5. maj 2008

UPA2008/43

 

Piginneqatigiilluni inissiat pillugit Inatsisartut peqqussutissaattut nr. xx, xx 2008-meersoq naapertorlugu siunnersuut

pillugu

Inatsisartut Attaveqarnermut Ineqarnermullu Ataatsimiititaliaata

ISUMALIUTISSIISSUTAA

Peqqussutissatut siunnersuutip aappassaaneerneqarnissaanut saqqummiunneqartoq

Inatsisartut Attaveqarnermut Ineqarnermullu Ataatsimiititaliaat suliarinninnermini makkuninnga inuttaqarpoq:

Inatsisartunut ilaasortaq Jonathan Motzfeldt, Siumut, siulittaasuugallartoq
Inatsisartunut ilaasortaq Vittus Mikaelsen, Siumut
Inatsisartunut ilaasortaq Agathe Fontain, Inuit Ataqatigiit
Inatsisartunut ilaasortaq Knud Kristiansen, Atassut
Inatsisartunut ilaasortaq Marie Fleischer, Demokraatit

UPA 2008-mi siullermeerinninnermi peqqussutissatut siunnersuut ataatsimiititaliap misissorpaa makkuninngalu oqaaseqaateqarniarluni.

Siunnersuutip imarisaa

Piginneqatigiilluni inissiat pillugit Inatsisartut peqqussutaata nr. 1-ip, 31. oktober 1991-imeersup ataatsimoortinneqarnissaa nutarterneqarnissaalu peqqussutissatut siunnersuutikkut matumani pineqartukkut pingaarnertut anguniarneqarpoq. Peqqussut maanna atuuttoq 1991-imiilli arlaleriarlugu allanngortinneqartarpoq, aammalu ineqarnermut tunngasuni ineriartornerup pisariaqartitsinerillu suliassaqarfimmi maleruagassanik tamarmiusunik ataatsimut nutarterinissaq pisariaqalersillugu. Tamanna ataatsimiititaliamit pitsaasutut isigineqarpoq, innuttaasut maleruagassat ataatsimoortinneqarpata ilisimatinneqarsinnaalluaqqullugit. Suliniutit taamaattut innuttaasut inatsiseqarnikkut isumannaatsuunerata annertusarneqarnissaanut naleqquttutut ataatsimiititaliamit isigineqarput. Nammineq pigisatut maannamut inissiat piginneqatigiilluni inissianik piginneqatigiilluni inissiaatillit peqatigiiffiit tigusinissaminnut periarfissaaannik oqilisaataasumik imaluunniit piginneqatigiilluni inissiaatillit peqatigiiffiit inissanik maannamut attartortittakkanik nammineq pigisatut inissiatut tunisaqarsinnaanngorlugit allannguisoqartoq ataatsimiititaliap maluginiarpaa. Tamanna tunngavigalugu piginneqatigiilluni inissianik pissarsisoqarsinnaaneranut periarfissat sisamat pilersaarutigineqarput, tamatumani Namminersornerullutik Oqartussat kommunilu tamarmik taarsigassarsisitsinnaallutik. Taamatuttaaq piginneqatigiilluni inissiap aqunneqarneranut ingerlanneqarneranullu maleruagassiisunik peqqussutissatut siunnersuut aalajangersakkanik imaqarpoq. Tamanna Inatsisartut kissaatigisaannut naapertuulluarpoq.

Piginneqatigiilluni inissiaatillit peqatigiiffiinut pisortat taarsigassarsiarititaannut annertussutsit siunnersuummi maleruagassiorneqarput. Sanaartornermut aningaasartuutit tamarmiusut 25 %-iinik ernialersugassaanatillu akilersugassaanngitsunik Namminersornerullutik Oqartussat kommunillu tamarmik immikkut siunissami taarsigassarsitsisinnaassapput. Inissiamut 110 kvadratmeterit angullugit angissusilimmut annertunerpaamillu kvadratmeterimut ataatsimut 19.100 kr.-inut taarsigassarsisitsisoqarsinnaavoq. Allannguinerup kingunerisaanik piginneqataasup piginneqataassutai 33 1/3 %-init 50 %-inut annertusissapput. Aaqqissuussinerup kingunerisaanik piginneqatigiilluni inissiamut nammineq akiliutigisassat 7 %-imit 5 %-imut annikillisinneqassapput. Namminersornerullutik Oqartussat kommunillu tamarmik immikkut annertunerpaamik 525.250 kr.-inik suli taarsigassarsisitsisinnaassapput. Taarsigassarsiat agguataarneqarnerata allanngortinneratigut piginneqatigiilluni inissiaatillit peqatigiiffiit annertunerusumik akisussaaffilerneqassapput, aningaasalersuinerup annertunerpaataa kreditforeningit aqqutigalugit pissammat.

Tusarniaanermit akissutit

Ataatsimiititaliap siunnersuummik matuminnga suliarinninnermini atugassaminik tusarniaanermit akissutit nuutinnerannik pissarsiniarsimavoq. Peqqussutissatut siunnersuut illuatungeriinnut makkununnga tusarniaassutigineqarsimasoq ataatsimiititaliap maluginiarpaa: Aningaasaqarnermut Pisortaqartaqarfik, Akileraartarnermut Pisortaqarfik, Inuussutissarsiornermut Pisortaqarfik, A/S Inissiaatileqatigiiffik INI, Iserit A/S, KANUKOKA, Sparbank Vest, GrønlandsBanken, Grønlands Ejendomskontor, Ejendomskontoret, Igdlo, Kalaallit Nunaanni Sulisitsisut Peqatigiiffiat aammalu Sulisitsisut peqatigiiffii NUSUKA, HST, ILIK, SIK, A-Revision ApS, Pricewaterhouse-Coopers Grønland A/S (Kalaallit Nunaanni kukkunersiuisoqarfik) aammalu Deloitte.

Tusarniaanermit ukunanit akissutit:

KANUKOKA, A/S Boligselskabet INI, Deloitte, SIK, A-Revision, Grønlands Revisionskontor (oqaasiinnaaq atorlugit tusarniaanermut akissuteqarpoq), GrønlandsBanken, Aningaasaqarnermut Pisortaqarfik, NUSUKA, Akileraartarnermut Pisortaqarfiik, Inuussutissarsiornermut Pisortaqarfik, Kalaallit Nunaanni Sulisitsisut Peqatigiiffiat aammalu ILIK.

Tusarniaarnermi illuatungeriit makku siunnersuutip imarisaanut oqaaseqaateqanngillat:

Aningaasaqarnermut Pisortaqarfik, NUSUKA, Akileraartarnermut Pisortaqarfik, Inuussutissarsiornermut Pisortaqarfik, Kalaallit Nunaanni Sulisitsisut Peqatigiiffiat aammalu ILIK.

Illuatungeriinnit tusarniaaffigineqartunit oqaaseqaatit allannguutissatullu siunnersuutit Naalakkersuisunit ataatsimut isigalugu ilanngulluarneqarsimammata ataatsimiititaliamit maluginiarneqarpoq. Tusarniaalluni suliaqarnermi Naalakkersuisut peqqissaarsimanerat suliniuteqarsimanerallu nersussallugu ataatsimiititaliap tunngavissaqarsoraa.

Taamaattorli kukkunersiuisoqarfimmit Deloittemit tusarniaanermit akissut sammilertussallugu ataatsimiititaliap pissutissaqarsoraa.

Deloittep tusarniaanermit akissummi oqaatigaa siunnersuut matumani pineqartoq aningaasaqarnikkut kinguneqartussaasoq, naak Naalakkersuisut akerlianik oqaaseqaraluartut. Naatsorsuinermi assersuutit aqqutigalugit piginneqatigiilluni inissiamik pigisaqarnermut peqqussut maanna atuuttoq malillugu inissianut sananeqarnermik kvadratmeterimut 15.000-it 17.204 kr.-it akornanni akeqartunut qaammaatikkuutaartumik akiliut 20 %-it missaannik qaffassasoq Deloittemit missingerneqarpoq. Akerlianik inissianut kvadratmeterimut 19.000 kr.-it sinnerlugit akilerlugit sananeqartunut qaammatikkuutaartumik akiliutit 20 pct.-it missaannik annikillissaaq. Tusarniaanermit akissut malillugu nalilerneqarpoq tamanna Nuummi piginneqatigiilluni inissiamik pigisaqarneq ataatsimut isigalugu akikinnerulissasoq, tamatumani kvadratmeterimut aki 18.000-it missaanniinnerassangatinneqarluni. Akerlianik nalilerneqarpoq sinerissami piginneqatigiilluni inissiamik pisaqarneq akisunerulissasoq, tamatumani kvadratmeterimut aki 15.000 kr.-it missaanniilluni.

Deloittep nalinginnaasumik assersuusiornermigut nalilerpaa peqqussut nutaaq malillugu piginneqatigiilluni inissiaq 105 kvadratmeterinik angissusilik kvadratmeterimut ataatsimut 15.000 kr.-inik akilerlugu sananeqartoq qaammammut 8.200 kr.-inik akilersorneqartariaqartoq. Peqqussummut maanna atuuttumut sanilliullugu tamanna qaammammut 1.500 kr.-it missaannik qaffaaneruvoq. Inissiamut kvadratmeterimut 19.000 kr.-it missaannut sananeqartumut atatillugu 10.000 kr.-it missaannik nalilimmut akiliutaasoq 2.500 kr.-it missaannik appassaaq.

Deloittep oqaatigaa Nuup avataani piginneqatigiilluni inissianik niuernermik tamanna unittoortitsivissasoq, inuit annertuumik isertitaqartut 10-40-50-imik aaqqissuussineq malillugu sanaartornissaat naatsorsuutigineqarsinnaammat aammalu inuit akunnattumik isertitaqartartut piginneqatigiilluni inissialiornissamut akissaqarunnaassangatinneqarmata.

Siunnersuummut nalinginnaasumik oqaaseqaatini allassimavoq ajornartorsiut Naalakkersuisunit eqqumaffiginiarneqartoq. Taamaalilluni allassimavoq nammineq akiliutigineqartussat apparnerat pissutigalugu aningaaserivinni taarsigassarsianit akisunerusunik pinnani realkreditimit aningaasalersorneqartunik taarsigassarsianut akilersuutinut piginneqataasut siunissami akikinnerusumik akilersuinissaat naatsorsuutigineqarsinnaammat.

Tamanna innuttaasunut siunissaq isigalugu iluaqutaasussatut immini isigineqarsinnaavoq, piginneqataasoq piginneqataassutiminik kingornagut tunisaqarnermigut naliusunit katersuillunilu sipaaruteqassammat. Piginneqataasut taamaalillutiik inissiaminni naliusumik ullumikkornit annertunerungaartumik sipaaruteqarnissartik naatsorsuutigissavaat.

Erseqqissaatigissallugu pingaaruteqarpoq peqqussutip akuersissutigineqarnerata kingorna inissianut nutaanut sananeqartunut allaannguutit taakku kisimik atuutissammata. Taamaalilluni piginneqatigiilluni inissianut sananeqareersimasunut aammalu piginneqatigiilluni inissiaatillit peqatigiiffiinut pisortanit taarsigassarsianik neriorsorneqareersimasunut peqqussut sunniuteqassanngilaq.

Deloittep uparuartugai ataatsimiititaliamit maluginiarneqarput, nalunngilluarluguli Deloittep siunnersuutai saqqummiunneqartut eqquutissagaluarpata ajornartorsiutaasinnaasut tamakku aaqqiinniarlugit siunnersuummik saqqummiussinissaminnut Naalakkersuisut tunuarsimaarnavianngitsut. Inuit akunnattumik isertitallit nunap ilaani sanaartornermi akit appasiffiusuni najugallit inissianik imminnut piviusorsiortumik imminnut pilersorsinnaajuarnissaat naalakkeruinermik aqutsinermikkut Naalakkersuisunit pingaartinneqarmat ataatsimiititaliamit isumaqatigineqarpoq.

Deloittemit allanillu tusarniaanermit akissutit isumaliutissiissummut ilanngussatut ilanngunneqarput.

Peqqussutissatut siunnersuutip aaqqissuinikkut misissorneqarnera

Ataatsimiititaliami suliarinninnermut atatillugu siunnersuut aaqqissuinikkut-aningaasaqarnikkut misissoqqullugu Naalakkersuisut qinnuigisimavai. Taamatut misissuineq ulloq 22. april 2008-mi pivoq. Misissuineq tamanna ataatsimiititaliamit assorsuaq iluaqutaasutut isigineqarpoq qujassutigalugulu.

Aaqqissuinikkut misissuinerminni Naalakkersuisut erseqqissaatigaat piginneqatigiilluni inissianik sanaartornermut akit realkreditimit aningaasalersorneqartut annertusineqarnissaat peqqussummi anguniarneqartoq. Tamanna nunatsinni inissianik niuernermi realkreditimit aningaasalersuutit annikillisinneqarnissaat eqqarsaatigalugu 10/40/50-imik aaqqissuussineq iluatsilluarsimasoq isigissagaanni.

Naalakkersuisut misissuinerminni kisitsisit takussutissiallu arlallit saqqummiuppaat, taakku peqqussutissap nutaap kingunerisassaasa ersersinneqarnerannut piukkunnaatilittut isigineqarlutik. Ajornartorsiutit Deloittemit saqqummiunneqartut toqqaannartumik pinaveersimatinnianngikkaluarlugit, Deloittep tusarniaarnermit akissutaa malillugu misisssuinikkut qulaajarneqarpoq siunissaq ungasinnerusoq isigalugu aningaasaqarnikkut iluaqutissat peqqussutikkut nalimmassarneqassapput. Iluaqutissanut taakkununnga pingaartumik ilaavoq peqqussummut maanna atuuttumut sanilliullugu inissianut sipaarutit annertusinerat aammalu nammineq akiliutissat annikillinerat.

Ataatsimiititaliap isumaliutai

Siunnersuut siullermeerneqarmat siunnersuummi siunertarineqarut piviusunngortinneqarnissaat ataatsimut isigalugu partiinit tapersersorneqartoq ataatsimiititaliamit maluginiarneqarpoq.

Peqqussutissatut siunnersuummi piginneqataasut sanaartornermut namminneq akiliutaasa 5 %-inut appartinneqarnerannik kiisalu Namminersornerullutik Oqartussat kommunillu tamarmik immikkut aningaasalersuinerata 25 %-imik appartinneqarnerannik maleruagassanik aalajangersaasunik Naalakkersuisut atuutsitsilernerat siumut isiginnilluarnertut ataatsimiititaliamit isigineqarpoq. Pisortat aningaasalersuinerisa appartinneqarnerat ataatsimiititaliamit ima paasineqarpoq kreditforeningip nunatsinni inissianik niuernermut suli – annertunerusumillu – aningaasalersuerusussuteqartutut Naalakkersuisunit isigineqartut.

Inissiamit attartortakkamiit piginneqatigiilluni inissiaatileqatigiinnut taassumalu kingorna piginneqatigiilluni inissiaatileqatigiiffik atorunnaarteriarlugu inissiatut nammineq pigisatut allanngortitsinissaq siunertaralugu siunnersuummi aningaasatigut atortoqanngitsoq Ataatsimiititaliap eqqumaffigaa. Inissiat attartortakkat inissisimanertik paarilluagaanertilluunniit pissutigalugu pilerinartutut tunineqarpata, pisortat teknikkikkut aningaasatigullu akigititaasigut aningaasanik inissiat taama ittut annaasaqaatigisinnaavaat. Taamaattumik inissianik pilerinartunik attartortut iluanaarniarnissaminnut ilusaatigut periarfissaqarsinnaapput. Ataatsimiititalialli naliliineratigut naluneqanngimmat nunatsinni inissiat amerlanerpaat aserfallatsaalineqannginneri iluanaarutiginiarneqarsinnaanngimmata Ataatsimiititaliaq suliami matumani annertunerusumik iliuuseqalersaanngilaq.

Taamatuttaaq ataatsimiititaliap naammagisimaarlugu maluginiarpaa attartortut inissiaminnik attartukkaminnik piginneqatigiilluni inissianngortitsinissaminnik kissaateqanngitsunik peqqussutissatut siunnersuutikkut naleqquttumik naammaginartumillu ikinnerussuteqarnikkut illersorneqarnerat Naalakkersuisunit qulakkeerneqarmat. Aammattaaq peqqussutissatut siunnersuummi siunnersuutigineqarpoq entreprenøri namminersortoq piginneqatigiilluni inissianik nutaanik sanaartorsinnaasoq, tamatumalu kingorna tunisaqarnermigut sanaartussanik nutaanik taakkuninnga piginneqatigiilluni inissiaatillit peqatigiiffiinut tunniusisinnaasoq. Kommunit Naalakkersuisullu sanaartortitsisutut inissisimanissaminnut peqqussutissatut siunnersuutikkut periarfissinneqarmata ataatsimiititaliap maluginiarpaa. Suliniutit taamaattut ataatsimiititaliamit tapersersorneqarput.

Piginneqatigiilluni inissialiortiternermut peqataarusulersinneqarnissaat taamaallillunilu nunatsinni inissiamik pilersuinerup annertusarneqarnissaa siunertaralugit sanaartortitsisut namminersortut aaqqissuussineq iluaqutissaqartutut isigissagaat ataatsimiititaliap neriutigaa.

Piginneqatigiilluni ineqarnermut tunngasuni maannamut ineriartornermut ikorfartuutaallunilu nukittorsaasutut siunnersuut ataatsimiititaliamit isigineqarpoq.

Siunnersuummik aappaassaaneerinninnermi oqaaseqaateqarfigeqquneqartunik ataasiakkaanik immikkut Naalakkersuisut oqaaseqaateqaqqussallugit Inuit Ataqatigiinnit ilaasortaatitap tunngavissaqarsoraa.

§ 12 malillugu piumasaqaataavoq kommunalbestyreli taarsigassarsisitsinissamik neriorsuuteqassasoq. Siunertamut aningaasanik naammattunik kommunit ataasiakkaat ilaat peqanngippata susoqassava? Peqatigiiffinnut taarsigassarsisitseqqinnissaminnut Namminersornerullutik Oqartussat piumappat?

Aaqqissuussineq nutaaq pisoqarluunniit Tuapannguani sanaartukkamut atorneqarniarnersoq kiisalu attartuusimasunut attartortinniarlugit piginneqataassutit ilaannik Namminersornerullutik Oqartussat pigisaqarnialersaarnerut paasissutissiissutigeqquneqarpoq. Matumani pingaartumik pissakinnerusut, soorlu angajoqqaat kisermaat utoqqalinersiutillillu eqqarsaatigineqarput.

Ataatsimiititaliap inassutaa

Siuliani oqaatigineqartut paaseqqullugit siunnersuut akuersissutigineqassasoq ataatsimiititaliamit isumaqatigiittumit inassutigineqarpoq.

Taama oqaaseqarluni siunnersuut Inatsisartunut ataatsimiititaliap matumuuna aappassaaniigassanngortippaa.

 

	Jonathan Motzfeldt, Siulittaasuugallartoq
Knud Kristiansen		Vittus Mikaelsen
Marie Fleischer		Agathe Fontain