25. januar 2008 16.10.2007

UPA 2008/17 UKA 2007/62

 

Peqqussutissatut siunnersuummut oqaaseqaatit

Nalinginnaasumik ataatsimut oqaaseqaatit

1. Peqqussutissatut siunnersuuteqarnerup tunuliaqutaa

Siunnersuummi pingaartinneqarpoq suliffeqarnermi susassaqartut maannamiit annertunerusumik inuussutissarsiutinut ilinniartitaanerup suliassaqarfiini sunniuteqartinneqalernissaat, siammasinnerusumik pisariaqartitsinerlu tunngaviginerullugu suliniutit aaqqissuunneqarnissaat siunertaralugu. Taamatut tunngaveqarluni siunnersuutigineqarpoq inuussutissarsiutinut ilinniartitaanerup suliassaqarfiini pikkorissaanernut brancheskole-it avataanni maannamiit annertunerusumik tapiissuteqartalersinnaaneq. Pikkorissaanissanut aningaasaliissutit atugassanngortinneqartarnerat ilaatigut Piginnaasat ineriartortinnissaat pillugu siunnersuisoqatigiinnit inassuteqaatit tunngavigalugit pisarpoq. Kiisalu siunnersuut aamma siunertaqarpoq peqqussummi aalajangersakkat aningaasanut inatsimmi aalajangersakkanut naapertuuttunngorsaanissamik.

Ilutigitillugulu maleruagassani atuuttuni naleqqussartariaqalersimasut ataasiakkaat periarfissaq iluatsillugu iluarsineqarput, ilaatigut inuussutissarsiutinut ilinniartitaanermi suliassaqarfiit allannguuteqarsimanerisa kingunerisaannik.

2. Peqqussutissatut siunnersuummi qulequttat pingaarnerit

a) Inatsisit atuuttut

Inatsisartut peqqussutaata taaguutaa kiisalu kapitalit 8-aanni qulequtaq "inuussutissarsiutinut ilinniartitaanermi pikkorissaanerit" atorneqarpoq.

Tamatumalu saniatigut arlalitsigut allassimavoq, ilaatigut maanna atuuttumi Inatsisartut inuussutissarsiutinut ilinniartitaaneq aamma inuussutissarsiutinut pikkorissartitsisarnerit pillugit peqqussutip § 11-imi allassimavoq inuussutissarsiutinut ilinniartitaanerit isumagineqassasut Kulturimut, Ilinniartitaanermut Ilisimatusarnermullu Pisortaqarfimmiit, soorluttaaq § 3-mi innersuussisoqartoq Kulturimut, Ilinniartitaanermut Ilisimatusarnermullu Naalakkersuisumut.

Aammattaaq Inatsisartut peqqussutaanni § 22, imm. 1 aamma 2-mi ersippoq, suliassaqarfimmi akisussaasut aalajangersaavigisassagaat siunnersuutit, ilinniagassat tunngaviusut, fag-it suliassaqarfiit, fag-it immikkut ittut fag-illu immikkut toqqarneqarsinnaasut ilinniakkanut ataasiakkaanut atuuttut, kisiannili erseqqissarneqarsimanani akuersissuteqartarneq aamma ilinniagassanut pilersaarutinut ataatsimut atuuttuusoq.

Kiisalu Inatsisartut peqqussutaata § 47, imm. 2-ani aalajangersarneqarpoq pikkorissaanerit tapiissuteqarfigineqarsinnaasut Inuussutissarsiutinut ilinniarfinnit ingerlanneqartussaasut, peqqussummullu oqaaseqaatini allassimasut naapertorlugit tamanna paasineqartussaalluni pikkorissaanerit taamaallaat Inuussutissarsiutinut Ilinniarfinnit ingerlanneqarsinnaasutut. § 47 imm. 3 naapertorlugu pikkorissaanernut allanit ingerlanneqartunut taamaallaat tapiissuteqartoqarsinnaavoq pikkorissaasartut allat ingerlataannut inuit ataasiakkaat peqataanerat pineqarpat, pikkorissaanerillu misileraalluni ingerlatsinerit kisiisa eqqarsaatigalugit. Taapiissuteqarfigineqarsinnaasutut siunnerfiusut eqqarsaatigalugit § 47 imm. 1-imi nalunaarneqarpoq tapiissuteqartarneq suliamik ilinniagaqarsimasut suliamillu ilinniagaqarsimanngitsut, tassungalu ilanngullugit suliffissaaleqisut pineqartut, kisiannili ersarissumik nalunaarneqarsimanani assersuutigalugu namminersortutut inuussutissarsiuteqartut suliassaqarfinni aalajangersimasuni, immikkut piorsaaviginiarneqartuni, soorluttaaq peqqussummi ersarissumik nalunaarneqanngitsoq sullitassatut siunnerfigisat ilinniagaqarsimassusiat qanoq ittuusariaqarnersoq.

b) Siunnersuut

Oqariaatsip "inuussutissarsiutinut ilinniartitaanermi pikkorissaanerit" allanngortinneqarnissaa imaalillugu " pikkorissarnerit inuussutissarsiutinut ilinniagaqarnermut tunngasut", siunertaqarpoq pikkorissaaneq suugaluarpalluunniit pikkorissaaneq suli inuussutissarsiuteqarnermut tunngasuussasoq.

Tamatumalu saniatigut erseqqissarneqarpoq pikkorissarnissanik akuersissuteqartarnermi ilinniartitaanermut pilersaarutit tamakkiisut pineqartut, fag-illu ataasiakkaaginnaat pineqanngitsut. Kiisalu siunnersuutigineqarpoq suliassaqarfinnik allanngortitsinerup kingunerisaanik tamakkiisumik assigiimmillu allannguinissat, soorluttaaq anguniarneqartoq inuussutissarsiutinut ilinniartitaanermi ilinniagaqartut sungiusaammik suliffeqarneranni akissarsiaqarnikkut ilinniagaqarnersiuteqarnikkullu atugassaqartitaanerat pillugu illersugaanerisa ersarissaavigineqarnissaat.

Siunnersuummi siunertaq pingaarneq tassaavoq pikkorissartitsinerni tapiissuteqartarnerup maleruagassiuunnissaa, branncheskole-it avataanni pikkorissaanerit neqeruutigineqarsinnaasut eqqarsaatigalugit, pikkorissaanerit brancheskole-nit neqeroorutigineqanngikkaangata, taamalu pikkorissaanissamik neqerooruteqarnerit pisariaqartitsinermik tunngaveqarnerusuutinniarneqarlutik, neqerooruteqarsinnaassutsimik tunngaveqaratik. Kisiannili suli pingaarnertut tunngaviusssaaq Inuussutissarsiornermi Ilinniarfinniit pikkorissaanerni pineqartuni qitiunerat. Pikkorissaanermik ingerlatsisartut eqqarsaatigineqarnerusut tassaapput Piareersarfiit, soorluttaaq pikkorissaasartut allat atorneqarsinnaasut. Tassungalu atatillugu pikkorissaanerit sumi ingerlanneqarsinnaanerannik killiliisoqanngilaq, kisiannili naatsorsuutigineqarluni nalinginnaasumik pikkorissaanerit Kalaallit Nunaanni ingerlanneqartassasut.

Tapiiffigineqartartunik pikkorissaanernik ingerlatsisarnerni siunertaasoq tassaavoq inuussutissarsiornermi sulisoqatigiiaat piukkunnarsarneqartuarnissaat, minnerunngitsumillu inuussutissarsiornermi sulisoqatigiiaat suliffeqarnermi piumasarineqartunik naammassinninniarnerminni ajornartorsiortutut isigineqarsinnaasut. Tassungalu atatillugu siunnersuutigineqarpoq pikkorissaanerit annerpaamik inuussutissarsiornermi ilinniartitaanerni suliamik ilinniagarsimasunut saaffiginnittuussasut. Fag-itigut ilinniagaqarsimassutsimi tunngaviusussat ersarinnerusumik nalunaarusiornermi maleruagassiuunneqarnissaat naatsorsuutigineqarpoq.

Namminersorlutik inuussutissarsiuteqartut eqqarsaatigalugit naatsorsuutaavoq tapiissuteqartoqarsinnaassasoq, namminersortunut assersuutigalugu inuussutissarsiutini ineriartortitsiviusussatut isigineqartuni kisimiilluni ingerlatsisuusunut, taakkua assersuutigalugu ilinniagaqarsimassutsimikkut annerusumik sivikitsumilli inuussutissarsiutinut ilinniartitaanerup iluani ilinniagaqarsimappata.

Naatsorsuutigineqarpoq nalunaarusiornermi aalajangersarneqassasoq, tapiissutit annertunerpaatigut angalanernut najugaqarnernullu aningaasartuutinut atorneqartassasut, kisiannili pikkorissarnermi aningaasartuutinut ullormusianullu pinnagit. Kisiannili ilanngullugu naatsorsuutigineqarpoq nalunaarummi aalajangersaasoqassasoq ullormusiaqartitsisoqarsinnaasoq pikkorissaasut tapiiffigineqarsinnaasunik pikkorissaanernik ingerlatsineranni, taakkunani ullormusiat sulisitsisunit aningaasartuutaasussaasarmata.

3. Pisortat ingerlatsineranni aningaasatigut allaffissornikkullu kingunerisassai

Peqqussutissatut siunnersuut aningaasartuuteqarneq eqqarsaatigalugu Namminersornerullutik Oqartussanut kommuninulluunniit kinguneqartussatut nalilerneqanngilaq.

4. Inuussutissarsiortut ingerlatsineranni aningaasarsiornikkut allaffissornikkullu kingunerisassai

Peqqussutissatut siunnersuut inuussutissarsiornermik ingerlataqartunut aningaasarsiornikkut allaffissornikkulluunniit kinguneqartussatut naatsorsuutigineqanngilaq. Naatsorsuutigineqartariaqassaarli sulisorisat inuussutissarsiutini ineriartortitassatut isigineqartuni pikkorissarnissaminnut ilinniaqqinnissaminnullu periarfissaginnerulissasut, pisariaqartitsinermik aqutsinerup pitsanngorsaavigineqarneratigut, pikkorissaanernilu taamatut ittuni tapiissuteqarnissamut periarfissaginnerulerneratigut.

5. Pinngortitamut avatangiisinullu sunniutissai

Peqqussutissatut siunnersuut pinngortitamut avatangiisinullu sunniuteqartussatut isigineqanngilaq.

6. Innuttaasunut allaffissornikkut sunniutissai

Peqqussutissatut siunnersuut innuttaasunut allaffissornikkut sunniuteqartussatut isigineqanngilaq.

7. Naalagaaffeqartigiinnermut namminersornermullu sunniutissai

Sulisorisat piginnaanngorsarneqarnerisa ingerlaavartut ilaattut suliniutit siunertaqarput avataaniit suliartortartut killilersimaarneqarnissaannik, namminersornermullu annerusumut ineriartornerup ilaatut isigineqassalluni.

8. Pisortaqarfinnut soqutigisaqaqatigiinnullu tusarniaaneq

Peqqussutissatut siunnersuut tusarniaassutigineqarsimavoq ukununnga:

Aningaasaqarnermut Pisortaqarfik
Akileraartarnermut Pisortaqarfik
Inuussutissarsiornermut Pisortaqarfik
Kulturimut, Ilinniartitaanermut, Ilisimatusarnermut Ilageeqarnermullu Pisortaqarfik
Brancheskole-it
KNAPK
KANUKOKA
SIK
Kalaallit Nunaanni sulisitsisut peqatigiiffiat
NUSUKA
ILIK
AK
Piginnaasat ineriartortinnissaat pillugu siunnersuisoqatigiit Peqqissaanermik Ilinniarfik

Akileraartarnermut Pisortaqarfimmit aamma Peqqissaanermut Ilinniarfimmit tusarniaanermi akissutisisoqarpoq, siunnersuusiornermi ilanngunneqartunik.

Tamatumalu saniatigut tusarniaanermi Inuussutissarsiornermut Pisortaqarfimmit, GA-mit, Inuussutissarsiornermut Ilinniarfinnit, Piginnaasat ineriartortinnissaat pillugu siunnersuisoqatigiinnillu akissutisisoqarpoq, akissutillu ilaannakuusumik peqqussutissatut siunnersuummi atorneqarput.

Aamma AK-miit tusarniaanermi akissutinik tigusaqartoqarpoq, pikkorisaanerni tapiiffigineqarsinnaasuni angujumaneqartut killeqarpallaartut, arlariinnillu ilinniagaqarsimasut periarfissaat killilersorneqartoq, naak taakkua maanna atorfigisaminni pikkorissaqqinnissamik pisariaqartitsisinnaagaluartut, soorluttaaq Kattuffiup sinniisut pikkorissartinneqartarnerannut tapiissuteqarsinnaaneq isumaqatiginngikkaa. Tunngavilersuummut siullermut atatillugu oqaatigineqassaaq tapiissuteqarfigineqarsinnaasut inuussutissarsiutinut ilinniartitaanernut sammititaanerat pissusissamisoortoq, pineqartut tassaammata inuussutissarsiutinut ilinniartitaanerit, soorluttaaq sulinermik inuutissarsiuteqartut allat, soorlu ilinniagartuut il.il. allatulli annertutigisumik inuussutissarsiutinut ilinniartitaanermi pikkorissartinneqarnissaat pisariaqartinneqanngitsoq, aammalu pineqartut annertusaavigineqassagaluarpata suliassaqarfimmi aningaasaliissutaasartunut sanilliullugu tapiissuteqarsinnaaneq nalikillivallaassasoq. Sinniisunik pikkorissartitsisarnernut tapiissuteqarsinnaanermut periarfissaqartitsineq isiginiarneqassaaq pisortat pikkorissartinneqarneranni tapiissuteqarsinnaanermut sanilliullugu, soorluttaaq suli aalajangiisuusoq pikkorissarnerit pineqartut suliffeqarnermut atatillugu piginnaanngorsaasuunerat, aammalu tapiissuteqarsinnaanermut apeqqut pikkorissaanissap qulequtaanit aalajangerneqarani pikkorissaanerup imarisaanit aalajangerneqartassasoq.

Kulturimut, Ilinniartitaanermut, Ilisimatusarnermut Ilageeqarnermullu Pisortaqarfik nalunaarpoq paasiuminaatinneqartoq pikkorissaanermi neqerooruteqarsinnaasut Inuussutissarsiornermi ilinniarfinnut killilerneqarmata, siunnersuutigineqarporlu pikkorissaanernik neqerooruteqarsinnaasut siammasinnerulersinneqassasut. Tassungalu oqaatigineqassaaq siunnersuummi siunertarineqarpiartoq pikkorissaanernik neqeroorutigineqarsinnaasut amerlinissaat, pikkorissaanerit Inuussutissarsiutinut Ilinniarfinnit neqeroorutigineqariinngikkaangata.

Kiisalu tusarniaanermi akissutinik KANUKOKA-mit tigusaqartoqarpoq, siunnersuummut tapersiinerminik nalunaaruteqartumut, soorluttaaq KNAPK aamma ILIK siunnersuutaasunut oqaaseqaateqanngitsut.

 

Peqqussutissatut siunnersuutip immikkoortuinut oqaaseqaatit

§ 1-imut

Nr. 1-imut

Allannguutissatut siunnersuutaasut siunertaqarput tapiissuteqarsinnaanerup nalilerneqarnerani inuussutissarsiornermi ilinniartitaanerit suliassaqarfiini pikkorissaasinnaanerit siammasinnerusumik nalilersorneqartarnissaannik. Inuussutissarsiutinut ilinniagaqartarneq inuussutissarsiornermi piginnaanernik pilersitsisarpoq, inuussutissarsiulernissamut piareersaataasunik. Taamaattumik aalajangiisuuvoq pikkorissaanerit peqataasut inuussutissarsiornermi piginnaaneqarnerulernissaanik pilersitiffiusarmata, suliffeqarnermi pisariaqartinneqartunut naapertuuttunik, aammalu peqataasut piginnaanngorsarneqassasut suliffeqarnermi atorsinnaasaannik, taamaalillutillu peqataasut suliffeqarnermi piumasarineqartunut unammillersinnaasumik inissisimalersillugit.

Nr. 2-mut

Allannguutissatut siunnersuut aaqqissuussinermut tunngavoq, allannguummillu nr. 1-imik tunngaveqarluni.

Nr. 3-mut

Nr. 1-itut.

Nr. 4-mut

Allannguutissatut siunnersuuteqarneq pissuteqarpoq suliassaqarfiit 15. april 2006-imi allannguuteqartinnneqarnerannik, taamalu inuussutissarsiutinut ilinniartitaanerit nuunneqarlutik, Inuussutissarsiornermut, Suliffeqarnermut Inuussutissarsiutinullu ilinniartitaanernut Naalakkersuisoqarfimmut. Inuussutissarsiutinut ilinniartitaanerup immikkoortillugu uani pineqarneratigut siunissami suliassaqarfinnik allannguisinnaaneq sillimaffigineqareerpoq.

Nr. 5-imut

Normu 4-mitulli.

Nr. 6-imut

Allannguutissatut siunnersuummi tunngavigineqarpoq kissaatigineqarmat ersarissaanissaq, akuersissuteqartarnermik pisussaaffiliinermi ilinniartitaanermut pilersaarut tamarmi pineqartoq, ilinniagassat assigiinngitsut tamaasa eqqarsaatigalugit, ilinniakkanillu nutaanik aallartitsisinnaanermi akuersisarneq kisiat pineqarani. Allannguinissamik siunnersuutit isigineqassapput ilinniagaqarnermik aaqqissuussinerit atuarnerup fag-iinik tunngaveqartut, ilinniartitaanermi pilersaarutini ilinniagaasussami immikkuualuttut ataatsimoortutut katitsigaasarneri pineqarmata. Aalajangersagaq isumaqarpoq ilinniartitaanermi pilersaarutit Inuussutissarsiornermi ilinniartitaanermut Pisortaqarfimmit akuerineqartussaasut.

Nr. 7-imut

Nr. 6-imi allannguinerit kingunerisaannik iluarsiineruvoq, § 22-mi atuuttumi aalajangersakkat siunissami ilinniartitaanermut pilersaarummut ilaatinnneqartussaammata.

Nr. 8-mut

Allannguutissatut siunnersuut tunngaveqarpoq ersarissaanissamik kissaateqarnermik, naak ilinniagaqartoq isumaqatigiissutaasut naapertorlugit sungiusaammik sulinermini akissarsiaqartinneqartussaagaluartoq, ilinniagaqartoq suli periarfissaqartinneqassasoq immikkut tapiissutit ilinniagaqarnersiuteqarnermi malittarisassat naapertorlugit pissarsiaqarsinnaanermut. Tamanna isumaqarpoq, ilinniagaqartoq suli angalanissamut akiliunneqarsinnaasoq, kisiannili ilinniagaqarnersiutinuunngitsoq.

Imm. 2.-mi ersarissarneqarpoq ilinniagaqarnersiuteqarnermut malittarisassat ilinniagaqartup ilinniarfimmi atuarnerani aamma atuuttut. Tamatuma kingunerisaanik ilinniagaqartoq aamma pissutissaqarpat ilinniagaqarnersiuteqarsinnaatitaavoq, sungiusaammik sulineq ilinniagaqarfimmi ingerlanneqarpat.

Nr. 9-mut

Nr. 1-imisulli.

Nr. 10-mut

Aalajangersakkap kingunerisaanik pikkorissarnernut assigiinngitsunut assigiinngitsunik tapiissuteqartoqarsinnaalissaaq. Ersarinnerusumillu aalajangersaanissaq nalunaarut aqqutigalugu isumagineqassasoq naatsorsuutigineqarpoq.

Tapiissuteqartarnermi siunnerfiusut tassaapput suliffeqarnermi suliamik ilinniagaqartut aamma suliamik ilinniagaqannngitsut, soorluttaaq inuussutissarsiutit ilaanni siuarsarniarneqartuni, maannakkutut angalanernut najugaqarnernullu aningaasartuutinut tapiissuteqartoqarsinnaasoq, inuussutissarsiuteqartut minnerusut pikkorissarnernut peqataasarnerinut.

Pingaarnertut pineqarput nunalerinermi, aalisarnermi piniarnermilu inuussutissarsiuteqartut. Siunnersuutigineqarpoq suliamik ilinniagaqarsimanngitsunut ilinniagaqarsimasunullu pikkorissaanerit, tassunga aamma ilanngullugit suliffissaaleqisunut, saaffiginnittuussasut annerpaamik suliamik ilinniagaqarsimasutut inuussutissarsiutinut ilinniartitaanerit iluanni ilinniarsimasunut. Tamanna tunngaveqarpoq, nalinginnaasumik oqaaseqaatini nalunaarneqareersutut, inuussutissarsiortut tassani pineqartut suliffeqarnermi piumasarineqartunik naammassinninniarnerminni immikkut pisariaqartitsisuummata, soorluttaaq naatsorsuutigineqartoq inuussutissarsiortut allat qaffasinnerusumik ilinniagaqarsimasut aningaasaliissutit allat atorlugit isumagineqassasut. Tassungalu atatillugu suliamik ilinniagaqarsimasunut ilinniagaqarsimanngitsunullu pisortatut ingerlatsinnermi pikkorissaanernut tapiissuteqartoqarsinnaanera periarfissaqarpoq, aammalu sinniisunik pikkorissaanernut tapiisoqarsinnaasoq.

Namminersortunut pisortanullu tunngatillugu siunnersuutigineqarpoq, taakkua annerpaamik ingerlaqqiffiusumik naatsumik ilinniagaqarsimasuussasut, inuussutissarsiutinut ilinniartitaanerit iluanni, tamannalu imatut paasineqassalluni ilinniartitaanerit aqqutigalugit pikkorissarnertigut ingerlaqqiffiusumik piukkunnarsarsimanertut. Pikkorissarnernut tapiiffigineqarsinnaasunut piumasaqaatit ersarinnerusut, tassunga ilanngullugit pikkorissarnerit sivisussusiat, tapiissuteqarsinnaanermut piumasaqaatit, tapiissutit tunniuneqartarnerat, tapiissutit annertussusissaat ilaatut ilanngullugit maannatut nalunaarummi aalajangersakkat aqqutigalugit malittarisassiuunneqassapput.

Naatsorsuutigineqarporlu tassunga atatillugu nalunaarut aqqutigalugu maleruagassiortoqassasoq, pikkorissaanerit piginnaanngorsaanermik siunertaqartut pingaartinneqarnissaanik, tassungalu ilanngullugit ilinniaqqinnerit, soorluttaaq periarfissaqartitsisoqassasoq inuttut ineriartorneq aqqutigalugu piginnaanngorsarnerit ingerlanneqartarnerannut, tamanna nalilerneqarpat fag-itigut ineriartornissamut aalajangiisuusumik pingaaruteqartoq. Pikkorissaanerit taakkua tunngaviusumik inuit ataasiakkaat ineriartornissaannut pilersaarutinik suliffissaaleqisunut sammititaasunik tunngaveqarnissaat naatsorsuutigineqarpoq, imaluunniit modul-ikkaartumik piginnaanngorsaaqqiinerup ilaatut aaqqissuussaassallutik.

Taamaallaallu tapiissuteqartoqarsinnaasassaaq aningaasanut inatsimmi aningaasaliissutaasimasut iluanni.

Aalajangersakkap imm. 2-a malinnaatitsilluni naqqiineruvoq, imm. 3-mi aalajangersakkap qasuterneqarneratigut.

Aalajangersakkalli immikkoortuani 3-mi siunnersuutigineqarpoq periarfissamik ikkussisoqassasoq, suliassaqarfimmi pikkorissaanermik ingerlataqartartut allat neqeroorutigisartagaannut tapiissuteqarsinnaanermik. Taakkua tassaasinnaapput pikkorissaanerit Piareersarfinnit ingerlanneqartut, imaluunnit pikkorissaasartunit namminersortunit. Kingulliit taaneqartut eqqarsaatigalugit pikkorissaanerit tassaasinnaapput assiliartalersuisartunut imaluunniit qarasaasialerinermut attuumassuteqartunut imaluunniit motorinut ilisimasaqarnerulernissamik pikkorissaanerit, il.il.. Naatsorsuutigineqarpoq ammaassinerup kingunerissagaa piumassuseqarnerulerneq ineriartornerlu inuussutissarsiutinut ilinniartitaanerup suliassaqarfiini pikkorissarnerit eqqarsaatigalugit, taamaaliornikkut pikkorissarnerit pisariaqartitsinermik aallaaveqarnerulissammata.

Kiisalu imm. 4-mi siunnersuutigineqarpoq taamaallaat tapiissuteqartoqarsinnaasoq qinnuteqaammik nassiussaqarsimanermik tunngaveqartumik. Aammattaaq taamaallaat tapiissuteqartoqarsinnaavoq pikkorissaanernut qinnuteqarneq tunngavigalugu tapiiffigineqarnissamik pikkorissaanissaq sioqqullugu neriorsorneqareersimasunut, taamaalillunilu "pikkorissaareersimalluni" qinnuteqarnerit aningaasaliiffigineqarsinnaanatik. Kingulleq tunngaveqarpoq naatsorsuutigisariaqarmat pikkorissaaneq ingerlannerareersimappat, tapiissutitaqanngitsumik ingerlanneqarsinnaasutut naatsorsuutigineqarsimassasoq.

Nr. 11-mut

Siunnersuutigineqarpoq ersarissumik pisinnaatitsisoqassasoq qinnuteqarnermi immersugassanik aalajangersimasunik atuisussaatitaanermut assersuutigalugu tapiissutinik qinnuteqarnermi. Immersugassami isumannaarneqassaaq qinnuteqartut paasissutissat tamakkerlugit nassiuttassagaat qinnuteqaatip nalilersorneqarnissaani atorfissaqartinneqartut, nalilersuisoqarsinnaaqqullugu pikkorissaaniarnermut pineqartumut tapiissuteqarnissamut pissutissaqartoqarnersoq.

Tamatumalu saniatigut siunnersuutigineqarpoq ersarissumik pisinnaatitsisoqassasoq tapiissutigineqarsinnaasut angissutsit maleruagassaqartinneqarnissaannut, Inuussutissarsiutinut Ilinniartitaanermut Pisortaqarfimmit aalajangersarneqartunik, taamaalillunilu najugaqarnermi aningaasartuutinut assersuutigalugu ullormut aalajangersimasumik aningaasartalikkamik tapiissuteqartoqarsinnaanngorlugu.

§ 2-mut

Siunnersuutigineqarpoq Inatsisartut peqqussutaat 1. januar 2008 atortuulersinneqassasoq.