25. november 2008

UKA 2008/73

 

Allannguutissatut siunnersuut

uunga

Inissianik attartortitsisarneq pillugu Inatsisartut peqqussutaata allanngortinneqarnissaa pillugu inatsisartut peqqussutissaannut nr. x, xx 2008-meersumut siunnersuut

Pingajussaanneerinissamut atatillugu Naalakkersuisunit saqqummiunneqartoq.

§ 1-imut

1. § 74, imm. 6, imatut oqaasertalerneqarpoq:
"Attartortut uku akilersuinissamut pisinnaatitaaffeqassanngillat:
1) Ukiut pingasut kingulliit iluanni attartorfigisimasaminni ineqarnermut aningaasartuutinut akilersukkanullu ingerlaavartunut akiliinngitsoortarnermikkut sumiginnaasimasut.
2) Akilersukkanik ingerlatsereersut.
3) Pisortanit ikiorserneqarnissamut pisinnaatitaaffeqartut, tassunga pisortanit ikiorsiisssutit pillugit Inatsisartut peqqussutaat nr. 15, 20. november 2006-imeersoq tunngavigineqartunut ilaalluni.
4) Aningaasaqarnikkut akisussaassuseqanngitsumik iliuuseqarnerup kingunerisaanik imaluunniit allatut nammineq pisuussutigisamik akilerneqanngitsunik akiitsoqalersimasut."

 

Allannguutissatut siunnersuummut nassuiaatit

Nassuiaatit nalinginnaasut

Peqqussutissatut siunnersuummut allannguutissatut siunnersuutip saqqummiunneqarnerani, Inatsisartut Attaveqaqatigiinermut Ineqarnermullu Ataatsimiititaliaata inissianik attartortitsisarneq pillugu Inatsisartut peqqussutaata allanngortinneqarnissaanut Inatsisartut peqqussutissatut siunnersuummut isumaliutissiissummini oqaaseqaatai innersuussutaalu tunngavigineqarput.

Siunnersuut siullermeerneqartussanngorlugu saqqummiunneqartoq attartortut amerlangaatsiartut akilersuisinnaanerannut aalajangersakkanik imaqarpoq. [issuaaneq aallartippoq] " Aallarniutigalugu ataatsimiititaliaq isumaqarpoq, aalajangersakkat oqariartaatsimik "aningaasatigut inissisimanerup allanngornera"-nik ataqatigiisitsisumik killiliisumillu allataqarsimagunannginnerup nassatarisinnaagaa, attartortut arlaqaqisut pisortani attartortitsisuni akilersuinissamut aaqqissuussinermut ilanngussinnaasutut isigineqalersinnaasut, "aningaasatigut inissisimanerup allanngornera" siumut naatsorsuutigineqarsimanngitsoq tassanngaannarlu pilersoq innersuussutigalugu. Peqqussutissatut siunnersuummi § 1, imm. 6, akilersuinissamut aaqqissuussinermik atuilersinnaanermut tunngasutigut marlunnik killiliisuusunik imaqarpoq:

Akilersuinissamik isumaqatigiissusiorsinnaatitaaneq attartortunut, ukiut pingasut kingulliit ingerlanerini attartugarisimasaminni ineqarnermut aningaasartuutinut ingerlaavartunut akilersugassanulluunniit akiliinngitsoortarnermikkut sumiginnaasimasunut atuutissanngilaq. Taamatuttaaq akilersuinissamik isumaqatigiissusiorsinnaatitaaneq attartortunut akilersukkanik ingerlatsereersunut atuutissanngilaq.

Taamaalilluni inatsisissap oqaasertalernerani attartortut, inuttut atukkat nammineq pisuussutiginngisat patsisigalugit ajornartoortut aammalu attartortut akisussaassuseqanngitsumik aningaasaqarnermik ingerlatsinermik nassatarisaanik akiligassaqalersut akornanni assigiinngisitsisuusumik killiliinermik allaqqasoqanngilaq. Taamaattumik aalajangersagaq ataatsimiititaliamit ima paasineqarsinnaavoq, aallaavittut isigalugu attartortut taakku assigiinngitsut marluusut akilersuinissamik isumaqatigiissusiornissamut pisinnaatitaassasut, aalajangersakkani § 1, imm. 6 naammassineqarsimappat. Aalajangersakkap oqaasertalerneqarnera taanna maanna periusaasumut, februar 2002-miit atuutilersumut sanilliulluni assut sakkortuujusoq ataatsimiititaliamit isigineqartariaqarpoq." [issuaaneq naavoq]

Ataatsimiititaliap aamma ilaatigut pisortanit ikiorsiissutit pillugit Inatsisartut peqqussutaanni nr. 15-imi, 20. november 2006-imeersumi § 7 aamma § 8 erseqqissaatigaa, taakkunanilu isumaginninnikkut pisimasut nassuiaatigineqarput. Taamatuttaaq inatsimmi pisunut, qinnuteqartup piumasaqaatit sukumiisumik aalajangersarneqartut naammassisimappagit innuttaasup ikiorserneqarnissaanut pisinnaatitaaffiliisunut killissarititaasunik aalajangersaasoqarpoq. Tassalu Inatsisartut peqqussutaanni aamma ineqarnermut akiliutinut naammaginartunik annertussusilinnut ikiorsiinissamut periarfissiisoqarpoq.

Aamma kommunini ullumikkut Inatsisartut peqqussutaat naapertorlugu innuttaasut isumaginninnikkut pisunik nalaataqartut, taamaalillutillu aningaasartuutissaminnut nalinginnaasunut akiliisinnaajunnaartut siunnerfigalugit isumaginninnikkut upalungaarsimasoqartoq Ataatsimiititaliamit maluginiarneqarpoq. Ataatsimiititaliaq allappoq: [Issuaaneq aallartippoq] "Taamaalillutik innuttaasut akiligassatigut pisussaaffimminnik naammassinnissinnaanngikkaangata kommunit aningaasartuutinik annaasaqaataasinnaasunillu ullumikkut akiliisarput. Inatsisissatut siunnersuut akuersissutigineqassappat ineqarfinnut immikkoortortaq aningaasaqarnikkut ingerlasinnaajunnaaraluarpat akilersuinikkut aaqqissuussinermi allaffissornermut aningaasartuutit aningaasaqarnikkullu annaasaqaratarsinnaaneq Namminersornerullutik Oqartussat inissiaatileqatigiiffiata INI A/S-ip tunngaviatigut isumagilissavai." [issuaaneq naavoq]

Ataatsimiititaliap isumaqatigiittup siunnersuutip ataatsimiititaliamit misissorneqarnera tunngavigalugu peqqussutissatut siunnersuutip naleqqussarneqarnissaa pisariaqartippaa, taamaalilluni attartortut akilersuisinnaatitaasussat killileqqinneqarsinnaassallutik.

Ataatsimiititaliap oqaaseqaatai Naalakkersuisunit tamakkiisumik taperserneqarsinnaapput, tamatumunngalu atatillugu inissianik attartortitsisarneq pillugu Inatsisartut peqqussutaata allanngortinneqarnissaa pillugu siunnersuut manna saqqummiuppaat.

Allannguutissatut siunnersuutip inatsisitut teknikkimut tunngasortai misissuiffigineqareerput.

Peqqussutissatut siunnersuutip allaffissornermut sunniutissai.

Allannguutissatut siunnersuut peqqussutissatut siunnersuummut naleqqiullugu allaffissornikkut nammagassanik amerlanerusunik kinguneqassanngilaq.

Peqqussutissatut siunnersuutip aningaasaqarnermut sunniutissai.

Allannguutissatut siunnersuummi attartortut akilersuisinnaatitaasussat ikilisinneqarmata, allannguutissatut siunnersuutip atuutilerneratigut akilersuinissamut isumaqatigiissutinik sumiginnaanerup kingunerisaanik aningaasaqarnikkut annaasassat killilersimaarneqarsinnaanissaat ilimagineqarsinnaavoq.

 

Peqqussutissatut siunnersuummi aalajangersakkanut ataasiakkaanut nassuiaatit

Nr. 1-imut

Aalajangersakkap atuuffissaa peqqussutissatut siunnersuutaaqqaartumut naleqqiullugu annertuumik annikillineqarpoq. Piumasaqaatit ataasiakkaat annikillisinneqarput siunissamullu sunniutissai annertusiartortussaallutik. Taamaattumik attartortut itigartitaanissaannut piumasaqaatini ataasiinnarmik naammassinnissimanissaat naammassaaq.

1-imut

Attartortut ukiut kingulliit pingasut ingerlaneranni attartukkaminnut allanut anisitaanermik kinguneqartumik sumiginnaasimasut, imaluunniit inissiap attartukkap maanna attartugaanera imaluunniit siornatigut attartugaasimanera apeqqutaatinnagu akilersukkanik akiliinngitsoortarsimasut nutaamik akilersuinissamik neqeroorfigineqarsinnaanngillat. Tamannattaaq attartortoq maannakkut attartukkaminut sumiginnaasimappat, taanna atuutissaaq.

2-mut

Attartortut ingerlaavartumik akilersugaqareersut akilersugartik naammassitinnagu nutaamik akilersuinissamut neqeroorfigineqarsinnaanngillat. Attartortoq akilersuinissamut piumasaqaatinik naammassinnissimagaluarpalluunniit tamanna atuutissaaq. Attartortup qaangersinnaanngisaminik akiitsoqalernissaa pinngitsoorniarlugu killiliissutaasoq ilanngunneqarpoq.

3-mut

Attartortut akilersuinissaminnik qinnuteqannginnerminni kommunimut ikiorserneqarnissamik qinnuteqarnerminni itigartitaasimasussaapput. Qinnuteqaatigineqartoq tassaasinnaavoq pisortanit ikiorsiissutit pillugit Inatsisartut peqqussutaat nr. 15, 20. november 2006-imeersoq immikkulluunniit inatsit alla naapertorlugu ikiorserneqarnissaq.

Pisortanit ikiorsiissutit pillugit Inatsisartut peqqussutaanni nr. 15-imi, 20. november 2006-imeersumi § 6-imut nassuiaatini ilaatigut imatut allassimasoqarpoq; "Pisortanit ikiorserneqarnissamut piumasaqaataavoq qinnuteqartup inooqatigiinnermi pisimasumik nalaataqarsimanissaa. Taamaalilluni naammakkunnaarpoq nikerartumik isertitaqarsimanerup aqussinnaasimannginnera.

Qinnuteqartup atugaanik naliliinermi pingaaruteqarpoq inooqatigiinnermi pisimasumik nalaataqarsimaneq, qinnuteqartup inuuniarnermi atugarisaatigut allanngortoqarsimanera allannguutaasorlu tunngavigalugu imminut ilaquttaminillu pilersuisinnaajunnaarsimanera.

Aalajangersakkami assersuusiaqarpoq allannguutit nalinginnaasut suusinnaanerinik, imaattunik napparsimalersimaneq, ernereernermi sulinngiffeqarneq, suliffissaaleqineq inooqatigiinnerullu taamaatinneqarnera. Pisariaqavissumik pilertortumik ikiorsiissutit annikinnerpaaffissaminniittuummata, annertusaaniarnissaq naammanngilaq. Imaappoq arlalippassuartigut ataasiakkaat pissutsinik atugaannik naliliisoqartariaqarpoq. Assersuutigalugu pisut najoqqutaralugit pineqaatissinneqarsimasunut inissiisarfimmut inissinneqartup ilaqutai pisortanit ikiorsiissutinik tunineqarsinnaapput. Aamma sulinermi ajoqusertoqarnerani pisortanit ikiorsiissutinik tunisisoqarsinnaavoq, sulinermi ajoquserneq napparsimanermik kinguneqartarmat, taannalu § 6-imi ilanngunneqarsimalluni.

Kommunalbestyrelsimit naliligassaavoq qinnuteqartut ataasiakkaat pissutsit nalaataat, taamalu naliligassaalluni qinnuteqartup inuttut inuunerani allannguutit ikiorsiinissamut tunngaviliinersut. Aalajangiisuussaaq qinnuteqartut inooqatigiinnermi nalaatanit patsiseqartumik pilersuinermut tunngasut kalluarneqarsimanersut, tamatuma kingunerisaanik qinnuteqartoq imminut ilaquttaminillu pisariaqartitaminnik pilersorsinnaajunnaarlutik.

Aammattaaq piumasaqaataavoq qinnuteqartup imminut ilaquttaminillu allatigut pisariaqartinneqartumik pilersuisinnaanera akiligassanillu aalajangersimasunik akilersuisinnaanera pisinnaanngitsoq. Ikiorsiissutit tassaapput allanit namminersortunit pisortanillu pilersorneqarsinnaanermut taartaasut.

Pisarialittut akiligassatullu aalajangersimasutut pineqarput inigisamut, nerisaqarnermut, kiassarnermut, innaallagissamut, atisanut allanullu tunngaviusumik pisariaqartitanut aningaasartuutit. Allannguutit siumut takuneqareersinnaanngitsut allannguutaasussatullu naatsorsuutigisariallit pisortanit ikiorsiissutisinissamut tunngaviliisinnaapput."

Tassalu attartortoq pisortanit ikiorserneqarnissamut qinnuteqaateqarnermini itigartitaasimappat aatsaat akilersuinissamut isumaqatigiissuteqartoqarsinnaasoq piumasaqaataavoq. Akilersuinissamut suliap suliarineqarneranut atatillugu attartortup pisortanik ikiorserneqarnissamut itigartitaasimanerminik, soorlu kommunip allakkatigut itigartitsissutaanik uppernarsaasiinissaa attartortitsisup piumasaqaatigisinnaavaa.

4)-mut

Attartortut patajaatsumik isertitaqartartut, kisiannili aningaasaatiminnik aningaasartuutinut aalajangersimasunut akiliisarnissamik tunulliussillutik siunertanut allanut atuisuusut akilersuisinnaatitaanngillat. Attartortoq aningaasaqarnikkut akisussaassuseqanngitsumik pissusilersorsimanersoq imaluunniit nammineq pisuussutigisaminik akilinngitsuukkaminik akiitsoqalersimanersoq pillugu naliliinermi, attartortuulluartut allat tamarmik taamatut iliorsimassagaluarnersut iliorsimassanngikkaluarnersulluunniit tunngavigineqassaaq.

Imm. 3-mut nassuiaatini isumaginninnikkut pisartunut tunngavilersuutit arlallit saqqummiunneqarput. Tassani ilaatigut qinnuteqartup napparsimalernini, qitornartaarnini, suliffissaaleqinini, inooqateqarunnaarnini assigisaalluunniit pissutigalugit isumaginninnikkut pisunik eqqorneqarsimasinnaanera taaneqarpoq.

Tassanili apeqqutaasoq pingaarnerpaaq tassaavoq, attartortoq nammineq ilaquttamilu inuuniarnikkut pisariaqartitaminnut aningaasartuutinullu aalajangersimasunut pissaqarsinnaanissaa.

Tassalu attartortoq inuuniarnikkut pisunik nalaataqarsinnaavoq, tamanna pissutigalugu aningaasartuutiminut aalajangersimasunut akiliisinnaajunnaarfiginngisaminik, taakkununngalu ineqarnermut akiliut ilaavoq. Assersuutigalugu attartortup inooqateqarunnaarsimasinnaavoq, attartortup aningaasaqarneranut artukkiinngikkaluartumik. Tassanilu attartortup aningaasaqarnera ajornartorsiorfigineqalersimasinnaavoq, tamatuma peqatigisaanik isumaginninnikkut ikiorserneqartariaqalerfiusumik pisoqanngikkaluartoq.

Attartortoq aningaasaqarnikkut akisussaaffeqanngitsumik pissusilersorsimaguni imaluunniit allatut nammineq pisuussutigisaminik akilinngitsuukkaminik akiitsoqalersimaguni akilersuisinnaatitaanissamik angusaqarsinnaanngilaq.