24.01.2008

UPA2008/52

 

Peqqussutissatut siunnersuummut oqaaseqaatit

 

Oqaaseqaatit nalinginnaasut

1. Aallaqqaasiut:

Pisortanit ikiorsiissutit pillugit inatsisartut peqqussutaata allanngortinnissaanut inatsisartut peqqussutaannut siunnersuut saqqummiunneqarpoq § 6, imm. 2-p aamma § 13, imm. 4-p qallunaatuuata kalaallisuuatalu assigiinngissuteqarnerat pissutigalugu.

§ 6-imi, imm. 2-mi qallunaatut oqaaseq: "opholdskommune" atorneqarpoq, § 6-illu imm. 2-ani kalaallisut oqaaseq: "kommuuni najugarivitaq"atorneqarluni. Paatsuugassaannginnissaa anguniarlugu qallunaatuuani oqaaseq "opholdskommune" atorneqassasoq, kalaallisuuanilu "kommuni uninngavigisaq" atorneqassasoq siunnersuutigineqarpoq.

§ 13-ip, imm. 4-aani oqaasertat assigiinngitsut marluk ilanngussaapput. Siunnersuutigineqarpoq kalaallisuuani imm. 4-mi oqaasertat siulliit atorneqassasut. Oqaasertat siulliit taakku qallunaatuaani § 13-ip, imm. 4-aani oqaasertanut naapertuupput.

§ 13, imm. 5-imi oqaaseqatigiit kingulliit nutaamik imm. 6-inngorlugit ilanngullugu siunnersuutigineqarpoq, pisortanit ikiorsiissutit annertussusilerneqarnerannut atatillugu meeqqat pisariaqartitaasa immikkut isiginiartariaqarnerat kommunalbestyrelsit pisussaaffigigaat, aalajangersakkamut nammineq pisuussutigisamik pisariaqavissumik ikiorserneqartariaqalernermut kukkusumik inissinneqarsimammat. Siunertaavoq pisariaqavissumik pisortanit ikiorsiissutit annertussusilerneqarneranni meeqqat pisariaqartitaat tamatigut isiginiarneqartarnissaat.

 

2. Aningaasaqarnikkut allaffissornikkullu kingunerisassai:

Allannguutissatut siunnersuut aningaasaqarnikkut allaffissornikkullu kinguneqassanngilaq.

 

3. Oqartussanik aamma suliniaqatigiiffinnik allanillu tusarniaaviginninneq:

Allannguutissatut siunnersuut Naalakkersuisut Inatsisinut allaffeqarfianni (Lovkontor) misissorneqarpoq.

 

 

 

Siunnersuutip aalajangersagaanut oqaaseqaatit

§ 1-imut

Nr. 1 aamma 2

Siusinnerusukkut oqaaseqaatit innersuussutigineqarput, taamaattorli malugeqquneqarluni oqaasertaasa allannguuteqarneri.

Nr. 3-mut tunngatillugu.
Siunnersuummi ingerlateqqinneqarpoq maannakkut aalajangersagaq, qinnuteqartoq nammineq pisuussutigisaminik pissaaleqilersimappat, taava qinnuteqartoq taamaallaat pisortanit ikiorsiissutisiassatut pisinnaasaraluata affaa pisortanit ikiorsiissutigineqarsinnaasoq.

Pissaaleqilerneq nammineq pisuussutigineqartutut isigineqartarpoq qinnuteqartoq nammineerluni suliffimminit soraarniuteqarsimappat imaluunniit pisuussutigisaminik soraarsitaasimappat, assersuutigalugu pissutissaqanngitsumik sulinngitsoorsimaneq pissutigalugu. Aningaasanngornagit ikiorsiissutit tunniunneqassapput qinnuteqartumut allattuganngorlugu, pisiniarfimmi naleqquttumi pisissutigineqarsinnaasumik. Aningaasartuutinut aalajangersimasunik akiliisitsiniartumut toqqaannartumik akilisiisoqartassaaq.

Nr. 4-mut tunngatillugu.
Taamatut pisoqartillugu kommunalbestyrelsip naliliinermini eqqarsaatigisussaavai meerartaasinnaasut pisariaqartitaasa suuneri. Meeqqat pisariaqartitaat atugarissaarnerallu tamatigut salliutinneqartassapput.

 

§ 2-mut

 

Siunnersuutigineqarpoq peqqussut ulloq 1. juli 2008-mi atuutilissasoq.