3. november 2008 UKA 2008/010
Allannguutissatut siunnersuut
Siunnersuut: Meeqqanik inuusuttunillu ikiorsiisarneq pillugu Inatsisartut peqqussutaannik allanngortitsineq pillugu Inatsisartut peqqussutaat lnr. xx, xx 2008-meersoqAappassaaneerneqarnissaanut saqqummiussaq Naalakkersuisunit.
§ 1-imut1. § 1 imatut oqaasertalerneqassaaq:
"Meeqqanik inuussutunillu ikiorsiisarneq pillugu Inatsisartut peqqussutaat nr. 1, 15. april 2003-meersoq, kingullermik inatsisartut peqqussutaatigut nr. 9, 20. november 2006-imeersukkut allanngortinneqartukkut makkuninnga allannguuteqartinneqarpoq.01. § 23 imm. 1, imatut oqaaseqartalerneqassaaq:
"Ulloq unnuarlu paaqqinniffiit pilersinneqarnissaannut, pisatsersornissaannut, siulersorneqarnissaannut ingerlanneqarnissaannullu aammalu paaqqinniffinni perorsaanermik suliaqarnermut aamma nakuuserneq pillugu malittarisassanik Naalakkersuisut aalajangersaassapput."02. § 26-ip kingornatigut immikkoortutut nutaatut ikkunneqassaaq:
"Meeqqanut inuusuttunullu ulloq unnuarlu paaqqinniffinni immikkoortortat isumannaallisakkat"
§ 01. Naalakkersuisut meeqqanut inuusuttunullu ulloq unnuarlu paaqqinniffinni immikkoortortanik isumannaallisakkanik pilersitsisinnaapput, tamanna pisariaqartinneqarpat.
Imm.2. Meeqqanut inuusuttunullu ulloq unnuarlu paaqqinniffinni immikkoortortaq isumannaallisagaq tassaavoq, immikkoortortaq akuerineqarluni matunik silarlernik igalaanillu parnaarsimajuartitsiviusartoq.
Imm.3. Naalakkersuisut meeqqanut inuusuttunullu ulloq unnuarlu paaqqinniffinni immikkoortortani isumannaallisakkani naammattunik inissaqartitsinissaq nakkutigissavaat.
Imm. 4. Naalakkersuisut meeqqanut inuusuttunullu ulloq unnuarlu paaqqinniffinni immikkoortortanut isumannaallisakkanut sukumiinerusunik maleruagassiussapput.§ 02.
Meeqqat inuusuttullu politiinit tigummigallagaasut eqqartuunneqarsimasulluunniit meeqqanut inuusuttunullu ulloq unnuarlu paaqqinnittarfinni immikkoortortanut isumannaallisakkanut inissinneqarsinnaapput. Aalajangersagaq aamma atorneqassaaq meeqqat 12-nik – 15-nillu akornanni ukiulinnut, sakkortuumik pinerluuteqarsimasunut, aamma meeraq eqqarsaatigalugu inissinneqarnissaa piumasarineqavippat.
Imm. 2. Meeqqanut inuusuttunullu ulloq unnuarlu paaqqinnittarfimmi immikkoortortamut isumannaallisakkamut inissiineq, ulloq unnuarlu paaqqinnittarfiup tulleriissaarisartuanit akuerineqassaaq.""2. § 2 oqaasertaliorneqassaaq ima:
"§ 2. Inatsisartut peqqussutaat atortuulissaaq 1. januar 2009."
Oqaaseqaatinut tunngatillugu siunnersuutit
Nalinginnaasumik oqaaseqaatit
Allannguutissatut siunnersuummi matumani pineqarput meeqqanut inuusuttunullu ulloq unnuarlu paaqqinniffinni immikkoortortanut isumannaallisakkanut maleruagassaliortarneq. Immikkoortortat isumannaallisakkat taamaallaat illusimmaviussapput meeqqanut inuusuttunullu pinerluttulerinermi inatsimmik unioqqutitsisunut unioqqutitsiniartunulluunniit, pineqaatissinneqarnissaminnut ukiukippallaartunut. Allannguutissatut siunnersuutip tunngaviusumik siunertaraa meeqqanut inuusuttunullu ulloq unnuarlu paaqqinniffinni immikkoortortanik isumannaallisakkanik pilersitsisinnaasarnissaq, taamaasillunilu Danmarkimi inissiisarnermut imaluunniit inersimasut pinerluuteqarsimasut peqatigisussanngorlugit inissiisarnermut taarsiullugu allamik periarfissaqalernissaq.
Meeqqat inuusuttullu taamaattut ima piumasaqarfiusartigaat meeqqanut inuusuttunullu ulloq unnuarlu paaqqinniffinni nalinginnaasuni paaqqutarineqarsinnaanatik. Pisariaqarpoq pineqartut immikkut aaqqissugaasuni pisariaqartitaannik ajornartorsiutaannillu isumaginniffiusinnaasuni inissiisarfinniitsinnissaq.
Allannguutissatut siunnersuummi aamma meeqqanut inuusuttunullu ulloq unnuarlu paaqqinnittarfinnik suugaluartunilluunniit akuersissuteqartarnermut, aammalu meeqqanut inuusuttunullu ulloq unnuarlu paaqqinniffinni pissaanermik atuineq pillugu malittarisassanut inatsisitigut tunngavissatut aalajangersakkat erseqqissarneqarput.
Aalajangersimalluinnartumik paragraffimik ilanngussisoqarpoq, tassanilu pineqartutuaallutik immikkoortortat isumannaallisakkat. Aalajangersakkamut peqatigitillugu, meeqqanut inuusuttunullu ulloq unnuarlu paaqqinniffinni immikkoortortat isumannaallisakkat pillugit Naalakkersuisut sukumiinerusumik maleruagassiorsinnaalerput.
Siunnersuummut sanilliullugu maleruagassanik erseqqissaallunilu itisilerineq pivoq allannguutissatut siunnersuutip Inatsisartut ukiakkut ataatsimiinneranni siullermeerneqarluni oqaluuserineqarneranut atatillugu. Taamatuttaaq allannguutissatut siunnersuummut ilanngunneqarput Inatsisartut Ilaqutariinnermut Ataatsimiititaliaani tamatuma kingornatigut oqallisaasimasut.
Taamatuttaaq malugineqassaaq meeqqanut inuusuttunullu ulloq unnuarlu paaqqinniffinnik nakkutilliineq Naalakkersuisut isumagisussaammassuk, tak. Isumaginninnermut tunngasunik nakkutilliineq pillugu Namminersornerullutik Oqartussat nalunaarutaanni nr. 6-imi, 16. februar 2006-imeersumi § 6. Naalakkersuisut nakkutilliinerat sukanganerussaaq, tamatumani immikkut akuliuttarnermut tunngassutilik pineqarmat.
Aalajangersakkanut ataasiakkaanut oqaaseqaatit
Nr. 1-imut
§ 23, imm. 1-mutAalajangersakkakkut meeqqanut inuusuttunullu ulloq unnuarlu paaqqinniffinni pissaanermik atuineq pillugu inatsisitigut tunngavissaareersut erseqqissarneqarput, taamaasilluni inatsisitigut tunngavissaq paasinarlunilu erseqqippoq. Pissaanermik atuineq ilungersunaqimmat immikkullu akuliunnermut tunngassuteqarmat pingaaruteqarluinnarpoq inatsisitigut tunngavissat qularutigineqannginnissaat. Aammattaaq innersuussutigineqarpoq Meeqqanut inuusuttunullu kiisalu annertuumik innarluutilinnut ulloq unnuarlu paaqqinniffiit pillugit Namminersornerullutik Oqartussat nalunaarutaat nr. 64, 29. december 1994-imeersoq.
§ 01-mutImmikkoortortat isumannaallisakkat pilersinneqarnissaat pillugu aalajangersagaq ilanngunneqarpoq. Meeqqanut inuusuttunullu ulloq unnuarlu paaqqinniffinni immikkoortortanik isumannaallisakkanik pilersitsisinnaanissaq annertuumik pisariaqartinneqarpoq, ullumikkut inuusuttut isumaginninnermi perorsaanikkut neqeroorfigineqarsinnaasanngitsut amerliartormata. Siusinnerusukkut meeqqat inuusuttullu pineqartut Danmarkiliartinneqartariaqartarsimapput imaluunniit inersimasut pinerluuteqarsimasut peqatigisussanngorlugit inissinneqartariaqartarsimallutik, Kalaallit Nunaanni naleqquttunik inissiisarfeqannginnera pissutigalugu.
Imm. 1-imut.
Aalajangersakkakkut meeqqanut inuusuttunullu ulloq unnuarlu paaqqinniffiini immikkoortortanik isumannaallisakkanik Naalakkersuisut pilersitsisinnaalerput.
Immikkoortortaq isumannaallisagaq inuusuttumut pinerluuteqarsimasumut allamik periarfissiivoq assersuutigalugu inersimasut pinerlussimasut akornanni inissiisarfimmiitinneqarnissamit, taamatullu inuusuttumut meeqqanut inuusuttunullu ulloq unnuarlu nalinginnaasumik paaqqinniffinni paaqqutarineqarsinnaanngikkaluamut isumaginninnermi perorsaanikkut neqeroorutaassalluni. Taamatut pisoqartillugu periarfissaq alla tassaasinnaavoq neqerooruteqarsinnaannginneq imaluunniit Danmarkimi inissiineq.
Pingaaruteqarpoq erseqqissassallugu, immikkoortortamut isumannaallisakkamut inissiineq meeqqamut/inuusuttumut 18-it inorlugit ukiulimmut isumaginninnermi perorsaanikkut neqeroorutaasinnaammat aamma Pinerluttulerinermut inatsit malillugu pineqaatissiissutaasinnaalluni. Meeqqamut inuusuttumulluunniit iliuusissanut pilersaarusiortoqassaaq, taamatuttaarlu pineqartup siunissaanut inuttullu ineriartornissamut anguniakkat aaqqissuunneqassapput. Meeqqanik inuusuttunilluunniit toqqorsiviunngilaq qanoq iliorfigeriassallugit nalulikkanik inissiisarfik, tassaallunili meeqqat inuusuttullu tikillugit suliaqarfiusoq, isumaginninnermi perorsaanerit aqqutigalugit inuunerannik ingerlariaqqiffissanut ikiorsiivik. Meeqqamik/inuusuttumik isumaginninneq pitsaasumik piginnaasaqarfiusumillu ingerlanneqassaaq siusinaartumik piginnaassuseqartumillu iliuuseqarnikkut.
Imm. 2-mut.
Immikkoortortat isumannaallisakkat paasineqassapput meeqqanut inuusuttunullu ulloq unnuarlu paaqqiffinni immikkoortortat minnerit imaluunniit illutaanit allamiittut, matui igaavilu paarnaaqqatinneqartut, taamaasilluni meeraq inuusuttorluunniit qimagutiinnarsinnaanngilaq.
Immikkoortortami isumannaallisakkami igalaat sequmittussaanngitsutut sanaajusarput, sulisut saassunneqassagunik kalerrisaaruteqartinneqartarput, ulloq unnuarlu tamaat nal. akunnerini 24-ni pigaartoqartarpoq sulisoqarlunilu. Immikkoortortap immikkoortuisa ilai parnaarneqarsinnaapput, pinerluttunillu isumaginnittoqarfik politiillu qanilluinnartumik suleqatigineqarlutik.
Imm. 3-mut.
Meeqqanut inuusuttunullu ulloq unnuarlu isumannaallisakkamik paaqqinniffinni inissat naammattut pigineqarnissaat Naalakkersuisut isumagisassaraat. Naalakkersuisut taakkuupput meeqqanut inuusuttunullu inissanik isumannaallisakkanik pisariaqartitsinermik nalilersuisartussat tamannalu tunngavigalugu iliuuseqartartussat. Immikkoortortat isumannaallisakkat pilersinneqarnissaannut Naalakkersuisut aningaasatigut pisussaaffeqarput. Peqatigitillugu meeqqap imaluunniit inuusuttup kommuniani kommunalbestyrelsi, najugaqarnermut akiliisussaavoq.
Imm. 4-mut
Imm. 4 tassaavoq, aalajangersagaq meeqqanut inuusuttunullu paaqqinnittarfinni immikkoortortanut isumannaallisakkanut Naalakkersuisut sukumiinerusunik malittarissasaliorsinnaanerannut, inatsisitigut tunngavissiisoq. Assersuutigalugu sulisut amerlassusissaannut malittarisassat, ilinniartitaanermut aamma sunngiffimmi sammisassaqartitsinermut neqerooruteqarnermi piumasaqaatit, init aaqqissuunnerannut il.il.
§ 02-mutUani aalajangersarneqarpoq, kikkut ulloq unnuarlu meeqqanut inuusuttunullu paaqqinniffinni immikkoortortani isumannaallisakkani inissinneqarsinnaanersut. Peqatigitillugu erseqqissarneqarpoq meeqqat inuusuttullu pinerluuteqarsimasut kisimik pineqartut.
Imm. 1-imut
Ulloq unnuarlu meeqqat inuusuttullu paaqqinniffinni immikkoortortani isumannaallisakkani meeqqat inuusuttullu inatsisinik unioqqutitsisimasut kisimik inissinneqarsinnaaput, imaluunniit tassaasinnaaput 15-nik ukioqalereersimasut. 15-inik ukioqalersimaneq pineqaatissinneqarnissamut ukiukinnerpaaffiummat, meeqqat 15-inik inorlugit ukiullit Pinerluttulerinermik inatsit malillugu pineqaatissinneqarsinnaanngillat, pinerluutigineqartoq inatsimmi taaneqaraluarpalluunniit.
Tassa immikkoortortat isumannaallisakkat taamaallaat meeqqanut inuusuttunullu pinerluuteqarsimasunut naatsorsuussaapput.
Tassunga atatillugu taaneqassaaq meeqqat inuusuttullu ikittuinnaat kisimik eqqartuussivimmit inissiisarfimmi inissinneqarnissamut pineqaatissinneqartarmata, tamatumani tamanna annertuumik akulerunnerummat pineqartunut pineqaatissiinerusarmat aammalu aatsaat inoqammut ulorianartumik pinerluuteqarnermi pineqaatissiisoqartillugu atorneqarsinnaaasarluni. Meeqqat inuusuttullu amerlanerpaartaat inissinneqartussanngorlugit eqqartuunneqartarput, meeqqanut inuusuttunullu isumaginnittoqarfimmik taaneqartartumut, tassaasoq eqqartuussut piumasaqaatitaqanngitsoq imaluunniit eqqartuussut piumasaqaatitalik meeqqap inuusuttulluunniit kommunalbestyrelsimit isumagineqartussanngornera pillugu inissinneqarnissaanik piumasaqaatitalik.
Meeqqat inuusuttullu eqqartuussivimmi eqqartuussisoqareertillugu Pinerluttunik isumaginnittoqarfimmut isumagisassanngortinneqartarput imaluunniit kommunimut najugaqarfimminnut isumagisassanngortinneqartarlutik. Pinerluttunik isumaginnittoqarfik meeqqanut inuusuttunullu inissiisarfinnut inissinneqartussanngorlugit eqqartuunneqartunut akisussaasuuvoq, meeqqallu inuusuttulluunniit paaqqinnittarfimmut inissinneqarfigisariaqagaanut inassuteqaateqassalluni.
Meeqqat inuusuttullu meeqqanut inuusuttunullu isumaginnittoqarfimmut isumagisassanngorlugit eqqartuunneqartunut pineqaatissinneqarnissaminnullu ukiukippallaartunut kommuni akisussaasuuvoq. Kommunalbestyrelsip isummerfigissavaa meeqqanut inuusuttunullu pineqartunut aaqqiineq sorleq naleqquttuunersoq. Ilaatigut tassaasinnaalluni ulloq unnuarlu paaqqinniffinnut inissiineq.
Meeraq inuusuttorluunniit ulloq unnuarlu paaqqinniffimmi immikkoortortami isumannaallisakkami tigummigallagassanngortinneqarpat Eqqartuussisoqarneq pillugu inatsimmi kapitali 5-imi tigummigallagassanngortitsisarneq pillugu malittarisassat atuutissapput, takuuk Eqqartuussisoqarneq pillugu inatsit.
Imm. 2-mut
Kommunalbestyrelsip, Pinerluttunik isumaginnittoqarfiup politiilluunniit kissaatigippassuk, meeqqap inuusuttulluunniit meeqqanut inuusuttunullu ulloq unnuarlu paaqqinnittarfimmi immikkoortortamut isumannaallisakkamut meeqqap inissinneqarnissaa, kommunalbestyrelsip paaqqinnittarfiup pineqartup tulleriiaarisartuinut inissiinissaq tamanna akuerisassanngorlugu inassutigissavaa. Tulleriiaarisartut akuersineratigut qulakkerneqassaaq, meeqqat sualuttumik pinerluuteqarsimasut kisimik immikkoortortanilu isumannaallisakkani sullinniakkat immikkoortortanut isumannaallisakkanut inissinneqarnissaat.
Nr. 2-mut
Siunnersuutigineqarpoq Inatsisartut peqqussutaat atortuulersinneqassasoq 1. januar 2009