Peqqussutissatut siunnersuummut nassuiaatit

Nassuiaatit nalinginnaasut

 

1. Aallaqqaasiut

Atassutip aalajangiiffigisassatut siunnersuutaata, imm. 25 "Inissianik attartortitsisarneq pillugu Inatsisartut peqqussutaata nr. 2, 12. maj 2005-imeersup allanngortinneqarnissaa pillugu siunnersuusiornissamik Naalakkersuisut peqquneqarnissaat pillugu siunnersuut, taamaaliornikkut inissianik attartortut ilaatigut aningaasatigut atugarisamikkut ajornerulersumik inissisimalerneq pissutigalugu ineqarnermut, imermut kiassarnermullu kinguaattoorsimasut kinguaattoorutiminnik naafferartumik akilersuisinnaanissaat pillugu periarfissaqartitsisoqaqqilernissaa qulakkeerneqaqqullugu" Inatsisartunit akuersissutigineqarnera attartortitsinermut peqqussummut allannguutissamik saqqummiussinermi tunngaviuvoq.

Atassutip aalajangiiffigisassatut siunnersuutaa 2008-imi Inatsisartut upernaakkut ataatsimiinneranni akuersaarneqarpoq, akuersisut 16-iullutik akerliusullu 12-iullutik. Taasinngitsoortoqanngilaq.

Atassutip aalajangiiffigisassatut siunnersuuteqarnermini tunngavilersuutigaa: "Inissianik attartortitsisarneq pillugu Inatsisartut peqqussutaat nr. 2, 12. maj 2005-imeersumi Kapitali 11 §§ 73-74 tunngavigalugit pisortanit attartortitsisup attartornermut, imermut, kiassanermut imaluunniit qularnaveeqqusiissutissamut akiliutissanut akiliinngitsoornerup kingunerisaanik attartornissamik isumaqatigiissut atorunnaarsittussaavaa. Piffissaq eqqorlugu attartortoq akiliinngippat, pisortanit attartortitsisup ulloq akiliiffissaq kingulleq qaangiunniariartoq "attartortitsisup akileeqqusissutaa"-nik taasaq ullup piffissaq eqqorlugu akiliiffissap kingulliup kingornatigut tunniunneqassaaq, tassanilu paatsuugassaanngitsumik allassimassaaq, attartornermut akiliutissanut kinguaattoorutit piffissamik killiliussap naannginnerani akilerneqanngippata attartortitsineq atorunnaarsinneqassa-soq, akileeqqusissutip tiguneranit ullut pingasut ingerlanerini attartortoq kinguaattoorutiminik akiliisimanngippat.

Soorunami pissusissamisoorpoq pisortat inissiaataat attartortittakkamik atuinissamut piumasaqaatit ersarilluinnartuunissaat, taamaaliornikkullu akiligassat sumiginnarneqarsinnaanerat pinaveersimatinniarlugu inatsisigut erseqqissumik toqqammaveqarnissaat. ATASSUT-milli isumaqarpugut, attartortut pisussaaffimminnik nalinginnaasumik nakkutiginnilluaraluarlutik aningaasatigut inissisimanerup allanngornerata kingunerisaanik pisussaaffimminnik naammassinninniaruminaatsitsillutik kinguaattooruteqarsimasut periarfissinneqarnissaat eqqumaffigineqartariaqartoq.

Inatsisit ullumikkutut itsillugit, attartortut pineqartut minnerpaamilluunniit periarfissinneqarneq ajorput pisussaaffimminnik naammassinneqqissinnaalernissaminnut. Paasinninnerput naapertorlugu tamanna pisortat tungaannit innuttaasut ajunnginnerpaamik kiffartuunneqarnissaannik anguniakkanut naapertuutinngilaq."

Tassalu siunnersuuteqarnermi attartortut tassanngaannartumik aningaasaqarnikkut inissisimanerup allanngorneranik eqqorneqartut, taamaalillutillu ineqarnermut, imermut kiassarnermulluunniit qaammammut akiligassaminnik akiliisinnaajunnaartut ikiorneqarnissaat siunertarineqarpoq. Aappaasup imaluunniit inooqataasup tassanngaannartumik toqukkut qimagunnera imaluunniit tassanngaannartumik suliffissaarunnera assersuutitut taaneqarsinnaapput.

2. Peqqussutissatut siunnersuutip pingaarnersai

Siunnersuutikkut attartortut akiitsuminnik akilinngitsuukkaminnik akilersuisalernissaannut periarfissaq ammaateqqinneqarpoq. 2003-mili akiitsunut akilinngitsuukkanut ineqarnermut akiliutinut, kiassanermut imermulluunniit akiligassanngortinneqarallartunut akilersuinissamut periarfissaq atorunnaarsinneqarsimagaluarpoq. Tamatumunnga peqatigitillugu akileeqqusinissamut piffissarititaasoq ullunit pingasuniit arfinilinnut allanngortinneqarpoq. Kiisalu pisortat attartortitsisut annaasassanut nalimmassaanissamik aaqqissuussinermik pilersitsisalersinnaanngorput, taamaalilluni najugaqatigiiffiit sanngiitsut annaasaqarnermikkut sakkortuumik eqqorneqartussaajunnaassallutik.

Akilersuinissamik isumaqatigiissuteqarnissaq pisortanut attartortitsisunut taamaallaat atuuppoq, namminersortunut attartortitsisunut atuunnani. Tassa imaappoq pisortat inissiaataanni attartortittakkani attartortut kisimik akilersuinissamik isumaqatigiissuteqarsinnaatitaapput.

3. Pisortanut aningaasaqarnikkut allaffissornikkullu sunniutissat

Peqqussutissatut siunnersuutip pisortanut inissianik piginnittuusunut aningaasaqarnikkut allaffissornikkullu annertuumik sunniuteqarnissaa naatsorsuutigineqanngilaq, najugaqatigiiffinni attartortumut ataatsimut annaasat najugaqarfimmi attartortut sinnerisa nammaqatigiillutik akilertartussanngussammatigit. Allatut oqaatigalugu tamatumani pissutsit ingerlaarnerat matoqqasoq pineqarpoq.

Najugaqatigiiffinni aningaasaqarnikkut pissutsit ingerlaartut unittoorpata aserorpataluunniit aatsaat tamanna pisortanut inissianik piginnittuusunut sunniuteqassaaq, tassalu imaappoq najugaqatigiiffiit naatsorsuuteqarlutik nammineerlutik kaaviiaartitsisinnaanngippata. Pingaartumik tamanna atuutissaaq akilinngitsuukkat pissutigalugit najugaqatigiiffiup akiligassaannik akiliinissamut aningaasassaarussimappat. Taamaattoqarnerani attartortitsisoq aningaasaliisariaqalertussaassaaq.

Taamaattorli oqaatigineqassaaq akiliinissamut piffissaliussap sivitsorneqarnerani Namminersornerullutik Oqartussat kommunillu aningaasaaliissutinit iluanaarutinit pissarsiassaat kingusinnerusukkut akilerneqartalertussaassasut. Tamatuma kingunerissaanik Namminersornerullutik Oqartussat taamatullu kommunit aningaasatigut annaasaqartussaapput, aningaasaliissutinit iluanaarutinit erniatigut pissarsiassaraluaminnik annaasaqartussaagamik.

4. Inuussutissarsiornermut aningaasaqarnikkut allaffissornikkullu sunniutissat

Peqqussutissatut siunnersuutip inuussutissarsiornermut aningaasaqarnikkut allaffissornikkullu sunniuteqarnissaa naatsorsuutigineqanngilaq.

5. Innuttaasunut aningaasaqarnikkut allaffissornikkullu sunniutissat

Peqqussutissatut siunnersuutip pisortat inissiaataanni attartortittakkani attartortunut, piffissaq eqqorlugu ineqarnermut akiliisartunut aningaasaqarnikkut sunniuteqarnissaa naatsorsuutigineqarpoq, attartortut, akilersuinerminnik sumiginnaasut maannakkut akiliuttartussanngussagamikkit.

Peqqussutissatut siunnersuutip atuutilerneratigut akiitsulinnut annaasassanut illuartitassat kvadratmeterimut ukiumut 25 koruuninut qaffanneqartussaassapput. Tamanna Namminersornerullutik Oqartussat illuutaanni attartortittakkani attartortunut 13 mio. koruunit missaannik naleqarpoq. Attartortoq inissiami 85 kvadratmeterinik annertussusilimmi najugaqarpat, qaammammut ineqarnermut akiliummut qaffaatissat 177 koruuniussapput.

Peqqussutissatut siunnersuutip innuttaasunut allaffissornerup annertunerulerneranik kinguneqarnissaa naatsorsuutigineqanngilaq.

6. Avatangiisinut pinngortitamullu sunniutissat

Peqqussutissatut siunnersuut avatangiisinut pinngortitamulluunniit sunniuteqassanngitsoq naliliiffigineqarpoq.

7. Sunniutaasinnaasut annertuut allat

Peqqussutissatut siunnersuut allanik annertuunik sunniuteqassanngitsoq naliliiffigineqarpoq.

8. Naalagaaffeqatigiinnermut namminersulernissamullu pissutsit

Peqqussutissatut siunnersuut Naalagaaffeqatigiinnermut namminersulernissamullu sunniuteqassanngitsoq naliliiffigineqarpoq.

9. Oqartussaasut kattuffiillu il.il. tusarniaaffigineqartut

Peqqussutissatut siunnersuutip allaqqaarneqarnera pillugu A/S Inissiaatileqatigiiffik INI, Iserit A/S, Deloitte, Kalaallit Nunaanni Sulisitsisut Peqatigiiffiat, KANUKOKA, NUSUKA, SIK, ILIK, Sparbank Vest, Grønlandsbanken, Nukissiorfiit, Naalakkersuisut siulittaasuata Naalakkersuisoqarfia, Aningaasaqarnermut Nunanullu Allanut Naalakkersuisoqarfik, Ilaqutariinnermut Peqqissutsimullu Naalakkersuisoqarfik, Aalisarnermut, Piniarnermut Nunalerinermullu Naalakkersuisoqarfik, Inussutissarsiornermut, Suliffeqarnermut, Inuussutissarsiutinullu Ilinniartitaanermut Naalakkersuisoqarfik, Kultureqarnermut, Ilinniartitaanermut, Ilisimatusarnermut Ilageeqarnermullu Naalakkersuisoqarfik, Aatsitassanut Ikummatissanullu Pisortaqarfik, Attaveqarnermut Aqutsisoqarfik aamma Avatangiisinut Aqutsisoqarfik tusarniaaffigineqarput.

Avatangiisinut Aqutsisoqarfimmi Pilersuinermut allaffik, Ilaqutariinnermut Peqqissutsimullu Naalakkersuisoqarfik, Iserit A/S, Attaveqarnermut Aqutsisoqarfik, Nukissiorfiit, Aningaasanut Nunanullu Allanut Naalakkersuisoqarfik, A/S Inissiaatileqatigiiffik INI, Inuussutissarsiornermut, Suliffeqarnermut Inuussutissarsiutitigullu Ilinniartitaanermut Naalakkersuisoqarfik aamma SIK tusarniaanermi akissuteqarput.

Tusarniaaneq makkuninnga pissutissaqalersitsivoq: Tusarniaanermi akissutit ilanngunneqartut kinguliani allaaserineqarput.

Attaveqarnermut Aqutsisoqarfik makkuninnga oqaaseqaateqarpoq:

Nassuiaatini nalinginnaasuni, immikkoortoq 4-imi ilanngunneqartariaqarpoq: "akiliinissamut piffissaliussap sivitsorneqarnerani Namminersornerullutik Oqartussat kommunillu aningaasaaliissutinit iluanaarutinit pissarsiassaat kingusinnerusukkut akilerneqartalertussaassasut. Tamatuma kingunerissaanik Namminersornerullutik Oqartussat taamatullu kommunit aningaasatigut annaasaqartussaapput, aningaasaliissutinit iluanaarutinit erniatigut pissarsiassaraluaminnik annaasaqartussaagamik."

Naalakkersuisoqarfiup Attaveqarnermut Aqutsisoqarfiup oqaaseqaata siunnersuummut ilannguppaa.

Nukissiorfiit imaatunik oqaaseqaateqarpoq:

"§ 1, imm. 5-imi allassimavoq "Attartortoq ineqarnermut, imermut kiassarnermulluunniit akilinngitsuukkaminik akiitsoqartoq akilersuinissamut nammineq piumassutsiminik attartortitsisumut isumaqatigiissuteqarsinnaatitaavoq, taannalu qaammatit sisamat sinnerlugit sivisussuseqartinneqarsinnanngilaq."

Naatsorsuutigaara imm. 5-imi attartortup attartortitsisullu akornanni akilersuinissamik isumaqatigiissuteqarneq pineqartoq, imatut paasillugu attartortitsisoq Nukissiorfinni sullitatut nalunaarsimavoq, kisiannili attartortitsisup attartortoq akilersuinissaanik isumaqatigiissuteqarfigippagu tamanna Nukissiorfiit susassarinngilaat.

Paatsoortoqarnissa pinngitsoorniarlugu Nukissiorfiit peqqussummut nassuiaatini erseqqissallaqquaat, attartortoq atuinerminut Nukissiorfinnut toqqaannartumik akiliuteqartartillugu attartortitsisup soorunami Nukissiorfiit pisussaaffilersinnaanngikkaa, akilersuinissamik isumaqatigiissutit (imaluunniit nammineq piumassutsimik isumaqatigiissuteqarnermik uagutsinni taaneqartartoq) tamarmik, sullitap Nukissiorfiillu akornanni toqqaannartumik isumaqatigiissutigineqartartussaammata."

Naalakkersuisoqarfiup oqaaseqaatit siunnersuummut ilannguppai.

Avatangiisinut Aqutsisoqarfimmi Pilersuinermut allaffik imaattunik oqaaseqaateqarpoq:

"Ataatsimut isigalugu:

Pilersuinermut allaffik (FK) naliliivoq peqqussutissatut siunnersuutikkut ineqarnermut akiliutip piffissaq eqqorlugu akilerneqartarnissaanut kajumissuseqarnissaq killilerneqartoq, piffissaq eqqorlugu akiliinngitsoornerup kinguneqartinneqarnissaa siunnersuutikkut annikillisinneqarmat. Tamanna imminut aningaasatigut napatilernissamut atatillugu FK-imit naleqquttuusorineqanngilaq, tassami aningaasartuuteqartarnerup ilusilersorneqarnerata paasiuminartuunissaa pisariaqarpoq, taamaalilluni aningaasaqarnitsinnut nukittorsaasumik akunnaatsumik aalajangiisoqarsinnaasariaqarluni.

Peqqussutissatut siunnersuut:

§ 74, imm. 5

Allassimasariaqaraluarpoq imermut kiassarnermullu akilinngitsuukkanut aatsaat akilersuinissamik isumaqatigiissuteqartoqarsinnaasoq, attartortitsisoq imermik kiassarnermillu pilersuisuuppat."

Naalakkersuisoqarfiup Nukissiorfiit tusarniaanermut akissuteqarnerat tunngavigalugu oqaaseqaatit ilanngutereerpai.

A/S Inissiaatileqatigiiffik INI imaattunik oqaaseqaateqarpoq:

"Imm. 5-imi akilersuinissamik isumaqatigiissuteqarnissamut piumasaqaatit tamarmik tulleriiaarlugit allattorneqassasut siunnersuutigineqarpoq. Assersuutigalugu imatut ilusilerneqarsinnaapput:

Piumasaqaatit makkua naammassineqarsimassapput attartortoq akilersuinissamut isumaqatigiissuteqarsinnaavoq:

1) Attartortup attartortitsisoq akilersuinissamik isumaqatigiissuteqarnissamik qinnuigissavai, allakkatigut akileeqqusissutip attartortumut apuutereernerata kingorna kingusinnerpaamik ulluinnaat arfinillit qaangiutsinnagit.

2) Attartortoq akilersuinissap isumaqatigiissutigineqarneranut akitsuummik 250 koruuninik akiliuteqassaaq aammalu qaammatit akilersuiffiusut ingerlaneranni qaammatit tamaasa 50 koruunimik akiliuteqartassalluni. Akitsuut akilersuinissamik isumaqatigiissuteqarnermi akilerneqassaaq.

3) Akilinngitsuukkat attartortup qaammatini ataatsimiit sisamanut akilersorsinnaavai.

4) Attartortup akilersuutit piffissani ineqarnermut akiliutip ingerlaavartup akilerneqarfissaanni akilertassavai."

Imm. 6 naammanngilaq, qaqugukkut akilersuut siulleq akilerneqassanersoq takuneqarsinnaanngimmat. Ajornartorsiut aaqqinneqarsinnaavoq imm. 5 siuliani takuneqarsinnaasutut siunnersuutigineqartutut oqaasertalerneqarneratigut."

Naalakkersuisoqarfiup tamanna siunnersuummut ilannguppaa, nr. 4 pinnagu, taanna naalakkersuisoqarfiup nassuiaatini ilanngussimavaa, pissutigalugu akilersuut ineqarnermut akiliummut ingerlaavartumut akiliiffiusartut atorlugit akilerneqartassanersoq attartortitsisup nammineq aalajangertussaammagu.

"INI-p IT-ikkut aqutsissutaani akileeqqusissut akilersuummut taamaallaat tunngasoq suliarineqarsinnaanngilaq. Qularutingaarput ineqarnermut aqutsinermi aqutsissutit allat suliassaq naammassisinnaassagaat. Nassuiaatini takuneqarsinnaanngilaq sooq taamaallaat akilersuutinik akiliinngitsoornermi akileeqqusissutinik nassiussisoqartassanersoq. Aamma allaqqanngilaq sooq akitsuut 2 procentimik ilaneqartassanersoq.

Allaffissornikkut aaqqiissutissaq eqqortoq tassaavoq, nalinginnaasumik eqqaasitsissutinik suliaqarnermi akilinngitsuukkat tamarmik ilanngunneqarsinnaassasut, attartortut akilersuinissaminnik isumaqatigiissuteqarsimasut akiliinngitsoorsimasut ilanngullugit. Taamaattoqassappat akilersuinermut akitsuummut immikkut 2 procentinik ilanngussisoqartariaqassanngilaq, kisiannili oqaatigineqareersutut akilersuutinut akileeqqusissutit kisiisa suliarineqarsinnaanngimmata immikkut akitsuut taaneqartoq aamma INI-imit naatsorsorneqarsinnaanngilaq.

Tamatuma kingorna imm. 6 allanngortinneqarsinnaavoq taamaalilluni akilersuutinik aamma ineqanermut akiliummik ingerlaavartumik akiliinngitsoornermi attartortitsisoq akileeqqusinerminut 150 koruuninik akitsuusiisinnaalerluni."

Naalakkersuisoqarfiup siunnersuummi allanngortippaa, Iserit aamma INI-ip aqutsissutai akileeqqusissutinik akilersuutinuinnaq tunngasunik suliaqarsinnaanngimmata. Taamaattumik 150 koruunimik akileeqqusinermut akitsuut kisimi atuutissaaq.

 

Peqqussutissatut siunnersuummi aalajangersakkanut ataasiakkaanut nassuiaatit

§ 1-imut

Aalajangersakkami imm. 1-imiit 4-mut maanna aalajangersagaasumik ingerlatitseqqinnerupput, imm. 5, 6, 7 aamma 8-p nutaajusut atuutsinneqalernissaasa kingunerisaanik iluarsineqarlutik.

Imm. 1-imut aamma 2-mut

Aalajangersakkami ineqarnermut, imermut, kiassarnermut imaluunniit qularnaveeqqusiissummut akiliinngitsoornerup kingunerisaanik attartornermut isumaqatigiissutip atorunnaarsinneqarneranut atatillugu suleriaasissaq aammalu attartortitsisup pisinnaatitaaffii pisussaaffiilu erseqqissarneqarput. Taamatuttaaq akilersuinermik aaqqissuussinermut akiliutissanik akiliinngitsoornerup kingunerisaanik attartornermut isumaqatigiissutip atorunnaarsinneqarsinnaanera aalajangersakkami maleruagassiuunneqarpoq. Tassani pisortat namminersortullu attartortitsisut § 73-imut nassuiaatini tunngavilersuutigineqartut malillugit immikkoortinneqarput.

Akilersuinissamik isumaqatigiissuteqarsinnaaneq inissiani pisortat attartortittagaanni attartortunut taamaallaat pisinnaatitaaffiussaaq.

Attartortitsisoq namminersortoq akilersuinissamik isumaqatigiissuteqarnissamik neqerooruteqarnissamik pisussaaffeqanngilaq, kisiannili taamaaliornissani qinersinnaallugu. Attartortitsisup namminersortup akilersuinissamik isumaqatigiissuteqarnissamik periarfissiissaguni, attartortitsisoq namminersortoq taamaalilluni aamma taamatut akilersuinissamik isumaqatigiissuteqarnissamut piumasaqaatinik aalajangersaasussaavoq. Tamatumani inuinnaat pisinnaatitaaffiinik tunngaveqartut inatsisit malinneqassapput.

Imm. 3-mut

Aalajangersagaq akiliinngitsoornermut atatillugu akileeqqusinermut akitsuummik akiliisitsinissamut inatsisitigut tunngavissamik imaqarpoq. Akitsuut attartornermut atatillugu akiligassatut pisussaaffiuvoq. Akitsuut annerpaamik 150 koruuninik annertussuseqarsinnaavoq.

Akileeqqusinermut akitsuut akilersuutinik, ineqarnermut akiliummut ingerlaavartumut akilinngitsuukkanillu akileeqqusinernut tamanut atuuppoq.

Imm. 4-mut

Aalajangersagaq aamma attartornerup atorunnaarsitsinneqarneranik atortussaajunnaarsitsinermut akitsuummik akiliisitsinissamut inatsisitigut tunngavissamik imaqarpoq. Akitsuut attartornermut atatillugu akiligassatut pisussaaffiuvoq. Akitsuut annerpaamik 150 koruuninik annertussuseqarsinnaavoq.

Pisortat attartortitsisut attartornerup atorunnaarsitsinneqarneranik atortussaajunnaarsitsinermut akitsuusiisinnaalernissaannut pisortat inissiaataanni attartortittakkani attartortut ataatsimoortut, akiliinngitsoornerup kingunerisaanik atorunnaarsitsinermik nalunaarummik tigusinerminni erngerlutik ineqarnermut akiliisarnerat pissutaavoq. Pisortat attartortitsisut atorunnarsitsinernik taamaattunik atortussaajunnaarsitsisarnerat allaffissornermi nammagassiisarpoq.

Pisortalli attartortitsisut akitsuusiussaat annerpaamik pisortat attartortitsisut akileeqqusissummik imaluunniit atorunnaarsitsinerup atortussaajunnaarsinneranik nassiussinerminut aningaasartuutaasa annertoqataannik annertussuseqassaaq.

Imm. 5-imut

Attartortoq akilinngitsuukkaminik akiitsoqalersimasoq pisortanut attartortitsisunut akilersuinissamik isumaqatigiissuteqarnissamut pisinnaatitaaffeqarpoq.

Aalajangersagaq attartortup aamma pisortat attartortitsisut akornanni akilersuinissamik isumaqatigiissuteqarnissamut taamaallaat tunngassuteqartutut isigineqassaaq. Tamanna kinguneqassaaq attartortoq Nukissiorfinni sullitanut ilaappat, akilersuinissamik isumaqatigiissuteqartoqarsimarnera Nukissiorfinnit susassarineqanngimmat. Tamanna Nukissiorfinnut atuutissanngilaq pisussaaffiliissananiluunniit.

Attartortoq atuinerminut Nukissiorfinnut toqqaannartumik akiliuteqartarpat, pisortat attartortitsisut taamaalillutik Nukissiorfiit akilersuinissamik isumaqatigiissummi pisussaaffilersinnaanngilaat, akilersuinissamik isumaqatigiissuteqarneq toqqaannartumik sullitap Nukissiorfiillu akornanni pisussaammat.

Akilersuinissamik isumaqatigiissuteqarnissamut piumasaqaataavoq attartortoq allakkatigut akileeqqusissutip tiguneraniit kingusinnerpaamik ulluinnaat arfinillit qaangiutsinnagit akilersuinissamik isumaqatigiissuteqarnissamik piumasaqassasoq. Tamatuma kinguneraa attartortoq allakkatigut akileeqqusissutip tiguneraniit ullut arfineq-marluk sivisunerusulluunniit qaangiunneranni akilersuinissamik isumaqatigiissuteqarsinnaajunnaassasoq. Pisortanit attartortitsisunit akilersuinissamik isumaqatigiissut aqunneqarsinnaassaaq, taamaattumik piffissaliussap iluani akilersuinissamik isumaqatigiissuteqartoqarsimassaaq. Attartortoq iliuuseqartussaavoq, taamaattumik pisortat attartortitsisut akilersuinissamik isumaqatigiissusiornissamik neqerooruteqarnissamik pisussaaffeqanngillat. Taamaattorli pisortat attartortitsisut akilersuinissamik aaqqissuussineq pillugu attartortumut ilitsersuisussaatitaapput.

Attartortup akilersuinissamut aaqqissuussineq unioqqutinngikkuniuk, akiitsut akilinngitsuukkat pissutigalugit attartornermut isumaqatigiissutip atorunnaarsinneqarnissaa attartortup pinngitsoorsinnaavaa. Akilersuinermut aaqqissuussineq sumiginnarneqarpat, pisortat attartortitsisut imm. 1 naapertorlugu akileeqqusissummik nassiussissapput. Akiligassanngortoq imaluunniit akiligassanngortut akilerneqanngippata, attartornermut isumaqatigiissut atorunnaarsinneqassaaq. Matumani akiitsut akilinngitsuukkat ataatsit arlallilluunniit pineqaraluarpata atuutissaaq, matumanilu ineqarnermut, kiassarnermut imermulluunniit akiligassat ingerlaavartut pineqanngillat.

Aammattaaq aalajangersakkap atuutilerneratigut attartortitsisoq taarsigassarsinermut uppernarsaatit suliarinerinut akitsuummik, kiisalu qaammammoortumik akilersugassat akilersinniarneqarnerinut akitsuummik qaammammoortumik akileeqqusisinnaalissaaq. Isumaqatigiissutip pilersinneqarnerani attartortup pilersitsinermut akitsuut aammalu qaammatit sisamat tikillugit akilersuinissamut akitsuutit aningaasanngorlugit akilissavai.

Assersuutigalugu qaammammi ataatsimi ineqarnermut akiliummut, tassungalu ilanngullugu kiassarnermut imermullu akiligassat 4.199 koruuniusut attartortup qaammatinut marlunnut avillugit akilernissaat kissaatigippagu, attartortup pilersitsinermut akitsuut 250 koruuniusoq, kiisalu qaammammut akitsuutit 50 koruuniusut marluk, tassalu katillugit 350 koruunit erngerluni akilissavai. Qaammat ataaseq qaangiuppat attartortup 6.298,50 koruunit akilissavai. Aningaasat ineqarnermut akiliummut ingerlaavartumut 4.199 koruunit, kiisalu akiitsunut akilinngitsuukkanut akilersukkanut siullernut 2.099,50 koruunit matussutigineqassapput. Qaammat ataaseq qaangiuteqqippat attartortup 6.298,50 koruunit akilissavai. Taamaalilluni akiitsut akilinngitsuukkat akilerneqassapput.

Imm. 6-imut

Attartortut qaammatit pingasut kingulliit iluanni attartukkamut allamut akiitsuminnik sumiginnaasimasut, tamatumalu kingorna attartorunnaarsinneqarsimasut, imaluunniit akiitsut maanna attartukkamut imaluunniit siusinnerusukkut attartorsimasamut tunngagaluarpataluunniit, siornatigut akilersuinissamik aaqqissuussinermik sumiginnaasimasut akilersuinissamik aaqqissuussinermik nutaamik neqeroorfigineqarsinnaanngillat. Tamanna aamma atuutissaaq attartortut maannakkut attartornerminnik sumiginnaasimappata.

Aammattaaq attartortut akilersuinissamik aaqqissuussinermi akilersuinermik ingerlataqareersut, akilersukkat ingerlanneqartut naammassitinnagit akilersuinissamik aaqqissuussinermik nutaamik neqeroorfigineqarsinnaanngillat.

Imm. 7-mut

Najugaqatigiiffiit najugaqaqatigiinnikkut aningaasaqarnikkullu sanngiitsut attartortitsinermi annaasaqarnerni akilersuinissamillu aaqqissuussinermi annaasaqarnermi sakkortuallaamik eqqorneqarnissaat pinngitsoortinniarlugu, pisortat attartortitsisut nalimmassaanissamut aaqqissuussinermik, nammaqatigiiffiusumik najugaqatigiiffiit attartornermut akilersuinissamillu aaqqissuussinermik aaqqissuussaanngitsumik naatsorsuutigeriinngisamillu annaasaannik nalimmassaasusamik, pilersitsisinnaapput. Pingaarnertut siunertaavoq attartortitsisup najugaqatigiiffimminni attartortut nalinginnaasumik agguataakkamik akiliisinnaassusaat naapertorlugu agguataarisinissamut periarfissaqannginnerannut taarsiullugu periarfissaqartitsinissaq, taamannali paasineqassaaq najugaqatigiiffiit tamarmik tunngaviatigut akilersuilluartartunik aammalu akiliineq ajortunik assigiimmik attartortoqartartut. Aalajangersagaq malillugu attartortitsisoq nalimmassaanissamut aaqqissuussinermik pilersitsinissamut pisussaaffeqarpoq. Taamaalilluni piumassutsip aallavigineqarnissaa pineqanngilaq. Aaqqissuussami "sillimmasiinermut tunngaviusut" aallavigineqarput, attartortitsisup najugaqatigiiffii tamarmik akiusumut ataatsimoorussamut tapertaasussaallutik, najugaqatigiiffiit ataasiakkaat annaasaqarnernik eqqugaasimagaluarpata eqqugaasimanngikkaluarpataluunniit apeqqutaatinnagu. Tassalu imaappoq, najugaqatigiiffiit tamarmik immikkut najugaqarfimmi attartortunit annaasassatut missingersuutigineqartut nalinginik akiliisassapput. Tamatumani attartortunit annaasassat nalinginnaasut aamma akilersuinermi aaqqissuussinermi annaasassat pineqarput. Tamaaliornikkut najugaqatigiiffiit ataasiakkaat nalaatsornerinnakkut attartortunit akiliisinnaassusikitsunit aammalu attartornermut annaasaqartarnernit sunnertianerat annikillisinneqassaaq.

Annaasassaviit annertussusaasa paasineqarnerini aningaasartuutissat nalimmassaanermut konto aqqutigalugu aaqqiivigineqassapput. Annaasassanut ukiumut kvadratmeterimut 25 koruunit inorlugit missingersuusiortoqarsinnaanngilaq.

Nalimmassaanermut aaqqissuussaq immikkut naatsorsuuteqartillugu pilersinneqassaaq aammalu sillimmasiinertut isigineqassalluni, akiliut tassaassalluni tapertaasussatut akiliut aammalu ajoqusertoqarnerani tunniunneqartartoq tassaassalluni annaasaqavinneq nalimmassaanermut aaqqissuussakkut aaqqiivigineqartussaq. Ineqarnermut suliassaqarfiup sinneratuulli nalimmassaanermut aaqqissuussamut ukiumoortumik naatsorsuusiortoqartassaaq.

 

§ 2-mut

Peqqussutissatut siunnersuutip 1. januar 2009-mi atuutilersinneqarnissaa siunnersuutigineqarpoq.