tarnip pissusaannut tunngasutigut qitiusumik inerisaavimmik pilersitsisoqarnissaanik inatsisinut oqaaseqaatini Naalakkersuisut peqquneqassasut, Ataatsimiititaliamittaaq paasineqarpoq. Qitiusumik pilersitsinissamut siunnersuut inatsisissamut aalajangersakkamut oqaaseqaatit naapertorlugit Inerisaavimmit isumassarsiaavoq. Aningaasatigut allaffissornikkullu aqutsinermi kingunerisinnaasai inatsisissatut oqaaseqaatini erseqqinnerusumik nassuiarneqanngillat.

Qitiusumik pilersitsinerup sanaartornermi aningaasatigut imaluunniit ininik attartornermut aningaasartuutinik kinguneqassava? Qitiusumik suliffeqarfissaq qassinik sulisoqassava qassinillu katillugit aningaasarsiassanut aningaasartuutaaffiussava? Ukiumut ingerlatsinermut aningaasartuutissat qassiussappat? Inerisaavik 2008-mi 56,6 mio. kr.-inik aningaasaliiffigineqarpoq. Perorsaanikkut-tarnip pissusaannut tunngasutigut qitiusumik inerisaavissaq aamma taamatut akisutigissava? Inatsisissanut oqaaseqaammi tamanna akineqanngilaq.

Nalinginnaasumik oqaaseqaatit nassuiaataasa siunertaraat inatsisissatut siunnersuutip aningaasatigut allaffissornikkullu aqutsinermi kingunerusinnaasut pillugit Inatsisartut isummernissaannut akisussaasumik tunngavississallugit. Inatsisartut inatsisissamut siunnersuummut akuerisinnginnerminni isummernissamut aamma aningaasatigut kingunerusinnaasut ilisimasariaqarpaat - aamma aningaasatigut ajornartorsiornerup nalaani – taamaattumik Naalakkersuisoqarfimmi tamanna paasineqarsinnaanngippat tupigusuutigineqarsinnaavoq.

Perorsaanikkut-tarnip pissusaannut tunngasutigut qitiusumik inerisaavimmik pilersitsisoqarnissamut siunnersuummut naammaginartumik aningaasatigut allaffissornikkullu aqutsinermi nassuiaasiortoqarnissaa Naalakkersuisut aappassaanerinermi akissutissaanut ilanngunneqassasoq Ataatsimiititaliamit qinnutigineqassaaq. Susassaqarfimmit sorlermit aamma aningaasat aaneqassanersut paasissutissiissutigineqassasoq Ataatsimiititaliamit aamma kissaatigineqassaaq.

Paasissutissat taakku amigaataaneri pissutigalugit Inatsisartut inatsisissamut oqaaseqaatit unioqqutinneqassanngitsut naatsorsuutigissavaat, tassa KIIINŽip susassaqarfiani qitiusussap pilersinniarneqarnerani aningaasaliissutigineqartut sulisussallu amerlassusissaasa iluini aningaasaliissutaareersunit ingerlanniarneqartoq.

Teknikkikkut amigaatigineqartut

Siunnerssummi aalajangersakkat arlallit (§ 10, imm. 2, § 12, imm. 3, § 14, imm. 2, nr. 4 aamma § 18, imm. 1) oqaatsit "aamma/imaluunniit" imarivai, taakkulu Namminersornerullutik Oqartussat malittarisassaliornermi maleruagassaanut akerliupput. Tamatumunnga ikiorsiissutaasinaasumik pingajussaaneerinissamut allannguutissatut siunnersuummik Naalakkersuisut saqqummiussissasut qinnuigineqassapput.

UKA 2008-mi siunnersuutip siullermeerneqarnera

Siunnersuutip siullermeerneqarnerani siunnersuut tamakkiisumik partiinit tamanik tapersersorneqarpoq. Meeraq qitiutillugu ilinniartitaanermut ataqatigiissumik pilersaarusiornissaq naalakkersuinikkut qulakkeerniarneqarnissaa kissaatigineqartoq siammasissumik taamaalilluni isumaqatigiissutigineqarpoq. Aammattaaq meeqqat Atuarfitsialammi aallartilluartarnissaasa qulakkeerneqarnissaat uparuarneqarpoq, tamannalu tikilluaqquneqarpoq.

Ataatsimiititaliap siunnersuummik suliarinninnera

Siunnersuummut Inatsisartut peqqussutissaat nalinginnaasumillu tamatumunnga oqaaseqaatit Ataatsimiititaliamit soqutigineqarluarlutik atuarneqarput. Siunnersuut ataatsimut isigalugu Ataatsimiititaliamit pitsaasutut isigineqarpoq, suliamilu Meeqqerivisialammut aaqqissuusseqqinnissamut isummat isumaqatigineqarlutik.

Siunnersuummi inatsit atuuttoq pisariunnginnerulersitsilersussaammat aammattaaq Ataatsimiititaliamit tamanna nuannarutigineqarpoq.

Suliat amerlasuut qaqinneqarnissaannut perorsaanikkut-tarnip pissusaannut tunngasutigut qitiusumik inerisaavimmik pilersitsisoqarnissanut siunnersuummi § 4-mi Naalakkersuisut peqquneqassasut Ataatsimiititaliamit immikkut maluginiarneqarsimavoq. Aammattaaq siunnersuummi § 6 Ataatsimiititaliamit immikkut maluginiarneqarpoq, tamannami kommunalbestyrelse meeqqanut inuusuttunullu pilersaarutinut pingaarnertut akisussaasuuneranik isumaqarmat. Aammalu kommunalbestyrelsi perorsaanermi ukiumut pilersaarusiortassasoq peqquneqassammat. Maannakkut kommunit perorsaanikkut ukiumoortumik pilersaarusiornissaannik peqquneqarnissaannut inatsisitigut tunngavissaqalermat Ataatsimiititaliamit pitsaasutut isigineqarpoq.

Ataatsimiititaliamit annertuumik suliaq pissanganartutut isigineqarpoq, nuannaarutigineqassaarlu Naalakkersuisut ataavartumik siunnersuutip atuutsinneqarnissaata tungaanut, assersuutigalugu naliliilluni nalunaarusiortoqarneratigut, Ataatsimiititaliamut ilisimatitsisoqartaraluarpat.

Siunnersuummi suliarinninnermi Ataatsimiititaliamit meeqqerivinnut utaqqisoqartarnermut ajornartorsiut eqqartorneqarsimavoq. Ajornartorsiut tamanna ajoraluartumik angajoqqaarpassuarnut piviusuuvoq nutaajunanilu. Ulluunerani meeqqanut suli atualinngitsunut pisariaqartitat malillugit neqeroornissamut akisussaaffik kommuniniittoq Ataatsimiititaliamit ilisimaneqarpoq. Ataatsimiititaliamiilli kaammattuutigineqarpoq, meeqqat qassit utaqqisuniinnersut qanorlu sivisutigisumik meeraq utaqqisuniitaarnersoq uppernarsaatitut naatsorneqartalernissaa pillugu Naalakkersuisut kommunit suleqatigiserissagai.

Inassuteqaat

Siunnersuut Inatsisartunut akuerisassanngorlugu Ataatsimiititaliamit isumaqatigiittumit inassutigineqarpoq.

Inatsisartut Kultureqarnermut Ilinniartitaanermullu Ataatsimiititaliaata taamatut oqaaseqarluni siunnersuut aappassaaniigassanngortippaa.

 

	Emilie Olsen Atassut
Per Rosing-Petersen Siumut		Aleqa Hammond Siumut
Kuupik Kleist Inuit Ataqatigiit		Olga Berthelsen Inuit Ataqatigiit