12. marsi 2008

UPA 2008/17

 

Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaata nr. 2, 31. maj 1999-imeersup allanngortinneqarnera pillugu Inatsisartut peqqussutaatissaattut siunnersuut

pillugu

allannguutissatut siunnersuut

Pingajussaaneerlugu suliarinninnissamut Inatsisartut Inuussutissarsiornermut Ataatsimiititaliaata ilaasortaanit saqqummiunneqartoq: Jonathan Motzfeldt (Siumut), Ole Thorleifsen (Siumut), Esmar Bergstrøm (Inuit Ataqatigiit), Jens B. Frederiksen (Demokraatit), Thomas Kristensen (Atassut).

§ 1-imut

1. Nr. 10-mi § 47, imm. 3 immikkoortoq nutaatut ilanngunneqassaaq:
"Imm. 4. Sulisut sinniisaasa pikkorissartinneqarnerinut imaluunniit taakkunani peqataanermut tapiissutinik tunniussisoqarsinnaanngilaq."

Imm. 4 taassuma kingorna imm. 5-inngussaaq.

 

Allannguutissatut siunnersuummut nassuiaatit

Nalinginnaasumik nassuiaatit

Peqqussutissatut siunnersuummik aappassaaneerlugu suliarinninnermi Inatsisartut allannguutissatut siunnersuummik akuersissutiginnipput, inuussutissarsiutinut ilinniartitaanermut tunngasuni pikkorissarnernut tunngatillugu taamaallaat tapiissuteqartoqarsinnaasoq tassuuna erseqqissarneqarluni. Inuussutissarsiutinut aalajangersimasunut imaluunniit inuussutissarsiorneq ataatsimut isigalugu pikkorissarnernut/pikkorissarnerni peqataanernut piginnaasanik qaffassaataasunut taamaallaat tapiisoqarsinnaanerata qulakkeerneqarnissaa siunertaavoq.

Allannguutissatut siunnersuummi matumani erseqqissarneqarpoq – tamatumunnga naapertuuttumik – sulisut sinniisaasa pikkorissartinneqarnerinut imaluunniit taakkunani peqataanermut tapiissutinik tunniussisoqarsinnaanngitsoq.

Allannguutissatut siunnersuut pisortanut aningaasatigut allaffissornikkulluunniit kinguneqassanngilaq, innuttaasunullu inuussutissarsiornermulluunniit aamma allaffissornikkut kinguneqassanani.

 

Allannguutissatut siunnersuummi aalajangersakkanut ataasiakkaanut nassuiaatit

Nr. 1-imut

Sulisut sinniisaasa pikkorissartinneqarnerinut imaluunniit taakkunani peqataanermut tapiissutinik tunniussisoqarsinnaanngitsoq allannguutissatut siunnersuutikkut erseqqissarneqarpoq. Tamanna brancheskolenit pikkorissarnissamut aammalu pikkorissarnissanut allanit neqeroorutigineqartunut assigiimmik atuuttussaavoq.

Aningaasaqarnermut inatsimmi konto 62.02.03, Pikkorissartitsineq, missingersuutinut ilanngussat Inatsisartut Aningaasaqarnermut Ataatsimiititaliaannut qinnuteqaammik Naalakkersuisut nassiussineranni tamatumunnga naapertuuttumik iluarsiniarneqartariaqarpoq.