18. januar 2008

UPA 2008/44

 

Siunnersuummut nassuiaatit


Nassuiaatit nalinginnaasut

1. Aallaqqaasiut

Inatsisartut peqqussutaannut allannguutissatut siunnersuut Qorlortorsuarmi erngup nukinganik nukissiorfittaaq sananeqaqqammersoq, erngup nukinganik nukissiorfissaq Sisimiuni sananeqaleruttortoq aammalu erngup nukinganik nukissiorfissaq Ilulissani sananeqartussatut pilersaarutigineqartoq tunngavigalugit saqqummiunneqarpoq.

Kalaallit Nunaat tamakkerlugu erngup nukinganik nukissiuuteqarnikkut ineriartortitsileruttornermut Inatsisartut peqqussutaat malinnaasinnaalersillugu Inatsisartut peqqussutaata allannguuteqartinneqarnissaa allannguutissatut siunnersuummi siunertarineqarpoq.

Utoqqarmiut Kangerluarsunnguani erngup nukinganik nukissiorfiup saniatigut allanik erngup nukinganik nukissiorfiliortitertoqarnera pissutigalugu, innaallagissamik kiassaatinut attavilersinnissamik pisussaaffeqarneq pillugu Inatsisartut peqqussutaat ullutsinnut naleqqutinngilaq. Tamatumunnga pissutaavoq Inatsisartut peqqussutaat kiassarnermi erngup nukissiorfiata Utoqqarmiut Kangerluarsunnguaniittup pilersuiffiani kiassaateqarfinnut innaallagissamit kiassarneqartunut (elektrokedler) attavilersinnissamik pisussaanermut tunngasoq, taamaallaat Utoqqarmiut Kangerluarsunnguani erngup nukinganik nukissiorfiup pilersuiffiani atorneqarsinnaammat.

Avatangiisit inuiaqatigiillu aningaasaqarnerat eqqarsaatigalugit erngup nukinganik nukissiorfiit piginnaasaat sapinngisaq tamaat atorluarneqassaaq. Attavilersinnissamik pisussaafiup sumiiffinni tamani atuuttussanngortinneratigut ikummatissanik nunap iluaneersunik kiassarnermut atuineq malunnaateqarluartumik annikillissaaq, tamatumuunalu Kalaallit Nunaata ataatsimut isigalugu CO2–mik aniatitsinera pinngitsoorani annikillisusaavoq.

Aningaasaqarneq eqqarsaatigalugu inuiaqatigiit kalaallit uuliap akiinit qaffakkiartuinnartunit sunnersimaarneqarunnaariartulissaaq, tamatumuunalu kalaallit aningaasaqarnerat patajaannerulissaaq.


2. Siunnersuutip immikkoortui pingaarnerit

Inatsimmi atuuttumi taamaallaat erngup nukinganik nukissiorfiup Utoqqarmiut Kangerluarsunnguaniittup pilersuiffiani pisortat aamma namminersortut kiassaateqarfiutillit erngup nukinganik nukissiorfimmiit innaallagissamik kiassartussanngornissaannik Nukissiorfiit peqqusisinnaanerat periarfissinneqarpoq. Allannguutissatut siunnersuutip akuerineqarnerani innaallagissap kiassaatitut atorneqalerneratigut Kalaallit Nunaanni erngup nukinganik nukissiorfiit tamarmik pitsaanerpaamik atorluarneqarsinnaanissaat qularnaarneqassaaq.

Peqqussutip qallunaatoortaani Grønlands Energiforsyning-imut innersuussutit maannakkut taaguutaasumut tassaasumut "Nukissiorfiit" naapertuuttunngorlugu allanngortinneqarput.


3. Pisortanut aningaasaqarnikkut allaffissornikkullu sunniutissat

Pisortanut allaffissornikkut sunniuteqarnissaa naatsorsuutigineqanngilaq. Aningaasaqarnikkut inuiaqatigiit kalaallit siunissaq ungasinnerusoq eqqarsaatigalugu pitsaanerusumik atugaqalernissaat naatsorsuutigineqarpoq, inuiaqatigiinni ikummatissanik nunap iluaneersunik pisariaqartitsineq annikinnerulersussaammat. Siunissaq qaninnerusoq eqqarsaatigalugu Nukissiorfiit innaallagissamik kiassaatinik ikkussuinernut aningaasartuuteqassapput, aningaasartuutilli taakku ikummatissanik nunap iluaneersunik pisisarnermi sipaaruteqarnikkut nalimmassarneqarnissaat naatsorsuutigineqarpoq.


4. Inuussutissarsiornermut aningaasaqarnikkut allaffissornikkullu il.il. sunniutissat

Nukissiorfinni ingerlatsinerup pitsaanerulersinneqarnera siunissaq ungasinnerusoq eqqarsaatigalugu innuttaasunut inuussutissarsiornermullu aningaasaqarnikkut pitsaasumik sunniuteqassasoq naatsorsuutigineqarpoq, taamaalilluni aningaasartuutit annikinnerutinneqassammata. Inuussutissarsiornermut il.il. allaffissornikkut sunniuteqarnissaa naatsorsuutigineqanngilaq.


5. Avatangiisinut pinngortitamullu sunniutissat

Kiassarnermut ullumikkut naliginnaasumik atorneqartartumut taarsiullugu erngup nukinga atorneqalersinnaappat nunatsinni ikummatissanik nunap iluaneersunik atuineq annikinnerulissaaq. Inatsisartut peqqussutaata allannguuteqarnera silaannaap pissusaata pitsaanerulernissaanut Kalaallit Nunaata pitsaasumik sunniuteqaqataanissaanut tunngavissiivoq. Assersuutigalugu erngup nukinga atorlugu kiassaanikkut kiassaanermit CO2-mik aniatitsineq annikinnerulertussaavoq.

6. Innuttaasunut allaffissornikkut sunniutissat

Atuaaneq akiligassiinerlu kisimik innuttaasunut allaffissornikkut sunniutaasussaapput.


7. Naalagaaffeqatigiinnermut aammalu namminersornermut tunngasut

Naalagaaffeqatigiinnermut tunngasut allannguutissatut siunnersuutip malitsigisaanik allanngussanngillat. Ikummatissanik nunap iluaneersunik, nunanit allanit eqqussorneqartartunik pisariaqartitsinerup annikinnerulernera namminersornermut aningaasaqarnikkut sunniutaassaaq. Tamanna tunngavigalugu kalaallit aningaasaqarnerat patajaannerulersinneqarsinnaassaaq.


8. Sunniutissat annertuut allat

Siunnersuuteqarnerup kingunerisaanik allanik annertunerusunik sunniuteqartitsinissaq naatsorsuutigineqanngilaq.


9. Oqartussaasunut kattuffinnullu il.il. tusarniaaneq

Allannguutissatut siunnersuut oqartussaasunut kattuffinnullu il.il. makkununnga tusarniaassutigineqarpoq:

Ineqarnermut Attaveqarnermullu Pisortaqarfik, Aningaasaqarnermut Pisortaqarfik, Nukissiorfiit, KNI Ikummatissat A/S, Kanukoka aamma Greenland Development A/S.

Makkua tusarniaanermut akissuteqarput: KANUKOKA aamma Aningaasaqarnermut Pisortaqarfik.

Aningaasaqarnermut Pisortaqarfimmit tusarniaanermut akissut makkuninnga pissutissaqalersitsivoq:

Tusarniaaffigineqartup maluginiaqquvaa siunissaq ungasinnerusoq eqqarsaatigalugu akiliutissatut aalajangersakkani takuneqarsinnaasumik imaluunniit allatut sunniuttumik innuttaasunut aamma inuussutissarsiornermut aningaasaqarnikkut pitsaasumik sunniuteqartussaassasoq.

Tusarniaanermi akissut tamatuma nassuiaatini ilannguneqarnissaanik pissutissaqalersitsivoq.

Tusarniaanermut KANUKOKA-mit akissut makkuninnga pissutissaqalersitsivoq:

KANUKOKAp tusarniaanermut akissutaa allannguinissamik pissutissaqalersitsinngilaq, tassani oqaaseqaatit inatsisini atuuttuni pissutsinut inatsiseqartitaareersunut tunngasuummata.

 

 

Siunnersuummi aalajangersakkanut ataasiakkaanut nassuiaatit


§ 1-mut

Nr. 1-mut

Inatsisartut peqqussutaani sumiiffiit sorliit pineqarnersut Inatsisartut peqqussutaata taaguutaani takuneqarsinnaassaaq.

Inatsisartut peqqussutaata atuuttup taaguutaa naapertorlugu erngup nukinganik nukissiorfiup Utoqqarmiut Kangerluarsunnguaniittup pilersuiffia kisimi Inatsisartut peqqussutaani malittarisassiorfigineqarpoq. Erngup nukinganik nukissiorfiit tamarmik pilersuiffiiniittut Inatsisartut peqqussutaanni malittarisassiuussiffigineqassasut kissaatigineqarmat peqqussutip taaguutaata allanngortinnissaa pisariaqarpoq. Taaguut allanngortinneqarpoq taamaalilluni "erngup nukissiorfiata Utoqqarmiut Kangerluarsunnguaniittup pilersuiffiani" taarserneqarpoq imatut "erngup nukinganik nukissiorfiit pilersuiffiini".

Peqqussutissatut siunnersuutip taaguutaa taamaalilluni erngup nukinganik nukissiorfeqarnermik Kalaallit Nunaanni ineriartortitsileruttornermut ingerlareersumut aammalu suli ineriartortinneqartumut naapertuuttunngortinneqarluni. Assersuutigalugu Qorlortorsuarmi erngup nukinganik nukissiorfik marlunnit pilersuiffeqartoq sillimaffigineqarpoq.


Nr. 2-mut

Allannguinerit inatsisilioriaatsimi iluarsiinerupput.

Grønlands Energiforsyning-imut innersuussutit taaguummut maannakkut atorneqartumut, tassaasumut "Nukissiorfiit" naapertuuttunngorlugit allanngortinneqarput.


Nr. 3-mut

Aalajangersakkap maannakkut oqaasertai malillugit pisortat namminersortullu erngup nukinganik nukissiorfiup Utoqqarmiut Kangerluarsunnguaniittup pilersuiffiata avataaniittut attavilersinnissamik pisussaaffilerneqarnissaat periarfissaqanngilaq. Aalajangersakkap oqaasertaasa allannguuteqartinnerisigut tamanna allanngortinneqassaaq, taamaalilluni pisortat namminersortullu erngup nukinganik nukissiorfiit tamarmik pilersuiffiiniittut attavilersinnissamik Nukissiorfinnit pisussaaffilerneqarsinnaalissallutik.


§ 2-mut

Siunnersuutigineqarpoq Inatsisartut peqqussutaat 1. juli 2008 atuutilissasoq, taamaalilluni Nukissiorfiit erngup nukinganik nukissiorfiit piginnaasaannik piaarnerpaamik atorluaasinnaalerniassammata.