Kommunit inuussutissarsiutini il.il. aningaasaliinermikkut inuussutissarsiutinik ineriartortitseqataanissaminnut periarfissaat pillugit Inatsisartut inatsisaat naapertorlugu inuussutissarsiutini aningaasaliinissami kommunit Unammillersinnaanermik nakkutilliisoqarfimmut saqqummiusseqqaartussaatitaanerannik pisussaatinneqarnerat pillugu Namminersornerullutik Oqartussat nalunaarutaat nr. 19, 27. juni 2008-imeersoq
Unammilleqatigiinneq pillugu inatsisartut inatsisaat nr. 16, 19. november 2008-imeersumi § 13, imm. 2 malillugu aamma Unammilleqatigiinnermut Ataatsimiititaliamiit oqaaseqaateqarneratigut aalajangersarneqarpoq:
§ 1. Kommunit inuussutissarsiutini il.il. aningaasaliinermikkut inuussutissarsiutinik ineriartortitseqataanissaminnut periarfissaat pillugit Inatsisartut inatsisaat naapertorlugu kommunit inuussutissarsiutini aningaasaliinissamut pilersaaruteqartut, aningaasaliinissamut pilersaarut kommunalbestyrelsimit akuerineqarnissaa sioqqullugu aningaasaliinissamut pilersaarut kommunalbestyrelsinit Unammilleqatigiinnermut Nakkutilliisoqarfimmut saqqummiunneqassaaq.
Imm. 2. Nakkutilliinermi ilisimalikkaminnik unammilleqatigiinnermik equtitsisumik tapiissuteqartoqanngitsoq pillugu sioqqutsisumik neriorsuuteqarluni Unammilleqatigiinnermut Nakkutilliisoqarfik nalunaaruteqarsinnaavoq.
Imm. 3. Pisuni Unammilleqatigiinnermut Nakkutilliisoqarfimmut ilisimatitsissutigineqartuni unammilleqatigiinneq pillugu inatsisartut inatsisaat § 12, imm. 2 malillugu unammilleqatigiinnermik equtitsisoqartoq Unammilleqatigiinnermut Nakkutilliisoqarfimmit paasineqarpat sioqqutsisumik neriorsuuteqarnissamik itigartitsinissamik Unammilleqatigiinnermut Nakkutilliisoqarfik nalunaaruteqarsinnaavoq.
Imm. 4. Sioqqutsisumik neriorsuuteqarnissamik itigartitsinissamik Unammilleqatigiinnermut Nakkutilliisoqarfiup aalajangiinera kommunalbestyrelsimut kiisalu nakkutilliisoqarfimmut nalunaarutigineqassaaq. Kommunit inuussutissarsiutini il.il. aningaasaliinermikkut inuussutissarsiutinik ineriartortitseqataanissaminnut periarfissaat pillugit Inatsisartut inatsisaat malillugu Nakkutilliisoqarfik aningaasaliisoqassanersoq aalajangissaaq.
Imm. 5. Inuussutissarsiutinut aningaasaliinerni Naalakkersuisunit akuerineqartussani, kommunit inuussutissarsiutini il.il. aningaasaliinermikkut inuussutissarsiutinik ineriartortitseqataanissaminnut periarfissaat pillugit inatsisartut inatsisaat naapertorlugu, Unammilleqatigiinnermut Nakkutilliisoqarfiup sioqqutsisumik neriorsuummik nalunaarutaa Naalakkersuisut suliarinninnissaannut ilanngunneqassaaq.§ 2. Aningaasaliinissamut pilersaarummik saqqummiussineq Unammilleqatigiinnermut Nakkutilliisoqarfimmut tunniunneqassaaq.
§ 3. Aningaasaliinissamut pilersaarummik saqqummiussineq paasissutissanik allagaatinillu immersugassiami K2-mi allanneqarsimasunik imaqassaaq. Immersugassiaq K2-mut allagaatit ilaatinneqartut assilineqarneri ilanngunneqassapput.
Imm. 2. Noqqaassuteqartoqarneratigut immersugassiami K2-mi allanneqarsimasunik paasissutissanik allagaatinillu tunniussisussaatitaanermut peqataannginnissaq Unammilleqatigiinnermut Nakkutilliisoqarfimmit akuerineqarsinnaavoq, suliap misissuiffiginissaanut taakku pisariaqanngitsutut Unammilleqatigiinnermut Nakkutilliisoqarfimmit nalilerneqarpata.
Imm. 3. Tigusinerup kingorna kingusinnerpaamik ulluinnaat qulinganni Unammilleqatigiinnermut Nakkutilliisoqarfimmit saqqummiussinerup tiguneqarnera uppernarsarneqassaaq.
Imm. 4. Saqqummiunneqartuni imaluunniit allagaatini ilanngunneqartuni paasissutissat amigartut Unammilleqatigiinnermut Nakkutilliisoqarfimmit paasineqarpata tamanna pillugu kommunimi oqartussat allakkatigut imaluunniit qarasaasiakkut Unammilleqatigiinnermut Nakkutilliisoqarfimmit ilisimatinneqassapput paasissutissanullu ilassutissaqarnermut naleqquttumik piffissamik aalajangiilluni.
Imm. 5. Kommunalbestyrelsi, sioqqutsisumik neriorsuummik nalunaaruteqarnissaq sioqqullugu, saqqummiussinermi allanneqarsimasuni pissutsini annertuumik allannguisoqarnera pillugu, kommunalbestyrelsillu ilisimasaanik imaluunniit ilisimasariaqagaanik, kaammattorneqarnani ingerlaannartumillu Unammilleqatigiinnermut Nakkutilliisoqarfimmut nalunaaruteqassaaq.§ 4. Kommunalbestyrelsip tamakkiisumik saqqummiussinerata kingorna kingusinnerpaamik sapaatit akunneri arfineq pingasut kingorna sioqqutsisumik neriorsuummik nalunaaruteqarnissaq pillugu Unammilleqatigiinnermut Nakkutilliisoqarfik aalajangiissaaq, § 3, imm. 1 aamma imm. 4 naap.
Imm. 2. Immikkut ittumik pisoqartillugu piffissaliussaq taanna Unammilleqatigiinnermut Nakkutilliisoqarfimmit sivitsorneqarsinnaavoq.§ 5. Unammilleqatigiinnermut Nakkutilliisoqarfimmiit sioqqutsisumik neriorsuut kiisalu itigartitsissut nalunaarutigineqartoq, § 1, imm. 2 aamma 3 naap., tamanut saqqummiunneqassaaq, unammilleqatigiinneq pillugu inatsisartut inatsisaat § 15, imm. 2 naap.
Imm. 2. Sioqqutsisumik neriorsuummik aamma itigartitsinermik nalunaaruteqarnerup tamanut saqqummiunneqarnera Unammilleqatigiinnermut Nakkutilliisoqarfiup nittartagaatigut pissaaq.§ 6. Nalunaarut una 1. juli 2008-mi atulissaaq.
Namminersornerullutik Oqartussat, ulloq 27. juni 2008
Siverth K. Heilmann/
Bent A. Sørensen