1. marts 2008

UPA 2008/17

 

Uunga

allannguutissatut siunnersuut

Siunnersuut: Inuussutissarsiutinut ilinniartitaanerit inuussutissarsiutinullu pikkorissartitsisarnerit pillugit Inatsisartut peqqussutaata nr. 2-p, 31. maj 1999-imeersup allanngortinneqarneranik Inatsisartut peqqussutaat

Inatsisartut Inuussutissarsiornermut Ataatsimiititaliaannit appassaaneerinissamut saqqummiunneqartoq.

§ 1-imut

1. Nr. 10-mi § 47, imm. 3 imatut oqaasertalerneqassaaq:
"Imm. 3. Taamaattoq imm. 2-mi taamatut allassimasoqaraluartoq inuussutissarsiutinut ilinniartitaanermut tunngasuni pikkorissarnernut tapiissuteqartoqarsinnaavoq, pikkorissaasartut allat neqeroorutaannut, pikkorissaanernik assingusunik inuussutissarsiutinut ilinniarfinnit neqerooruteqartoqanngippat. Tamatumalu saniatigut inuit ataasiakkaat pikkorissarnernut peqataanissaannut tapiissuteqartoqarsinnaavoq, inuussutissarsiutinut ilinniartitaanermut tunngasuni pikkorissarnernut inuussutissarsiutinut ilinniarfinnit neqeroorutigineqangitsunut."

 

Allannguutissatut siunnersuummut nassuiaatit

Nalinginnaasumik nassuiaatit

§ 47, imm. 1-ip oqaasertassaatut siunnersuutigineqartumut naapertuuttumik inuussutissarsiutinut ilinniartitaanermut tunngasuni pikkorissartitsinernut kisimi tapiissuteqartoqarsinnaasoq allannguutissatut siunnersuutikkut erseqqissarneqarpoq.

Erseqqissaaneq tamanna Naalakkersuisut siunnersuuteqarnerminni (aamma tak. § 47, imm. 1-ip oqaasertassaatut siunnersuutigineqartoq) siunertarisaannut naapertuulluinnartutut isigineqarpoq, taamaalillunilu allannguutissatut siunnersuut pisortanut, inuussutissarsiutinik ingerlatsisunut innuttaasunulluunniit aningaasaqarnikkut allaffissornikkullu kinguneqassanngilaq.

Allannguutissatut siunnersuummi aalajangersakkanut ataasiakkaanut nassuiaatit

Nr. 1-imut

Inuussutissarsiutinut ilinniartitaanermut tunngasuni pikkorissartitsinernut kisimi tapiissuteqartoqarsinnaasoq allannguutissatut siunnersuuteqarnikkut erseqqissarneqarpoq. Pikkorissartitsinerit nunatsinni qitiusumik ilinniarfiit saniatigut allanit neqeroorutigineqartut tapiiffigineqassagunik inuussutissarsiutinut attuumassuteqartussaanerat tamatumani killiliissutigineqarpoq. Allatut oqaatigalugu inuussutissarsiutinut aalajangersimasunut inuussutissarsiutinilluunniit ingerlataqartunut pikkorissartitsinerit piginnaanngorsaataassapput.