6. oktober 2008 UKA 2008/58
UPA 2008/128
Suliffeqarfimmik ingerlatsinissamut tunniussisoqartillugu sulisartut inatsisit naapertorlugit inissisimanerat pillugu Inatsisartut peqqussutissaattut siunnersuut
pillugu
Inatsisartut Inuussutissarsiornermut Ataatsimiititaliaata
ISUMALIUTISSIISSUTAA
Siunnersuutip aappassaaneerneqarnerani saqqummiunneqartoq
Inatsisartut Inuussutissarsiornermut Ataatsimiititaliaat suliarinninnermini ukuninnga inuttaqarpoq:
Inatsisartunut ilaasortaq Jonathan Motzfeldt, Siumut (siulittaasoq)
Inatsisartunut ilaasortaq Knud Kristiansen, Atassut (siulittaasup tullia)Inatsisartunut ilaasortaq Ole Thorleifsen, Siumut
Inatsisartunut ilaasortaq Esmar Bergstrøm, Inuit Ataqatigiit
Inatsisartunut ilaasortaq Marie Fleischer, Attaviitsoq
Inatsisartunut ilaasortaq Thomas Kristensen, Atassut
Inatsisartunut ilaasortaq Jens B. Frederiksen, Demokraatit
Inatsisartunut ilaasortaq Jørgen Wæver Johansen, Siumut
Inatsisartut peqqussutissaattut siunnersuut ulloq 29. april 2008-mi siullermeerneqarpoq, siullermeerinerullu kingorna Inuussutissarsiornermut Ataatsimiititaliamit suliarineqartussanngorlugu innersuunneqarluni.UPA 2008-imi siunnersuummik siullermeerineq tunngavigalugu aalajangiiffigisassatut siunnersuut matumani pineqartoq Inatsisartut Inuussutissarsiornermut Ataatsimiititaliaata misissorpaa.
Siunnersuutip imarisaaSuliffeqarfimmik ingerlatsinissamut tunniussisoqartillugu sulisartut inatsisit naapertorlugit inissisimanerat pillugu Inatsisartut peqqussutissaattut siunnersuut Naalakkersuisunit saqqummiunneqarpoq.
Naalakkersuisut UPA 08/128-mut saqqummiussissutaanni ima allassimavoq:
Peqqussutissatut siunnersuut aallaaveqarpoq Inatsisartut 2006-imi ukiuakkut ataatsimiinnerannut atasumik aalajangiiffigisassatut siunnersuuteqartoqarneranik, oqaluuserisassani UKA 2006/55-tut siullermeerlugu saqqummiunneqartumik, suliffeqarfimmik ingerlatsinissamut tunniussisoqartillugu sulisartut inatsisitigut tunngaveqartunik illersorneqarsinnaalernissaat siunertaralugu maleruagassiortoqartariaqartoq pillugu, aappassaaneerneqartumillu Inatsisartut 2007-imi ukiakkut ataatsimiinneranni, ullormut oqaluuserisassani UPA 2007/10-tut, tassanilu paasineqarluni Danmarkimi suliffeqarfinnik ingerlatsinissamut tunniussisoqartillugu inatsit atuuttoq Kalaallit Nunaanni atortuulersinneqarsinnaanngitsoq, aammalu sulisartut suliffeqarfinnik ingerlatsinissamut tunniussisoqartillugu illersorneqarnissaat inatsisitigut aalajangersaavigineqarsimanngitsoq."
Peqqussutissatut siunnersuummut nassuiaatini aamma ima allassimasoqarpoq:
Siunnersuummi pingaarnertut siunertarineqartoq tassaavoq sulisartut suliffeqarfimmik tunniussisoqareernerata kingorna suliffeqarfimmik pineqartumik piginnittuulersumit aningaasarsiatigut atorfeqarnermilu atugarisatigut allannguutitaqarfiunngitsumik atugaqartinneqarnissaat isumannaarniarneqassammat. Siunnersuut malillugu sulisartut suliffeqarfimmik tunniussisoqarneranut atatillugu inatsiseqartitsinermi illersugaanerat tamanut atuuttumik aalajangersaaffigineqassaaq, tamatumunnga ilaallutik pisortat ingerlataqarfiinik, suliffeqarfinnik il.il. naamminersortut inatsisitigut maleruagassaat malillugit ingerlatsilernissaannut allannguinerit. Siunnersuut malillugu aalajangersarneqarpoq sulisitsisoq sulisunik suliffeqarfiup tunniunneqarnera kisiat tungavigalugu soraarsitsisinnaanngitsoq, tamatumani aamma pineqarpata pisortat ingerlataqarfiannik namminersortunngorsaaneq imaluunniit imminut pigisunngortitsineq.
Ilutigalugu suliffeqarfimmik piginnittuulersoq siunnersuut malillugu pisussaatinneqassaaq sulisartunut piginnittuulerneq pillugu paasissutissiinissamik, aammalu tamatuma sulisartut atugarisaannut malitsigiumaagassai pillugit. Paasissutissiineq sulisut sinniisaannut taamatullu aamma sulisartunut tamanut apuunneqassaaq, paasissutissiisussaatitaanermullu ilaapput tunniussinermut/piginnittuulernermut pissutaasut, tunniussineq/piginnittuulerneq piffissami ullormilu qaqugukkut pissanersoq, aammalu sulisartunut inatsisitigut, aningaasaqarnikkut inuttullu atugarisatigut malitsigiumaagassaat, taamaatullu aamma pineqaatissiissutaasinnaasut, tunniussinermi/piginnittuulernermi imaluunniit allannguinermi sulisartunut sunniutaasussat.
Siunnersuutip tusarniaassutigineqarneraPeqqussutissatut siunnersuut ilaatigut Kalaallit Nunaanni Sulisitsisut Peqatigiiffiannut (GA), Kalaallit Nunaanni Sulisitsisut Kattuffiannut (ILIK) NUSUKA-mullu tusarniaassutigineqarpoq. Tusarniaanermit akissutit tiguneqartut aallaavigalugit akissutit siunnersuummut sapinngisamik ilanngunniarneqarsimasut ataatsimiititaliap oqaatigissavaa. Taamaattumik tamatumunnga annertunerusumik oqaaseqaateqarnissaminut ataatsimiititaliaq tunngavissaqarsorinngilaq.
Siunnersuutip Inatsisartunit siullermeerneqarneraInatsisartut siunnersuummik siullermeerineranni siunnersuut Siumumit, Inuit Ataqatigiinnit Atassummiillu taperserneqarpoq.
Aammattaaq siunnersuut Demokraatinit tigulluarneqarpoq, aaqqissuussinerminilli suliffeqarfimmut tiguneqartumut pisisup naleqqussaanissaanut tamanna periarfissiissagunanngimmat pisortat suliffeqarfiutaannik tigusinissamut namminersortunit siunnersuut soqutiginnikkunnaartitsissanersoq ernumassutigalugu oqaatigineqarluni. Tassunga atatillugu nunatsinni sulisitsisut peqatigiiffii tamakkerlutik tusarniarneqassasut Demokraatinit kissaatigineqarpoq.
Ataatsimiititaliap suliarinninneraTunniussineq soraarsitsinissamut immini tunngavissaannginnera pissutigalugu inuussutissarsiuteqartup sulisunik soraarsitsisinnaatitaanera siunnersuutikkut killilersorneqarpoq. Aningaasaqarnikkut, teknikikkut aaqqissuussaanikkullu allannguutinik sulisunut piumasaqaatinik allanngortitsisunik tunngavilersuuteqarluni soraarsitsisoqarsinnaavoq.
Sulisorisanut ataasiakkaanut atatillugu piffissami tigusiffiusumi tunniussisup pisinnaatitaaffiinik pisussaatitaaffiinillu suliffeqarfimmik tigusisoq akisussaasunngussasoq ataatsimiititaliamit oqaatigineqassaaq. Taamaalilluni suliffeqarfimmi tunniunneqartumi naleqqussaanissaq siunnersuutikkut mattunneqanngilaq. Suliffeqarfiup aaqqissuussaanerata naleqqussarnissaanut piginnittoq nutaaq suli periarfissaqarpoq. Piginnittut nikinnerata sulisut inatsisit naapertorlugit inissisimanerannut akornusiinermut atorneqannginnissaa siunnersuutip pingaartumik qulakkeerpaa.
Aammattaaq sulisut piginnaatitaaffiinik illersuinerup tassunga tunngasumik inatsisikkut isumagineqarnera pissutigalugu pisortat ingerlatsineranni namminersortunngorsaanernut aktiaateqarluniluunniit ingerlatseqatigiiffinngortitsinernut atatillugu suliffeqarfinnik tunniussinermi sulisorisat inatsisit naapertorlugit inissisimanerat pillugu inatsimmik pisariaqartitsisoqarsimanngitsoq ataatsimiititaliamit paasineqarpoq. Taamatut pisoqartillugu inatsisitigut immikkut maleruaqqusaliornissap siunissami pisariaqarnissaa aamma naatsorsuutigineqarpoq, taamaalilluni peqqussutissatut siunnersuummut matumani pineqartumut sanilliullugu inatsit kingullertut taaneqartoq immikkut inatsisaanini pissutigalugu salliutinneqartussaatitaalluni.
Inuussutissarsiornermut Ataatsimiititaliap inassuteqaataaSiuliani oqaatigineqartut siulianilu allassimasutut paasinnilluni siunnersuut akuersissutigineqassasoq Inuussutissarsiornermut Ataatsimiititaliap isumaqatigiittup inassutigaa.
Taama oqaaseqarluni Inatsisartut Inuussutissarsiornermut Ataatsimiititaliaata siunnersuut Inatsisartunut aappassaaniigassanngortippaa.
Jonathan Motzfeldt
SiulittaasoqKnud Kristiansen Ole Thorleifsen Esmar Bergstrøm Marie Fleischer _________________
UKA 2008/58
UPA 2008/128
J.nr. 01.25.01/08EM-LABU-00058