29.april 2008

UPA 08/44

 

Inatsisartut peqqussutaata kiassarnermi erngup nukissiorfiata Utoqqarmiut Kangerluarsunnguaniittup pilersuiffiani kiassaateqarfinnut innaallagissamit kiassarneqartunut (elektrokedler) attavilersinnissamik pisussaanermut tunngasup allannguuteqartinnera pillugu Inatsisartut peqqussutissaattut siunnersuut

pillugu

Inatsisartut Ineqarnermut Attaveqarnermullu Ataatsimiititaliaata

ISUMALIUTISSISSUTAA

Inatsisartut peqqussutissaattut siunnersuutip aappassaaneerneqarnerani saqqummiunneqartoq
(Ineqarnermut, Attaveqarnermut Aatsitassanullu Naalakkersuisoq)

Inatsisartut Attaveqarnermut Ineqarnermullu Ataatsimiititaliaat kingullermik suliarinninnermini ukuninnga inuttaqarpoq:

Inatsisartunut ilasortaq Godmand Rasmussen, Atassut, siulittaasoq
Inatsisartunut ilasortaq Jørgen Wæver Johansen, Siumut, siulittaasup tullia
Inatsisartunut ilasortaq Marie Fleischer, Demokraatit
Inatsisartunut ilasortaq Johnathan Motzfeldt, Siumut
Inatsisartunut ilasortaq Esmar Bergstrøm Inuit Ataqatigiit

Siullermeerinerup kingorna Inatsisartut Attaveqarnermut Ineqarnermullu Ataatsimiititaliaata Inatsisartut peqqussutaat nassuiaatitaalu misissorpai.

Siunnersuutip imaa.

Qorlortorsuarmi erngup nukinganik innaallagissiorfiup nutaap pilersuiffiani sullitat, pisortaagunik namminersortuugunilluunniit, erngup nukinganik innaallagissiorfimmit innaallagiaq atorlugu kiassarnissamut pisussaaffilerneqarnissaannut Inatsisartut peqqussutissaattut siunnersuutikkut Nukissiorfiit periarfissinneqarput. Taamatut piginnaatitsissut Sisimiuni erngup nukinganik innaallagissiorfimmut maanna sananeqartumut aammalu Ilulissani erngup nukinganik innaallagissiorfiliassatut pilersaarutigineqartumut aamma atuuttussanngortinneqalersaarpoq.

Tusarniaaneq

Siunnersuut oqartussaasunut kattuffinnullu ukununnga tusarniaassutigineqarpoq: Ineqarnermut Attaveqarnermullu Pisortaqarfik, Aningaasaqarnermut Pisortaqarfik, Nukissiorfiit, KNI Energi A/S, Kanukoka aamma Greenland Development A/S. KANUKOKA Aningaasaqarnermullu Pisortaqarfik tusarniaanermut akissuteqarput. Naalakkersuisut amerlanerusunut tusarniaasimappata pitsaasimassagaluartoq ataatsimiititaliaq isumaqarpoq, tassunga ilanngullugu assersuutigalugu Kalaallit Nunaanni Sulisitsisut Peqatigiiffiannut, taassumami ilaasortai arlallit nukimmik annertuumik atuiffiusumik tunisassiortuummata, matumani immikkut eqqarsaatigineqarluni aalisakkanik tunisassiorneq. Tamatuma saniatigut ataatsimiititaliaq allanik oqaaseqaatissaqanngilaq.

Ataatsimiititaliap siunnersuummik suliarinninnera

Ataatsimiititaliap aallarniutigalugu oqaatigissavaa inatsisitigut maanna inissisimanermut sanilliullugu atortutigut annertunerusumik allannguinermik peqqussutissatut siunnersuut kinguneqassanngimmat, inatsisitigulli inissisimaneq tamanna sumiiffinnut erngup nukinganik innaallagissiorfinnik nutaanik sanaartorfiusunut atuuttussanngortinneqarluni. Tamatumani Qorlortorsuarmi innaallagissiorfiup aammalu Ilulissani Sisimiunilu erngup nukinganik innaallagissiorfissat tunisassiaasa sinneruttup sapinngisamik atorluarneqarlunilu inuiaqatigiinnit annertunerpaamik iluanaarutigineqarnissaa siunertarineqarluni. Naalakkersuisut nalinginnaasumik nassuiaatini imatut oqaaseqarnerat ataatsimiititaliamit maluginiarneqarpoq:

Aningaasaqarnermut Pisortaqarfimmit tusarniaanermut akissut makkuninnga pissutissaqalersitsivoq:

Tusarniaaffigineqartup maluginiaqquvaa siunissaq ungasinnerusoq eqqarsaatigalugu akiliutissatut aalajangersakkani takuneqarsinnaasumik imaluunniit allatut sunniuttumik innuttaasunut aamma inuussutissarsiornermut aningaasaqarnikkut pitsaasumik sunniuteqartussaassasoq.

Taama tunngaviusumik isumaqarneq ataatsimiititaliamit taperserneqarsinnaavoq, tassungalu atatillugu siunissaq ungasinnerusoq isigalugu aningaasaqarnikkut iluanaarutit innaallagissamik pisisunut iluaqutissanngortinneqarnissaat Naalakkersuisoqarfiup Nukissiorfiit suleqatigalugit qanoq suliniutigilersaarneraa pillugu oqaaseqaammik siunnersuutip matumani pineqartup aappassaaneerneqarnerani saqqummiusseqqullugu Naalakkersuisunut ilaasortaq qinnuigineqarpoq. Tassami taamatut siunertaqarneq nassuiaatini immikkut ersersinniarneqarsimasutut isumaqarfiginanngimmat. Siunnerfittut aalajangiunneqartoq siunissaq ungasinnerusoq isigalugu ikummatissanik nunap iluaneersunik atuinermik annikillisaaqataassasoq Co´2-millu aniatitatta appartinneqarnissaanik qulakkeerinnissasoq Naalakkersuisut assigalugit ataatsimiititaliaq isumaqarpoq. Aammattaaq attavilersinnissamik pisussaaneq innuttaasunut anigaasartuutaassanngimmat ataatsimiititaliap nuannaarutigaa, tassami innaallagissiorfimmut attaviliinermi aningaasartuutit Nukissiorfiup kisimi nammassammagit. Ataatsimut isigalugu siunnersuutikkut anguniarneqartut siunniussallu ataatsimiititaliami partiit sinniisaannit tamanit taperserneqarput.

Peqqussutissatut siunnersuutip suliarineqarnera Atassummit Inuit Ataqatigiinniillu ilaasortaatitat immikkut oqaaseqaateqarnissaannut tunngavissaqalersitsivoq.

Assersuutigalugu nunalerinermik ingerlataqartut erngup nukinganik innaallagissiorfeeqqat aqqutigalugit innaallagissamik, imermik kiammillu imminnut tamakkiisumik pilersorsinnaanissaasa suli siuarsarneqarnissaannik ammaassisunik peqqussutip aalajangersakkanik ilaqartinneqarnissaa isumaliutigineqarsimasinnaagaluartoq Atassutip ilaasortaatitaata oqaatigissallugu tunngavissaqarsoraa. Aammattaaq inuussutissarsiummik ingerlataqartut imminut pilersornissamik kissaateqarnertik oqaatigisimagaat Atassummit ilisimaneqarpoq, peqqussutissatullu siunnersuutip nutarterneqarnera sioqqullugu suliami apeqqut taanna ilanngunneqarsimasorinanngilaq. Atassummit ilaasortaatitap tamanna ajuusaarnartuutippaa.

Inuit Ataqatigiit ilaasortaatitaat isumaqarpoq Nukissiorfiit aktiaateqarluni ingerlatseqatigiiffinngortinneqassappata ingerlatseqatigiiffiup neqeroorutaanik tamakkiisumik ilaannakortumilluunniit atuerusunnerlutik atuerusunngilluinnarnerlutilluunniit innuttaasut suliffeqarfiillu aalajangernissaminnut periarfissinneqarnissaat qulakkeerneqartariaqartoq. Unammilleqatigiinnermut inatsit naapertorlugu aktiaateqarluni ingerlatseqatigiiffiit allanut atugassaritaasunik atugassaqarlutik unammillertussaapput, aammalu niuernermi siuttuugaluarunilluunniit suliffeqarfinnit mikinernit akikinnerusumik neqerooruteqarnissaminnut siuttutut inissisimanerminnik atornerlueqqusaanngillat.

Aalajangersakkamik innuttaasut nukissiuutinik allanik atuisinnaanerannik periarfissiisumik ilanngussisoqartariaqartoq Inuit Ataqatigiit ilaasortaatitaat aamma isumaqarpoq. Taakku tassaasinnaapput seqernup kissarneranik tigooraaviit imermik uunnaanermut imaluunniit silaannarmik kissartumik illup iluanut supoorinermut atorneqarsinnaasut nukissiuutilluunniit allat. Tamanna pillugu siunnersuutip aappassaaneerneqarnissaanut allannguutissatut siunnersuummik saqqummiusseqqullugit Naalakkersuisut ilaasortaatitamit kaammattorneqarput.

Ataatsimiititaliap inassuteqaataa

Siuliani allassimasutut paasinnilluni siunnersuut akuersissutigineqassasoq ataatsimiititaliap isumaqatigiittup inassutigaa.

Taama oqaaseqarluni Inatsisartut Attaveqarnermut Ineqarnermullu Ataatsimiititaliaata peqqussutissatut siunnersuut Inatsisartunut aappassaaniigassanngortippaa.

 

	Godmand Rasmussen Siulittaasoq
Jørgen Wæver Johansen Siulittaasup tullia		Marie Fleischer
Jonathan Motzfeldt		Esmar Bergstrøm