1. marts 2008

UPA 2008/17 UKA 2007/62

 

Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaata nr. 2, 31. maj 1999-imeersup allanngortinneqarnera pillugu Inatsisartut peqqussutissaattut siunnersuut

pillugu

Inatsisartut Inuussutissarsiornermut Ataatsimiititaliaata

ISUMALIUTISSIISSUTAA

Siunnersuutip aappassaaneerneqarnerani saqqummiunneqartoq

Inatsisartut Inuussutissarsiornermut Ataatsimiititaliaat suliarinninnermini ukuninnga inuttaqarpoq:

Inatsisartunut ilaasortaq Jonathan Motzfeldt, (S) Siulittaasoq
Inatsisartunut ilaasortaq Thomas Kristensen, Atassut (A)
Inatsisartunut ilaasortaq Esmar Bergstrøm, (IA)
Inatsisartunut ilaasortaq Ole Thorleifsen, (S)
Inatsisartunut ilaasortaq Jens B. Frederiksen, (D)

UKA 2007-imi siunnersuummik siullermeerineq tunngavigalugu Inatsisartut peqqussutissaattut siunnersuut matumani pineqartoq Inatsisartut Inuussutissarsiornermut Ataatsimiititaliaata misissorpaa.

Siunnersuutip imarisai

Pikkorissaanissamik neqerooruteqarnerit pisariaqartitsinermik tunngaveqartinnerulernissaat siunertaralugu nunatsinni inuussutissarsiutinut ilinniarfiit avataanni inuussutissarsiutinut ilinniartitaanermut tunngasuni pikkorissarnernut allanit neqeroorutigineqartunut tapiissuteqarnissamut periarfissat annertusineqarnissaat peqqussutissatut siunnersuutikkut pingaarnertut anguniagaavoq.

Inuussutissarsiutinut ilinniartitaanermut tunngasuni pikkorissartitsinernut atatillugu tapiissuteqarnissamut inatsisitigut tunngavissap annertusineqarneranik, tassunga ilanngullugu praktikkernermi akissarsiaqartitsinermut maleruagassanik kiisalu suliassaqarfiit allanngortinneqarnerisa kingunerisaannik erseqqissaatinik siunnersuut imaqarpoq.

Pikkorissartitsinernut aningaasat qanorpiaq atugassanngortinneqarnissaat nalunaarutitut ilusilerlugu maleruagassiorneqassaaq, tassungalu atatillugu 2007-imut 2008-mullu aningaasanut inatsisini ani-ngaasaliinermi tunngavigineqartunut naapertuuttumik pikkorissarnernut pineqartunut tapiissutit agguarneqarnerannut maleruagassiisumik nalunaarusiortoqarnissaa Naalakkersuisunit kissaatigineqarsimavoq, taamaalilluni pikkorissarnernut inuussutissarsiutinut ilinniarfiit saniatigut allanit neqeroorutigineqartunut aamma tapiissuteqartoqarsinnaaqqullugu.

Tassunga atatillugu pikkorissarnernut inuussutissarsiutinut ilinniarfiit saniatigut allanit neqeroorutigineqartunut tapiissuteqarnissamut aningaasanut inatsimmi aningaasaliinermi tunngavigineqartut malillugit periarfissiisoqareerpoq.

Taamaattorli inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaata atuuttup oqaasertaliornerata kingunerisaanik taama nalunaarusiornissaq ullumikkut periarfissaanngitsoq paasineqarsimavoq. Allatut oqaatigalugu 2007-imut 2008-mullu aningaasanut inatsisini aningaasaliinermi tunngavigineqartuni oqaasertat aammalu suliassaqarfimmut tamatumunnga inatsisartut peqqussutaanni atuuttumi oqaasertat imminnut naapertuussorinanngillat.

Tamanna tunngavigalugu maleruagassat aningaasanut inatsimmi suliassaqarfik pillugu aalajangersakkanut sapinngisamik piaartumik naapertuuttunngortinneqarnissaat siunertaralugu UKA 07-imi tunniussivissaq qaangiutereersoq oqaluuserisassanngortitsinikkut siunnersuutip matumani pineqartup saqqummiunneqarnissaa Naalakkersuisut tulluartissimavaat, taamaalilluni ilinniartitaanikkut, piginnaanngorsarnikkut pikkorissartitsinikkullu pissutsit nalinginnaasumik tulleriaarlugit pingaarnersiorneqarnerannut atatillugu suliniutigilersaakkat 1. januar 2008-mi aallartinneqareersinnaaqqullugit. Aappassaaneerinissap UPA 08-mut kinguartinneqarnera pissutigalugu siunnersuutip atuutsinneqalernissaa soorunami kinguartinneqarpoq.

Piginnaasat ineriartortinnissaat pillugu Siunnersuisoqatigiinnit inassuteqaatit ilaatigut tunngavigalugit pikkorissartitsinernut aningaasat atugassanngortinneqassapput, tamatumani siunnersuisoqatigiit inassuteqaataat pikkorissartitsinernut inuussutissarsiutinut ilinniarfinnit neqeroorutigineqartunuinnaq taamaalillutik tunngatinneqassanatik.

Kiisalu susassaqartunik peqataatinneqartunik tamanik naammaginartumik tusarniaanissamik pisariaqartitsinerup nassatarisaanik siunnersuut UKA 07-imi tunniussivissaq qaangiutereersoq oqaluuserisassanngortinneqartariaqarsimasoq Naalakkersuisut oqaatigaat, tak. Inatsisartut siullermeerinerat pillugu immikkoortoq.

Tusarniaaneq

Siunnersuutip Inatsisartunut nassiunneqarnerani tusarniaanermit akissutit amigaatigineqarnerat pillugu Inuussutissarsiornermut Ataatsimiititaliap uparuaaneranut atatillugu inatsisissatut siunnersuutip tunniussivissaq qaangiutereersoq oqaluuserisassanngortinneqarnerani piumasaqaataasut malinneqarsimannginnerat Naalakkersuisunit ajuusaarutigineqarpoq, tamatumalu kingorna tusarniaanermit akissutit amigaatigineqartut Naalakkersuisunit ataatsimiititaliamut nassiunneqarlutik.

Siunnersuutip Inatsisartunit aappassaaneerneqarnissaa sioqqullugu tusarniaaffigineqaqqaartunit amerlanerusunut siunnersuutip tusarniaassutigalugu nassiunneqarnissaa Inuussutissarsiornermut Ataatsimiititaliamit kissaatigineqarpoq.

Siunnersuut pillugu tusarniaaffigineqaqqaartunik naammagisimaarinninnerminnut nassuiaat kingulianiittoq Naalakkersuisut ataatsimiititaliamut nassiuppaat:

"Pissutsit qanoq innerat aallaavigigaanni immikkoortumi siullermi oqaatigineqareersutut, suliassami uani inatsisitigut aaqqiissuteqartoqarnissaanik pisariaqartitsineq pissutigalugu, Naalakkersuisut pingaarnertut nalilerpaat tusarniaaneq ingerlanneqarsimasoq isumannaatsumik pisimasoq.

Ataatsimiititaliamit oqaatigineqartutut tusarniagassaagaluit tusarniarneqanngitsoorsimasut pillugit, pingaaruteqarpoq erseqqissaatigissallugu inuussutissarsiutinut ilinniartitaanermi tapiissuteqartarneq pineqarmat, tamannalu soorunami inuussutissarsiutinut ilinniartitaanermi inuussutissarsiutinullu pikkorissartitsisarnermut tunngatillugu inatsisartut peqqussutaat tunngavigalugu aningaasanullu inatsit naapertorlugu suliaammata.

Kikkut tusarniarneqartariaqarnersut pillugu nalilersuinermi, oqaatigineqareersutut inatsisitigut tunngaviusut pikkorissartitsinerni pineqartuni kikkut tapiiffigineqarsinnaanerannik tunngaveqartinneqarpoq. Allatut oqaatigalugu inuussutissarsiutinut ilinniartitaanermi inuussutissarsiutinullu pikkorissartitsisarnerni peqqussummi pineqartut, aammalu Inatsisartut sulisoqarnermut akitsuummik inatsisaat tapiissutissat akilersortinneqarneranni inatsisitigut tunngavigineqartut, inatsisip § 2-a naapertorlugu, inuussutissarsiutinut ilinniartitaanermut attuumassuteqartuni taamaallaat tapiissuteqartoqarsinnaasoq, taamaattumillu ilinniartitsisut perorsaasullu pikkorissartinneqarnerinut tapiissutit soorunami inatsisini tunngaviusut avataaniittut, tamatumalu kingunerisaanik assersuutigalugu IMAK tusarniaanermi ilaatinneqanngitsoq, soorluli aamma Ilinniagartuut Kalaallit Nunaanni Kattuffiat (ASG) taamatut inissisimasoq, tassami taakkua allallumi inuussutissarsiutinut ilinniartitaanerit avataaniittuusut. Kingulliullugit taaneqartunut tunngatillugu ilanngunneqassaaq gruppit pineqartut pikkorissartitsinernut tunngatillugu tapiiffigineqarnissamut allanik periarfissaqarmata.

Tassungalu atatillugu oqaatigineqassaaq siunnersuutip siullermeerneqarneranut atatillugu Inatsisartunut ilaasortat ilaata oqaatigimmagu pikkorissaanissamut aningaasaliissutit ilinniagalinnut amerlanerusunut iluaqutissanngortinneqartariaqaraluartut, assersuutigalugu socialrådgiverinut socialpædagoginullu, tamanna inatsimmi tunngaviusunik paatsuuinermik tunngaveqarsimassaaq, soorluli soqutigisaqaqatigiit pineqartut aningaasanut inatsimmi isumagineqareersimasut, tassami kontomi pingaarnermi 30.01.03.-mi Pikkorissartitsinerit ilinniaqqinnerlu isumaginninnerup iluani 9,5 mio. kr.-it immikkoortinneqarsimammata.

Ilanngullugulu eqqaasitsisutigineqassaaq, pikkorissartitsinernut tapiissuteqartarnissamik nalilersuinerit aallaaveqarmata siullermik nioqqutsisiornermi suliffeqartunut ilaatigullu kiffartuussinermi suliffeqartunut pikkorissartitsinernut sammitinneqassasut. Tassungalu atatillugu qitiulluinnarpoq inuussutissarsiortut siuliani pineqartut immikkut navianartorsiortuusut, suliffeqarnermi piumasarineqartunik naammassinninniarnissaminnut, tamannalu assersuutigalugu ilinniartitsisunut perorsaasunullu atuutinngitsutut nalilerneqartariaqartoq, tassunga ilaallutik inuussutissarsiortut allat inuussutissarsiutinut ilinniartitaanerup avataani inissisimasut, atuagarsornermik aallaaveqartunik annertunerusumik ilinniagaqartuusut.

Kingulliit sanilliunneqassapput Inatsisartut sulisoqarnermut akitsuummik inatsisaanut oqaaseqaatini allaaserineqartunut, tassanimi allaaserineqarmat suliffissaaleqisut nalunaarsorneqarneranni ersittoq inuit piffissani sivikinnerusuni sivisunerusuniluunniit suliffissaaleqinermik eqqorneqartartut tassaanerusut inuit ilinniagaqarsimanngitsut, imaluunniit piginnaanngorsaataasumik allamik ilinniagaqartut."

Taamaalillutillu Naalakkersuisut tamanna tunngavigalugu naliliipput tusarniaaneq naammaginartumik tunngaveqarluni ingerlanneqarsimasutut isigineqartariaqartoq, soorluttaaq eqqaamaneqartariaqartoq inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit inatsisartut peqqussutaata atuuttup allanngortinneqarnissaanut siunnersuuteqarnermi siunertarineqartoq tassaammat inuussutissarsiutinut ilinniartitaanernut tunngasuni tapiissutit pillugit maleruagassat aningaasanut inatsimmi aningaasaliinermi tunngavigineqartunut aammalu suliffeqarnermi akitsuut pillugu inatsisartut inatsissaanni agguaanissamut innersuussutinut naapertuuttunngortinneqarnissaat.

Tusarniaanermit akissutit imaattunik oqaaseqaateqarnissamut tunngavissaqalersitsipput:

Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit inatsisartut peqqussutaat tunngavigalugu inuussutissarsiutinut tunngasuni oqartussaasut susassaqartut Naalakkersuisunit tusarniarneqarsimasut Inuussutissarsiornermut Ataatsimiititaliamit maluginiarneqarpoq. Soorluttaaq ataatsimoortukkuutaat allat, soorlu ilinniartitsisut isumaginninnermilu perorsaasut suliassaqarfimmut tassunga ilaatinneqanngitsut ataatsimiititaliamit maluginiarneqartoq. Taamaattumik ataatsimoortukkuutaat taakku tusarniaanermi ilaatinneqarsimanngillat.

Tamanna tunngavigalugu nutaamik tusarniaanissaq Naalakkersuisut tunngavissaqarsorisimanngilaat.

Tamanna ataatsimiititaliamit tusaatissatut tiguneqarpoq.

Tassunga atatillugu ataatsimiititaliamit erseqqissaatigineqassaaq peqqussummik naleqqussaanerup pingaarnertut saneqqunneqarsinnaanngitsutullu nassatarimmagu susassaqartut tamarmiusut inatsimmi assigiimmik pineqarnerat, tamatumani apeqqutaatinneqarnani immikkoortukkuutaat ilaat isumaqatigiissutit suliffeqarnermiluunniit isumaqatigiissutit allat aqqutigalugit allanik periarfissaqarnersut.

UKA 07-imi Inatsisartut siullermeerinerat

Siunnersuut Inuussutissarsiornermut Ataatsimiititaliami suliarineqartussatut Inatsisartunit innersuussutigineqarpoq.

Tunniussivissaq qaangiutereersoq immikkoortoq Inatsisartunut oqaluuserisassanngortinneqarpoq ullorlu 19. oktober 2007-imi ullunik marluinnarnik periarfissinneqarluni siullermeerneqarluni. Taamatut atugassaqartitsilluni inatsisissatut siunnersuutip isumannaatsumik suliarineqarnissaa partiit oqaaseqartartuinit piareersarneqarsinnaanngitsoq erseqqimmat immikkoortup siullermeerneqarnerani periaaseq sakkortuumik uparuarneqarpoq.

Siullermeerinermi makku pissutissaqarluartumik uparuarneqarput:

• Siunnersuut inuiaqatigiinnut annertoorujussuarmik kinguneqassasoq, tassunga ilanngullugit illuatungeriinnut susassaqartunut kinguneqassasoq,
• Siunnersuutip akuersissutigineqannginnerani allannguutissatut siunnersuuteqarnissaq taamatullu tusarniaaneq sukumiinerusoq pisariaqartinneqarsinnaasut, aammalu
• Taamatut periaaaseqarnikkut siunnersuutip kingunerisassaanik sukumiisumik misissuinissamut Inatsisartut periarfissakilliortorujussuussasut, taamaalillutillu illuatungeriinnik susassaqartunik tusarniaanissamut aamma piffissakilliortorujussuussasut.

Tamakku saniatigut Inuussutissarsiornermut Ataatsimiititaliap makku oqaatigisinnaavai:

• Tunniussivissaq qaangiutereersoq oqaluuserisassanngortitsinissamut ullormullu oqaluuserisassani immikkoortup taassuma nukingiullugu suliarineqarnissaanut tunngavissanik qularnaatsunik paasissutissiisoqarsimanngitsoq,
• Siunnersuutip imarisai naalakkersuinikkut isumaqatigineqanngitsut siullermeerinermi ersarissisoq, tamatumanilu inatsisissatut siunnersuut nukingiullugu suliarineqartussatut naleqqutinngitsoq erserseqqissarneqaqqilluni,
• Tusarniaanermi atortut inatsisissatut siunnersuummut nalunaarutigineqartumut ilanngullugit tunniutissallugit Naalakkersuisut pisussaaffigisaat pigineqanngitsut, taamaattumillu ullormut oqaluuserisassani immikkoortup naalakkersuinikkut suliarineqarnissaanut tunngavissaq pingaarutilik amigaatigineqartoq,
• Piffissaq tusarniaaffiusoq paasissutissiissutigineqarsimanngitsoq, tamatumalu angusanik tusarniaanerullu ingerlanneqarsimasup nalinganik naliliinissaq piuminaallisinnerullugu,
• Tusarniaaffigissallugit piukkunnaatillit, soorlu SPS, PPK, PIP aamma IMAK tusarniaaffigineqarsimanngitsut, soorluttaaq tamanna siullermeerinermi aamma uparuarneqartoq. Aammattaaq Peqqissutsimut Pisortaqarfik peqqinnissakkut sulisut ilinniartitaanikkut inissisimanerannut pingaarnertut akisussaasuusoq pinnagu Peqqissutsimut Ilinniarfiup tusarniarneqarnissaanut Naalakkersuisut pissutissaqarsimanerat eqqumiiginarsinnaasoq, aammalu
• Ataatsimiititaliami peqqissaartumik piviusorsiortumillu suliaqartoqarnissaa assigiinngitsut tunngaannit, tassunga ilanngullugu Inuussutissarsiornermut, Suliffeqarnermut Inuussutissarsiutinullu Ilinniartitaanernut Naalakkersuisumit ujartorneqartoq.

Tamanna tunngavigalugu siunnersuutip aappassaaneerneqarnissaata UPA 2008-mut kinguartinneqarnissaa Inuussutissarsiornermut Ataatsimiititaliamit qinnutigineqarpoq.

Inuussutissarsiornermut Ataatsimiititaliap siunnersuummik suliarinninnera

Aappassaaneerinissaq sioqqullugu Naalakkersuisunut ilaasortamut ilassutitut paasissutissat Inuussutissarsiornermut Ataatsimiititaliap qinnutigai.

Siunnersuutip Inatsisartuni suliarineqarnissaa sioqqullugu sooq taama sivikitsigisumik piffissaqartitsilluni nalunaaruteqartoqarsimanersoq nassuiaatigeqqullugu Naalakkersuisunut ilaasortaq Inuussutissarsiornermut Ataatsimiititaliamit qinnuigineqarpoq. Soorluttaaq tusarniaanermit akissutit amigaatigineqartut siunnersuummut ilanngunneqanngitsut ataatsimiititaliamit uparuarneqarsimasut. Inatsisissatut peqqussutissatullu siunnersuutinik nalunaarutiginninnermi periusissatut piumasaqaatinut tamanna naapertuutinngimmat ataatsimiititaliap Naalakkersuisunut eqqaasitsissutigissavaa.

Siunnersuutip Inatsisartunit suliarineqannginnerani nalunaarutiginissaanut sivikitsuararsuarmik piffissaqartitsinermut aammalu nukingiussamik suliarineqarnissaanik qinnuteqarnermut pissutaasut sukumiinerusumik nassuiaqquneqarnerannut atatillugu Naalakkersuisut ataatsimiititaliamut akissumminni ima allapput:

"Tassunga atatillugu eqqaasitsisutigineqassaaq, Inatsisartut sulisoqarnermi akitsuummik inatsisaat nr. 10, 2. november 2006 aqqutigalugu Sulisoqarnermut akitsuummik 1. januar ukioq manna atortussanngortitsinerannut atatillugu atorunnaarsinneqarmat piffissaq taanna tikillugu suliassaqarfimmi inatsisitigut tunngaviusimasoq inuussutissarsiutitigut ilinniartitaanermut sulisitsisut akiliutaat pillugit Inatsisartut inatsisaat nr. 16., 23. november 1989-imeersoq.

Inatsisartullu siunertarisimagunarpaat, Inatsisartut inatsisaannut nassuiaatitut oqaasertani allanneqarsimasutut, sulisoqarnermut akitsuut pillugu inatsisip Inuussutissarsiutinut Ilinniarfiit (Brancheskoler) kisimik pinnatik aammali allat pikkorissaanernik pisortanit tapiiffigineqartunik ingerlatsisartut pikkorissaanernik neqerooruteqarsinnaatinneqassasut, tassami oqaaseqaatini nassuiaataasuni eqqaaneqareersutut allassimammat "…pikkorissaanernut aningaasaliissutit pisariaqartitsineq ingerlatsinerlu naapertorlugit aqunneqassapput, ilaatigut Piginnaasat ineriartortinnissaat pillugit siunnersuisoqatigiit, aammalu Inuussutissarsiutinut Ilinniarfiit brancheudvalg-iillu inassuteqartarnerat tunngavigalugit. Kisiannili siunnersuinermut ilitsersuinermullu qitiusunik ingerlatsivinngortussani aamma…."

Pikkorissaanernut tapiissuteqartarnermi inatsisitigut periarfissiinerup annnertusineqarnera aamma aningaasanut inatsisip Inatsisartunit akuersissutigineqarnerani aalajangersarneqartunut naapertuuppoq. Kisiannili aamma ukioq manna siusinnerusukkut Inatsisilerinermut allaffimmiit aammalu Akileraartarnermut Pisortaqarfimmiit sulisoqarnermut akitsuummik atortitsinermi pisortaqarfiusumiit ilisimatitsisutigineqarpoq, inatsit pineqartoq pikkorissartitsinissanut aningaasaliissutinik akuersissuteqartarnermi tunngavigineqarsinnaanngitsoq, inatsit pineqartoq akiliuteqartitsisarnermut inatsisaammat, taamaattumillu pikkorissaanermi aningaasaliissutinik akiliuteqarnermi tunngavigineqarsinnaanani, aamma inatsisip nassuiaataani § 2-anilu nalunaarneqarsimagaluartoq aningaasat inuussutissarsiutitigut ilinniartitaanermi pikkorissartitsisarnernut piginnaanngorsaanernullu atorneqartussaasut. Pissutsillu taamaannerat aatsaat 2007-ip upernaavani ersarissisimavoq..

Inuussutissarsiutinut ilinniagaqarnermut sulisitsisut akiliutaat pillugu Inatsisartut inatsisaata oqaatigineqareersutut atorunnaarsinneqarnerata kingunerisaanik, "akiliisarnermi" inatsisaasup, inatsit atortussalerinermut taamaallaat inatsisaasutut taaneqarsinnaavoq, inatsisartut peqqussutaat inuussutissarsiutitigut ilinniartitaanernut aamma inuussutissarsiutitigut pikkorissartitsisarnerni aningaasaliussanik tunniussisarnermut taamaallaat atorneqarsinnaalerpoq.

Inatsisartut peqqussutaat taanna taamaattoq tapiissutinik tunniussisarnissamut periarfissaqartitsinngilaq, inuussutissarsiutitigut ilinniagaqarnermut sulisitsisut akiliutaat pillugit Inatsisartut inatsisaanni periarfissaatinneqartutut, aningaasanullu inatsimmi aningaasaliissuteqarnermi periarfissaatinneqartutut, tassami pikkorissaanerit akuersissutigineqarsimasut annertunerpaatigut Inuussutissarsiutinut Ilinniarfinni ingerlanneqartussaammata. Taamaattoq Inatsisartut peqqussutaanni periarfissaqartitsisoqarpoq malittarisassamik pineqartumik saneqqutsinissamut, peqqussummi § 51 naapertorlugu misileraalluni ingerlatsisoqartillugu. Pineqartoq kingulleq tunuliaqutaralugu ukioq manna siusinnerusukkut nalunaarusiortoqarpoq, imarisamigut annertunerpaatigut inatsisartut peqqussutissaattut siunnersuummut imarisamigut assingulluinnartumik, inatsisartut peqqussutissaattut siunnersuummik inuussutissarsiutinut ilinniartitaanermi inuussutissarsiutinullu pikkorissartitsisarnerni inatsisartut peqqussutaata allanngortinneqarnissaanik siunnersuutaasumik, aningaasanut inatsimmi aningaasaliissuteqarnermi tunngavigineqartut naapertorlugit tapiissuteqartarnermut maleruagassat aaqqinneqarnissaat siunertaralugu, aammalu ilinniagaqarnermut sulisitsisut akiliutaat pillugu inatsisartut inatsisaannut naapertuuttunngortinniarlugu.

Ukioq manna siusinnerusukkut nalunaarut tusarniaassutigineqareermat Inatsisilerinermut allaffimmut nassiunneqarpoq, tassanngaanniillu nalunaarutigineqarpoq Inatsisartut peqqussutaanni § 51 atorneqarsinnaanngitsoq nalunaarusiornermut tunngavigissallugu, nalunaarusiami siunertarineqarmat tapiissuteqartarnerup aqunneqarnissaa, aningaasanut inatsimmi aningaasaliissuteqarnermi tunngavigineqartut sulisitsisullu suliffeqarnermi akiliutaat pillugit inatsit tunngavigalugu, misileraanertut isigineqarsinnaanngitsumik, aaqqissuussinertulli ataavartutut. Pissutsit taamaalipput, naak siunertaasimagaluartoq kingornatigut inatsimmut allannguutissatut siunnersuusiornissaq, Inatsisartunut saqqummiunneqartussamik, siunnersuummut piffissaliussat naapertorlugit tunniussisimanissamik tunngaveqarluni."

Aammattaaq Naalakkersuisut allapput

"Tamatuma kingunerisaanik nalilerneqarpoq sukkkanerpaamik pikkorissaanernut aningaasaliissuteqartoqartillugu inatsisitigut toqqammavissaasunik maleruagassiortoqartariaqartoq, tassuuna pikkorissaanernut aningaasaliissutit aqunneqarnissaat aqqutissiuunniarlugu, sulisoqarnermut akitsuut pillugu inatsimmi aningaasanullu inatsimmi aningaasaliissutinut tunngaviusut naapertuuttunngortinneqarniassammata, tamannalu Naalakkersuisut anguniarsimavaat siunnersuutip matuma saqqummiunneqarneratigut. Taamaattumillu ajornarsimavoq nalinginnaasumik piffissaliussat malinneqarnissaat."

Inatsimmik naapertuuppallaanngitsumik suliarinnissimaneq Inuussutissarsiornermut Ataatsimiititaliap immikkoortumik suliarinninnermini maluginiarpaa. Inatsisit nutaat ingerlaavartumik malitseqartinneqartarnissaat qulakkeerneqarsimasorinanngilaq. Inatsisinik suliarinninnerit siunissami sukaterneqassasut ataatsimiititaliamit kaammatuutigineqassaaq, taamaalilluni inatsisip sapinngisamik pitsaanerpaamik tunngaveqarnissaa piffissaagallartillugu peqqissaartumik qulakkeerneqarsinnaaqqullugu. Inatsisitigut tunngavissat pisariaqartut inatsisip siunertarisaata eqquutsinneqarnissaanik qulakkeerisussat Aningaasanut inatsisip akuersissutigineqarnerani qulakkeereerneqartannginnerat akuersaarneqarsinnaanngilaq.

Aammattaaq sulisoqarnermut akitsuutip imarisaa siunertarisaalu siammasippallaartumik oqaasertaliorneqarsimasut ataatsimiititaliaq isumaqarpoq, taamaattumillu inuussutissarsiutinut ilinniartitaanernut tapiissutinut atatillugu neqerooruteqartartussat taakkuninngalu tigusisartut peqqussutip imarisaani erseqqinnerusumik killiliivigineqarnerat taamaaqataanik ersernerluppoq.

Tamatuma Naalakkersuisut peqqussutissatut siunnersuutitut saqqummiussaannut allannguutissatut siunnersuummik saqqummiussinermigut aaqqiivigineqarnissaa ataatsimiititaliap kissaatigaa. Allannguutissatut siunnersuummik saqqummiussinermigut peqqussutip erseqqinerulernissaata aammalu inuussutissarsiutinut ilinniartitaanerni pikkorissarnernut sapinngisamik annertunerpaamik sammitinneqarnissaata qulakkeerneqarnissaat ataatsimiititaliap kissaatigaa. Pikkorissartut ataasiakkaat piginnaasaqarnerulernerannik pikkorissarnermi peqataanerup kinguneqarnissaa ataatsimiititaliamit kissaatigineqarpoq.

Piffissaq atuutsitsilerfiusussaq

Naalakkersuisut siunnersuutannik maannangaaq akuersissutiginninneq Inatsisartut peqqussutaata ki-ngoortumik atuutilerneranik kinguneqassaaq. Piffissap atuutsitsilerfiusussap allanngortinneqarnissaa siunertaralugu pingajussaaneerinissamut allannguutissatut siunnersuummik Naalakkersuisut saqqummiussisariaqarnersut isumaliuutigeqqullugu Naalakkersuisut ataatsimiititaliamit kaammattorneqarput.

Inassuteqaat

Tamanna tunngavigalugu siunnersuutip Inatsisartunit akuersissutigineqarnissaa Inuussutissarsiornermut Ataatsimiititaliap isumaqatigiittup inassutigaa.

Taamatut oqaaseqarluni Inatsisartut Inuussutissarsiornermut Ataatsimiititaliaata siunnersuut aappassaaniigassanngortippaa.

 

	Jonathan Motzfeldt Siulittaasoq
Thomas Kristensen		Ole Thorleifsen
Esmar Bergstrøm		Jens B. Frederiksen